1 Preek: 1 Korintiërs 13:1-13 Teksverse: 1 Korintiërs 13:7 Tema: Die Heilige Gees rus jou toe om met ware liefde te leef! Inleiding Geliefde gemeente, ons het afgelope Donderdag op n besondere manier aan die hemelvaart van ons Here Jesus Christus gedink. Tien dae na Jesus se hemelvaart is die Heilige Gees uitgestort en daarom dink ons volgende Sondag aan die uitstorting van die Heilige Gees. Die Heilige Gees verbind ons Jesus en sy verlossingswerk. Met ander woorde, Hy maak ons gelowiges. Maar die Heilige Gees lei ons ook om as gelowiges te leef. In ons lewe as gelowiges is die liefde baie belangrik, en daarom lees ons in Galasiërs 5 dat die liefde deel is van die vrug van die Gees. Vanoggend gaan ons 1 Korintiërs 13 hoor hoe ons as gelowiges met liefde moet leef. 1 Korintiërs is n baie gewilde teks vir troues. Maar in 1 Korintiërs 13 gaan dit oor baie meer as net huweliksliefde. Dit gaan oor die ware liefde waarmee gelowiges elke dag moet leef. Ons kyk vanoggend na drie punte: 1. Hoe die liefde nie is nie. 2. Hoe die liefde wel is. 3. Die volledige waarheen gelowiges oppad is. 1. Hoe die liefde nie is nie In die eerste plek: Hoe die liefde nie is nie. Die eerste lesers van 1 Korintiërs was die kerk in die stad Korinte. In die eerste drie verse kry ons n goeie opsomming van die kerk in Korinte en wat vir hulle belangrik was: Vers 1. Sommige lidmate het daarop aanspraak gemaak dat hulle die gawe het om in verskillende tale te kan praat. Vers 2. Vir ander lidmate was die gawe van profesie belangrik. Profesie beteken om God se boodskap te verkondig. Hulle het dit beklemtoon dat gelowiges die geheimenisse van die evangelie moet verstaan, en dat lidmate moet groei in kennis en geloof (vers 2). Vers 3. Die gemeente in Korinte het ook vir die armes gesorg. En dan was daar ook lidmate wat gesê het dat hulle bereid is om verbrand te word vir hulle geloos, soos dit ook met baie gelowiges gebeur het in die tyd van die Nuwe Testament. NIe net hier in 1 Korintiers 13 nie, maar in die hele 1 Korintiërs lees ons van al hierdie dinge wat die gemeente van Korinte gedoen het. Die gemeente van Korinte was dus aktief en het ander gehelp. Hulle het gegroei in hulle kennis van die Bybel en hulle wou doen wat reg is. En dan was daar selfs lidmate wat graag in tale wou praat sodat hulle vir ander kan wys dat hulle die Heilige Gees het. Maar dan kom verse 4-6 en dit vertel ons dat daar in die gemeente van Korinte ook probleme was. Wanneer ons die res van 1 Korintiërs lees, sien ons dat verse 4-6 n opsomming is van wat verkeerd was in die gemeente. Hulle was ongeduldig, onvriendelik, jaloers en grootpraterig. Hulle was ook liggeraak en selfsugtig.
2 Luister, Paulus sê die volgende. Hy sê: Julle kan al hierdie mooi dinge doen julle kan God dien en ander mense help, maar julle kan dit sonder enige liefde doen! Hoekom? Want die mooi dinge wat hulle probeer doen het, het hulle nie vir God of ander mense gedoen nie, maar vir hulleself. Want sien, dit is moontlik om die Bybel te lees en al hoe meer kennis van God te hê. Dit is moontlik om te bid en ander mense te help. Dit is moontlik om al hierdie dinge te doen vir jouself! Baie lidmate in Korinte was hoogmoedig, jaloers en selfgesentreerd. Want sien, al die goeie dinge wat hulle gedoen het, het hulle vir hulleself gedoen!? Vandag nog is daar mense wat so leef. Hulle doen dinge wat op die oog af goed lyk, soos byvoordeeld om ander te help, geld vir n goeie saak te gee, betrokke te wees by die kerk en n mooi lewe te leef. Daar is selfs mense wat daarop aanspraak maak dat hulle in tale kan praat of wonderwerke kan doen. Maar hoekom doen hulle dit? Want hulle wil belangrik voel, of hulle wil iets hê om oor te spog, of hulle wil mag hê of hulle doen dit sodat God hulle moet seën en hulle gebede moet verhoor. Met ander woorde, al die dinge wat hulle doen, doen hulle uit selfsug en eersug. Dit is nie vir God of iemand anders nie. Dit is vir hulleself. In vers 11 lees ons: Toe ek n kind was, het ek gepraat soos n kind, gedink soos n kind, geredeneer soos n kind. Kinders het baie mooi eienskappe. Jesus leer ons in Matt. 19 dat ons in Hom moet glo soos n kind. Maar n kinders het ook baie