Preek Romeine 1:16-17

Transcriptie

1 1 Preek Romeine 1:16-17 (Preek gelewer tydens erediens in Welkom-Noord op Sondag 19 Februarie2017) Prediker: Ds JL van der Schyff Voor die erediens Sing: Lied 255:1,2,3 Sing: Psalm 119-1:39 Sing: Psalm 89-1:6 Afkondigings Stilte Erediens: Votum Groetseën Lofprysing: Psalm 33-1:2,5 Geloofsbelydenis: Twaalf Artikels Die Wet van die Here: Exodus 20:1-17 Sing: Lied 257:1,2 Gebed Skriflesing: Romeine 1:1-17 Fokus: Romeine 1:16-17 Preek: Tema: Terug na die Fontein beteken terug na die Woord. Gebed Diens van barmhartigheid Sing: Psalm 19-3:4 Wegstuurseën Amen: Skrifberyming Preek: Geliefdes in ons Here Jesus Christus Inleiding Ons tema vir die jaar is: Terug na die Fontein. Dit beteken terug na God toe, want by Hom is die fontein van die lewe (Psalm 36:10). As jy dors is, gaan na Christus toe en drink by Hom die water van die lewe (Johannes 7:37). Waar vind jy Christus? Die antwoord is: In die Woord! Terug na die Fontein beteken dus ook terug na die Woord.

2 2 Daar lê krag in die Woord Terug na die Woord! Hoekom? Want daar lê krag in die Woord! Dit is soos wat daar in Romeine 1:16 (1983/92-Vertaling) staan: Ek skaam my nie oor die evangelie nie, want dit is n krag van God tot redding van elkeen wat glo,... Die Griekse woord wat hier vir krag gebruik is, is dunamis. Dit is die woord waarvan die woord dinamo afgelei is. Soos julle weet, is n dinamo iets wat krag opwek. So wek die Woord by wyse van spreke krag op. Nog n woord wat van die Griekse woord dunamis afgelei is, is die woord dinamiet. Julle weet hoe sterk dinamiet is. So is die Woord vol dinamiet! n Voorbeeld van hoeveel krag daar in die Woord is, kry ons in Hebreërs 4:12 (1983/92- Vertaling): Die woord van God is lewend en kragtig. Dit is skerper as enige swaard met twee snykante en dring deur selfs tot die skeiding van siel en gees en van gewrigte en murg. Dit beoordeel die bedoelings en gedagtes van die hart. Die Woord dwing jou tot n keuse jy kan nie neutraal daarteenoor staan nie. Nog n voorbeeld van die krag wat daar in die Woord lê, kry ons in Jesaja 55:11 (1983/92- Vertaling): So sal die woord wat uit my mond kom, ook wees: dit sal nie onverrigter sake na My toe terugkeer nie, maar dit sal doen wat Ek gedoen wil hê en tot stand bring waarvoor Ek dit gestuur het. Die Woord keer nie leeg terug nie dit lewer resultate op. Die krag van die Woord kan gesien word in die feit dat God deur die Woord die hemel en die aarde en alle skepsels uit niks geskep het. Ja, die Heer se woord is skeppingsmagtig wat lewe uit die dood gebied. Hy spreek dit staan daar lewenskragtig, Hy roep net en dit het geskied! Die krag van die Woord lê in sy boodskap Waarin lê die krag van die Woord? Dit lê in sy boodskap! Kyk na Romeine 1:17 (1933/53- Vertaling): Want die geregtigheid van God word daarin geopenbaar uit geloof tot geloof, soos geskrywe is: Maar die regverdige sal uit die geloof lewe. Die Woord van God vertel dus van God se geregtigheid. God se geregtigheid is n diep en ernstige saak en kan n hele klompie dinge beteken. As ek dit moet vereenvoudig, sou ek sê dat God se geregtigheid is dit wat reg is voor God. Dit gaan oor dit wat reg is voor God in verhoudings. Dit gaan oor dit wat reg is voor God in ons verhouding met God. Dit gaan oor dit wat reg is voor God in mense se verhoudings met mekaar. Dit gaan oor dit wat reg is voor God in die samelewing. Dit gaan oor dit wat reg is voor God in die reg. Hier in Romeine 1 gaan dit veral daaroor dat dinge tussen God en mense weer regkom. Dit gaan daaroor dat dinge in mense se verhouding met God regkom, deurdat Hy hulle van hulle sonde vryspreek. Dinge kom reg met God, omdat hulle nou nie meer skuldig voor God staan nie.

