B E R N A D I T E N K L O O S T E R T E W A R M O N D R E G I O N A A L A R C H I E F L E I D E N K L O O S T E R A R C H I E V E N 5 0 3

Transcriptie

1 B E R N A D I T E N K L O O S T E R T E W A R M O N D R E G I O N A A L A R C H I E F L E I D E N K L O O S T E R A R C H I E V E N C A R T U L A R I U M R E G I S T E R V A N D E B R I E V E N D U B B E L E F O L I O S S A M E N G E S T E L D D O O R J. V A N H O U T B E W E R K I N G D O O R A N T H O N I U S V A N D E R T U I J N T E R H O O N Voor eventuele vragen, opmerkingen en verbeteringen (anthonius@alice.nl).

2 Als u gegevens uit deze bewerking gebruikt voor genealogische of historische doeleinden, dient een verwijzing naar deze bewerking vermeld te worden. Bij gebruikmaking van gegevens uit deze bewerking ten behoeve van publicaties, in welke vorm dan ook, moet een adequate bronvermelding naar deze bewerking worden vermeld. Niet aanwezig zijn folio 45 en 191. De navolgende nummers en folio zijn in het Latijn gesteld en zijn niet door mij overgenomen wegens het niet beheersen van de Latijnse taal, te weten: Nr. 12 folio 4v. Nr. 13 folio 5. Nr. 15 folio 6. Nr. 39 folio 13v. Nr. 49 folio 20v. Nr. 56 folio 23v. Nr. 57 folio 23v. Nr. 242 folio 99v. Nr. 335 folio 146v. Nr. 346 folio 152. Nr. 350 folio 154v. Nr. 363 folio 161v. Nr. 379 folio 174. Nr. 383 folio 177. Nr. 404 folio 189v. Nr. 438 folio 211v. De navolgende zijn gedeeltelijk in het Latijn en gedeeltelijk in het Nederlands. Nr. 7 folio 3. Nr. 215 folio 88v. Nr. 429 folio 209v. Nr. 1 folio 1 d.d Dirc van Wassenaer borchgrave van Leijden ridder doe condt allen luden dat ic gegeven hebbe ende gheve mit desen open brieve Dirc vter Delle tot zijnen vrijen eijghen vrijen wille mede te doen die ander halff morgen lants die in die Delle ghelegen zijn, inden ambocht van Ruijsburch mitter wooninge die daer op staet, die hij ende zijnen voirvorders van mij ende mijnen voirvorders te leene te houden plagen. Ende heeft belegen op die zuijtzijde des Heijlighs Geests gilde van Ruijsburch ende op die noirtzide Henric van Alcmade ende Aersts erfnaem die porter was tot Leijden in zijnen leven, op dat oestende die wech die voir Claes Pieter Vinkens zoens goet, streckende mitten westende inden Oude Vliet. Ende zo wes gebrec dat Dirc voorsz. of zijne naecomelinge hier in creghen, dat gelove ic voir mij ende mijne naecomelinge him op te rechten. In toirconde desen brieve bezegelt mit minen zegele op Sinte Mauricius dach int jaer ons heeren dusent drie hondert ende vier ende tzeventich. Ende was bezegelt mit eenen groenen wthangende zegel aen uijtgesneden staert. Nr. 2 folio 1v. d.d Ick Willem van der Made doe condt allen luden dat ic vercoft hebbe Sijman Bort ende Gherijdt van Oijen Wermbouts zoon sestien morghen landts, luttel min of meer, die zij hebben sellen gemeen ende gemengerder voir. Welc landt gelegen es binnen den ambachte van Zoeterwoude, streckende mit den oostende in den Rijn ende leijt allanghes mit de zuijtzijde op Renneghenun waeteringhe ende an die noortzijde hen ick zelve belegen mit lande dat ic te leen houde van de Graeffelichede. Welc landt voirschr. ic hem belove te waren, vrie ende commerloos tot ewigen dagen. Ende hadden Sijman voirschr. ende Gherijdt of hoir naecomelinghe ijmmermeer eenich gebrec daer in, dat sij dat lant niet behouden en mochten tot horen vrijen eijgen, sonder ijemants weder seggen. So wat cost zij of hair naecomelinge daer bij leden. Dat gelove ic hem op te rechten bij hoirs zelfs simpels woirden. Sonder ijet meer toe te doen. Ende dat te betalen binnen veertien daegen nae horen vermanen. Te versiene an mijnen goeden waert gelegen es. In kennisse der waerheijt hebbe ic Willem van der Made voirseijt desen brief bezegelt mit mijnen zeghel. Ende Jan Willems zoon voorsz. love alle puijnten mede mit mijner vader te houden alse voorsz. is. Ende hebbe om der meerre zekerhede gebeden Jan Hugen zoon mijnen broeder, desen brief voor mij te bezegelen, want ic zelve gheenen zegel en hebbe. Ende ic Jan Hugen zoon hebbe om beden Willem Jans mijns broeders voorschr., desen brief mede

3 bezeghelt mit mijnen zegel. Int jaer ons heeren dusent drie hondert vijf ende tzeventich op den elfsten dach in de Meert. Nr. 3 folio 1v. d.d Wij schepenen in die Haege maecken condt alle luden dat voor ons quamen Dirc Aernts zoon van den Sloet ende verliede schuldich te wesen Bertelmees Wouters zoon of den houder des briefs, drie pont hollants jaers eeuwelic staende gelt, daermen wijn ende broot om coopt, te betalen alle jaer die een helfte Voorschoter merct ende die ander helfte Valckenburger merct. Dit heeft hij verzeeckert op half die wooninge mitten lande die zijns vaeders was, alzo cleijn ende alzoo groot als hijse liet, in zijnen leste lijve. Ende belegen heeft op die oest zijde Jacob Heijnen zoon ende die westzijde Tonis Jan Didden zoons weduwij met Geertruijdt hoerre dochter, behouden den heer zijn recht. In oirkonde desen brieve bezegelt mit onsen gemeenen zegele. Gegeven int jaer ons heeren duijsent drie hondert vier ende tzeventich des sonnedaechs naer Meijen daege. Nr. 4 folio 2 d.d Ic Willem van der Maede doe condt allen luden dat ic vercoft hebbe Sijman Bort ende Gherijd van Oijen Wermbouts zoon sestien morgen lants, luttel min of meer, die zij hebben sellen ghemien mit gemengerder voir. Welc lant gelegen es binnen den ambochte van Soeterwoude, streckende mit den oestende inden Rijn. Ende leijt langes mit de zuijtzijde op Rennegommer wateringhe ende an die noortzijde heb ict zelve belegen mid lande dat ic te leen houde vande Graeffelichede. Welc lant voorseijt ic hem belove te waren vrije ende commerloos tot eeuwigen daegen. Ende hadden Sijman voorseijt ende Gherijt of hoer naecomelinge immermeer eenich gebrec daer in, dat dit lant niet behouden en mochten, tot hoeren vrijen eijgen sonder ijemants wederseggen. Soe wat cost zij of haer nacomelinge, daer bij leden, die gelove ic hem op te richten, bij hoers zelfs sempele woirden, zonder ijet meer te doen. Ende dat te betaelen binnen veertien daegen nae hoeren vermanen. Te versiene an mijnen goede, wairt gelegen is. In kennisse der waerheijt heb ic Willem van der Made voorseijt desen brief bezegelt mit mijnen zegel. Ende ic Jan Willems zoon voorscreven (lovede) alle pointen mede mit mijnen vader te houden, als voorsz. is. Ende hebbe om der meerre zekerhede gebeden Jan Huijgen zoon mijnen broeder, desen brieff voer mij te bezegelen, want ic zelve gheenen zegel en hebbe. Ende Mr. Jan Huijgen zoon heb om beden Willem Jansz. mijns broeders voorseijt desen brief mede bezegelt