NUUSBRIEF: DESEMBER 2010-FEBRUARIE 2011

Transcriptie

1 NUUSBRIEF: DESEMBER 2010-FEBRUARIE 2011 BLADSY Inhoudsopgawe & Kersgroete 1 Aftrekbaarheid van mediese uitgawes 2 Is jou trust in orde? 4 Wie moet vir belasting registreer? 5 KERSGROETE Ons bedank graag al ons kliënte vir julle ondersteuning gedurende die jaar. Ons het 'n uitdagende jaar met die oorname van die praktyk gehad, en ons waardeer almal se gesindheid en samewerking. Ons kantore sluit op 15 Desember 2010 vir die Kersseisoen. Ons open weer ons deure op 10 Januarie Indien u om enige rede gedurende hierdie tyd met ons moet kontak maak, kan u vir Wessel Steyl kontak by selfoon of per e-pos by wessel@steylcloete.co.za. Ons wens u en u naastes 'n geseënde Kerstyd en 'n voorspoedige nuwe jaar toe! Ry asseblief veilig wanneer u op die pad gaan en keer veilig terug. Vriendelike groete Steyl & Cloete-span 1

2 DIE AFTREKBAARHEID VAN MEDIESE UITGAWES Ingevolge art. 18(a) van die Inkomstebelastingwet Nr. 58 van 1962 kan 'n Suid-Afrikaanse inwoner wat vir belasting geregistreer is, die volgende mediese bydraes en uitgawes vir belastingdoeleindes aftrek: 1. Bydraes gemaak aan 'n geregistreerde mediese fonds of skema ten opsigte van homof haarself en ander afhanklikes. 2. Bedrae betaal aan verskeie dokters, hospitale en apteke (vir voorgeskrewe medisyne). Enige medisyne aangekoop by 'n apteek sal slegs deur SARS toegestaan word as 'n aftrekking indien dit voorskrifmedisyne is. Soos u weet, is die belastingjaar van alle individue vanaf Maart elke jaar tot einde Februarie van die volgende jaar. Mediese uitgawes en bydraes tot mediese fondse is natuurlik slegs aftrekbaar in die belastingjaar waarin dit aangegaan is. Die aftrekking ten opsigte van medies is elke jaar onderworpe aan sekere voorwaardes. INDIVIDUE ONDER 65 JAAR SONDER ENIGE GESTREMDHEDE Eerstens word 'n beperkte, primêre aftrekking per persoon per maand bepaal vir die aantal persone wat aan die belastingpligtige se mediese fonds behoort. Daarna word die mediese bydraes en uitgawes wat oorbly, bymekaargetel vir 'n sekondêre aftrekking, wat slegs aftrekbaar is indien dit meer as 7,5% van die belastingpligtige se belasbare inkomste te bowe gaan. Vir die 2011 finansiële jaar (1 Maart 2010 tot 28 Februarie 2011) is die primêre aftrekking R670 vir die eerste twee lede van 'n mediese fonds en R410 vir elke addisionele lid. Die volgende is 'n vereenvoudigde voorbeeld: Mnr. Koos van der Merwe verdien 'n salaris van R150,000 vir die 2011 finansiële jaar. Hy maak bydraes van R2,700 per maand, wat 'n totaal van R32,400 vir die jaar opmaak. Hy, sy gade en twee kinders is onder sy naam by die mediese fonds geregistreer. Hy het verder R3,600 se kwalifiserende uitgawes by sy plaaslike apteek en huisdokter aangegaan (wat nie deur die mediese fonds betaal was nie). Ons bepaal mnr. Van der Merwe se aftrekking vir medies soos volg: Primêre aftrekking: R670 x eerste 2 persone x 12 maande = R16,080 R410 x 2 afhanklikes x 12 maande = R 9,840 TOTALE PRIMÊRE AFTREKKING R25,920 Sekondêre aftrekking: Die bedrag vir die aftrekking is soos volg: (R32,400-R25,920) + R3,600 = R10,080 Die aftrekking word toegelaat vir die bedrag wat meer as 7,5% van die belasbare inkomste is wat soos volg bepaal word: 2

