Preek Handelinge 15:11 en Efesiërs 2:8

Transcriptie

1 1 Preek Handelinge 15:11 en Efesiërs 2:8 (Preek gelewer tydens erediens in Welkom-Noord op Sondag 5 Maart 2017) Prediker: Ds JL van der Schyff Voor die erediens Sing: Lied 203:1,2 Sing: Lied 231:1,2,3 Sing: Lied 241:1,2,3 Afkondigings Stilte Erediens: Votum Groetseën Lofprysing: Psalm 145-1:1,5,10,12 Geloofsbelydenis: Twaalf Artikels Die Wet van die Here Sing: Lied 245:1,2,3 Gebed Skriflesing: Handelinge 15:1-35 Sing: Skrifberyming 17-2:5,6,7 Fokus: Handelinge 15:11 en Efesiërs 2:8 Preek: Tema: Terug na die Fontein beteken terug na genade alleen. Gebed Diens van barmhartigheid Sing: Lied 510:1,2,3,4 Wegstuurseën Amen: Skrifberyming 13-3 Fokus: Ons tema vir die jaar is: Terug na die Fontein. Tot dusver is in die preke hieroor gesê: Terug na die Fontein beteken terug na God, want by Hom is die fontein van die lewe (Psalm 36:10). Terug na die Fontein beteken terug na Christus (Johannes 7:37). Terug na die Fontein beteken terug na die Woord (Romeine 1:16-17). Vandag se preek gaan daaroor dat terug na die Fontein beteken terug na genade alleen. Ons fokusverse is Handelinge 15:11 en Efesiërs 2:8. In Handelinge 15:11 staan (1983/92- Vertaling): Nee! Ons, en ook hierdie gelowiges glo dat ons net deur die genade van die Here Jesus gered word. In Efesiërs 2:8 staan (1983/92-Vertaling): Julle is inderdaad uit genade gered, deur geloof. Hierdie redding kom nie uit julleself nie; dit is n gawe van God.

2 2 Preek: Geliefdes in ons Here Jesus Christus, Inleiding Die wêreld verander voortdurend. Die veranderings bring nuwe uitdagings, nuwe uitdagings op elke terrein van die lewe. Baie keer bring dit nuwe vraagstukke na vore: Hoe nou gemaak? Meestal vra dit aanpassings, om nuut te dink en nuwe planne te maak. Die vroeë kerk word gekonfronteer met n nuwe situasie Die vroeë kerk van wie ons in die boek Handelinge lees, het ook hiermee te doen gekry. Daar het n nuwe gemeente in Antiogië ontstaan. Voordat hierdie gemeente ontstaan het, was verreweg die meeste van Jesus se volgelinge Jode, Jode wat Christene geword het. Met die ontstaan van die gemeente in Antiogië het dinge egter heeltemal verander, want die gemeente in Antiogië was die eerste volwaardige gemeente onder nie-jode, mense uit die sogenaamde heindennasies. Die vroeë kerk het nou nie meer meestal uit Jode bestaan nie, maar ook uit baie nie-jode. Hierdie nuwe situasie het n nuwe vraagstuk na vore gebring: Moet hierdie klomp nie- Joodse Christene ook besny word? Kan iemand as n volwaardige Christen beskou word, as hy nie besny is nie? Meer nog: Kan iemand gered word, as hy nie besny is nie? Daar het toe n groot meningsverskil hieroor ontstaan. Sommige van die Joodse gelowiges het vir die nie-joodse gelowiges gesê: As julle nie die gebruik van Moses nakom deur julle te laat besny nie, kan julle nie gered word nie. Paulus en Barnabbas het hulle egter teen hierdie siening verset. Die uiteinde was dat die vroeë kerk besluit het om n vergadering te hou, sodat uitsluitsel oor hierdie saak gekry kon word. Die vroeë kerk herontdek die geloofswaarheid van genade alleen Tydens die vergadering wat in Jerusalem gehou is, was dit veral gelowiges wat vroeër Fariseërs was, wat gesê het dat die nie-joodse gelowiges ook besny moes word. Na n lang bespreking het Petrus opgestaan en aangetoon hoe God hom gebruik het om die evangelie aan die heidennasies te verkondig sodat hulle kon glo, hoe God sy Heilige Gees ook aan hulle gegee het, hoe God geen onderskeid tussen Petrus-hulle en die nie-joodse gelowiges gemaak het nie en hoe God ook hulle harte deur die geloof gereinig het. Verder het Petrus gesê: Waarom wil julle dan nou God se geduld op die proef stel deur op die nek van die gelowiges uit die heidennasies n juk te lê wat ons voorvaders nie in staat was om te dra nie en ons ook nie? Nee! Ons, en ook hierdie gelowiges, glo dat ons net deur die genade van die Here Jesus gered word. Daarna het Barnabbas en Paulus vertel van die groot dinge wat God onder die heidennasies gedoen het. Toe hulle klaar was, het Jakobus gesê dat dit wat gebeur het, naamlik dat mense uit die heidennasies hulle bekeer

