OPENBARING 5:5 HK Sondag 48

Transcriptie

1 OPENBARING 5:5 HK Sondag 48 Votum en seën Psalm 93 : 1, 4 Gebed Skriflesing: Openbaring 5 (AV 1933/53) Belydenis: HK 48 Teks: Openbaring 5:5 (AV 1933/53) Psalm 72 : 2 Preek: God sorg self vir die koms van Sy koninkryk Gebed Kollekte Skrifberyming 32 (2-3) : 1 Seën Skrifberyming 78 (13-3) Ook: Sb 8 (5-3) : 1

2 2 Die Here sorg self vir die verheerliking van Sy Naam so het ons verlede Sondag gesien. Hý doen dinge wat daartoe lei dat Sy Naam deur mense geheilig word. En omdat Hý sorg vir die heiliging van Sy Naam, daarom bíd ons daarvoor, daarom vra ons Hom wat dit doen om dit te doen! Presies dieselfde geld by die tweede versoek van hierdie gebed wat die Here Jesus ons geleer het: Laat U koninkryk kom. Weet u hoekom word ons geleer om daarvoor te bid? - omdat net die Here Sy koninkryk kan laat kom; - omdat Hy ook daarvoor sélf moet sorg. Dis waaroor vanaand se preek gaan: oor God wat self sorg vir die koms van Sy koninkryk. Kom ons kyk na die volgende: - dat dit in Openbaring 5 oor die koms van die koninkryk gaan; - dat net Christus dit kan laat gebeur; - dat ons dus daarvoor moet bid. 1. OPENBARING 5 GAAN OOR DIE KOMS VAN DIE KONINKRYK Die woord wat hier vir boek gebruik word, verwys na die destydse boekrol: n lang stuk skryfoppervlakte, wat gewoonlik van papirus, n fyn soort riet, gemaak was, en wat opgerol kon word as daar klaar daarop geskryf is, en dan soos hierdie boekrol daar in die hemel elke kort-kort met n amptelike seël van die een wie se geskrif dit was, verseël kon word, sodat slegs persone wat die nodige magtiging het, dit mag oopmaak en lees.

3 3 Die boekrol daar in die hemel, wat in die regterhand van God is, is een wat Hý geskryf het. Dit bevat Sy plan vir Sy wêreld tot in die ewigheid in. As n mens na die inhoud van die sewe dele van hierdie boekrol gaan kyk (soos wat dit van Openbaring 6 af beskryf word), dan sien jy mos waaroor hierdie boekrol gaan: - dit beskryf al die belangrikste faktore wat God gaan gebruik in die uitvoering van Sy plan met hierdie wêreld, heelal; - en dit beskryf die groot dinge wat Hy gaan laat gebeur om Sy doel met alles en almal te bereik. En dis baie duidelik uit die hele boek Openbaring dat God se groot doel is om Jesus Christus die Koning van die heelal te laat wees en om alle magte en mense en geeste wat teen Hom in opstand is, nadat hulle hulle speelruimte gee is, onder te ploeg en al Sy kinders deur die aardse stryd tot in die ewige heerlikheid in te lei. En wat is dit anders as die koms van die koninkryk van God? In HK 48, wat Skrifgegewens wat met die koms van die koninkryk te doen het, saamgevat het, word juis dít bely: - dat die koms van die koninkryk die toenemende deurwerking van die koningskap van die Here in Sy kinders en in Sy kerk en in die wêreld is, tot by daardie punt waar die finale oorwinning oor alle teenstanders behaal is en die koninkryk volmaak bestaan as n koninkryk waar God alles in almal wat daar is, sal wees. Die boekrol in God se hand daar in die hemel, beskryf God se plan vir die koms van Sy koninkryk. Die feit dat hierdie boekrol, anders as wat dit destyds gewoonlik gebeur het, binne én buite beskryf was, wys dat God alles klaar bepaal en beplan het. Daar s nie nog nuwe planne wat Hy eendag vorentoe gaan moet maak nie. Op die boekrolle wat mense destyds geskryf het, was daar altyd nog plek oor vir die skrywer of iemand anders om later nog iets by te voeg. Maar God het álles klaar beplan en oor die hele boekrol opgeskryf, sodat daar nie meer spasie oor is vir wrede skokke of onaangename verrassings waarvan Hy nie geweet het nie.

4 4 Alles wat in hierdie heelal moet gebeur om God se koninkryk te laat kom, is klaar beplan en opgeskryf. 2. NET CHRISTUS KAN HIERDIE KONINKRYK LAAT KOM Hierdie boekrol daar in die hemel was verseël. En dit het by daardie hemelse boekrol nie net beteken dat niemand anders dit kon lees en kon weet wat daarin staan nie, maar dit het ook beteken dat dit wat daarin staan, nie gaan gebeur nie: want dis wat ons van Openb 6 af sien: dat toe die seëls uiteindelik oopgemaak word, dit nie net bekend word wat gaan gebeur nie, maar dit inderdaad ook begin gebeur: - die oopbreek van n seël laat dit wat in daardie deel van die boekrol staan, gebeur. God verseël Sy plan, sodat dit nie bekend kan word en nie uitgevoer kan word nie, behalwe as daar iemand sou wees wat waardig is om die seëls oop te breek. Wat sou iemand waardig maak om dit te kan doen? Twee dinge. o So n een moet alle mag in die hemel en op die aarde hê, want God se plan vereis dat alles en almal in die heelal só bestuur en beheers moet word, dat alles wat God wil hê moet gebeur, sal gebeur; Hierdie een moet met ander woorde totale beheer oor alle mense en volke en nasies hê, en oor die natuur wind en weer, sonskyn en hael, see en rivier, en oor die ruimtes son en maan en sterre. Hierdie een moet selfs die duiwel en al sy magte en instrumente kan beheer en oorkom en uiteindelik kan wegbêre in die poel van ewige vuur. Om hierdie boekrol oop te maak en sy seëls te breek en so alles wat hierin staan, te laat gebeur dáárvoor is almag nodig. o Maar ook meer. Wat God beplan:

5 5 - om Sy uitverkorenes te red; - om hulle sondes af te was - en hulle as Sy kinders in die geloof te laat lewe en te laat volhard dwarsdeur alles wat gaan gebeur heen - en hulle ná hierdie aardse bedeling in die ewige feestelike lewe op die nuwe aarde te laat deel dáárvoor is iemand nodig wat hulle sondeskuld vir hulle kan betaal, sodat hulle met God versoen kan wees en die Gees van God weer in hulle skoongewaste harte kan woon. As jy almagtig is en n offer vir die sondes van al God se uitverkorenes kan wees, dán is jy waardig om die boekrol oop te maak en sy seëls te breek. Verstaan u nou waarom daar (behalwe vir die Een wat uiteindelik na vore sou kom) niemand in die hemel, of op die aarde, of onder die aarde gekry kon word wat waardig is om dit te doen nie? Nie die sterkste engel, nie die magtigste koning hier op aarde, of die voorbeeldigste ampsdraer, of die vroomste gelowige, of die Christen met die uitnemendste Geestesgawes is almagtig of kan vir ander se sondes betaal nie. En verstaan u waarom Johannes so gehuil het omdat dit eers gelyk het asof daar niemand in die heelal was wat dit kon doen nie? As hierdie boekrol nie oopgemaak sou word en sy seëls gebreek sou word nie, sou God se koninkryk nie kom nie: - sou die duiwel en sy magte nooit finaal oorwin word nie; - sou Christus se bruid, Sy kerk, Hom nooit weer sien nie; - sou daar nooit n nuwe aarde onder n nuwe hemel en n nuwe Jerusalem en n lewe sonder trane en moeite vir God se kinders aanbreek nie Maar daar ís toe Een wat waardig is om die boekrol oop te maak en sy seëls te breek: - die Leeu uit die stam van Juda wat oorwin het; - die wortel van Dawid; - die wonderlike Lam met die sewe horings en die sewe oë daar in die middel van die troon asof Hy geslag was. Dis nie nodig om in detail vir u te verduidelik hoe al hierdie terme op Jesus Christus wys nie:

6 6 - Hy s uit die stam van Juda, en die Een wat soos n leeu die krag en die moed het om te doen wat Hy moes doen; 1 - Hy s die wortel van Dawid Hy s nie net as mens n nasaat van Dawid nie, maar as Seun van God is Hy ook die Here van Dawid, 2 die Een wat Dawid laat ontstaan het en as koning van Israel laat optree het; - Hy s die Lam, wat daar aan die kruis op Golgota as offer vir ons sondes geslag is, 3 maar uit die dood opgestaan het 4 en alle mag in die hemel en op die aarde gegee is. 5 Hý beantwoord aan die vereistes! Hý s waardig om die boekrol te gaan vat uit die regterhand van Sy hemelse Vader daar op die hemelse troon en dit oop te maak en sy seëls te breek, en so nie net bekend te laat word wat God beplan nie, maar dit ook uit te voer! God sorg self vir die uitvoering van Sy plan, vir die koms van Sy koninkryk. 3. ONS MOET DUS BID DAARVOOR As ons wil hê dat die koninkryk van die hemel moet kom - dat die Here Jesus ons elkeen persoonlik, deur die Heilige Gees wat met Sy Woord werk, al hoe meer moet beheers - en dat die ware kinders van die Here, Sy kerk, meer moet word en geestelik veilig moet wees - en dat Hy die duiwel en sy magte en mense se planne moet kelder en Sy eie koninkryk se volmaakte bedeling gou moet laat aanbreek, dan moet ons in die eerste plek daarvoor bid. Ons moenie met n klomp koninkryksaksies en koninkrykswerk begin, asof óns Sy koninkryk kan laat kom nie. Ons moet bid dat Hý dit sal doen. En as Hy ons dan in Sy Woord wys dat Hy ons inspan wanneer Hy dit doen, moet ons ons gewillig laat inspan soos en wanneer Hy wil. 1 Vgl bv Gen 49:9-10; Mat 1:3 2 Vgl bv Jes 11:10; Mat 22: Vgl bv Joh 1:29; 1 Kor 5:7 4 Bv 1 Kor 15:4 5 Mat 28:18; Flp 2:9-11

7 7 Maar ons moet nooit dink dat óns Sy koninkryk kan laat kom nie. Die eerste en grootste werk wat ons vir die koms van die koninkryk van God kan doen, is om daarvoor te bid ernstig en opreg en aanhoudend. En as ons dan daarvoor gebid het, kan ons maar gaan kyk hoe hierdie gebede verhoor word: - hoe die Here deur Sy Gees al intenser met ons gaan werk; - hoe die ware kerk tog gaan bly en selfs gaan groei; - en hoe bose planne gefnuik word en dit wat in Gód se boekrol staan, net soos dit geskryf is voor ons oë gebeur. Gebede vir die koms van die koninkryk van die hemel sál verhoor word. Hoe sal die Here dit wat Hý ons geleer het om te vra, dan nie gee wanneer ons gehoorsaam aan Hom dit vra nie? AMEN