Preek Jeremia 14:11-12 en Jeremia 15:1

Transcriptie

1 1 Preek Jeremia 14:11-12 en Jeremia 15:1 (Preek tydens erediens in Gereformeerde Kerk Welkom-Noord op Sondag 7 Mei 2017) Prediker: Ds JL van der Schyff Voor die erediens Sing: Lied 281:1,2,3 Sing: Lied 274:1,2 Afkondigings Stilte Erediens: Votum Groetseën Lofprysing: Psalm 146-1:3,4,8 Geloofsbelydenis: Twaalf Artikels Die Wet van die Here: Exodus 20:1-17 Sing: Psalm 38-1:1,17 Gebed Skriflesing: Jeremia 14:1-15:4 Sing: Psalm 130-3:1,2 Fokus: Jeremia 14:11-12 en Jeremia 15:1 Preek: Tema: Die dag toe die Here nie na sy volk se gebede wou luister nie. Gebed Diens van barmhartigheid Sing: Psalm 139-1:1,12 Wegstuurseën Amen: Skrifberyming Preek: Geliefdes in ons Here Jesus Christus Ek wil vir julle vertel van die dag, toe die Here nie na sy volk se gebede wou luister nie. Swaar tye Die volk Israel het op daardie stadium baie swaar tye beleef. Luister hoe beskryf Jeremia dit in Jeremia 14:2-6 (1983/92-Vertaling): Juda verdor, sy stede versmag, sy mense sit in rouklere op die grond, die hulpgeroep van Jerusalem weerklink. Die vername mense stuur hulle slawe om water te gaan haal. Dié kom by die putte, maar kry geen water nie; hulle

2 2 bring hulle kruike leeg terug. Hulle is verslae en verleë, hulle koppe hang. In die hele land het daar geen reën geval nie. Omdat die grond niks oplewer nie, is die boere moedeloos, hulle koppe hang. Die takbok lam in die veld en gooi haar lam weg omdat daar nie gras is nie. Wildedonkies staan op die kaal heuwels en snuif die wind net soos jakkalse; hulle oë raak dof, want daar is nie meer gras nie. In baie opsigte beleef ons ook swaar tye hier in Suid-Afrika. Ons is wel dankbaar dat verlede jaar se droogte tot n mate gebreek is, maar in die Wes-Kaap lyk dinge nie so goed nie. Daar sukkel hulle tans met n droogte. Al is óns droogte tot n mate gebreek, beteken dit nie dat dit nou skielik goed gaan met ons nie. Dit gaan wel nie met almal ewe swaar nie. Inteendeel, daar is mense met wie dit nog relatief goed gaan. Maar tog beleef ons in baie opsigte swaar tye. In swaar tye bid mense Wat doen mense in swaar tye? Een van die dinge wat hulle doen, is bid. Ons het dit twee naweke gelede gesien met die groot gebedsbyeenkoms wat in Bloemfontein plaasgevind het. Baie mense het soontoe gegaan, omdat hulle swaar tye beleef en daarom saam met ander vir uitkoms wou bid. Die feit dat so baie mense soontoe gegaan het, wys hoe groot die nood onder ons mense is. In n sekere sin was dit destyds dieselfde met Israel. Hulle nood was nie net die droogte nie, maar ook dinge soos bloedvergieting en hongersnood. Luister hoe beskryf Jeremia dit in Jeremia 14:17-18 (1983/92-Vertaling): Sê vir hulle dit: Dag en nag, sonder ophou, vloei die trane uit my oë; my volk ly aan sy wonde, hy is swaar getref. Wanneer ek uitgaan na die veld toe, lê die lyke daar van dié wat met die swaard doodgemaak is; wanneer ek in die stad kom, lê daar die slagoffers van die hongersnood. Profeet en priester trek in die land rond sonder dat hulle weet wat om te sê. Hier staan dat die ellende dag en nag geduur het. In die oorspronklike staan die woord die nag voor die woord die dag. Daar staan dus dat die ellende die nag en die dag geduur het. Miskien staan die woord die nag in die oorspronklike opsetlik voor die woord die dag. Dwarsdeur die nag huil die profeet oor die volk se ellende en in die môre is hy nog nie uitgehuil nie. Ja, die ramptoestand was baie erg. In hierdie swaar tyd het die volk hulle toevlug tot God geneem. Hulle het gebid. Hulle gebede, soos wat dit in Jeremia 14:7-9 en Jeremia 14:19-22 beskrywe word, lyk na gebede soos op n nasionale Dag van Verootmoediging en Gebed. Op die oog af het hulle hartroerende gebede gebid vrome, opregte gebede, waarin hulle hulle skuld bely het. Hulle het selfs die skuld van hulle voorvaders bely. God se reaksie op sy volk se gebede Geliefdes, wat ek egter graag vir julle wil wys, is God se reaksie op hulle gebede. Ons kry dit in Jeremia 14: Daar staan (1983/92-Vertaling): Die Here het vir my gesê:

3 3 Moenie vir hierdie volk voorspraak doen nie. Wanneer hulle vas, sal Ek nie na hulle gesmeek luister nie; as hulle brandoffers en graanoffers bring, maak dit die volk nie vir My aanvaarbaar nie, want Ek sal met oorlog, met hongersnood en met pes n einde aan hulle maak. Hier gebeur iets wat die volk Israel glad nie verwag het nie. Die Here wil nie na hulle luister nie. Hy verwerp hulle, met hulle pleitbedes en al. Wat nog erger is, is dat Hy die profeet verbied om hoegenaamd verder vir hulle te bid. Jeremia het nog probeer pleit vir versagtende omstandighede, maar die Here se antwoord het dieselfde gebly. Hoor wat staan in Jeremia 15:1 (1983/92-Vertaling): Die Here het vir my gesê: Al het Moses en Samuel self by My gepleit, sou Ek geen gevoel vir dié volk gehad het nie. Stuur hulle weg van my teenwoordigheid af, laat hulle gaan. Jeremia 14 en 15 beskryf n dag in Israel se geskiedenis, toe die Here nie na sy volk se gebede wou luister nie. Hierdie was ook nie die enigste keer dat dit gebeur het nie. Hoor wat staan in Jesaja 1:15 (1983/92-Vertaling): As julle julle hande in gebed uitsteek, sal Ek my oë vir julle toemaak. Selfs al bid julle hoe baie, sal Ek nie luister nie,... Hoekom God nie na sy volk se gebede wou luister nie Hoe gebeur dit? Hoe gebeur dit dat God nie sy volk se gebede wil hoor en daarna luister nie? Dit gebeur, wanneer n volk bid sonder om hulle lewens reg te maak. Dit gebeur, wanneer n volk bid sonder om hulle te bekeer. Luister weer na Jesaja 1:15 saam met Jesaja 1:16 (1983/92-Vertaling): As julle julle hande in gebed uitsteek, sal Ek my oë vir julle toemaak. Selfs al bid julle hoe baie, sal Ek nie luister nie, want julle hande is met bloed bevlek. Was julle reinig julle. Moenie voor My verskyn as julle verkeerd doen nie. Hou op met kwaad doen. Terug na die groot gebedsbyeenkoms wat op 22 April 2017 in Bloemfontein plaasgevind het. In n artikel wat ek hieroor gelees het, het die skrywer van die artikel gesê dat dit nie net gaan oor wat op 22 April 2017 gebeur het nie, maar ook oor wat daarna gebeur. Dit gaan ook oor wat op 23 April 2017 gebeur het en wat vandag (Sondag 7 Mei 2017) gebeur en wat op 1 Januarie 2018 gaan gebeur. Hoe gaan jou Facebook-comments lyk, wanneer jy lees van nog n moord? Hoe gaan jy teenoor ander optree? Gaan mense die dienaarsliefde van Jesus in jou lewe kan raaksien? Of gaan hulle iemand sien wat graag sy gewig wil rondgooi en in wie se lewe die eie-ek nog baas is? Gaan ons dit wat verkeerd in ons lewens is, reg maak? Of gaan ons op die ou, verkeerde paaie aangaan? Gebed en bekering gaan saam Die skrywer van die artikel wys dan vanuit die boek Hosea baie mooi dat gebed en bekering saamgaan, soos vinkel en koljander die een kan nie sonder die ander. Ons kan nie bid vir genesing, sonder bekering nie. Ons kan nie vra vir n mooi toekoms, maar nie terugdraai van ons bose weë nie.

