Preek 2 oor gesag (vyfde gebod)

Transcriptie

1 Preek 2 oor gesag (vyfde gebod) (Preek gelewer tydens gesamentlike erediens van Geref. Kerke Welkom en Welkom-Noord op Sondag 13 Augustus 2017) Prediker: Ds JL van der Schyff Voor die erediens Sing: Lied 475:1,2 Sing: Lied 550 Afkondigings Stilte Erediens: Toetredelied: Psalm 118-2:5 Votum Groetseën Lofprysing: Psalm 118-2:7,8 Geloofsbelydenis: Twaalf Artikels Die Wet van die Here: Skrifberyming 9-1:1-10 Sing: Skrifberyming 9-1:11 Gebed Skriflesing: Johannes 13:1-17, Efesiërs 5:23 en Efesiërs 5:25-30 Sing: Lied 530:1,2,3 Fokus: Johannes 13:13-15 en Efesiërs 5:23 Preek: Tema: Oefen gesag dienend uit. Gebed Diens van barmhartigheid Sing: Psalm 128-1:1,4 Wegstuurseën Amen: Skrifberyming Preek: Geliefdes in ons Here Jesus Christus As jy kinders het, het jy gesag oor hulle. Jy is hulle pa of ma. As jy n tuinier of huiswerker het, het jy gesag oor hulle. Jy is hulle werkgewer. So staan elkeen van ons êrens in n gesagsposisie. In die preek tydens verlede Sondag se erediens het ek gesê dat baie mense wat gesag moet uitoefen, dit nie meer reg doen nie of nie meer weet hoe om dit te doen nie. Weens

2 groot veranderings in die wêreld het baie van dié wat gesag moet uitoefen, onseker geword oor wat hulle rol as gesagsdraers is en hoe hulle hulle rol as gesagsdraers moet uitoefen. Vandag se preek gaan oor hoe ons gesag moet uitoefen. Dit gaan oor hoe ons moet optree teenoor dié wat onder ons gestel is. Ons gaan aandag gee aan die voorbeeld wat ons Here Jesus Christus gestel het en dan gaan ons dit toepas op die huwelik. Heel eerste dan: Wat is die voorbeeld wat ons Here Jesus Christus gestel het? Hoe het Hy gesag uitgeoefen? In Johannes 13:1-17 word vertel hoe Jesus sy dissipels se voete gewas het. Destyds was daar nog nie karre soos wat ons vandag het nie. As mense êrens heen wou gaan, het hulle meestal gestap en dít met sandale op stowwerige grondpaaie. Daarom was dit die gebruik dat die gasheer sorg dat al sy gaste se voete eers gewas word, voordat daar saam geëet word. Een van die gasheer se slawe moes gewoonlik die werk doen om al die gaste se voete te was. Veral die minder goeie slawe, daardie slawe wat eintlik vir niks anders goed was nie, moes hierdie werk doen. Toe Jesus sy dissipels se voete gewas het, het Hy dus die werk van n slaaf gedoen. Hy het sy dissipels gedien. En dit terwyl Hy eintlik hulle Here is en hulle sy diensknegte is! Hoor wat staan in Johannes 13:13 (1983/92-Vertaling): Julle noem My julle Leermeester en Here, en julle is reg, want Ek is dit. Jesus is hulle meerdere by verre! Tog is dit nie hulle wat Jesus se voete was nie, maar Jesus wat hulle voete was. Toe Jesus sy dissipels se voete gewas het, was dit n geval van n gesagsdraer wat sy onderdane gedien het. Hoor nou wat staan in Johannes 13:14-15 (1983/92-Vertaling): As Ek, wat julle Here en Leermeester is, dan julle voete gewas het, behoort julle ook mekaar se voete te was. Ek het vir julle n voorbeeld gestel, en soos Ek vir julle gedoen het, moet julle dit ook doen. Die voorbeeld wat ons Here Jesus Christus vir ons gestel het, is om gesag uit te oefen deur te dien. Hy, wat Koning oor alles en almal is, het na die wêreld toe gekom om te dien. Hy, wat ons Here en ons God is, het Homself opgeoffer om ter wille van ons te sterf. Hy, wat die Hoof van die kerk is, het liefde en genade aan sy kerk bedien. Dienaarsliefde dít is wat ons by ons Here Jesus Christus leer oor hoe ons gesag moet uitoefen! Dit beteken nie dat ons, wanneer ons in gesagsposisies is, nie streng mag wees nie of nie reëls mag afdwing nie. Nee, wanneer jy in n gesagsposisie is, hét jy n sê oor die mense wat onder jou is. Jy hét die reg om vir hulle te sê wat om te doen en wat om nie te doen nie. Jy hét die reg om vir hulle reëls te gee en jy hét die reg om die reëls af te dwing. Jy hét die reg om hulle straf, as hulle nie na jou wil luister nie, en jy hét die reg om hulle te prys of te beloon, as hulle na jou luister. Onthou dat gesag deur God daargestel is om tot ons voordeel te wees. Dit is sodat daar orde in die samelewing kan wees. As jy nie streng genoeg is nie of nie straf wanneer jy moet straf nie, is dit tot almal se nadeel. Dit is tot nadeel van die een wat verkeerd doen en dit is tot nadeel van diegene wat jou in die gesagsposisie aangestel het. Oefen daarom

