Preek Genesis 1:27. (Preek gelewer tydens oggenddiens in Welkom-Noord op Sondag 6 November 2016)

Transcriptie

1 1 Preek Genesis 1:27 (Preek gelewer tydens oggenddiens in Welkom-Noord op Sondag 6 November 2016) Voor die erediens Sing: Lied 447:1 Sing: Lied 456:1,3 Afkondigings Stilte Ontmoetingsdiens: Toetredelied: Psalm 33-1:11 Votum Groetseën Lofsang: Psalm 148-2:1,7,8,9 Geloofsbelydenis: Twaalf Artikels Verootmoediging- en Versoeningsdiens: Verootmoediging: Romeine 3:23 Versoening: Romeine 3:24 en Romeine 5:1 Vernuwing: Kolossense 3:5-17 Woorddiens: Gebed Skriflesing: Genesis 1:26-30 en Kolossense 1:15-20 Fokus: Genesis 1:27 Preek: Tema: Leef jy as die beeld van God of skep jy God na jou beeld? Antwoorddiens: Sing: Skrifberyming 12-3:1,2 Sing: Skrifberyming 2-2:1,3 Sing: Psalm 8-1:3,4 Diens van barmhartigheid Sing: Lied 528:1,2,3 Wegstuurseën Amen: Skrifberyming 13-3 Preek: Geliefdes in ons Here Jesus Christus Inleiding In Genesis 1:27 staan daar (1983/92-Vertaling): God het die mens geskep as sy verteenwoordiger, as beeld van God het Hy die mens geskep,... In hierdie preek wil ek probeer aantoon hoe die mens hierdie woorde omdraai na: Die mens het God geskep as sy verteenwoordiger, as beeld van die mens het hy God geskep.

2 2 Hierdie omdraai van die woorde van Genesis 1:27 vind op die volgende maniere plaas: Mense wat nie in God se bestaan glo nie, sê dat die mens God uitgedink het Eerstens vind hierdie omdraai van die woorde van Genesis 1:27 plaas deur mense wat nie in God se bestaan glo nie. Volgens hulle is God n konstruksie van die mens se denke. Dit wil sê hulle glo dat die mens God uitgedink het. Hulle glo dus dat die mens self God in sy denke geskep het. Hulle glo hierdie dinge nie net van God nie, maar van alle ander gode wat deur ander godsdienste aanbid word. Hiervolgens is alle godsdienste deur die mens uitgedink en ontwikkel. Volgens hulle is daar ook n rede waarom die mens God (of gode) geskep het, naamlik om sekere onverklaarbare dinge te verklaar en om die mens se behoefte aan n godheid te bevredig. Volgens hierdie siening het die mens al minder n God nodig, omdat die mens nou al meer en meer die dinge wat vroeër onverklaarbaar was, wetenskaplik kan verklaar. Geliefdes, hierdie is n baie belangrike saak waaroor ons onsself sal moet toets. Glo jy dat God werklik van altyd af bestaan of glo jy dat God deur die mens uitgedink is? Dit wil sê: Glo jy dat God die mens geskep het of glo jy dat die mens God geskep het? Die antwoord op hierdie vraag is iets wat jy nie kan bewys nie. Ek kan nie vir julle bewys dat God bestaan en dat Hy die mens geskep het nie. Dit is n kwessie van oortuiging: Of jy glo dit of jy glo dit nie. Máár, liewe mede-gelowige, die wêreld en alles wat gebeur, gaan jou oortuigings uitdaag. En dit kan gebeur dat jy soms twyfel. Ek twyfel soms. Maar dan lei God my maar weer om te glo. Mag God deur sy Heilige Gees ons lei om aan te hou glo. Mag Hy ons lei om aan te hou glo dat Hy bestaan én dat Hy ons geskape het en ons Hom nie geskep het nie. Mense wat in God se bestaan glo, skep hulle eie beeld van God Die omdraai van die woorde van Genesis 1:27 vind ook plaas deur mense wat wel in God se bestaan glo. Hoewel hulle glo dat God nie deur mense uitgedink is nie en dus van altyd af bestaan, pas hulle hulle siening van wie en wat God is, aan by wie en wat hulle graag wil hê God moet wees. Hulle skep dus hulle eie beeld van wie en wat God is. Geliefdes, ek dink nie dat ons altyd besef hoeveel ons beeld van God nie net deur die Bybel gevorm word nie, maar ook deur ons eie ervarings en lewensomstandighede en ook deur ons ideologiese en politieke oortuigings. Dit gebeur onbewustelik, daarom dat ons nie altyd daarvan bewus is nie. Daarom is hierdie ook n belangrike saak waaroor ons onsself sal moet toets. Is dit wat jy oor God glo, rêrig wie en wat Hy is? Of is dit wat jy oor God glo, n beeld wat jy (onbewustelik) self geskep het? As jy die beeld wat jy van God het wil toets, is dit belangrik dat jy dit nie sonder gesprek met ander doen nie. Dit is in gesprek met ander dat jy gehelp word om eerlik te wees. Dit is nou te sê as jy eerlik wíl wees.