3 3 Kyk weer na Romeine 1:17 (1933/53-Vertaling): Want die geregtigheid van God word daarin geopenbaar uit geloof tot geloof, soos geskrywe is: Maar die regverdige sal uit die geloof lewe. Dat God mense van hulle sonde vryspreek, sodat dinge tussen hulle en God weer regkom, is iets wat slegs deur die geloof gebeur. Dit gebeur nie deur die wet te onderhou nie. Jy kan so hard probeer soos jy wil, maar jy sal nooit dinge tussen jou en God regkry deur die wet na te kom nie. Dit gebeur ook nie deur jou skuld voor die priester te bely en dan n sekere bedrag te betaal waarmee jy jou sondes afkoop nie. Dit is mos wat die kerk destyds, toe die Kerkhervorming plaasgevind het, vir hulle lidmate gesê het. Maar dit het nie dinge met God reggemaak nie, met die gevolg dat die lidmate geestelik dors gebly het. Vir n mensdom wat totaal en al skuldig voor God gestaan het en daarom die ewige straf van die hel verdien het, bring die Woord die blye boodskap dat God hulle van hulle sonde vryspreek en dat hulle slegs hoef te glo om dit te ontvang. Dít is die boodskap waarin die krag van die Woord lê! Die Woord gee redding Die krag van die Woord lê in hierdie boodskap, want dit is n boodskap wat redding gee. So staan daar in Romeine 1:16 (1983/92-Vertaling): Ek skaam my nie oor die evangelie nie, want dit is n krag van God tot redding van elkeen wat glo,... Dit gee redding, want dit bevry jou van jou sondeskuld. Jy word bevry van jou skuldig wees voor God. Omdat God jou uit genade vrygespreek het vanweë die verlossing deur Jesus Christus, staan jy nie meer skuldig voor God nie. So word jy bevry van jou gewete en die aanklagte van Satan en die wêreld. Jy word vry van jou verlede, maak nie saak hoe sleg dit was nie. Die redding wat die blye boodskap van die Woord gee, is ook dat dit jou bevry van enige vrees vir God se oordeel of die oordeelsdag. Jy hoef nie bang te wees vir God se oordeel of die oordeelsdag nie, want jy weet dat jy nie meer die straf gaan kry wat jy weens jou sonde verdien het nie. Jy gaan nie die straf kry nie, want Jesus Christus is in jou plek gestraf. Die redding behels ook dat daar nou vrede tussen jou en God is. So staan daar in Romeine 5:1 (1983/92-Vertaling): God het ons dan nou vrygespreek deurdat ons glo. Daarom is daar nou vrede tussen ons en God deur ons Here Jesus Christus. Wat n wonderlike wete! Ek het vrye toegang tot God! Ek het vrede in my gemoed! Ons redding bestaan nie net daarin dat ons sonde vergewe word en ons eendag hemel toe kan gaan nie. Dit bestaan ook daarin dat ons self verander word. Deur ons eenwees met Christus word ons ou mens saam met Christus gekruisig en begrawe en staan n nuwe mens in ons saam met Christus op. Ons word doodgemaak vir die sonde en lewend gemaak vir God. Dít is wonderlik, want nou staan ons nie meer in diens van die sonde

