Preek 1 oor gesag (vyfde gebod)

Transcriptie

1 1 Preek 1 oor gesag (vyfde gebod) (Preek gelewer tydens gesamentlike erediens van Geref. Kerke Welkom en Welkom-Noord op Sondag 6 Augustus 2017) Prediker: Ds JL van der Schyff Voor die erediens Sing: Lied 475:1,2 Sing: Lied 190:1,2,3 Sing: Lied 549 Afkondigings Stilte Erediens: Votum Groetseën Lofprysing: Psalm 100-2:1,2,3 Geloofsbelydenis: Twaalf Artikels Sing: Skrifberyming 12-3:1,2 Die Wet van die Here: Exodus 20:1-17 Gebed Skriflesing: Romeine 13:1-7 en 1 Petrus 2:13-17 Sing: Psalm 34-1:6 Fokus: Romeine 13:1-2 en 1 Petrus 2:13-14 Preek: Tema: Onderwerp jou aan gesag. Gebed Diens van barmhartigheid Sing: Psalm 128-2:1 Wegstuurseën Amen: Skrifberyming Gaan na bladsy 2 vir die preek.

2 2 Preek: Geliefdes in ons Here Jesus Christus Ons beleef tans n gesagskrisis. Dié van julle wat onderwysers is, sal kan getuig hoe daar deesdae baie kinders is wat nie na julle wil luister nie. Soos ek verneem, is daar kinders wat blatant hulle onderwysers se gesag uitdaag. Dit is nie net by die skool waar dit gebeur nie. Dit gebeur ook op ander terreine van die lewe dat mense nie gesag wil aanvaar nie en hulle nie aan reëls wil onderwerp nie. Die gesagskrisis bestaan nie net van onder na bo dat mense nie meer gesag wil aanvaar nie. Dit bestaan ook van bo na onder dat baie van dié wat gesag moet uitoefen, dit nie meer reg doen nie of nie meer weet hoe om dit te doen nie. Weens groot veranderings in die wêreld het baie van dié wat gesag moet uitoefen, onseker geword oor wat hulle rol as gesagsdraers is en hoe hulle hulle rol as gesagsdraers moet uitoefen. Die krisis bestaan ook daarin baie van dié wat gesag moet uitoefen, so optree dat hulle geen respek verdien by dié wat onder hulle is nie. n Gesagskrisis is baie sleg. Dit is sleg vir ons land, dit is sleg vir ons gesinne en dit is sleg vir ons kerke. Waar daar n gesagskrisis is, kan n samelewing nie werklik geseënd wees nie. Geen wonder dat ons land so vol probleme is nie wil ek amper sê! Wat is die antwoord vir die gesagskrisis? n Belangrike deel van die antwoord is: Back to basics! Terug na die Fontein! Terug na die Woord! Terug na die basiese waarhede in die Woord! In vandag se preek en volgende week se preek gaan ek fokus op die basiese waarhede in die Woord oor gesag. Vandag se preek gaan oor hoe ons moet optree teenoor dié wat bo ons gestel is. Volgende week se preek sal gaan oor hoe ons moet optree teenoor dié wat onder ons gestel is. Wat is gesag? Gesag is om seggenskap oor iemand te hê. Dit is die reg om vir iemand te sê wat om te doen en wat om nie te doen nie. n Pa en n ma het die reg om vir hulle kinders te sê wat om te doen en wat om nie te doen nie. n Pa en n ma oefen hierdie reg uit deur reëls vir hulle kinders te gee. Onderwysers het die reg om vir hulle leerders te sê wat om te doen en wat om nie te doen nie. Onderwysers oefen hierdie reg uit deur reëls neer te lê wat hulle leerders moet gehoorsaam. n Regering het die reg om vir die landsburgers te sê wat om te doen en wat om nie te doen nie. n Regering oefen hierdie reg uit deur landswette te maak wat die landsburgers moet gehoorsaam. Die eerste basiese waarheid oor gesag in God se Woord is: God het gesag oor ons. In 1 Petrus 2:16 (1933/53-Vertaling) word ons diensknegte van God genoem. God het die reg om vir ons te sê wat om te doen en wat om nie te doen nie. God oefen hierdie reg uit

