De Sjter 1 verlus verdeind van LHC; Ut driede en viefde hoale oet; Rachid Bourja scoort 4x! Marco Vaassen waer volop in de picture! Veer hubbe un weekend mit wisselende resultaten achter de rugk. Beide selectieteams leden un nederlaag, die volledig woar te wiete aan zjwaak sjpel. Os eesjte moosj ut aaflegke taege ut ongeraan bivakkerende LHC mit 0-2 en os tweede verloor oet van hoogvleiger FC Hoensbroek 2 mit 1-0. De dames deilden in de malaise via un neit verwachte 1-3 thoesnederlaag taege GSV. Gelukkig deige de legere seniorenteams ut aanzienlijk baeter. Op zoaterdig al wonnen de vets mit 5-2 van Sjummert. Op zondig deigen auch ut driede (5-2 winst taege Caesar 5) en ut veerde (5-8 winst taege SV Brunssum 3) unne duit in ut zekske. Man van ut weekend woar euverdudelijk Rachid Bourja, dae d r veur ut veerde maar leifs 4 insjtampte. Zeker de muijte waerd om Rachid (en ziene brouer Abby) ens aan uch veur te sjtelle. Doanaeve woar d r auch waer genog te belaeve in ut randjgebeuren. Zo woort dit weekend alvas de datum geprik van de broelof van Marco Vaassen. Sjoerd Sevn Vanmulken bliek dermate sjlech te zeen in ut computersjpel FIFA 18, dat de makers van dat sjpel zelfs un apaarte categorie veur m hubbe geïntroduceerd. Dames-vedette Sanne Boelhouwers kalt geregeld mit un Russisch accent. De gezonje kantine vilt in de sjmaak bie de midline side en bie ein van ozze veteranen. Kimberly van de dames kreeg aafgeloupe waek un oor aangeneijd. Jari Knoops scoorde un wereldgoal op de training ondanks (of dankzij) unne kapotte sjoon. Patrick Vanmulken deit un ninja-opleiding. En gewaardeerd sjeidsrechter Robert Kraus kreeg un passend verjoardaagskado van de dames. Genog om te besjpraeke kortom. Dus loate veer maar sjnel beginne. En dat doon veer dees waek mit ozze veteranen. Die houwe ut waer ens un waekske druk op de groepsapp. Op de eesjte plaatsj mit un tweetal facebook-berichten van Mia Leurs euver heure Will. Gerard Martens woar d r es de kippen bie om die te deile mit de res van de vets:
Coach Leon vroog doordewaeks of d r aafmeldingen woare veur de wedsjtried van ut weekend. Marc Lacroix koom mit un foto, wovan Willem Thewissen dach dat die eerder van Will Leurs woar: Piele koosj neit komme voetballe omdat hae op vakansie woar. Vanaaf zien vakansie-adres verbliede hae waal de res mit un foto die un goeie verwiezing bevatte noa auwt-veteraan Peter Kut Janssen:
Ron Marchal bleek auch doordewaeks op vakansie. Noa zien huuske in Sjpanje waal te versjtoan. Op zoaterdig zei hae doa euver: Ich woar de letste keer vergaete om de veurdeur aaf te sjleite in Sjpanje. Dus doa moosj ich dees waek veur terugk. Ut is toch eigenlijk van de gekke. Sinds Henkie van de Pitsch unne auto haet, mot ich auch in Sjpanje de deur op sjloat doon. Ron koom auch nog terugk op un verzuik van de sjriever van dit sjtuk. Dae koosj veurige waek neit komme voetballe, maar zien vrouw koom es veteranen-keuningin desondanks kieke. Aan Ron woar toen ut verzuik gedoan om un bietje op heur te lette.