mit mijnen zeghel. Int jaer ons heeren duijsent drie hondert vive ende tzeventich op den elfster dach in Meijes maent. Aldus scout ondergescreven. Nr. 5 folio 2v. d.d Wij Ewout Jansz., Lambrecht Willems zoon ende Adriaen Gillis zoon schepenen int landt van Charloijs kennen dat voor ons gecomen es Fije, Verboudt Hugesoens wedue ende lijde dat zij mit hoeren gecoren voochts hant, in rechter aelmissen gegeven heeft, voir hoir ende voir hoiren erven, die Bernadijten tot Warmont, die gifte ende die vrije eijgendom van vier morgen vrij landts min vijftich roeden, gelegen int landt van Charloijs voorscreven, gemeen met Verbout Huijgesoons kinderen ende mit Jacob Croijsen. Welc lant belegen heeft mit eijgen ende mit erve an die oostzijde IJsbrant Gerijtsz. vten Hage ende an dat suijteijnde meester Heijnric van Haerlem ende Wouter van Bekesteijn mit IJsbrant vten Hage ende an die westzijde Aernt van Nievelt mit Mr. Anthonis weduwe mit haer kinderen ende aen dat noorteijnde eenen wech. Voirt soe geloeft Fije voorscreven voir hoir ende voir hoiren erven, waert bij alzo, dat die Bernarditen voorsz. van dit voorscreven landt eenich creij of hinder cregen, dat zij dat den Bernarditen voorscreven vrijen ende waren zal, nu ende ten eeuwigen dagen, nae den recht vanden lande. Alle dunck zonder arch of list. In kennisse der waerheijt zo hebben wij schepenen voorscreven desen brief wthangende bezegelt mit onsen zegelen. Int jaer ons heeren duijsent drije hondert negen ende tzeventich, den derden dach in octobri. Ende was bezegelt mit drije groen zegelkens aen double doersteecken uijthangende franchijnen staerten. Nr. 6 folio 3 d.d Wij Vranc Michiels zoon ende Sijman Sijmans zoon schepenen in Leijden oirconden dat voor ons quam Daniel de Bruijn Daniels zoon ende geliede dat hij vercoft heeft Vranc IJsac, twee morgen lants die geleghen zijn inden ambocht van Coudekerc ende inden Hogen Waert ende gelegen zijn inden oestrant al langhes in Wiggers weer. Ende belegen heeft aen die oestzijde Willem van Foreest ende die grote Buijc ende den Buttercamp, ende an die westzijde Daniel zelve voorscreven ende Geertruijdt Jans Bruijnen wedue mit hoiren kinderen, al mid horen lande in Wiggers weer voorscreven, streckende wt den Rijn aen den wech inden Lagen Waert. Ende Daniel voorscreven lovede Vrancken voorscr. dit voorgenomde lant te waren tot eewigen dagen alsmen een vrie volbede eijghen erve schuldich is te waren ende allen commer of te doen dier nu ter tijt op staen mach. Ende wair dat Vranck voorscreven hier of commer of schade hadde, dair of looft hem Daniel voorseijt schadeloos te houden buten Vrancken cost. Ende Daniel voorscr. belijt hem hier af voldaen ende betaelt, den lesten penninc mitten eersten. In oirkonde desen brieve bezegelt mid onsen zegelen. Int jaer ons heeren

4 duijsent drie hondert ende tachtich op den vive ende twintichsten dach in Aprille. Ende was bezegelt mit twee groen uijthangende zegelkens aen uijtgesnden staerten. Nr. 7 folio 3 d.d Deze akte is maar gedeeltelijk ingevuld. Dat voor ons quam Vranck Daniels zoon ende verliede schuldich te wesen (niets ingevuld) van desen brieve twintich schellingen hollants tsiaers ewelic staende ghelt (niets ingevuld) te betalen alle jaer op Sinte Odulphus dach. Ende dese voorscreven renten (niets ingevuld) vierdalf morgen landts lutter meer of min ende belegen hebben op die westzijde (niet ingevuld) Pieters van Dammen kinder, op die oostzijde Jan Ghelen zoons kinder (niets ingevuld) ende an twesteijnde die van Waeteringhe, behouden den heere zijn recht. (niets ingevuld) brief open bezegelt mit onsen gemeenen zeghel (niets ingevuld) ons heeren duijsent drie hondert twee ende tachtich. Nr. 8 folio 3v. d.d. woensdag na Onze Vrouwendag purisicatio Wij Dirc Pues Jans zoon Leijden ende Henric Willems zoon schepene in Leijden oirkonden dat voor ons quam Willem Gerijts zoon ende gheliede dat hij vercoft heeft Andries Walgairts zoon, eenen camp lants die gelegen es inden ambocht van Wassenaer. Ende belegen heeft op die zuijtzijde Gerard Knoep ende Knaep geheeten Robbrecht op die noortzijde, Jacob Oudelant opt westende ende Bellekens laene aent oostende. Ende Willem Gerritsz. voorscreven lovede Andries voorscreven desen voorgenoemden camp landts te waren jaer ende dach alse recht es ende men een vrie volboden erve schuldich es te waren. Ende Willem voorsz. beliede hem hier of voldaen ende betaelt den lesten penninc mitten eersten. In oirkonde desen brieve bezegelt mit onsen zegelen. Int jaer ons heeren duijsent drie hondert vijf ende tachtich tswoensdages naer Onser Vrouwen dach purificato. Ende was bezegelt met twee groen zegelkens aen uijtgesneden staerten. Nr. 9 folio 3v. d.d. zaterdag na St. Pouwelsdag conversio Wij Hughe van der Hant ende Jan Stantvast Ludolfs zoon schepenen in Leijden oirkonden dat voor ons quam Gernd van Oijen Wermboutsz. ende gheliede dat hij vercoft heeft Sijman Bort die helft van zestien morgen lants, luttel min of meer, die hij gemien hadde mit Sijman voorscreven, mit alle der huijsinge dier op staen. Welc landt gelegen es inden ambocht van Zoeterwoude, streckende van den oostende inden Rijn ende leijt allanghes mit der zuijtzijde op Rineghimmer waeteringhe ende aen die noortzijde Willem van der Made mit lande dat hij te lien houdt van der graeffelichede. Welc landt Sijman ende Gernd voorsz. coften jegens Willem van der Made. Ende Gernd van Oijen voorscreven beliede hem hier of voldaen ende betaelt, den lesten penninc mitten eersten. In oirconde desen brieve bezegelt mit onsen zegelen. Int jaer ons heeren duijsent drie hondert vijve ende tachtich tsaterdaghes naer Sinte Pouwels dach conversio. Ende was bezegelt mit twee groen zegelkens aen uijtgesneden uijthangende staerten. Nr. 10 folio 4 d.d. Vrijdag na Pinksteren Aelbrecht bij Gods genaeden palensgrave upten Rijn, hertoghe in Beieren, ruw(aer)t van Heneg(ouw)en van Hollant van Zeelant ende van Vrieslant, doen condt allen luden dat wij gegeven hebben ende gheven over mits desen openen brieve, omme Gods wille ende in gedenckenesse der zielen onser liever ghesellinnen vrouwe Margriete bi tiden hertoginne ende vrouwe der lande voorscreven, dier God genadich moet wesen, eersamigen ende geestelicken luden den abdt ende convente van Campe inden gestichte van Colen van der oerden van Cijsterse, onse hooffstede van Oude Teijlinge inder prochie van Warmonde in onsen lande van Hollandt mit tien mergen landts, dier zelver hoffstede alre naeste ende gadelicste gelegen mit eijgenscippe mit scippe ende profijte tot eenen clooster van horen oerden daer