Preek Hebreërs 4:9-11

Transcriptie

1 1 Preek Hebreërs 4:9-11 (Preek gelewer tydens oggenddiens in Welkom-Noord op Sondag 21 Augustus 2016) (Dit is die vyfde preek van n reeks oor die tema Afrigting vir die lewe en gaan oor die vraag: Hoe rus ek vir die wedloop van die lewe?) Voor die erediens Sing: Lied 464:1,4 Sing: Psalm 19-3:1 Sing: Lied 509:2,4 Afkondigings Stilte Tydens die erediens: Votum Groetseën Loflied: Psalm 92-1:1,2 Geloofsbelydenis: Twaalf Artikels Die Wet van die Here Gebed Skriflesing: Hebreërs 4:1-11 Sing: Skrifberyming 17-2:5,6,7 Fokus: Hebreërs 4:9-11 Preek: Tema: Laat die rus van die sabbat jou verkwik vir die wedloop van die lewe. Gebed Diens van barmhartigheid Sing: Lied 588:1,2,3 Wegstuurseën Amen: Skrifberyming 13-3 (Die preek begin op die volgende bladsy)

2 2 Preek: Geliefdes in ons Here Jesus Christus Inleiding Enige goeie afrigter maak voorsiening vir rus in die oefenprogram wat hy vir sy atlete uitwerk. n Moeë atleet kan nie sy beste lewer nie. Daarom moet hy rus ook. Dieselfde geld vir die wedloop van die lewe waaraan ons as gelowiges deelneem. Die wedloop van die lewe is weens die eise van ons tyd nie maklik nie. Dit maak ons moeg. Daarom het ons rus nodig. Hierdie preek gaan oor watter tipe rus God (ons geestelike Afrigter) vir ons gee, sodat ons effektief aan die wedloop van die lewe kan deelneem. In kort kan ek sê dat dit die rus van die sabbat is. Met die rus van die sabbat bedoel ek nie die sewende dag van die week oftewel die sabbatdag nie. Nee, met die rus van die sabbat bedoel ek die sabbatsrus waarvan ons in Hebreërs 4:9 lees. Die rus van die sabbat n Tevredenheid en n kalmte dat alles mooi en reg is Wat behels die rus van die sabbat? Die antwoord op hierdie vraag is in Hebreërs 4:10 (1983/92-Vertaling):... want elkeen wat in die rus van God ingaan, rus van sy werk, net soos God van Syne. Die rus van die sabbat behels dus om van jou werk te rus soos God van sy werk rus. Hoe rus God van sy werk? In Genesis 1:31 staan daar dat God gekyk het na alles wat Hy gemaak het, en dit was baie goed. En dáárna het Hy gerus. God rus nie, omdat Hy moeg geword het en daarom eers sy kragte moes herwin nie. Nee, God se rus beteken dat Hy sy werk klaar gemaak het. God se rus beteken dat Hy met vreugde kon terugkyk op sy skeppingswerk. Ons sou God se rus kon beskryf as n tevredenheid en kalmte dat alles mooi en reg is. Alles is mooi en reg, omdat God sy werk volmaak voltooi het. Die rus van die sabbat is om híérdie rus (die rus van God) te hê. Die rus van die sabbat n Toestand van seën en eenwees met God In Genesis 2:3 staan daar dat God die sewende dag geseën en dit geheilig het. God se rus beteken nie dat Hy niks gedoen het nie. God het wel klaar geskep, maar Hy het op verskeie maniere betrokke gebly by sy skepping. Hy het sy skepping geseën en dit geheilig, dit wil sê dat die skepping aan Hom gewy is. Daar was n geseënde eenwees tussen God en sy skepping, in volkome harmonie, in rus en in vrede. Die rus van die sabbat is dus: n Tevredenheid en kalmte dat alles mooi en reg is. n Toestand van seën en eenwees met God, in volkome harmonie, in rus en in vrede.

