Preek Genesis 15:5. (Preek gelewer tydens erediens in Welkom-Noord op Sondag 8 Januarie 2017)

Transcriptie

1 1 Preek Genesis 15:5 (Preek gelewer tydens erediens in Welkom-Noord op Sondag 8 Januarie 2017) Voor die erediens Sing: Lied 464:1,2 Sing: Psalm 67-2:1,3 Afkondigings Stilte Tydens die erediens: Votum Groetseën Lofprysing: Psalm 148-2:1,2,3,8 en Lied 456:1,3 Geloofsbelydenis: Twaalf Artikels Die Wet van die Here Gebed Skriflesing: Genesis 15:1-21 Sing: Psalm 119-1:33 Fokus: Genesis 15:5 Preek: Tema: Wat sê die sterre? Gebed Diens van barmhartigheid Sing: Psalm 8-3:3,4,6 Wegstuurseën Amen: Skrifberyming 13-3 Preek: Geliefdes in ons Here Jesus Christus Inleiding Wie van julle sal graag wil weet wat in 2017 vir julle voorlê? As ek julle vanoggend sou vra om dié vraag vir my te beantwoord, sou ek waarskynlik verskillende antwoorde kry. Party van julle sal ja antwoord en party van julle sal nee antwoord. Nou is dit so dat sommige mense gaan kyk na Wat sê die sterre?. Julle weet mos van die rubrieke in tydskrifte hoe daar volgens die sterreteken wat elkeen van ons na aanleiding van ons geboortedatum blykbaar het, voorspel word wat vir ons voorlê. Maar wat sê die sterre rêrig? Want die sterre het tog vir ons n boodskap. In Genesis 15 lees ons hoe die Here vir Abram, toe hy oor sy toekoms getwyfel het, buitentoe geneem het en vir hom gesê het: Kyk op na die hemel en tel die sterre as jy kan. So baie sal jou

2 2 nageslag wees. Na aanleiding hiervan wil ek in hierdie preek stilstaan by die vraag: Wat sê die sterre? Ek gaan dit aan die hand van die volgende vier hoofpunte doen: Die sterre sê: Sien vir God raak. Die sterre sê: God is almagtig. Die sterre sê: God verander nooit. Die sterre sê: Daar is n groter prentjie. Die sterre sê: Sien vir God raak Die gebeure wat in Genesis 15 neergeskryf is, het plaasgevind lank nadat God vir Abram uit Ur van die Chaldeërs geroep het en vir hom n land en n nageslag belowe het. En steeds het dit nie gebeur nie. Abram het nog nie die land en die nageslag wat aan hom belowe is, gehad nie. Tewens, dit het ook nie gelyk of dit ooit gaan gebeur nie. Abram en Sarai was immers al te oud om kinders te kon hê. Geen wonder dat Abram begin twyfel het nie. n Mens hoor amper die twyfel en moedeloosheid in sy stem, as hy sê (vers 2 en 3): Here my God, wat kan U vir my gee? Ek sal kinderloos sterf, en Eliëser die man uit Damaskus sal my besittings kry. U het nie vir my n nageslag gegee nie. n Slaaf uit my huis sal my erfgenaam wees. God het Abram egter nie so in sy twyfel en onsekerheid gelos nie. Hy het hom op n wonderlike manier tegemoet gekom. Ons lees (vers 4) dat die Here gesê het: Daardie een sal nie jou erfgenaam wees nie. Een wat jou eie nasaat is, hy sal jou erfgenaam wees. Die Here herhaal die belofte oor n nageslag, en dán neem die Here vir Abram buitentoe en sê vir hom (vers 5): Kyk op na die hemel en tel die sterre as jy kan. So baie sal jou nageslag wees. En dan lees ons in vers 6 dat, nadat Abram na die sterre gekyk het, hy toe in die Here geglo het. Die kyk na die sterre het veroorsaak dat Abram geglo het. Hy het God weer raakgesien. Geliefdes, wat sê die sterre? Die sterre sê dat daar n God is. Die sterre sê: Sien Hom weer raak. Onthou, ons weet vandag veel meer van die sterre as wat Abram destyds geweet het. Ons weet dat daar baie sterrestelsels in die heelal is en dat daar sterre is wat baie ligjare ver van ons af is. Ja, dit wat ons van die sterre weet, sê vir ons dat daar n God moet wees. Om aan te sluit by art 2 van die Nederlandse Geloofsbelydenis: Die sterre is saam met die res van die heelal soos n mooi boek waarin alle skepsels (ook die sterre) die letters is wat ons die onsigbare dinge van God duidelik laat sien. Kom ons trek dit deur na elkeen van ons se persoonlike situasie. In elkeen van ons se lewens gaan daar baie aan. Daar gebeur baie in ons huise, ons gesinne, ons werk, ons finansies, ensovoorts. Daar is goeie en slegte gebeure in elkeen van julle se lewe. Die sterre sê: Sien God te midde van al die gebeure in jou lewe raak. Sien veral God se genade in jou lewe raak. Sien God vir Wie Hy is.