4 4 nie, maar in diens van God. Ons is nie meer slawe van die wet nie, want ons behoort nou aan Christus. Ons het nie meer die wet nodig om ons in toom te hou nie, want die Gees lei ons nou om te doen wat God wil hê. Hy skryf die wet op die tafels van ons harte. Ja, die wonderlike van ons redding is dat die Gees nou ons lewe beheer. Hy lei ons om op n nuwe manier te lewe. Ons het n nuwe lewe ontvang, tot eer van God. Dít is die redding wat die blye boodskap van die Woord aan ons gee. Die Woord gee redding vir dié wat glo Hierdie redding is nie vanselfsprekend vir alle mense nie. Dit is n redding slegs vir dié wat glo. So staan daar in Romeine 1:16 (1983/92-Vertaling): Ek skaam my nie oor die evangelie nie, want dit is n krag van God tot redding van elkeen wat glo,... Geloof is dus noodsaaklik. Terug na die Fontein beteken daarom ook terug na geloof alleen. Maar daaroor n volgende keer. Vandag is die fokus dat ons moet terugkeer na die Woord, die Woord wat n krag van God is tot redding vir elkeen wat glo. n Terugkeer na die Woord behels om die boodskap van die Woord te glo. Dit behels om die boodskap van die Woord jou eie te maak. Dit is om te glo dat dit ook waar is van jou. Verder behels dit ook om uit hierdie geloof te lewe, dat jou geloof aan jou krag gee vir die lewe van elke dag. Die oproep van hierdie preek, naamlik keer terug na die Woord, is n oproep dat jy aan die boodskap van die Woord sal vashou, om daar jou krag vir die lewe te vind. Dit is tegelyk n oproep om met hierdie boodskap die wêreld in te gaan. Ja, ware geloof beteken dat jy jou nie sal skaam vir die Woord nie. Dit beteken dat jy soos Paulus sal sê: Ek skaam my nie oor die evangelie nie, want dit is n krag van God tot redding van elkeen wat glo,... Die Woord is n lig vir die pad en n kompas vir die lewe Die krag van die Woord lê ook daarin dat dit n lamp is wat vir ons lig op die lewenspad gee. Dit wys vir ons hoe en waar ons moet gaan. So staan daar in Psalm 119:105 (1983/92-Vertaling): U woord is die lamp wat vir my die weg wys, die lig op my pad. Nie n lig wat die volle pad tot daar ver verlig nie. Dit sê nie vir ons wat môre en oormôre en volgende week en volgende jaar gaan gebeur nie. Maar dit gee genoeg lig vir nou, tree vir tree vir elke tree wat ons gee. Dit is vir ons n kompas vir die lewe sodat ons nie die pad byster raak en afdwaal nie. Die nood van die wêreld is dat dit sy kompas verloor het, met die gevolg dat sovele die pad byster raak, met droewige en hartseer gevolge. In plaas van die Woord het TV programme en tydskrifte mense se morele kompas geword. En laat ek sê, daar is TV programme (veral sommige sogenaamde realiteitsprogramme) wat die slegste, immorele waardes uitbeeld asof dit maar is hoe dit moet wees. Ja, as daar ooit n tyd waar n terugkeer nodig is na die waardes wat God in sy Woord aan ons leer, dan is dit nou! Psalm 119:9 (1983/92-Vertaling) sê dit so mooi: Hoe kan n jongmens sy lewe skoon hou? Deur hom te hou aan u woord!

5 5 Die Woord kom van God af Die krag van die Woord lê ook daarin dat dit van God af kom. Hy het dit gegee. Omdat Hy dit gegee het, waarborg Hy dit ook. Daarmee saam het Hy ook sy Gees gegee, sy Gees wat die Woord in ons plaas, sy Gees wat die Woord vir ons oopmaak. Die Woord is daarom nie net n klomp leë woorde nie. Nee, dit is n boodskap wat resultate lewer. Dit bring iets voort. In hierdie verband is die woorde van Jesaja 55:11 waarna ek vroeër in die preek verwys het, belangrik. Soos ek vroeër in die preek gesê het, staan daar (1938/92-Vertaling): So sal die woord wat uit my mond kom, ook wees: dit sal nie onverrigter sake na My toe terugkeer nie, maar dit sal doen wat Ek gedoen wil hê en tot stand bring waarvoor Ek dit gestuur het. Die Woord bring mense tot geloof. Dit verander mense se lewens. Dit laat mense nuut lewe. Dit laat mense die krag van Christus se opstanding ervaar, dat Hy binne-in hulle opstaan en lewe. Slot n Terugkeer na Woord dit is wat 500 jaar gelede nodig was, toe die Kerkhervorming plaasgevind het. Dit is wat vandag weer nodig is. Dit tye en omstandighede waarin ons leef, vra daarvoor! Amen.