De Sjter 1 wint aafgeteikend van LHC; De Sjter 2 pak punt taege koplouper; Veurzitter in kleidlokaal bie 1; Transfer Wesly Wanten aansjtoande?

Transcriptie

1 De Sjter 1 wint aafgeteikend van LHC; De Sjter 2 pak punt taege koplouper; Veurzitter in kleidlokaal bie 1; Transfer Wesly Wanten aansjtoande? Ut woar un weekend mit resultaten op greutsj op te zeen veur ozze seniorenteams. Op vriedig moosjten de mannen van 3 weliswoar un nederlaag sjlikke taege Sjpaubaek 3 (6-1) maar op zondig revancheerden ze zich taege OVCS 3 (7-1). De veteranen bonje op zoaterdig de vets van RKBSV (zegk neit Limburgia!) aan de zegekar (4-2). Ut tweede behoalde un knap punt, in eige hoes taege koplouper Hoensbroek (2-2). Ut veerde leed un jammerlijke kleine nederlaag op bezuik bie RKUVC 4 (2-1). En os eesjte elftal hoalde in Eygelse flink oet taege de lokale fanfaar LHC (0-4). De dames houwe niks te voetballe en zette volgende waek hun jacht op de koppositie veurt. En doanaeve woar d r auch waer unne hele houp sjpas rondjom de velje, in de cafés en in de kleidlokale, wo de diverse reporters uch deilgenoot van goan make. Loate veer dus maar sjnel aan de sjlaag goan. En dat doon veer dees waek mit de mannen van 1. Die houwe unne oetwedsjtried taege middenmotor LHC op ut programma sjtoan. Die ploug houw un hauf joar geleje in Sjtein nog indruk gemaak en doamit de waeg omhoog ingezat. Van de angere kantj weite veer auch dat LHC oet de aafgeloupe joare altied waal un garantie op punte woar. Men koosj dus mit un positief gevuil aafreizen. Dat gebeurde echter pas noadat d r doordewaeks lekker getraind woar en auch get lol gemaak woar op de social media. Zo zat aanvaller Marko Jevric un foto van zien zeunke op instagram, gehuld in Ajax-tenue, mit doabie de vroag aan Ajax of ze al un contract houwe kloarligke veur ziene zoon:

2 Dat woar natuurlijk vroage om reacties. Auwt trainer Ronny Czornyj houw un leuke reactie in hoes, die Marko waal koosj waardere. Thijs Nieuwland koom echter mit unne nóg baetere counter-punch (mit un verwiezing noa de hondj van Marko, genaamp Tyson): In de competitie sjteit d r nog un noacompetitie-plaatsj op ut sjpel veur os eesjte. Aangezeen nummers 2 (Limburgia) en 5 (Caesar) op de rangliest de periodetitels op zak hubbe en ut op de 4 e plaatsj genoteerde GSV de 3 e periode-sjtandj aanveurt, dreigt veur ozze jonges (thans 3 e in de sjtandj) unne competitie zonger toetje. Men mot zelf un goeie reeks neerzette de letste wedsjtrieje en hoape op puntverleis van GSV om zo de letste periode nog binne te sjleipe. Die goeie reeks moosj dan aafgeloupe zondig waere ingezat taege LHC, dat eigenlijk nurges meer om sjpeelt. Dat de druk inmiddels flink hoog is opgeloupe en un sezoen zonger noacompetitie onacceptabel is, leek geïllustreerd te waere door de aanwezigheid van veurzitter Raymond Dukers in ut kleidlokaal veuraafgoand aan de wedsjtried. Wol hae wie unne echte tyrannieke Zuid-Europese clubveurzitter de druk op coach en sjpelers opveure? Woort d r unne premie in ut veuroetzicht gesjteld bie winst vandaag? De aanwezige toesjouwers oet Sjtein en Eygelse zulle dat soort gedachten ongetwiefeld gehad hubbe. En dan is ut toch prettig esse in ut kleidlokaal un lek hubs dae hoarfien vaslegk op de foto en oetlegk wat de veurzitter noe precies koom doon in ut kleidlokaal:

3 De mannen van 1 houwe zich inmiddels op ut gemaak aangekleid, de veurbesjpraeking aangeheurd en deige vervolges watse ut beste koosj doon aafgeloupe zondig:

4 Coach Maas sjtuurde zien troepen in de volgende samensjtelling ut veldj in: Kis: Geoffrey Achter: Bob, Stan, Guido en Sjoerd Midden: Timo, Mike en Thijs Veur: Marko, Maarten en Giel Bank: Hassan, Tarik, Frank en Donny Elftalleider Frans Beaujean deit versjlaag van ut gebeure in Eygelse. Op unne heerlijke zoneuvergoten daag stjting ozze (op papier) lestige oetwedsjtried taege ozze vrunj oet Eygelse op ut programma. Hoge temperature en de plaatsjelijke joarmert woare wellicht de oorzaak van ut geringe aantal toesjouwers. Sjteinder supporters houwe de euverhandj. Noa de veurbesjpraeking, wo in coach Maas de wedsjtried in Sjtein in herinnering houw gebrach plus ut feit dat veer nog ummer in de race zeen veur un prieske, ginge ozze mannen in ut hemelse blauwe oet-tenue de wei op. Un tenue dat euveriges tot noe toe allein maar euverwinninge haet opgeleverd. In de beginfase woar d r effe un oapeningsoffensief van LHC. Dat resulteerde in enkele versjieninge veur de goal van Geoffrey. Dae heerste echter in de 16. Effe woort ut nog hachelijk wie unne bal get kort woort terugkgesjpeeld door Stan (dae euveriges unne goeie pot sjpeelde), maar Geoffrey lette goud op en veurkoom gevoar. Stan excuseerde zich bie Geoffrey door te zegke dat hae nog mit ziene kop zoot op ut terras in Malaga, wo hae un waekske woar gewaes mit zien bloedstollend sjone Anique. (noot Rob: veer kieke al oet noa de foto s in ut versjlaag van volgende waek, Frans). Geoffrey vonj dit un prima reje en vergoof Stan. Doanoa woar De Sjter continu de boaveliggende partie. Steeds meer kansen krege veer. Unne sjieke sjtaekpass op Maarten dae woort gecaramboleerd door verdedigers en door Thijs woort aafgemaak beteikende de 0-1. Ondanks luid verweer van de Eygelse grensrechter dae dach aan boetesjpel, bleef de sjeids bie zien besjlissing. Vlak veur de rust woort Thijs vriegesjpeeld op rechs en in tweede instantie sjoot hae de 0-2 binne. Dat woar auch de rust sjtandj. Noa de rust veel d r eigenlijk weinig meer te geneite. De Sjter heerste op alle fronten. Thijs noom de 0-3 veur zien raekening en completeerde doamit ziene valsje hattrick. Effe leek ouwe rot Guido Rutten de 0-4 aan te teikene. Ziene prachtige snoekduuk deig de ouwe miensjachte op hun grondvesten trille helaas koom Guido un naaslengte tekort om de bal te rake. Coach Maas wisselde en brach Hassan in veur Marko, Tarik veur Thijs en Frank veur Stan. Dat houw geliek effect, want unne aafgesjlage bal koom veur de veut van Frank terech dae houw de oavend vanteveure ut wereldrecord bitterballe aete sjerper gesjteld, dach dat de bal unne bitterbal woar, en knalde m hoog in ut daak van de goal veur de 0-4.

5 De tweede helf woar ut aankieke neit meer waert van Eygelse kantj. Einige minpunt veur os woar dat veer os doelsaldo neit wiejer hubbe opgekrik. GSV sjpeelde geliek dus veer hubb nog alle kans om boave die te eindige en ofwel zelf de 3 e periode te winne ofwel de periode van de kampioen euver te numme. Noa de wedsjtried woar ut gaas gaeve noa Sjtein wo bie ut Pintelierke nog lekker lang noagekeuveld woort mit z n allen. Danke Frans. Un lekkere degelijke euverwinning, die hoapelijk ut sjtartsein is veur un reeks van euverwinninge die leidt noa de noacompetitie. Nog effe knalle! Euveriges mot auch nog vermeld waere dat de langdurig geblesseerde Roel Heffels dudelijk al bezig is mit ziene rentree kommend sezoen. Es hae waer gans fit terugk keert kent hae linea recta de basis in. Dat haet hae zich dees waek namelijk al sjlum geregeld bie coach Maas thoes: Van ut eesjte sjakele veer door noa de mannen van 3. Die houwe ut maar druk want ze houwe aafgeloupe waek zowel op vriedig es op zondig unne wedsjtried op ut programma sjtoan. Mit name op de zondig houw men de neudige personele probleme, maar gelukkig woare de kanjers van 4 bereid oet te helpe. Maar leifs 4 sjtuks troaje aan om ut driede oet te helpe. Mit Ralph Gladiator Doek natuurlijk veurop:

6 Sjpeler/topscorer/coach/veteranen-oethelper Rene Gooren deit verslaag van beide wedsjtrieje: Os voetbalweekend begoos op de vriedig mit eene oetwedstrijd in Sjpiebak. Die ploug haet unne flinke sprong gemaak op de ludder van meest gehate taegestenjers door bie eene 6-0 veursprong de taegestenjer te goan oetlache en dan helemoal verbaasd te zeen es ze unne stamp kriege. Wat een stelletje huulebalken woare dat bie ein. Taege Sjpiebak leet Ludi Claessens euveriges waal zeen dat hae mit sprongen veuroet geit. In deze wedstried haet hae maar leefs 2x get geraak. Grote en onverwachte positieve wending woar de verloren zoon dae woar terukgevonge. Kint g r m nog? Dae mit dae puntmuts en de triangel. Rene maakte de enige goal oet eene vriejen trap dae eindelijk weer ens de winkelhoak in ging. Mede door de slumme Mike dae mit ziene linker auch achter de bal ging stoan wodoor ut keepertje zien moer helemoal verkeerd zat. De bal dreejde sjoon de winkelhoak in en de kabouter sjloog waer op zien triangel. Eindstand 6-1 veur die van Sjpiebak. Op zondig tied veur revanche en dat begoosj good. Want op ut aafgesproake tiedstip wore toch al 3 spelers aanwezig. Teen minute later heije v r 11 man bie ein en wisten v r dat de wedstrijd door koos goan. Ralph Doek en Jesse Grummer woare ditmoal bereid om oet te helpe. Klasse! En Robert Kraus woar nog bereid om te vlagge noadat Marco titties Vaessen eene ongeoorloofde vrieje daag heij opgepak. Thijs Kemp woar de man van de tactiek vandaag taege een hele jeugdige ploog van OVCS. Ouwerwets en simpel werd oet de krokodillenlaere laarzen getoverd. Ut wirkde perfect en v r speelden heel mekkelijk door de linies van hun. Oetslaag woar 7-2 mit es

7 doelpuntenmakers Maikel (3x), Bob, Mike, Rene en een wereldgoal van Meester Martijn dae de kabouter oet Sjpiebak houw mitgesmokkeld en de bal mit hoge snelheid in de winkelhoak knalde. Ech een DIKKE goal! Klasse mannen van 3. Dat is nog ens revanche numme. En goud om te laeze dat de kabouter waer terugk is. Dat r nog maar vaak op dae triangel moag houwe! Euveriges houw Rene Gooren ut maar druk dit weekend. Vriedig en zondig voetballe bie 3, op zoaterdig bie de veteranen oethelpe en auch nog ens mit Tom de Keul dreije bie Tilly es ut DJ-duo Völler en Rijkaard. Wat unne klasbak! Van ut driede sjakele veer door noa de mannen van 2. Die houwe unne hele lestige thoeswedsjtried op ut programma sjtoan taege koplouper Hoensbroek 2. Al mot gezag waere dat in de oetwedsjtried sjlechs un kleine (en onverdeinde) nederlaag woort geleje. Kieke of dat dit keer nog unne sjlaag baeter zou kenne. In de aanloup noa de wedsjtried woort doordewaeks un nuujt hoofdsjtuk toegevoeg aan ut epistel euver ut aansjtoande vertrek van Luc Spaans noa GSV. Luc haet dit sezoen al dekker loater weite dat hae verzurger Wesly Wanten nog ut meeste geit missen. Op de website van GSV zoog Luc dees waek echter un bericht sjtoan dat m hoap goof:

8 En dus ging men bie de selectie van 2 al sjnel aan de sjlaag mit fotoshop en ut mot gezag dat rood sjteit Wesly helemoal neit verkeerd. Al zal hae waal deze zomer flink aan de sjlaag motte om in september in de rooie GSV-polo van de vertrekkende verzurger te passe:

9 Zo wie t geer gewend zeet, deit Jari Knoops versjlaag van de verrichtingen van 2: Vandaag sting de wedstrijd taege koplouper Hoensbroek 2 op ut programma. Hoensbroek en Susteren zeen de 2 pleug die baeter zeen dan de rest in de 1 e reserve klasse. In de kantien woort d r veur de wedsjtried al get gelache. Luca heij ein braatsj aan de moel en Steve vroog wat dat woar. Steve: Luca, wat heb jij aan je lip? Luca: Ja, is wat kapot. Jari: Hae steit neet veur niks basis De opstelling woar es volgt: Kis: Bastiaan Achter: Frusj, Joep, Jari en Kenny Midde: Cyrill, Frank en Randy Veur: Luca, Erik en Hoessein Bank: Bart, Luc, Geoffrey, Joep H. en Donny De Ster begoos baeter aan de wedstrijd en creerde get kenskes. Hoensbroek speelde veural langk op hunne Steven Seagal zonger staart, of counterde mit hun snelheid. Hoessein zurgde veur de 1-0 noa ein mooie combinatie mit Erik. De 1-1 woort door Hoensbroek gescoord via eene aafstandssjeut dae d r in vloog. Denoa noa weer ein mooie combinatie tussen Hoessein en Erik sjoot Hoessein de bal, via ut lichaam van Luca, binne veur de 2-1 veursprong. Ut bleef veural oppassen veur hunne nummer 11. Dat woar de biste, dat woar heel dudelijk. De Frusj wis doa echter waal road mit. Resultaat: sjouwer oet de komp. De 2 e hilf scoorde Hoensbroek vrie snel de 2-2. Bart koam veur Frank en Luc verving Cyrill. De Ster woar baeter in deze fase maar langzaamaan vloeiden de krachten weg. Hoensbroek woort sterker maar Bastiaan sting paraat. Hoensbroek kreeg zelfs nog unne penantie maar gelukkig woort dae gemis door de Hoensbroek-speler (dae euveriges un naefke woar van ozze spits Erik). De Ster kreeg auch nog genog kansen mer beie ploge wisten deze neet meer te benutte. Eindstand 2-2. Un verdeenstelijk punt taege de koploper en d r woort noa aafloop nog lang doorgetoafeld bie De Ster wodoor ut tweede dit sezoen ongeslagen blif in de 3 e helf. Klasse mannen van 2. Un lekker resultaat door hel wirke! Rene Gooren houw euveriges un prima verkloaring veur dat goeie resultaat. Jari woar ut doa neit gans mit ens:

10 Van ut tweede sjakele veer door noa ut veerde. Dat houw unne wedsjtried taege medemiddenmotor RKUVC op ut programma sjtoan. Men moosj ut doon zonger vaste reporter Ralph Doek (dae bie ut 3 e woar oethelpe). Gelukkig woar Mark Habets bereid om versjlaag te doon van de wedsjtried: Vr vertrokke schwoan op tied noa Ulestroate. Allein Ivo en Mark houwe de mail goud gelaeze en koame fijn om 9.15 oer de kantien benne. De res woar dr al om 9 oer. Want vr vertrekke toch ummer un oer vanteveure? woar hun reactie. Oftewel: ze kenne geweun neet tegooj laeze Wie vr eindelijk vertrokke houwe vr toch allemoal un angere route om doa te komme. Ozze Marokkaanse vrienden deege dr sjus get langer euver. Brahim zat zich sjwoan in de dugout en de res sting al op ut veld. Ik ben nog niet warm, zag r. Dan heb je geluk want het is warm genoeg buiten woar ut entjwoord wat r kreeg. De wedstrijd ging geliek op. Get kenskes euver en weer. Inens woar doa Rachid mit un actie wobie de taegestenjer m kwiet woar en doadoor dus te laat woar. Penalty in unne oetwedstrijd. Jenki eiste metein de bal op en sjoot onberispelijk raak: 0-1 veur! Zwoa bereikten vr auch de rus. Bjorn koam noa de rus ut veld in om es stormram veurin die men ut laeve zoer te maken. Dit lukte helaas neet gans wie gepland. De druk woort grwoater en ozze vlaggers bezweke allebei hie onger. De ummer warrig fluitende B. Goverde maakte d r nog un leuke show van veur beide partieje. Helaas woar Ulestroate doeltreffender en maakte geliek en kort doanoa de winnende 2-1. Un geliekspel woar zeker terech gewaes veur ut veerde.

