NUWE WYN STILTETYD. Leer kinders die daaglikse praktyk van stiltetyd. Dr. Christo Nel. N u w e W y n v i r k i n d e r s

Transcriptie

1 NUWE WYN STILTETYD Leer kinders die daaglikse praktyk van stiltetyd Dr. Christo Nel 2012 N u w e W y n v i r k i n d e r s

2 Contents STILTETYD... 2 DEEL 1 WAT IS STILTETYD?... 2 DEEL 2 HOEKOM HOU 'N MENS 'N STILTETYD?... 4 DEEL 3 WANNEER EN WAAR HOU 'N MENS STILTETYD?... 5 DEEL 4 HOE HOU 'N MENS STILTETYD? (1)... 6 DEEL 5 HOE HOU 'N MENS STILTETYD? (2)... 8 DEEL 6 HOE MOET EK BID? DEEL 7 WAT HET EK NODIG? DEEL 8 TERUGRAPPORT DEEL 9 HERSIENING... 13

3 STILTETYD Inleiding Ek het jare gelede hierdie stuk voorberei n.a.v. n stuk lesmateriaal van CEF, "A quiet time". VISUELE APPARAAT TYDENS LESAANBIEDING: 1. 'n Afrikaanse vertaalde weergawe van die visuele apparaat van "A quiet time" in 'n "Flip file". (Denham, K A quiet time. Kilchzimmer: European Child Evangelism Fellowship.) 2. Of gebruik die Powerpoint-aanbieding, Stiltetyd, wat ek hiervoor berei het. DOELWIT Om die groep kinders die daaglikse praktyk van stiltetyd as gelowiges aan te leer. INHOUD DEEL 1 WAT IS STILTETYD? (Vertoon buiteblad aan kinders) Kom ons gesels 'n bietjie oor dit wat ons hier sien. Ek gaan vir jou 'n paar vra daaroor vra en dan kyk ons of jy dit kan beantwoord. Kyk mooi na die seuntjie in hierdie prentjie... Dink jy hy is 'n Christen? (Meestal antwoord die kinders "Ja"). Hoekom sê jy so? (Die kinders antwoord gewoonlik " Hy bid en lees die Bybel"). O! Maak dit iemand 'n Christen as hy bid en Bybel lees? (Die kinders besef dan die probleem, en antwoord "Nee, 'n Christen is iemand wat Christus as Verlosser aangeneem het").

4 Nou, kom ons veronderstel dat hierdie seuntjie werklik Jesus Christus as Verlosser aangeneem het en daarom werklik 'n Christen is. Verduidelik 'n bietjie aan my waarmee is hy besig? (Die kinders antwoord "Hy hou stiltetyd"). Ja, hierdie seuntjie het die Here Jesus lief en daarom staan hy vroeg in die oggend op om 'n bietjie tyd saam met Jesus te spandeer voordat hy met die ander dinge van die dag besig raak. Het jy raak gesien hoe laat hy opgestaan het? (Die kinders antwoord "Ses uur"). In die volgende paar weke gaan ons 'n bietjie met mekaar gesels oor "Stiltetyd" - 'n baie spesiale tyd elke dag saam met Jesus. As jy in die Here Jesus glo en op Hom vertrou om jou te red, hoop ek dat jy ook so 'n spesiale tydjie elke dag met Jesus sal hê. (Vertoon bladsy 1 en 2 na mekaar. Die kernwoord by elke prentjie op bladsy 2 moet toegeplak wees. Soos wat gevorder word op die bladsy, kan die antwoorde vertoon word). Kom ek vra julle 'n ander vraag oor stiltetyd... Wat is stiltetyd? Hierdie bladsy gaan ons help om daardie vraag te beantwoord. Wie wil vir ons die eerste ding oor stiltetyd sê? (Die kinders antwoord "Lees die Bybel"). Ja, as ons God werklik beter wil leer ken, moet ons die Bybel lees, want dit is Sy Woord. Hierin praat Hy self met ons. Hierin vertel Hy vir ons meer oor Homself, wie Hy werklik is en hoe Hy oor ons voel. Hy wys ook vir ons hoe ons werklik lyk, en hoe Hy wil hê ons moet lewe. In Openbaring 3:20 staan daar dat die Here Jesus sê as ons sy stem hoor en die deur van ons lewe vir Hom oopmaak, kom Hy by ons in om saam met ons feesmaal te hou, en ons met Hom. Dit beteken dat Hy graag wil kom om dinge met ons te deel, ja, om ons hele lewe met ons te deel en altyd by ons te wees. Hy stel in ons belang, want Hy is lief vir ons. Hy gee om oor alles wat met ons elke dag gebeur. Wat sê Nommer 2 is nog deel van stiltetyd? (Die kinders antwoord "Gebed").

