De Sjter 1 mis periode maar lup in op koplouper! De Sjter 3 baalt van derby der derby s! Will Leurs maak succesvolle rentree bie veteranen

Transcriptie

1 De Sjter 1 mis periode maar lup in op koplouper! De Sjter 3 baalt van derby der derby s! Will Leurs maak succesvolle rentree bie veteranen In un weekend wo in de rechtgeaarde Sjteindenaer keuzes zat houw veur de besjteding van ziene vrieje tied (kinjeroptocht, rommelmert bie de Merode) moosjten drie seniorenteams aantraeje veur unne belangrieke wedsjtried. Os eesjte elftal ging de sjtried aan mit SHH oet Herten, dat dit sezoen pas eine keer verloare haet (van De Sjter euveriges), en moch in un ongerling duel besjlisse wae de 2 e periode ging binnesjleipe én wae de grootste oetdager blif van Hoensbroek in de sjtried om t kampioensjap. Os driede elftal sjpeelde mesjiens nóg waal unne belangriekere wedsjtried. Veur ozze Beesten van 3 sjting immers de belaje derby taege Haslou 3 a.k.a. Sjtein Zuid 3 op t programma. En ozze veteranen tot sjlot die sjpeelden op zich neit zonne hele belangrieke wedsjtried. Taegesjtenjer woar immers de ummer vrunjtelijke combi-ploug van Born/GVCG. Maar wat deze wedsjtried belaje maakte woar de rentree van golden boy Will Leurs. Dat leverde vanzelfsjpraekend waer un paar sjteingoeie quotes op in t kleidlokaal van de vets. Loate veer de waek maar ens goan doornumme, wobie ich al waarsjuw dat t versjlaag grotendeils is gewijd aan de veteranan. De meeste teams zeen waarsjienlijk qua randjgebeuren hun kruut dreug aan t haute veur de vasteloavend. Veer loate os maar verrasse wat d r noa de vasteloavend allemoal aan foto-materiaal besjikbaar wurt gesjteld door ozze vaste correspondenten. Loate veer ut versjlaag maar beginne mit de mannen van 5. Dees combi van godenzonen en zoepnaze, die dit sezoen acteert onger de geuzennaam FC Biejeingeraap. Houw geine wedsjtried op t programma sjtoan dit weekend. Desondanks woare Ralph Doek en Devon Moerkens de aafgeloupe waek twee keer aanwezig op de training en trainden ze mit de jonges van ut driede mit. Geweun, omdat un training van Rene Gooren altied waer un openbaring is. Klein leed woar d r auch te melje bie ut viefde. De blessure van Roy Janssen bliek erger te zeen dan verwach. Ziene doem bliek tóch gebroake te zeen. Om die blessure neit wiejer te verergere haet Roy aan coach Habets beloaf om tiedes de vasteloavend mit zien chocolade-linkerhandj t beierglaas vas te haute. Dat zal m ongetwiefeld baeter aafgoan es t gaeve van unne pass mit zien chocolade-linkerbein. De dames houwe auch niks te voetballe en koosjten auch gein sjmeuïge informatie mit os deile. Noa verluid zeen ze veurnamelijk bezig gewaes mit veur-sjloape veur de vasteloavend. Veer kenne os dan auch ongetwiefeld opmake veur un paar MB s aan foto s van de belaevenisse in de Sjteinder Cafés de kommende daag. De mannen van 2 houwe auch al geine wedsjtried op t programma sjtoan. Veur coach Crutzen gein probleem, want dae haet de henj vol aan t op peil haute van de selectie richting kommend sezoen, de letste loodjes van ziene trainerscursus en zien vasteloavesverplichtinge in Voelender. In dees rustige periode veur De Sjter 2 woar t unne auwt sjpeler van dit team, en huidig Urmondia-keeper, Nick Kohlen, dae opveel mit un leuke opmerking op facebook, nao aanleiding van un artikel euver un voetbalsjool die

