Tema: God eis my vir Hom op.

Transcriptie

1 1 Filippense 1:27-2:11; T:27 K 11/8/2013 Sing: Ps. 111:1,2; Ps. 119:4,5; Ps. 66:6,7; Ps. 24:1,2,3,4,5; Ps. 111:4,5. Inleiding: Geliefde broeders en susters ons wat behoort aan die kerk van ons Here Jesus Christus Hoe neem ons besluite en hoe rig ons ons lewens daarvolgens in? Wanneer ek n groot besluit moet neem? Wanneer ek moet standpunt inneem oor iets? Wanneer ek n sekere rigting in my lewe begin inslaan n bepaalde koers begin loop? Wanneer ek my verbind om sekere dinge te doen en om sekere dinge na te laat? Hoe besluit ek? Hoe weet ek dat ek die regte besluit geneem het dat ek die regte ding doen? Hoe weet ek dat ek die pad wat ek ingeslaan het met vrymoedigheid kan loop? Alleen as ek onthou Tema: God eis my vir Hom op. Daarom moet my lewe en my optrede volgens God se wet en Woord ingerig word. Volgens Filippense 2:27 moet dit waardig of in ooreenstemming met die Evangelie(boodskap) van Christus wees soos Hy van ons verwag soos Hy ons leer vlg. sy Woord só moet ons lewensoptrede wees. Maar hoe lyk só n lewensoptrede dan? Ons het n vorige Sondag uit die brief aan die Filippense gehoor hoedat Paulus alles wat hy gedoen het, gemeet het in die lig van die voordeel wat dit vir God se kerk en koninkryk ingehou het. Dat God se eer in alles gesoek moet word. Maar hoe moet ons dan lewe hoe sal ons lewens wys dat ons God se eer soek? Alleen as ons as gelowiges leef en optree volgens die eis van God se Woord. As ons besef: God het ons en ons lewens vir Hom opgeëis toe Hy ons deur die bloed van sy Seun Jesus Christus gekoop het toe Hy ons Sy eiendom gemaak het. Só n lewe wat aan God behoort, word gekenmerk deur stryd, deur groei en deur die regte lewensgesindheid. Kom ons ondersoek nou uit die gelese gedeelte van God se Woord die kenmerke van n lewe wat ingerig is wat waardig is die Evangelie van Christus. Onthou: God eis my vir Hom op. Daarom 1. Moet ek deelneem aan die geloofstryd. 2. Moet ek in die geloof bly groei. 3. Moet ek met die regte gesindheid lewe. 1

2 2 1. Ek moet deelneem aan die geloofstryd. Ons kan vandag maklik die fout maak deur te dink dat alle mense wat hulleself christene noem, in dieselfde juk as ons trek. Ons kan verkeerdelik dink dat ons alle mense as broeders en susters in die geloof moet beskou, bloot omdat hulle sê dat hulle christene is. Maar daardie fout moet ons asseblief tog nie meer maak nie!! Onthou die Here Jesus Self het ons vlg. Matteus 7:15 gewaarsku: Pas op vir die valse profete wat in skaapsklere na julle toe kom en van binne roofsugtige wolwe is. Saam met die valse profete kan ons die goeie stryd tog nie stry nie! Broeders en susters Ons kan alleen saam met hulle stry wat stry vir die geloof van die evangelie van Jesus Christus. Saam met hulle wat vashou aan die Jesus Christus wat God en soos wat God Hom in sy Woord en deur sy Gees aan ons bekend maak. Die Jesus Christus, die Seun van God wat aarde toe gekom het. Hy het Mens geword sonder die toedoen van n man deur die werking van die Heilige Gees. Hy is gebore uit die maagd Maria as n ware, maar sondelose mens wat tegelykertyd ook waarlik God is. Dit is Hy, Jesus Christus, wat gesterf het aan n kruis, maar wat ook weer uit die dood opgestaan het, opgevaar het na die hemel, en sit aan die regterhand van God die Vader vanwaar Hy sal kom om as Regter oor die mensdom te oordeel. Op daardie dag sal Hy ook oor die valse profete en oor hulle dwaalleer oordeel. Die eerste vereiste van n getroue kind van die Here is: Ek moet vashou aan die Jesus Christus in Wie ons glo. Onwankelbaar vashou soos n klein kindjie glo kinderlik glo en vashou stry vir die geloof van die Evangelieboodskap van Jesus Christus ons Here. In Hom glo soos wat Hy Homself in sy Woord aan ons bekend gemaak het. Sonder slimpraatjies. Sonder allerlei breinspronge en sogenaamde slim pogings om te probeer verduidelik wat dit wat in die Bybel staan nou eintlik beteken. En nou kan n mens vra maar is dit nou werklik nodig dat ons almal dieselfde moet glo?? Kan een mens presies dieselfde glo as n ander een? Is daar twee mense wat presies dieselfde is en dink? Nee, broeder en suster tereg is dit só dat geen twee persone presies dieselfde is nie. Maar God? Hy is onveranderlik vas. Hy is nie in sy Godheid anders vir jou as vir enigiemand anders nie. Die feit dat Jesus Christus vir jou sondes betaal het en dat jy dit van harte moet glo, kan tog nie n ander waarheid wees vir Jan, as vir Piet en vir Sannie nie!! Daarom is dit so belangrik dat ons 2

