De Sjter 2 hoalt oet; Dames winne derby; Marco Vaassen verdeint un sjtandjbeeld

Transcriptie

1 De Sjter 2 hoalt oet; Dames winne derby; Marco Vaassen verdeint un sjtandjbeeld T woar t weekend van t TentefeStein in Sjtein. Normaliter un weekend wo in de Sjter teams, vanwaege n geveerlijk hoog alcoholpromillage, weinig punten pakke. Dit joar veel dat echter alleszins mit. Ut eesjte, de veteranen en ut driede moosjten weliswoar de punten loate aan respectievelijk Geusselt Sport, Haslou en OVCS. Maar de dames, ut viefde en ut tweede behoalden glorieuze euverwinningen. De vechtmachine van de dames knokte zich noa un 1-2 euverwinning, oet taege Haslou. Ut viefde redde t nipt taege IVS: 3-2. En ut tweede sjpeelde taegesjtenjer LHC 2 compleet van de mat en sjtuurde de gasten mit un 8-1 nederlaag noa hoes. Wisselende voetbal-resultaten dees waek dus. De sjriever van dit sjtuk voetbalde zelf neit mit, bie de vets en vreesde dus veuraaf weinig te sjrieve te hubbe, noe hae t moosj doon zonger de gebroekelijke blaadvullende, hilarische Ron Marschal-quotes. Oeteindelijk veel dat reuze mit. Weliswaar weinig Ron in dit versjlaag maar d r zeen dees waek genog angere verhoale te vertelle en genog helden te bewierrouken. Mannen wie Steve Krijgsman en Marco Verhoeven, die hun teams noa de euverwinning leidden mit geweldig voetbal. Maar auch luuj die sjus naeve t voetbalveldj van zich deige heure. Dus loate veer maar sjnel beginne. En dat doon veer dees waek bie de veteranen. Veur de vets begoosj de waek op de groepsapp mit n mysterieus bericht op facebook, aafkomstig van Mia van Will Leurs. Veurig joar haet un dergelijk bericht van Mia os sjpas veur ettelijke moanje opgeleverd. Dit keer woar de lol echter mit 1 reactie van Ron Marschal alwaer achter de rugk:

2 Wiejer houwe de veteranen t dees waek veural druk mit t feliciteren van elkaar op de groepsapp. Op moandig woar de sjriever van dit sjtuk joarig. Mit name ut bericht van Gerard Martens sjprong d r oet:

3 Diezelfde waek woar auch Gerard Martens joarig. Toevallig op dezelfde daag es ziene mededamescoach Tom Keulen. Samen bereikten ze de respectabele laeftied van 100 joar. Wie de ongerlinge verdeiling van de joare precies is, is mich neit gans dudelijk. Auch Gerard woort oetgebreid gefeliciteerd en ditmoal sjprong ut bericht van de vakantie vierende Dennie Vorstermans d r oet: Euveriges beginne de joare bie Gerard de letste tied waal zichtbaar te tellen. Op t voetbalterrein wit hae zich nog eine keer per waek biejein te rape om n goeie partie te

4 sjpele. Maar in t dagelijks laeve begint t beheurlijk noa te loate bie m. Zo is hae unne tied geleje al bewust vlak bie Café de Poart goan wonen om zien verzjwaakte lichaam neit te voal te belasten mit onneudige maeters noa hoes, noa zien nachtelijke escapades. Tot ozze sjrik troffen veer dees waek echter auch un foto aan dat d r daag zeen dat Gerard neit ens meer in sjtoat is om die paar maeter van thoes noa De Poart te euverbrugke om zich eine te drinke. Gelukkig beejt thuisbezorgd.nl in dergelijke gevallen oetkomst. Die bezurge bliekbaar sinds kort auch alcoholische dranken aan hoes: Maar veer zeen d r nog neit es t geit om felicitaties op de veteranen groepsapp. Want auch Rene Hillen kreeg d r de neudige. Neit vanwaege ziene verjoardaag maar vanwaege de gebeurte van zien kleinkindj. Nog dezelfde daag feliciteerden wurkelijk alle veteranen hunne veurzitter doamit. Nou ja, bienoa alle veteranen. Want Peter Janssen houw t berich pas unne daag later gezeen en reageerde toen. Leon Fredrix goof Peter geliek d r van langs:

5 De veteranen moosjte voetballe taege Haslou in Aelse. D r woare beheurlijk get aafmeldingen en de selectie woar oetgedund tot 13 man. Gerard Martens woar vanzelfsjpraekend wáál present. Dae is ummer doa, geef ummer 100% en haet nooit get te klage. Dat leet hae dees waek auch weite aan hoofdtrainer Czornyj, dae aan t vertelle woar dat un aantal sjpelers neit houw kenne mittraine vanwaege blessures, en eine omdat hae unne tandj houw loate trekke. Gerard heurde zich dat ens aan en reageerde: Auw kut, man. Ich hub vandaag 14 ongesjtelde wiever motte traine. En heurse mich klage? De mannen van Sjtein deige in hunne wedsjtried eigenlijk alles goud, maar vergote te scoren. En es de coaches dan auch nog de eesjte helf hunne beste verdediger, Willem Thewissen, op de bank haute, kent t zomaar gebeure dasse mit 2-0 achtersjteis. Noa de rus deig Math Caanen waal nog get terugk mit unne geweldige curve vanaaf de achterlien, dae bie de eesjte poal binneveel. Doanoa probeerde Math t nog unne keer, dit keer via unne (mit boetekantj vout getrapte) corner dae bienoa bie de eesjte poal binneveel. Wo zuusse zoget nog, luuj? Unne corner mit boetekantj vout in eine keer d r in dreije? Oeteindelijk moosjten de vets dus t ongersjpit delven mit 2-1. En wat de nederlaag nog erger maakte, woar dat Misha Dreessen unne oetermate pienlijke vout aan de wedsjtried euverheel. D r woort zelfs gevrees veur n breuk. Gelukkig brach Marc Lacroix unne daag later goud nuujts:

6 Van de veteranen goan veer door noa de op-zondig-voetballende-seniorenteams. Te beginne mit ut nuuje viefde. Dat moosj aantraeje taege t door living legend Pietje Franciscus getrainde IVS 2. Coach Mark Habets houw t druk mit t in goeie banen leiden van de kinjermiddig in de feesttent en dus moosjten zien mede-regelnaeve Roy en Mark Janssen, same mit captain Noud Claessens probere t team op sjerp te kriege. De mannen moosjte aantraeje zonger gladiator Ralph Doek. Dae sjpeelde de aafgeloupe joare altied mit, zelfs es zien gezondjheid of fysieke toesjtandj dat eigenlijk neit toeleet. Maar sinds de selectie dit sezoen oet 25 man besjteit, kent zelfs Doekie zich permitteren om zien lichaam af en toe rust te gaeve. Hae woar natuurlijk waal geweun aanwezig bie de wedsjtried en brach noa aafloup kort en bondig versjlaag oet, wobie hae dudelijk maakte dat Marco Verhoeven de Man of the Match woar:

7 Wat unne topper is dae Marco Verhoeven! 65% balbezit in dien eentje. Dat zeen Stef Conjouriaanse getallen. Klasse Marco! Wie de mannen van 5 zich in t zjweit aan t wirke woare, koom Robert Kraus aansjloffe mit unne zjwoare kop. Roger d n Doam vonj dat Robert zich biejein moosj rape. Roger: Kraus, kiek neet zo wie un bezoape paerd! Robert: Watte? Pffff.. jonges, loat mich effe un tas koffie drinke en vroag t mich doanoa nog unne keer, want op dit moment kump d r niks binne bie mich. Wie Robert zich un tas koffie houw gedronke, koom hae aan de reling sjtoan bie de wedsjtried van 2. Ongertusje woort veur de rus gefloate bie ut viefde. De sjpelers kome ein veur ein langs richting kleidlokaal. Roel Heffels veel op dat Noud Claessens de aanveurdersbandj droog. En doa wol hae effe get euver kwiet. Robert Kraus toonde vervolges aan dat hae alwaer un sjtuk frisjer woar. Roel: Wie kenne ze dich noe aanveurder make, Noud? Doe bes de beperkste d r oet! Robert: Dan zulle ze dich auch waal sjnel aanveurder make op ut eesjte, Roel. Ut viefde moosj t zondig euverges doon zonger sjterkhouwer Rick Kostons, dae zich moosj veurbereiden op zien optraeje in de tent dae oavend. Dat optraeje woar eigenlijk bedoeld om de tent nóa t optraeje van Fabrizio laeg te sjpele, maar Rick s showman-skills en zien vocaal iezersjterke vertolking van Frans Duijts greatest hits houwe precies t taegeneuvergesjtelde effect: jederein sjtormde de dansvloer op en koom d r pas oere later vanaaf. De dames van De Sjter veurop:

8 Maar auch zonger de inbreng van Rick behoalden de mannen van ut viefde dus geliek drie punten in hunne eesjte competitie-wedsjtried. Dat woar ut veurmalige veerde (wovan voal sjpelers noe in ut viefde sjpele) nog nooit geluk, in de joare dat Patrick Nordhausen t doa veur t zegke houw. Grensrechter Pedro Willems toonde zich noa aafloup in de kantine genadeloos: Ich hub joare langk gezag dat ze dae Nordhausen moosjte wegjage. Man, man, wat haet dae os punten gekos al die joare. Gelukkig haet Patrick Nordhausen euveriges waal un nuuj positie binne de vereiniging gevonje. En dat is geliek os brukske noa de volgende wedsjtried, namelijk dae van os tweede taege LHC 2. Patrick is sinds dit sezoen namelijk assistent van Rudy Crutzen bie De Sjter 2. En gezeen t sjpel en resultaat in de wedsjtried van gistere, begint dat al zien vruchten aaf te werpen. Want LHC woort in 90 minute wervelend aanvalssjpel compleet van de mat gevaeg en moch oeteindelijk blie zeen dat t bie 8-1 bleef. De Sjter 2 sjpeelde in de volgende opsjtelling: Kis: Esat Achter: Jari, Cyril, Joep en Sjoerd Midden: Bart, Zubair en Luc Veur: Youri, Marko en Steve

9 De wedsjtried houw un kwarteerke neudig om los te komme, maar toen ging t auch ech goud los. Steve Krijgsman zurgde mit unne kupbal oet unne corner veur de 1-0. Vervolges woar t unne prachtige sjtaekpass van Jari Knoops op Steve, dae vervolges ziene taegesjtenjer oetkapte en unne veurzet goof dae door Marko Jevric woort binnegeloupe veur de 2-0. Veur de rus houw de teller al flink kenne oploupe, maar de score bleef beperkt tot 2-0. Noa de rus woar d r gein haute meer aan veur LHC. De nog neit op zien ideale gewicht zittende Marko Jevric houw Joep Nacken toegesjproake in de rus mit un geniale ingaeving en dat wirkde goud: Joep, gooi die ballen maar erover. Heb je gezien hoe dik die laatste man is? De 3-0 woort gescoord door Marko oet alwaer unne veurzet van Steve. En auch de 4-0 koom veurt oet unne assist van Steve en woort binnegeloupe door Youri. Steve zelf scoorde de 5-0 oet unne veurzet van Luc. En daezelfde Luc noom de 6-0 veur zien raekening via unne diagonale pegel. LHC deig veur de statistieken nog get terugk en koom op 6-1, wonoa de man mit de sjoonste naam van os ganse clubke, invaller Eliandro Carbone, de 7-1 scoorde. Ut sjlotakkoord koom, noa un machtige versjnelling op naam van de beste sjpeler van alle seniorenteams van dit weekend, Steve Krijgsman. Hae scoorde auch de 8-1 en eindigde zo op 3 goale en 3 assists. Veur de luuj die ut tweede hubbe zeen voetballe en die zich aafvroage of De Sjter 1 coach Ronny blindj is door Steve structureel neit in ut eesjte te loate sjpele: geer mot weite dat Steve haet aangegaeve dat hae allein in ut tweede wult sjpele mit ziene vrundj Joep Nacken. Un besjlissing wo hae wat mich betruf euveriges ummer op moag terugkkomme. Sjterkste opmerking tiedes de wedsjtried van 2 koom euveriges op naam van Joep Nacken dae bie unne 7-1 sjtandj in un reflex unne taegesjtenjer vasheel en un gael kaart pakte. Bart: Woarom deisse dat noe, Joep? Joep: Ich pak gael wienee ích dat wul. Bie ut tweede leet euveriges auch good old Pascal Conjour, es invaller, nog van zich heure. Hae houw waer un paar goeie acties in hoes en zat un paar keer mit unne sjtaekpass unne medesjpeler vrie veur de keeper. Hoogtepunt van Pascal ziene daag koom echter pas un paar oer later wie hae, zij t ietwat aarzelend, gevolg goof aan de oproup van Fabrizio in de tent dat alle kinjer en luuj mit un versjtanjelijke beperking t podium op mochte komme: Van Fabrizio is t maar un klein sjtepke noa os volgende seniorenteam, de mannen van 1. Woarom? Op de eesjte plaatsj omdat ozze hoofdmacht zondig moosj aantraeje taege unne