5 Ja, in ons stiltetyd luister ons nie net na wat God vir ons in sy Woord sê nie, ons kry ook kans om self met God te praat in gebed. Ons kan vir Hom van die dinge vertel wat vir ons belangrik is. Dit is "deel met mekaar" tyd. In ons gebed kan ons vir God vertel dat ons Hom liefhet, en ons kan vir Hom vra om spesiale dinge vir ons te wys in sy Woord. Ons kan vir Hom vra om ons te help, en om ander te seën. Nommer drie is natuurlik ook baie belangrik! Wat dink julle beteken die woordjie "dink" as ons stiltetyd hou? Wanneer ons in ons stiltetyd tyd maak om na God te luister en met Hom te praat, jaag ons dit nie net om klaar te kry nie. Ons maak tyd om mooi te dink oor dit wat ons gelees het en wat ons graag vir God wil sê as ons bid. Miskien wil God vir ons iets baie besonders sê. Maar dan moet ons mooi luister terwyl ons dink, en bid dat die Here daardie iets besonders vir ons sal sê. DEEL 2 HOEKOM HOU 'N MENS 'N STILTETYD? (Vertoon eers blabsy 3, dan 4). Kom ons gesels vandag 'n bietjie oor die vraag waarom moet ons stiltetyd hou. Kan jy vir my 'n paar redes gee waarom ons hierdie spesiale tyd met God moet hê in ons lewens? (Laat die kinders toe om hieroor 'n bietjie te gesels voor jy verder gaan). Baie van die redes wat julle gegee het is goeie redes! Kom ek noem nog twee vir julle. Hierdie twee redes waarom ons stiltetyd moet hou, kry ons in die Bybel self. Matteus 4:4. (Lees die vers hardop). In hierdie vers sê die Here vir ons hoe belangrik dit is om die Bybel te lees en te bestudeer. In hierdie verhaal word Jesus deur Satan versoek. Satan wil graag hê Jesus moet doen wat hy sê. Maar Jesus het geweet dat dit verkeerd sal wees om Satan te gehoorsaam, en daarom gebruik Hy die Woord van God, die Bybel, om Satan van Hom af te laat weggaan. As dit vir die Here Jesus nodig was om die Woord van God te ken, hoeveel meer het ons nodig om dit ook te ken! Matteus 14:23. (Lees die vers hardop). Het jy geweet dat die Here Jesus ook tye in sy lewe gehad het waar Hy spesiaal alleen was saam met sy Vader, God? In hierdie hoofstuk van die Bybel lees ons dat die Here Jesus baie besig was. Hy het 'n groot wonderwerk gedoen toe Hy meer as 5000 mense kos gegee het met 5 broodjies en twee klein vissies. Maar nadat alles verby was, het die Here Jesus sy eie dissipels weggestuur. Hy wou heeltemal alleen wees om met sy Vader, God, te praat. So het ons ook tyd nodig om heeltemal alleen te wees saam met God. Natuurlik is dit heerlik om kerk en kategese (Sondagskool) toe te gaan, of hier na die Kinderkrans/GNK toe. Hier kan ons saam met ander Christene wees - om meer oor