3 die gesag uit wat aan jou gegee is. Doen dit in n gesindheid van liefde. Wees ferm, maar wees ook redelik en regverdig en billik. In Kolossense 4:1 sê die Here vir ons (1983/92- Vertaling): Eienaars, behandel julle slawe reg en billik in die wete dat julle ook onder iemand staan, onder die Here in die hemel. Om in n gesagsposisie te staan, beteken eintlik om te dien as jy mooi daaraan dink. n Pa en n ma (wat in n gesagsposisie teenoor hulle kinders staan) sien om na hulle kinders se behoeftes. Hulle bedien hulle kinders met sorg en liefde. Mense in leiersposisies is daar om te dien. n Regering is daar om sy landsburgers te dien. Munisipaliteite is daar om die gemeenskap te dien. Wat die wêreld (en spesifiek ons land) nodig het, is dat mense in gesagsposisies weer terugkeer na die eintlike rede hoekom hulle in die gesagsposisies is, naamlik om te dien. Ongelukkig gebeur die teenoorgestelde te veel, naamlik dat mense wat in gesagsposisies is, hulle posisie misbruik om hulleself te dien. Daar is in ons nasionale regering, in ons provinsiale regering en in ons plaaslike regering net te veel mense wat hulleself wil verryk. Ook buite die staat is daar te veel mense wat hulle posisie en mag misbruik. Dit is nodig dat ons weer die dienaarsliefde van ons Here Jesus Christus herontdek, met alles wat dit inhou, én dat ons daarvolgens optree ook in die wyse waarop ons gesag uitoefen. Kom ons pas dit nou toe op die huwelik. In Efesiërs 5:23 staan daar (1983/92-Vertaling): Die man is die hoof van die vrou, soos Christus die hoof van die kerk is. Christus is ook die Verlosser van die liggaam, sy kerk. Die verhouding tussen n man en n vrou is soos die verhouding tussen Christus en die kerk. Die man moet teenoor sy vrou optree soos wat Christus teenoor sy kerk optree. Hoe tree Christus teenoor sy kerk op? Voetewassend met dienaarsliefde! Die man se hoofskap beteken dat Hy met Christus se dienaarsliefde teenoor sy vrou optree. Dít is die aard van Christus se Hoofskap oor sy kerk en dit moet die aard van elke man se hoofskap oor sy vrou wees. Die man se hoofskap beteken nie dat hy baasspeel oor sy vrou nie, maar dat hy haar bedien met Christus se dienaarsliefde. Hoor nou wat staan in Efesiërs 5:25 (1983/92-Vertaling): Mans, julle moet julle vrouens liefhê soos Christus die kerk liefgehad en sy lewe daarvoor afgelê het. Hoor julle? Die man moet sy vrou liefhê. Hoe? Met watter liefde? Soos Christus die kerk liefgehad het! Met Christus se dienaarsliefde! Waarin bestaan Christus se dienaarsliefde? Dit bestaan daarin dat Christus sy lewe vir sy kerk afgelê het. Hy het Homself vir sy kerk opgeoffer. Die man moet sy vrou liefhê deur vir haar op te offer. Dít is die aard van die man se hoofskap. Mense in gesagsposisies is daar om leiding te neem. So behels die man se hoofskap ook dat hy leiding moet neem. Leiding moet neem waarin? In die gee van liefde! Dink n bietjie: Waar kom die liefde tussen Christus en die kerk vandaan? Van Christus af. Wie het die leiding geneem in die gee van liefde? Christus of die kerk? Christus! Hy het eerste liefgehad. Dit is Hy wat die leiding geneem het. Dit is Hy wat ons eerste so