3 3 daarvan oortuig moet wees dat hulle wat saam met ons die geloofstryd stry, ook waarlik in die Evangelie van Jesus Christus glo. Onder die gelowiges in Filippense was daar blykbaar nie ernstige dwaalleer nie. Tog was daar onderlinge geskille en moontlik partyskappe in die gemeente. Vir sommige van die lidmate het dit oor hulleself en oor hulle eie belange en eer gegaan. Hulle gesindheid en optrede was tot nadeel van die Here se kerk. Hulle moes egter onthou: Hulle eintlike burgerskap was in die hemele. Hier op aarde was hulle nog midde in die geloofstryd wat sonder ophou woed tot en met die dag van die wederkoms. Vers 27 kan letterlik vertaal word: Alleen, hou aan om julle burgerskap te beoefen op n wyse wat die Evangelie van Christus waardig is. Want julle is burgers! Hemelse burgers! Onthou: Paulus skryf aan n klomp oud-romeinse soldate. En hulle was trots daarop om Romeinse burgers te wees. Maar nie al die gelowiges was Romeinse burgers van geboorte af nie sommige het hul burgerskap gekoop. Ja nie almal het al die aardse voorregte van Romeinse burgerskap ontvang as diegene wat van geboorte af Romeinse burgers was nie. Maar al het hulle geen aardse voordeel as Romeinse burgers ontvang nie as gelowiges het hulle hemelse burgerskap ontvang met al die voorregte wat daarmee saamgaan onbeperkte voorregte en hulle moes daardie voorregte koester. Hulle moes dankbaar trots daarop wees. En daarom moes hulle ook hulle lewens inrig soos burgers van die hemelse Koninkryk. Maar hoe moes hulle dan lewe? Paulus gebruik baie militêre terme wat die lidmate van daardie gemeente in Filippi goed verstaan het. As goeie en lojale soldate van Jesus Christus het hulle die burgerlike plig gehad om in ooreenstemming met die Evangelie op te tree. Hulle moes wees soos n goeie soldaat wat besig is om wag te staan wakker, getrou, eensgesind en met dieselfde doel voor oë as al sy makkers. In een gees vasstaan en, een van siel, saam stry ja een van siel en een van sin moes hulle saam vir die geloof veg. Hulle moes hulle ook geensins deur hulle geloofsvyande laat afskrik nie. Ja hierdie gelowiges het geweet van oorlog maak. Die beeld wat hier in vs. 27 gebruik word vir n eenheid wat vasstaan en stry, verwys na gladiatore of 3