6 God te leer, en om Hom te aanbid. Maar as ons wil hê ons vriendskap met God moet groei en verdiep, moet ons gereeld tyd alleen saam met God deurbring om Hom beter te leer ken. Magriet was 'n nuwe meisie by die skool. In die begin was dit werklik moeilik, want sy het niemand geken nie. Maar na 'n dag of twee, het sy vriende gemaak met 'n ander meisie, Karen. Toe word die nuwe skool vir haar lekker. Magriet en Karen het baie met mekaar gesels en mekaar so baie beter leer ken. En sommer gou-gou was hulle twee soos 'n Dawid en Jonatan, boesemvriendinne, wat altyd bymekaar is en alles saam doen. Die Here Jesus wil ook graag hê ons moet tyd saam met Hom deurbring om Hom so beter te leer ken. Hy stel tog in alles wat ons doen belang, en in alles wat met ons gebeur. Kom ons maak seker daarvan dat ons elke dag 'n spesiale tyd maak om saam met Hom alleen te wees! DEEL 3 WANNEER EN WAAR HOU 'N MENS STILTETYD? Vandag moet ons twee baie belangrike vrae antwoord. En albei het te make met ons stiltetyd. Hier is die eerste een: (Vertoon bladsy 5). Wanneer hou 'n mens jou stiltetyd? (Vertoon vlugtig die voorblad). Hoe laat het hierdie seuntjie sy stiltetyd in die oggend gehou? (Die kinders antwoord: Ses uur). Ja, hy het gevind dat dit vir hom die beste tyd van die dag was om vroeg in die oggend op te staan en stiltetyd te hou. (Blaai terug na bladsy 6). Miskien is dit ook vir jou die beste tyd van die dag - maar daar kan dalk ook ander tye wees wat vir jou beter is. Die Here Jesus het dikwels vroeg in die oggend opgestaan om alleen saam met God te wees. Maar Hy het ook dikwels op ander tye van die dag of in die aand alleen gewees met God. Jy moet dus self 'n tyd gedurende die dag kies wat vir jou die beste is. Miskien is voor ontbyd in die oggend 'n goeie tyd, of na ontbyt. Of wat van direk na skool in die middag, of voor ete vanaand, of selfs net voor jy bed toe gaan in die aand. Wat belangrik is, is om 'n spesiale stiltetyd elke dag te hê, en dit is altyd goed as dit elke dag dieselfde tyd is. So word dit dan 'n goeie en belangrike gewoonte in jou lewe! Kan jy dalk aan enige ander tyd gedurende die dag dink wanneer jy stiltetyd kan hou? (Laat die kinders voorstelle maak).

7 Die tweede belangrike vraag waaroor ons vandag gaan gesels, is die vraag: Waar hou 'n mens stiltetyd? (Vertoon bladsy 7, dan 8). Sarie was die jongste van vier kinders. Sy het twee ouer sussies gehad, en 'n ouer broer. Sy het 'n kamer gedeel met haar een sussie. Dit was altyd baie raserig en woelig in hulle huis, want in die middae na skool was daar altyd vriende by hulle, en soggens was dit 'n groot gejaag om almal ontbyt te eet en betyds te wees vir die skoolbus. Sarie se juffrou by die kategese/gnk het ook met hulle gesels oor hoe belangrik stiltetyd elke dag vir iemand is wat die Here Jesus liefhet en Hom beter wil leer ken. Maar hier binne het Sarie gedink: "Stiltetyd in ons huis...! Dit is onmoontlik. Daar is nooit enige tyd wat dit stil is in ons huis nie. En verder is ek nooit enige tyd alleen nie! Na kategese/gnk gesels sy toe met haar juffrou hieroor. "Sarie," sê haar juffrou. "Kom ons bid hieroor, en vra vir die Here om self vir jou 'n tyd te wys wanneer jy werklik alleen en stil kan wees." En hulle het saam hieroor gebid, en die juffrou het belowe om aan te hou om vir Sarie elke dag te bid totdat sy 'n tyd gevind het. Die volgende week het Sarie goeie nuus vir haar juffrou gehad. "Ek het 'n tyd gekry wanneer my broer en sussies my alleen moet laat en ons almal baie stil moet wees. Wanneer ons in die aand huiswerk moet doen na ete, sorg Ma dat dit doodstil in die huis is, en elkeen van ons moet ook alleen in 'n aparte kamer studeer. Daarom het ek vir haar gevra of ek stiltetyd mag hou voor ek begin huiswerk doen, en sy het 'Ja' gesê. Dit help my sommer om my huiswerk ook beter te doen as ek eers daaroor gebid het!" Miskien moet jy ook eers baie dink waar gaan jy 'n plek kry om alleen en stil te wees. Maar as jy regtig wil, sal die Here jou help om 'n tyd en 'n plek te kry waar jy alleen kan stiltetyd hou. DEEL 4 HOE HOU 'N MENS STILTETYD? (1) (Vertoon bladsy 9, en dan 10 aan die kinders. Sorg net dat die antwoorde toegemaak is. Die antwoorde word, soos die les vorder, stelselmatig ontbloot). Ons het nou al vir mekaar 'n hele klomp dinge oor stiltetyd vertel, né? Maar ek dink dat daar een belangrike vraag is waaroor ons nog nie gesels het nie, en miskien is hierdie vraag belangriker as al die ander dinge waaroor ons tot hier gesels het. Baie keer vertel mense vir ons hoe belangrik dit is om 'n seker ding te doen. By die skool sê juffrou "Doen jou somme", of "Spel daardie woorde". En jy weet jy behoort dit te doen. Jy weet jou juffrou gaan ook nie baie gelukkig wees as jy dit nie doen nie. En tog, in plaas van om te doen wat sy sê, sit jy en kou aan jou potlood of krap jy jou kop.