3 (R150,000 - R25,920) * 7,5% = R 9,306 TOTALE SEKONDÊRE AFTREKKING DUS R 774 TOTALE MEDIES AFTREKBAAR VIR BELASTING R26,694 Die gedeelte in die bogenoemde voorbeeld wat nie in die betrokke finansiële jaar aftrekbaar is nie, gaan verlore. Dit kan nie na die volgende jaar oorgedra word nie. Die bogenoemde voorbeeld raak meer gekompliseerd wanneer 'n werkgewer namens 'n werknemer bydraes tot die werknemer se mediese fonds maak. In so 'n geval verminder die werkgewer se bydrae die primêre aftrekking wat die belastingpligtige kan aftrek, aangesien die werknemer nie op die bydrae van die werkgewer as byvoordeel belas word nie. INDIVIDUE OUER AS 65 Alle kwalifiserende uitgawes is van belasbare inkomste aftrekbaar, sonder enige beperkinge soos in die voorbeeld getoon. INDIVIDUE MET GESTREMDHEDE Indien die belastingpligtige of enige ander afhanklikes 'n gestremdheid het (met enkele beperkinge) is alle kwalifiserende mediese uitgawes aftrekbaar, sonder enige beperkinge soos in die voorbeeld getoon, selfs al is die betrokke individu(e) jonger as 65 jaar. SLOTSOM 'n Belangrike nuwe ontwikkeling aan SARS se front ten opsigte van medies is die dokumentasie wat op aanvraag verskaf moet kan word om enige bedrag geëis, te bevestig. Gedurende die laaste paar jaar was 'n opsomming van kwalifiserende mediese uitgawes voldoende. Ons ondervind egter die laaste tyd dat SARS weer begin om slegs die aftrekking vir medies toe te staan as afskrifte van die fakture en kwitansies aan hulle verskaf kan word. Hulle doen dit natuurlik om te bevestig dat alle mediese uitgawes wat geëis is, kwalifiserende uitgawes is, m.a.w. medisyne op voorskrif gekoop. Die aftrekbaarheid van mediese uitgawes is 'n onderwerp in die belastingwêreld wat voortdurend ontwikkel. Voor 28 Februarie 2011 sal die Minister van Finansies die nuwe belastingjaar se veranderinge in belastingsake aankondig. Ons kan dus slegs wag om te sien wat die nuwe jaar vir ons inhou. Ons sal u op hoogte hou! Wessel Steyl Die bogenoemde voorbeeld is slegs ter illustrasie van die algemene voorwaardes en beginsels rondom die belastingadministrasie van toepassing op mediese uitgawes en aftrekkings. Ons beveel aan dat u 'n gekwalifiseerde belastingkenner nader vir advies rondom u eie unieke omstandighede. 3

