De Sjter 1 wint taege Geusselt Sport; Gesjlaagde beerpong-oavend in kantien Dames-coach krig d r verbaal van langs; Engelsje aanwinst veur veteranen?

Transcriptie

1 De Sjter 1 wint taege Geusselt Sport; Gesjlaagde beerpong-oavend in kantien Dames-coach krig d r verbaal van langs; Engelsje aanwinst veur veteranen? Ut woar un weekend mit wisselende resultaten. Op zoaterdigoavend versjpeelden ozze veteranen unne veursjprong taege RKUVC en moosjten oeteindelijk genoegen numme mit un 3-3 gelieksjpel en veier aafgekeurde Sjter-goals. Op zondig dolven ozze dames helaas mit 2-1 ut ongersjpit in unne topper taege GKC/RKHVC oet Kelpen. Ut veerde elftal leed auch un nederlaag, in unne thoeswedsjtried nog waal, taege FC Gelaen Zuid 5. Ut driede houw niks te voetballe, maar zoog heure sjpeler/coach Rene Gooren waal sjtarten in de basis bie ut tweede. Dat leverde auch geliek resultaat op want os tweede sjpeelde verdeinstelijk geliek taege Schaesberg 2. Gelukkig zurgde op zondigmiddig ozze hoofdmacht waal veur unne driepunter, door Geusselt Sport mit 0-2 te versjloan. Wiejer in dit versjlaag auch natuurlijk waer aandacht veur ut randjgebeuren. Mit name de geweldige beerpong-oavend in de kantine (en ut vervolg doa op in de Mondial) kump doabie oetgebreid aan bod. Dae oavend sjneuvelden immers heel get Sjteindenaere. Auch de dansles die stagair Rudy Crutzen kreeg van elftalleider Peter Janssen kump aan de orde. Utzelfde geldt veur de vlagger van os eesjte, dae dermate dik aangedoan woar dat hae verdach veul weg kreeg van un figuur oet reclames veur autobenj. En tot sjlot is d r, in ut kader van #MeToo aandacht veur de emotionele mishanjeling die bie os damesteam plaatsjvindj. Al is ut in dit geval neit unne mannelijke trainer dae zich vegrepe haet aan zien sjpeelsters, maar sjus ut taegendeil: unne trainer dae waekelijks verbaal en emotioneel wurd toegetakeld door zien sjpeelsters. Geer laes d r alles euver in dit verslaag. Loate veer dus maar sjnel beginne. En veer beginne dees waek bie ozze dames. Die houwe unne oetwedsjtried in Kelpen-Oler taege ut plaatsjelijke GKC/RKHVC op ut programma sjtoan. Inzet woar de koppositie in de klasse. Unne wedsjtried wo geer dus zeker un versjlaag van wult heure. En dat versjlaag leek effe gevoar te loupe. Want vaste reporter Robin Martens zit al tieje in Paries, en kreeg dit weekend auch nog bezuik van de angere vaste reporter, Jill Janssen. Gelukkig bleek Samantha Vanhouwe bereid om un wurkelijk weergaloos versjlaag veur uch te typen. Laes en sjmul: Verrassend genog woar Dyonne Conjour es eesjte aanwezig op de parkeerplaatsj op zondigmurrige. Hie woar ze mega trots op, maar noa veurige waek houw ze auch get goud te make. Mit maar 13 dames ginge veer op reis noa Kelpen-Oler. Helaas houwe veul dames zich aafgemeld. Nikel/Nikky/Nikky Minaj houw un duip-fees, Nel/Cindy koosj vandaag eindelijk heur kortingsbonnen inlevere veur heure nuuje rollator, Marwa houw unne cursus verkes knuffele mit un nektesjke om, Jill J. woar in Paries bie Robin, Kyra woar de waeg kwiet in Geulle en coach Gerardus woar waer ens treinen aan ut telle langs ut sjpoor. Einmaal aangekomme in Kelpen-Oler ginge de dames zich rustig omkleije in un veuls te kouwe kleidkamer. Hienoa begoosjten veer aan de warming up op un prachtig kelderklasse veldj. Veural de middensjtip woar prachtig. Gein idee wat midden beteikent in Kelpen,