8 En wanneer sy jou vra waarom jy nog nie jou werk begin doen het nie, antwoord jy: "Maar Juffrou, ek weet nie, ek weet nie hoe nie? Ja, HOE is 'n baie belangrike vraag, en vandag gaan ons gesels oor Hoe om stiltetyd te hou. Ons het alreeds vir mekaar gesê stiltetyd is 'n baie spesiale tyd saam met God. God praat met ons deur die Bybel, en ons praat met Hom in gebed. Kom ons gesels 'n bietjie met mekaar oor hoe ons ons Bybel moet lees sodat God met ons kan praat. Daar is sewe stappe wat ek en jy moet volg as ons die Bybel in ons stiltetyd lees. Wie wil vir ons die eerste stap lees? (Bid). Ja, ons met eers bid voor ons die Bybel lees. Weet jy hoekom? Omdat dit belangrik is om ons gedagtes na God toe te bring om Hom te vra om ons te help om oor Hom te dink, en oor sy Woord. Ons moet Hom vra om ons te help om op Hom te konsentreer, om te hoor en te verstaan wat ons in die Bybel lees. In Ps 119:18 lees ons so 'n mooi gebed in die Bybel: "Maak my oë oop dat ek die kragtige werking van u wet ervaar." Of daar in 1 Samuel 2 hoor ons die klein Samuel bid: "Praat, Here, u dienaar luister!" Jy kan jou stiltetyd begin met so 'n gebed waarin jy vir God vra om met jou te praat deur die Bybel. Sal iemand vir ons die tweede stap lees wat ons moet volg? (Lees). As ons klaar gebid het, is ons gereed om die Bybel te lees om so uit te vind wat die Here vir ons wil sê! Maar hoe weet 'n mens waar om te lees - die Bybel is tog 'n baie dik boek. Waar begin 'n mens lees? Miskien het jy nog nooit self baie in die Bybel gelees nie, en daarom sal dit baie goed wees as jy 'n bietjie oor die Here Jesus sal lees: Hoe Hy geleef het, en wat Hy gesê en gedoen het terwyl Hy hier by ons op aarde was. (Die onderwyser kan hier voorstel dat die kinders by die Evangelie van Johannes of Markus kan begin. Wys vir hulle waar dit in die Bybel is.) Dit is 'n baie goeie idee om dan hierdie hele boek in die Bybel dwarsdeur te lees, elke dag net 'n paar versies op 'n keer natuurlik! Ander mense het weer 'n kaartjie of 'n boekie wat vir hulle sê waar hulle elke dag moet lees. Nou is ons by die derde stap. Wie wil dit vir ons lees? (Dink). Ja, dink! 'n Mens kan selfs 'n groter woord daarvoor gebruik: mediteer. As 'n mens die paar versies van daardie dag klaar gelees het, kan jy oor hulle dink deur die volgende vrae te vra:

9 * Is dit wat hier staan, 'n Bybelse waarheid wat ek kan leer - miskien oor God, of oor myself, of oor ander? * Is dit dalk 'n spesiale belofte van God, aan my? * Is hier dalk 'n voorbeeld wat ek kan volg - uit die lewe van 'n goeie of 'n slegte mens in die verhaal? * Is hier 'n opdrag - iets wat God vir my vra om te doen? * Is hier dalk 'n waarskuwing, 'n gevaar of 'n sonde waarvoor ek moet oppas? Volgende keer leer ons die ander belangrike stappe wat ons moet volg as ons die Bybel lees in ons stiltetyd. DEEL 5 HOE HOU 'N MENS STILTETYD? (2) Verlede keer het ons met mekaar begin gesels oor die vraag hoe 'n mens stiltetyd hou. Kan jy onthou wat ons tot dusver vir mekaar daaroor gesê het? (Nadat die kinders gesê het wat hulle kan onthou, vertoon weer bladsye 9 en 10 aan hulle, en hersien kortliks die eerste drie feite). Ja, bid eers. Vra vir God om met jou te praat, en om jou te help om op Hom en op sy Woord te konsentreer. Dan? Lees ons 'n gedeelte uit die Bybel uit - miskien twee of drie keer oor - terwyl ons...? Ja, dit is reg. Terwyl ons daaroor dink. Ons dink en vra vir onsself vrae oor wat die Here vir ons hier wil sê. Dit kan miskien 'n spesiale belofte wees of 'n Bybelse waarheid; iemand in die Bybelse verhaal kan dalk 'n voorbeeld vir ons wees; of daar kan 'n opdrag wees wat ons moet gehoorsaam, of 'n waarskuwing oor 'n sekere sonde of gevaar! Wanneer jy die gedeelte goed deurgelees het en 'n spesiale gedagte daaroor ontdek het, is jy gereed vir die vierde stap van stiltetyd. Weet een van julle wat hierdie stap is? (Bid) (Vertoon bladsy 11). Wat sê jy? Ons moet weer bid? Maar hoekom moet ons weer bid. Ons het tog alreeds gebid. Ja, maar hierdie keer bid ons oor wat ons gelees het en wat die Here vir my daarin gesê het. Sê nou, byvoorbeeld, dat jy die verhaal van Jesus gelees het waar Hy na die mense gekyk het terwyl hulle hulle geld in die offergawekis by die tempel kom sit het. (Lees Mrk 12:41-44).

