Vries al hulle bates, betaal geld terug met rente, hy word `n handearbeider vir die wat hy/sy besteel het.

Transcriptie

1 1 Daniël 6 Wh Ek dink jy sal met my saam stem, dat daar strenger strawwe vir politici moet wees wat nie by die wette hou nie. Wat sou jy voorstel? Vries al hulle bates, betaal geld terug met rente, hy word `n handearbeider vir die wat hy/sy besteel het. Maar wat van `n tronksel vol leeus? Selfs al kan ons so in ons stilligheid dink dit is dalk al wat gaan werk, weet ons dat dit nie gepas is nie. In Daniël 6 hoor ons dat Daniël vir hierdie straf gemerk is, nie omdat hy homself verryk het, of nie sy opdragte uitgevoer het, of die parlement ontwrig het nie, maar juis omdat hy in sy werk uitgeblink het. Daniël was werklik iemand met `n besonder doelgerigte lewe om God te dien. Dit begin by sy naam, wat beteken, God is my regter, en hoe het hy nie opgeleef tot hierdie naam nie! In alles wat hy gedoen het, was dit duidelik dat niemand nie, nie een van die drie konings onder wie hy gewerk het, of enige van die ander kulture en volke hom kon oordeel nie. Ons sien dit in `n paar dinge: Hulle het telkens probeer, maar vir Daniël is daar net een regter wat saak maak en dit is sy Regter. 1. In sy eetgewoontes: As tiener gevangene gaan hy teen Koning Nebukadneser se bevel in, en eet net dit wat hy weet nie God se eer sal steel nie. 2. As hy drome uitlê: Hy vra in 2:18 vir sy vriende om saam met hom te bid dat God die geheim van koning Nebukadneser se droom sal bekend maak, en as God dit doen hoor ons in vers 22 hoe hy sy God loof en dank. Verder getuig hy voor die koning dat niemand anders die droom kon uitlê nie Maar daar is `n God in die hemel wat geheime kan openbaar en wat aan u wil bekend maak wat in die toekoms gaan gebeur. Nie kan gebeur nie, maar gaan!

2 2 3. In hoe hy gewerk het: Ons hoor dat Daniël een van drie ministers was wat oor die hele koninkryk van Babel regeer het, en selfs hierin was hy so bekwaam dat die koning geen geheim daarvan gemaak het dat hy Daniël oor alles wou aanstel nie. Hy sou tweede in bevel wees, naas die koning, die magtigste man in die nabye Ooste. Natuurlik was daar van die ander amptenare wat `n stokkie hiervoor wou steek, want hul eie onbekwaamheid en korrupsie sou dan aan die lig kom. Hulle probeer alles, maar kry niks teen Daniël se werk nie, hy was ywerig in sy werk, al was dit as `n balling in `n ander land. Sou ek en jy so gewerk het? Daniël was werklik gehoorsaam deur die vrede en voorspoed van die stad te soek soos God deur die profeet Jeremia (29:7) beveel het. In vers 6 hoor ons die woorde wat elkeen van ons moet hoop mense van ons kan sê: ons sal niks teen hierdie Daniël kry nie, behalwe as ons iets kan kry in verband met sy godsdiens Daniël was dus vir twee dinge bekend: 1. God getroue werksetiek, en 2. God getroue gehoorsaamheid in sy aanbidding. Dink maar vir jouself of dit van jou gesê kan word. 4. In sy gebedslewe: Dat Daniël sy naam gestand doen, is te sien in sy reaksie op die dekreet van die koning. Lees weer vers 11 en 12. Ons moet `n paar dinge uitlig: a. Daniël was heeltemal bewus van die nuwe wet, en ook van die gevolge daarvan, hy was immers een van die drie ministers. Om nie te bid nie, was nie `n opsie nie, en die oomblik toe hy daarvan hoor, gaan hy met sy God daaroor praat, in weerwil van die koning se opdrag. Hy is meer gehoorsaam aan God as aan mense, eerder dood as om nie te bid nie. b. Hy gaan na sy huis toe om te bid, en nie eenkant in die veld of bos nie.

3 3 Hy gaan bid dus openlik, en leef sy geloof voor almal soos hy nog altyd gedoen het, al moes hy geweet het dat sy vyande hierop sou staat maak. Daar was geen godsdienstige wet wat hom verplig het om op sy dak met oop vensters te bid nie, hy kies vir `n getuienis. c. Daniël neem standpunt in deur te hou by sy goeie gewoonte om te bid, en doen dit waar almal wat wil, dit kan sien en hoor. Dit is wie hy is, gebed is sy lewensaar, en niemand kan dit wegneem nie. Hy maak `n publieke demonstrasie daarvan, en ons moet besef dat hy alles het om te verloor. Hy was op die punt om 2de in bevel van die koninkryk te wees, sekerlik sou hy kon motiveer dat hy die koning gehoorsaam het sodat hy later selfs van meer nut vir God kon wees. Nee, dis of die heeltyd alles vir God, of niks. d. Daniël het `n gebedsritme en volharding van 3 keer `n dag. Weereens is daar geen wet in die Bybel wat hom daartoe verplig nie, hy doen dit uit `n gevestigde dissipline om God se wil te soek. Gebedsdissipline is `n anker om tot eer van God te werk en te ly. e. Wat Daniël bid, is nie onduidelik nie. Ten spyte daarvan dat Daniël waarskynlik dieselfde werkslading as `n president gehad het, het hy steeds tyd gemaak vir sy gesprek met God, want God is sy regter. Sy vyande kry hom waar hy tot sy God bid. Geen misverstand. Daar is net een God vir Daniël. Ons kan hiermee opsom dat Daniël se gebed en sy lewe dieselfde ding was, soos hy geleef het, so het hy gebid, en was hy bereid om te ly.