3 3 Hoe gebeur dit dat n mens n verkeerde beeld kry van wie en wat God is? Dit gebeur, wanneer jy een aspek van God se wese oorbeklemtoon ten koste van ander aspekte van sy wese, byvoorbeeld slegs God se genade en liefde sonder sy oordeel of slegs God se oordeel sonder sy genade en liefde. Vir baie mense is God liewe Jesus, sag en teer. Dit is nie heeltemal verkeerd nie, maar Hy is nie net liewe Jesus, sag en teer nie. Hy is baie meer as dit! Ons sou ook kon sê dat jy n verkeerde beeld kry van wie en wat God is, wanneer jy net sekere dele van hoe God Homself in die Bybel bekend maak, aanvaar. Dit gebeur onder andere as jy eensydig klem lê op die Ou Testament of eensydig klem lê op die Nuwe Testament. Die beeld wat jy van God het, bepaal baie keer wat jou siening oor etiese kwessies is. Etiese kwessies gaan oor wat reg en verkeerd is. Dit is dinge soos: Is saambly sonde? Is homoseksualisme sonde? Hoe jy hieroor en ander vrae oor wat reg en verkeerd is dink, word baie keer bepaal deur die beeld wat jy van God het. Geliefdes, daarom moet ons ons siening van God bly toets. Pasop dat jy nie vir God na jou beeld skep, sodat hy jou gedrag of jou oortuigings oor wat reg en verkeerd is kan goedkeur nie. Mense worstel soms met God, omdat Hy maar net nie wil inpas by die prentjie wat hulle van Hom het nie. Verder gebeur dit dat mense se beeld van God partykeer gevorm word deur wat hulle hoop om by Hom te kry of wat Hy vir hulle kan beteken. Vir baie mense is God net daar om hulle te seën. Baie mense sien godsdiens as n middel waardeur hulle sukses in die lewe kan bereik. Vir baie gaan godsdiens slegs daaroor om voorspoedig te wees. Dit is die voorspoedsteologie wat deesdae so gewild is. As jy graag die regte beeld wil kry van wie en wat God is, gaan kyk dan na dit wat Jesus gesê en gedoen het. Die rede hiervoor is dat Jesus, die Seun van God, volgens Kolossense 1:15 die beeld van God is, van God wat self nie gesien kan word nie. Verder staan daar in Johannes 1:18 dat die Seun van God, wat die naaste aan die Vader is, Hom bekend gemaak het. In en deur Jesus kan jy sien hoe lyk God se hart, naamlik dat Hy die wêreld so liefgehad het dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê. Jesus het kom wys met watter oë God na sondaarmense kyk. Sy lewe, dood en opstanding wys met watter oë van ontferming God na jou kyk. Mense wat in God se bestaan glo, skep vir hulle nog n god Nog n manier waarop die omdraai van die woorde van Genesis 1:27 plaasvind, is deur mense wat wel in God se bestaan glo, maar dan behalwe God nog n god vir hulle skep. Dit is die afgode wat mense so maklik vir hulleself maak. Soos julle weet, kan enige iets n afgod wees: geld, sport, drank, kos en so kan ek aangaan. Geliefdes, hierdie is nog n baie belangrike saak waaroor ons onsself sal moet toets. Wat is daar in jou lewe wat vir jou te belangrik geword het? Wat is daar in jou lewe wat jou lewe tot so n mate oorgeneem het dat jy dit as t ware soos n god aanbid? Wat is daar in jou lewe waarvan jy so afhanklik geword het, dat jy nie daarsonder kan klaarkom nie?