4 4 swaardvegters wat sy aan sy teen hulle gesamentlike vyande veg. Teen die vyand veg. Vir die geloof van die Evangelie van Christus veg. Swaard teen swaard. Déél hê aan die bloed en die sweet en die pyn en die uitputting van die geloofsgeveg. Met die wete dat hulle ook sou deel hê aan die vreugde en die blydskap wat die oorwinning bring. Dat die pyn en die opoffering alles die moeite werd sal wees wanneer die oorwinning uiteindelik behaal word. Ja hierdie christene het geweet: Die oorwinning in Jesus Christus is vas en seker. Daarom kon hulle die geloofstryd voer end-uit bly voer. Paulus het die gelowiges in Filippi aangemoedig om in hierdie stryd volkome eensgesind te wees. Hoe kan jy tog teen die vyand teen die satan en teen al sy bose magte veg en oorwin as julle as gelowiges nie saamstaan nie? Hoe kan gelowiges as gevolg van onderlinge verskille oor persoonlike sake en belange (LW: hier gaan dit spesifiek nie oor geloofsake nie!!) toelaat dat die duiwel en sy saak daardeur bevoordeel word? Saamstaan!! As die satan dit reg kry om ons onderling te verdeel, gaan ons baie moeilik kan staande bly! Verder mag julle nie toelaat dat die duiwel julle bang maak of afskrik nie. Die woord wat in vs. 28 gebruik word vir afskrik, dui op n trop perde wat skrik en onbeheersd op loop gaan. Só mag julle nie toelaat dat die duiwel julle laat skrik en op loop jaag nie. Maar ons mag ook nie maar die oë toemaak en maak asof sekere dinge hier rondom ons nie gebeur nie kop in die sand steek of maak asof sekere dinge sommer minder belangrik is nie! Dit mag wees dat Rome rondom ons brand en dat ons nie eers daarvan bewus is dat daar rondom ons n geloofsoorlog om lewe en dood woed nie! Ja broeders en susters rondom ons woed n geestelike oorlog waartydens satan probeer om ons plat te slaan en probeer om ons van binne af te vergiftig partykeer sonder dat ons dit eers agterkom! Hoor maar hoe praat die satan se meelopers: Die Bybel moet ons tog net geestelik verstaan. Jesus Christus was maar net n baie goeie mens by wie ons n klomp mooi dinge kan leer. En Stel jou maar bloot aan pornografie en aan allerlei goddelose denke en optrede dit kan tog nie skade doen nie. Maar wat probeer die satan en sy meelopers regkry? Hulle wil nie hê jy en ek moet agterkom dat ons op die 4

5 5 slagveld staan nie! Wil nie hê dat ons raaksien dat die ongeloof alles in sy vermoë doen om elke liewe gelowige in die geloof te laat wankel en te probeer oorwin nie! As gelowiges moet ons egter onthou: Om te kan stry om vir die Here te kán lewe, maar ook om vir die Here te kan ly dit is n voorreg. Om Hom te mag ken, is God se werk in my. Hy het my sy dienskneg gemaak. Daarom lewe ek met vreugde vir Hom. Daarom is ek bereid om vreesloos teen die duiwel op te staan en vir God te getuig. Ek weet: Hy beskik oor elke ding wat in my lewe gebeur. Hy gebruik my in sy diens. Hy weet ook van die daaglikse stryd wat ek teen die duiwel stry. Ja, Here kom tog my kleingeloof en vrese en gebrek aan ywer vir U en vir U saak tegemoet! Gee tog aan my die krag om onophoudelik vir U te bly stry. Ja neem tog al my vrese wég en maak my getrou! Kom ons ondersoek vervolgens n verdere eis van n lewenswandel volgens die Evangelie van Christus die eis om geloofsgroei. Ja as burger van God se koninkryk 2. Ek moet in die geloof groei. Elkeen wat stry in die geloof, sal ook groei in die geloof. Hulle sal geestelik vooruitgaan. Hierdie groei in die geloof word gekenmerk deur die woorde van Filipppense 2:2: Eensgesind te wees en dieselfde liefde te hê, een van siel of hart, een van sin of strewe. Saam moet ons die beste voordeel vir die saak van die Here Jesus Christus soek. Nie my eie belang nie. Nie my eie voordeel nie. Maar God se saak. Daarom is dit so belangrik dat gelowiges saam daarna streef om Christus bó alles te stel. Dat ons Hom en sy saak liefhet en sy wil soek. Daarom ook mekaar liefhet en mekaar se beste voordeel soek. Die liefde moet immers die basis wees van ons eensgesindheid onder mekaar. Ons moet van harte één wees in ons liefde vir die Here en in ons liefde vir mekaar. Daarmee saam moet gelowiges ook groei in nederigheid. Volgens Filippense 2:3 Nie iets doen uit selfsug of uit eie eer nie. Wat is n ou mensie tog? In myself is ek niks! Wat ek het, het ek tog ontvang. Waarop kan ek in myself tog hoogmoedig wees? 5