4 IS JOU TRUST SE SAKE IN ORDE? Trusts word deur die Wet op Beheer van Trustgoed beheer. Die doel van 'n trust is om bates ten behoewe van begunstigdes te bewaar. Enige trust word beheer en bestuur deur trustees, wat te goeder trou in hul amp moet optree. Indien bevind word dat trustees nie te goeder trou opgetree het nie, kan teen hulle opgetree word 'n saak wat deur die Meester in 'n baie ernstige lig beskou word. Trustees moet derhalwe verseker dat hulle weet wat van hulle verlang word en wat hulle pligte behels. Die volgende punte is belangrike beginsels wat oorweeg moet word om te bepaal of u trust se sake in orde is: By enige trust is minstens 3 partye betrokke, nl. die oprigter van die trust, een of meer trustees en een of meer begunstigdes. Indien enige van die partye ontbreek, kan die trust ongeldig verklaar word. Die oprigter en die trustees moet almal die trustakte teken, wat behoorlik by die Meester geregistreer en geliasseer moet wees. Daarsonder kan die trust ongeldig verklaar word. Die Meester reik ook aan die trustees 'n oorspronklike magtigingsbrief uit wat hulle magtig om ingevolge die voorwaardes en beperkinge van die trustakte op te tree. Elke trust moet 'n onafhanklike trustee hê om te verseker dat die ander trustees nie die trust na hul eie belang bestuur nie. Behoorlike rekeningkundige rekords moet bygehou word en jaarlikse finansiële state moet opgestel en by die Ontvanger van Inkomste ingedien word. Dit impliseer natuurlik dat die trustees moet toesien dat die trust se belastingsake op datum gehou word. Trustees moet toesien dat behoorlike notules van besluite deur die trustees minstens op 'n jaarlikse basis opgestel en behoorlik onderteken/bekragtig word. Die trustees moet toesien dat die bates van die trust behoorlik teen ongemagtigde gebruik beskerm word en dat die opbrengs uit bates die trust toeval en behoorlik verantwoord word. Indien die trust handel dryf en deel is van 'n groep, moet sorg gedra word dat die bedrywighede van die trust behoorlik van die res van die groep se bedrywighede onderskei kan word. 'n Algemene beginsel by trusts is die uitkering van inkomste- of kapitaalwinste aan begunstigdes wat ingevolge die trustakte benoem is. Trustees moet sorg dra dat die trust voldoende kontant beskikbaar het / sal hê om sy verpligtinge teenoor die begunstigdes na te kom, soos bepaal deur die trustakte en wense van die oprigter. Wessel Steyl 4

5 WIE MOET VIR BELASTING REGISTREER? Ek glo dat baie mense wat vir belasting geregistreer is, voel soos Snoopy hierbo. Vir baie mense is belasting 'n onderwerp wat hulle veel eerder sou vermy indien moontlik. Ongelukkig was belasting deur die eeue heen nog altyd 'n realiteit. Voorheen was enige individu in Suid-Afrika verplig om vir belasting te registreer indien hul jaarlikse inkomste R60,000 te bowe gegaan het. In September 2010 het die Minister van Finansies aangekondig dat daar nou van alle persone wat enige vorm van inkomste verdien, vereis word om vir belasting te registreer, selfs al verdien hulle minder as die belastingperk. Bogenoemde beteken dus dat werkgewers (wat by SARS vir LBS- en WVF-doeleindes geregistreer is) elke jaar 'n IRP5 of IT3 vir hul werknemers moet uitmaak, selfs al betaal die werknemer nie belasting nie. Dit beteken verder dat die werkgewer die werknemers se onderskeie belastingnommers en ander relevante inligting op hul IRP5 s moet aandui. SAL ALMAL 'n BELASTINGOPGAWE MOET INVUL EN INDIEN? Gelukkig is die antwoord Nee. Waar 'n belastingpligtige 'n totale inkomste van minder as R120,000 verdien, kan die belastingpligtige kies om nie 'n opgawe in te dien nie, indien hulle aan die volgende kriteria voldoen: Die belastingpligtige ontvang vergoeding van 'n enkele werkgewer. Die vergoeding ontvang is vir 'n volle jaar van aanslag (m.a.w. 1 Maart tot 28/29 Februarie). Geen toelaag (bv. reistoelaag) is ontvang nie. In die geval waar 'n belastingpligtige aan die bogenoemde voldoen en nie sy/haar opgawe indien nie, sal SARS outomaties die inligting deur die werkgewer aan hulle verskaf as korrek aanvaar en 'n aanslag aan die werknemer uitreik. Aangesien die werkgewer reeds belasting van die werknemer se salaris verhaal het, behoort die aanslag te toon dat die werknemer nie belasting hoef in te betaal nie. 5

6 Indien die werknemer meer as R120,000 per jaar verdien of kwalifiserende mediese uitgawes of bydraes tot 'n mediese fonds gemaak het wat hulle wil aantoon, sal hulle uiteraard hul opgawe moet indien sodat SARS dit in ag kan neem wanneer die aanslag uitgereik word. Indien u enige twyfel rondom u eie of naasbestaandes se unieke situasies het, kan u te eniger tyd ons kantore vir advies skakel. Verder kan ons u bystaan om vir belasting te registreer om u sake in orde te hou of u bystaan om u belastingopgawe in te dien. Wessel Steyl 6