De Sjter 1 sjpeelt geliek taege Centrum Boys; Veteranen behoale finale winjtertoernooi Lintjheuvel; Diverse jubilarissen in zönke gezat op receptie

Transcriptie

1 De Sjter 1 sjpeelt geliek taege Centrum Boys; Veteranen behoale finale winjtertoernooi Lintjheuvel; Diverse jubilarissen in zönke gezat op receptie Terwiel de meeste teams nog geneite van deze rustige winterperiode en veural druk zeen mit de veurbereiding op de naderende vasteloavend, moosj os eesjte elftal aafgeloupe zondig al aan de bak veur de competitie. Op os eige Hetjen woar ut Zittesje Centrum Boys de taegesjtenjer. In dit versjlaag vanzelfsjpraekend aandacht veur dae wedsjtried. Maar auch veur angere gebeurtenissen in de aafgeloupe winjterperiode. Zo verdeine de veteranen aandacht veur hun prima prestaties op t winjtertoernooi in Lintjheuvel, wo mit name Stef Conjour zien vuit én angere lichaamsdeile leet sjpraeke. En auch un aantal jubilarissen, die tiedes de nuujjaorsreceptie in t zönke gezat woorte, verdeine ut om nog effe de sjienwerpers op zich gerich te kriege in dit eesjte versjlaag van Doanaeve auch nog get leuke berichten oet de kantine, de kleidlokalen en de diverse groepsapps, die ut waert zeen om te deile mit de ganse vereiniging. Zo zult geer antjwoord kriege op de vroag wat Samantha Vanhouwe mit 5 gesjpierde kaels op de foto deit. En op de vroag wo Marko Jevric zich in december bie Beluga euver beklaagde. Jari Knoops leet in jannewarie dudelijk blieke dat hae de trainingssjtof van Jean Janssen zum kotzen vinjt. Jo van Funs wult gein probleme mit de belastinge op de hallenmasters. Will Leurs ongervingk aan den lieve dat un grote naas auch zien noadeile haet. Enkele veteranen acteren in de prachtige laevende kerst-sjtal in De Poart. En natuurlijk waer de neudige hilariteit oet ut kleidlokaal van de veteranen, mit Ron Marchal es belangriekste quote-kanon. En loate veer al dat gebeure maar in chronologische volgorde behanjele, dan kenne veer eindige mit de wedsjtried van os eesjte elftal. Veer motte gans terugk goan noa ut veurige joar, wo ozze Dames 1 vedette Samantha Vanhouwe op 20 december heure 25 e verjoardaag vierde. En dat deig ze in sjtijl, getuge de einige foto die de censuur euverlaef haet (want wat zich noa ut make van dees foto haet aafgesjpeeld, doa vraete de hunj gein brood van) :

2 Aevenens in december organiseerde os clubke natuurlijk auch waer ut grootste en beste boarding zaalvoetbaltoernooi van de regio. Honderden jeugdsjpelers en senioren koosjten zich, versjpreid euver 8 toernooidaag, aanein maete. Dat leverde prachtige acties binne de liene op. Maar nog veul sjieker om te zeen is dat d r jeder joar waer zoveul vrijwilligers zeen die zich insjpanne om d r un succes van te make. Wat dat betruf verdeine, zonger angeren tekort te wulle doon, Tom Keulen, Stef Conjour, Robert Kraus, Ger Coumans, Jo van Funs en Hein Meijer absoluut un groot compliment. En auch ozze jeugdsjpelers Sem Conjour, Mick Dewaide, Mylano Luijten, Pim Lebens en Stan Wessels, die allemoal bienoa jedere daag aanwezig woare om te fluiten of ut secretariaat te bemannen, motten absoluut genuimp waere. En tot sjlot natuurlijk de onvermuijbare luuj van de wirkploug die alle hubbe opgeboewd en aafgebroake. Klasse jonges! Op dat toernooi is natuurlijk waer unne houp gelache en aangezeen deze reporter op dat moment in de winjtersjtop-sjtandj sjting, is doa weinig van blieve hange. Behalve dan ein goei quote van Jo van Funs, dae get te drinke wol goan hoale veur Jan de Weijer. Jo: Wat wulse drinke Jan? Jan: Unne zjwarte koffie. Jo: Doa kenne veer neit aan beginne, Jan, dan kriege veer probleme mit de belastinge. Unne grote aafwezige tiedes de hallenmasters woar De Sjter 1-sjpits Marko Jevric. Zaalvoetballe is neit zo zien dingk, woort doa euver gefluusterd. Ut bleek echter net get angesj te ligke. Marko houw namelijk un heel goei reje om elders te verblieve: hae woar immers drie joar getrouwd en vierde dat mit un aetentje bie Beluga. Via instagram leet Marko, gedurende ut aete, weite neit zo onger de indruk te zeen van de gerechten:

3 Auch Roy Vanmulken, normaliter ummer van de partie, woar maar weinig in de sjporthal aanwezig eind december. Jari Knoops koom d r echter achter dat Roy zich waarsjienlijk druk aan ut veurbereiden woar op zien DJ-optredes tiedes de dit joar waal heel extreem vruig vallende vasteloavend: Noa de hallenmasters sjting in jannewari alwaer de nuujjoarsreceptie op ut programma. Noadat ozze jonges van 1 de nuuj ploug van auwt coach Ronny Czornyj houwe aafgedreug, woort d r in de kantine un gezellige biejeinkomst van gemaak. Auch Jari Knoops woar van de partie. Dae houw neit mit 1 mitgesjpeeld maar same mit zien ploeggenoten van 2 un rustige training, onger leiding van coach Janssen aafgewirk. Un training die Jari dermate zjwoar woar gevalle dat hae zich un paar keer effe houw motte terugktrekke in de sjtruke om get euvertollige maaginhoud te lozen. En natuurlijk woare d r auch waer de joarlijkse plichtplegingen. Zo woar d r de priesoetreiking van de loaterie, wovan de opbrengst noa ut nuuj te plaatsje scorebord geit. Ein van de prieswinnaars woar De Sjter 2 sjpeler Joep Nacken, dae unne bal won. Dat lokte natuurlijk reactie oet Ron Marchal: Wat mos dich noe mit unne bal? Ich zegk al joare dat ze dich sjus zo weinig muigelijk de bal motte gaeve. Vervolges kreeg dichter des vaderlands Willem Thewissen ut woord om un aantal jubilarissen in ut zönke te zette. Te beginne mit Nonk Thé, dae woort gepreze veur zien

4 joare lange inzet en dae door Willem woort benuimp es de einige man dae zien ganse laeve in precies dezelfde houding haet geloupe. Eesj op ut sjter-terrein achter ut machien om de liene te trekke, en noe de letste joare achter ziene rollator. Maar noe effe zonger flauwekul: zo n luuj zeen natuurlijk goud waert veur un vereiniging en verdeine terecht alle lof en applaus. Es ultieme beloning woort auch nog de nuuj geoapende koffiehouk in de serre vernuimp noa Nonk Thé, wodoor ziene naam veur ummer aan De Sjter verbonje zal blieve. Auch veteranen Misha Dreessen, Eddy Ubbink en Paul Janssen woorte door Willem in ut zönke gezat. Eddy woar neit aanwezig maar de angere twee krege un sjiek gedicht van Willem veurgesjoteld. Utzelfde gold veur Johnny van de sjpin dae zien 50 (!) joarig jubileum bie de club vierde. En last but not least auch Ron Marchal woort gehuldigd veur zien 25 joarig jubileum. En dat leverde natuurlijk de neudige leuke quotes op. Te beginne mit veurziter Raymond dae Ron noa veure reep. Raymond: Dit is de eesjte keer dat ich dich zenuwechtig zeen. Ron: Nae dit is de eesjte keer datse mich mit kleijer aan zuus. Willem goof aan dat hae veur Ron twee versies van ut gedicht houw. Ein veur es Nicol waal d r bie woar en ein veur es ze d r neit bie is. Willem: Ich zeen Nicol neit, dus ich ken de ongecensureerde versie doon. Ron: Wach effe. De sjoonpap is waal hie. Noa ut gedicht deig Willem nog effe oet de duik dat Ron eigenlijk al 50 jaor lid is van de club. Maar dat hae un tiedje tusjedoor weg is gewaes omdat hae toen zo neudig wereldkampioen motorcross moosj waere. Ron vertelde nog un leuke anekdote euver de sjtart van zien lidmaatsjap Ron: Toendertied mochse pas vanaaf 12 joar lid waere van de vereiniging. Ich zeen mich nog aan de deur sjtoan van de toenmalige veurzitter om mich aan te melje. Ich moosj sjpringe om aan de bel te komme. Ich hub toen auch motte leige euver miene laeftied. Get wat ich op Tinder noe nog ummer doon trouwes Noa de receptie ging ut al hel aan op de vasteloavestied. En dus woorte d r auch prinsen oetgeroupe en woare d r her en der zittinge. Unne ideale tied veur vermaarde sjnabbelaere wie DJ Stan Ortmans en DJ Will Leurs. Dae letste heel echter meer es allein unne leuke cent euver aan de prinsoetruiping bie De Grous, zo bleek oet de foto s