4 4 Dit gesê, is daar `n groot fout wat mens kan maak, en dit is om te sê dat ons elkeen daarna moet streef om soos Daniël te wees sodat ons werk en lyding God kan eer. Nee, Daniël se bewonderenswaardige liefde en toewyding aan God as sy regter en verlosser, is `n vinger wat wys na die Held wat sou kom. Iemand wat God so lief sou hê as Regter en Verlosser dat dit wel sy lewe sou kos, maar ook sou beteken dat Hyself die Regter en Verlosser van die heelal sou word. Ja Daniël se lewensstorie wys ons op Jesus Christus. Ons sou onsself graag as die Daniël van die storie wou sien né, maar eintlik is ons meer soos die ministers en goewerneurs. Ons hou nie regtig van God as ons regter nie, en hoop dat mense in magsposisies ons sal kan red, en die lewe vir ons makliker maak. Dit bepaal baie keer die rede waarom ons ons werk doen, of waarom ons by reëls en wette hou, om ander tevrede te stel sodat dit met ons beter kan gaan. Hoe baie van jou geloofsritme offer jy op ter wille van jou werksverpligtinge, of omdat dit nou maar is wat die lewe vereis? Maar hier is die ding: ons hoef nie te werk vir redding nie, of sodat ons regverdig beoordeel sal word nie. Elkeen wat sy geloof in Christus plaas, se sonde is reeds geoordeel, deur Hom en nie ander mense nie. Dit moet mens lei tot `n lewe van vrede en vryheid, vryheid om jou werk met al jou krag en ywer te doen, omdat jy dit nie vir mense doen nie, maar vir God. Ook as ons moet ly omdat ons nie bereid is om ons geloof en hoop in God prys te gee nie. Daniël se geloof het hom nie uit die leeukuil uitgehou nie, en hy kon nie voor die tyd geweet het dat God hom gaan red nie. Maar met dieselfde gesindheid waarmee hy in sy plek van gebed ingegaan het, het hy ook in die leeukuil ingegaan, biddend, met sy lewe veilig oorgegee in God se hande. Sal ons so leef dat ons tot eer van God werk en ly?

5 5 Maak gereed vir die lyding, deur nou reeds tot eer van God te werk. Hoe maak ons gereed? Deur gebed. Hier is `n paar dinge oor gebed wat ons dan kan vasknoop: 1. Gebed is `n openbare getuienis, nie om deur mense gesien of beoordeel te word nie, maar om te wys dat jy deur God gesien en beoordeel word. Bid daarom openlik, eerlik, natuurlik, opreg en oral. 2. Gebed is `n bewys dat jou lewe gebou is op gesprek met God. Moenie besluite neem, en maar net aangaan met jou lewe, sonder om met God daaroor te praat nie. Smeek God om jou voete te lei na waar Hy jou wil neem. Maak God deel van alles: jou en jou gesin se beplanning, jou worstelinge, die opvoeding van jou kinders, jou gesondheid. 3. Gebed is gedissiplineerd en gereeld. En nee, dit is nie een of ander wettiese bevel nie. Baie mense maak asof ons vryheid in Christus beteken dat ons nie dissipline in ons geloof moet hê nie. Gebed is nie net vir monnike, priesters of predikante wat baie tyd daarvoor het of kamstig daarvoor geleer het nie. Ook Jesus het baie gereeld gebid, en dit in die openbaar, waar Hy juis nie `n klop op die skouer gekry het nie, maar die respek en geloof van sy dissipels, en liefde van sy Vader. 4. Gebed is belangriker as die lewe self. Opregte, innige en liefdevolle gesprek met God, is die lewe. Dit is jou lewensaar vir die ewige lewe, en daarom belangriker as hierdie lewe. Moenie skaam wees, om in gebed gevang te word nie. Ja, met die manier hoe jy bid, nie soos ander nie. Mag jou woorde dan ook so wees dat dit duidelik is tot wie jy bid. Sommige mense se gebede sou verwar kon word, met `n lysie wat eintlik vir Kersvader bedoel is. Nee, bid persoonlik, tot die God wat jou hart gegryp het, smeek Hom om genade, en prys Hom omdat Hy dit reeds in oorvloed gegee het deur sy Seun.

6 6 `n Laaste gedagte: mag ons dan wanneer ons met ons kinders, vriende of vreemdelinge praat oor Daniël, baie meer maak van die feit dat hy gebid het, as van die feit dat hy vir die leeus gegooi is. Nie meer Daniël en die leeukuil nie, maar Daniël en sy bokamer! Bly bid, en mag ons elkeen, groei in ons toewyding in gebed. So sal ons toegerus wees om tot eer van God te werk en te ly.