De Sjter 1 en 2 winne; Dames nog ongesjlage; Coupe gepleeg in Sjtein

Transcriptie

1 De Sjter 1 en 2 winne; Dames nog ongesjlage; Coupe gepleeg in Sjtein Veur t eesj dit sezoen houwe alle seniorenteams unne wedsjtried in t zelfde weekend. En dat leverde unne houp punten op, via euverwinningen van de veteranen, ut eesjte, ut tweede en de dames. Maar dat leverde veural auch waer unne haup sjieke verhoale op. Verhoale euver teamgeist, euver Ster-iconen, euver zate voetballers, sjpiejende grensrechters en nog veul en veul meer. Maar doa beginne veer dit weekend neit mit. Veer beginne mit t grote verhoal dat Sjtein op heur grondjvesten deig trillen aafgeloupe waek. Un verhoal, dat de lanjelijke en auch de lokale media neit hoalde. Maar dat uch desondanks noe wurt gebrach, mit dank aan ster-reporter Rene Gooren. Rene sjtruinde de aafgeloupe waek door os sjone nuuje winkelcentrum. Niksvermoedend, geneitend van n lekker fel sjienend herfst-zönke, prakkezerend euver de training die hae dae oavend moosj gaeve aan zien mannen van ut driede. En toen gebeurde t. Rene zoog t, bedach zich gein moment, pakte ziene gsm en lag t vas op de foto. Nog ummer gesjrokke van wat hae aansjouwt houw, deilde hae t mit de sjriever van dit sjtuk in n kort appje: Noa de mislukte coupe in Turkije, noe auch unne mislukte coupe in Sjtein Potverdomme, van zo n berich vilse toch bienoa van diene sjtool aaf. Teentalle gedachten ginge mich door de kop. Woar Graad Coumans t zó beu gewoare dat hae ummer tweede viool moosj sjpele in de gemeinteroad? Houw Huub Driessen de conclusie getrokke dat al dat moele in de oppositie gein zoden aan de dijk zet en houw hae de daad bie t woord gevoeg en burgemeister Leurs mit gesjtrek bein op kneihoogte aafgezaeg? Gelukkig leet Rene mich neit te lang in sjpanning want al sjnel volgde un foto van dae mislukte coupe in Sjtein: Ein van de twee heren op de foto, Mark Habets, woort gevroag om oetlegk en dae koom mit n verhoal dat mit n körrelke zout genomme mot waere.

2 Mark besjreef t gesjprek tusje Roger Daemen en de kapster es volgt: Kapster: Hoe wilt u de haren geknipt, meneer? Roger: Doe maar zoals Mark Habets, juffrouw. Die is altijd zo modieus. Kapster: Die is ook wat lichter dan u, meneer. Roger: Ja, die is behoorlijk afgevallen, juffrouw. Noa un minuut of twintig knippen vuilde Roger zich waer helemoal t menke. Tevreje bekeek hae t resultaat. Mark Habets geit wiejer mit zien besjrieving van de gebeurtenisse: Roger: Habets, piemel, doe bes toch gein foto s aan t make, he? Kapster: Zo meneer, we zijn klaar. Wat vindt u ervan? Roger: Nondeju wat zeen ich d r goud oet. Lekker Kort. Sjus wie Habets. Kapster: Wilt u de achterkant ook even zien? Roger: Nee dat hoeft niet. Dat is meer iets voor mijn tegenstander zaterdag.