3 3 deur in sy Woord vir ons te sê wat om te doen en wat om nie te doen nie. Geliefdes, God het die sê oor julle! Dit is nie asof julle kan kies of julle na God wil luister of nie. Julle móét na Hom luister. Dit is nie asof julle kan kies na watter opdragte in sy Woord julle wil luister en na watter nie. Julle moet na al sy opdragte in sy Woord luister. Hoe het dit gekom dat God die sê oor ons het? Behalwe dat Hy ons geskape het, het sy Seun ons met sy kosbare bloed gekoop, sodat ons nou Syne is. Ons is burgers van God se koninkryk. Soos enige regering oor sy burgers sê het, so het God oor ons sê. Dít is die betekenis daarvan dat Jesus jou verlos het! Omdat Jesus jou verlos het, het God die sê oor jou. Jy kan nie verlos wees en dan nie onder God se gesag staan nie. Die tweede basiese waarheid oor gesag in God se Woord is: Almal wat gesag oor ons het, is deur God oor ons aangestel. Almal wat n sê oor jou het (byvoorbeeld ouers en onderwysers, die regering, jou baas by die werk), het die sê oor jou, omdat God aan hulle n sê oor jou gegee het. Hoor hoe duidelik staan dit in Romeine 13:1 (1983/92-Vertaling): Elke mens moet hom onderwerp aan die owerhede wat oor hom gestel is. Daar is immers geen gesag wat nie van God kom nie, en die owerhede wat daar is, is daar deur die beskikking van God. Die derde basiese beginsel oor gesag in God se Woord is: Gesag is goed dit is tot ons voordeel. In Romeine 13:4 staan daar dat die owerheid n dienaar van God is tot jou beswil. Dit is tot ons voordeel, want die owerheid moet (in die woorde van 1 Petrus 2:14) dié wat kwaad doen straf en dié wat goed doen prys. Dit is daarom dat ek vroeër in die preek gesê het dat n gesagskrisis baie sleg is. Dan mis ons die seëninge wat God deur middel van gesag wil bereik. Die vierde basiese waarheid oor gesag in God se Woord is: Wanneer jy dié wat gesag oor jou het se gesag verwerp, verwerp jy God se gesag. Hoor hoe duidelik staan dit in Romeine 13:2 (1983/92-Vertaling): Wie hom teen gesag verset, kom dus in opstand teen die ordening van God;... As jy optree asof die mense wat bo jou gestel is, geen sê oor jou het nie, tree jy op asof God geen sê oor jou het nie. Dit kan nie, want God is jou God! Jy moet na Hom luister! Die vyfde basiese waarheid oor gesag in God se Woord is: Jy moet jou ter wille van die Here aan gesag onderwerp. Hoor hoe duidelik staan dit in 1 Petrus 1:13 (1933/53- Vertaling): Wees dan onderdanig aan elke menslike verordening ter wille van die Here. As jy jou nie onderwerp aan die mense wat God oor jou aangestel het nie, verwerp jy God se gesag (soos in die derde basiese waarheid hierbo gesê is) en is dit nie tot God se eer nie. As jy jou wel aan hulle onderwerp, strek dit tot God se eer. Jy doen dit dus ter wille van God: dat Hy verheerlik word. Jy doen dit nie ter wille van die mense wat God oor jou gestel het of om húlle te verheerlik nie. Jy is nie iets aan hulle verskuldig nie, want ons is vry so staan dit in 1 Petrus 2:16. Die rede waarom ons na hulle luister, is omdat ons diensknegte is van n hoër Koning, wat vir ons sê om aan hulle onderdanig te wees. Die sesde basiese waarheid oor gesag in God se Woord is: Wanneer dié wat gesag oor jou het verkeerd optree, moet jy jou steeds aan hulle gesag onderwerp. Die