3 3 Die sterre sê: God is almagtig niks is vir Hom onmoontlik nie Voortspruitend uit bogenoemde sê die sterre: God is almagtig. Die sterre is ook deel van die grootsheid van God se skepping. Soos ek reeds gesê het: Die sterre is ook deel van die boek van die natuur wat ons God se ewige krag en goddelikheid laat sien. Wat het Abram raakgesien, toe hy na die sterre gekyk het? God se almag. Die boodskap van die sterre aan Abram was: As God slegs deur te praat so n menigte sterre so mooi in heerlikheid kon maak, dan is hy mos in staat om n nageslag te gee so ontelbaar soos die sterre. Dít was vir Abram genoeg om te glo. Om te glo dat, al is hy en Sarai al te oud om kinders te hê, God tog vir hom n nageslag sal gee. Hoe weet hy nie, maar in sy almag sal God daarvoor sorg. Geliefdes, dít is wat die sterre steeds vir ons sê. Te midde van onsekerheid oor die toekoms, kyk na die sterre. Sien God se almag daarin raak. Sien rak dat niks by God onmoontlik is nie. As Hy die sterre kon maak slegs deur te spreek, kan Hy ook te midde van die skynbare chaos van hierdie wêreld nuwe lig bring en uitkoms gee. En onthou, Hy het die blink Môrester, ons Here Jesus Christus, gegee deur Wie n nuwe dag vir ons aangebreek het. God het deur Jesus Christus die onmoontlike moontlik gemaak. Dit het reeds by sy geboorte begin, deurdat Hy uit n maagd gebore is. Juis omdat dit onmoontlik is dat n maagd geboorte kan gee, aanvaar baie mense nie meer die maagdelike geboorte van Jesus Christus nie. Ek glo egter dat dit wel gebeur het, want die sterre sê vir my dat God almagtig is en dat niks vir Hom onmoontlik is nie. Ons redding uit die sonde is eintlik ook niks anders as dat die onmoontlike gebeur het nie. Weens ons sonde het ons die ewige lewe verloor en was dit onmoontlik dat ons dit weer sou kry. Al wat moontlik was, was dat ons gestraf moes word. Maar Jesus het die onmoontlike laat gebeur deur ons sondes aan die kruis te dra. Hy het ook uit die dood opgestaan (nog iets wat onmoontlik is) sodat ons in n nuwe lewe kan opstaan. Geliefdes, sekere dinge in jou lewe lyk dalk tans vir jou onmoontlik. Dinge mag vir jou donker lyk, weens finansiële probleme of ander teëspoed of siekte of n ongelukkigheid in jou lewe of verhoudings wat skeefgeloop het waar dit vir jou onmoontlik lyk dat dit ooit sal regkom. Dan sê die sterre vir jou: Vir God is niks onmoontlik nie. Dit beteken nie dat die onmoontlike noodwendig gaan gebeur en alles gaan regkom nie. Maar dit is moontlik. Dit hang alles af van wat God se plan in jou lewe is. Maar bid daarvoor. En intussen: Kyk na die sterre. Tel hulle as jy kan. Só talryk is die geestelike seëninge wat God vir jou gegee het en sal gee. Die sterre sê: God verander nooit. Die derde ding wat die sterre sê, is dat God nooit verander nie. Ons het na die Skriflesing Psalm 119-1:33 gesing:

4 4 Heer, u woord is onbeweeglik, en u waarheid het geen end, soos die sterre wat bly vonkel aan die hoë firmament. Baie dinge kan verander, maar die sterre nie. Met die woorde die sterre verander nie bedoel ek dit wat ons elke aand kan sien. Elke aand is hulle daar, elkeen op sy plek. Die Suiderkruis sal jy altyd op dieselfde plek kry, so ook die ander sterrebeelde. Met die kennis wat ons het, weet ons dat die sterre tog verander. Hulle brand uit, ensovoorts. Maar Abram het nie hierdie kennis gehad nie. Wat hy geweet het, was dit wat ons elke aand met die blote oog kan sien. Die sterre is vanaand dieselfde as gisteraand. En dit is hierdie kennis waarby God aangesluit het. Wat die Here deur middel van vir Abram gesê het, is: Kyk na die sterre, hulle verander nie. So ek ook nie. Wat Ek belowe het, sal Ek doen. Ek sal n groot nageslag gee, so talryk soos die sterre. Geliefdes, so staan God se beloftes vas. Dit verander nie. Hy is gister, vandag en môre dieselfde. Dit is een vastigheid om aan vas te gryp, te midde van n onsekere wêreld en n onseker toekoms. Baie dinge kan verander, maar God se raadsplan sal nie verander nie. Baie dinge kan verander, maar God verander nie. Soos wat jy Hom in die Bybel leer ken, so is Hy vandag steeds. Aan die een kant beteken dit dat jy kan weet wat om van Hom te verwag. Jy kan verwag dat Hy die pad saam met jou sal loop. Jy kan verwag dat Hy aan jou genade sal gee, ensovoorts. Aan die ander kant beteken dit dat jy sy besluite en dade nooit ten volle sal ken of begryp nie. Hy is veel groter as wat jy ooit sal kan verstaan. Die sterre sê: Daar is n groter prentjie Die vierde ding wat die sterre sê, is dat daar ook n groter prentjie is. Die grootsheid van die sterrehemel sê hoe nietig ons as mense eintlik is. Binne die heelal is ons eintlik maar n niks, n klein spikkeltjie. Psalm 8 sê dit mooi: As ek u hemel aanskou, die werk van u vingers, die maan en die sterre, waaraan U n plek gegee het, wat is die mens dan dat U aan hom dink, die mensekind dat U na hom omsien? Wat die Here eintlik met Abram gedoen het, was om hierdie groter prentjie aan hom te wys. Abram moes agterkom dat dit om meer as sy klein probleem gaan. Dit gaan allereers om God én sy plan vir die wêreld. Die groot nageslag wat God aan Abram gegee het, was nie in die eerste plek ter wille van Abram nie. Dit was in die eerste plek ter wille van God se plan, naamlik dat daar vir Hom n volk, naamlik die volk Israel, uit Abram tot stand kon kom en dat God Hom aan hierdie volk sou verbind en dat sy Seun uiteindelik uit hierdie volk gebore sou word, tot redding vir die wêreld. Geliefdes, die sterre sê vir jou: Sien raak dat daar n groter prentjie is. Jou probleme en kwellings is eintlik maar n nietigheid binne hierdie groter prentjie. Gaan dit waaroor jy jou ontstel en kwaad word of oor bekommerd is, die wêreld laat vergaan of van sy as laat afwyk? Sien raak dat alles wat gebeur, deel is van God se raadsplan. Hy is met jou op

5 5 pad na waarheen Hy jou wil vat. Hy is met ons as kerk op pad na waarheen Hy ons wil vat. Hy is met ons land op pad na waarheen Hy ons wil vat. Hy is met die wêreld op pad na waarheen Hy ons wil vat. Geloof is om hierdie groter prentjie te kry. Die Woord vertel ons van die groter prentjie. Dit vertel van Jesus Christus, die Seun van God, wat nuwe hoop en uitkoms gebring het. Wanneer jy hierdie groter prentjie sien, leer jy om in vertroue op en oorgawe aan God te leef. Die genade is dat daar binne die groter prentjie ook vir ons plek is. Binne die raamwerk van n groter vervulling word uiteindelik ook ons probleme opgelos! Binne die raamwerk van die groter prentjie dat God vir Hom n volk uit Abram se nageslag wou laat voortkom, sodat sy Seun daaruit gebore kon word, het Abram op die ou end n groot nageslag gekry. Binne die groter prentjie van waarheen God met ons op pad is en sy raadsplan word ons probleme ook soms opgelos. Of ten minste: Ontvang ons ook God se genade en die talle geestelike seëninge wat Hy vir ons gee. Slot In vers 8 lees ons dat Abram, nadat hy na die sterre gekyk het en daarna in die Here geglo het, tog steeds gevra het: Hoe sal ek weet dat ek dit sal besit? Dit is amper asof Abram maar gou weet twyfel. So bly die lewe met God n leerproses. Dit is meestal nie so dat jy op n dag tot geloof kom en dan is alles 100% volmaak en reg nie. n Lang pad lê gewoonlik voor, waarop n mens nog moet leer wat geloof rêrig is. In hierdie leerproses is God egter nie onbetrokke nie. Hy help jou op die pad. Daarom het Hy Abram geantwoord, toe Abram gevra het: Waaraan sal ek weet? Die Here het geantwoord deur met Abram n verbond te sluit. Die treffende van dié verbond is dat God alleen tussen die stukke vleis deur gaan. So anders as gewoonlik. Dit sê: God, en Hy alleen, is die waarborg vir die voortgaan van die verbond. Nie Abram of sy geloof nie. Nie wie jy is of wat jy doen nie. Slegs God en sy genade. Geliefdes, met hierdie gedagte wil ek afsluit: Agter God se verbond met ons staan nie n mens of n mensewoord nie, maar Gód self en sy Woord, sy Woord wat tegelyk sy eer is. Amen.