3 Die letste briljante zin haet Roger euveriges éch oetgesjproake in de kappers-sjtool. Bie de res van t verhoal van Mark plaatsj ich enkele vroagteikes. Van de mislukte coupe van de nummer 5 in de veteranen-doelmannen-pik-orde goan veer noa n uitting van echte teamgeist. Rudy Crutzen, coach van De Sjter 2 en nummer 6 in de veteranen-doelmannen-pik-orde, volg dit sezoen de trainerscursus. Dat beteikent unne houp hoeswerk veur Rudy maar auch un aantal kere per joar praktijk-cursus. En veur zonne praktijk-cursus hubse natuurlijk sjpelers neudig. Op zich gein probleem natuurlijk want De Sjter haet un breij selectie. Maar ja, es dae cursus dan gegaeve wurt op moandigoavend in Weert en Rudy geach wurt om doa mit 16 sjpelers te versjiene dan hubse natuurlijk un lestig verhoal. Wae wult noe in godsnaam op moandigoavend noa Weert koetsje om doa te acteren in un training onger leiding van KNVB-voetbalprofeet Jo Slenter? Nou, die luuj zeen d r waal degelijk te vinje. Veurnamelijk in de personen van sjpelers van De Sjter 2. En dat is ech grote klasse, jonges. Un teiken van respect noa coach Rudy en ut ultieme bewies van t feit dat de teamgeist bie de mannen van 2 top is. Al woare de bewaegrejene van de diverse sjpelers, zeer oeteinloupend. Joep Nacken moosj effe un wit vuitje bie ziene coach hoale vanwaege t feit dat hae maar ens in de twee waeke kent mitvoetballe. Jari Knoops wol geine zeik aan de ontbijttoafel op dinsdigochtend. En Marko Jevric? Dae wis nog un prima etablissement langs de A2, ter hoogte van Nederweert, wo unne sjportmaaltied genuttigd koosj waere:

4 Van dees randjzaken goan veer ens door noa t voetballende gedeilte van aafgeloupe weekend. D r woar genog te voetballe en dees waek beginne veer ens bie ozze Dames. T is nog maar vruig in t sezoen maar t liek d r sjterk op dat coaches Cindy, Kiki, Tom de Keul en Gerard Martens d r n geoliede machine van gemaak hubbe. Op t programma veur de ladies sjting unne wedsjtried taege de dames van Geertruidse Boys. Un team dat heur beide eesjte wedsjtrieje houw gewonne. Unne geduchte opponent dus. Reguliere correspondente, en vrouw van, Robin Martens woar neit besjikbaar. Euveriges, veur de luuj die get minder goud zeen ingeveurt in t liefdeslaeve van ozze seniorenleden en die noe de term vrouw van koppele aan t feit dat coach Gerard en correspondente Robin dezelfde achternaam hubbe, geer zit d r n bietje naeve. Robin is de vriendin van Bart Linders en Gerard euverwaeg zich te loate omboewe. Volges Piele omdat zien leifdeslaeve d r es vrouw vas neit sjlechter op zal waere es t noe is. Volges Ron Marschal omdat dat Gerard s kansen vergreut om nog ens mit Ron in bed te belanje. Maar goud, van dees letterlijke weergave van n gesjprek vlak veur t begin van de 2 e helf van de wedsjtried van de veteranen, sjakele veer waer terugk noa os Dames team. Robin waor d r dus neit, maar gelukkig woar Jill Janssen bereid om versjlaag te doon (al verzuchtte ze hauverwaege t versjlaag: ich hub hie eigenlijk geine zin in, maar Robin moosj de doeve vore van 11 pes 1): Coach Tom de Keul koom doodleuk un kwarteer te laat aan. Noadat hae viefteen euro in de boetepot houw gedoan, koosj de wedsjtried beginne. De eesjte goeie kans woar veur os ladies. Unne goeie veurzet van Bo koosj door Sanne net neit tot goal gepromoveerd waere. Vervolges kreeg Geertruidse Boys get kansen maar keepster Rambo Maartje sjting jedes keer in de waeg. De Sjter knalde flink d r op. Jill gebroek heur vot om unne taegesjtenjer om te keigele en Siri (doordewaeks ummer leif lachend en behulpzaam in de Action, maar op zoaterdig un beest in t veldj) knalt waer emes ongesjteboave. Ondanks die daadkracht komme ozze dames op 0-1 achter. Bo pep heur teamgenoten op mit de weurt kom op dames, maak niks oet, veer zeen baeter. En dae boodsjap koom euver. Want al sjnel woar ut un prima actie van Sanne, die de bal veurzat op Joy, en die scoorde de verdeinde 1-1. Efkes doanoa unne penalty veur De Sjter. Dyonne geit achter de bal sjtoan en deit wat al die dikbetaalde miljonairs van PSV al waekelangk verzuimen: de bal rustig in de krusing deponeren. 2-1 veur ozze ladies. Geertruidse Boys maak vervolges de 2-2 maar de gael zjwarten gaeve effe flink gaas en oeteindelijk is t de debuterende invalster Kyra mit de besjlissende assist op Bo, die de 3-2 binne knalt. Op de bank wurt al Bo is on fire ingezat. Maar t blif effe batsekniepe de letste minuut. Gelukkig bliek auch keepster Maartje on fire. Dyonne wurt vlak veur tied nog van t veldj gesjtuurd maar dat moag de pret neit drukken. De punten zeen binne. Ozze dames zeen nog ongesjlage dit sezoen en vedette Bo Knoops leet zich juichend fotografere.

5 Van deze glorieuze euverwinning van de dames sjakele veer noa de mannen van 5, die tot aafgeloupe zondig, auch nog ongesjlage woare. Taegesjtenjer woar Lindenheuvel/ Heidebloem 4. Ut betrof unne oetwedsjtried veur ozze godenzonen/zoepnaze. En dat beteikende voetballe op éch graas. De wedsjtried verleep veur ozze mannen neit zo goud. Ralph Gladiator Doek vatte de wedsjtried in 1 zin treffend same: Gistere foute party in MFC de Grous, vandaag foute festijn op t veldj.

6 De 2-0 nederlaag van zondig houw veule oorzaken: koppie van t zoepe, linies te wiet oeterein, veul balverleis, sjlechte eindpasses, Noud waer (gebleseerd) oetgevalle. T zoot allemoal neit mit. Einige hoogtepunt van de middig woar de invalbeurt van de Julio Eglesias van de Maasbendj, Rick Kostons. Neit zozeer vanwaege zien sjpel maar vanwaege zien activiteiten op de reservebank veuraafgoand aan zien invalbeurt. Doek besjrif dat es volgt: De technische staf koosj oeteindelijk vrede hubbe mit de nederlaag en concludeerde dat un baeter ingesjpeeld De Sjter 5, noa de winjtersjtop, op t eige kunstgraas deze taegesjtenjer moosj kenne oprolle. En ein oet-nederlaag is ingecalculeerd op waeg noa de titel, aldus coach Habets. En auch de mannen van 5 toonden zich échte clubluuj door noa aafloup van hunne wedsjtried nog mit 3 man te goan oethelpe bie ut driede. Reporter Ralph Doek sjpeelde zelf euveriges neit mit en wis zich desondanks toch nog te blesseren wie hae euver de reling probeerde te sjpringe Mesjiens un idee veur Ralph om de res van t sezoen op de kinjer van ziene brouer, Maarten, te goan passen op zondigmiddig, zodat El Capitano-in ruste, Maarten, waer kent komme voetballe. Letste woort bie de wedsjtried van ut viefde koom op naam van de sjpelersvrouwen in de dug out, die in koor zeije: Baeter eine Kostons in t veldj. dan eine in de dug out Van ut viefde goan veer noa de mannen van Rene Gooren: de beesten van De Sjter 3. Die houwe unne wedsjtried taege titelfavoriet Lindenheuvel/Heidebloem 2 op t programma sjtoan. Sjmurges vruig koom d r sjlech nuujts veur de coach, in de vorm van un berich van Sjter-icoon én iron man Marco Vaessen dae waarsjienlijk un virus-infectie houw opgeloupe omdat ze op de foute party bie MFC de Grous zien 35 e glaas beier neit goud gesjpeult houwe:

7 Wie t unne echte trainer van un driede elftal betaamp, sjreef coach Gooren de opsjtelling neit op n sjtuk papier maar op de achterkantj van un viltje: Rene experimenteerde tiedes deze wedsjtried mit un verdedigender concept, in de vorm van un systeem. De mannen van 3 kome geliek flink onger druk te sjtoan maar de defensie onger leiding van Roel van de Hill en keeper Brian bleef goud euvereind. Al woar de

8 taegesjtenjer oeteindelijk geweun un paar klassen baeter. Russjtandj woar 0-3. Eindsjtandj 0-7. Gein sjanj taege deze taegesjtenjer. Hoogtepunt van deze wedsjtried koom euveriges waal op naam van unne sjpeler in zjwartgael: un balaanname én pass achter t sjtandjbein van Bjorn van de Bergh, dae doabie neit ens geblesseerd raakte! Noa de wedsjtried zoot coach Gooren d r in eesjte instantie wie n dood vögelke bie, maar wie de meiden van os dames team m un hart onger de reim kome sjtaeke, fleurde hae gelukkig waer op: Van ut driede goan veer door noa De Sjter 2. Die mannen hubbe de sjmaak te pakken de letste waeke en nome die goeie vorm mit noa t prachtige sjportcomplex (aafgezeen van t sjpeelveldj) in Baek bie Caesar. De mannen van 2 houwe in de aanloup noa de wedsjtried sjlech nuujts gekrege, in de vorm van un deip in de nach versjene foto van topverdediger Stefan Frusj Frissen:

9 Coach Crutzen houw desondanks un plaatsj in zien basisteam ingeruump veur de Frusj, mit t idee dat de frusj noa n nachtelijk dieet van beier en shoarma baeter 50 maeter bie dich vandaan langs de lien kent drave, dan naeve dich in de dug out zitte te rotte. Wiejer zoog de opsjtelling van De Sjter 2 d r es volgt oet: Kis: Bastiaan Achter: Sjoerd, Joep, Cyril en Frusj Midden: Mike, Luc en Zoubair Veur: Youri, Marko en Steve Marko Jevric leet veur t begin van de wedsjtried zeen dat hae geprikkeld woar, want wie t gemoel van Joep Nacken m de kael begoosj oet te hange zei hae in onvervalsj plat (mit Montenegrijns accent): Joepie, loat mich neet tot doa komme he, want dan hubse de pannen aan t dansen.

10 Aan t begin van de wedsjtried woort De Sjter compleet euverloupe. De ploug sjpeelde zelf sjlordig en de taegesjtenjer oet Baek woar geweun veul feller en attenter. Noa un minuut of 10 woar t te danken aan keeper Bastiaan dat de 0-0 op t bord bleef sjtoan. Hoewel t sjpel nog ummer neit bes woar, tuinde os tweede zich waal super efficiënt. De eesjte kans woar geliek raak. Luc Spaans zat Marko Jevric vriej veur de keeper en dae scoorde koeltjes de 0-1. Dit woar auch de rus sjtandj. In de rus woort Sjoerd vervange door Jari. Sjoerd moosj es wisselsjpeler noa ut eesjte en de invalbeurt van Jari goof coach Rudy de kans om Jari op rechsback te zette en Frusj noa de linksbackplaatsj (nóg un helf zo wiet muigelijk van de dug out aaf) te verplaatsje. Wiejer koom Frank de plaatsj van Zoebair innumme op t middenveldj om get meer power te brenge doa. Auch de tweede helf begoosj Caesar fel. Maar t woar opnuuj De Sjter dat scoorde. Unne corner noa 55 minute sjpele woort door Joep bie Steve gebrach, dae de 0-2 binnetikte. Caesar koom nog effe terugk tot 1-2 en raakte doanoa nog unne keer de lat. Maar oeteindelijk woare t twee counters die de score noa 1-4 tilden, via goals van Luc en Steve. Un zeer effectief sjpelend De Sjter 2 boekte doamit alwaer un euverwinning en sjteeg zo door noa un top 3-klassering in heur klasse. Dan sjnel door noa os vlaggesjip, De Sjter 1. Dat moosj thoes aantraeje taege rode lantaarndrager Heer oet de geboartesjtand van veteraan Steef van de Woude. Penningmeister Tom de Keul wreef zich in de henj bie dat affiche want L1 zou komme en loate noe net de nuuje wedsjtriedshirts zeen binnegekomme dees waek. De nuuje sjponsor zal tevreje zeen mit zo veul PR. De selectie houw te make mit n aantal aafwezigen. Tim Sipers genoot van un waekske vakantie. En Randy Wanten is nog ummer druk aan t wirke aan ziene terugkkeer van blessureleed. Un aantal waeke geleje woare in dit versjlaag nog foto s te bewonjere van Randy dae zich bie Vouershof in t zjweit aan t wirke woar. De indruk besjting doadoor dat Randy zien hersjtel serieus aan t numme woar. Aafgeloupe waek bleek echter de woare reje dat Randy lid woar gewoare bie Vouershof. Aafgeloupe vriedig woar namelijk t joarlijkse ledenfeest van Vouershof en doa woare alle leden, die zich veur 1 september 2016 houwe ingesjreve, welkom. Randy bleek zich op 31 augustus te hubbe ingesjreve En dus woar Randy aafgeloupe vriedig in sjtoat om te poseren op dat feeske, temidden van Sjteinder sjpierbundels en fitness-freaks wie Bastiaan Muijtjens, Wesly Wanten, Davy Hodselmans en Noud Claessens:

11 Randy woar dae oavend vanzelfsjpraekend auch waer op jacht. Aan sjone milfs gein gebrek in Vouershof. En al sjnel houw hae beet. Of ja, beet. Mit t tact van Math Caanen houw hae un vrouw in de batse geknepe, die woar doa neit van gedeind, goof unne sjtamp achteroet mit heur pumps, bleef mit de hak onger de reim van Randy hange en beinde kwoad noa hoes:

12 Randy poseerde vervolges greutsj mit zien trofee en wach geduldig aaf pes dees prinses heur glazen muiltje kump ophoale.

13 Maar goud, veer woare gebleve bie de wedsjtried van De Sjter 1. Dat L1 koom, woar al un waek bekend en dan zuusse dat zoget auch ummer get luuj aantrek die un tiedje oet de spotlights zeen gewaes en die hoape dat ze auch nog effe in beeld komme. Luuj wie oud- Roda sjpits Frank Demouge. Maar aafgeloupe zondig zuusse dan toch dat van dat soort wannabe-celebs weinig euver blif es ze aug in aug komme mit échte living legends. Dan sjmeek auch unne ex-prof wie Demouge immers om n foto om die thoes aan zien kinjer te kenne loate zeen: Coach Czornyj sjikte zien team de wei in, in de volgende formatie: Kis: Geoffrey Achter: Timo, Guido R., Paolo, Roel Midden: Ricardo, Stan, Guido C. Veur: Thijs, Guillermo, Hassan Noadat sjpelerke van de waek, River Habets, de aaftrap houw gedoan begoosj De Sjter de wedsjtried in n veul te leeg tempo. Heer deig dat euveriges neit veul baeter en beide plouge maakten auch nog veul fouten. Kansen woare d r nauwelijks. Es euvermaat van ramp veel Thijs auch nog geblesseerd oet. Bob Dukers woar ziene vervanger. Noa n beroerd hauf oer voetballe goof Ricardo unne prima deiptepass op Guillermo. Dae kapte de verdediging van Heer oet en sjoot mit links prima binne: 1-0! Helaas koom Heer neit veul later alwaer terugk in de wedsjtried via unne benutte penalty. En vlak veur rus kreeg de Mesjtreichse ploug auch nog unne vrieje trap op de randj van de 16, maar gelukkig veur gael-zjwart woort dae gemis. De tweede helf woar net zo sjlech es de eesjte, aldus reporter Randy Wanten. In de 65 e minuut wisten ozze jonges gelukkig waal de wedsjtried oape te braeke. Hassan dribbelde de 16 in, woort neergelag en Ricardo knalde de penalty binne: 2-1. Noa un sjpannend sjlot van de wedsjtried moch de euverwinning in t kleidlokaal gevierd waere. Omdat auch sjlechte

14 wedsjtrieje gewonne motte waere. En euver t getoonde karakter woar 90 minute niks te klagen gewaes. Dan rest os nog ein seniorenteam dat besjproake mot waere: de veteranen. Die houwe doordewaeks de verjoardaag van Ron Marschal te vieren. Ron woort gefeliciteerd op de groepsapp en die berichten gove un prima beeld van m: Vervolges meljde neo-veteraan Levi Nelissen zich potverdomme alweier aaf veur de wedsjtried. Ron houw doa echter weinig muijte mit:

15 Al woar Ron mit die foto auch waer neit gans tevreje: Willem sjakelde vervolges door noa de taegesjtenjer van t weekend dat zou volgen en kreeg doa get sjiet-lollige reacties op:

16 Vervolge sleet Steeeeeef van de Woude van zich heure vanoet Dubai: Gerard Martens woar totaal neit onger de indruk van Steefs oetsjtepke noa Dubai. Gerard is meer van t sjtom zoepe in eige dörp en reageerde in neit mis te versjtoane bewoordinge:

17 Ron maakde zich echter auch un klein bietje zurg om t lange-termien-effect van t aete van hondj en waarsjuuwde Steef.

18 Noa al dees leifdesverkloaringe koom Leon Fredrix op de proppen mit n foto die jedere angere in verlaegenheid houw gebrach. Ron Marschal bleef echter heel rustig en deilde zelfs nog unne prik oet noa Jos Driessen euver diens vrouw Brigitte.

19 Steef van de Woude houw intusje in Dubai bliekbaar tiejelijk geine toegang tot de groepsapp van de veteranen want hae meljdde zich via de aaf veur de wedsjtried. Gerard Martens noom t doa op volkomen terecht op veur de paar veteranen die neit 3x modaal verdeine:

20 Mit al dae doordewaekse sjaele zeiver achter de rugk, woar de zoaterdig aangebroake. De veteranen verzamelden zich in t kleidlokaal veur hunne wedsjtried taege Puth/Schinnen. Willem Thewissen vertelde dao dat hae bang woar dat hae nooit meer werk ging vinje es hae zien baan zou kwietrake. De reje? Hae houw ziene eige naam ens gegoogled. En ijdel es hae is, houw hae dan auch ens op afbeeldingen gedruk. En doa trof hae t volgende aan (probeer t maar ens, t klop ech): Omdat coach Leon neit aanwezig koosj zeen, koom coach Frans noa binne om de opsjtelling mede te deile. Frans begoosj onorthodox mit de opsjtelling van de 2 e helf om doanoa die van de eesjte helf mede te deile. Frans: Tweede helf sjpeelt Stef in de sjpits. Willem: Is dae hie dan? Ron: Zien vrouw waal. Dat is veul belangrieker. Frans: Eesjte helf sjpeelt Jackie Linders in de sjpits. Piele: Dae is gaar neit hie. Dae kump vandaag auch neit. Will Leurs: Ich goan dan waal in de sjpits de eesjte helf. Gerard: Leurs, gangk dich dreije in de Merode, kuttekop. Door Dennie Vorstermans en Eddy Ubbink woort bie Mat Creemers ens geïnformeerd noa de status van t veteranen oetsjtepke van hauf oktober. Mat sjtelde jederein gerus. Mat: Alles is geregeld jonges. Ich hub veul motte belle maar t is rondj. Op n gegaeve moment houw ich unne pruus aan de lien en dae haet os plaatsje geregeld, midden in de tent. Dennie: Joa, veur 250 euro de man extra zeker. Ron: Es de vrouwluuj dan veur niks zeen, vinj ich dat nóg neet te veul.

21 De eesjte helf woar t voetballe maar erg matjes. Zeker de eesjte twintig minute houw De Sjter continu de bal, maar de kansen woorte neit benut. Totdat Robbie van der Linden de turbo aan zat. Binnen un kwarteier sjpele, scoorde hae veier kere en dus ginge veer mit unne 4-0 veursjprong rusten. Coach Frans wisselde Robbie mit de weurt: angesj krig r dalik nog kapsones auch. Robbie zoot op dat moment echter al lang aan breid aan t buffet mit n pilske veur de naas. In meer dan ein helf sjpeeltied houw hae sowieso geine zin. Noa de rus woare t goals van Stef Conjour (2x) en Stefan Janssen die de score op 7-0 brachte. In de letste minuut mog Puth/Schinnen via unne penalty nog get terugk doon. Tót dat moment houwe de keepers Ron Marschal (1 e helf) en Roger Daemen (2 e helf) hun doel bekwaam sjoon gehaute. Roger deig dat noa de rus euveriges mit 2 prachtige, katachtige reddingen. Ron deig dat veur rus door de einige bal oppe goal (unne prachtige poging direct vanoet de aaftrap, dae op t daak van de goal eindigde) euver de goal haer te kieke. Rob: Woarse neit effe bang dat dae bal d r in ging vallen, Ron? Ron: Gaar neet. Alles wat euver mich haer geit, geit euver de goal. En dat woar neit de einige verwiezing noa zien eige postuur, die Ron maakte. Ron: Onger de wedsjtried koom n vrouw van Puth aanloupe en die heur ich zegke: och, kiek doa. Doa sjteit unne kleine in de goal. Willem: Dat is auch neet leuk. Ron: Doa op zei ich: esse m in de moel krigs, kumpse toch aan t kuèke, maedje. Auch Willem Thewissen houw euveriges in t veldj waer get aan de handj. Willem veroverde unne bal maar doabie leep ziene taegesjtenjer taege Willem aan. Kermend ging de taegesjtenjer noa de grondj. Wie Willem eesj houw vasgesjteld dat d r gein hard feelings woare, zei hae: in t vervolg mosse dich dreugwoosj oppe botterham doon, in plaatsj van hagelsjlaag. Noa aafloup in de kantine woort al veuroetgeblik op de wedsjtried taege OVCS van kommend weekend. Veurig joar woar noa aafloup van dae wedsjtried nog get heisa omdat Mat Caanen un sjpelersvrouw van OVCS unne tik op de batse houw gegaeve. Ondanks oetgebreide excuses van Mat in zowel Nederlands es Pools, bleef men doa euver n scene make. Oeteindelijk bleek de vrouw in kwestie euveriges Oekraiens te zeen en neit Pools, dus wellicht woar dat de reje dat de welgemeinde excuses neit aankome. Willem: Caan, kommende waek motte veer noa OVCS. Die goan dan mesjiens belle ofs doe mitdeis. Wat wuls doe zelf? Math: Zegk ze maar dat ich neit mitvoetbal, maar allein noa de kantien kom. Eddy: Allein pools-hoogte numme zeker. En doamit zeen veer alwaer aan t eind gekomme van t versjlaag van dees waek. Ich loat uch achter mit n foto die mich bereikte via un neit-nader-te-nuime bron. Ut betruf un foto

22 van unne veteraan dae al joare bekend sjteit es Neerlands bekendste ambassadeur van de herenslip-zonger-piepkes. En die rol nump hae heel serieus, getuge dees in café de Poart genomme foto: Pes volgende waek Rob Sjulpe