3 3 Die rus van die sabbat Iets wat voorlê Kyk na Hebreërs 4:9 (1983/92-Vertaling): Daar wag dus nog steeds n sabbatsrus vir die volk van God,... Hiervolgens is die rus van die sabbat iets wat nog voorlê. Dit wag nog vir die volk van God. Dit is die ewige rus wat aan ons belowe is en wat ons eers na hierdie lewe ten volle ontvang. Dáár in die hemel by God sal alles mooi en reg wees. Ons sal geseënd wees en ewig een met God wees, in volkome harmonie, in rus en in vrede. Ons sal soos God rus, in dié sin dat ons taak op aarde voltooi is. Daarom staan daar in Openbaring 14:13 dat dié wat in die Here sterwe, sal rus van hulle arbeid, want alles wat hulle gedoen het, volg hulle. Dit is soos n atleet wat die Comrades voltooi het, en na die tyd dit met dankbaarheid en vreugde kan vier. Dit is soos Paulus in 2 Timoteus 4:7-8 (1983/92-Vertaling) sê: Ek het die goeie wedloop afgelê; ek het die wenstreep bereik; ek het gelowig enduit volgehou. Nou wag die oorwinnaarskroon vir my, die lewe by God. Liewe medeburger van God se volk, die belofte om in die rus van die sabbat in te gaan, is nog steeds van krag. Dit is n belofte waarmee jy die wedloop van die lewe vol geloof en hoop kan hardloop. Laat hierdie belofte jou verkwik, wanneer die wedloop van die lewe jou moeg en afgemat laat. Die rus van die sabbat Nou reeds Die feit dat daar volgens Hebreërs 4:9 n sabbatsrus vir die volk van God wag, beteken nie dat ons nou niks daarvan het nie. Hoewel die volle vervulling van die belofte om in God se rus in te gaan nog vir ons voorlê, kan ons deur die band wat ons met God het, nou reeds iets daarvan beleef. In Sondag 38 van die Heidelbergse Kategismus bely ons dan ook dat ons die ewige sabbat reeds in hierdie lewe begin. Jy begin die ewige sabbat deur elke dag van jou bose werke te rus en die Here deur sy Gees in jou te laat werk. Dan kan jy jou verlustig in die nuwe lewe waar die Heilige Gees beheer oorneem in jou lewe. Dan dien jy God en aanbid en verheerlik jy Hom. Die rus van die sabbat Slegs te kry deur geloof in Jesus Christus Weens die sondeval is alles nie meer mooi en reg nie. In Genesis 3:18-19 staan daar dat die aarde deur die mens se toedoen vervloek is. Hy sou voortaan met swaarkry n bestaan daaruit maak. En hoe beleef ons dít nie elke dag nie! Hoe beleef ons nie die swaarkry van die werk en die lewe nie! Verder sou die aarde vir die mens dorings en dissels laat uitspruit. Ja, frustrasies en teëspoed en siekte en dood het deel van die lewe geword. Dit is nie meer mooi en reg nie. Dit is nie meer geseënd nie. Die wonderlike saamwees met God is nie meer daar nie. Adam en Eva het gaan wegkruip, toe God in die aandwindjie in die tuin gewandel het.

