Die Here gee ons in Sy Woord goeie nuus

Transcriptie

1 SKRIFLESING: Jesaja 52:1-12 TEKS: Jesaja 52:7 HK 1 TEMA: Die Here gee ons in Sy Woord goeie nuus Psalm 149 : 1, 2 Psalm 107 : 1 Skrifberyming 29 (18-3) : 6, 7, 8 Skrifberyming 78 (13-3) Ook: Sb 22 (11-1)

2 2 Die Bybel het uiteindelik een, groot, hoof-boodskap. Al bestaan hierdie bibliotekie uit ses-en-sestig verskillende boekies en al is die eerste en laastes daarvan meer as duisend jaar uitmekaar geskrywe en al bevat dit verskillende soorte stof, soos geskiedenis en poësie en profesie en briewe, het dit tog uiteindelik een sentrale boodskap. En hierdie boodskap is n mooi boodskap, n positiewe boodskap. Daarom word dit evangelie genoem. 1 Evangelie beteken: blye boodskap. Die Bybel is n boek met goeie nuus die goeie nuus van die Here Jesus Christus, van wie Hy is en van wat Hy gedoen het en wat dit alles vir ons beteken. En alles wat n mens in die Bybel lees, in die Ou en in die Nuwe Testament, het met hierdie sentrale boodskap van die Bybel te doen, is op een of ander manier boublokkies daarvan. Ook die gedeelte wat ons vanaand gelees het, het daarmee te doen. Die goeie nuus wat vir die Here se volk van daardie tyd gebring is, dat hulle uit die Babiloniese ballingskap bevry gaan word, is n voorspel van die groot blye boodskap wat vir die hele wêreld bedoel is: dat Jesus Chrstus mense uit die ballingskap van sonde en dood bevry. Kom ons kyk vanaand na 1. die goeie nuus in Jes 52; 2. die goeie nuus waarna dit heenwys; 3. hoe dit alles ons raak. 1. DIE GOEIE NUUS IN JES 52 Die Judeërs was in ballingskap. Die Babiloniërs, onder hulle groot koning, Nebukadnesar, het hulle militêr verslaan, hulle land en stad, Jerusalem, verwoes 1 Mark 1:1; 16:15

3 3 en hulle as gevangenes na Babel toe gevat, waar hulle in n vreemde land, uitgelewer aan heidene, moes probeer oorleef. Maar die Here gaan hulle bevry! Dís die goeie nuus wat hier, op tipiese profetiese manier, vir Jerusalem gegee word 2 Jerusalem wat natuurlik die volk in ballingskap verteenwoordig. Die Here (so sê Hy deur Sy profeet) het gesien hoe die vyand Sy volk onderdruk en Sý Naam laster; 3 en Hy gaan nou die straf wat Hy oor Sy volk laat kom het, omdat hulle aangehou het om sonder berou en bekering te sondig, ophef; 4 en Hy gaan na Sy volk toe kom 5 en hulle troos 6 en hulle voor die oë van die hele wêreld 7 teruglei na hulle land toe, terwyl Hy voor hulle is én agter hulle is, 8 net soos Hy destyds Sy volk na die uittog uit Egipte in die woestyn gelei het met die wolkkolom en die vuurkolom voor hulle, maar ook ágter hulle wanneer dit nodig was, 9 en Hy gaan weer saam met Sy volk daar in Jerusalem woon. 10 En natuurlik is dit wonderlike goeie nuus, wat die ballinge gaan laat juig en jubel! 11 Ons teks praat van hierdie boodskap as n goeie boodskap, die goeie tyding, n boodskap van vrede en redding, In die Bybel is die goeie dit wat die Here gee en doen as Hy seën, dis die teenoorgestelde van wat Hy gee en doen as Hy straf. n Goeie boodskap is dus n boodskap wat vertel van die Here se seëninge wat op pad is. 2 Bv verse 1, 2, 7, 9. 3 Vers 5 4 Jes 51:22 5 Vers 6 6 Vers 9 7 Vers 10 8 Vers 12 9 Exod 13:21-22; 14: Vers 8 11 Vers 9