4 4 Ons het soms baie meer afgode as wat ons besef. Ons het soms ander dinge waarop ons meer vertrou as op God. Mag God ons deur sy Heilige Gees lei om te bly besef dat daar maar net een ware God is. Mag Hy ons lei om op Hom alleen te vertrou en Hom alleen te aanbid. Die ander god wat n mens soms skep, kan ook jy self wees. Die sondige mens hou daarvan om gedien te word. Hy hou daarvan om homself te dien. Die eie-ek word baie keer n afgod wat naas God of selfs bo God gedien moet word. Die mens wil nie net beeld van God wees of n verteenwoordiger van God wees nie. Hy wil self God wees. Mag God ons deur sy Heilige Gees hiervan bevry. Mag Hy, en nie ons eie-ek nie, ons lewens beheer. Lewe as beeld van God Die omdraai van die woorde van Genesis 1:27 vind nie net plaas deur wat ons oor God glo of sê nie, maar ook deur wat ons doen. Dit vind plaas deur hoe ons lewe. Die feit dat God ons as sy beeld geskep het, beteken dat ons ook so moet lewe. Geliefdes, hierdie is net soos al die ander ook n baie belangrike saak waaroor ons onsself sal moet toets. Hoe lyk jou lewe? Leef jy as die beeld van God? Hoeveel dinge is daar in jou lewe wat nie van God af kom nie? Hoeveel dinge is daar in jou lewe wat nie pas by die beeld van God nie? Hoeveel van die dinge wat nie pas by iemand wat die beeld van God is nie, kom in jou lewe voor? Moet ek vir julle n lys gee van die dinge wat nie pas by iemand wat die beeld van God is nie? Ek dink nie so nie. Julle almal weet dat dinge soos onsedelikheid, onreinheid, losbandigheid, afgodsdiens, vyandskap, haat, woede, rusies en jaloesie nie pas by iemand wat die beeld van God is nie. Julle almal weet dat dinge soos om mekaar nie te aanvaar en nie te vergewe nie en n wrok te koster nie pas by iemand wat die beeld van God is nie. Dit is alles dinge wat nie van God af kom nie. Die dinge wat van God af kom, is dinge soos liefde, vrede, geduld, vriendelikheid, goedhartigheid, getrouheid, nederigheid en selfbeheersing. Dit en al die ander deugde wat in die Bybel genoem word, is die dinge wat pas by iemand wat die beeld van God is. Mag God ons deur sy Heilige Gees lei dat hierdie dinge al meer en meer in ons lewe na vore kom. Mag Hy ons lei om al meer as die beeld van God te lewe. Mag Hy ons al hoe meer vernuwe na die beeld van ons Skepper en tot die volle kennis van God. Daar is twee baie belangrike redes waarom jy as beeld van God moet lewe. Die eerste rede is dat God jou so geskep het. God het jou as sy verteenwoordiger, as sy beeld geskep so staan dit in Genesis 1:27. God het jou in hierdie ereposisie geplaas, dat jy Hom op aarde moet verteenwoordig. Die tweede rede is dat, toe jy weens die sonde hierdie ereposisie verloor het, God jou weer in hierdie posisie herstel het. Dit is wat Jesus Christus vir jou gedoen het. Hy het die beeldskap van God, wat deur die sonde geskend is, weer in jou herstel. God het jou nie net geskep nie, Hy het jou ook herskep. Hy het jou

5 herskep om weer sy beeld te wees, soos wat sy aanvanklike bedoeling was, toe Hy jou geskep het. Jy moet as beeld van God lewe, want dit is God se plan met jou. Dit is jou missie, waarmee God jou op hierdie aarde geplaas het. Hoe getrou is jy aan hierdie missie? Slot 5 Wanneer ons oor God praat, is dit belangrik dat ons die woorde van Romeine 11:33 onthou (1983/92-Vertaling): O diepte van die rykdom en wysheid en kennis van God! Hoe ondeurgrondelik is sy oordele, hoe onnaspeurlik sy weë! Ons moet onthou dat God veel groter en heerliker is as wat ons ooit kan dink of weet of met een beeld kan beskryf. Sy wese is veel meer as die een aspek of enkele aspekte waaraan ons soms vashou. Ons kennis van God is beperk. Daarom moet ons ootmoedig bly in wat ons oor Hom dink en praat en glo. Ons moet versigtig wees om Hom nie na ons beeld te maak nie. Hy is die Skepper, nie ons nie. Ons is na sy beeld geskep, nie andersom nie. Leef jy as sy beeld? Amen.