Zonger Frank prees coach Janssen zich waal gelukkig dat hae un beroep koosj doon op de van un blessure hersjtelde Randy Wanten, dae bie ut

Transcriptie

1 Sjpectaculaire euverwinning De Sjter 1; Maarten Neuhaus scoort 4x! De Sjter 2 klop DVO in geweldig duel; Medailles veur auwt-de Sjter-sjpeler op winjtersjpele! Qua resultaten woar ut un lekker weekendje veur os clubke. Op zoaterdigoavend nome de veteranen drie punte mi toet Born via un 1-3 euverwinning. En op zondig woar de puntenoogst auch prima. Ut driede verloor weliswoar de derby taege koplouper Havantia 2, mer es d r in die klasse toch emes kampioen mot waere, dan toch maar ozze sympathieke buren oet Maes. Gelukkig wisten beide selectieteams op ut eigen Hetjen de volle buit te hoale. Ut tweede leverde un topprestatie door mit unne man minder unne 0-2 achtersjtandj taege DVO 2 om te buige in un 4-3 euverwinning. En os eesjte elftal tot sjlot leet helemoal niks heel van de gasten oet Eijsden. Noa un hauf oer sjpele sjting d r al 4-2 op de borden en noa 90 minute eindigde ut sjpektakel in maar leifs 8-2. Auch naeve ut voetbaldveldj woar d r genog te belaeve. Weliswaar sjpeelden nog neit al ozze seniorenteams dit weekend, wodoor sommige teams auch qua randjgebeure get onger de radar bleve, maar gelukkig zeen d r nog de neudige vasteloaves-foto s te deile mit uch én... de veteranen sjpeelden waer ens en dus waer quotes en sjieke verhoale te euver in dit versjlaag. Loate veer maar sjnel beginne dus. En dat doon veer dees waek mit os tweede elftal. Dat moosj aantraeje taege ut ummer lestige DVO. Un ploug die zich de aafgeloupe joare haet ontpop tot unne woare angstgegner veur os tweede. De veurbereiding op dat duel woar echter prima. De mannen van coach Jean Janssen houwe veur de vasteloavend nog twee oefenwedsjtrieje aafgewirk taege eesjte elftalle en houwe beide duels gewonne. Veierde klasser FC Maasgouw woort mit 2-0 versjlage en 5 e klasser SVA mit maar leifs 0-6. Bovendien haet mit name Frank Haenraets zich dermate goud gepresenteerd de eesjte sezoenshelf dat hae inmiddels vaste kracht is bie de selectie van os eesjte elftal. Un klasse prestatie van Frank en leuk veur de vaste supporters. Unne echte Sjteinder jong, dae ummer goud is veur 100% inzet en dae auch boete ut veldj unne goeie gast is, gunse ut natuurlijk ummer net get meer. Frank zelf koosj tiedes de vasteloavend zien gevuiles euver zien eige prestaties neit verberge want hae leek waal 10 centimaeter gegruijd of de mam houw zien pekske geweun get te heit gewesje

2 Zonger Frank prees coach Janssen zich waal gelukkig dat hae un beroep koosj doon op de van un blessure hersjtelde Randy Wanten, dae bie ut vasteloavend viere in Köln gelukkig waer zien ouwe Milfhunter -vibe haet terugkgevonje:

3 Os tweede elftal deig veur de bank waer un beroep op un drietal talentvolle A-jeugdsjpelers en sjtartte in achterhoede mit ut kwartet eins-zwei-drei-vier-saufen : Kis: Bastiaan Achter: Frusj, Joep N., Jari en Kenny. Midden: Cyrill, Randy en Luc Veurin: Hoessein, Erik en Tarik. Bank: Steve, Luca, Joep H. en Anass Vlag : Erhan De Sjter begoosj goud aan de wedsjtried en lag sjoon en verzurg voetbal op de mat. Dat resulteerde in un aantal goei kansen, wovan unne sjeut op de lat van Erik het kortste bie unne treffer koom. Noa un aantal merkwaardige besjlissinge van sjeidsrechter Mazzei op riej, begoosj echter de frustratie langzaam maar zeker in de ploug te sjlupe. Unne lange bal van DVO op hunne boetesjpel sjtoande sjpits koom aan, Erhan vlagde, maar de sjeids leet m sjtoan. Gelukkig wis de pielsjnelle Kenny ut gaat nog toe te loupe, maar in ut duel dat doanoa ontsjting woort Kenny omgetrokke. Gelukkig floot de sjeids noe waal en goof vrieje trap veur DVO net boete de 16. DVO houw tot dat moment nog niks gecreëerd maar kreeg noe toch un oetgelaeze kans om te scoren. Unne DVO sjpeler nestelt zich in de Sjter-moer, duujt vervolges Kenny opzicht om, Kenny vilt op ziene boek en krig ligkend op de grondj de bal taege zien handj gesjoate. Penantie, Bastiaan kansloos en 0-1 veur DVO. De Sjter natuurlijk flink euver de zeik, leet dat blieke en tja dan krigse natuurlijk helemoal jeder besjlissing taege. Zo houw Tarik al gael gekrege en solliciteerde hae noa un tweede prent. Coach Janssen greep in en wisselde m veur Luca noa un hauf oer sjpele. Un versjtenjige besjlissing van de coach. Want mesjiens zou doamit de rust get terugk kere in de ploug. En warempel krege ozze mannen noa dae wissel auch geliek un goei kans. Hoessein woort deip gesjtuurd en erg opzichtig vasgehaute in ut sjprintduel. Doadoor koosj ziene taegesjtenjer nog mit unne tackle gevoar veurkomme. De man in ut zjwart zoog d r echter gein euvertreding in, loat sjtoan un gael kaart. Die houw hae trouwes waal in petto veur de reclamerende Hoessein. Maar goud, mit unne houp irritatie en al get kaarten op zak, woort de rust bereik. In de rust ginge Joep en coach Jean op un rustige maneier mit de sjeids kalle, dae toegoof dat hae inderdaad waal erg in ut noadeil van De Sjter houw gefloate. Hae beloafde de tweede helf baetersjap en zou waer neutraal goan fluite. In ut kleidlokaal verzekerde de coach zien troepen dat es ze ens de mondj ginge haute en ginge voetballe, dat ze de punten dan gegarandeerd in Sjtein ginge haute. Mit die intentie ging men auch waer ut veldj in. Noa un oer sjpele echter opnuuj taegesjlaag veur os tweede. Hoessein wol unne lege veurzet binneglije maar de keeper woar eerder bie de bal. Hoessein raakte de keeper en kreeg zien tweede gaele kaart gepresenteerd. Men moosj dus mit unne man minder wiejer. De moewe woorte noe opgesjtruip en d r woort geknok veur jedere bal. Desondanks verdubbelde DVO noa 65 minute sjpele de veursjprong door un onvolkomenheid in de

4 defensie. Ut signaal om alles of niks te goan sjpele. Steve koom in de ploug veur Cyrill veur nog get extra aanvallende impulsen en Joep sjoof door noa ut middenveldj, wodoor men ut restant van de wedsjtried in un opsjtelling aafwirkte. Dat houw effect want mit zien eesjte balcontact scoorde Steve al de aansjleitingstreffer: 1-2. Vechten veur jedere maeter en ut leich oet de auge loupe veur elkaar woar ut devies. Dat resulteerde in de 85 e minuut tot unne penantie veur De Sjter. Un goedmakertje. Luc Spaans sjoot koeltjes binne: 2-2 mit unne man minder. Alle zeilen biezette om un punt euver de sjtreep te trekke? Niks d r van. Men rook bloud en drukte door. En in de 87 e minuut scoorde Luc de 3-2 op aangaeve van Steve. DVO zette vervolges eindelijk waer druk veuroet en ze krege geliek un aantal kenskens. En warempel in de 91 e minuut scoorden ze de geliekmaker. Maar de kupkes bie os mannen ginge neit omleeg. Nog eine keer woort d r gaas gegaeve en ging alles op de aanval. In de 94 e minuut kreeg men nog unne corner. Randy sjlingerde de bal veur de goal en doa woar ut clubman-pur-sang Jari Knoops dae bie de eesjte poal de 4-3 binnekupte!!! Noa ut letste fluitsignaal woar de vreugde gigantisch en de mannen van 2 bleve nog veule uurkes noakalle in euforische sjtumming. Un heerlijke euverwinning veur os mannen en un geweldige team-prestatie. Grote klasse! Van os tweede sjakele veer effe kort noa os veterinnen. Die komme in dees versjlage eigenlijk nooit aan bod, omdat ze neit zo gek vaak sjpele en geine vaste reporter hubbe. Gelukkig hele veer echter aan de vasteloavend un foto van diehard Sjter-dames Kiki, Cindy en Mandy euver:

5 En dan nog get wat, vanwaege de vasteloavesdrukte, beheurlijk ongergesjneeuwd dreigde te raken: op de olympische winjtersjpele maakte unne auwt eesjte elftalsjpeler (en ein van mien perseunlijke all time favoriete ploeggenoten) furore door op de 5km un zilveren en op de 10km zelfs un houwe medaaje te hoale. Sjiek dat hae ozze club auch nog effe vermeldde in zien interview noa aafloup.

6 Auch ozze dames houwe aafgeloupe weekend nog niks te voetballe. Al sjrok ich waal effe van de gruijspurt dae de kleine van dames-vedette Jill Janssen en Sjter 1-klasbak Roel Heffels haet doorgemaak. Zuusse wie sjnel dat kent goan tusje september 2017 en fibberwari 2018: Nog effe en dae zit op vriedigoavend auch aan de teek bie Jo van Funs. Tied om waer ens euver voetballe te goan kalle en dus sjakele veer euver noa os eesjte elftal. Dat moosj op zondig thoes aantraeje taege ut dit sezoen matig presterende Eijsden. Ut versjlaag is, zo wie zo vaak, aafkomstig van elftalleider Frans Beaujean, dae aafgeloupe waek euveriges ziene 52 e verjoardaag vierde. Ter gelegenheid van ziene verjoardaag kreeg hae van zien zöster Rozien un sjieke zjwart-wit foto toegesjtuurd van unne jonge Frenske dae un nog jongere Rozien in bad deit:

7 De joarige Frans sjtuurde een relatief kort versjlaag van de wedsjtried van ozze jonges. Dat versjlaag deit ongetwiefeld gein rech aan al ut spectaculaire gebeuren op ut veldj, maar van de angere kantj vele d r zoveul goale datse d r eigenlijk geweun bie houws motte zeen. Coach Maas sjikte de ploug in de volgende opsjtelling de wei in: Kis: Geoffrey Achter: Frank, Davy, Guido en Sjoerd Midden: Stan, Mike en Thijs Veur: Hassan, Maarten en Giel Bank: Timo, Marko, Randy en Bastiaan De weelde op de bank geef waal aan wat un luxe probleem de technische staf op dit moment haet. Frank dankte zien basisplaatsj, naeve zien goeie sjpel, aan un waekske aafwezigheid van Timo (vakantie), dae doadoor op de bank begoosj. Bie taegesjtenjer Eijsden, dat normaliter toch altied goud is veur un sjtevige plek in de middenmoot of subtop, veel veural op dat d r heel get bekende gezichte van veurgoande joare gesjtop of vertrokke woare. De gemiddelde laeftied van Eijsden bedroog 19,5 joar. Taege zonne onervaren taegesjtenjer deig De Sjter ut einige juiste: geliek ut heft in henj numme. Al noa 5 minute sjnelde Hassan de 16 in en woort hae van achtere ongeroet gesjoffeld. Maarten benutte de penantie en zat zien ploug op 1-0. Doanoa kreeg Eijsden al sjnel un goei kans, vanwaege onoplettendheid bie os jonges. Geoffrey wis in eesjte instantie nog te redden maar de rebound woort doa op esnog binnegekup veur de 1-1. Rondj ut hauf oer woort de wedsjtried vervolges al besjlis in Sjteins veurdeil via drie sjnelle goals van un oppermachtig De Sjter. Maarten scoorde de 2-1, Stan kupte de bal in de lange houk van de 3-1 en Giel woar attent op unne gepareerde inzet van Maarten om de 4-1 te scoren. Wedsjtried besjlis dus. Al wis Eijsden vlak veur de rust waal nog de achtersjtandj tot 4-2 te verkleinen. In de rust koom Timo veur Frank in de ploug op rechsachter. De Sjter begoosj opnuuj sjterk en leet un paar zeer mooie aanvalle zeen. Eine doavan woort verzilverd door Maarten, op aangaeve van Stan. 5-2 veursjprong maar men woar nog ummer neit kloar. De gasten woarte van ut kesjke noa de moer gesjik. Randy koom vervolges in de ploug veur Mike. Timo sjoof door noa ut middenveldj en Randy noom zien vertroewde sjtek op rechsachter in en sjpeelde wie vanouds. Bie de gasten leep de frustratie vanwaege de onmacht op en dat leidde tot enkele pittige euvertredinge, die door de prima leidende sjeidsrechter Ploegstra mit gael woorte besjtroaf. Thijs scoorde vervolges nog bezunjer fraai de 6-2 en Hassan tilde de score oet unne penantie noa 7-2. Vlak veur tied leep Maarten nog op sjnelheid door ut centrum haer en versjalkte hae de keeper, wodoor de eindsjtandj op 8-2 koom. De sjriever van dit sjtuk baalde beheurlijk dat hae dit doelpuntenfestijn houw gemis. Al plaatsjte hae auch un kritische kantjteikening bie de prestatie van de taegesjtenjer, mit un verwiezing noa de in Eijsden woonachtige Sjter-diehard-fan Peter Smeets:

8 Op de euverwinning woort nog ens feestelijke getoast in hoeze Jevric wo de ganse selectie woar oetgeneudig veur de kraamvisite. Mit balkan-achtige gastvrieheid en onger ut genot van Montenegrijnse lekkernijen woort de zondig op sjone wieze aafgesjloate, wobie un groot woord van dank mot oetgoan noa de femieje Jevric. Kommende donderdig sjpeelt os eesjte taege Sjpaubaek veur de baeker en op zondig wurt d r wederom thoes gesjpeeld taege Simpelveldj. Komt dat zien, komt dat zien!

9 Van die glansrieke euverwinning van os eesjte elftal sjakele veer door noa os driede elftal. Dat houw unne heusse topwedsjtried op ut programma sjtoan in de vorm van de derby taege koplouper Havantia 2. De veursjpas euver dae wedsjtried woar veuraaf al groot. Zo bereikte mich un ingesjproake geluidsfragment dat ech geweldig woar. Lestig natuurlijk om euver te brenge op papier, maar geer mot uch veursjtelle dat ut woord gebrach wie un wedsjtriedveurbesjouwing op de radio oet de ouw doos. Dus eesj de ut vrolijke deuntje van koning voetbal en doanoa un lekkere krakende, monotome en zakelijke sjtum die de volgende boodsjap brach: Goede avond Nederlanders. Hier volgt een speciaal bericht voor de mensen in gemeente Stein. Morgenmiddag staat de derby tussen Havantia 2 en De Ster 3 op het programma. Om 11 uur wordt er afgetrapt in deze derby op sportpark op den heuvel in Meers. Zorg dat u ruim op tijd bent in verband met verwachte drukte en eventuele ijzel op de weg. Dit voorkomt lange wachtrijen bij de kassa en zodoende kunt u rustig uw plaatsje gaan opzoeken en fijn gaan genieten van een mooie pot voetbal. Hup Havantia! Huphup! Alle veursjpas leverde oeteindelijk gein punten op. Havantia heel via un 5-2 euverwinning de drie punte in eige hoes. Doelpunten van os driede woorte gescoord door Serge en Thijs. Volgende waek waer baeter, mannen. En dan rest os nog maar ein elftal te besjpraeke, namelijk ozze veteranen. Die houwe zich mit de vasteloavend auch goud geammeseierd. Mit in de hoofdrol natuurlijk Poart-prins Roger d n Doam:

10 Maar auch de man mit veurzittersaspiraties, Gerard Martens, leet zich goud gelden: Veteranen keeper Rudy Crutzen meldde zich vlak veur de vasteloavend op de groepsapp mit un bericht euver zien eige trainers-toekomst: Vanzelfsjpraekend sjtruimden doa op de felicitaties binne op de app. Ich hub d r veur uch un paar oetgepik die ut laeze waert zeen. Zo houw Willem Thewissen un waarsjuwing veur Rudy, dae in ut verleje de toenmalige veurzitter van Walram en huidige Miss Sjtein, Christel van Kan, aan de hoak haet gesjlage:

11 Ron Marchal zoog in de carriere move van Rudy un kans om definitief aaf te komme van de man dae zien aafsjeid es veurzitter van de feestcommissie van de veteranen haet aangekondigd, maar dae gaer wult aanblieve es senior advisor van diezelfde commissie. Noa joarelangk dictatoriaal geregeerd te hubbe euver die commissie, wobie jonge, hongerige talenten wie John Jacobs en Jos Driessen zich maar bleve sjtote aan ut door Mat in sjtandj gehaute glazen plafond, zoog Ron noe un oplossing om van m aaf te komme: Auch aaftredend veteranen veurzitter Rene Hillen houw un sjieke felicitatie in petto:

12 En tot sjlot houw Ron auch nog un poëtische gelukwunsj veur Rudy in petto. Ech dames, om uch vingesj bie aaf te lèkke. En es geer doa zelf geine zin in hub, dan lèk Ron ze uch waal aaf. Inmiddels houw jederein Rudy gefeliciteerd. Nou ja, eine nog neit. Maar veer kenne ongetwiefeld binnekort op facebook van zien eega laeze wo dat door kump. Un aantal veteranen lepe doa al op veuroet:

13 Goud nuujts dus veur Rudy, dae ongetwiefeld achter un paar succesvolle joare bie Horn waer terugkkeert om os eige vlaggesjip onger zien hoede te numme. En goud nuujts veur de veteranen omdat Rudy bereid is om te blieve keepen bie de vets. En of dat nog neit genog woar, volgde un paar dag later nog meer goud nuujts van de joarige Willem, dae doaveur oetgebreid door jederein gefeliciteerd en bewierrouk woar: Auch Jos Driessen woar joarig aafgeloupe waek en hae noom de oetgebreide loftuitingen oetermate besjeije in ontvangst: Maar al dat gezeiver op de app is waal leuk en aardig. Grote vroag woar of d r gevoetbald koosj waere door de vets. Want dat woar alwaer un tiedje geleje. Zouwe d r waal genog sjpelers besjikbaar zeen? Un aantal vedetten ontbrook helaas. Rudy moosj unne wedsjtried analyseren veur ziene cursus en auch dreh-und-angelpunkt Steef van de Woude meldde zich aaf:

14 Auch un angere vaste waarde meldde zich aaf. Coach Leon Fredrix zal waal un paar keer flink gevlook hubbe wie hae ut loos en volges Corry is r die nach auch twee keer badend in ut zjweit wakker gewoare. Op de app bewaarde Leon, zo wie ut unne topcoach betaamp, echter de rust: Gelukkig woare d r oeteindelijk toch 16 fitte sjpelers besjikbaar. Luxe dus veur de technische staf Fredrix-Worms. En wat sjiek woar veur Willem Thewissen, fervent veursjtander van same oet-same thoes, woar dat 14 van de 16 sjpelers vanoet De Sjter vertrok noa Born. De sjriever van dit sjtuk woar dae middig auch al opgevalle dat nog nemes houw gemeld dat r rechsjtreeks zou aafreizen noa Born. Wie r dat op de app wol zette, woort hae echter alwaer van rechs ingehoald door rebel without a cause Gerard M.:

15 De meeste veteranen woare sjoon op tied in de kantine aanwezig om nog effe get moud in te drinke veur ut vertrek noa Born. Ron Marchal bleek doa neit gans fit te zeen, want hae sjnoterde get. Ron: Normaal breng ich de ganse daag door in mien zuursjtoftentje. Geisse eine keer mit de vasteloavend op sjtap, en dan wurse waer geconfronteerd mit baccillen van allerlei pluimage. En dan hubse ut geliek plekke. Stefan Janssen koom binnewanjele mit un waffel in de handj. Piele houw dat geliek gesjoate. Piele: En Janssen, loog nog get op sjtroat wat ze oetgesjmete hubbe mit de vasteloavend? De troepen woare bienoa compleet. Zelfs notoire laatkommer Misha Dreessen koom binnewanjele. Willem houw dat al gezeen maar noom toch mit un sjtalen gezicht ut woord. Willem: Jonges, zulle veer geweun goan zonger Misha. Dae is ummer te laat oh, doa is r toch. Paul Janssen kreeg de vroag om nog ens oet eesjte handj te vertelle wie hae unne zate Mark Habets thoes houw gekrege van de mansluujzitting. Willy de Worm begoosj doa namelijk euver en refereerde auch effe aan 10 joar eerder, wie daezelfde Paul unne zate Leon Fredrix van de sjtroat houw opgeraap. Willy: Paultje, wat is dat veur get das doe ummer zate luuj van de waeg deis oprape? In waat veur kringen begeefs doe dich? Hubse probleme? Auch ut aansjtoande veurzittersjap van Gerard koom nog ter sjproake. Piele: Ut eesjte wat dae deit is ut clublokaal verplaatsj van Lies noa de Poart. Ron: Joa, dan kent r wie unne echte heerser van bie heum oet de trap aafdalen en unne grootse entree make. Willem: Joa, onger de klanken van Eye of the Tiger. Aangekomme in Born zoot daezelfde Gerard al netjes in ut kleidlokaal te wachte. Jederein begoosj zich om te kleije, maar allein Willem aarzelfde nog effe. Willem: Ich wach effe mit omkleije jonges. Es ich dalik d r naeve sjtoan dan ben ich weg. Gerard: Daaaag Willem. Ron: Jonges, zet emes Willem effe thoes aaf? Dan weite veer ut tenminste zeker. Stef Conjour koom binne en reep alle veteranen op om bie de gemeinteroadsverkeizinge te sjtumme op zien Resi. Willem ging doa geliek taege in. Stef: Jonges, sjtump geer waal allemoal op uch ouw keuningin? Willem: Doe bes te laat Stef. Ich hub dees sjtumme al allemoal ingepik. Stefan: Veur welke partie deit te mit, Stef? Stef: Steins belang Willem: Sjteit Graad Coumans doa auch nog ummer op de lies? Stef: Gein idee.

16 Piele: Ouw muk, deit dae nog mit? Wie oud is dae waal neit, Willem? Willem: Gein idee. In jeder geval heeeel oud, want dae is al kaal. Stef: Mosse heure wae ut zaet. Willem: Ich ben kaal omdat ich ut d r aaf sjaer. Angesj houw ich de hoare utzelfde es dich. Gerard: Utzelfde es Piele, bedoelse. Willem besjloot Gerard doa op aan te sjpraeke dat hae es aankommend veurzitter waal zien mede besjtuursleje mot sjteune. Willem: Gerard, veer es DB van de veteranen motte elkaar waal sjteune he. Gerard: DB? Willem: Gerard, doe hubs dich hoapelijk toch waal verdeip in os governance model, he? Gerard: Ut watte? Kal normaal, sumpele. Om effe bie te komme van die consternatie sjtook Gerard zich effe un sigaretje op in ut kleidlokaal. Get wo euveriges al lang nemes meer get euver zaet, omdat de reactie veur jederein waal bekend is: Es ut dich neit bevilt dat ich binne rouk, geisse dich maar boete omkleije : Ut verhoal van de wedsjtried is sjnel verteld. De Sjter houw ut meeste balbezit maar koom maar lestig tot scoren. De ban woort oeteindelijk gebroake wie Rob de bal insjpeelde op Stef, doorleep en m via un hakje terugkkreeg en toen vlak veur de keeper breid lag op Misha dae de 0-1 koosj binnesjuve. Born scoorde oet unne counter waal nog de 1-1 maar nog veur de rust scoorde Stef, dae sjoon wegdreijde van ziene taegesjtenjer de 2-1.