10 Miskien was die spesiale gedagte wat die Here vir jou hier gegee het, die gedagte dat hierdie vrou aan God alles gegee het wat sy gehad het. Dan kan jy bid: "Here Jesus, ek het nie baie nie, maar ek wil ook soos hierdie vrou vir U alles gee wat ek het. Wys U vir my hoe ek dit kan doen. Amen." Of miskien het jy die verhaal gelees waar Judas, een van die dissipels van Jesus, besluit het om Jesus te verraai aan sy vyande. (Lees Mrk 14:10-11). Dan kan jy miskien bid: "Here Jesus, gee vir my asseblief die krag om te lewe soos wat U wil hê ek moet, sodat ek U nooit in enigiets sal verraai nie. Bewaar my dat ek nie vandag sal sondig nie, sodat dit wat ek doen of sê vir mense sal wys dat ek vir U lief het. Amen." Nadat jy gebid het oor wat jy gelees het, wat dink jy kom volgende? (Skryf). Ja, skryf die spesiale gedagte neer sodat jy kan onthou wat die Here vir jou gesê het. Weet jy hoe kan jy dit doen? (Gebruik 'n skoon vel papier/skoon notaboekie om vir die kinders te wys hoe lyk 'n stiltetyd-notaboekie). Bo-aan die bladsy skryf jy die datum en wat jy vandag gelees het. Bv: 10 Oktober Mrk 12: Op die volgende lyntjie skryf jy die opskrif: "Spesiale gedagte". En langs dit die vers wat vir jou die meeste beteken het van dit wat jy gelees het, en miskien 'n paar woorde wat jy daaroor gebid het. Dit bring ons by stap 6. Wat is dit? (Leer). Kyk weer 'n slag goed na die gedeelte in die Bybel wat jy gelees het. Lees dan weer 'n keer wat jy in jou notaboek daaroor geskryf het. Vra dan vir jouself: "Wat het ek werklik vandag geleer? Is daar iets wat die Here vir my sê wat ek moet doen? Is daar miskien 'n sonde in my lewe waarmee ek moet stop? Wat is God regtig besig om vir my te sê?" Weet jy, dit is hoe 'n mens uit die Here se Woord leer. Wanneer ons noukeurig kyk en luister wat Hy daarin vir ons sê. Jy kan ook 'n minuut of twee neem en die vers wat vir jou spesiaal was, weer 'n paar keer vir jouself herhaal, want dit is tog ook iets wat die Here vir jou wil leer! Skryf dan in jou notaboekie neer wat jy vandag in jou stiltetyd geleer het, en dan is jy gereed vir die laaste stap in jou stiltetyd. Wat is dit? (Gehoorsaam). Ja, en hierdie stap is seker die belangrikste van almal. Moenie dit ooit vergeet nie. Die Bybel sê: "Julle moet doen wat die woord sê en dit nie net aanhoor nie, anders bedrieg julle julleself." (Jak 1:22). Die Here Jesus wil hê dat ons moet doen wat Hy vir ons in die Bybel sê, sodat Hy ons lewens dag na dag verder kan verander, sodat ons meer en meer soos Hy sal lyk en lewe.

11 DEEL 6 HOE MOET EK BID? Kan jy onthou wat ons gesê het wat stiltetyd is? (Laat die kinders toe om te antwoord). Ja, stiltetyd is ook 'n tyd van saam gesels. Waar ek na die Here Jesus luister as Hy met my gesels deur die Bybel, en ek dan weer met Hom gesels in gebed. Vandag gaan ons 'n bietjie hieroor praat: Hoe om te bid! (Vertoon bladsy 12). Louise is 'n Christenmeisie. Sy het ook geleer wat dit beteken om stiltetyd te hou. En daarom bid sy so ver moontlik elke dag. Sy het selfs vir haar 'n klein gebedslysie gemaak, en daarop het sy die name van al haar familielede geskryf. Pieter, haar jongste boetie het nog nie die Here Jesus gevra om sy Verlosser te wees nie, en sy bid werklik dat hy dit binnekort sal doen. Sy bid ook vir haar ouers, want sy weet hulle is Christene, en daarom het hulle elke dag krag en genade nodig om vir die Here elke dag te lewe, net soos sy self. By haar eie naam op die lysie het Louise drie dinge neergeskryf waarmee sy baie graag wil hê die Here moet haar nou help: nl haar skooleksamen, haar vinnige humeur, en haar wens om na die CSV/KJA/GN-kamp te gaan. Sy weet dat die Here ook in al hierdie dinge belangstel en dat Hy in staat is om haar gebede te beantwoord. Het jy al so 'n gebedslysie? Watter dinge sal jy op jou gebedslysie neerskryf as jy een sou maak? (Laat die kinders 'n bietjie hieroor saam gesels en gee vir hulle hierin leiding indien nodig). O, daar is so baie dinge waarvoor ons kan bid, maar het jy agtergekom dat die meeste van die dinge wat ons genoem het dinge is wat ons vra? Is gebed dan net heeltyd om te vra? Is daar nie ook ander dinge wat ons kan doen as ons bid nie? Kom ons kyk of ons boekie vir ons hieroor raad het. Wat dink julle kan ons nog doen as ons bid? (Laat hulle antwoord). (Vertoon die woorde op bladsy 13 soos jy vorder). Lyk vir my ons boekie stel voor dat ons nie sommer begin om dinge van die Here te vra as ons begin bid nie. Hoe moet ons dan begin? (Loof). Ja, die Here is so groot, Hy is so goed, en vol liefde vir sy kinders. Ons kan Hom loof en prys daarvoor en vir Hom vertel hoe lief ons vir Hom het. Wat kan ons volgende doen? (Dankie sê). Die Here wil hê ons moet dankie sê vir alles wat Hy vir ons reeds gegee en gedoen het. Moenie vergeet om tyd hiervoor te maak as jy bid nie!