op te timmeren ende te stichten. Ende beloven hem voir ons ende onsen naecomelingen hem ende horen naercomelingen daer in te houden ende te stercken ten eewigen daeghen. In oirconde desen brieve bezegelt mit onsen zegele. Gegeven tot Leijden int jaer ons heeren duijsent driehondert zes ende tachtich tsvrijdaeghs na Pincxster. Nr. 11 folio 4v. d.d. Vrijdaechs nae onses Heerendach Circumcisio (14)15. Wij heer Jan van Crabbenburch deken ende heere Jan Floris zoon canonic de collegimus Sinter Niclaes tot IJselsteijn doen condt ende kennelic allen den ghenen die desen brief sellen zien of horen lesen, dat wij gesien hebben eenen brief bezegelt mitten zegele hertogen Aelbrechts bij tiden grave van hollandt, welcke brieve hielt van woirde te woirde als hier nae bescreven staet: Aelbrecht bij goids genaden palensgrave op den Rijn, hertoge van Beijeren, ruwert van Henegouwen, van Hollant, van Zeelandt ende van Vrieslandt, doen condt allen luden dat wij gegeven hebben ende gheven overmits desen openen brieve om gods wille ende in gedenckenesse der zielen, onser liever gesellinse vrouwe Margriete bij tijden hertoginne ende vrouwe der lande voorscreven dier god genadich moet wesen erersanigen ende ghestelicken luden den abdt ende convente van Campe inden gestichte van Colen, van der oirden van Cisterse, onse hoffstede van Oude Teijlinge inder prochie van Warmonde in onsen lande van Hollandt mit tien morgen landts dier zelver hofstede alre naeste ende gaedelicste gelegen, mit eijgenscippe, mitscippe ende profijte tot eenen cloister van

5 horen oirden daer op te timmeren ende te stichten. Ende beloven hem voir ons ende onsen naecomelingen hem ende horen naecomelingen, daer in te houden ende te stercken ten eeuwigen daegen. In oirconde desen brieve bezegelt mit onsen zegele. Gegeven tot Leijden int jaer ons heeren duijsent driehondert zes ende tachtich tvrijdaechs naer Pincxster. In kennisse der waerheijt so hebben wij heer Jan deecken ende heer Jan canonick voorscreven desen brief bezegelt als een vidimus int jaer ons heeren (niets ingevuld) ende vijftien, des vrijdaechs nae onses Heerendach Circumcisio. Nr. 12 folio 4v. d.d. Deze akte is in het Latijn gesteld wat ik niet kan lezen. Hoogst waarschijnlijk dezelfde akte als hiervoor in het Nederlands gesteld. Nr. 13 folio 5 d.d. Nog een akte in het Latijn. Nr. 14 folio 5v. d.d. zaterdag na St. Lijsbeth dag Ic Jan van Tetroden doe condt allen luden dat ic vercoft hebbe Nanne Andries Walcher zoens weduwi anderhalf morgen zeven ende twintich gairden ende drie verendel lants die ghelegen zien inden ambochte van Judic an Belletgens laen ende belegen heeft an die noortzijde Nanne voorsz. ende an die zuijtzijde Jan van der Laen, Willem van Tetroden mit horen landen. Ende Jan voorscreven love Nan Andries weduwi dit voorsz. lant te waren jaer ende dach alse recht is ende men vrij eijgen lant schuldich is te waren. Ende voirt so lie ic mij hier of voldaen ende betaelt den lesten penninc mitten eersten. In kennisse der waerheijt heb ic desen brief bezegelt mit mijnen zegel. Int jaer ons heeren duijsent drie hondert negen ende tnegentich tsaeterdaeghs nae Sinte Lijsbetten dach. Nr. 15 folio 6 d.d. Latijnse akte. Nr. 16 folio 7 d.d. woensdag na St. Jansdag Wij Willem Aernt zoon ende Pieter Buijtewech schepenen in Leijden oirconden dat voir ons quam Floris van den Tol ende geliede dat hij vercoft heeft Jacob Vrancken zoon drie morghen landts ende een half hond landts, dat gelegen is inden ambocht van Coudekerc inden Hogen Wairt in Wigghers weer. Ende Floris voorseijt gemeen hadde mit Jan van den Tol zijnen broeder mid Vranc IJsac ende mit Ermegaert Floris Jans zoons dochter. Ende belegen heeft aen die westzijde Gherrit jonge Dircx zoon mit zijnen kinderen, Claes Jongher Jans erfnamen van Poelgeest, heer Jan van Poelgheest, Floris van den Tol, Aernd Ramp, Alijt Dirc Kerstants zoons, Dirc van den Tol ende Pieter Vredericx zoon ende an die ander zijde Jacob Vincken zoon, Mouwerijn van der Does, Henric van der Does mitten aelmoeslande, Vranc IJsac ende die Butter camp. Alle voorsz. mit horen landen. Streckende uijten Rijn op anden wech inden Lagen Wairt. Ende Floris voorscreven lovede Jacob Vrancken zoon voorsz. dit voorscreven landt te waren jaer ende dach alse recht es alsmen een vrije volboden eijgen erve schuldich es te waren ende allen commeren of te doen dier mitertijt opstaen mach. Ende Floris voorscreven beliede hem, hier of voldaen ende betaelt, den lesten penninc mitten eersten. In oirkonde desen brieve bezegelt mit onsen zegelen. Int jaer ons heeren duijsent drie hondert twee ende tnegentich tswoensdaechs nae Jansdach. Ende was bezegelt mit twee groen zegelkens aen uijtgesneden staerten, daer op dit naervolgende transport op doersteecken es. Nr. 17 folio 7 d.d. dinsdags na Palmdag Wij Jan Jan Voeken zoons zoon ende Pieter Gobbergen zoen schepenen in Leijden oirkonden dat voir ons quam Jacob Vrancken zoon ende gaff over Vranc IJsac zijnen vaeder eenen scepenen brief dait desen schepen brief doersteecken es, mit recht ende mit vonnisse alse recht es. Ende scepenen wijsden Vranc IJsac mede te winnen ende te verliesen in allen schijn of Jacob zijn zoen voorsz. zelve wair. In oirkonde desen brieve bezegelt mit onser zegelen. Int jair ons heeren duijsent vierhondert tsdijnsdaeches na Palmen dach. Ende was bezegelt mit twee groen zegelkens aen double franchijnen uijthangende staerten. Nr. 18 folio 7v. d.d. donderdag na St. Pouwelsdag conversio Wij Philips Aernts zoon van Dam ende Willem Jans Vos zoon schepene in Leijden oirkonden dat voor ons quam Floris Claes zoon van Mersen ende geliede dat hij vercoft heeft Vranc IJsac zevendalf hont landts die gelegen sien inden ambochte van Coudecerc inden Hogen Wairt ende in Wiggers weer met gemengeder voere mit Vranc IJsac, mit Florijs van Tol, mit Jan van Tol ende mit Jans kinderen van Tol. Ende Floris Claes zoon ende Willem Floris zoon loven mit gesamender hant ende elc voor al Vranc IJsac dit voorschreven lant te waeren tot eewigen dagen alsmen vrij volboden eijgen lant schuldich is te waren ende allen commer of te doen die dair nu ter tijt op staen mach. Ende hier of lovede Floris Claes zoon voorsz. Willem Floris zoon schadeloos te houden. Voirt zoe lijede hem Floris voorsz. hier of wel voldaen ende betaelt den laetsten penninc mitten eersten. In oirconde desen brieve bezegelt mit onsen zegelen. Int jaer ons heeren duijsent vier hondert ende een tsdonredaechs nae Sint Pouwels dach Conversio. Ende was bezegelt mit twee groen zegelkens aen uijtgesneden staerten uijthangende.