11 Einmoal in ut kleidlokaal keerde de rus truuk en kos ederein van ut sjwoane waer goan geneite. Kommende zonjig weer unne derby op ut program. Oet noa Stein Noord, oftewel Uermend. Ondanks dat d r niks meer op ut sjpel sjteit veur uch, toch nog effe gaas gaeve de letste wedsjtrieje, mannen van 4. Come on boys! Van ut veerde houve veer neit te sjakele noa de dames. Die houwe aafgeloupe weekend geine wedsjtried en dus hubbe veer nog maar ein team te besjpraeke en dat zeen ozze veteranen. Die moosjten thoes aantraeje taege de veteranen van RKBSV (ein van de veurloupers van BSV Limburgia, maar ze wolle per se onger hunne ouwe naam blieve sjpele). Taege ut eind van de middig druppelden de vets ein veur ein ut sjportpark op. Op enig moment koom auch fortuna-fan Marc Lacroix ut complex oploupe. Dae woort begroet door Ron Marchal (mit de gebroekelijke waekelijkse begroeting die door Ron geweun woort aangehaute ondanks dat ze neit meer van toepassing is) en leep geliek noa Paul Janssen toe. Ron: En Marc, wat haet Fortuna gistere gemaak? Marc: Godmiljaar Paul. Ich kom 10 joar bie Fortuna en doe kumps eine keer en doe kumps geliek mit diene kop op Fox Sports. Vanwaege un flink aantal aafwezigen houwe de vets waer un beroep motte doon op un tweetal oethelpers. Gelukkig woare Rene Gooren en Bart Pantus gaer bereid om te helpe. Grote klasse mannen! Rene leet auch bie de veteranen blieke dat hae möpkes kent, want wie die van RKBSV bewonderend noa ut hoofdveldj keke, ontsjting dit gesjprek.

12 Sjpeler RKBSV: Sjieke mat heur. Rene: Dat is unne echte Picasso. Sjpeler RKBSV: Picasso? Rene: Joa, is kunst-graas. Sjnapse m? Ron besjloot op ut terras un gesjprek aan te knuipe mit de middelste zoon van Stef Conjour, Cisco. Ron: Hubse gevoetbald vandaag? Cisco: Joa ich hub bie de C1 oetgeholpe. Ron: Sjpeels doe pas in de C? Ich dach in de A. Cisco: Ich sjpeel eigenlijk nog in de D. Ron: Wie ich zo groot woar es dich, sjpeelde ich al in de A. Cisco: Huh? Ron: Ja jong, ich ben geweun te auwt veur mien lengte. Stef noom doanoa ut woord om get mien zien zeunkes te besjpraeke. Stefs zus Mandy zou dae oavend op de kinjer lette. Stef: Jonges, ich mot de 2 e helf weg. Veer goan oet aete. Mandy let dan op uch. Ron: Maar wae let dan op Mandy? Stef: Ich dach das doe dat waal zouws doon. Ron (taege de zeunkes van Stef): Jonges, ich waer ugge nuuje nonk. Ut woar inmiddels tied gewoare om te goan omkleije. In ut kleidlokaal houw Willem positief nuujts. Ron maakte doa op un ploagende opmerking euver Ruud van Didden. Willem: Jonges, Bartje Pantus geit noa de zomer bie os aansjleite. Ron: Dan hubbe veer tenminste eine goeie oet Maes d r bie. De wedsjtried woort gesjpeeld onger un flink brennende zon. Micha Dreessen woar doa waal blie mit want hae woar sjus truk van un vakantie noa Kaapverdie, wo noa zien sjmaak toch unne frisje windj sjting. Ruud: Auw muk, hie geisse kapot in de wermte. Ich ben blie dat ich de tweede helf in de sjaduw sjpeel. Denny: Joa haha. Ich denk dat Misha de einige is dae lever neit in de sjaduw voetbalt. De wedsjtried verleep in un rustig tempo wobie De Sjter toch dudelijk de boaveliggende partie woar. Toch doerde ut nog aardig lang veurdat un goal veel. En tot euvermoat van ramp veel sjpits Stef auch nog geblesseerd oet. Hae woort vervange door Willem Thewissen en dae woort allerhartelijkst ontvange bie ziene entree op ut veldj door Ron vanoet de goal. Ron: NAE! Zet noe unne góeie d r in, Leon! Willem trok zich d r echter niks van aan en knikte 45 seconde later de 1-0 binne. Doamit woar de ban gebroake en vloeiden d r heel get aanvalle richting RKBSV-goal. Bart Pantus scoorde veur de rust nog de 2-0 mit unne fraaie geplaatsjte bal mit links in de krusing.