5 Of hae noe geweun vol taege un glazen pui woar aangeloupe of dae hae de lengte van zien naas verkeerd houw ingesjat en neit wiet genog d r om bie woar geloupe, bleef in nevelen gehuld. Bie de veteranen maak men zich intusje auch al op veur de joarlijkse vergadering. Un happening die inmiddels dermate veul bekendheid haet gekrege dat de geruchten goan dat ze dit joar veur ut eesj integraal live wurt oetgezonje op Omroep Stein. Dat unicum woar veur aaftredend veteranen veurzitter Rene Hillen reje om un veursjtel te doon om de vergadering te verplaatsje van de gebroekelijke vriedigoavend noa de zondigmiddig. Dat veursjtel woort door aaftredend veurzitter van de feestcommissie Mat Creemers aanleiding om unne aan Rene te sjture (dae mich via Wikileaks bereik haet):

6 Ondanks die prachtige plannen van Mat en Rene, hoalde ut veursjtel ut neit. Via de en de groepsapp woort dudelijk dat vriewel jederein de veurkeur goof aan de vriedigoavend. Op zondig ging men lever vusje, fitse, kieke noa De Sjter 1 of get mit de vrouw doon. Rene reageerde teleurgesjteld op de app. Die letste opmerking woar veur Gerard Martens aanleiding om Rene nog un ploagend berich te sjikke:

7 Un dergelijk fienbesjnoard betoog zeen de veteranen neit gewend van Gerard en dus ginge d r al sjnel geruchten euver wae noe dae eine veurzitterskandidaat woar, dae zich gemeld houw

8 Geer zult de joarvergadering van de veteranen motte aafwachte om antjwoord te kriege op wie dit geit aafloupe. Op ut hoofdkantoor van Omroep Stein vrieve ze zich in jeder geval in de henj want dit wurt must-see-tv veur jedere rechtgeaarde Sjteindenaer. Wat unne rechtgeaarde Sjteindenaer is, zegk geer? Nou, zegk maar ut taegeneuvergesjtelde van dit exemplaar Al woare de dames op de vrouwluujzitting bie De Poart zeer te sjpraeke euver ut optraeje van Steef en zien zusje es K2. Bie ut posten van dit versjlaag zit Steef euveriges veur zien werk in de zandjbak van Abu Dhabi. Hoapelijk bereik dit versjlaag de lokale autoriteiten doa neit

9 Op die dameszitting bie De Poart gove vanzelfsjpraekend auch waer unne hele houp sjpeelsters van os damesteam acte de presence. En auch ein van de veteranen woar doa, in zien gebroekelijke rol es oetsjmieter: Zo, en noe wurt ut tied om ens te goan kalle euver ut voetballe. Want dat begoosj bie de sjriever van dit sjtuk langzaamaan toch waer un bietje te kriebele. Helaas bleek dat sjlechs bie enkele angere veteranen auch ut geval want veur ut joarlijkse hartsjtikke sjieke winjtertoernooi bie Lintjheuvel houwe zich sjlechs 8 man opgegaeve. Precies genog om, zonger technische sjtaf auch, aaf te reizen noa dit 8 taege 8 toernooi. De helden die op dit toernooi hun 2 e plaatsj van 2016 en hun 3 e plaatsj van 2017 ginge probere te verbaetere woare Willem Thewissen (dae geblesseerd en wel es keeper fungeerde), Denny Vorstermans, Ruud van Didden, Gerard Martens, Misha Dreessen, Ron Marchal, Rob Schulpen en Stef Conjour. Auch dit joar moosj men ut kleidlokaal waer deile mit de sjpelers van Heidebloem. Wie bie die ploug de letste sjpelers binnedruppelden, leet Ron heure dat hae neit onger de indruk woar van de Heidebloem-selectie. Ron: En jonges, koosjte die goeie bie uch neit? Misha Dreessen woar zich aan ut omkleije en beklaagde zich d r euver dat hae nog neit gans op wedsjtriedgewich woar. Misha: Ich ben toch get biegekomme dees vakansie, geluif ich. Denny: Joa, 2 ons zeker. Ron: Joa inderdaad. Hae haet zich vas unne tandj loate vulle.

10 Ut team deig ut veurtreffelijk, want in twee wedsjtriedjes van 20 minute woorte eesj Born en doanoa Sweikhuizen aan de kantj gesjoave mit 4-1 en 6-1. Doadoor woar men al geplaatsj veur de finalewedsjtrieje. De letste wedsjtried in de veurrunj taege unne Belsje opponent koosj dus op hauve krach aafgewirk waere. Doa dachten die Belsje echter angesj euver. Want noa 7 minute sjpele houwe ze al 5 euvertredinge gemaak, de sjeidsrechter 6x oetgekafferd en Stef unne sjlaag in zien gezich verkoch. De Sjter besjloot maar versjtenjig te zeen en ut veldj te verloate om ut un bitje gezellig te haute. Die vervruigde pauze goof waal un goei kans om boete, bie ut knapperende vuurtje, onger ut genot van werme drank, ens aanheure woarom Mat Creemers zich houw aafgemeld, en doanoa get verhoale oet de auw doos te hoale. Stef: Wat houw Matje noe? Willem: Hae woar bie de hoesarts gewaes en dae houw get gediagnostiseerd wat hae nog nooit eerder houw gezeen. Unne sjpierhernia in zien ongerbein.. Denny: Dat kump normaal allein veur bie un indianensjtam in de binnenwouden van Zuid Amerika. Ron: Zeen dat rumpsjel-indiane? Want dan kent Matje bes dat bloud in zien oare hubbe. Misha: Dae Matje is toch ech un uniek figuur he jonges. Willem: Misha, ich hub dich al dekker gezag dat veer allemoal uniek zeen bie de veterane. Misha: Sjei oet Willem, aan mich is niks unieks. Willem: Sjus waal. Esse die unieke bie os in drie categorieje van uniekheid kens indeile, dan heurs doe absoluut bie groep 1. Misha: Ach Willem. Willem: Nae ech. Bie os lup geine eine normale rondj ja, mesjiens Marc Lacroix. Misha: Dae is fortuna hooligan! Willem: Joa, en dae haet Petra op zien bein getatoeëerd. Dat is auch neit normaal. Ron: Petra van Willy de Worm? Nae dat is inderdaad ech neit normaal. Op dat moment koom unne veteraan van Lömmerich informere woarom veer al zo vruig kloar woare taege die Belsje. Wie dae biegekald woar, koom Willem nog op un verhoal. Willem: Lömmerich wit geer noch dat ich doa unne keer neit goud woort veur de wedsjtried in de kantine. Wie ich omkiepde. Ron: Joa, inderdaad dat weit ich nog. Willem: En Resi van Stef ontfermde zich toen euver mich, he Resi. Resi: Joa klop. Dat weit ich nog. Stef: Hubse m toen mondj op mondj gegaeve? Willem: Joa lach maar. Maar ze woar de einige die bie mich bleef. Wie ich de auge oape deig, gingk geer uch geweun allemoal omkleije. Misha: Is gaar neit woar. Ich ben nog unne tied gebleve. Hub toen nog gekeke noa dien sjoonsmoat. Willem: Mien sjoonsmoat? Misha: Joa, ich dach: es r ut neit redt, ken ich mesjiens zien voetbalsjoon euvernumme. Stef: Esse woars gesjtorve, dan woar ut gezich van Resi ut letste gewaes watse gezeen

11 houws. Willem: Dan woar ich waal mit unne glimlach op mien gezich gesjtorve. Ron: Joa, en mit unne helle in de boks. Dan houwe veer un gaetje in de kis motte boare. Angesj ging ut deksel neit toe. Ron: En dan houw v r es veteranen unne krans d r om haer kenne hange. Dan houw nemes dat gezeen. Inmiddels houw de toernooi organisatie alle tellingen gedoan en bleek dat ozze vets de finale nog mochten sjpele taege Heidebloem. Ondanks opnuuj un heroïsch finale-optraeje van Willem es keeper (net zo wie 2 joar geleje), moosj men ut ongersjpit delven mit 2-0. Noa ut douche woar dat echter sjnel vergaete wie jederein zich de neudige glaze beier en unne teijer goulash noa binne houw gesjove. En dan is de tied alwaer aangebroake om euver te sjakele noa os hoofdgerecht van aafgeloupe waek: de wedsjtried van os eesjte elftal taege Centrum Boys. Die ploug houw in de winjtersjtop eindelijk de oetsjproak van de tuchtcommissie euver unne eerdere gesjtaakte wedsjtried gekrege. Conclusie: 3 punten aaftrek en 2 joar veurwaardelijk. Mit anger weurt: de ploug oet Zitterd houw de punten noe extra hel neudig. De warming up ging mit t neudige tumult gepaard. Doa woar de aafgeloupe 10 joare alle 150 oet-plouge netjes hun warming up houwe gedoan aan de euverkantj van ut veldj, doa vonje de jonges oet Zitterd ut neudig om unne houp heissa te make euver de helf wo op de warming up gedoan woort. Gelukkig lag men zich d r oeteindelijk bie neer en woort de