2 techniektraining kump gaeve op os complex. Ut lijdend veurwerp, un combinatie van Charundi Martina en Diego Maradonna (helaas veur heum mit de sjnelheid van Maradonna en de voetbaltechniek van Martina), woar sjnel mit reagere: De mannen van drie houwe waal unne wedsjtried. En wat veur eine! Taege de vrunj van Sjtein Zuid 3, oftewel de wedsjtried van ut joar. Veuraaf zoot de sjtumming goud d r in. De matchday-foto van Rene Gooren woar briljant:

3 En auch bie de sjpelers van 3 zoot de sjtumming d r goud in, zo deilde sjpeler-coach Gooren op de app: Dat geluidsfragment kent geer natuurlijk neit mitloestere, maar ut woort doa in dudelijk dat de mannen d r zin in houwe. En die goei zin woar auch hel neudig want taegesjtenjer Haslou woar veuraaf favoriet. De ploug sjteit immers hoger genoteerd op de ranglies en os jonges wachten nog op hun eesjte euverwinning. Die eesjte euverwinning koom veúr de winjtersjtop waal jeder waek korterbie. Al moosj men helaas tot noe toe ummer genoegen numme mit un kleine nederlaag of un gelieksjpel. En helaas voltrok zich auch in Aelse op zondigmurge waer dát scenario. Noa 90 minute sjting un score van 2-1 veur die van Aelse op t scorebord. Einige doelpunt van De Sjter-kantj koom op naam van Thijs Kemp. Rene Gooren woar kort in zien analyse en kreeg un hart onger de reim gesjtoake door ultimate warrior, Ralph Doek:

4 Dan maar kieke of os eesjte elftal wáál de punten zou kenne binnesjleipe in heure topwedsjtried. Ut affiche woar prachtig. Os eige jonges sjtinge op de tweede plaatsj op de ranglies en auch in de periodesjtandj op de tweede plaatsj. Taegesjtenjer SHH sjting op de derde plaatsj op de ranglies en woar koplouper in de periodesjtandj. De opdracht veur beide teams woar dus dudelijk. Os jonges wolle per se winne om op die maneier de periodetitel in de wacht te sjleipe én om in t sjpoar te blieve van koplouper Hoensbroek. De gasten oet Herten teikenden veuraaf waarsjienlijk waal veur un gelieksjpel want dat woar veur hun voldoende om de periodetitel in de wach te sjleipe. Os jonges houwe, onger bezielende leiding van coach Czornyj, lekker getraind de ganse waek. Elftalleiders Peerlings, Beaujean en Janssen houwe nóg get extra bevloagenheid euvergebrach op de groep. En verzurger Wanten houw de letste pienkes vakkundig weggekneed. Pak doabie dat de mannen in unne geweldige flow zitte en al 4 moandj ongesjlage zeen en alle seinen sjtinge op gruin veur unne topwedsjtried. Auch euver de publieke belangsjtelling veel neit te klage. Ondanks ut feit dat de kinjeroptoch door Sjtein trok, woar de opkomst hartverwarmend. Die troewe supporters (én auch inmiddels de neudige neutrale voetballeifhubbers die de waeg noa os sjportcomplex weite te vinje) zoge de gael-zjwarten in de volgende opsjtelling acteren: Kis: Geoffrey Achter: Timo, Guido R., Guido C., Paolo Midden: Stan, Ricardo, Bob Veur: Thijs, Marko, Guillermo Bank: Bastiaan, Hassan, Mike en Sjoerd Noadat sjpelerke van de waek Lucas de aaftrap houw verrich en t netje houw loate bollen (op de bank zei hae: pfff, dat was wel erg makkelijk. Ik liep ze allemaal zo voorbij!), ontsjpon zich unne échte wedsjtried veur de auge van de toesjouwers. Un oetgebreid versjlaag hub ich van nemes ontvange, maar de geluiden die ich opgevange hub woare waal dudelijk: SHH presenteerde zich es n ploug die goud georganiseerd sjting en die probeerde geweun de 0 te haute en op de counter gevoar te sjtichten. Un alleszins logische tactiek esse bedenks dat ze belang houwe bie un gelieksjpel. Ozze jonges deige hun sjtinkende bes, maar houwe muijte om vöäl kansen te creëren. Enerzijds omdat t eige sjpel nét get minder sjprankelend woar es veurbieje waeke. Anderzijds omdat de taegesjtenjer geweun prima verdedigde, weinig kansen weggoof en minder bereid woar om d r unne leuke wedsjtried van te make (nogmaals: dat woar hun goud rech). En doabie woort de wedsjtried auch nog ontsierd door n onveursjtelbaar aantal gaele kaarten, dat door de matig leidende sjeidsrechter teveursjien woort getoverd. Zo woort invaller Hassan kort noa ziene entree getracteerd op un gael prent, terwiel Timo de euvertreding maakte. Kwestie van foutje bedankt maar dat pak natuurlijk erg vervaelend oet es de sjeidsrechter neit voal later genoodzaakt is om daezelfde Hassan op un terechte gaele kaart te tractere.