Vanoet Sjpanje sjtuurde Ron een foto wo op, tot vreugde van de res van de vets, auch zien lieftallige eega fugureerde: Noa aanleiding van die foto ontsjting un discussie tusje Ron en Steef euver de invloed van un goeie arbeid-rust-verhouding op de prestaties op ut veldj:
Helaas kome d r auch dees waek waer un groot aantal aafmeldingen wodoor ut doorgoan van de wedsjtried twiefelachtig woort. Ron toonde zich echter unne woare klasbak: Oeteindelijk wis de onbetaalbare Willem Thewissen toch waer un voltallige selectie op de bein te brenge. Op zoaterdigmiddig woort ut langzaamaan tied om te verzamele, wie de sjriever van dit sjtuk inens un appje kreeg van de vaste Sjter 1-supporters van de midline side. Men woar ontzettend enthousiast euver de gezonje kantine:
De sjriever van dit sjtuk herinnerde zich doa op dat Roger d n Doam al drie joare op de joarvergadering d r veur pleit om de vaste sjoal mit snacks noa de wedsjtried van de veteranen te vervange door gezonje smoothies: Wie alle vets woare binnegedruppeld woort nog effe in de kantine biegekald. Men moosj toch wachten totdat de wedsjtried van de A-jeugd gedoan woar. Op dat moment koom Cindy Peters binneloupe, pakte zich de jas en wol noa boete loupe. Ron Marchal zjweijde heur oet. Ron: Hooooi! Ich venj dich leuk. Wie vinjse mich? Cindy: Hoiieeee! Ich ben weg. Ron: Ich bel dich dalik nog waal. Stef: Jonges, dalik rente Ron extra hel op ut veldj. Ron: Dat denk ich neit. Ut is sjus extra lestig renne mit unne sjtieve. Willem: Haet dae back van Sjummert tenminste waal get om zich aan vas te haute. Aangekomme in ut kleidlokaal bleek tot jeders verrassing Levi Nelissen aanwezig te zeen. Dae houw zich doordewaeks aafgemeld (zo wie ummer, aldus Gerard Martens), maar bleek toch gekomme te zeen veur un helfke voetballe. Marc: Enne? Wat deis doe hie? Levi: Soms loat ich auch ens luuj versjteld sjtoan.
Gerard: Héél soms dan toch. Roger: Deigse dat mit voetballe auch maar ens. Wie Will Leurs binnekoom, kome natuurlijk auch de facebookberichten van zien Mia aan de orde. Gerard: Will, kom verdomme toch ens op tied oet dien nes es ut maedje krank is! Ron: Joa, doe kumps nóg te laat op heur begrafenis. Dan wurse wakker gebeld omdat ze mit un pekske aan de deur sjtoan. Bliek ze al gecremeerd te zeen. Stef Conjour verbaasde zich euver ut aantal besjikbare sjpelers. De ganse waek woar d r angst veur te weinig sjpelers en toen woar d r auch nog de last minute aafmelding van Steef van de Woude euverhaer gekomme. Stef: Jonges ut vilt waal op. Steef meldt zich aaf en inens hubbe veer genog sjpelers. Aangezeen ich noe al genog hub gesjreve euver de vets, zal ich de wedsjtriedbesjrieving beperke tot de hoogtepunten. De rustsjtandj woar 2-1 in ut veurdeil van De Sjter. Sjummert bleek un sjterke ploug te hubbe en goof prima taegesjtandj. De score woort geoapend door Stef, dae unne bekeken pass euver de verdediging van Rob aafronjde mit unne lob. De score woort verdubbeld door Levi Nelissen, dae van kortbie binnetikte wie de keeper unne kupbal van Rob maar hauf keerde. In de rust moosjten de neudige omzettingen gedoan waere. Levi Nelissen en de oethelpende Mark Habets (woveur dank!) moosjten weg en Gerard Martens en Will Leurs woarten ut sjlachoffer van ut roulatiesysteem van coach Fredrix. Omdat ut ganse verdedigingscentrum woar gewissel en Denny Vorstermans, Piele en Mat Creemers neit besjikbaar woare, ginge Roger Daemen en Robbie van der Linden ut hart van de defensie vormen. En dat ging eigenlijk prima. Weliswoar scoorde Sjummert kort noa rus de geliekmaker. Maar doanoa goof men nauwelijks nog un kans weg en woare ut aan de angere kantj Ron Marchall (1x) en Rob Schulpen (2x) die de eindsjtandj op 5-2 bepaalden. Noa de wedsjtried, wo in auch de zoon van Leon Fredrix un helfke houw mitgedoan, woar dae jong aan ut zuike noa zien beusj, tusje alle veteranen-beusje. Ron en Jos Driessen veurzogen dat van commentaar. Ron: Dae sjrik zich dalik kapot wat d r in die beusje zit. Veer hubbe allemoal drie keer modaal. Jos: Dat drie keer modaal is un gemiddelde. Frank Rutten haet 70x modaal en de res allemoal 1x modaal. Ron: En Frank haet pas opsjlaag gekrege, dus veer kenne zelfs eine mit sjulden goan aannumme. Willem Thewissen wees nog effe op de verwarring die woar ontsjtange euver de aansjtoande feestdaag van de vets. Mat Cremers houw namelijk gezag dat de kinjer doa auch mochte komme, terwiel dat volges Jos Driessen toch neit in de planning zoot.