3 3 het en gelowiges geword het, iets is wat God reeds in die Ou Testament gesê het dat dit gaan gebeur. Die profete het al daarvan gepraat. Dit wil sê: Wat hier gebeur, is volgens God se Woord. Die uiteinde was dat die vergadering in Jerusalem besluit het dat die nie-joodse gelowiges nie besny hoef te word nie. Daarmee het die vergadering teruggekeer na die basiese geloofsoortuiging dat ons net deur die genade van die Here Jesus gered word. Genade alleen dit is een van die kernsake in die Evangelie, soos wat Paulus dit onder andere in Efesiërs 2:8 verwoord: Julle is inderdaad uit genade gered, deur geloof. Ons kan sê: Die vroeë kerk het in die vergadering waarvan Handelinge 15 vertel, teruggekeer na die Fontein. Omdat hulle teruggekeer het na die Fontein, het hulle die geloofswaarheid herontdek dat ons alleen uit genade gered word. Genade in oorvloed Die woord genade is n wonderlike woord. Genade is iets soos goedheid of guns. As jy aan iemand genade gee, dan is jy goed teenoor daardie persoon. Genade is om goed te wees teenoor iemand, sonder dat daardie iemand dit verdien. So behels God se genade dat Hy goed is teenoor ons, sonder dat ons dit verdien. Hy seën ons, sonder dat ons dit verdien. God se genade is al die wonderlike dinge wat Hy aan ons gee, nie omdat ons dit verwerf of verdien het nie, maar net omdat Hy so besluit het. God gee sy genade aan ons in en deur Jesus Christus. En Hy gee in oorvloed. In Johannes 1:14 staan iets wonderliks oor Jesus Christus. Daar staan: Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van God het, vol genade en waarheid. Ja, Hy is vol genade. Soos n houer wat tot bo volgemaak is, is Hy vol genade. Uit sy oorvloed het ons almal genade op genade ontvang, so staan daar in Johannes 1:16. Dit is genade onder ons, bo ons, voor ons, agter ons en langs ons. Genade orals. Efesiërs 1:6 praat van die wonderlike genade wat God in die Geliefde vrylik aan ons geskenk het. Efesiërs 1:7 praat van die ryke genade van God. Dit is genade wat uit die oorvloed van God se voorraad van genade kom en nooit verminder nie. Lukas sê in Handelinge 4 dat die genade van God groot was oor al die gelowiges. Paulus sê in Romeine 5:2 dat ons in die genade vasstaan. Ons hele lewe word geleef in n omgewing van genade. In Romeine 5:17 sê Paulus dat God vir ons n oorvloed van genade gee. Jakobus sê dat ons n groter genade ontvang het, groter as wat ons ooit sal kan verstaan. Petrus sê dat ons veelvoudige genade van God ontvang het. Genade word altyd beskryf in terme van oorvloed, van volheid, van rykdom, van oormaat, juis omdat ons soveel genade nodig het. En God gee genoeg en meer as genoeg en die voorraad hou nooit op nie. God skeep nie af, as dit by genade kom nie. Dit is genade wat ons red. Dit is genade wat ons skoon maak, wat ons heilig maak.. Dit is genade wat ons begrip gee van die Woord. Dit is genade wat vir ons die wysheid gee om dit toe te pas. Dit is genade wat aan ons die krag gee om versoekings te weerstaan. Dit is genade wat