4 4 owerheid waarvan Paulus in Romeine 13 praat, was n heidense owerheid. Tog sê Paulus: Gehoorsaam hierdie owerheid! Hierdie owerheid was nie net n heidense owerheid nie, dit was ook n owerheid wat die Christene wreed vervolg het. Die gelowiges van destyds moes hulle onderwerp aan die gesag van mense wat hulle vervolg en doodgemaak het! Die mense aan wie Petrus geskryf het, word vreemdelinge in die wêreld genoem, moontlik omdat hulle nie burgerregte gehad het nie. Tog sê Petrus: Onderwerp julle aan die owerheid. Onderwerp julle aan n owerheid wat julle nie goedgesind is nie. Die sewende basiese waarheid oor gesag in God se Woord is: Wanneer ons ons aan gesag onderwerp, kan dit ons kritici se monde stilmaak. Hoor wat staan in 1 Petrus 2:15 (1983/92-Vertaling): Dit is die wil van God dat julle deur goed te doen, n einde sal maak aan die kwaad wat mense sonder begrip uit onkunde praat. Daar is destyds baie negatiewe dinge oor die Christene gesê, byvoorbeeld dat hulle ateïste was omdat hulle nie beelde van God gemaak het nie, dat hulle kannibale was (wat met Nagmaal Jesus se liggaam geëet en sy bloed gedrink het) en dat hulle ontrou aan die keiser was, omdat hulle n ander Here gedien het. Hulle moes hierdie verkeerde persepsies weerlê deur goed te doen, soos byvoorbeeld deur hulle aan alle vorme van gesag te onderwerp. Geliefdes, wat is die persepsie wat die wêreld van ons het? Sien hulle ons as mense wat die verskillende owerhede in ons land se gesag aanvaar? Nie net die nasionale regering nie, maar ook die plaaslike owerhede. Watter naam het ons in die wêreld daarbuite, as dit kom by die aanvaarding van die gesag van die amptenare wat in verskillende posisies aangestel is? Ter wille van die eer van die Here, moet ons ons kritici se monde stilmaak deur ons aan gesag te onderwerp. Die wêreld moet kan sien hier is mense wat na hulle Koning luister. Hulle luister na hulle Koning se opdrag om aan alle owerhede gehoorsaam te wees. Daarom: Gedra julle altyd goed onder die heidene sodat, al praat hulle kwaad van julle asof julle misdadigers is, hulle julle voorbeeldige lewe (byvoorbeeld dat julle aan alle owerhede gehoorsaam is) kan sien en God kan verheerlik op die dag van afrekening só staan dit in 1 Petrus 2:12! Hiermee het ek sewe basiese waarhede uit die Bybel oor gesag aan julle gegee. Daar is seker meer basiese waarhede oor gesag, soos dat jy aan almal wat oor jou gestel is, alle eer, liefde en trou moet bewys. Verder moet jy met hulle gebreke geduld hê, omdat God ons deur hulle wil regeer. Die belangrike punt is egter: Julle moet daarvolgens lewe! Jy moet dit doen! Nie net sê nie, maar doen! Kinders, julle moet na julle onderwysers luister. Sê wie? Sê God! Ja, God sê dat julle na julle onderwysers moet luister. Nie net na hulle nie ook na julle pa s en ma s en elke ander mens wat n sê oor julle het. Ek wil raai dat die meeste van júlle dit wel doen. Dan stel julle n goeie voorbeeld vir julle maats wat dit nie doen nie. Julle het n baie belangrike werk wat julle by die skool vir God moet doen. Julle moet vir julle maats sê dat God vir hulle sê dat hulle na hulle onderwysers moet luister én julle moet dit met julle lewe bewys ook. Moenie dit sommer so aanvaar, as julle maats dit nie doen nie. Onthou, julle is die sout vir die aarde en die lig vir die wêreld. So julle moet hierdie lelike dinge dat kinders nie meer vir hulle onderwysers wil luister nie, keer. Doen dit vir God!

5 5 Geliefdes, hoe voel julle oor ons regering? Ek sou raai dat baie van julle negatief oor ons regering is. Tog moet julle julle steeds aan ons regering onderwerp. Julle moet julle steeds aan ons regering onderwerp, al is hulle hoe korrup en al lyk dit asof ons deesdae in n mafiastaat woon. Sê wie? Sê God! Hy sê dat julle gehoorsaam moet wees aan almal wat n sê oor julle het. Ouers, watter voorbeeld stel julle aan julle kinders? Watter voorbeeld stel julle deur wat julle doen én deur dit wat julle sê? Hoe praat julle voor julle kinders oor mense wat in gesagsposisies is? Hoe praat julle voor julle kinders oor onderwysers en die regering en ander mense in gesagsposisies? Dit help niks ons hoor elke Sondag die vyfde gebod (naamlik eer jou vader en jou moeder ) nie, maar ons trek met dit wat ons doen en sê n streep daardeur nie. Dan kan ons maar net sowel los om Sondae die Wet van die Here in ons eredienste voor te lees, want dan is dit maar net n uiterlike formaliteit wat ons nakom sonder enige betekenis. Die opdrag in Romeine 13 dat ons ons aan gesag moet onderwerp, rus onder andere op Romeine 12:1 (1983/92-Vertaling): En nou doen ek n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen. Dien God op grond van sy groot ontferming! Dien God op grond van alles wat Hy vir jou gedoen het! As jy nie almal wat oor jou gestel is gehoorsaam nie, kan ek met reg vra: Beteken God dan so min vir jou? Liewe kind, as jy nie na jou onderwyser of jou pa of jou ma luister nie, beteken God dan so min vir jou dat jy bereid is om te doen wat God vir jou sê nie? Geliefdes, as julle julle nie aan die regering wil onderwerp nie, beteken God dan so min vir julle dat julle bereid is om die gesag van mense wat God bo julle aangestel het, te verwerp? Die opdrag in 1 Petrus 2 dat ons ons aan elke menslike owerheid moet onderwerp, rus onder andere daarop dat ons n nuwe lewe gekry het, omdat ons weer gebore is (1 Petrus 1:3) en dat ons n nuwe identiteit gekry het (1 Petrus 2:9-10). Toe Jesus Christus jou verlos het, het Hy jou n nuwe mens gemaak en Hy het aan jou n nuwe lewe gegee. Vanaf 1 Petrus 2:11 word uitgespel hoe jy moet lewe, omdat jy hierdie nuwe lewe en nuwe identiteit ontvang het. Deel hiervan is dat jy jou aan gesag sal onderwerp. Amen.