10 Mesjtreichse opponent. En op de tweede plaatsj omdat Fabrizio zich presenteerde es unne beheurlijk sjerpe milfhunter: Ozze eige resident milfhunter van De Sjter 1, Randy Wanten, moosj leidzaam toezeen wie Fabrizio gans 35+ vrouwelijk Sjtein de kop gek maakte. En Randy houw toch al neit zien waek, op dat gebied. Want in de feesttent kreeg hae dit weekend veurnamelijk aandacht van waal erg jong maedjes: Zo jongk zelfs dat d r veurzichtig taege Randy woort gezag dat hae maar un bietje moosj oetkieke veur de plisse. Ralph Doek houw op dat gebied gelukkig goud nuujts veur Randy door zien kennis te deile euver de bekendste voetballende politie-agent van Sjtein:

11 De mannen van 1 moosjten dus dit weekend aantraeje taege kampioenskandidaat nummer 1, Geusselt Sport. Dat moosj gebeure zonger Hassan, dae zien verblief in Marokko houw motte verlenge vanwaege t euverlieje van zien oma. En auch zonger Ikram, dae doordewaeks, vanwaege kansen op zien werk, houw motte besjloete om te sjtoppe bie De Sjter 1. Pak daobie dat verdediger Roel Heffels auch nog drie daag op riej mit un sjtuk in de hakke de feesttent koom oetgewaggeld althans, dat wis ziene concurrent op de backpositie, Randy Wanten, te melden aan de handj van foto s (die waarsjienlijk op eine daag zeen genomme, maar versjpreid euver 3 daag tactisch woorte gelek): Dat Randy Wanten zelf auch neit gans frisj t weekend is doorgekomme bleek waal oet de foto die ziene broor Wesly vanoet zien sjloapkamer noom. Wesly besjreef dat es volgt: ich heur unne houp kabaal boete en herken de sjtum van Randy. Vervolges heur ich gerammel aan t hekwerk van de Sjteinerbos (dae taegeneuver os hoes ligk). Toen woort t effe sjtil en wol ich mich in bed legke. Totdat ich Randy inens om hulp heurde roupe. Dae aerpel woar

12 mit zien zate klitse euver t hek van Sjteinerbos geklomme maar woar neit meer in sjtoat om waer d r oet te komme. Of Wesly, noa t numme van dees foto, de muijte haet genomme om ziene broor te bevrijden, is mich neit bekend: Maar goud, loate veer t maar goan hubbe euver de jonges die wáál fit woare om te voetballe aafgeloupe zondig. Oet die besjikbare sjpelers houw coach Czornyj de volgende opsjtelling gemaak: Kis: Geoffrey Achter: Roel, Tim, Guido R., Paolo Midden: Stan, Ricardo, Guido C. Veur: Bob, Guillermo, Thijs