4 4 En vrede is in die Bybel in die eerste plek vrede-met-god. n Boodskap van vrede is dus n boodskap wat die volk kom verseker dat die Here nie meer vir hulle kwaad is nie, dat die verhouding tussen Hom en hulle herstel is en Hy hulle weer goedgesind is. En redding of verlossing is in die Bybel om vrygemaak te word van die ellende wat die Here se toorn en straf op jou sondes oor jou gebring het. Die goeie, die vrede, die redding dis hier, Jerusalem! Wees bly! Jou God, o Sion ( n ander naam vir Jerusalem) is Koning! Dit het dalk in die ballingskap vir jou gevoel of ander magte en hulle konings die septer swaai in hierdie wêreld, maar dis nie so nie; die Here is Koning; wat Hý wil, gebeur; Sy optrede of dit nou is om te straf of om te seën kan niemand keer nie! Die Here gee vir Sy volk goeie nuus dís wat ons in hierdie verse hoor. Maar hierdie goeie nuus, is eintlik maar net n heenwysing. 2. DIE GOEIE NUUS WAARNA DIT HEENWYS Uit Romeine 10:15, waar die apostel Paulus ons teksvers aanhaal, blyk dit dat hierdie vers sy volle betekenis kry in die goeie nuus van die verlossing wat Jesus Christus bewerk het. 12 Nie net is die terugkeer van Israle na die ballingskap die regskuif van die situasie vir die geboorte van die Verlosser uit hierdie volk nie. Hóé Israel uit die ballingskap, waar hulle in die mag van vreemdes was, bevry is en teruggevat is na hulle eie land toe om daar weer saam met die Here te gaan woon, is alles n beeld, n vooraf-modelletjie van hoe die Here Jesus mense uit hulle geestelike ballingskap bevry. 12 Sien bv Hand 10:36; Efes 6:15

5 5 o Mense word mos deur hulle sondes op sleeptou geneem, na n bestaan toe waar die straf van God hulle voorland is. o Maar die Here Jesus kom breek die mag van die sonde in mense se lewens, deur die doodstraf daarop vír hulle te dra daar aan die kruis, sodat elkeen wat in Hom glo, se skuld by God betaal is en weer tot God se kind aangeneem is. o En deur Sy Heilige Gees, wat Hy op daardie Pinksterdag tien dae na Sy hemelvaart en vyftig dae na Sy opstanding uit die dood uit, in die harte van Sy kinders uitgestort het, bring Hy by hulle n afkeur van sonde en n brandende begeerte om dit wat God wil hê, te doen. o En deur ons aardse lewensreis bly die Heilige Gees by ons, totdat ons terug is in ons eintlike vaderland waar ons vir altyd saam met ons hemelse Vader gaan bly. Hierdie evangelie van Israel se bevryding uit ballingskap, waarvan Jes 52:7 vertel, is maar net die skaduwee van die werklike evangelie wat in Jesus Christus aan die lig sou kom, die evangelie van mense se bevryding uit die eintlike ballingskap, uit die Babel van sonde en dood. En dis hierdie eintlike evangelie, hierdie een, groot, hoof-boodskap van die Bybel, wat in die kerk se eie woorde opgesom is in die Heidelbergse Kategismus. En van die hele Heidelbergse Kategismus is Sondag 1, wat as n inleiding tot die hele Kategismus dien, nou ook weer nog n korter opsomming. Ons kry, met ander woorde, in HK 1 n opsomming van n opsomming van die groot Bybelse boodskap die goeie nuus van wat die Here Jesus Christus vir ons gedoen het. Het u gehoor dat HK 1:1 oor Hom gaan? Ons diepste troos (so bely die kerk hier) is dat ons aan Jesus Christus behoort - ons getroue Verlosser; - die Een wat met Sy kosbare bloed ten volle vir al ons sondes betaal het; - die Een wat ons uit alle heerskappy van die duiwel verlos het; - die Een wat ons só oppas dat niks ons saligheid in die gedrang bring nie; - die Een wat ons deur die Heilige Gees seker maak dat ons die ewige lewe gaan hê