slegte eienskappe (wat hulle moet afleer). Wat doen n tweejarige as hy aandag soek? Hy gooi n tantrum. Hoe kry mens dit reg dat n kind iets doen? Jy gee hom of haar n beloning. Jy sê: As jy doen wat ek vra, sal ek jou dit gee of ek sal dit vir jou doen. Dit is hoe kinders is. Hulle doen iets om aandag te trek of om n beloning te kry. Maar dit is nie hoe die liefde is nie. Die liefde soek nie belonings of aandag nie. 2. Hoe die liefde wel is Ons het gehoor hoe die liefde nie is nie. Kom ons hoor nou in die tweede plek hoe die liefde wel is. Vers 4 sê dat die liefde geduldig en vriendelik is. En die meeste mense sal daarmee saamstem. Jip, die liefde is geduldig en vriendelik! Maar dan kom Paulus en hy sê dinge in vers 7 wat ons voete onder ons uitslaan. Hy wys ons wat die verskil is tussen iemand wat dinge vir eiebelang doen, en iemand wat deur God verander is en regtig liefhet. Vers 7 sê ware liefde bedek alles, glo alles, hoop alles, verdra alles. Met ander woorde, ware liefde gee nooit op nie. Dit hou aan om te vergewe, te glo, te hoop en te verdra. Iemand sal sê: Maar dit is onmoontlik! En dit is nie net onmoontlik nie, maar ook onwenslik! Wanneer jy aanhou om te glo, te hoop en te verdra is jy mos goedgelowig!? So, wat bedoel die Here hier? Is liefde dieselfde as goedgelowigheid? Nee, liefde is nie goedgelowigheid nie. Kom ons verduidelik.
3 Wanneer jy ander mense liefhet en hulle glo en verdra dan weet jy dat hulle jou in die steek kan laat. Jy weet daar n risiko is dat mense jou gaan teleurstel. Jy weet dat wanneer jy ander vertrou, hulle jou kan bedrieg of in die rug kan steek. Jy weet dit, maar omdat jy liefhet bedek jy alles, glo alles, hoop alles en hoop alles. Wanneer jy liefhet weet jy dus wat die risikos is. En dit is nie dieselfde as goedgelowigheid nie. n Goedgelowige mens vertrou uit onkunde. n Goedgelowiges mens is naïef en ken nie die risikos nie. Wanneer iets verkeerd loop, dan sê die goedgelowige mens: Hoekom het dit gebeur? Of: Ek het nooit gedink dat dit gaan gebeur nie. Ware gelowiges weet dat daar teleurstelling in hierdie lewe is, en dat hulle dit sal kan hanteer. Hoekom? Omdat ons weet hoe lief God ons het. So lief dat God sy enigste Seun in ons plek gestraf en laat sterf het. So lief dat Hy vir ons sondes betaal het sodat ons weer sy kinders kan wees. Hierdie liefde gee ons n nuwe lewe, en maak dat ons ander kan vergewe en kan verdra. Hierdie liefde maak dat hy weer kan glo en hoop. n Gelowige sê nie: Ek kry geen beloning nie, en daarom gaan ek nie meer help nie. Of: Ek gaan dalk seerkry, en daarom gaan ek nie hier betrokke raak nie. Ware liefde is om ten spyte van die risikos, te vertrou en te hoop. God se liefde maak dat ons teleurstellings kan hanteer. Dit maak dat ons kan vergewe en weer risikos kan vat. Beteken dit dat ander mense op ons kan trap, en dat ons maar net moet verdra en vertrou? Moet ons toelaat dat ander teen ons sondig? Natuurlik nie! Wanneer iemand besig is om verkeerd te doen, dan moet ons hom konfronteer en hom probeer stop. Hoekom? Nie omdat ons bang is vir die seerkry nie, maar omdat ons hom/haar wil reghelp. Want as ons hom nie reghelp nie, gaan hy homself en ook ander mense seer maak.. 3. Die volledige waarheen gelowiges oppad is Kom ons kyk nou in die derde plek na die volmaakte liefde waarheen gelowiges op pad is. In verse 9 en 10 lees ons: Want ons ken maar gedeeltelik,en ons profeteer maar gedeeltelik, 10 maar wanneer die volledige kom, sal wat gedeeltelik is, uitgedien wees. Wat beteken dit? In die eerste plek beteken dit dat gelowiges op pad is na die volledige. Die woord wat met volledige vertaal word, beteken letterlik om te wees waar jy moet wees, en om te doen wat jy moet doen. Dit is volledig. Kom ons gebruik n voorbeeld. Dink aan n walvis. n Walvis is baie groot en baie sterk. Hy swaai sy stert wat n paar ton weeg heen en weer. Nou, hier is n walvis wat sy groot stert heen en weer swaai. Maar kom nêrens nie; hy is net besig om homself seer te maak. Hoekom? Want hy is op die strand. n Walvis op die strand kan sy stert swaai soos jy wil, maar al wat hy doen is om homself en ander seer te maak en homself dieper in die sand in te grawe.
4 Hoekom? Want hy is nie waar hy moet wees nie. n Walvis is nie gemaak vir die strand nie, maar vir die see. Die see is sy volledige. Dit is waar hy sy stert swaai sodat hy vinnig deur die water beweeg. Die see is waar hy moet wees en waar hy moet doen wat hy doen. Ons probleem is dat ons nie by ons volledige is nie. Ons is nie waar ons moet wees nie. Maar daar toestand waarheen elke gelowige oppad is waar ons by ons volledige gaan wees. Daar gaan ons oorloop van blydskap en vervulling. Wat is hierdie volledige waar gelowiges oorloop met blydskap en vervulling? Vers 12 sê dat ons in n dowwe spieël kyk en dat ons n raaiselagtige beeld sien, maar eendag sal ons alles sien soos dit werklik is. Letterlik staan daar dat ons eendag van aangesig tot aangesig sal sien. In die Bybel word die uitdrukking van aangesig tot aangesig gebruik wanneer iemand n God ontmoet het en sy teenwoordigheid ervaar het. Soos wat met Jakob, Moses en Elia gebeur het. Ons volledige is wanneer ons God van aangesig tot aangesig sien. Dit is wanneer ons in God se teenwoordigheid en liefde ervaar Nadat vers 12 gesê het dat ons van aangesig tot aangesig sal sien, sê dit verder: gedeeltelik, maar eendag sal ek ten volle ken soos God my ten volle ken. Nou ken ek net Wanneer jy by n konsert is en jy luister na n sanger, dan ervaar jy iets van die sanger sonder dat jy hom of haar ken. Jy ervaar die sanger se mooi stem, sonder dat jy weet wie hy of sy regtig is. Net so kan mense iets van God ervaar, sonder dat hulle Hom regtig ken. Hulle ervaar iets van sy almag in die natuur. Ongelowiges kan selfs ervaar dat God hulle gebruik in sy plan met die wêreld. Dit is dus moontlik om God te ervaar, sonder dat jy Hom ken. Maar gelowiges ervaar nie net God nie, hulle ken Hom. Hulle ervaar nie net sy liefde, maar hulle ken ook sy liefde. Hulle weet wat sy liefde is en wat dit alles gedoen het, naamlik dat Hy sy enigste Seun gegee het om die straf op die sonde dra, sodat elkeen wat in Hom glo nie verlore sal gaan nie, maar die ewige lewe sal hê Gelowiges weet ook wat God se liefde nou doen. Dat Hy die Heilige Gees gegee het om ons deur geloof aan Jesus Christus se verlossingswerk te verbind. Dat Hy ons nou deur sy liefde ook troos en lei, en dat ons na ons lewe op aarde in sy liefde gaan voortleef. Ons ken en ervaar God se liefde dus nou reeds, maar nog nie ten volle nie. Ons ken en ervaar dit gedeeltelik, nog nie volledig nie. Wanneer ons volledige aanbreek, dan ervaar ons God se volmaakte liefde. En dan gaan ons dit nie net volmaak ervaar nie, maar ook volmaak ken. Ons gaan dan presies weet wat God se liefde is en doen! Om God se liefde volmaak te ervaar en te ken. Dit is waarna ons as gelowiges verlang, en dit is wat ons gelowiges geliefdes wat gesterf het, nou het. Slot Ten slotte, geliefde gemeente. God roep ons met 1 Korintiërs om met ware liefde te leef. Ware liefde doen nie dinge om iets daaruit te kry nie, maar hou aan om te vergewe, te glo, te hoop en te verdra. Ware liefde is selfopofferende liefde het. Dit is die liefde wat God vir ons het en die Heilige Gees rus ons toe sodat ons ook met hierdie liefde kan leef. Kom ons gaan dus en gaan leef met God se liefde in n gebroke wêreld.
AMEN 5