13 Un debuut in de basis dus veur de 16-joarige Bob Dukers. Sjiek om te zeen dat coach Czornyj vas blief haute aan de visie dat d r zoveul muigelijk Sjteindenaere in De Sjter 1 motte sjpele. Taegesjtenjer Geusselt Sport houw tot noe toe twee kere dik gewonne en is de grote favoriet veur de titel, mit op papier de sjterkste ploug in dees klasse. Maar natuurlijk auch un ploug mit beheurlijk get mennekes in de ploug, die elkaar oet de wedsjtried goan kalle es t neit lekker lup. Helaas woar doa aafgeloupe weekend gein sjproake van. In de eesjte helf ging de wedsjtried nog goud geliek op. Geusselt Sport sjpeelde erg sjlordig en De Sjter zoot d r fel op. Doadoor ontsjpon zich unne wedsjtried mit in de eesjte helf nauwelijks doelriepe kansen. Eine keer dook de sjpits van Geusselt Sport vrie op veur de Sjter-goal, maar keeper Geoffrey redde ziene inzet bekwaam. Mit unne 0-0 sjtandj woort de rus bereik. Noa de rus bleef De Sjter sjtrieje veur jedere maeter en kome d r auch kenskes. Bob koom aan de rechterkantj goud door, lag de bal terugk op Guillermo maar dae vonj de keeper op ziene waeg. Aan de angere kantj toonde de tweede sjpits van Geusselt Sport, dae tot dat moment nog geine bal houw geraak, aan dat hae unne echte sjpits is. Bie de eesjte kans die hae kreeg, loog de bal geliek in t netje. Hoewel Geusselt Sport de ganse tweede helf baeter woar, kreeg De Sjter auch kansen. Oet unne goeie corner kupte Stan Goossens de bal op de lat. Helaas woar t effe later aan de angere kantj wáál pries, wo de sjpits van Geusselt Sport ziene tweede van de middig maakte en doamit de wedsjtried besjliste. Ozze jonges woare doanoa neit meer bie machte om get te forceren en boften dat t vizier bie de taegesjtenjer doanoa neit meer op sjerp sjting. Auch keeper Geoffrey houw nog un paar prima reddingen en verkoom doamit un grotere nederlaag. Al mit al un nederlaag womit te laeve is, taege unne taegesjtenjer dae dit weekend geweun baeter woar. En mit als lichtpuntje veur Sjtein dat ozze 16-joarige debutant Bob 75 minute zeer verdeinstelijk sjpeelde: heel voal sjtrijd, enorme kupkracht, voal lef in zien acties kortom, dat kump waal goud mit dae jong. Al zal hae waal auch geduldig motte zeen en veurluipig lekker gebroek blieve make van de kansen die hae krig. Dan kump die basisplaatsj d r auch waal sjnel genog. Mit zien basis-debuut hoalde Bob auch nog de gezet op moandig:

14 De traditie is dat emes dae mit foto in de gezet kump, mot tractere op vlaai. Mit dank aan de femieje Dukers wurt dit waal de eesjte keer dat die vlaai neit aafkomstig is van de Aldi. Terwiel de mannen van 1 90 minuten knokten taege unne sjterke opponent, zote de Dames van De Sjter/Havantia al op t terras van t Hetjen. Én un praatjes dat ze houwe! Maar ze houwe auch alle recht om die praatjes te hubbe. De dames toonden immers dit weekend aan dat drie daag zoepe handj in handj kent goan mit t winnen van belangrieke wedsjtrieje. Opponent van de dames woar de grote aartsrivaal Haslou. De taegesjtenjer woar de eesjte helf zjwoar de baetere ploug en leidde verdeind mit 1-0. In de rus besjloten de dames en hun coaches echter dat és t voetballend neit lup, dat dan de beuk maar d r in mot. Op handhandige wijze woort de tweede helf d r op gevloage en dat resulteerde, via doelpunten van Bo Knoops en Samantha Vanhouwe, in un 1-2 euverwinning in Aelse. Die euverwinning woort eesj in Aelse, toen op t Hetjen en tot sjlot in de feesttent grandioos gevierd. Grote klasse, dames!

15 Tot sjlot sjpeelde auch os derde elftal unne wedsjtried, oet taege OVCS. Coach Gooren houw dees waek twee keer prima getraind mit zien mannen en houw d r veuraaf vertroewe in. Grensrechter Marco Vaassen moosj, vanwaege euverbelasting, plaatsj numme op de reservebank en zien vlag aafsjtoan aan unne teamgenoot. De reje van die euverbelasting volg aan t eind van dit sjtuk. Ut driede trof in OVCS 2 unne taegesjtenjer dae nét get sjterker woar. Tot aan de rus wis keeper Brian Nitsch mit un aantal prachtige reddingen de 0-0 euver de sjtreep te trekke. Maar noa rus moosj auch hae twee kere capituleren om inzette van OVCS. Op die euverwinning veel niks aaf te dingen. De aafsjleiter van t versjlaag van dees waek geit euver unne man dae un sjtandjbeeld verdeint. Hae woar veurig sezoen de man dae alles regelde veur de Beesten van 5. Dit sezoen is hae leider en grensrechter bie ut driede. En doanaeve is hae al un paar joar