2 maar dae sjtip loog in jeder geval neit in ut midden. Doanaeve loog dat veldj auch nog op de lokale Mount Everest. Taegesjlaag in de warming up want Lonneke raakde geblesseerd. Gelukkig koosj Kimberly heur plaatsj innumme. Noa unne korte peptalk van Kiki en Tom begoosjten veer aan de wedsjtried. Kort samengevat woar de eesjte helf geweun Ka-Uu-Tee. De tweede helf ging gelukkig un sjtuk baeter. Siri sjoot toen Siri-eus de 1-1 binne. Doanoa woort nog un goal van Bo helaas aafgekeurd. En wiejer wol de bal geweun neit d r in. Oh joa, en de sjeids wis neit wat unne corner woar. Helaas krege veer 10 minute veur tied nog de 2-1 binne. Joamer genog gein drie punte. Hoapelijk blieve die punte volgende waek wounsdig waal in Sjtein. En doanaeve wulle veer gaer ozze vaste supporter, Danielle (de mam van Yaël/Sjarel) bedanke. Die sjteit os waek in, waek oet, of ut noe oet of thoes is, aan te moedigen langs de lien. TOP! Samantha, doe bedank veur dit super versjlaag. Moagse dekker doon! Sjiek! Van ozze dames sjakele veer euver noa os veerde elftal. Dat houw unne thoeswedsjtried op ut programma sjtoan taege FC Gelaen Zuid 5. Ralph Doek deit versjlaag: Mit de nuuj truitjes en tesje van ozze nuuje sjponsor Wiertz woare veer vol gooje mood en haupden veer op un good resultaat taege kopluiper Gelaen Zuid 5. De trainingspakke van Wiertz koosjte auch geliek gebroek waere want ut woar godverdommesse koud, gek! Lang ongerbrook aan onger ut trainingspak en aan em! Ut begint natuurlijk get eintonig te waere: bes good sjpele maar door ut gebrek aan unne echte keeper onnwaedig verleeze. Held Noudje sjting te bevreze in de goal. Ingepak wie un Michelin-menke koos r nog get belke taegehaute. Veer kome euveriges waal nog op veursjprong via un sjieke individuele actie van Rachid Bourja, die hae zelf doeltreffend aafronjde. Gelaen koom nog veur de rust terugk en scoorde de 1-1 via unne onhoudbare kupbal. De res van de geulkes vele in de 10 minute die volgden. Mit unne 1-3 achtersjtendj ginge veer dus de rust in. Noa de pauze probeerden ver nog get te doon aan de achtersjtendj en sjpeelden ver eigenlijk un goeie tweede helf. Mit unne bal op de poal en un paar sjeut vlak langs de poal wisten ver echter neet meer te scoren helaas. Positief punt woar waal dat ozze nuujkommer oet Maes, Jup the Butcher, dit keer waal kom op Stein reep in plaatsj van kom op Maes!. Kom op De Ster is veurluipig nog un brugk te wiet, en aan ozze kleuren is hae auch nog ummer neit gans gewend. Maar veur eine Maessenaer is ut al unne ganse stap om te voetballe in Stein Kommende waek Lintjheuvel oet. Ens kieke of veer doa de nul kenne haute en get punte kenne mitnumme noa Stein. Klasse Ralph. Bedank waer veur dien versjlaag. En die punten pakke geit vas helemoal goud komme. Zeker es Stan Ortmans dan dezelfde vorm tentoonspreid die m auch (naeve veteraan Eddy Ubbink) tot de co-ster van de Steinder Revue maakde de aafgeloupe twee

3 weekende. Op de foto zeet geer Stan in zien glansrollen es enerzijds travestiet en angerzijds Steinder Gestapo-officier Herr Click: Stan, doe woars grandioos. Hulde! En noa volgende waek waer knallen veur De Sjter 4! Van ut veerde goan veer euver noa De Sjter 2. Twee sjpelers oet dat team woare aafgeloupe vriedig verantwoordelijk veur ut in de kantine georganiseerde beerpong-toernooi. Veur de ouwere laezers: beerpong wurt gesjpeeld in teams van elk 2 sjpelers. De twee teams sjtoan aan beidskenj van un lang toafel mit veur zich 10 baekerkes, in un bowling-opsjtelling. De bedoeling is om un pingpongbelke te mikke in unne baeker van ut angere team. Jedere score zurg d rveur dat ut angere team un drenkske mot numme. Es dat lestig klink: sjaam uch neit. Auch Jo van Funs houw neit gans in de gate wo al die gekleurde baekerkes veur bedoeld woare: Ut woar unne fantastische oavend, dankzij organisatoren Jari Knoops en Steve Krijgsman. Veerteen teams streden om de euverwinning. En dat alles onger de klanken die woorte