4 4 Wat beteken dit om terug te draai van ons bose weë? Vir sommige mense mag dit dalk beteken dat ons regering tot inkeer kom, sodat ons n Christelike regering het, waar die parlement met Skriflesing en gebed geopen word. Om terug te draai van ons bose weë is baie meer as net dít. Om terug te draai van ons bose weë gaan oor wat ék en jý doen. Dit gaan oor wat die gewone mens op straat doen, dat óns ophou om verkeerd te doen. Wanneer gewone mense terugdraai van hulle bose weë, kan daar nie sulke lelike dinge gebeur, soos wat onlangs in Coligny gebeur het nie. Wanneer gewone mense terugdraai van hulle bose weë, kom die dienaarsliefde van Jesus in hulle lewe na vore. Dan kan daar nie dinge soos onreg en uitbuiting van ander wees nie. Dit is n welbekende feit dat daar n geweldige gaping in welvaart in ons land is. Die gaping tussen die rykstes en die armstes is geweldig groot. Die vraag is: Wat kan ek en jy as gewone mense hieraan doen? Ons is mos nie die mense wat die ekonomiese beleid van ons land opstel nie. Dit is so, maar tog kan ek en jy as gewone mense wel iets doen. In ons omgaan met ander mense kan ons die dienaarsliefde van Jesus beoefen. Baie van ons werk vir iemand of het werkers wat vir ons werk. As jy vir iemand werk, kan jy jou werk volgens God se voorskrifte doen. En as jy iemand het wat vir jou werk, kan jy jou werker volgens God se voorskrifte behandel. En God se voorskrifte behels dat jy nie jou werker uitbuit of geen regte gun nie. God se voorskrifte behels dat jy aan die landswette gehoorsaam is, ongeag of jy van die wette hou of nie. Verder is baie van ons iemand se eggenoot of eggenote. Baie van ons is iemand se pa of ma. In al hierdie en ander verhoudings moet ons terugdraai van ons bose weë en optree soos wat God in sy Woord vir ons voorskryf. Dít is wat ons land en ons tyd nodig het. God het nie sy oë en ore vir Jesus se offer aan die kruis gesluit nie Geliefdes, daar is n baie belangrike saak, wat hierby moet bykom en dit is die goeie nuus (die evangelie) dat ons Here Jesus Christus ons verlos het. Dit moet nie as n terloopse laaste gedagte bykom nie, as n wesenlike saak. Laat ek verduidelik. Toe ons Here Jesus Christus aan die kruis Homself as offer vir ons sondes gegee het, het God nie sy oë en ore daarvoor gesluit nie. God het hierdie offer aangeneem. So is ons uit ons grootste nood, naamlik die nood weens die sonde verlos. Verder het ons Here Jesus Christus na die hemel opgevaar, waar Hy ons Voorspraak by die Vader is. En anders as wat destyds volgens Jeremia 15:1 met Moses en Samuel sou gebeur het, het God n gevoel vir ons, wanneer ons Here Jesus Christus vir ons pleit. Hierdie goeie nuus (evangelie) is slegs moontlik, omdat ons Here Jesus Christus n baie duur prys betaal het. Hy het met sy lewe betaal. Moet daarom nie van dit n goedkoop saak maak nie. Wanneer maak jy daarvan n goedkoop saak? Jy maak daarvan n goedkoop saak, wanneer jy bid, maar dan steeds met jou bose weë aangaan. Jy maak daarvan n goedkoop saak, wanneer jy die verlossing in Christus aanneem, maar dan nie jou lewe verander nie. Gebed en verootmoediging en skuldbelydenis is geen goedkoop saak nie, dit is n dodelik ernstige saak! Dit is die gebed van n mens of n gemeenskap

5 wat gebroke is voor God, nie omdat hulle nood so groot is nie, maar omdat hulle skuld so groot is. Dit vra n hartgrondige inkeer en bekering. Dit vra dat jy dit wat nog in jou lewe verkeerd is, sal gaan regmaak. Die Heilige Gees laat jou terugdraai van jou bose weë 5 In Jeremia 31:31 lees ons dat God gesê het dat Hy n nuwe verbond met Israel en Juda sal sluit. Deel van hierdie nuwe verbond is volgens Jeremia 31:33 (1983/92-Vertaling): Dit is die verbond wat Ek in die toekoms met Israel sal sluit, sê die Here: Ek sal my woord op hulle harte skryf en dit in hulle gedagte vaslê. Ek sal hulle God wees en hulle sal my volk wees. Dít is presies wat na die uitstorting van die Heilige Gees gebeur het. Die Gees van God woon nou in die gelowiges en Hy skryf die wet van die Here op die tafels van ons harte. Die Gees stel jou in staat om terug te draai van jou bose weë en nuut en reg te begin lewe. Daarom: Moenie dat jou sondige vlees langer jou lewe beheer nie. Laat die Gees jou lewe beheer. Ek wil afsluit met n laaste gedagte. Wanneer ons kies om op ons bose weë aan te gaan, sal dit soos n boemerang na ons toe terugkeer en by ons kom spook. Hoor wat staan in die laaste deel van Jeremia 14:16: Ek sal die kwaad wat hulle gedoen het, op hulle eie koppe laat afkom. Dít is presies soos dit in die lewe gaan. Maak nie saak wie jy is nie, of jy die regering is of n sekere groep van die bevolking of net n individu nie, wat jy saai, sal jy maai. Die geskiedenis het dit al oor en oor bewys. Wat ons land vandag en elke dag hierna nodig het, is mense wat hulle werklik hartgrondig voor God verootmoedig, sonder om die skuld altyd op ander te wil pak. Mense wat bid én hulle bekeer. Dít is wat God vra. Amen.