16 jeugdleider bie os clubke. Hae deit dus voal veur de vereiniging. Maar dát is neit de reje dat Marco Vaassen, want euver dem hub ich t natuurlijk, un sjtandjbeeld verdeint. De aanleiding doaveur ligk in de nach van zoaterdig op zondig. De mannen van ut driede woare in de feesttent en houwe doa al de neudige pinten gedronke. Luc Maas woar get euvermoedig gewoare door de alcohol en woar Marco Vaassen un bietje aan t ploage. Marco reageerde dat Luc dan maar ens moosj vlaggen bie de oetwedsjtried taege OVCS op zondig. Wo op Luc zei: Ich vlag waal, es doe te vout noa OVCS toe lups. Kiek, en zo n dinger mosse taege Marco neit zegke. Want hoewel hae pas 23 joar is, is hae qua mentaliteit eine van de ouwe sjtempel. En dus leep Marco om hauf 1 de feesttent oet, zoch op ziene gsm de sjnelste waeg noa Zitterd en begoosj aan zien toch. Ongerwaer heel hae, via de groepsapp van ut driede, zien ploeggenoten op de heugte van zien vorderingen: Maar ja, die foto s houwe auch van internet getrokke kenne zeen. En dus sjtuurde Marco ongerwaeg auch un veiertal filmkes noa zien ploeggenoten, wovan ich un screenshot gemaak hub:

17 Maar eigenlijk deit dees eine screenshot gein eer aan de prestatie van Marco. Immers, neit allein lag hae de tocht van de feesttent noa t terrein van OVCS in Zitterd aaf in de exacte tied dae google maps doaveur gepland houw: iets minder dan 2 oer. Wobie google maps d r dan waarsjienlijk neit van oet geit dasse dae tocht aaflegks mit 20 pils in de nek en ongerwaeg auch nog de tied mos numme om filmkes en foto s te deile. Maar t allersjoonste is dat Marco, es hae bienoa aangekomme is, in zien letste filmke, nog get extra s presteert. Mit de accu van ziene gsm bienoa laeg, realiseert hae zich dat hae keuzes mot make. Hae haet de tillefoon neudig om emes te kenne belle dae m kump ophoale, angesj wach m unne kouwe nach in de dug out. Jedere angere zou d r dan auch veur keize om gein risico te numme. Dae kostbare accu-tied opsjpare veur dat belangrieke telefoontje. Maar Marco is unne teamplayer. Hae realiseert zich dat d r belangrieker dinger in t laeve zeen dan in un werm bed sjlaope. En dus pak hae ziene gsm, rich m op zichzelf, en terwiel hae langs de riekswaeg in Zitterd lup, mit de kop naat van de raege, begint hae aan un speech wo Martin Luther King, Mahadma Ghandi, Winston Churchill en Barack Obama un puntje aan kenne zoege. Omdat r zo geweldig is, zal ich m gans oettypen veur uch. De heerlijke rollende R mot geer d r zelf maar bie denke: Nou, zo es geer mesjiens kent heure loup ich op dit moment onger de brugk bie t ziekenhoes in Zitterd. Ich goan zo de wiek in en dan is t nog un tweehonderd, driehonderd maeter loupe en dan ben ich bie ozze grote opponent. Ich zou zegke: num deze mentaliteit euver, sjtrijd geweun murge, tot t bittere einde.. enne, ich zal uch sjtraks nog get filmkes en foto s sjture van bie OVCS. Ich zal d r gein gekke dinger oethoale, alsjeblief neet Hie is nog

18 ummer de riekswaeg. Dus.. kump allemoal goud, jonges. Zurg maar veur die drie punte murge. Marco, doe bes unne grote klasbak. Mit rech moags doe dich dees waek De Man van de Waek nuime in Sjtein. Hoapelijk wirk die mentaliteit aansjtaekelijk veur alle teams binne os clubke. Want dan wurd t un fantastisch sezoen! Rob Sjulpe