Willem: Jonges, is dat zoaterdig noe mit kinjer? Graad Smeets: Es doe nog get dekker trouws, hubse dalik nog meer kinjer es de pap van mich. Ut aug van Ron woar intusje gevalle op de vriendin van de zoon van Leon. Ron sjprook Willem aan, op un volume dat ut maedje dat mitkreeg. Ron: Willem, die sjoondochter van Leon mot toch unne leukere vrundj kenne kriege? Om zich vervolges noa heur toe te dreije en te zegke: Kindj, esse wuls kense dich vanaovend nog verbaetere. Auch de dames van de enkele van de jongere sjpelers van Sjummert woare Ron opgevalle. Ein houw zelfs nog un baby tje bie zich. Ron: Jonges, kiek doa! Die van Sjummert hubbe vrouwluuj die nog ongesjteld waere! Wie jederein woar biegekomme van ut lachen, koom tot sjlot nog ter sjprake dat Ron sinds kort get aan ut bieverdeine is in de isolatie. Willem: Bes doe noe waer aan ut werk Ron? Ron: Joa. Normaal luuj sjtoppe op hun 60 e. Ich begin noe pas mit wirke. Willem: Bevult dat goud? Ron: Joa, ich hub dees waek unne nuuje moage aannumme. Ze zochten eine mit rume ervaring in de isolatie. Dus hub ich Henkie van de Pitsch aangenomme. Jos: Henkie? Ron: Dae haet 3 joar in un isoleercel gezaete. En mit die 5-sjterre quote van Ron verloate veer de veteranen en sjakele veer euver noa de angere teams. Te beginne mit ozze dames. Die houwe unne thoeswedsjtried op ut programma sjtoan taege GSV. Doordewaeks woar d r prima getraind door de ladies. Al woort Kimberly noa de vriedigtraining waal beheurlijk un oor aangeneijd:
Op vriedig houwe de dames auch aandacht veur Robert Kraus, dae op zoaterdig ziene verjoardaag vierde, same mit zien aevenens joarige Miriam:
Dames trainer Gerard Martens deig dae zelfde oavend op facebook nog un veursjpelling euver ein van zien sjpeelsters: Ozze dames ammeseerden zich dus waer prima de ganse waek. En op zondig moch d r eindelijk waer ens gevoetbald waere. Jederein houw d r zin in, aldus reporter Jill Janssen. Helaas woort dae zin neit omgezat in geweldig veldsjpel. Want noa un hauf oer sjpele keek men al aan taege unne 0-3 achtersjtandj. Vlak veur de rus woort de achtersjtandj waal nog verkleind door Bo Knoops, die unne veurzet van Rachel aafronjde. In de pauze woort in ut kleidlokaal besjproake wie ut de 2 e helf angesj moosj. Jederein begoosj waer positief aan ut tweede deil. Ut sjpel woort auch sjtukke baeter, maar helaas woorte de kansen neit benut. En unne rejelijk onsjportief vlaggende grensrechter van GSV holp auch neit ech mit. Noadat de sjeidsrechter m veur de 8 e keer twiefelechtig zoog
vlaggen, kreeg de grens unne oetbrenner. De in de eesjte helf opgeloupe achtersjtandj koosj echter neit meer ingehoald waere. En zo ginge de dames van GSV mit de drie punte heivesj. Gelukkig veur ozze ladies verloar auch de koplouper, wodoor de competitie inens supersjpannend is gewoare. Kent unne keer gebeure. Volgende waek geweun waer lekker knallen dames! Van de dames sjakele veer euver noa os tweede elftal. Dat houw de ganse waek lekker getraind en keek dus mit vertroewe oet noa de wedsjtried tusje de nummers 1 en 2 van dees eesjte reserve-klasse. Mit name bie Jari Knoops woar ut zelfvertroewe groot. Want op de vriedigtraining houw hae ziene trainer Jean Janssen, dae fungeerde es keeper, mit unne geweldige sjtift gepasseerd. En dat auch nog ens mit kapotte sjoon, zo leet Jari weite. En wie coach Janssen zich door Wesly Wanten leet massere aan de pienlijke nek, dae hae houw euvergehaute aan ut noakieke van dae sjtift, poseerde Jari greutsj mit ziene kapotte sjoon: Sjoerd Sevn Vanmulken is auch boete de traininge om ummer mit voetballe bezig op ziene playstation tenminste. Al sjient hae doa waal aanzienlijk minder goud in te zeen dan geweun lekker voetballe op ut veldj. Volges Timo Haberland hubbe ze bie FIFA18 zelfs un compleet nuuje moeilijkheidsgraad gemaak veur Sjoerd:
Op dees maneier haet Sjoerd de aafgeloupe waek waer get zelfvertroewe kenne tanken op ziene playstation. De ganse selectie woar dus kloar veur de belangrieke wedsjtried om de koppositie. En auch in de begeleidingsstaf zoot ut waal sjnor, getuge ut bericht van leider Patrick Vanmulken op de groepsapp van 2: De veurteikenen woare dus prima. Jari Knoops deit versjlaag van de wedsjtried:
Vandaag sting de topper teage Hoensbroek op t programma, de nummer 2 teage de nummer 1. Ver ginge vol gooje mood noa Hoensbroek in de weitesjap dat ver teage ein gooje ploog mooste aantreaje. De opstilling waor es volg: Kis: Bastiaan Achter: Jari, Cyrill, Joep en Sevn Midden: Frank, Timo en Luc Veur: Steve, Marko en Hoessein Bank: Bart, Frusj, Kenny en Luca. Ver begooste redelijk aan de wedstrijd, ver zatte hoog druk en Hoensbroek hanteerde doadoor de lange bal. De lange bal werd door hun eigelijk voortdurend gebruuk wodoor er weinig voetbal op t middenveld waor. Hoensbroek woar ein erg fysieke ploog, en mit zo ein pleug hubbe ver ummer meujte. 3 man achterin van hun hejje eine super crossbal en omdat veer veurin te wiet ervan aafstinge kreege hun auch edere keer de gelegenheid om dees bel te geave. De Ster creëerde get meugelijkheden mer de grootste kans waor veur de thoesploog. Echter pakte Bastiaan de bal good in ein 1-op-1 situatie. Wier waor t neet ech om aan te zeen en mit de brilstand ginge ver dan auch rusten. In zo ein wedstrijden is t meistal dat wea de 1-0 maakt auch es winnaar van t veld zou stappe. Dus ver wiste wat os te doon sting in de 2 e helft. De 2 e helft ginge ver veurin get korter stoan wodoor hun minder lange ballen kooste geave en ze meer mooste voetballen. Echter ging t niveau van de wedstrijd nog ummer neet noa t gewenste niveau. Noa 55 minuten kreeg Hoensbroek eine curner, deese promoveerde ze zelfs tot doelpunt, 1-0 Hienoa koam Bartje in t veld om get meer creativiteit in t spelke te bringe. Mer teage 2 van die reuzen koam Bartje in de spits neet echt tot zien recht. Jari werd van t veld gehoalt en Luca werd gebracht. 1-op-1 achterin, Frank de punt in neave Luca en Bartje es createf brein op t middenveld. Hienoa begooste ver auch beater te voetballen en begooste ver kansen te creeren. In de 88 e minuut ein grandioze steakbal van Bart op Luca, dea sting boetespel en leet de bal dan auch goan veur Steve. Steve koam 2 meater achter ziene verdediger oet en sjoot de bal benne, 1-1. Zousse dinke. Mer dea flabbes van eine grensrechter stook zien vlag de loch in. En de zwakleidende sjeids ging dr nog op in auch. Ederein ging op de sjeids aaf en ein van ozze spelers leep auch lichtjes teage de sjeids op. Frank, dea dat euveriges neet waor, kreeg hie geal veur. Helaas veur heum waor dat zien 2 e en koos er inrukken. Mit ein nare noasmaak verleete ver noa t eindsignaal t veld. Verloare en de koppositie kwiet. Echter is er nog niks aan de hand en kenne ver noa goan jagen in plaats van gejaagd weure. Volgende weak de derby thoes teage Caesar. Dan zulle ver os motte herstellen van 2 mindere resultaten in competitieverband.