4 uitnemend liefgehad het. Net so is dit die man se werk as hoof om die leiding te neem in die gee van liefde. As daar nie liefde in n huwelik is nie, moet ons nie die fout eerste by die vrou gaan soek nie. Nee, as daar nie liefde in n huwelik is nie, moet ons die fout eerste by die man gaan soek. Kyk na die Engelse woord husband. Dit bestaan uit twee dele: hus (house) en band. Dit wil sê: Band of the house. Dit sê alles. Die man is die band van die huis, wat alles bymekaar hou. Hy hou alles bymekaar deur die band van liefde, deur die leiding te neem in die gee van liefde. Behalwe dat die man as hoof die leiding moet neem in die gee van liefde, moet sy liefde vir sy vrou konstruktief en opbouend wees. Hoor wat staan in Efesiërs 5:26-27 (1983/92- Vertaling): Dit het Hy gedoen om die kerk aan God te wy, nadat Hy dit met die water en die woord gereinig het, sodat Hy die kerk in volle heerlikheid by Hom kan neem, sonder vlek of rimpel of iets dergeliks, heilig en onberispelik. Christus se liefde vir sy kerk, en sy opoffering om sy lewe vir sy kerk af te lê, was om die kerk te heilig. Dit was om die kerk in volle heerlikheid by Hom te neem. Dit was sodat sy kerk sonder vlek of rimpel kan wees. Net so moet die man se hoofskap sy vrou opbou en nie afbreek nie. Die man moet sy vrou opbou, sodat sy kan groei en ontwikkel as gelowige. Die man moet dit doen deur aan sy vrou geestelike leiding en emosionele leiding te gee. Die man se hoofskap behels ook dat hy sy vrou moet koester. Hoor wat staan in Efesiërs 5:28-30 (1983/92-Vertaling): Die mans behoort hulle vrouens so lief te hê soos hulle eie liggame. Wie sy vrou liefhet, het homself lief, want niemand het nog ooit sy eie liggaam gehaat nie. Inteendeel, hy voed en versorg dit, soos Christus met sy kerk doen omdat dit sy liggaam is, waarvan ons lede is. Die man moet sy vrou voed en versorg soos Christus dit met sy kerk doen. Hierdie voed en versorg is baie meer as net te sorg dat sy kos en klere en n dak oor haar kop het. Dit is ook om haar geestelik en emosioneel ensovoorts te voed en te versorg. Ons kan dit vergelyk met houers wat volgemaak moet word. Daar is die houer vir die vrou se fisiese, materiële behoeftes (kos, klere, ensovoorts). Daar is die houer vir die vrou se behoefte aan liefde (haar liefdestenk). Daar is die houer vir die vrou se geestelike behoeftes. Daar is die houer vir die vrou se emosionele behoeftes. Daar is die houer vir die vrou se behoefte aan kameraadskap, ensovoorts. As die man nou net aan haar fisiese, materiële behoeftes (kos, klere, ensovoorts) aandag gee, dan het hy slegs 20% van haar totale behoeftes aangespreek. Sê nou die man is werkloos met die gevolg dat hy niks kan gee vir sy vrou se fisiese, materiële behoeftes nie, maar hy kry dit reg om net die helfte van elkeen haar ander behoeftes aan te spreek, het hy dubbeld soveel van haar totale behoeftes aangespreek as die man wat net aan sy vrou se fisiese, materiële aandag gegee het.

5 Manwees gaan oor veel meer as net om die broodwinner te wees. Dit gaan ook en veral daaroor om as hoof van die vrou die leiding te neem in die gee van liefde en om geestelike en emosionele leiding te gee, ensovoorts. Ons leef in n tyd waar die vrou soms die broodwinner is. Daarby is werk skaars en word al meer mans werkloos. Die gevolg is dat baie mans nie meer weet wat hulle rol as hoof van die vrou is nie. Een van die redes waarom mans dan n identiteitskrisis beleef, is omdat mans hulleself net meet aan hoe goed hulle vir hulle vrou op materiële gebied sorg. As hulle op materiële gebied goed vir hulle vrou sorg, dan is hulle n goeie man. Nee, dit is maar net 20% van die prentjie. Ware manwees beteken om ook jou vrou se ander behoeftes aan te spreek. Ware manwees beteken om die leier te wees in die gee van liefde, om geestelike en emosionele leiding te gee, om jou vrou op te bou en te koester. Geen mens kan iets gee wat hy nie het nie. Geen man kan nie die leier in die gee van liefde wees, as hy nie liefde het om te gee nie. Geen man kan geestelike leiding gee, as hy nie geestelik daarvoor toegerus is nie. Geen man kan emosionele leiding gee, as hy self nie emosioneel toegerus is om dit te doen nie. Daarom, liewe broers, julle moet sorg dat julle as hoof van julle vroue die nodige liefde en geestelike en emosionele rypheid kry om dit vir julle vroue te kan gee. Waar kry julle dit? By God! In sy Woord, onder leiding van sy Gees. As jy vér van God af en vér van sy Woord af leef, sal julle dit nooit hê nie en sal julle nooit op die regte manier hoof van julle vroue kan wees nie. n Ware man, n man uit een stuk, is n man wat deur die Gees beheer word. n Man wat deur die Gees beheer word, is n man wat uit die Woord leef, want die Gees en die Woord gaan saam. Back to basics! Terug na die Fontein! Terug na die Woord! Terug na mans wat naby God en sy Woord leef! Terug na mans wat besef dat hulle werk as hoof van die vrou baie meer is as om net die broodwinner te wees. Terug na mans wat, omdat hulle naby God en sy Woord leef, toegerus is om leiers te wees in die gee van liefde, mans wat toegerus is om geestelike en emosionele leiding aan hulle vroue te gee en hulle vroue te koester. Dít is wat vandag nodig is! Amen.