12 Maar ons kan nog iets doen as ons bid. Wat dink julle is dit? (SÊ ons is jammer). Ja, daar is baie keer tye in ons lewe wat ons byna nie kan bid of die Here loof nie. Dit is gewoonlik omdat daar dinge in ons lewe is wat ons verkeerd gedoen het en dan moet ons eers vir die Here sê dat ons jammer is daaroor. Maar ons hoef nie hieroor te lank treurig of mismoedig te wees nie. Die Here Jesus vertel vir ons wat ons dan moet doen. Ons moet net erken wat ons verkeerd gedoen het, sê dat ons jammer is daaroor, en dan ophou om hierdie verkeerde dinge weer te doen. Dit is tog wat dit beteken om jou sondes te bely. In die Bybel staan daar: "Maar as ons ons sondes bely - Hy is getrou en regverdig, Hy vergewe ons ons sondes en reinig ons van alle ongeregtigheid." (1 Joh 1:9). M a w as jy sondig, erken dit dadelik teenoor die Here, en vra die Here om jou daardie verkeerde woord of daad te vergewe, sê vir Hom dankie dat Hy dit gedoen het, en begin dadelik om Hom weer te loof en te prys. Dit bring ons by die laaste deel van gebed, en dit is die een waarmee ons begin het: Vra. Maar, het jy gesien, in hierdie boekie staan dit heel laaste op ons lysie van wat gebed regtig is - en dit is eindelik presies waar dit regtig hoort! Dit beteken nie dat om sekere dinge in gebed van die Here te vra onbelangrik is nie. Inteendeel, dit is vir God belangrik, want Hy het ons lief, en wil ons help, en daarom wil Hy hê ons moet ook met ons versoeke na Hom toe kom. Dit moet net nie al wees waaruit ons gebed bestaan nie. DEEL 7 WAT HET EK NODIG? Ons het nou al baie dinge vir mekaar oor stiltetyd gesê, né, oor wat dit is, waarom dit belangrik is, en hoe 'n mens stiltetyd hou. Is jy nie al opgewonde om daarmee te begin nie? Natuurlik is jy! En daarom is vandag se vraag 'n baie spesiale vraag. (Vertoon bladsy 14). Wat het ek nodig? Die belangrikste is natuurlik dat jy daar moet wees! Ken jy werklik die Here Jesus as jou Verlosser? Wil jy Hom regtig beter leer ken en vir Hom elke dag lewe? Dit is baie belanrike vrae die om vir jouself te vra, anders gaan jy erens langs die pad moeg word om stiltetyd te hou en ophou daarmee. Maar as dit vir jou erns is, sal God jou help om getrou te wees in jou stiltetyd.