4 geproduceerd door ut befaamde DJ-duo Rijkaard&Völler. Veuraaf woar d r maar eine torenhoge favoriet (en dat vonj hae zelf auch, getuge dees foto): Oeteindelijk gingen echter Bastiaan en Steve d r es winnend team vandoor mit de baeker en de eeuwige roem. De foto s van unne sjieke oavend sjpraeke boekdeile:

5 Leuk woar auch dat un aantal auwt Sjter-sjpelers dae oavend de waeg noa de kantine houwe gevonje. Zo deig Youri Voesten vol euvergave mit aan ut toernooi. En auch Guillermo Kroon, dae veurige waek nog mit Sjarn netjes de punten in Sjtein achterleet, woar de sjmaak van ozze baco s zo goud bevalle dat hae auch nog effe koom binnewanjele: Dat Guillermo op dees foto poseert in de keuken van de kantine, terwiel hae nog ummer in ut bezit is van unne volledig gebit, kent twee dinger beteikene: ofwel Ans woar op dat moment aafwezig, ofwel de goedlachse Guillermo haet in ein sezoen in Sjtein dermate veul punten gescoord bie Ans dat hae un pötje kent braeke Noa aafloup van dit ultra-sjpannende toernooi zoch unne flinke groep oet Sjtein nog get ontsjpanning in de Mondial in Baek. Angeren houwe in de kantine al genog gedronke en krope rechsjtreeks noa hoes toe. Wie dan auch, dat de oavend en nach sjlachoffers eisten, woar euverdudelijk. In dit kader houw unne man of 50 geluk dat mich gein foto van hun bereikte veur dit versjlaag. Unne in de Mondial rechtop sjloapende Joep Nacken en unne mit unne houten kop wakker gewoare Davy Hodselmans woare minder gelukkig

6 Noa zo n success-story zouwse bienoa vergaete dat d r auch nog gevoetbald moosj waere door ozze selectieteams. Loate veer eesj maar ens kieke wie dat os tweede elftal verging. Jari Knoops deit versjlaag: Dees waek heije twee spelers van os 2 e ein evenement georganiseerd in de kantien. Ut baco/beerpong-toernooi sting op ut programma. Steve en ich (Jari) hubbe dit veurbereid en auch dankzij de hulp van Bart Linders, Roel Heffels, os DJ-duo en Ans en Jo, woar dit weer ein succes. Noa twee joar zelf te hubbe gewonne es organisator zeende, vong ich ut dit joar ens tied veur eine angere organisator om te winne, Steve dus Nae zonger flauwekul, Steve en Bastiaan woare de terechte winnaars in de finale taege Davy en stand-in Rudy Crutzen. Chapeau dat d r toch zo n 30 man bereid woare om mit te doan, wo onger coach Jean Janssen en de in topvorm verkerende Patrick Nordhausen, dae werkelijk alles raak gooide wie hae in vorm koom. Dan noa de zondig. De wedstrijd taege Schaesberg sting op ut programma. Altied ein lestige ploog om taege te voetballe en zeker in ozze huidige (matige) vorm. De opsjtilling woar es volgt: Kis: Bastiaan Achter: Kenny, Jari, Joep en Frusj Midden: Cyrill, Frank en Bart Veur: Steve, Rene en Luca Bank: Sevn, Jason, Anas en Jesse (die letste drie zeen van de A-jeugd)