5 Ondanks de numerieke minderheid bleve de gael-zjwarten sjtriede veur un euverwinning. Door t veelvuldig sjtil ligke van de wedsjtried woar t op t lets noodzakelijk om t leich op t hoofdveldj aan te make. Robert Kraus woort op verzuik van de sjeidsrechter op paad gesjtuurd en veteranen grensrechter Willy Worms lag dat, zo besjaafd en neutraal es veer van m gewend zeen, vas op de groepsapp van de veteranen: Maar auch de verleichting brach ozze mannen neit korter bie de euverwinning. De wedsjtried eindigde wie hae begoosj woar: 0-0. Teleursjtelling euverheerste op t Hetjen noa de wedsjtried. Dat woort waal verzach door t nuujts euver de verrassende nederlaag van koplouper Hoensbroek. Maar ozze jonges moage greutsj zeen op de ongesjlage serie die ze al sinds oktober in sjtandj haute. Eesj kommend weekend lekker vasteloavend viere en dan de waek doanoa de altied mit goud voetbal gepaard goande derby taege GSV. En dan hubbe veer nog ein team neit besjproake en dat zeen ozze veteranen. Gelukkig compenseerden die t gebrek aan nuujts bie de angere teams ruumsjoots. Bie de veteranen woar t sinds veurige waek echter maar zeer de vroag of d r dit sezoen nog waal gevoetbald ging waere. T leek d r immers op dat secretaris Willem Thewissen op eige houtje wedsjtrieje aaflasj es hae zelf geblesseerd is. Ron Marchal sjmeet dan auch op de app:

6 Auch topscorer Stef informeerde noa de gezondjheid van Willem. Dae vatte dat in eesjte instantie op es oprechte belangsjtelling, kreeg vervolges t deksel op de naas en reageerde toen op de toon die Willem zich mit de waek meer is goan aanmaete: Paul Janssen meldde zich aaf en verwees doabie noa t verhoal van Steef van de Woude van veurige waek in t kleidlokaal euver t vineus angioom dat hae in de kop houw: Euveriges kreeg de sjriever van dit sjtuk aafgeloupe weekend nog kritiek van zien ploeggenoten veur t neit vermelden van de term vineus angioom in t versjlaag. De verontsjuldiging dat t alwaer 20 joar geleje is wie ich de letste les latijn houw gehad, maakte weinig indruk. Want wie Mat Creemers nog gein minuut later un verhoal euver un

7 ouwe vrouwelijke verovering begoosj te vertelle, die hae getracteerd houw op cunnilingus, woort Mat ongerbroake mit de mededeiling: Mat, sjpel dat effe veur Rob want dae sjrif mit en Latijnse weurt zeen neit zien sjterkste punt. Wo op Mat aanvulde dat ze dat in Mesjtreich zeije es ze t euver de musj lekke houwe. Van deze cursus Latijn veur beginners goan veer terugk noa de aafmelding van Paul Janssen. Dae zei dus dat hae in de knei houw, wat Steef in de kop haet. Dat vroog om un hele mekkelijke reactie van Stef Conjour, dae mit dit soort kansen waal roat wit: Op gounsdig woar Willem Thewissen joarig. En dan is t heel logisch dat de eesjte felicitatie aafkomstig is van jawel:

8 Noa die sjone omsjrieving van Jack Dassen volgden felicitaties van alle angere veteranen. De meesten deige dat mit un korte, hartelijke felicitatie. Ron Marchal wiejde zelfs maar un kort bie-zinke in n voal belangrieker verhoal, aan de joarige Willem: De sjriever van dit sjtuk vonj t toepasselijk om, in noavolging van Jack Dassen, get meer weurt te gebroeke bie t felicitere van dit fenomeen. Dat bleek echter get verwarring bie de joarige te veroorzaken:

9 En de hubs natuurlijk auch ummer waer eine d r tusje dae t neudig vinj om nog ens terugk te komme op de veurige waek aafgelasjte wedsjtried: Unne sjtaek onger water, dae Willem mit unne glimlach op t gezich aan zich veurbie leet goan. De tweede sjteek onger water, volgde echter al sjnel:

10 Die tweede sjneer woar Willem te voal van t goeie en hae verveel waer in n drie keer modaal-onwaardige tirade: Gerard bleef uitermate koeltjes en probeerde ziene naef waer tot bezinne te bringe. Dat bleek echter allein maar meer olie op t vuur te zeen: En esof dat nog neit genog woar veur de erme Willem constateerde Piele auch nog ens dat op facebook de verkeerde informatie rondjom de wedsjtried van De Sjter sjting. Zoegend informeerde Piele doa euver bie Willem:

11 Wo op Piele op un lullige maneier d r op wees dat zelfs de wedsjtried daag op facebook neit klopte (mit sjteun van Gerard vanzelfsjpraekend):

12 Denny Vorstermans waagde zich aan un diagnose. Utgein tot de volgende tirade leidde, wo op Gerard un letste poging deig om Willem hulp te loate zuike: Oeteindelijk woar t Jack Dassen dae ingreep: Unne daag later woar auch Jos van Fieje Driessen joarig en auch dae woort oetgebreid gefeliciteerd. Willem Thewissen, noe finaal de waeg kwiet, deig dat middels un oetgebreide lofzang... op Jos Muris... De joarige Jos Driessen sjikte un foto vanoet Curaçao, wo hae de kouwe winjterperiode oetzit. Jos koppelde geliek un raadseltje aan zien bericht:

13 Dat raadseltje brach get reuring mit zich mit. Un sjtad die vernumt is noa de leider van de veteranen. Suggesties die de revue passeerden woare onger angere OTTEwa, VatiCAANstad, DOAMtown, FREDERIXstad, Sint PETERsburg, HAAGMAN eilanden en ToRONto. Wie Ron oeteindelijk mit de goei oplossing koom, constateerde Willem dat de vroagsjtelling van Jos Driessen neit goud woar gewaes: Maar gelukkig houw Willem auch nog goud nuujts te melje:

14 Mit unne vakkundig ingepakte sjouwer arriveerde Willem zoaterdigmiddig in de kantine. Doa koosj hae geliek aan de sjlaag want t tweede bord van de club van 25+ woar inmiddels opgehange in de kantine. Dees actie van de supportersvereiniging om luuj te werven die minstens 25 euro per joar aan de supportersvereiniging doneren (geldj kump ten goede aan zaken die de ganse vereiniging aangoan) is un dermate groot succes gewoare dat neit meer alle namen op ein bord pasten. Willem pakte, ondanks ziene ingepakte sjouwer, de taak op zich om te beginne mit t vullen van dat tweede bord. Auch ut nuujste lid van de club van 25+, Will Leurs, kreeg un plekske. Zien naambordje woar nog neit vaerdig, maar t handjgesjreve exemplaar dat alvas woort opgeplek, kreeg un opvallend (maar geheel bie de actualiteit rondjom Will passend) detail: Ein veur ein druppelden de veteranen binne. Auch Gerard Martens en Steef van de Woude kome tegeliek de kantine in. Steef woort aangemaand om auch de twee waeke geleje aafwezige Gerard te vertelle woarom hae neit moag kuppe. Dat ging zo:

15 Gerard: Wat neit kuppe? Steef: Ich hub un vineus anginoom in miene kop. Gerard: Miljaar. Wo hubse dat gegaete? In Turkije? Roger Daemen: Maar nog los doavan liek dat voetballe van dich sowieso nurges op, Steef. Steef: Jonges, geer mot neit vergaete dat ich nog ummer op therapeutische basis bezig ben noa mien hartoperatie. Willy Worms: Enne? Therapeutische wat? Hubse in de Dikke Van Dale zitte laeze? Steef: De Dikke van Daemen? Willy: Mich niks in de mondj goan legke, he Steef. Ron: Joa Steef, sjei oet, Willy is Patricia Paay neit. Vervolges koom Will Leurs de kantine in. En deze terugkkeer van Will zurgde veur de neudige oproer, mit opmerkingen wie: Enne Will, besse op weekendverlof oet de Geerhorst? Will, in april hubbe veer un vriej weekend. Kense dan regele dat veer taege t gevangenisteam kenne voetballe? Van dat soort opmerkingen zouwe d r nog meer volge. Ut woar echter inmiddels tied gewoare om noa t kleidlokaal te goan. Doa constateerde Steef dat hae get vergaete woar. Steef: Jonges, haet emes un extra paar zukke bie zich? Gerard: NAE! Jonges, NAE! Nemes haet extra zukke veur Steef. Willem: Angesj voetbalse toch geweun un waekske neit mit, Steef. Eddy: Ich hub un extra paar bie mich, maar dat zeen gein twee linkse. Captain Mat Creemers noom vervolges ut woord en meldde dat de veteranen gevroag woare om dit joar eine daag op t TenteFestein in de zomer in te vulle. Will houw doa get euver op te merke maar woort door Mat geliek terech geweze. Mat: Leurs, doe hubs dien medewerking al toegezag. En doa houd ich dich aan. Ron: Deit Will de sjtroum dan? Eddy: Will haet nog un aggregaat sjtoan thoes, dat veer moage gebroeke. Vervolges koom Stef binne en dae begoosj auch al geliek euver Will. Stef: Jonges, woarom zit d r nemes naeve Will? Ron: Jederein is bang om un DNA sjpoor achter te loate.

16 Willem noom vervolges ut woord en meldde dat hae mit ziene ingepakte sjouwer gein beuken koosj oetdeile vandaag en dus alles voetballend ging oplosse. En es dat unne keer misgeit, dan neit geliek op mich sjeije, he, voegde hae doa aan toe. Misha Dreessen richtte zich vervolges waer tot Will. Misha: Wievoal plentjes houwse noe sjtoan Will? Will: Ach, bienoa niks man. Paar plentjes. Misha: Ich houw geheurd Mat: Will, esse nóg unne keer waags te komme voetballe, belle veer de plisse dat t d r woare. Willem: Zulse net zeen dat ze m dan vas zette es t zomersjtop is. Ron: Dan goan veer in hoger beroep. Doamit woar de gifbaeker nog ummer neit laeg veur Will. Eddy: Bie welke energieleverancier zitse eigenlijk, Will? Stef: Besse veurig joar euvergesjtap? Noa GREENchoice? Misha: Wae haet dich eigenlijk aangegaeve? Marc: Ziene buurman, Hubert de Bok, kent t neit zeen gewaes. Die sjtum herkense oet doezende. Willem: Dae plis haet waarsjienlijk gedach dat hae Hub van de Sjpar aan de lien houw. En veurdat de wedsjtried begoosj woar d r nog nét get tied euver veur n sjieke opmerking van Eddy Ubbink. Eddy: Will, doe kens dich baeter winjtmeules zette in de tuin om dae sjtroum veur die plentjes op te wekke. Will: Wiezo dat? Eddy: Dat ruuk auch geine get. En es ze dich tóch pakke, dan zaesse dasse unne sjlaag van de meule gehad hubs. Ut woar inmiddels tied veur de eesjte helf van de wedsjtried taege de veteranen van Born/GVCG. De Sjter koom op veursjprong wie unne prachtige aanval via Rob bie Stef koom, dae onbaatzuchtig breid lag op de opgekomme Marc Lacroix, dae de 1-0 binneleep. Nog gein minuut later sjting ut alwaer 1-1, wie Will Leurs ziene directe taegesjtenjer oet ziene rugk leet loupe. Dat koom m op commentaar van de bank te sjtoan. Gerard: Dat woar diene man, Leurs. Doe mos mitloupe! Wie Will un minuut later goud mit terugk verdedigde pes de eige achterlien, begoosj Stef vanoet de sjpits te roupe.