4 4 ons toelaat om die Here te gehoorsaam. Dit is genade wat ons in staat stel om te dien. Dit is genade wat ons deur beproewings en teëspoed en swaarkry-tye dra. Dit is genade wat ons optel bo teleurstellings en pyn. Dit is hoekom die genade van God oor gelowiges in 2 Korintiërs 9:14 beskryf word as genade wat oorvloedig is. Genade alleen God se genade kan veral gesien word in die manier waarop Hy ons red. Weens ons sonde was ons totaal en al skuldig voor God en het ons verdien om met die ewige dood in die hel gestraf te word. God het egter besluit om aan ons genade te gee. Hy het besluit dat sy eie Seun in ons plek skuldig bevind moes word en in ons plek namens ons gestraf moes word. Die gevolg is dat ons nou onskuldig voor God is. Dít, dat ons onskuldig voor God is, is iets wat ons nie verwerf of verdien het nie. Dit word uit genade aan ons gegee, verniet. Dieselfde gebeur met ons heiligmaking. Heiligmaking is dat ons weer skoon gemaak word, geheilig word. Weens ons sonde was ons vuil. Ons was onheilig. Dat God ons uit genade red, beteken ook dat Hy ons uit genade weer skoon maak. Hy maak ons heilig. Hy doen dit deur sy Heilige Gees wat binne-in ons woon en ons van binnekant af reinig. Hy gee aan ons nuwe harte. Hy maak van ons nuwe mense. Hierdie proses duur ons hele lewe lank. Dít, dat ek al minder en minder sonde doen en al meer nuut word en geheilig word, is maar net genade. Dieselfde gebeur met ons heerlikmaking. Heerlikmaking is dat ons weer heerlik gemaak word. Weens ons sonde het ons ons heerlikheid verloor, die heerlikheid wat God met die skepping aan die mens as die kroon van sy skepping gegee het. In die plek daarvan het ons vol skande geword. Dat God ons uit genade red, beteken dat Hy in en deur Christus ook ons heerlikheid weer aan ons terug gee. En eendag in die hemel sal ons hierdie heerlikheid weer voluit hê. Ook dit, dat ons heerlik gemaak word, is maar net genade. Dit is die hoogtepunt van God se genade, waardeur Hy vir ons ewigdurende genade sal gee, in ewigheid. Die geloofsoortuiging dat ons uit genade alleen gered word, is die oortuiging in ons harte dat ons totale verlossing n geskenk van God se genade alleen is. Dit is die oortuiging dat ons geen bydrae tot ons verlossing kan of hoef te maak nie. Ons moet terugkeer na genade alleen Die oortuiging dat ons uit genade alleen gered word, is die wonderlike geloofswaarheid wat die vroeë kerk in Handelinge 15 herontdek het. Dit is die wonderlike geloofswaarheid wat met die Kerkhervorming wat vanjaar 500 jaar gelede begin het, herontdek is en daarom een van die vyf slagspreuke van die Hervorming geword het. Dit is die geloofswaarheid waarheen ons moet terugkeer. Terug na die Fontein beteken terug na genade alleen, om te herontdek dat God aan mense wat diep geval het, genade gegee het.

5 5 Dink daaraan: Iemand soos Dawid wat met Batseba owerspel gepleeg het en daarna nog moord ook gepleeg het, het genade gekry. Iemand soos die vrou wat op owerspel betrap is en toe deur die Fariseërs na Christus toe gebring is om deur hom veroordeel te word, het genade gekry. Iemand soos Petrus wat vir Christus drie keer verloën het, het genade gekry. Een van die moordenaars aan die kruis het genade gekry. Paulus wat die kerk van die Here vervolg het en die moord op diaken Stefanus goedgekeur het, het genade gekry. Geen mens se sonde is so groot, geen mens se mislukking is so diep, geen mens se val is so ver dat God nie aan jou genade kan gee nie. Daarvoor is God se genade net te groot, te onbeskryflik groot. Die geloofswaarheid dat ons slegs deur genade gered word, het John Newton geïnspireer om die wonderlike lied Amazing Grace te skryf. Dit is n genade wat so wonderlik is dat dit (om John Newtong se woorde te gebruik) saved a wretch like me. n Wrak soos ek, n sondaar soos ek, word gered! Dít is die wonderlike troos vir my en jou en elke ander gelowige wat bewus is van hoe ver hy weens sy sonde geval het! Ongelukkig is die wêreld (en baie keer ons ook) nie vatbaar vir die geloofswaarheid dat ons slegs deur genade gered word nie. Die idee van jy moet op jou eie voete staan en jy moet nie van ander afhanklik wees nie en jy moet jou eie heil uitwerk beïnvloed ook ons siening van hoe ons gered word. Ons hou nie daarvan om afhanklik te wees en om hulp nodig te hê nie. Maar as ons nie by daardie punt kan kom nie, is ons nog nie reg vir God se genade nie, want God se genade beteken juis dat ons van Hom afhanklik is. God se genade beteken: Ons staan nie op ons eie voete nie. Ons is nie selfstandig nie. Ons is nie wonderlik nie. Ons het hulp nodig. Ons het hulp nodig om vrygesrpeek te word van ons sonde. Ons het hulp nodig om nuwe harte te kry. Ons het hulp nodig om nuwe mense te word. Ons het hulp nodig om heerlik gemaak te word, om die heerlikheid wat ons verloor het, terug te kry. Dit is wat God aan ons gee, met niks wat jy hoef by te dra nie. Nie genade plus nog iets nie. Genade is nie iets wat jy verdien of verwerf nie. Dit is n geskenk van God. Hy gee dit, omdat Hy so besluit het. Amen.