Klasse Jari. Mit de sfeer in uch team EN de aanwezige voetballende kwaliteiten kump dat zeker goud. Volle gaas kommend weekend taege die van Baek! Van ut tweede sjakele veer euver noa de mannen van 3. Die moosjten thoes aantraeje taege Caesar 5. En zo wie ummer, koosjten ze doabie waer un beroep doon op clubman Marco Vaassen. Dit ondanks ut feit dat hae sjmiddigs alwaer bie 1 moosj vlaggen en dat hae unne daag eerder al houw gevlag bie de jeugd. Al leek dat letste m maar weinig energie gekos te hubbe, getuge dees foto: De mannen van 3 begoosjten prima aan de wedsjtried taege Caesar. Coach Gooren leet weite dat jederein un dikke 8 scoorde en dat de taken prima woorte oetgeveurd. Ut woar Thijs Kemp dae de wedsjtried oapebrook mit 2 prachtige acties en dito assists, die in beide gevallen aafgerondj woorte door (auwt Caesar 5-sjpeler) Ralph Jansen. Nog veur de rust woort de score noa 3-0 getild door Mick Cremers, dae unne prima assist van Rene Gooren aafwirkte. Bob Schoutrop profiteerde vervolges optimaal van unne blunder in de verdediging van Caesar en zat de 4-0 op ut bord. De voetbalshow bleef veur de rust maar doorgoan. Oudgedeinde Bart Pantus wis zelfs veur ut eesj in 7 joar unne taegesjtenjer op sjnelheid d r oet te loupe! Door deze wervelende voetbalshow woar sjeidsrechter Claessen waarsjienlijk get van sjlaag want hae keurde un zuvere goal van Bob aaf veur boetesjpel, terwiel d r nog unne verdediger op de achterlien sjting. Vervolges moch auch nog unne aanval van Caesar doorgoan, ondanks ut feit dat doa toch waal un hele sjterke boetesjpel-loch aan zoot. De tweede helf woar minder van os driede. Vanwaege te gehoast sjpel ging d r te veul mis. Mick scoorde waal nog de 5-1 en daezelfde Mick en auch Rene Gooren houwe d r allebei nog eine motte make. Caesar moch auch nog unne keer scoren en zo eindigde de wedsjtried in 5-2. Ozze mannen hubbe volges coach Gooren gooie mood om un goeie serie neer te zette en wae wit wo dit geit eindigen
Grensrechter Marco Vaassen woar in jeder geval auch blie mit de prestaties want hae is d r dermate greutsj op dat hae zien De Sjter-trainingspak op vandaag zelfs dreug bie ut sjtappen: Van ut driede goan veer euver noa os eesjte elftal. Dat moosj thoes aantraeje taege rode lantaarndrager LHC. Un ploug die veurgoande joare ummer goud waor veur un plaatsj in de subtop, maar die dit joar pas 1 puntje houw gehoald. Bovendien unne taegesjtenjer dae os 1 e de letste joare ummer goud loog. Meestal woorte 4 of 6 punten per sezoen behoald taege LHC. En dat nog waal in joare dat die ploug boavenin mitdeig om de prieze. Dit sezoen bleek ut echter compleet angesjom te zeen. LHC bivakkeert ongerin en bleek unne zjwoare kluif te zeen wo ozze jonges zich beheurlijk in versjlikten. Ich hub zelf de eesjte helf gemis dus ken doa weinig zinnigs euver sjrieve. En van de luuj die m waal hubbe gezeen, hub ich begrepe dat ich niks gemis hub. LHC woar de ganse wedsjtried de boaveligkende ploug. Neit zozeer qua balbezit maar waal qua veldsjpel, euvertuging en strijdlust. Bie de rust keke os jonges dan auch al taege unne 0-2 achtersjtandj aan. Bie de sjtart van de tweede helf leek ut d r aanvankelijk op dat d r get meer dadendrang van os jonges koom. Maar auch dat ebde al heel sjnel weg. De einige echte doelkans die woort aafgedwonge woar unne veurzet van Thijs dae door Maarten op de lat woort gemik. Wiejer koosj de ganse ploug eigenlijk gein potten braeke. Ut ontbrook aan lef, wilskracht, vertroewe om ut prima gegroepeerd opererende LHC te braeke. Dees waek effe de kupkes biejein sjtaeke en kommend weekend mit lef en zelfvertroewe d r op knalle taege GSV is ut beste medicien taege zo n dipje. Kom op jonges! Gaas gaeve zondig!