4 4 Die goeie nuus van die Evangelie is dat ons Here Jesus Christus hierdie vloek van die sonde weggeneem het. Hy het in ons plek n vervloekte geword en aan die kruis gesterf. Hy het kom reg maak wat sonde hier stukkend gemaak het. In Hom word alles weer mooi en reg. In Hom word ons geseën met al die seëninge van die Gees wat daar in die hemel is. Deur Hom vind ons weer die wonderlike eenwees met God. In Hom vind ons die rus van die sabbat. Hy is ons Sabbat. Die rus van die sabbat (naamlik die tevredenheid en kalmte dat alles weer mooi en reg is en die toestand van seën en eenwees met God) is iets wat jy slegs kry as jy in Jesus Christus glo. Geloof laat jou ophou met alle pogings om jouself deur jou eie werke te red. Dit gee aan jou die tevredenheid en klamte dat jy uit genade gered is, as gevolg van die verlossingswerk van Jesus Christus. Dit bevry jou van die juk van die wet. Dit lei daartoe dat jy jou verlustig in die nuwe lewe wat jy ontvang het. Die rus van die sabbat Die rus wat jy nodig het vir die wedloop van die lewe Weens die eise van die lewe moet ons sorg dat ons ook rus kry. Liewe mede-atleet in die wedloop van die lewe, wat doen jy om te sorg dat jy genoeg rus kry? Die eerste vorm van rus wat almal van ons nodig het, is ons nagrus. Om elke nag goed te slaap en uit te rus, sodat jy die wedloop van die lewe kan hardloop. Indien jy sukkel om in die nag te slaap, kyk of jy n oplossing vir die probleem kan kry. Een moontlike oplossing is om n dokter te gaan sien. As jy medisyne nodig het om die probleem op te los, moenie huiwer om dit te gebruik nie. Soms is n mens se kragte of energie net te veel getap, sodat jy nie sonder medisyne sal kan regkom nie. Nog iets wat jy kan doen, is om vir jouself af te vra of jou gesukkel met jou nagrus nie dalk is omdat jy n slaaf van jou werk of jou bekommernisse of enige iets anders is nie. Indien dit wel die geval is, gaan kyk of die rus van die sabbat jou nie dalk kan help om jou van hierdie slawerny vry te maak nie. n Volgende vorm van rus wat almal van ons nodig het, is om elke week n rusdag te hê. Ons is nie gemaak om elke dag van die week te werk nie. As jy nooit afvat nie, moet jy vir jouself afvra of jy nie dalk n slaaf van jou werk geword het nie. Wat natuurlik hierby aansluit, is dat jy ook met vakansie moet gaan. Hoewel die dinge wat ek so pas genoem het (naamlik jou nagrus en om elke week n rusdag te hê en met vakansie te gaan) baie belangrik en baie kosbaar is, is dit net deel van die antwoord. Daar is nog n vorm van rus wat onontbeerlik is om die wedloop van die lewe effektief in die geloof te hardloop, en dit is die rus van die sabbat. Wanneer jy ontstel word deur alles wat lelik en verkeerd in die wêreld is... (en kan ons nie ontstel word nie! Veral as die wêreld nie op my skedule is nie of as dinge nie gebeur soos ek dit graag wil hê nie of as ek deur hierdie een en daardie een gefrustreer word.) Wanneer jy dan ontstel word, help die tevredenheid en kalmte en seën en eenwees met God wat die rus van die sabbat aan jou gee, jou om oor jou ontsteltenis en frustrasies en angs en seer te kom. Al is dit hoe onstuimig in jou gemoed, kan die rus van die sabbat jou in staat stel om weer rustig te word. Wanneer jy deur skuldgevoelens verteer word, behels

5 die rus van die sabbat dat jy vergewe is en daarom vrede kan vind. Wanneer bitterheid jou verteer, stel die rus van die sabbat jou in staat om te vergewe en so weer rus vir jou siel te vind. Wanneer iets of iemand jou kwaad maak, stel die rus van die sabbat jou in staat om nie in woede uit te bars nie, maar jou woede reg te hanteer. So kan ons aangaan en nog voorbeelde noem. 5 Weens die baie frustrasies van die lewe en die onsekerheid van die tye waarin ons lewe en die seerkry wat ons ervaar en alles wat verkeerd en lelik in die wêreld is, is dít baie keer die prentjie wat ons van die lewe en die wêreld het. En al beteken jou nagrus en jou afdag en jou wegbreek naweek en jou vakansie hoe baie, verander dit nie hierdie harde werklikhede van die lewe nie. Na jou nagrus of afdag of wegbreek naweek of vakansie moet jy maar weer terug na hierdie harde werklikhede. Jou nagrus of afdag of wegbreek naweek of vakansie was in n sekere sin net n ontvlugting van die verkeerd en lelik van die wêreld. Met die rus van die sabbat is dit anders. Die rus van die sabbat is om te midde van die lelik en verkeerd van die wêreld n ander werklikheid te ontdek: Die werklikheid van God Drie-enig se werke: Dit wat God deur al die eeue gedoen het en steeds doen en sal doen. Dít is n ander prentjie. Dit is n mooi prentjie. Dit is n prentjie waar alles reg is en waar daar vrede is en eenwees met God. Hierdie rus is altyd daar. Dit is nie n ontvlugting nie. As ek teruggaan na die harde werklikhede van die lewe dra ek dit nog by my. Om dít te kan sien, het jy geloofsoë nodig, om verder as hier en nou te sien, om byvoorbeeld soos Abraham uit te sien na die stad wat vaste fondamente het en waarvan God self die ontwerper en bouer is (Hebreërs 11:10). Hierdie nuwe werklikheid van die rus van die sabbat is n werklikheid wat aan jou tevredenheid en kalmte gee. Dit is n werklikheid wat nie verdwyn, wanneer jy na die harde werklikhede van die lewe terugkeer nie. Dit is n werklikheid wat jou verkwik om die wedloop van die lewe te hardloop. Dit is die rus wat God (jou Geestelike Afrigter) vir jou gee. Die rus van die sabbat Beywer jou daarvoor Kyk na Hebreërs 4:11 (1983/92-Vertaling): Laat ons ons dan beywer om in daardie rus in te gaan, sodat niemand hulle voorbeeld van ongehoorsaamheid navolg en ook omkom nie. Liewe mede-gelowige, jy moet jou daarvoor beywer om die rus van die sabbat (soos dit vanoggend in hierdie preek aan jou verduidelik is) te verkry. Jy moet jou daarvoor beywer om die tevredenheid en kalmte te verkry dat alles mooi en reg is, omdat God alles mooi en reg gemaak het. Hierdie opdrag is baie belangrik, veral in die lig van Hebreërs 4:1, waar die volgende geskrywe staan (1983/92-Vertaling): Terwyl die belofte om in sy rus in te gaan nog van krag is, moet ons oppas dat dit nie miskien later blyk dat een van julle agtergebly het nie. Hebreërs 3:7-4:11 gaan oor die gevaar om die rus van die sabbat te mis.