6 Nr. 19 folio 7v. d.d. zondag na St. Margrietdag Ic Bartelmeus van Raphorst ridder maeke condt ende kenlike alle den ghenen die desen brief zullen zien of horen lesen dat Jacob Capoens zoon nu opgedragen heeft tot eenen vrijen eijgen vier hondt landts, die gelegen zijn inden ambocht van Wassenaer after Jan Dircx zoons in een camp van tien honden, van de oostende in te meten. Welcken landen voorscreven belegen heeft op die oestzijde dat godshuijs van Voorschoten, opt zuijtende heer Willem van Craelingen ridder, op die westzijde Jacob zelfs voorseijt ende opt noortende Dirc Jans zoon. Voert zo heeft mij Jacob voorseijt noch opgedregen tot eenen vrijen eijgen, noch vier hont lants die gelegen zijn inden ambocht voernoemt oestwaert vander capelle van Hilnaer. Welcke vier hont landts nu lest voorseijt belegen in allen zijden ende tot beijden eijnden heer Barthelmees voorscreven. Ende dat Jacob voernoempt nu dit lant voorseijt opdroech tot eenen vrijen eijgen van sinen eijgeliken goede. Soe heb ic Berthelmeeus van Raphorst ridder voorscreven Jacob Capoens zoons voernoempt al dit voorseijde landt verleijt, van nu te leen te houden ende nae zijnre doot te comen op sijnen ousten zoon die hij bij Heijlen sijnen wijve heeft ende voert op enen after suster kinde niet te versterven. Ende dat goet te verheerwaden dien ghenen die dair leenvolger of is mit eenen dordrechsen gulden, of mit paijment sijnre waerde. Ende omdat ic dit vaste ende gestade houden wil ende oic onbrekelic, zo heb is desen brief bezegelt mit mijnen zegel. Int jaer ons heeren dusent vierhondert ende drie des sonnedaeches nae Sinte Margrieten dach. Ende was bezegelt mit een groen zegelken aen uijthangende double franchijnen staert. Nr. 20 folio 8 d.d Wij Jan van Leijden ende Floris Paedzen zoon schepene in Leijden oirconden dat voir ons quamen Dirc Claes zoon ende Machtelt zijn wijf ende gelieden dat zij vercoft hebben mit gezamender hant ende elc voir al IJmme, Jan heuren zoons weduwe, zulc landt als hun an bestorven is van Machtelden moeder voorscreven. Ende leit ghemengeder vuer mit Jan Duker, Ermgaert zijn zuster ende Barthout ende zijn wijf. Ende Dirc Clais zoon voorseijt ende Machtelt zijn wijf loveden mit gesamender hant ende elc voir al IJmmen voorscreven, zulc lant als hun anbestorven es van Machtelden moeder voorsz., te waren jaer ende dach alse recht is, alsmen een vri volbeden erve schuldich is te waren. Ende hier of lieden hun Dirc ende Machtelt voorsz. voldaen ende betaelt den lesten penninc mitten eersten. In oirkond desen brieve bezegelt mit onsen zegelen. Int jaer ons heeren duijsent vierhondert ende zeven opten 6 e dach in Maert. Nr. 21 folio 8v. d.d Johan bijder genaden gods palensgrave upten Rijn, hertoge van Beijeren nu ter tijt clerc van Ludic, Greve te Loon ende heer van Voirne etc., dien condt allen luden dat wij vercoft hebben Dirc die Rige jongesz. alsulcx landt als hier nae gescreven staet ende gelegen ins binnen den ambocht van Warmonde. Inden eersten Vercleureijse velt in die wooninge tot Warmonde, vijf morgen twee hont lants, luttel meer of min, die nu ter tijt Jan van Griecken ghebruijct. Item noch in die wooninge tot Warmonde, geheeten dat Liesvelt, vijf morgen lants luttel meer of min ende nu ter tijt gebruijct Jacob Gijsbrechtszoon. Item noch een stuc lants geheten dat Burchvelt, inhoudende zeven ende een half morgen lants luttel meer of min ende nu ter tijt gebruijct Claes Aernts zoon. Item noch een stuc lants geheeten die Kaemerveen, inhoudende drie ende een halve morgen lants ende thien gairden luttel meer of min ende nu ter tijt gebruijct Willem Duker. Welc lant voorsz. wij him geloven voir ons ende onsen naecomelingen him ende sinen naecomelingen te waren tot eeuwigen daegen. Ende bekennen Dirc voorsz. den rechten eijgendom vanden lande voornt in alre manieren alst der vrouwen van Voirne zaliger gedachten toe plach te behoren. Ende belien ons hier of wel voldaen ende betaelt den lesten penninc mitten eersten. In kennisse der waerheijt zo hebben wij onsen zegel aen desen brief gehangen. Ende om die meere zekerhede ende vestichede wille hebben wij gebeden onsen lieven geminden heer ende broeder hertoge Willem van Beijeren, greve van Henegouwen, van Hollandt, van Zeelant ende heer van Vrieslant, dat hij desen voorsz. coop ende voirwaerde mit ons geloven ende bezegelen wil. Ende wij hertoge Willem voornt. om beden wille ons liefs geminde broeders heren Johans van Beijeren voorscreven, hebben wij gelooft ende gheloven voir ons ende onsen naecomelingen Dirc voorsz. ende sijnen naecomelinghen inden coop vanden lande voorsz. te houden ende te stercken tot eewigen daegen. In alre manieren als voorsz. staet. Ende bekennen Dirc voorscreven den rechten eijgendom vanden lande voirn. Ende hebben dezen in getugenisse desen brief mit onsen lieven geminden broeder voorscreven mede bezegelt mit onsen zegel. Gegeven int jaer ons heeren duijsen vierhondert ende zeven twintich daegen in Decembri. Nr. 22 folio 9. Hier naer volcht een extract uijt den inventaris vande goederen der Bernarditen tot Warmont, twelc hier gestelt es in plaetsse vanden brieve die welcke doer oudtheijt bijnae bedorven ende geheelic onleesbaer geworden es. Ende dat om te vervolgen tgetal vande coppelen daeraf opgeregen zijnde. Nr. 23 folio 9 d.d. St. Thomas avond 1408.

