TEKS: Spreuke 5:15-19 HK 41. Die Here wil trou en vreugde in huwelike hê

Transcriptie

1 SKRIFLESING: Spreuke 5 TEKS: Spreuke 5:15-19 HK 41 TEMA: Die Here wil trou en vreugde in huwelike hê Psalm 89 : 1 Skrifberyming 14 (8-1) : 1, 2 Psalm 59 : 1, 10 Psalm 128 : 1, 2 Skrifberyming 78 (13-3)

2 2 Die verskil tussen n ware Christelike lewe en n lewe sonder God, word deesdae al hoe duideliker gesien by huwelike en by die ander fasette van man-en-vrou-wees in hierdie wêreld. Dis glad nie meer n geheim nie - dat al hoe minder paartjies trou en al hoe meer sommer net saamwoon; - dat egskeidings toeneem; - dat selfs lang-getroudes se huwelike in elk geval nie is wat dit moet wees nie nie vir húlle n vreugde nie en nie vir hulle kinders n voorbeeld nie. En dan praat ons nog nie eers oor die enorme bedryf van onsedelike literatuur en films en vertonings en watter impak dit op mense en spesifiek op baie getroudes se huwelikslewe ook het nie. Die huwelik as n instelling word bedreig. En daarom is dit nodig om weer die sewende gebod te hoor, n gebod waarin die Here, onder andere, die huwelik beskerm deur te beveel: - jy mag die huwelik, die eg, nie breek nie! Kom ons kyk vanoggend na hierdie gebod in die lig van hierdie Skrifgedeelte, veral verse 15-19, waar die Here ons laat hoor dat Hy trou en vreugde in huwelike wil hê. Ons kyk eers na die feit dat die huwelik God se werk is, dan na die trou wat Hy daarin wil hê en dan na die vreugde. 1. DIE HUWELIK IS GOD SE WERK U moenie die storie glo wat deesdae orals vertel word - dat die huwelik maar net n menslike instelling is nie; - dat n papiertjie van die staat en n godsdienstige seremonietjie niks beteken nie. Net die feit al dat die Here sê dat die huwelik nie gebreek mag word nie, wys mos dat die huwelik Sy goedkeuring wegdra, dat dit iets is wat Hy wil hê wat in stand gehou moet word.

3 3 Die Here Jesus het dit dan ook duidelik in antwoord op n vraag oor egskeiding gesê, dat dit van die skepping af God se bedoeling was en God se werk was dat n man en vrou in n lewenslange verbintenis saamgevoeg word. 1 En dwarsdeur die Bybel word die huwelik hierdie plegtige verbintenis wat openlik aangegaan word as n eerbare instelling beskou en hanteer. Dit spreek boekdele dat die Here Jesus daardie bruilof in Kana bygewoon het en Sy eerste wonderwerk juis dáár gedoen het. 2 Die huwelik is God se werk. n Spesiale werk van God. Dit blyk uit die Bybel dat Hy die huwelik gemaak het om n beeld, n prentjie, te wees van Sy verhouding met Sy volk, met Sy kerk. 3 Soos Hy Hom uit genade aan ons verbind het in n vaste verhouding (die genadeverbond), waarin Hy onderneem het om sekere dinge vir ons te doen en te gee en waarin Hy van ons vereis om op sekere maniere teenoor Hom op te tree, net so wil Hy hê dat n man en n vrou wat saam deur die aardse lewe gaan, dit doen in n vaste verhouding (die huwelik) waarin Hy hulle die opdragte gee en hulle dit dan onderneem om op sekere maniere teenoor mekaar op te tree. Die man moet byvoorbeeld in sy selfopofferende liefde vir sy vrou iets van die selfopofferende liefde van die Here vir Sy kerk weerspieël, 4 en die vrou moet in die eerbied wat sy vir haar man wat haar só liefhet, betoon, iets weerspieël van die eerbied wat die kerk vir hulle Here en Verlosser het 5 Die huwelik is n maaksel van die Here. 2. HY WIL TROU IN HUWELIKE HÊ Een van die wonderlikste kenmerke van die genadeverbond wat die Here met Sy kinders gesluit het, is die feit dat Hy volmaak getrou bly. Dit beteken 1 Mat 19:3-6 2 Joh 2: Jes 54:5; Efes 5:24-25, 32 4 Efes 5:25 5 Efes 5:24,33

4 4 - dat Hy die ondernemings wat Hy teenoor ons gemaak het Sy beloftes altyd nakom, selfs al kos dit Hom dan dat Hy Sy enigste Seun aan die kruis offer vir ons sondes om só Sy belofte te hou dat Hy ons van al ons sondes sal verlos! - dat Hy die band wat Hy met ons het, nooit van Sy kant af sal breek nie; - dat Hy nie een van Sy kinders ooit sal weggooi nie, maar hulle in Sy liefde deur dik en dun na die ewige Vaderhuis toe sal dra. Die Here is getrou. En nou wil Hy hê dat ons hierdie trou van Hom moet afbeeld in ons huwelike deur aan ons lewensmaats getrou te bly. Een van die dele in die Skrif waarin die Heilige Gees dit vir ons leer, is Spreuke 5. Hier word vir die man gesê en terloops, al is Spreuke gegiet in die vorm van onderrig aan n jong man, geld dit wat hier staan natuurlik net so veel vir vroue ook 6 hier word vir die man gesê: - Drink water uit jou eie reënbak en strome uit jou eie put. 7 - Wees getrou aan jou eie vrou. - Moenie by n ander vrou betrokke raak nie, 8 maar leef met jou eie vrou saam. - Hê n verhouding met háár! En so moet dit bly, sê die Here in die sewende gebod: - ons moet getrou bly aan mekaar. n Getroude man of vrou wat uit n ander put/reënbak drink, sondig. Owerspel is sonde. Vir n getroude is n spesiale verhouding met n ander man of vrou as jou lewensmaat, sonde. Om n ander een selfs net met n kyk te begeer, is al sonde, het die Here Jesus ons geleer. 9 6 Net soos wat die jong man byvoorbeeld hier teen n slegte vrou gewaarsku word, net so wil die Here hê dat vroue ook gewaarsku moet wees teen slegte mans! 7 Vers 15 (AV 1933/53) 8 Verse Mat 5:28

5 5 Of jy die ander een in lewense lywe sien, of in n tydskrif of op jou TV- of rekenaarskerm, maak nie saak. Net om n ander een te begeer, maak jou al in die oë van die Here n egbreker. Daarom bely ons as kerke dan ook in HK 41:109 dat die Here in die Bybel nie net die daad van owerspel verbied nie, maar ook die begeerte daartoe, die gedagte daaraan, praatjies daaroor, suggesties daarvan, situasies wat jou daartoe kan verlei. Jy mag die eg nie breek deur n ander een te hê of te begeer nie, maar jy moet getrou bly. Dis wat die Here met die sewende gebod beveel. En dat die Here ook met hierdie gebod dodelik ernstig is, blyk duidelik uit die Bybel. Ons word nie net gewaarsku teen die bitter gevolge wat ontoelaatbare verhoudings hier op aarde vir ons kan inhou nie kyk byvoorbeeld hoe die jongman in hierdie hoofstuk daarop gewys word hoe n buite-egtelike verhouding jou beste jare kan opsluk, jou finansieel kan ruïneer, jou plek in die kerk in gedrang kan bring, 10 jou later met selfverwyt gaan oorlaai maar ons word ook in die Bybel gewaarsku teen die ewige gevolge wat ontoelaatbare verhoudings kan hê: - as jy sonder berou en bekering die sewende gebod oortree, sal jy nie die koninkryk van die hemel beërwe nie; - geen egbrekers sal deel kry aan die koninkryk van God nie. 11 Ons moet die Here se trou aan ons afbeeld deur ons trou aan mekaar in ons huwelike. 3. HY WIL OOK VREUGDE IN HUWELIKE HÊ Die wil van die Here is nie maar net dat ons getrou sal bly, al is die huwelik dan nou nie vir jou lekker nie. Dis ook Sy wil dat ons huwelike gelukkig sal wees, dat daar vreugde in ons huwelike sal wees: 10 Vgl vers 14b (AV 1933/53) 11 1 Kor 6:9-10

6 6 Sing die lof van jou eie fontein, verheug jou oor jou eie vrou, so vol liefde, so mooi soos n takbok, soos n ribbok. Geniet voluit van haar liefkosings, laat dit jou deurentyd bedwelm. 12 Jy moet die huwelik geniet en die huwelikslewe en die huweliksliefde. Jy moet doelbewus bly wees oor die lewensmaat wat die Here vir jou gegee het. En julle moet mekaar liefhê. Word bedwelm deur mekaar se liefde. En ja, hierdie uitdrukking verwys natuurlik ook na die seksuele deel van die liefde. Die Bybel is nie negatief oor die seksuele nie. Die Here verbied die seksuele buite die huwelik. Jy mag hierdie gawe nie geniet buite die binding en sekuriteit van die huwelik, hierdie lewenslange verbintenis tussen n man en n vrou, nie. En daarom is seks tussen ongetroudes en prostitusie en pedofilie en homoseksualisme en lesbianisme alles verkeerd sonde teen die sewende gebod. Maar binne die huwelik gee die Here die seksuele n plek. Dink maar net aan die boek Hooglied in die Bybel, n boek wat ook die fisiese aantrekking van die bruid en haar man besing. Dis n gawe van die Here. 12 Vverse (AV 1983)

7 7 En hierdie liefde tussen n man en n vrou ál die fasette daarvan is een van die mooiste dinge wat die Here vir ons op hierdie aarde gegee het; en daarom wil Hy hê dat hierdie liefde in al sy fasette vreugde in n huwelik moet bring. Onthou u dat selfs die Prediker, wat soveel van die donker van die aardse lewe raakgesien en neergeskryf het, ons aanspoor: Geniet die lewe met die vrou wat jy liefhet 13 Natuurlik is geen huwelik net maanskyn en rose nie. Die Here gee ons ook in n huwelik vir mekaar om saam die laste van die lewe te dra, om mekaar daarmee te help, om saam te werk op verskillende terreine van die lewe, om saam Sy verbondskinders te kry en groot te maak, om Hom saam te dien alles dinge wat partykeer moeilik is en offers verg en swaarkry meebring. En dan is ons nog sondaars ook, wat veroorsaak dat daar soms ook verkeerde en onaangename dinge tussen huweliksmaats gebeur dinge waarvan ons ons natuurlik moet bekeer met die krag wat die Heilige Gees gee en waarvoor ons mekaar moet vergewe met die liefde wat die Heilige Gees gee net soos die Here ons al ons ontelbare sondes vergewe het Geen huwelik is nét vreugde nie. Maar geen huwelik moet ook sónder vreugde wees nie. Die Here wil vreugde in ons huwelike hê. Net soos ons die eg nie na buite moet breek deur buite-egtelike verhoudings aan te knoop nie, so moet ons ook nie die eg/huwelik hier binne breek deur liefdeloosheid en vreugdeloosheid nie Die Here wil trou én vreugde in ons huwelike hê. TOEPASSING As die huwelik in ons tyd op allerhande maniere bedreig word en geminag word, is dit sekerlik ons taak as kinders van God om die huwelik hoog te hou, 13 Pred 9:9

8 8 om hierdie instelling van God en Sy goeie bedoeling daarmee, duidelik met ons monde te laat hoor en met ons voorbeelde te wys. Ons moenie rêrig saampraat wanneer die getroude lewe afgekraak word nie, selfs al het ons ervaring van die vernietigingswerk wat sonde ook in n huweliksverhouding kan doen. Dis nie die huwelik wat die probleem is nie, maar die sonde! En as jy nog nie getroud is nie, of as jy nie meer getroud is nie, bly kuis soos wat die Here dit van Sy kinders verwag, en bid en soek en wag vir n lewensmaat as jy een begeer. Behalwe as Hy n baie goeie rede het om anders te doen, sal die Here een of ander tyd vir jou iemand gee met wie jy kan trou en met wie jy dan die liefdesvreugde in al sy fasette n leeftyd lank sal kan geniet. En ons wat getroud is? Bly getrou, sê die Here in die sewende gebod en ook in Spreuke 5. En werk doelbewus aan die vreugde in die huwelik. Bring dit terug as dit verlore geraak het. En help mekaar met die laste van die lewe. En stop die lelike, die sondige. Vergewe mekaar dit tot sewentig maal sewe toe! So kan ons daaraan meewerk dat die huwelik weer geëer word in hierdie wêreld en weer aantreklik word, ook vir ons kinders. En so sal ons huwelike al hoe meer word wat dit bedoel is om te wees: - n prentjie van die wonderlike en onverganklike verbintenis tussen dié Bruidegom, die Here Jesus, en Sy bruid, al die ware gelowiges AMEN