Ut letste team dat os dan nog rest is os veerde elftal. Die mannen moosjten oet taege SV Brunssum 3 voetballe. Ralph Doek deit versjlaag: Ut veldj leep un kleine 30 grade aaf en de goale sjtinge waterpas, wodoor os goal links un sjtuk hoger woar es rechs (bie die angere goal angesjom natuurlijk) Van dat gegaeve maakte Brunssum goud gebroek want ze wisten gedurende de wedsjtried un paar kere te scoren aan de hoge kentj van de goal. Veur de res woar ut unne draak van unne wedsjtried mit unne draak van unne sjeids. Veer heije nog waal twee keer zo veul goale kenne make, maar hubbe ut oeteindelijk maar bie 8 gehaute. De opsjtelling woar es volgt: Kis: Abby (hamstring blessure) Achter: John, Danny, Mark en Andy (3 e ) Midden: Patrick, Raoul, Ralph, Michel Veur: Jenki en Rachid Bank: Brahim, Devon en Noudje Ver sjpeelden bes ontsjpanne, bietje ouwehore, get geulkes make, get belkes mit de chocolaat gaeve ow, nou eigenlijk ging dat sjtuk euver michzelf. Ich woar sjus teruk van Thunderdome in Utrecht en zoat nog lekker in unne flow tot de 60 e minuut en toen heij ich geine zin mjae en reegde mich op inens. Van de res hub ich neet veul mitgekrege eigenlijk maar ich heurde van versjillende sjpelers dat ut unne kutpot woar. Links en rechs unne houp sjoonheidsfoutjes, ozze keeper woar get aan de kleine kantj en ver heije nog noojts bergop gevoetbald en auch neet bergaaf dus. Toch woar eigenlijk nemes in paniek es de taegegoale vele. Allein ozze grens Frenske. Dae sjteit ummer alle kenj op te kieke behalve richting veldj. Dae zoog un zwoar blessure op veldj 1 (veer sjpeelden op veldj 3) wodoor hae unne keer of 10 vergoot te vlagge De sfeer woar good in de rus en noa de rus woort t aafgemaak. Brahim, Devon en Noudje (keeper 2 e helf) houwe lekker get minute gemaak. Drie punte in de tesj en metein gemaak dat v r wegkome doa. Oetstralingsloze regio De goale woorte gemaak door Raoul Dassen (2x), Jenki Jevric (2x) en Rachid Bourja dae d r maar leifs 4 maakte. Eindsjtandj 5-8! Leider Mark Janssen dae zich netjes heij aafgemeld omdat r auch in Utrecht zoot zoaterdignach, haet de ganse middig mit un tevreeje geveul in bed ligge biekomme.. Zonger m lup de diesel van 4 dus auch gewoon wie unne tierelier! Un klasse versjlaag waer van ozze Gladiator. Wat unne teamplayer! Thunderdome in Utrecht gewaes, niks gesjloape en geweun komme voetballe. Topper! En mit die 4 gemaakte goale haet auch Rachid Bourja zichzelf op de kaart gezat in Sjtein. Hoog tied om Ralph dus effe get nadere info te vroage euver Rachid en zien breurke Abby:
De aafsjleiter van dees waek is gewijd aan ut duo dat os 1 e elftal verleje joar leidde. Destieds woar Rudy Crutzen nog trainer van 2 en woare Jean Maas en Jean Janssen nog neit bie os club. En dus woar ut aan Ronny Czornyj en Frans Beaujean om alle in goeie banen te leiden. Inmiddels hubbe hun wegen zich gesjeije, maar op facebook woort dees waek dudelijk dat ze elkaar nog ummer un werm hart toedragen. Aanleiding woar un foto op de facebookpagina van Frans zien zus, Rozien. Op die foto figureren Rozien, Frans, en de echtgenote van Frans, Danielle:
Ronny Czornyj houw die foto auch veurbie zeen komme. En veer weite allemoal wat veur unne gevuilsmiensj Ronny is. Hae koosj dus neit angesj dan un reactie plaatsje onger die foto, wo in hae zien gevuiles veur de drie personen in kwestie blootgoof: Pes volgende waek! Rob Sjulpe