7 Item eenen brief van daete veerttienhondert ende zeven op sinct Thomas avont, waer af dinnehouden doer rematicheijt vande voorsz. plaetsse onleesbaer es geteeckent anno 21 e. Nr. 24 folio 9 d.d Wij Gherijt de Grenier Ermbouts zoon ende Huge Boudijns zoon schepene in leijden oirkonden dat voor ons quamen Pieter Andries zoon ende Jan Pieters zoon, zijn zoon ende gelieden dat zij vercoft hebben joufvrou Alijd Dircx weduwi van der Zijl een huijs ende erve mit half die muijren after an bijden zijden, also als die caemer daer op betimmert staet. Ende mit horen erve gelegen es. Ende een huijs ende erve daer after gelegen overdwers mit eenen halven waeterganc buten den muijr, naeder stede recht. Voert zo heeft heer Reijner een mur die van sijnen voorhuijse strect an die camer. Welcke muijr heer Reijner alleen toebehoort ende een halve waeterganc dair buten, behoudelic die camer horen halven waeterganc. Welcke huijsing ende erve belegen heeft an die een zijde heer Reijner voorscreven ende an die ander zijde Aernt Gijsbrechts zoon, mit horen husen ende erven, streckende wter Kercgraft after aen Jan Riken zoons an Trude Mathijs ende an Heijntgen van Alfens erven. Ende Pieter Andries zoon, Jan Pietersz voorsz. ende Aelbrecht Pieters zoon zijn kinder, loveden mit gezamender hant ende elc voor al joucvrou Alijdt voorsz. dese huijsingen ende erve alse voorsz. is, te waren jaer ende dach alse recht es ende alle commer of te doen die daer nu ter wilen opstaet zonder vijf scellingen goets gelts mitten houde ende zes comans grooten siaers mit half den houde van heer Reiner Aerts zoons huijs ende erve dair naest gelegen als voorsz. is. Voert zo lieden Pieter ende Jan elcx van hoiren andeel hier of voldaen ende betaelt, den lesten penninc mitten eersten. Voert zo loveden Pieter ende Jan, Aelbrecht hier of schadeloos te houden. In oirkonde desen brieve bezegelt mit onsen zegelen. Int jaer ons heeren duijsent vier hondert ende achte opten zevenden dach in April. Ende was bezegelt mit twee zegelkens aen uijtgesneden staerten. Nr. 25 folio 9v. Hier naer volght een extract uijt den inventaris vande goederen der Bernarditen tot Warmont, twelck hier gestelt es in plaetsse vanden brieve die welcke doer oudtheijt bijnae bedorven ende geheelic onleesbaer geworden es. Ende dat om te vervolgen tgetal vande coppelen daer af opgeregen zijnde. Nr. 26 folio 9v. d.d. dinsdag na Pietersdag ad Cathedram Jan van den Woude ridder heer van Warmonde doe condt ende kennelijc allen luden die desen brief sullen zijen of horen lesen, dat ic overdragen ben mit den prior ende convent van Sinte Bernaerts oirden tot IJselsteijn, als van ghetimmert hun te maecken ende goeden te geven tot beghin van eenen cloister van hoire oirden als hier nae bescreven staet. Ende den prior ende convent voorsz. ses monicken tot Warmonde te senden, op dit voorn. getimmert ende goet alsot hun ghesekert ende geconfirmeert is. Ende dat ghetal daer te houden gelickerwijs hen die goede gehouden werden. In voerwairden waer dat saecke dat die monicken voorsz. van Warmonde togen buten verdriven of gewelt, zo mach ic heere Jan voorscreven alle mijne goede weder nae mij trecken, die ic hun ghegeven hebbe. Item inden eersten zo zel ic heer Jan voorscreven binnen den jaer naer der confirmatien des oversten of capittels der bruederen voorscreven van desen zaecken voorsz. hunluden een dormiter maecken, hondert voeten lanc ende twee ende twintich voeten breet, derdehalf steen dick mit een hangende pande. Ende den voorscreven dormiter te glaesen ende onder te onderschieten mit stenen beschot na der oirden manier. Item eenen rementer veertich voeten lanc ende twee ende twintich voeten breet ende daer een kelver onder doergaens. Ende die dicte des renenters voorscreven gelick den dormiter. Item ic zel hun geven des derden jaers twee hondert nobel tot eenre kercken te hulpe. Item ic zal hun vercrigen conformaci ende consent van den bisschop van Vtrecht ende den curijet van Warmonde ende die stede te laeten wijen buten der bruederen cost voorscreven. Item ic zel hun geven een cappelrije van twintich vrancrixe croonen des jaer of daer ontrent als si verschijnt ende dier tijt toe mit twintich cronen voorscreven, hun anders waer te voersien. Item noch daer toe tzestich croonen voirsz. jaerlicx of an lande. Item vijf casuffelen ende vier rocke, dat is een hoochtijts, een sonnedaeches ende daegelicx drie. Item twee sulveren kelcken ende den eenen vergult. Item een heel groot misboec ende een cleijn. Item twee ghewidde outaer steen. Item corporalen ende outaer dwaelen alzo veel als zij behouven tot drie outaren. Item vier coperen potten. Item twee ketelen ende een panne. Item eenen groten matalen pot. Item twee becken ende twee waetervaeten ende twee lavooren. Item twaelf sittecussen. Item vier taeflaken ende tien dwalen. Item achte coeijen. Item den brueders die in den beghinsel noot zijn te comen alsmen timmert, zal ic geven na den beloop der renten van zes monicken. Item een gulden taefel up den outaer te setten. Item vier morgen veens tot baringhe. Item die brueders sellen mogen coopen vijftich margen landts in den lande van Warmonde ende niet daer boven. Item waer dat hun lant beset warde of ans turf inden lande van Warmonde, dat mogen die magen of die naesten lossen dairt of compt den penninc mit dertien of zij willen, of die brueders sellen dat ander lude vercoopen tot haeren schoonsten. Item die brueders voorscreven sellen op mijn molen maelen zonder loon, ter tijt toe waent si selve een molen setten, dair zij alleene hoir behoufte op maelen sellen ende niet anders. Item mede zo sellen de prior

8 ende brueders voorsz. die renten die zij voortijts mit den convente van Huesden te Warmonde gehadt hebben der stede van Warmonde laten blijven. Item ic heer Jan voersz. gheve hun noch twee bedden mit horen toebehoren, dat is een int beghin ende dat ander als zij alle zes gecomen zijn. Item dan mede tien nobel tot een brou tonwe te hulpe. Item ic zel hun mede vercrigen aen den heere van Hollant dat zij in Hollant copen mogen an lande of hebben zes hondert oude wilhelmus ghulden hollants des jaers. Item ic love den brueders mede laten toe te zeghelen hoir voorgenomde tzestich vrancrixe croonen des jaers van der vrouwen van Cruningen ende Jan van den Woude mijnen neve. Ende want ic Jan van der Woude heere van Warmonde voorscreven alle dese voorseijde puncten houden wil ende die prior ende convent voirgenomt die zeecker wesen sellen up voorwaerde als voorsz. is. So hebbe ic mijn zegel tot eenre vestinge hier op gedruct. Int jaer ons heeren duijsent vierhondert ende twaelf des Dijnsxdaghes na Sinte Pietersdach ad Cathedram. Nr. 27 folio 10v. Hier naer volght een extract uijt den inventaris van de goederen der Bernarditen tot Warmont twelc hier gestelt es, in plaetsse vanden brieve die welcke doer oudtheijt bijnae bedorven ende meestendeel onleesbaer geworden es. Ende dat om te vervolgen tgetal vande coppelen daer af opgeregen zijnde. Nr. 28 folio 10v. d.d Item eenen brief van daete 1400 ende 12 den 17 e augusti doer die voorsz. rematijcheijt qualicken leesbaer geworden, schijnende tinhouden te wesen annertisatie vande huijse ofte hofstede van oude Teijlingen onder Warmont om een clooster te timmeren, onderteijckent bijden notaris Petrus Milde ende geteijckent nr. 25. Nr. 29 folio 11. Hier naer volcht een extract uijt den inventaris van de goederen der Bernarditen tot Warmont twelc hier gestelt is in plaetse vanden brieve die welcke (hier gestelt es in plaetse vanden brieve die welcke) door oudtheijt bijnae bedorven ende meestendeel onleesbaer geworden es. Ende dat om te vervolgen tgetal vande coppen daer af opgeregen zijnde. Nr. 30 folio 11 d.d Nos frater Johannes Abbas cisterij etc. veertien hondert ende taelff den 14 e Septembris, daer bij die goeden tot Warmonde doer generaele commissie werden den convent van IJselsteijn geïncorporeert, gezegelt mit eenen geluwen zegel aen uijtgesneden gevlochten staerte, die welcke bij nae af was. Geteijckent nr. 26. Nr. 31 folio 11. Hier naer volght een extract uijt den inventaris vande goederen der Bernarditen tot Warmont twelck hier gestelt es in plaetsse vanden brieve die welcke doer oudheijt bijnae bedorven ende qualijcken leesbaer geworden es. Ende dat om te vervolgen tgetal van coppelen daer af vervolgens opgeregen zijnde. Nr. 32 folio 11 d.d. St. Maartensdag Religiosis in Christo sibi deuotis priori et conuentui monasterij montis dominus nostre in IJselsteijn etc. veertienhondert dertien op Sinte Mertens dach, daer bij die voorscreven goeden tot Warmonde werden bij tcapittel generael van Cisterrien den convent van IJselsteijn voorsceven geïncorporeert, gezegelt mit eenen groenen zegel aen uijtgesneden staerte gevlochten ende geteijckent nr. 27. Nr. 33 folio 11v. d.d. St. Pieters avond ad Cathedram Wij broeder Jan prior ende gemeene convent van Onsen Vrouwen berge tot IJselsteijn der orde van Cistercien, doen condt ende kennen allen luijden die desen brief zullen zien of horen lesen, als dat wij overdragen zijn mit heeren Jan van den Woude heer van Warmonde, van getimmert ons te maecken ende goede te geven tot begin van een clooster van onser oirden als hier nae bescreven staet. Ende wij prior ende convent voirsz. zes monicken tot Warmonde te seijnden up dat voorgenomde getimmert ende goet alset ons gesekert ende geconfirmeert is. Ende dat getal daer te houden gelijckerwijs ons die goeden gehouden waerden. In voirwaerden wair dat die monicken voorschreven van Warmonde togen buijten bedrijven of gewelt. Soe mach heeren Jan voorscreven allen zijn goede weder nae hem trecken dae hij hen gegeven heeft. Item inden eersten zo zal heeren Jan voorgenomt binnen dat jaer naer der confirmatien des oeversten of capittels der Bernarditen voorscreven van desen saecken voorscreven, henluijden een dormiter maecken hondert voeten lanc ende zes ende twintich voeten breet langes ende dweers onderschoten tot den solder toe, mit steenen muijren. Ende den voorgescreven dormiter sal hij solren cellen maecken ende die hemelen te minsten van dier cellen zesse ende die wooninge beneden ende die cellen boven te glaesen, in elcken houten kesijn. Ende anden voorgenomden dormiter een heijmelicheijt als noot is, voir een heel convent van monicken. Item eenen rementer veertich voeten lanc ende mit redelick ende betaemelicke breette langes, onderschoten mit eenen steenen muijre tot enen pande na der oirden. Ende onder den voorscreven reventer een kelneer deurgaens. Item heer Jan voorscreven sal dit vuergemelde getimmert zo matigen inder hoichten ende dair nae steen en hout inden getael ende inder dicten naer zijnen

9 eijssche, dat een den anderen te dragen, zo dat bescheijden geestelijcken menschen dair in hoir vleesselijcken natuijr der werelt mogen ontrecken. Ende die broeders sullen mit simpelheijt ende betamelijcke oijtmoedicheijt zonder groote costelicheijt of nieuwicheijt hun laeten genoegen. Item heer Jan voornt. zal geven den broederen voorscreven des derden jairs twee hondert nobel tot eenre kercke te hulpe. Item hij zal hen vercrijgen confirmacie ende consent vanden bisschop van Vtrecht ende den cureijt van Warmonde. Item die stede te laeten wijen mit der kercke kerchof, autaeren ende alle getimmert dat behoorlic es ende betamelic naer der oirden, buten der broederen cost voorscreven. Item heeren Jan voorsz. zal hen geven een cappelrie van twintich vranckerixe croonen tsiaers of dair ontrent als zij verschijnt ende tot dier tijt toe mit twintich cronen voorscreven hun anders wair te versien. Item hij geeft hem dat landt dat Jacob Willemsz. bruijct ende hiet ver Jans camp, groot vijf margen ende twee hont. Ende heeft belegen die Hoelmaer streckende op den Poel, aent zuijtoost heeft belegen die abt van Egmonde. Item Rijcken camp die is groot 2½ morgen. Ende heeft heer Jan van den Woude selve allomme belegen. Item vander gheermade zeven margen ende heeft belegen an die zuijtzijde Claes Renghers wooninghe, an die noortzijde Henric van der Does, ant westende die Zijl ende leijt gemengeder voir mitter cappelre van Teijlinge. Dit voirgenoemde lant is gelegen inden ambochte van Warmonde. Item voirt so sullen die broeders heffen vijftien nobel des jairs wt vijftien morghen landt geheeten die Hooge Weijde ende bruijct nu ter tijt Willem Doe tot die tijt toe. Waent hem heer Jan voorscreven also veel an renten of an lande bewijset heeft daer zij wel an verzeeckert zijn binnen Hollant of anderswair. Item den brueders die inden beginsel naer sijn te comen alsmen timmert, salmen geven nae den beloop der renten van zes monicken. Item heer Jan voorscreven gheeft hem vier margen veens tot baringhe. Item zij zullen moogen coopen vijftich margen lants inden lande van Warmonde ende niet daer boven. Item wair dat hem lant bezet werde of anstarf inden lande van Warmonde, dat mogen die magen oft die naeste lossen dairt of compt, den penninc mit dertien of zij willen off die broeders sellen dat anderluijden vercoopen tot horen schoonsten. Item die broeders voorscreven zellen op heeren Jans molen maelen zonder loon ter tijt toe, want zij zelve een ors molen zetten, dair zij alleene hoir behoufte up maelen sellen ende niet anders. Item mede so sellen die prior ende broeders van IJselsteijn die renten die zij voortijts mitten convent van Huesden te Warmonde gehadt hebben, der stede van Warmonde laeten blijven. Item voirt mede zo sal hem heer Jan voorgenomt geven alsulcke tilbair have, cleijnoot, ornementen ende huijsraet tot selcken tijden als hij hem