17 In de rust woort o.a. Ron Marchal op zien eige verzuik gewisseld. Hae moosj noa ut voetballe van ziene zoon goan kieke. Misha: Ron geisse al? D r is toch gein verkeerd woord gevalle nog? Ron: Ich goan alvas noa ut clubhoes van Born. Dat ligk toch in Roostere langs de doorgoande weg, he? Stef: Kenne veer doa ut drinke sjtraks bie dich loate opsjrieve? Stefan: Doa zegke ze dan vas: ah natuurlijk, onze goldcardhouder. Ron: Jonges, es geer dalik auch komp, dan moag geer geweun miene locker gebroeke. Nummer 1. Wie Ron de deur van ut kleidlokaal achter zich houw toegetrokke, koom nog ter sjproake dat Ron veur unne keer neit in ziene sjieke auto mit nummerplaat RON007 doa woar maar mit ziene bedriefswage. Gerard: Sjiek he. Mit de caddy van zien bedrief. Marc: Joa, net zo wie die telfort reclame. Van RON007 naar een caddy voor de deur. Wie had dat gedacht? De tweede helf woar veural erg duuster en erg kort. Un vroag aan de sjeidsrechter of de lampe mesjiens esteblijf aan koosjte woort beantjwoord mit: Och jonges dat kos veuls te veul geldj. Ich fluit geweun aaf zodra veer niks meer zeen. Heuglijk feit in de tweede helf woar de rentree van Willem Thewissen noa lang blessureleed. Mit twee vingers in de naas bleef hae euvereind. De Sjter breidde de veursjprong nog oet noa 1-3, via Stef dae opnuuj knap wegdreijde en insjoot. Paul Janssen, dae neit koosj sjpele maar waal koosj keepen omdat hae nog te vermuijd woar van ut sjleipe mit Mark Habets, heel in de tweede helf de nul. En zo woort noa 20 minute voetballe aafgefloate, gedouche en nog get noagekald in de kantien. Piele: Ich vonj dich goud Willem. Willem: Voetballe verleerse nooit. Oeteindelijk woort zelfs de driede helf nog euvertugend gewonne, zo loze veer in un appbericht van Willem, dae en passant auch de nuuje bienaam van Paul Janssen vereeuwigde.

18 En dat bringk os alwaer bie ut sjlotakkoord van dit versjlaag. En dat wurt dit keer gewijd aan ozze oudste voetballende leden: de mannen van ut walking football. In dees versjlage hub geer al af en toe get euver dees mannen kenne laeze. Maar auch in de waek dat geer niks lees euver ze, trappen ze troew un belke op de moandigochtend en zitte ze doanoa nog effe gezellig biejein. Aafgeloupe moandig houw dat biejein zitte un get formeler karakter omdat eind van de walking footballers, same mit zien collega-voetballers, wol toasten op ut heuglijke feit dat hae en zien vrouw tot Bok en Geit woare oetgeroupe mit de vasteloavend. Noa de koffie en de vlaai heften de walking footballers un ies- en ieskoud glaeske op deze kanjer. Veer hubbe ut euver unne man dae veur eeuwig verbonje zal blieve aan os clubke. Zelf is r auwt sjpeler en dus op vandaag auch waer actief voetballend bie de walking footballers. Twee joar geleje woar hae zelfs clubkampioen klaverjasse. Al houw dat veural te make mit de krach van ziene klaverjas-kompaan Maar auch ziene zoon, Mark, haet r mit ut Sjter-virus besjmet. Dae lup immers vanaaf zien 6e joar al rondj bie os club es sjpelend lid en de letste joare auch es coach van de leger elftalle en de jeugdteams. En danzij Paul de zaate opraper Janssen kent Mark dat gelukkig auch noa de aafgeloupe vasteloavend blieve doon. En es extra garantie dat deze kanjer os clubke nooit geit losloate voetballe inmiddels auch zien kleinkinjer in de diverse jeugdteams, wobie hae jedere zoaterdig (en auch geregeld op trainingsoavende) greutsj langs de lien sjteit te kieke.

19 Ut geit natuurlijk euver Math Habets. Math, names de ganse vereiniging van harte gefeliciteerd mit dien oetruiping es Bok! Datse nog heel get joare moags blieve rondjloupe op ut Hetjen, es voetballer en es geneitende opa! En boavenal: bedank datse Joep Nacken (getuge ongersjtoande foto) hubs weite euver te hoale om oet te sjeie mit voetballe op 2 en auch aan te sjleite bie ut team wo hae ut allerbeste tot zien rech kump: Pes volgende waek!