13 Wat jy dan verder nodig het is 'n stil plek, en 'n spesiale tyd waar jy en God saam kan gesels. Dink 'n bietjie hieroor na en dan besluit jy watter tyd is vir jou die beste om stiltetyd te hou. Kom ek noem vir jou nog 'n paar dinge wat jy nodig het vir stiltetyd. (Vertoon bladsy 15). Jy het natuurlik 'n Bybel nodig. Het jy een? (Besluit vooraf wat jy gaan maak in gevalle waar daar kinders is wat nie 'n Bybel of 'n gedeelte uit die Skrif het nie). Saam met jou Bybel is dit heerlik om 'n Bybelleesgids van die een of ander aard te hê. Onthou jy ek het jou vertel dat sommige mense in hulle stiltetyd 'n lysie het wat vir hulle vertel waar hulle elke dag in die Bybel moet lees? Ander mense gebruik weer 'n boekie wat vir hulle sê waar hulle in die Bybel moet lees, saam met 'n verhaaltjie of 'n verduideliking wat vir hulle help om dit wat hulle gelees het, beter te verstaan. (Kry 'n klompie van hierdie hulpmiddels vooraf in die hande. In Afrikaans is daar reeds 'n verskeidenheid in die Bybelkor-reeks beskikbaar. In Engels is daar die "Daily Bread booklets" beskikbaar wat by die CEF se plaaslike tak beskikbaar is). 'n Mens kan selfs 'n soort uitleen-biblioteek skep as jy 'n klompie van hierdie Bybelleesgidse beskikbaar het. Kinders gebruik dit dan vir 'n maand en bring dit dan weer terug en ruil dit om vir 'n ander een). Jy het ook jou eie notaboekie en potlood/pen nodig. Kan jy nog onthou waarvoor gaan jy dit gebruik? (Om 'n spesiale gedagte neer te skryf, en wat jy geleer het). Jy is heeltemal reg. Dit is belangrik om neer te skryf wat 'n mens al geleer het, want so onthou 'n mens ook om te doen wat die Here vir jou gesê het. So 'n stiltetydnotaboekie is iets wat jy ook vir die toekoms wil bêre, want dit bly altyd iets baie kosbaar vir die res van jou lewe. 'n Mens kan dit mos weer en weer deurlees, en onthou wat die Here vir jou gesê het. Nou is die res jou verantwoordelikheid! Jy het nou gehoor hoe 'n mens stiltetyd kan hou en jy het 'n hele klomp ander dinge daaroor geleer. Maar net jy kan stiltetyd hou - niemand anders kan dit vir jou hou nie. Waarom begin jy nie sommer vandag daarmee as jy nog nie daarmee begin het nie? Volgende keer gaan ons 'n bietjie hoor hoe gaan dit met julle stiltetyd, en dan kan jy vir ons vertel hoe vorder jy. Miskien is daar iets wat jy graag met ons wil deel wat die Here uit sy wonderlike Bybel die afgelope tyd vir jou geleer het. DEEL 8 TERUGRAPPORT Spandeer 'n bietjie tyd om terugrapport te kry van die kinders wat reeds begin het om stiltetyd te hou. Antwoord enige vrae wat die kinders daaroor het, en gee vir hulle verdere leiding in die verband.

14 Bid vir die kinders, dat hulle werklik sal groei in hulle geestelike lewe, en dat stiltetyd deel sal word van hulle daaglikse lewenspatroon. Wees beskikbaar en bereid om hulle te help en aan te moedig vir 'n hele klompie maande in hierdie verband. Onthou dit neem 'n geruime tyd om nuwe lewenspatrone en gewoontes aan te leer. Wees daarom geduldig en hou aan met bid hieroor! DEEL 9 HERSIENING Hersien die inhoud van die Stiltetyd-visuele hulpmiddel kortliks. Hou ook Bybelleesgidse byderhand, en moedig die kinders aan om die gewoonte aan te leer om daagliks stiltetyd te hou. STILTETYD-VISUELE HULPMIDDEL Hierdie hulpmiddel en ook ander is beskikbaar by die plaaslike CEF-kantore (die adres vind u elders in die teks). Dit kan ook bestel word van die oorspronklike uitgewer nl: European CEF Centre Kilchzimmer CH 4438 Langenbruck SWITZERLAND Die oorspronklike teks is deur Kay Denham geskryf. En die ontwerp deur Didi Greiner gedoen. Kopiereg 1983 European Child Evangelism Fellowship Alle regte voorbehou. Hierdie Afrikaanse vertaling is in 1990 deur dr Christo Nel gedoen terywl hy leraar van van die Ned Geref Gemeente, Potchefstroom-Mooirivier was. Deesdae kan jy hom by die volgende e-posadres kontak: nchristo@lantic.net Sy volledige kontakbesonderhede is soos volg: Posbus 3114 Somerset-Wes 7129 Tel: Sel nr.: Webwerf: