12. God se Advokaat by my Johannes 14:15-26

Transcriptie

1 12. God se Advokaat by my Johannes 14:15-26 Tema Die Heilige Gees het na ons toe gekom soos Jesus aanvanklik by die dissipels was om te help dat ons nie alleen word, twyfel en ophou om in Jesus en die Vader te glo nie. Agtergrond en interpretasie In hierdie aanbieding en die volgende een val die klem op die Griekse woord paraklet. Dit kan vertaal word met iets soos advokaat, raadgewer, tussenganger, iemand wat vir n ander intree (intercessor) of bloot helper in die algemener sin van die woord. Dit is iemand wat geroep word om jou by te staan. Die take van die Heilige Gees kan soos volg saamgevat word: As Helper kom die Gees om die dissipels te versterk. Hy help hulle om in Jesus as die waarheid te bly glo, teenoor mense wat Hom verwerp en nie ken nie. As Raadgewer of Voorspraak herinner die Gees die dissipels aan alles wat Jesus vir hulle geleer het en hoe Jesus Hom aan hulle geopenbaar het. Iemand sê selfs die Gees kom as God se Advokaat om God se saak in die wêreld te bly verdedig. As God se Advokaat, oortuig Hy ons van ons sonde en wys hoe Jesus alles weer regmaak. As teenwoordige God plaas die Gees die dissipels se lewe (en ons s n ook) in die groter perspektief van die ewigheid: Hy herinner ons aan dit wat verby is, trek nuwe horisonne oop en verseker ons dat Satan oorwin is. Die Vader se mag is groter as alles wat ons bedreig. So bring die Gees die vrede wat Jesus gee tot by ons. Tydens hierdie ontmoeting kan die leier benamings soos Helper, Voorspraak of Advokaat gebruik aan die hand van verse in Johannes 14 en 16. By die volgende ontmoeting kan hy of sy daarop wys dat Jesus ook die Parakleet is. 1 Johannes 2:1 noem Jesus ons voorspraak by die Vader. Omdat Hy, die Regverdige, die versoening vir ons sonde is, kan Hy in die groot hofsaak voor God ons vrylating bepleit. As ons dus die aardse sfeer en die hemelse sfeer onderskei, kan ons sê die Heilige Gees is God wat in die aardse sfeer sorg dat mense in Jesus glo en God verheerlik, terwyl Jesus God is wat deur sy menswording sorg dat dié wat in Hom glo nie van die ewigheid uitgesluit word nie. Jesus maak vir ons plek gereed en verseker ons dat ons die ewige lewe het. Hoewel ons God die Vader, Seun en Heilige Gees so onderskei, is die drie-enige God by ons verlossing betrokke. Dit bly vir ons n misterie iets wat ons nie met ons menslike verstand kan verklaar nie. Wat ons vol blydskap maak, is dat die Bybel vir ons iets probeer verduidelik van God se erns om mense te laat besef hoe lief Hy ons het.

2 Bybelgedeeltes en hoofgedagtes Bybelgedeelte (lees of vertel) Lees Johannes 14:15-18 Lees Johannes 14:23, Vertel Johannes 16:12-15 Hoofgedagtes van die ontmoeting 1. Jesus sal die Vader vra om vir ons n ander Voorspraak te stuur wat Jesus se plek by ons inneem. 2. Die Heilige Gees leer ons en herinner ons aan alles wat Jesus gesê het. 3. Die Heilige Gees gaan wys wat die waarheid is, naamlik dat Jesus die Here is, en Hy gaan verduidelik wat Jesus vir ons wil sê. Uitkoms 1. Insig: Die Heilige Gees is God by ons wat ons gedurig aan Jesus en die Vader herinner. 2. Respons: Sê vir die Gees dankie dat Hy jou kom help. Vra Hom om jou elke dag te help glo en om dinge te doen wat Jesus en die Vader bly maak. Hulpmiddels by die storie 1. Paneel 6. Hulpmiddels vir kleingroepvaslegging Junior kleingroep Bring saam Senior kleingroep Bring saam 1. Penne of potlode. 1. Penne of potlode. 2. Kleurpotlode of -kryte.

3 Die storie Begin Wie van julle het al fietsgery? Wie het jou geleer fietsry? Iemand moes jou eers wys hoe n fiets werk en jou leer om jou balans te hou. Soms sit die persoon wat jou leer fietsry eers klein wieletjies langs die agterwiel om jou te help. Hy of sy hou ook eers die fiets vir n rukkie vas totdat jy jou balans kan hou. Daar was n seun met die naam Johan. Hy het vir sy sewende verjaarsdag n splinternuwe fiets by sy oom Pieter gekry. Oom Pieter het vir Johan gewys hoe hy op die fiets moet klim en die pedale moet trap. Johan het opgewonde op die fiets geklim terwyl oom Pieter die fiets vir hom vashou. Oom Pieter het ook die fiets vasgehou terwyl Johan probeer ry het. In die begin het dit maar moeilik gegaan, maar dit het al hoe makliker geword. Oom Pieter het die volgende dag weer vir Johan kom help. Hy het vir Johan verduidelik hoe hy die fiets moet stuur en aan watter kant van die pad hy moet ry. Hy het ook vir Johan al die padreëls verduidelik sodat Johan veilig kan ry. Johan het dit begin regkry om vir kort entjies op die fiets te ry. Gelukkig was oom Pieter heeltyd daar om hom te help en vas te hou as hy sukkel. Johan het baie daarna uitgesien dat oom Pieter hom die volgende dag weer gaan kom help fietsry. Die volgende oggend om sê Johan se ma vir hom dat oom Pieter in n motorongeluk was en dat hy nie gou weer vir Johan sal kan leer fietsry nie. Johan was baie hartseer, want wie gaan hom dan nou help? Johan se ma vra toe vir hom: Kan jy onthou wat oom Pieter alles vir jou geleer het? Ja, ek kan, antwoord Johan. Sy ma sê toe: Dan sal jy regkom, want jy is nie alleen nie. Jy het mos oom Pieter se stem by jou. Onthou net sy woorde en wat hy alles vir jou geleer het. Dit sal jou help om te kan fietsry. Die middag het Johan gaan fietsry. Hy het aan oom Pieter se woorde gedink en hy het begin doen wat oom Pieter vir hom geleer het. Toe Johan in die pad afry, het hy weer oom Pieter se stem gehoor wat vir hom verduidelik watter kant van die pad hy moet ry en wat die padreëls is. In die Bybel het Jesus vir sy dissipels ook baie gehelp en vir hulle geleer hoe hulle moet optree. Toe hoor die dissipels dat Jesus weggaan. Hulle was baie hartseer en bekommerd. Hulle het gewonder wie hulle nou gaan help. Luister wat sê Jesus toe vir hulle in Johannes 14. Hoor Moment 1: Johannes 14:15-18 Jesus sal die Vader vra om vir ons n ander Voorspraak te stuur wat Jesus se plek by ons inneem Jesus sê vir hulle dat hulle nie alleen gaan wees nie. Hy gaan die Vader vra om die Gees te stuur om hulle te help. Dit is Jesus se Gees wat binne-in hulle sal woon en hulle sal help. Die Gees is God se Voorspraak. Dit beteken dat die Gees met hulle sal praat en vir hulle sal vertel hoe God en Jesus wil hê hulle moet leef. Hierdie Gees sal hulle help om alles te onthou wat Jesus vir hulle geleer het. Hy sal hulle ook help om dit te doen. Luister wat sê Jesus vir hulle verder in Johannes 14.

4 Moment 2: Johannes 14:23, Die Heilige Gees leer ons en herinner ons aan alles wat Jesus gesê het Die Gees sal vir die dissipels help om Jesus se woorde te onthou dit is nou alles wat Jesus vir hulle gesê en geleer het. Moment 3: Johannes 16:12-15 Die Heilige Gees gaan wys wat die waarheid is, naamlik dat Jesus die Here is, en Hy gaan verduidelik wat Jesus vir ons wil sê Die Bybel sê in Johannes 16 dat die Gees vir die dissipels sal wys wat die waarheid is. Hierdie waarheid is dat Jesus regtig die Seun van God is. Die Gees is ons helper. Hy wil ons help onthou dat Jesus regtig die Here is. Hy wil ons help onthou wat Jesus vir ons in die Bybel leer. Hy wil ons help onthou wat ons alles in die Bybel lees en hoe ons volgens dit moet optree. Hy wil ons ook help om reg en met liefde op te tree soos Jesus en die Bybel ons leer. Dink Johan het eendag weer gaan fietsry. Terwyl hy verby n huis ry, het hy n krieketkolf buite op die gras sien lê. Johan wou baie graag n krieketkolf gehad het. Hy het gewonder wie se kolf dit is en hoekom dit buite lê. Hy was baie lus om te stop en die kolf op te tel en huis toe te vat. Maar Johan onthou toe dat oom Pieter eenkeer vir hom Bybel gelees het en gesê het: Jy mag nooit iets vat wat nie joune is nie. Die Gees het vir Johan gehelp om hierdie woorde in die Bybel te onthou en nou die regte besluit te maak. Johan het met sy fiets verby gery en nie die kolf gevat nie. Dink julle Jesus was bly oor Johan besluit? Dink julle die Gees kan julle ook help onthou wat ons in die Bybel leer? (Laat die kinders antwoord.) Ja, want die Gees is by ons. Hy is ons Helper. Kyk na jou twee hande en sê agter my aan: Die Gees is by my. (Met elke woord wat jy sê, vat aan een van die vingers aan jou een hand.) Die Gees is my Helper. (Doen dieselfde met jou ander hand.) Leef Waar jy ook al is (by die huis, in jou bed, by die skool), is die Gees by jou. Jesus het gesê jy sal nie alleen wees nie, want die Gees sal by jou wees. Die Gees sal jou Helper wees. Die Gees sal jou help onthou wat Jesus gedoen het en vir ons in die Bybel leer. Die Gees sal jou ook help onthou wat die waarheid is. Hy sal jou help om reg op te tree en te doen wat Jesus se hart bly sal maak. Het julle al gehoor dat iemand in n hofsaak n persoon kry om hom te help (verdedig)? Ons noem hierdie helper n advokaat. Die advokaat probeer sy bes om die persoon wat hy moet verdedig, te help. Die Heilige Gees is amper soos n advokaat. Hy is hier in die wêreld en Hy sorg dat God se saak en Jesus se saak reg verloop. As iemand, soos Johan, verkeerde dinge wil doen, dan kom sê die Heilige Gees: Nee, doen die regte ding, sê die regte goed, wees vol liefde.