6 6 en ons in mense wat vir Hom wíl lewe, verander Die Bybel is die boek met die goeie nuus dat Jesus Christus ons kom bevry het! Natuurlik beteken die feit dat die Bybel goeie nuus is, nie dat daar niks oor sonde en oordeel gesê word nie. Inteendeel, daar word báie daaroor in die Bybel gesê; want hoe gaan jy die goeie nuus van bevryding begryp, as jy nie eers daarvan bewus gemaak is dat jy n gevangene is en dat jy magteloos is om jouself van die ewige straf wat jy eintlik verdien, te bevry nie? Daarom begin die HK ook, wanneer dit nou van HK 2 af die Bybelse boodskap vollediger gaan opsom, by die sondes en die sondigheid van die mens en hoe dit alle mense eintlik misdadigers maak vir wie die straf van die helse ballingskap wag Maar die hóóf-boodskap van die Bybel bly die goeie nuus wat God ons laat hoor die evangelie van vrede, die boodskap van bevryding: - by Jesus Christus is daar vir verdoemde ballinge uitkoms! 3. HOE DIT ONS RAAK As ons dan mense is wat die Bybel glo, wat die goeie nuus glo wat hierdie boek laat hoor, wat glo dat Jesus Christus ons Verlosser en Bevryder is, dan moet mense dit by ons sien en hoor. Hulle moet in ons lewe en in ons lewensbenadering kan sien en in ons geselskap kan hoor dat ons, by al die druk en moeite en hartseer van die aardse lewe, mense is wat diep bly is, wat n onvernietigbare vreugde in ons het. En as ons met mense oor die boodskap van die Bybel praat en ons móét, by elke moontlike geleentheid! dan moet ons dit oordra as n blye boodskap. Iets wat ongelukkig nie altyd gebeur nie. Daar s mense, selfs mense wat katkisasie gehad het en gereeld Bybel lees en kerk toe gaan, wat nog steeds die hoof-boodskap van die Bybel verkeerd verstaan.

7 7 o Hulle praat byvoorbeeld oor die Bybel asof dit basies n wetboek is, n boek wat hoofsaaklik n hele rits moets en moenies gee. En die ergste van dit alles is dat sulke mense die Bybelse boodskap gewoonlik ook só voorstel dat dit sê dat jy eers bevry sal word as jy genoeg van die moets en die moenies nagekom het! As dít die boodskap van die Bybel was, was dit nie meer evangelie, goeie nuus, blye boodskap nie, maar n wetboek wat voorwaardes vir redding aan ons stel wat ons as mense nooit sal kan nakom nie! Om vir sondaars, soos wat ons almal is, te sê dat jy eers genoeg van God se opdragte moet nakom voor jy n plek by God kan kry, is soos om vir iemand sonder bene te sê: hier s n leer wat jy kan klim tot in die hemel in Maar dis nie goeie nuus nie! o Ander praat met mense oor die Bybel asof dit hoofsaaklik die boek oor God se dreiging en straf is. Na so n gesprek is die hoorders vol onrus en angs oor die hel waarheen God sondaars soos hulle kan en waarskynlik gaan verban as hulle die dag doodgaan! En nou móét sondaars tot skrik vir God se oordeel gebring word, maar die blye boodskap is dan juis dat Jesus Christus vir sondaars bevryding bring. Jy moet mense nie in die donker invat, sonder om die pad na die lig toe ook vir hulle te wys nie! o Daar s ook mense wat, wanneer hulle met ander oor die Bybel praat, die Bybel bloot gebruik as n handleiding om ondersteuners vir jou geliefkoosde godsdienstige opinies te wen en om nuwe lede vir jou kerkgenootskap/denominasie te werf! Jy ruk hierdie teks en daardie uitspraak uit en jy wen die argument maklik! Maar die een met wie jy gepraat het, loop nie van die gesprek af weg met n hart vol verwondering oor die wonderlike nuus wat aan hom/haar vertel is nie

8 8 Die Bybel is die boek waarin God vir ons die beste en mooiste nuus bring wat n mens maar kan hoor. Dis die boek wat vertel: - die Here het gekom; - Hy t die goeie vir ons kom doen; - Hy t vrede en verlossing gebring! Dís die boodskap wat ons self moet vasgryp met die hande van die geloof. Dís wat ons vir ons kinders moet leer. Dís waaraan ons mekaar moet herinner, veral wanneer die lewe ons wil onderploeg. Dís wat ons vir die wêreld moet gaan sê: In hierdie boek is daar die mooiste boodskap wat ooit op hierdie aarde gebring is, die beste nuus wat mense ooit sal kry! AMEN