17 Stef: Will, wat sjteisse doa te backen? Doe mos hie veurin loupe! Will: Noa achter, dan waer noa veur, ich waer raat gek van uch. Desondanks ging Will neit bie de pakken neerzitte. Want eesj kupte hae unne veurzet van Willem Thewissen op de lat. En vlak veur rus wis hae unne hoge veurzet bienoa binne te tikke. Dit keer sjting de poal echter in de waeg. De rust woort bereik mit unne 1-1 sjtandj. In t kleidlokaal ging t maar waer ens euver Will. Roger: Wo sjleit dat eigenlijk op dat Will in de basis sjting? Ron: Dan hubbe veer tenminste nog un ganse helf om t rech te zette. Denny: Will, hubse trouwes unne enkelbandj om dae geit piepen esse oet die 10 veierkantje maeter kumps, die se de eesjte held hubs besjtreke? De tweede helf noom Roger d n Doam de plaatsj van Ron in onger de lat. Ron noom zien vaste sjtek op rechsboete in en woar doa geliek besjlissend. Un geweldige actie wobie hae twee man passeerde en vervolges mit links aafdrukte, zurgde veur de besjlissende 2-1. Doamit woar t verzet van Born/GVCG gebroake. Via treffers van Stef, Misha en Rob leep De Sjter nog oet noa 5-1, wonoa de prima leidende Devon aaffloot. In t kleidlokaal constateerde de Mesjtreichse moelejan, en loupende medische encyclopedie, Steef dat hae get ongelukkig woar gewaes in de passing. Steef: Mien passes woare get ongelukkig vandaag jonges. Ich denk dat ich de tweede helf un lichte hersenbloeding hub gehad. Stef: Woar dat maar zo, dan gingse auch ens get langzamer kalle. Roger: Joa, dan kalse zo wie Will Leurs voetbalt. Eddy Ubbink woort gecomplimenteerd mit zien sjieke actie. Stefan: Sjieke actie, langs de lien, Eddy! Eddy: Ja ach, esse op de plaatsj van Will invils dan liek t al sjnel get. Willem informeerde nog ens noa de toekomst van Will. Willem: Wie lang mosse noe zitte, Will? Will: Ich houf neit te zitte. Ich waer vrie gesjproake. Ich hub niks gedoan. Ron: Dat hub ich gezeen de eesjte helf, joa. En tot euvermoat van ramp veur Will (dae euveriges al die opmerkinge stoicijns lachend euver zich haer leet komme) leet zien echtgenote Mia dees waek auch waer un bericht op facebook achter. Gerard Martens woar d r es de kippen bie om t bericht te deile:

18 En mit die opmerking loate veer t veteranen voetbal maar ens achter os. Tied om de waek aaf te sjleite. En dat doon veer mit de man dae aafgeloupe waek joarig woar, bakken kritiek euver zich haer kreeg vanwaege unne aafgelasjte wedsjtried, en dae desondanks ziene geblesseerde sjouwer leet tapen zodat de veteranen toch koosjte voetballe. Ut leek waer de goeie kantj op te goan mit ozze Willem. Totdat hae dees waek zelf un foto op de groepsapp zat:

19 Noa de neudige berichskes vol leedvermaak, woar t Denny Vorstermans dae (onger verwiezing noa de al geblesseerde sjouwer van Willem) mit un heerlijk onsjuldige, en doadoor des te leukere, opmerking de waek aafsjloot: Allemoal unne fejne vasteloavend gewunsj! Rob Sjulpe