verzegelt heeft in eenen anderen brief. In kennessen der waerheijt alle desen voorsz. punten ende voirwairden. So hebben wij prior ende gemeen convent voorgenompt onses conventen zegel hieraen gehangen. Gegeven int jaer ons heeren duijsent vierhondert ende derthien up Sint Pieters avont ad Cathedram. Aldus stont ondergescreven, collo. facta est cum bris originalibus per me ondergeteeijckent. Nr. 34 folio 12v. d.d. heiligen Ascensionsdag Wij Gherijt van Oestgheest Willems zoon ende Hugen Andries zoon schepenen in Leijden oirkonden dat voor ons quamen Jan van der Nesse Dircx zoon van den Werve ende Gherijt van der Waeteringe Dircx zoon ende gheliede dat zij vercoft hebben mit gesamender hant Heijnric van der Does twaelf morgen lants, luttel min of meer den hoop sonder maet, gelegen inden ambocht van Zoeterwoude. Ende belegen heeft an die noortzijde een weteringhe geheeten Burmaede, an die zuijtzijde Catrijn Everaerts vter Weiport mit hoir kinderen, an dat westende die Vliet ende an dat oestende die Broecwech. Ende Jan ende Gerijt voorscreven loveden mit gesamende hant elc voir al Henric van der Does dese twaelf morgen landts voirscreven te waren jaer ende dach alse recht is, alsmen een vrij volboden eigen erve schuldich is te waren tot eeuwigen daegen ende allen commer of te doen die daer nu ter tijt wilen upstaet. Voirt zo lieden hun Jan ende Gerijt voirnoempt elcx van haren aendeel hier of voldaen ende betaelt, den laesten penninc mitten eersten. In oirkond desen brieve bezegelt mit onsen zegelen. Int jaer ons heeren duijsent vierhondert ende dertien opten Heijligen Ascensions dach. Ende was bezegelt mit twee groen zegelkens aen uijtgesneden gewrongen uijthangende staerten. Nr. 35 folio 12v. d.d. Hier naer volght een extract uijt den inventaris vande goederen, brieven, munimenten ende bescheet der Bernarditen tot Warmont twelc hier gestelt is om der cortheijt wille plaetsse vanden brieve die welcke van cleijnder importantien es ende van egheen gronden van erven off renten mentie en maect. Ende dat om te vervolgen tgetal vande coppelen, daeraf vervolgens opgeregen zijnde. Nr. 36 folio 13 d.d. St. Pieter avond ad Cathedram In nomini domini amen etc. veertien hondert ende dertien den achtiensten Meij daer bij Fredericus bisschop tot Uijtrecht confimeert ende approbeert die fundantie ende gifte bij den grave van Hollandt anno dertien hondert zessentachtich svrijdaechs naer Pincxster (1400) tien gedaen van zijne hofstede van Oude Teijlinge tot Warmonde mit tien morgen landts daer naest gelegen, als ooc die gifte ende fundatie bij Jan vanden Woude gedaen vande goeden tot Warmont veertien hondert derthien op Sinte

10 Pieters avont ad Cathedram (1428). Gezegelt mit een rooden zegel aen uijtgesnden gevlochten staert die bijnae af was ende aengeplect geteeckent (1430). Nr. 37 folio 13 d.d Johan heer van Egmond ende IJselsteijn doen condt allen luden dat wij geoirloft hebben te vercoopen ende tot eenen vrijen eijgen gegeven hebben ende geven mit desen brieve Gerrit Dircxz. twaelf morgen lants die gelegen zijn inden ambocht van Zoeterwoude ende hij van ons te leene hielt. Ende machtigen den selven Gerrit voirscreven den vrijen eijghendom vande voorgenomde twaelf morgen landts van onsen wegen te gheven zo wijen hij wil. Ende daer inne te doen ende te laeten, gelijc of wijt zelve mit hande ende monde daden. In oirconde desen brieve bezegelt mit onsen zegel hier beneden opgedruct. Gegeven int jaer ons heeren duijsent vierhondert ende dertien opten twintichsten dach inder maent van Meije. Nr. 38 folio 13v. d.d Wij Jan van Egmonde ende Aelbrecht van Merestein doen condt allen luden dat wij daer over ende aen geweest hebben als mannen ons heeren van Egmonde dat Jan van der Nesse te leijn ontfinc twaelf morgen lants gelegen inden ambocht van Zueterwoude, die hem aengecomen waeren van Dirc van den Werve zijnen vaeder, dien God gedencken moet. Ende belegen heeft die noortzijde een weteringe geheeten Burmaede, die zuijtzijde Everaerts wijfs kinderen wter Weijpoort, dat westende die Vliet ende an dat oestende die buerwech. Welc voorsz. landt Jan van der Nesse voorgenomt weder quijtschont onsen heer van Egmonde als recht was, daer Gerrijt Dircx zoon tegenwoirdich scout ende ontfanc zulc goet, mit hande ende mit monde als voorsz. zijn, van onsen voorgenomden heer van Egmonde. Welc goet onse voerscreven heer van Egmonde, Gherijt Dircxz. weder quijtschont ende tot eenen eijgen gaf, zijnen vrijen wille mede te doen. In kennisse der waerheijt, zo hebben wij Jan van Egmonde ende Aelbrecht van Meresteijn voorscreven onse zegelen aen desen brief ghehanghen. Int jaer ons heeren duijsent vierhondert ende dertiene opten 27 e dach in Meije. Ende was bezegelt mit twee groen zegelkens uijthangende aen uijtgesneden gevlochten staerten. Nr. 39 folio 13v. d.d. Akte in het Latijn. Nr. 40 folio 14v. d.d. dinsdags na Catharinendag Wij Philips Hugen zoon schout ende Dirc Willems zoon, Wouter Bloc, Sijmon Aelbrechts zoon, Pieter Floris zoon, Aernt Heijnricxz. Gherijt Niclaes zoon ende Claes Aernts zoon buijrlude inden ambocht van Warmonde, doen condt ende kenlic allen luden die desen brief sullen zien of horen lesen dat wij dair an ende over waeren, dair onde lieve heere, heere Jan van den Woude heere van Warmond einder eeren gods ende sijnre lieber moeder den heijliger maget Marien, der tien duijsent martelaren, der heijligen confessoren, Sinte Benedictus ende Sinte Bernaerts ende allen anderen heijligen gods, om salicheijt zijnre zielen, sijnre liever gesellinnen vrouwe Agniese van Cruningen, daer godt die ziele of hebben moet, alle sijnre ouderen ende alle der ghenen daert heer Jan voorscreven schuldich was voor te doen, puerlicken in aelmisse gaf de prior ende den bruederen des cloosters van Sinte Marien haven der oirden van Cistercien, die nu tot Warmonde woonen of naemaels woonen sellen, geven vrijen eijgendom van landen die hier nae bescreven staen ende scheijde dair of als recht was. Item inden eersten inden ambocht van Warmonde dat lant dat Jacob Willems zoon bruijct ende hiet Ver Jans camp, streckende up den Poel, ant zwtoost heeft belegen die abdt van Egmonde. Item Riken camp die es groot derdalf margen ende heeft heere Jan van den Woude zelve allomme belegen. Item van der Gheermade zeven margen ende heeft belegen aen die zwtzijde Claes Renghers wooninge, aen die noortzijde Heijnric van der Does, an twestende de Zijl ende leijt gemengeder vuer mit der cappelrien van Teijlingen. Item voort zoo sullen die bruders voorscreven heffen jaerlicx vijftien gouden nobel van des conincx munte van Engelant of paijment daermense mede coopen mach, wt vijftien margen landts geheeten die Hooge weijde ende bruijct nu ter tijt Willem Doe, tot dier tijt toe, waent him heer Jan