Stephan Joubert skryf gisteroggend in sy Goeie Nuus rubriek in Beeld: Ek wil graag by Stephan aansluit en vir jou vra: hoekom soek jy vir Jesus?

Transcriptie

1 1 Johannes 6 Tema: Hoekom soek jy vir Jesus? Stephan Joubert skryf gisteroggend in sy Goeie Nuus rubriek in Beeld: Goeie wense is so oud soos die spreekwoordelike berge. Ons wens mekaar n geseënde Kersfees toe. Ons wens mekaar n gelukkige verjaarsdag toe, of n voorspoedige nuwejaar. Soms voeg ons nog ander wense by, soos dat al mense se drome mag waar word. Of dat hulle goeie gesondheid sal geniet. Sulke mooi wense sê ons gee om vir mekaar. Soms wonder ek egter of iemand al ooit vir die ontvangers van sulke goeie wense gevra het of hulle toe wel n geseënde kersfees gehad het. En of die voorspoedige nuwejaarswens aan die begin van 2017 toe waar geword het. Hoe dit ook al sy, God doen meer as om net goeie wense met ons te deel. Hy doen wat Hy sê. Ek wil graag by Stephan aansluit en vir jou vra: hoekom soek jy vir Jesus? Ons samelewing gaan gebuk onder `n geweldige toename aan die sogenaamde evangelie van voorspoed. Voorbeelde: Spreek lewe; in die naam van Jesus neem ek beheer van my toekoms; hierdie siekte is van die duiwel, ek bind hom in die naam van Jesus; of soos by `n atletiek kamp die week Jesus is my krag, met Hom aan my kant gaan ek nog `n wêreldkampioen word! Jy praat dalk nie so nie, en tog is dit baie meer algemeen as wat jy dalk wil dink. Kyk gou na hierdie kort video: Het jy dit dalk as goeie wens vir 2018 gekry of aangestuur? Haat, vrees, korrupsie, siekte, armoede, twyfel is alles deel van 2017 niks van hierdie goed gaan in 2018 gebeur nie. Regtig? En sê nou net dit doen? Aaah, sê die voorspoedsdissipel, jy glo nie genoeg nie, daarom gaan hierdie goed gebeur. jy blokkeer die genade van die Here met jou negatiewe houding. Hoor bietjie wat sê Kenneth Mbugua uit Kenia oor die boodskap van voorspoed: (Engels op die bord ek lees my vrye vertaling in Afrikaans) Dit is `n evangelie wat aanspraak maak op vryheid van siekte, armoede en lyding op grond van Christus se sterwe aan die kruis. Dit belowe materiële, fisiese en tasbare

2 2 seëninge vir almal wat dit aanneem. So dring die voorspoed evangelie daarop aan dat God se wil vir al sy kinders is dat hulle hier en nou voorspoedig sal wees. Maar die voorspoed evangelie bevat vier belangrike skeeftrekkings wat van die Bybelse evangelie verskil. Dit verkondig `n klein God; dit identifiseer nie `n mens se grootse nood nie (redding van sonde); dit ontneem die evangelie van sy krag; en steel God se eer. Niemand spreek hierdie dwaalleer wat so welig in ons samelewing en dikwels in ons eie harte groei aan soos die Here Jesus self nie. Ons luister na 3 gedeeltes uit Johannes 6. Lees Johannes 6: 1-16 Hierdie is `n bekende gedeelte en ek gaan nie te veel tyd spandeer om die konteks te verduidelik nie. Ek wil net uitlig dat Johannes met goeie rede eerder van wondertekens, as van wonderwerke praat. Elke ding wat Jesus gedoen het, het `n spesifieke betekenis gehad of was `n teken vir iets besonders. Daar is dus hierdie groot klomp mense, volgens die ander evangelies tot mense, wat agter Jesus aangeloop het oor die tekens wat Hy gedoen het. Nou kry ons die eerste van 3 toetse: Filippus, waar kan ons brood koop? God toets hier die kwaliteit van sy kinders se volgelingskap. Filippus se reaksie: nee, dit kan nie gedoen word nie. Daar is nie genoeg geld nie. Andreas se reaksie: hier is wat ons het Here. Uit al hierdie mense het een seuntjie voorberei om Jesus te volg, en 5 broodrolletjies en 2 klein vissies ingepak. Julle ken die res: Jesus verwerp nie die seuntjie se bydrae nie, maar dank sy Vader, en deel dit dan met mense. Daar is so baie, dat 12 mandjies oorbly nadat almal genoeg geëet het.

3 3 Uit wat die seuntjie deel, wat lyk na niks vir so baie mense, gee Jesus `n teken. Maar die mense verstaan die teken verkeerd, hulle sien net die brood wonder! En so verkondig hulle `n klein God Hy is die Profeet wat moes kom. As jy `n Jood was sou jy verstaan dat hulle hier dink aan Moses en die manna in die Woestyn, wat nou weer gebeur. Jesus se reaksie hierop in aangrypend en ingrypend. Lees vers 15: Toe Jesus merk dat hulle Hom met geweld wil kom koning maak, het Hy verder die berg opgegaan, Hy alleen. Hulle sien die teken: Hy is die een wat ons armoede gaan verlig. Dink net, elke dag meer kos as wat jy kan opeet, seëninge in oorvloed. Ja, ek wil Hom as koning hê. Maar Jesus gee pad, letterlik volgens die oorspronklike, Hy vlug. Nee, dis nie `n teken vir julle voorspoed nie. Jesus draai letterlik sy rug op so `n betekenis van sy koms. Hy is nie maar net `n profeet nie! Hy is nie maar net die voorsiener van brood nie! Hy is nie maar net `n aardse koning vir die rebelle nie! Volgens Matteus se getuienis het Jesus sy dissipels ernstig beveel om weg te vaar na Kapernaum. Ook hulle moet hul rug hierop draai, al weet Jesus dat dit ook in hul harte leef. En kyk hoe Jesus dit dan regstel. Lees Johannes 6:16-21 Wat val jou op? Om Jesus te volg, bring dikwels kwaai beproewing! Van tekens van voorspoed tot tekens van verwoesting. En, Jesus is nie hier nie.

4 4 Nou gebeur kwaliteit toets 2 en 3. Eers die storm: ons hoor in die ander evangelies dat die dissipels gedink het dat hulle gaan doodgaan. Wat sou hulle als geroep het daar in die middel van die nag, met water wat oral om hulle spat. 12 Mandjies wegneemetes lank vergete. Miskien: Here ek is nie reg nie, kan ek tog net `n laaste offer vir my sondes doen? Wil hulle steeds vir Jesus as koning hê, al kan hulle dalk doodgaan? En dan die derde toets: Jesus self. Johannes maak baie daarvan dat hulle bang was toe hulle Jesus op die water sien loop. Jesus is meer as die voorspoed profeet. Juis wanneer die mense sy teken misverstaan as iemand wat vir hulle aardse voorspoed kan bring, is Hy in sy persoon vir hulle `n teken. Sy woorde is min, maar vol betekenis: Dit is Ek; moenie bang wees nie. Ja, Ek loop op water, want Ek kan. Dit is Ek!!! Ek is die teken van `n beter boodskap as voorspoed op land en water. Die krag van die regte evangelie word juis in Jesus duidelik as Hy die ou woorde van die Vader bevestig: Ek is, wie Ek is. Nie net is Hy bewus van hul omstandighede en kom op die water daaraan nie. Maar as Hy in die bootjie klim, bedaar die see en so terloops hoor ons in vers 21 het hulle net daarna by die land aangekom waarheen hulle op pad was. Hy is heerser oor die land, water, tyd, ruimte. Hy is meer as wat jy kan dink en dit gaan oor baie meer as jou voorspoed. Lees Johannes 6:22-40 Hoekom soek jy vir Jesus?

5 5 Die mense soek vir Jesus daar waar hulle vol geëet het. Hulle vaar selfs na die oorkant van die see. As hulle Hom kry vra hulle amper beskuldigend: Rabbie/leermeester, wanneer het u hierheen gekom? As hulle maar geweet het. Jesus kom reguit tot die punt: Julle soek my nie oor My nie, maar oor die brood. Brood is niks! `n Vol maag is niks! As jy My nie het nie! Ek kan die ewige lewe gee! Eers vra hulle: wat moet ons doen om te doen wat God wil hê? Glo in die wonder van die teken! Glo in God se gestuurde! Dit is Ek. En dan vra hulle vir Hom: Wat gaan jy doen? Of anders gesê, watter teken gaan jy doen dat ons in jou kan glo? Wat is hierin vir ons honger mae, vir ons armoede, vir ons gesondheid? Weer sê Jesus in vers 35: Dit is Ek, Ek is hierdie brood wat die lewe kan gee. En so is dit dan met die wat net die voorspoed uit God se hand wil hê, wat na Jesus toe kom, nie vir wie Hy is nie, maar vir die byvoordele. Maar prakties, wat beteken hierdie woorde van Jesus dat Hy die brood is wat lewe kan gee sodat jy nooit weer honger sal word nie? Jesus antwoord in vers 40: Dit is die wil van my Vader: dat elkeen wat die Seun sien en in Hom glo, die ewige lewe sal hê; en Ek sal hom op die laaste dag uit die dood laat opstaan. Hoor jy hoe hier nie van `n klein god gepraat word wie net daar is om kospakkies uit te deel nie? Hoor jy hoe hierdie evangelie ons diepste nood aanspreek, naamlik ons sonde wat ons dood gaan beteken nie? Kan jy hoor hoe hierdie evangelie vol krag is?

6 6 Hoor jy hoe hierdie evangelie nie God se eer steel deur op die voorspoed van mense te fokus nie, maar juis sy eer soek en herstel, deur te wys dat die wonderteken van Jesus, oor Hom gaan? Dit beteken prakties: As die hongerpyne kom, hoor ek vir Jesus wat sê: dit is Ek, moenie bang wees nie. As ek siek is, hoor ek Jesus sê: Ek loop op water want ek kan. Hou jou oog op my, terwyl jy jou pille drink, terwyl jy gesond word, terwyl jy wegkwyn, Ek is hier, Ek is genoeg, Ek is die lewe. Dit beteken nie prakties dat 2018 nie depressieloos gaan wees, of dat dit heel jaar op elkeen se stukkie grond gaan reën omdat iemand ons goeie voorspoed toegewens het nie. Net so beteken dit nie dat as jy Jesus se bloed oor jou kar gebid het, daar nie ongelukke gaan wees nie; ook nie dat as jy genoeg glo, jou omstandighede bloot net gaan verander nie. Nee dit, dit is om `n klein god te verkondig wat sy bloed vir karre en mense se bestuursvernuf kom stort het; dit is om te verkondig dat ons veiligheid op die pad, of ons finansiële vryheid ons grootste nood is, en nie ons sonde wat ons dood beteken nie; dit is om die krag van Jesus se boodskap pap en kragteloos te maak. Dan is dit nie meer die boodskap wat lewens omdop om weer sin te maak op pad saam met die Koning nie; dit is om God se eer te steel, sodat Hy eerder in my diens is, as ek in sy voetspore. Hoekom soek jy vir Jesus? Is hy genoeg van `n wonderteken wat jou wys dat Vader, Seun en Gees jou lewe vir ewig wil red, of moet Hy eers nog iets vir jou doen? Mag ons dan die onderskeidingsvermoë hê om hierdie valse leer raak te sien, en om nie toe te laat dat dit die eer van ons Koning steel nie.

7 7 Hy wat nie gekom het dat my broodblik altyd kan vol wees nie, maar sodat ek, al kan ek dalk hier van die honger doodgaan, versadig is in die wete dat Jesus sê: Dit is Ek, moenie bang wees nie.