13 In de rust noom Paul Janssen de plaatsj van Ron in de goal in. Ron houw opnuuj de nul gehaute en dat auch nog ens zonger echte keeperstrui. Veur de gelegenheid houw hae gekeep in unne zjwarte De Sjter-polo dae m lekker sjtrak om ut lief zoot. Ron bekeek zich ens in de sjpeigel en zei: De nul gehaute en ich ben auch nog ens de sjmaalste keeper van de ganse club. Noa de rust scoorde Denny Vorstermans nog twee keer. De tweede woar de sjoonste. Vanaaf de rechtezielien leet Denny unne veurzet vertrekke. Wie de bal ziene sjoon verleet reep hae al: Ach shit, nae Wonoa de bal fraai euver de keeper in de lange houk zeilde. Veursjprong dus noa 4-0 en d r koom nog un kans op de 5-0 wie Ron unne penantie moch numme. Die van RKBSV woare ut neit eins mit dae penantie maar Eddy Ubbink maande ze tot rust door te zegke: Rustig maar jonges, es ut unne terechte waor, zouwe veer waal unne góeie sjpeler de penantie loate numme. Ron miste doa op prompt. RKBSV scoorde nog twee keer en zo woort de wedsjtried besjloate mit 4-2. Noa de wedsjtried bleef ut nog lang gezellig in de kantine. En ut feit dat de hapjes-sjoal dit keer van XXXL-formaat woar vergrootte de sfeer allein maar. De geblesseerde Rudy woort gefeliciteerd mit zien trainers diploma en keeper Paul woort geploag mit de 2 taegegoale. Rudy: Jonges, ich waer kommende waek geopereerd en ben in september waer fit. Willem: Dat hoap ich want Paul vroage veer neit meer om te keepe.

14 Hoewel d r waer legio geweldige verhoale woare die ich neit meer allemoal ken reproducere, zeen d r toch twee die ich uch neit wul onthaute. Vanzelfsjpraekend mit Ron in de hoofdrol. Willem: Ron das doe noe in de isolatie zouws zitte, houw ich nooit gedach vruiger. Ron: Wiezo? Willem: Das doe dich mit maatschappelijk verantwoorde dinger bezig gings houte. Ron: Ich houw veul ervaring. Hub twee joar in un isoleercel gezaete. Leon: En joarelangk gate gedicht. Ron: Joa, in de parenclubs altied loake toegemaak. En die vrouwluuj die ich toen gehad hub, die hubbe ut sindsdien auch ummer werm. Leon: Wie zou ut mit Matje de Caan zeen? Rob: Ich zeen um noe dekker bie os langsloupe mit un Thaise vrouw. Willem: Joa hae haet inderdaad un Thaise vriendin noe. Ron: Joa maar hae haet d r de besjrieving van unne pekinees biegekrege. Dus noe mot r jedere daag mit ze loupe. Wie ut in de kantine gedoan woar, trok un flinke groep nog noa de Sjteinder kroegen om doa de gezelligheid veurt te zette tiedes ut Kirmes-weekend. Doa troffe ze euveriges unne geblesseerde veteraan aan, dae bie un dansgezelsjpap bliek te zitte:

15 De aafsjleiter van dees waek kump op naam van 2 e elftalsjpeler, en kindj van de club, Steve Krijgsman. Zonne jonge dae goud inein sjtik. Ummer positief, goeie voetballer, leuk in de omgang, veul goale en assists jeder sezoen, en auch nog een leuke dosis humor. Dat bleek althans aafgeloupe zondig in un gesjprek tusje Steve en ziene ploeggenoot Luca, beide kampend mit un blessure. Luca: En Steve weten ze al wat je hebt? Steve: Ik krijg morgen de uitslag. Luca: En, wat denk je? Steve: Ik denk een jongetje. Pes volgende waek! Rob Sjulpe