voorscreven, alzo veel aen renten of an lande bewiset hevet, daer zij wel an verzeeckert zijn, binnen Hollant of anders wair. Item wair dat die brueders voorgenomt dese vijftien nobel voorscreven wt der Hoger weijde voorscreven niet geheel beuren en mochten, zo zellen zij het verhaelen op landen die geheeten zijn die hem Cromme Heijnricx kamp. Item voort zo hevet heer Jan voorgemelt gelovet voir hun ende voir sijne nacomelingen, te betalen jairlicx den bruederen voorscreven een ende twintich nuwe wilhelmus schilde als mijn heere van Hollandt nu ter tijt geslaegen heeft of paijment hoirre waerde, voir der cappellerijen die hij hun tot Delft gegeven heeft, ter tijt toe waent sij verschijnt, den bruederen voorscreven. In kennissen der waerheijt so hebbe ic Philips schout voorscreven voor mij ende voir den buijrluijden voirgenomt, die op dese tijt zelve geen zegel en hadden, desen brief tot vermaninge mijns lieven heeren, heeren Jans voorscreven mit mijnen zegel bezegelt. Ende ic Jan van den Woude ridder, heere van Warmonde voorscreven, hebbe dit zelve mit mijnen zegel bezegelt. Ende hebbe aengesocht mijnen lieven zoon Jacob van den Woude dat hij dese voorsz. goede ende aelmissen in allen schijn als voorscreven es, mit mij tot een eewige vestinge bezegelen willen. Ende ic

11 Jacob van den Woude voorgenomt hebbe om begheren ende ansueckinge mijns geminden heere vaders, want ic dit vast ende gestade mede houden wil, desen brief mit mijnen zegel mit hun bezegelt. Ende love dese voorseijde brueders eewelicke hier in te starcken ende te houden. Gegeven int jaer ons heeren duijsent vierhondert ende dertien des dijncxdaghes nae Sinte Catherinen dach. Ende was bezegelt mit drie groen zegelen aen double franchijne staerten. Nr. 41 folio 15v. d.d. dinsdag na Catharina dag Wij Philips Hugen zoon schout ende Dirc Willams zoon, Wouter Block, Sijmon Aelbrechts zoon, Pieter Floris zoon, Aernt Heijnricx zoon, Gherijt Niclaes zoon ende Claes Aernts zoon buijrluijden inden ambocht van Warmonde, doen kont ende kenlic allen luden die desen brief zellen zien of hooren lesen, dat wij daer aen ende over waren, dair Jan Duker in der eeren gods ende zijnre liever moeder ende heijliger maghet Marien ende alle heijligen godts om zalicheijt zijnre zielen, alle sijnre ouderen ende alle der ghenen daert Jan voorscreven schuldich was voir te doen, puerlicken in aelmissen ghaf den prior ende den bruederen des cloisters van Sinte Marien Haven der oirden van Cistercien, die nu tot Warmonde woonen of naemaels woonen sellen, eenen vrijen eijgendom van landen die hier nae bescreven staen ende scheijde dair of als recht was. Item inden eersten inden ambocht van Warmonde anderhalff hont gheests, besijden aen onser lande liggende. Item vierdalf morgen broeclants ende hiet Broecvelt ende heeft belegen an die westzijde Wouter Jans zoon ende Wijburch Jacobs dochter. In kennisse der waerheijt zo heb ic Philips schout voorscreven voor mij ende voir den buijrluijden voorgenomt, die up dese tijt zelve geen zegel en hadden, desen brief mit mijnen zeghel bezeghelt. Ende ic Jan Duker voorscreven hebbe mede gebeden mijnen lieven heeren heer Jan van den Woude heere van Warmonde, dat hij desen brief mede over mij bezegelen wil, tot meerre vestinge ende zeeckerheijt. Ende ic Jan van den Woude ridder heere van Warmonde voorgenoemt, hebbe om beden wille Jans voorscreven mijn zegel an deser brieve tot eenre versticheijt gehangen. Gegeven int jaer ons heeren duijsent vierhondert ende dertien des dijncxdaghes nae Sinte Catherinen dach. Nr. 42 folio 15v. d.d. maandag na Jansdag decollatio Ic heere Jan van den Woude ridder heer van Warmonde doe kont ende kenlic allen luden die desen brief zellen zien of horen lesen, dat ic totter eeren godes in rechter aelmissen gegeven hebbe ende geve gecondenteer hebbe ende consenteer voor mij ende voor mijne nacomelingen den prior ende den gemeenen convent die nu zijn off naemaels wesen sullen, woonachtich inder cloester van Sinte Marien Haven in mijnen dorpe van Warmonde der oirden van Cistercien die ic gefundeert hebbe ende geven tot een beghinsel der fundatiën geheeten Oude Teijlinge die gefundeert was bij hertoge Aelbrecht bi wilen grave van hollandt, der welcken godt genadich wesen moet, dese puncten die hier nae bescreven staen. Item inden eersten want die brieven vander eerster fundatiën der capelrijen die ic hun gegeven hebbe als die brieve dair aftugen spreecken van vier messen te doen op die goede tot een stede daer die collatoer dat begherende ende eijschende es. Des verbants verdrage ic hem claerlick ende eewelicke voor mij ende voor mijne naecomelinge waer zij mogen ende zellen die goede verdienen binnen hoiren cloister mit missen, getiden ende ander weldaden hoire oirden int gemeen voor mij ende voir den ghenen dair elx voor begheer. Item die prior ende dat convent voorscreven sellen mogen besitten vijftich mergen lants off hier naemaels crijgen mogen inden ambochte voorscreven. Item wair dat hem boven den bescreven ghetal lant beset werde of an besterf inden lande van Warmonde voorscreven, dat mogen die magen of die naeste lossenen daert of compt, den penninc mit dertien of zij willen of die brueders zellen dat ander lude vercoopen tot horen schoonsten. Item dat convent veerscreven zal op mijne molen malen tot Warmonde zonder loon daer af te geven. Ende willen zij hier naemaels zelver een ors molen setten, dair zij alleene hoer behoeftwe op maelden, dat zellen zij mogen doen. In oirconde de waerheijt zo heb ic Jan vanden Woude ridder heer van Warmonde voorscreven dese voorscreven puncten bezegelt mit mijnen zegel hier an gehangen. Ende hebbe aengesocht mijnen lieven zone Jacob van den Woude, dat hij dese voorgen. puncten in allen schijn als voirsz. is, mit mij tot een eewige vestinge bezegelen wil. Ende Jacob van den Woude voorsz. hebbe om begeren ende ansueckinge mijns geminden heeren vaeders want ic dit vast ende gestade mede houden wil desen brief mit mijnen zegel mit hem bezegelt. Ende love dese voorsz. brueders hier in te starcken ende bij te staen. Gegeven int jaer ons heeren duijsent vierhondert ende veertien des maendaghes nae Sinte Jansdach decollatio. Nr. 42 folio 16v. d.d Hertoge Johan van Beijeren bij gods genaden elect van Luijdic, grave tot Loon ende heer van Woerden, etc. doen condt allen luden want wij legge hebben in Warmonde, ijerst een morgen geests lants ende negen gairden, die belegen hebben aen die oestzijde die monicken van Onser Vrouwen Haven tot Warmonde aen die westzijde die papelicke prove ende an die zuijtzijde Alijt Bertouts mit hoiren kinderen an die westzijde ende die voorscreven monicken an die oestzijde. Item noch een half hont lants dat belegen hebben die voorsz. monicken aen die oestzijde ende die abdisse van