5 Kleingroepvaslegging: Junior groep Welkom Gee vir almal n beurt om te sê wanneer hulle verjaar en wat hulle gunsteling-speelding of -speletjie is. Wegspring Kies twee kinders om n opdrag te mimiek terwyl die ander raai wat hy of sy doen. Fluister die opdragte in die twee kinders se ore. Die eerste kind moet mimiek hoe hy of sy fietsry. Die tweede kind moet mimiek hoe hy of sy krieket speel. Werksaam Jesus het gesê ons sal nie alleen wees nie, maar dat die Gees by ons sal wees en ons sal help. 1. Gebruik jou hande en sê die volgende saam met jou maats: Die Gees is by my. Die Gees is my Helper. 2. Skryf die regte woord bokant elke vinger om jou te help om dit te onthou. 3. Sê dit nog n paar keer hardop saam met jou maats. Wegstuur/Huisgeloof Gesels by die huis saam hieroor: 1. Die stemmetjie binne-in jou is nie altyd die Heilige Gees nie. Partykeer is dit jou eie gedagtes. Hoe gaan jy weet wanneer dit die Heilige Gees is wat met jou praat? 2. Waar het die Gees jou vandag gehelp om reg op te tree of die regte besluit te maak? 3. Lees Johannes 14:23-26 saam en gesels oor wat dit beteken.

6 Kleingroepvaslegging: Senior groep Welkom Laat die kinders vertel waar hulle in die week iets van die Here gehoor of gesien het by die huis, skool of in die natuur. (Vertel iets uit jou eie ervaring as die kinders nie saamgesels nie.) Wegspring Laat die kinders in n kring sit. Fluister die volgende in een van die kinders se oor: Die Gees is my Helper. Laat hy of sy dit in die maat langsaan se oor fluister. Elke kind moet dit vir die volgende maat fluister totdat almal die boodskap gehoor het. Laat die laaste kind hardop sê wat hy of sy gehoor het. (Die speletjie is soos telefoontjie.) Wonder Sit met toe oë en maak prentjies in jou kop terwyl jou leier die volgende woorde lees. (Lees dit stadig met stiltes tussen-in.) Helper. Hande. Dra. Swaar. Sterk. Saam. Voorspraak. Praat. Hoor. Moed. Liefde. Herinner. Trooster. Hartseer. Omhels. Trane. Lag. Werksaam 1. Lees Johannes 14:15-18 en saam. Daar is 15 woorde uit hierdie gedeelte in die blok in jou werkboek weggesteek. Kan julle al 15 kry? Verbind die letters van elke woord met n gekleurde streep. Gebruik n ander kleur vir elke woord. (Laat die groep eers soek. Trek die woorde op die lysie hieronder dood soos hulle dit kry. Jy kan later die woorde wat hulle nie kry nie stadig lees en kyk of hulle dit kry. Die woorde is in rooi gemerk in die blok hieronder.) Opdragte Vader Voorspraak Gees Waarheid Ken Weeskinders Jesus Liefhet Woorde Leer Stuur Herinner Vra Ander 2. Kies drie van die woorde waarvan jy die meeste hou. Kleur die blokkies van daardie letters met jou gunsteling-kleur in. Wegstuur/Huisgeloof Gesels by die huis saam oor die volgende: 1. Die stemmetjie binne-in jou is nie altyd die Heilige Gees nie. Partykeer is dit jou eie gedagtes. Hoe gaan jy weet wanneer dit die Heilige Gees is wat met jou praat? 2. Waar het die Gees jou vandag gehelp om reg op te tree of die regte besluit te maak? 3. Lees Johannes 14:23-26 saam en gesels oor wat dit beteken.