6 6 Veral twee dinge kom in hierdie gedeelte na vore as redes waarom jy die rus van die Sabbat kan mis, naamlik ongehoorsaamheid en n gebrek aan vertroue op God. Dit is wat met Israel gebeur het. Moenie dieselfde fout maak as wat Israel destyds in die woestyn gemaak het, toe hulle teen God in opstand gekom het nie. Moenie deur sonde jouself van die rus van die sabbat ontneem nie. Dink byvoorbeeld net hoe oneerlikheid of skelmstreke of diefstal of ontrouheid jou rus en kalmte kan wegneem, omdat jy heeltyd met die vrees lewe dat jy uitgevang kan word. Ongehoorsaamheid neem die rus van die sabbat weg. Gebrek aan vertroue op God neem die rus van die sabbat weg. Glo in God, vertrou op Hom en bly aan Hom gehoorsaam. Die rus van die sabbat Vier dit In die Ou Testament het die volk Israel die sewende dag van die week as sabbatdag gedenk. Ons doen dit egter nie meer nie. Die rede hiervoor is dat die sabbatdag volgens Kolossense 2:17 maar net die skaduwee is van wat sou kom, naamlik Christus. Noudat Christus gekom het, het ons nie meer die skaduwee (die sabbatdag) nodig nie. Tog moet ons die rus van die sabbat vier net soos God sy skeppingswerk gevier het. Die manier waarop ons dit kan vier, is om dit elke dag te vier, om elke dag daaruit te leef, om elke dag die tevredenheid en kalmte te ervaar dat ons Here Jesus Christus alles weer mooi en reg gemaak het, om elke dag te ervaar dat ons in Hom geseënd is en een is met God. Ervaar elke dag hoe die Heilige Gees jou lei om op n nuwe manier te lewe. Lewe elke dag saam met die Here. Dien God en aanbid en verheerlik Hom elke dag van jou lewe op elke terrein van die lewe. Veral Sondae het jy n spesiale geleentheid om die rus van die sabbat te vier. Sondag is die eerste dag van die week, die dag van die Here. Hoekom die dag van die Here? Want dit is die dag waarop ons Here Jesus Christus uit die dood opgestaan het. Dit is die dag waarop Hy die dood oorwin het. Dit is soos wanneer n mens sê: Jou verjaardag is jóú dag, vier dit! So is Sondag, die opstandingsdag, die dag van die Here! Vier dit! God het dit so beskik dat die kerk op hierdie dag eredienste hou. En Hy sê in Hebreërs 10:25: Moenie daarvan wegbly soos party se gewoonte is nie. Geliefdes, kom Sondae kerk toe. Kom herdenk ons Here Jesus Christus se oorwinning oor die dood. Kom vier dit dat Hy sy werk voltooi het. Kom vier dit dat jy daardeur die rus van die sabbat ontvang het. Kom ervaar die tevredenheid en kalmte dat God alles mooi en reg gemaak het. Kom ervaar die seëninge van die Gees en die eenwees met God. Slot Dit is rof daarbuite. Dit is moeilik daarbuite. Die eise daarbuite kry ons baie keer onder. Dit laat ons moeg en afgemat en gefrustreerd en angstig en kwaad. Jy kan daaroor kom. Maar dan moet jy leef uit die rus van die sabbat. Dit is die rus wat jy nodig het, om die wedloop van die lewe effektief in die geloof te hardloop. Amen.