6 6 Oppas dan om jou eie eer in die kerk van die Here na te jaag. Nee as gelowiges moet ons onder mekaar ánders optree. Die een moet die ander hoër ag as homself. As jy en ek immers besef hoe nietig en klein ons eintlik voor God is hoe vol sonde en gebreke, kan ons nie anders as om nederig te wees nie. Elkeen van ons behoort eerder soos n Paulus uit te roep: Ek is die grootste van alle sondaars! Ek, die misgeboorte! Ja hierdie besef bring my daartoe om ook ander gelowiges se gawes raak te sien. Om God sonder enige jaloesie te dank vir dit wat Hy in en aan ander mede-gelowiges doen en gee. Ja ek groei volgens Filippense 2:4 in die geloof as ek nie maar net met myself en met my eie belange en dinge en sake besig is nie, maar as ek ook uitreik en omsien en help om my naaste se belange te bevorder nie net met woorde nie, maar ook met die daad. Dan gaan ek uit my pad om my naaste te help en by te staan in hulle besondere omstandighede. Om te help deur my naaste se beste voordeel te soek. Ek groei m.a.w. in die geloof waar ekself en my eie voordeel en belange nie meer my hele lewe en my menswees en my gedagtes in beslag neem nie. Nie ék in die middelpunt van my lewe nie maar God. Nie ek en my belange en my sake en my menslike hoogmoed die middelpunt van my lewe nie, maar God en my naaste. Dán is daar groei in my geloofslewe en groei in die res van die liggaam in die kerk van die Here. En só wil God dit hê. Stryd en groei. Maar n lewenswandel volgens die eis van die Evangelie het ook nog n verdere kenmerk, naamlik 3. Ek moet met die regte gesindheid lewe. In Filippense 2:5 hoor ons: Want hierdie gesindheid moet in julle wees. Van watter soort gesindheid word hier gepraat? Wie se gesindheid moet ons hierin navolg? En dan hou Paulus onder leiding van die Heilige Gees vir Jesus Christus Self vir ons as DIE VOORBEELD voor. Die gesindheid wat in Christus Jesus was, moet ook in julle wees. Hy wat Self God is, het Homself verneder deur n mens te word. Hy het nie aan sy bestaan as God vasgeklou nie. Nee Hy het juis prys gegee. Opgeoffer. Die hoogste prys denkbaar betaal. Gehoorsaam aan die eis van sy hemelse Vader tot die dood toe gehoorsaam. Wat n Voorbeeld van selfverloëning en opoffering!! 6

7 7 Hierdie volmaakte gesindheid en Voorbeeld van Jesus Christus: Dít is die Voorbeeld wat sy kerk op aarde moet navolg. En dit terwyl julle die goeie stryd stry eensgesind en nederig stry, terwyl julle in alles die Voorbeeld van Jesus Christus najaag. Dán sal jy weet hóé om jou lewe in te rig. Dán sal jy weet hoe om besluite te neem. Dán sal jy weet of hierdie besluit een is wat daartoe sal lei dat my lewenswandel steeds volgens die Evangelie van Jesus Christus sal wees. Ja: Sal dit wat ek doen daartoe aanleiding gee dat ek as n navolger van Jesus Christus in die geloof sal groei en toeneem? Is dit wat ek beoog en doen werklik tot voordeel van die Evangelie? Gaan ek só die saak van die Evangelie van ons Here Jesus Christus uitbou of benadeel? Slot: Geliefde broeder en suster Hoe lyk jou lewenswandel? Is dit toonbeeld van iemand wat besef dat jy n burger is van die hemel en daarom lewe volgens die Evangelie van Jesus Christus? Ja lewe jy soos God dit van jou as sy kind verwag? - Dan stry ek saam met mede-gelowiges saam in die geloofstryd teen die satan en sy bose magte. - Dan lewe ek in eensgesindheid en in nederigheid saam met my medegelowiges en ek soek nie maar net my eie belang nie. - Dan volg ek die Voorbeeld van Jesus Christus, ons Here, ná. Nederig en gehoorsaam aan my hemelse Vader. Ja dan stry ek die goeie stryd ek neem voluit deel aan die geloofstryd ek span al my kragte in terwyl ek met verlange uitsien na die wederkoms van ons Here Jesus Christus op die wolke. AMEN. 7