12 discussie besjloate mit un aangehoald vredelievend citaat van de grote pacifist Ghandi: wach maar in de wedsjtried dalik, krigse unne kopsjtoot! Coach Maas moosj ut doon zonger de geblesseerde Randy Wanten en Roel Heffels. Tja, en euver dae letste gesjproake.. wie mich in de vakansie un foto bereikte wo op dat sjtief hout aan ut sjtunte woar, dach ich al: dit is vroage om blessures De opsjtelling woar es volgt: Kis: Geoffrey Achter: Timo, Davy, Guido, Giel Midden: Stan, Bob, Maarten Veur: Hassan, Marko, Thijs Bank: Frank, Mike, Sjoerd en Richard Un samenvatting van de wedsjtriejd sjteit euveriges op youtube. Wat doa te zeen is aan hoogtepunten ongersjtreep ongersjtoand relaas van reporter Frans Beaujean: Vanaaf ut eesjte fluitsignaal woare os jonges de baetere ploug. Centrum Boys leet zich wiet terugk zakke, maar desondanks koom De Sjter un aantal kere prima combinerend door euver de rechterflank, via de goud opkommende Timo. Oet zonne rush en prima veurzet van Timo kreeg Maarten de eesjte kans van de wedsjtried. Ziene kupbal woar echter neit doeltreffend. De Sjter bleef de baetere ploug, al moosj men un aantal kere achterin aan de bak noa veurtreffelijke crosspasses van Centrum Boys-libero Facenna. Bie unne aanval euver de linkerflank kreeg Thijs de kans om allein de 16 in te goan. Helaas koos hae net get te sjnel veur unne sjeut en raakte hae de bal neit helemoal lekker, wodoor de keeper koosj redden. Hassan en Thijs wisten elkaar nog un paar kere via goeie

13 combinaties vrie te sjpele maar tot un doeltreffende aafronjing koom men neit. Op sjlaag van de rust kreeg Maarten nog un prima kans, via unne assist van Marko, maar auch die goei kans woort neit benut. Omdat Centrum Boys aan de angere kantj unne sjeut oet de dreij auch net naeve mikte, woar de rust sjtandj 0-0. Noa de rust utzelfde sjpelbeeld Al woar ut baltempo aan Sjteinder kantj net get te leeg om Centrum Boys ech aan ut wankele te kriege. Kansen kome d r echter toch veur os jonges. Rebounds oet corners en vrieje trappe vele echter net neit lekker wodoor ut bleef bie sjeut van aafsjtandj. Coach Maas wisselde nog aanvallend en brach Mike en Frank in de ploug veur de aangesjlagen Bob en de muig gesjtreje Maarten. Dat brach waer get meer schwung in de wedsjtried. Perfecte knallen van Thijs en Mike woorte mit indrukwekkend keeperswerk van Centrum Boys gepareerd. En aan de angere kantj woar ut nog effe sjrikke wie unne counter van de gasten un grote kans opleverde. Gelukkig woort auch die gemis. Sjoerd verving aan ut eind nog Hassan en pakte zo nog nuttige sjpeelminuten mit. Goals vele d r echter neit en dus woort de wedsjtried mit 0-0 beëindigd. Noa aafloup woar men aan De Sjter kantj toch waal teleurgesjteld. Qua sjpelbeeld houw d r meer in gezaete. Maar van de angere kantj houw men de taegesjtenjer auch neit ech kapot kenne sjpele. Volgende krachtmaeting veur ozze jonges is kommende zoaterdig oet in Zitterd taege VV Sittard. Vanwaege de kinjeroptochten in Zitterd en Sjtein dus op zoaterdig om oer en neit op zondig! En dat bringk os alwaer op de aafsjleiter van dit versjlaag. En omdat veer sjus de heilige feestmoandj achter de rugk hubbe en os alwaer bienoa goan sjtorten in ut sodom en gamorra van de vasteloavend, wul ich uch achterloate mit un beeld dat unne perfecte euvergang vormp tusje de reinheid en de puurheid van ut kerstfeest en de sjpas van verkleidpartiekes in de vasteloavend. Mit dank aan o.a. Roger Daemen (de os), Thijs Otten (d n engel), Johnny van de sjpin (jozef) Gerard Martens (de wieze oet ut oosten) en Ron Marchal (kindje Jezus).

14 Pes volgende waek! Rob Sjulpe