7 Ver begooste redelijk good aan de wedstrijd en voetbalden leuk. Allein werd er in de cruciale fases de moeilijke oplossing gezoch terwiel ut mekkelijker koos. Steve trapte noa 13 minute unne corner in eine keer d r in. Luca claimde dat hae m aanraakde maar helaas veur heum gebeurde dat achter de doellien. 1-0 dus door Steve. Hienoa bleven ver redelijk voetballe en leek d r auch niks aan de hendj. Tot 3 minute veur rust. Get laconiek verdedigen op ut middenveldj leidde unne vliemsjeper counter van hun in. Veurzet, 2 maeter boetesjpel, goal. Erhan vlagde maar de sjeids noom zich neit ens de muijte om noa m toe te goan. Frits d n Engel, dae achter de goal van Bastiaan sting aan de manege-kantj reep vervolges vanalles op de sjeids. Dae dach dat Bastiaan dat woar, wodoor dae nog bienoa gael kreeg enfin 1-1 rustsjtandj. Noa de rust noom Schaesberg ut initiatief euver. Dit leidde tot ein paar kenskes maar doa bleef t dan auch bie. Noa 20 minute in de 2 e helft ginge veer waer baeter voetballe en zetten veer hun onger druk. Dit leidde tot ein enorme kans veur Rene, mer helaas woar die neet aan m besteed. Noa nog ein aantal kansen bleef ut oeteindelijk toch geliek. Ver hubbe gevochten veur wat veer waerd woare mer t zoot d r neet in. Volgende waek nuuje kans op unne driepunter, oet taege Laar. Klasse Jari. Bedank veur dien versjlaag en sjiek dat geer uch biejein hub gepak om zo n leuke activiteit in de kantien te organiseren. Goud bezig mannen van 2! Oh, en veurdat ich t vergaet Rene Gooren wis auch nog get leuks te deile euver daezelfde Jari. Rene en Jari zeen onlangs mit unne ganse groep un waekske noa Mallorca gewaes. Doa houwe ze un Duutsj maedje lere kenne. Die houw Rene en Jari aafgeloupe waek allebei utzelfde berichske gesjtuur. Oet de reactie van Jari bliek dat d r nog flink get aan zien Duutsj gesjaaf kent waere. Gelukkig sjpijkerde Rene m geliek effe bie:

8 Dan door noa os angere selectieteam. De mannen van 1 zitte in un goeie fase qua resultaten en wolle natuurlijk in dae positieve flow blieve. Dat moosj aafgeloupe zondig un vervolg kriege in Mesjtreich taege Geusselt Sport. Die ploug, die veurig sezoen nog mitdeig om de prieze in de 2 e klasse, haet flink get sjpelers zeen vertrekke. Dit sezoen bivakkeert men dan auch in de middenmoot, mit onger angere auwt-sjtersjpeler Twan van de Woude in de gelederen. Frans Beaujean deit versjlaag van de wedsjtried: Guur, koud en un sjlech veldj wo op technisch voetbal vriewel onmuigelijk leek te zeen. De veurteikene veur unne leuke wedsjtried woare dus sjlech. Boffen veur os woar waal dat Geusselt Sport heur creatieve sjpeerpunten Sour en Marijnen miste vanwaege blessures. Veer troffen dus unne gehavende taegesjtenjer. De opsjtelling woar es volgt: Kis: Geoffrey Achter: Timo, Davy, Guido en Roel Midden: Mike, Stan en Thijs Veur: Maarten, Marko en Hassan Bank: Randy Walraven, Frank, Steve Onger leiding van unne piepjonge sjeidsrechter (20 lentes jongk) sjtartte de wedsjtried mit enige vertraging. Vertraging omdat os jonges 10 minute veur ut begin te heure krege dat de kleuren van beide teams te veul op elkaar lieke. Dus woorte sjnel de blauwe tenues aangetrokke en koosj d r esnog begoosj waere. Ut woar geliek dudelijk dat Geusselt Sport dit sezoen voetbalt om neit te verleize. In un systeem groof men zich in, om vervolges te probere mit lang bel geveerlijk te waere. Maar goud: Veritas versjpeelde hie veurige waek unne 0-2 veursjprong in de letste teen minute. Toch maar oppassen dus. De Sjter woar de baetere ploug in de oapeningsfase en kreeg un aantal kenskes via Hassan. Noa ongeveer un kwarteierke sjpele veel de oapeningstreffer. Goud doorzette van Marko en Maarten leverde de bal ietwat gelukkig veur de vuit van Thijs op, dae beheerst de 0-1 scoorde. Vervolges ontsjpon zich unne helle wedsjtried wo in Geusselt Sport zich van heure onsjportieve kantj leet zeen. Hassan woort veur de rust in de 16 getorpedeerd maar die euvertreding woort weggewuifd door de sjeidsrechter. Doanoa waer un kans veur Hassan. Dae mikte op de poal en kreeg vervolges gein kans om de rebound binne te tikken omdat hae ruw woort weggeduujd. Wederom houw de sjeidsrechter niks gezeen. Vlak veur de rust moch Marko nog unne keer allein op de keeper aaf. Marko besjloot echter breid te legke in plaatsj van zelf te sjeite en doamit ging de kans verloare. Rust Noa de rust ontaardde de wedsjtried zich, mit name vanwaege frustraties aan de kantj van Geusselt Sport in un regelrechte sjup-partie. Stan kreeg tiedes un duel aan de zielien un volle sliding van achteren te incasseren. Dat gebeurde vlak veur de naas van grensrechter Marco Vaassen, dae mitgenomme woort in de valpartie van Stan. Marko houw zich trouwes goud ingepak mit dit kouwe waer. En mit zien hesje euver die dikke kleijer haer, houw hae verdach veul weg van un Michelin-menke:

9 Terugk noa de belachelijke sjuppartie in Mesjtreich.. Want kort noa die eesjte charge op Stan, woort hae opnuuj geattakkeerd. In ut doa op volgende opsjtootje woort door unne sjpeler van Geusselt Sport noagetrap en un kopsjtootje oetgedeild. De sjeids koosj natuurlijk niet angesj dan de rooj kaart trekke. De Sjter woar noanoa waer de baetere ploug en kreeg auch kansen. D r woort echter verzuimd om ut aaf te maken. Totdat Marko wie un duvelke oet un deuske de verlossende 0-2 scoorde. Daezelfde Marko woort doanoa nog unne keer getorpedeerd door ziene taegesjtenjer, wo op (heel logisch) Marko de gael kaart getoond kreeg Maar goud, de wedsjtried woort gelukkig zonger noemenswaardige blessures aafgesjloate en de euverwinning koosj gevierd waere. Men kent waer omhoog kieke en mit twee thoeswedsjtrieje veur de boeg en van blessures terugkkerende sjpelers geef dat un goud gevuil. En in de nuuje blauwe oettenues is dit sezoen nog un 100% score gehoald (6 oet 2). De euverwinning woort terugk in Sjtein nog gevierd door selectie en begeleiding:

10 En noa 10 pils besjloot elftalleider Peter Janssen nog dansles te goan gaeve aan de stagair: Proficiat mannen van 1. Nog un paar keer gaas gaeve noe, 6 punte pakken thoes, en dan mit un heerlijk gevuil de kerstvakantie in. Come on! En dan rest os nog maar 1 team te besjpraeke: ozze veteranen. Willem Thewissen, dae achter de sjermen jeder waek waer bergen werk verzet om wedsjtrieje te regele veur ozze vets, sjtuurde un appje de wereld in euver de aankommende wedsjtried. Tja, en es doa un typfoutje in sjteit, dan witse wie ut geit :

11 Maar goud, wedsjtried woar dus geregeld. Bovendien lekker thoes sjpele dus aan ut veldj koosj ut auch neit ligke. Noe allein nog zurge dat veer zelf genog man houwe. Steef goof in jeder geval ut goeie veurbeeld. Al kreeg hae doa op geliek un ploagerige opmerking van Ron Marchal te verwirke: En auch Mat Cremers houw goud nuujts. Hae woar bliekbaar volledig hersjteld van zien gebroake ribben, boekzenuw-kneuzing, dubbele hernia en navelbreuk: En auch Roger Daemen woar waer besjikbaar. Al dronk dae zich op zoaterdig om 12 oer, es coach van os maedjes JO15-team, waal alvas un pilske op de door zien meiden behoalde euverwinning. Levi Nelissen, dae net ziene zoon mit zien JO13-team houw zeen winne van Aelse, woar doa neit van gecharmeerd:

12 Temidden van al dae flauwekul meldde Marc Lacroix vanoet Birmingham dat hae nog unne extra sjpeler houw gevonje veur de res van dit sezoen. Hae woar nog hersjtellende van un blessure, maar is op de waeg terugk. Steef woar neit onger de indruk:

13 En auch Jack Dassen leet (op lekker dreuge humoristische wieze) mirke dat hae neit onger de indruk is van meer dan 60 interlands veur Engelandj, unne gewonne champions league, 5 engelsje kampioensjappe en 3 FA cups: Denny Vorstermans wees d r waal nog terech op dat d r auch un gevoar zit aan ut inhuren van John Terry. Hae haet namelijk nogal un reputatie es ut geit om de vrouwen van ploeggenoten:

14 Maar goud, loate veer maar ens noa de wedsjtried van os veteranen toe goan. Rondj kwart op 4 druppelden de sjpelers binne. Mat Cremers zoog d r, wie ummer, gelek oet. Al vonje sommigen dat driedeilige kostuum get euverdreve: Roger: Mat, doe kens maar baeter al beginne mit dich oetkleije. Want dat geit waal effe doere, zo te zeen. Ron: Joa, esse zo noa de hore geis, besse al 100 euro kwiet veurdasse de kleijer oet hubs. Eenmaal in ut kleidlokaal koom Will Leurs aanloupe. Dae zoog Steef van de Woude en begroette m allerhartelijkst. Steef besjloot Will geliek om un gunst te vroage, want hae wis nog urges un feeske wo Will moosj dreije. Ron houw die gunst get angesj begrepe: Will: Steeeeeeef! Steef: He Will, ich hub dich nog neudig veur un klusje. Ron: Oh jee, geisse plantjes zette, Steef? Vervolges koom coach Leon binne mit de opsjtelling. Leon: Zo jonges, doa goan ver. Ron Marchal in de goal.. Ron: Un garantie veur de 0. Leon: Mat Cremers letste man. Ron: Alleh, mesjiens toch un geulke taege dan. Leon: Piele veursjtopper. Ron: Oioioi, of twee goale taege Veurdat men ut veldj op koosj, moosj d r nog gewach waere totdat de jeugdwedsjtried veur os aafgeloupe woar. Ron houw kiekend noa ut sjpel nog un briljante opmerking. Mat: Is dat de B-jeugd? Ron: Nae man, de C. Rob: Nae, is de B, heur. Ron: Ech? Wie ich in de B sjpeelde woar ich veul groter. En Mat en Ron zatte hun gesjprek nog effe veurt. Noa unne sjieke aanval van De Sjter B1 noom Mat waer ut woord. Mat: Sjiek he veur die jonges. Venj ich ech sjiek dat die zo lekker kenne voetballe hie. Ron: Dat zegke die auch dalik euver dich. Sjiek, dat dae ouwe man dat nog kent. Hae is nog te muig om zich te sjaere maar hae lup toch maar sjoon euver dat veldj. Sjiek he. Noa un korte warming up bloos gelegenheids-sjeidsrechter Willem Thewissen op zien fluitje es teiken dat de plouge zich kloar moosjten make veur de aaftrap. Roger Daemen gunde de

15 aaftrap aan taegesjtenjer RKUVC mit de weurd: Loat hun maar aaftrappe Willem, die hubbe unne dikke d rbie. Gezeen ut aantal pagina s dat ich aan ut bereiken ben, zal ich ut versjlaag van de wedsjtried kort haute. Un klein foutje achterin goof RKUVC de kans om de score te oapene. De geliekmaker woort door de sjriever van dit sjtuk gescoord, wie hae wegdreijde van ziene taegesjtenjer en mit links in de boavehouk mikte. Vlak veur rust veel auch nog de 2-1 veur De Sjter. Steef van de Woude ronjde de assist van deze sjriever koelbloedig aaf. Noa de rust leek de wedsjtried al sjnel gesjpeeld, wie Ron Marchal de 3-1 scoorde. Niks woar echter minder waor, want RKUVC knokte zich verdeind terugk noa unne 3-3 eindsjtandj. Al mot gezag dat sjeids Willem zich genoodzaakt zoog om maar leifs 3 goale van os aaf te keure omdat de grens de vlag omhoog sjtook. Enigszins discutabel un paar keer, maar goud. De wedsjtried is toch ummer van ongergesjikt belang aan de res bie de vets. Noa aafloup in ut kleidlokaal woar ut un opmerking van Steef van de Woude, die al ut gedeuns euver waal of neit boetesjpel waer relativeerde en die dudelijk maakte dat de jeugd doorgoans laef bie carpe diem, maar de meeste vets rondjzjwoegen bie memento mori. Al wis Steef zich toch nog eine veteraan te herinnere dae waal de daag pluk : Steef: Jonges ich mot geliek noa un feeske. Will: Hubse alwaer un feeske? Steef: Joa, un vriendin van mich wurt 50 joar. Ich hub godverdomme allein nog maar vriendinne van 50-plus momenteel. Will: Ja joa, Steef. Steef: Ich denk dat ich maar ens get meer mit Willem Thewissen goan optrekke, want ich wul auch nog waal ens un jongk blumke bekieke. De aafsjleiter van dees waek geit euver unne man dae ut lestig haet. Hae haet al moanjelangk vlinders in de boek wodoor hae eigenlijk ut leefste allein maar bie zien (veuls te jonge en aantrekkelijke) maedje is. Voetballe bie de veteranen deit hae dus auch al un paar waeke neit meer. De ein aafmelding noa de anger haet d r veur gezurg dat hae inmiddels zelfs door Levi Nelissen mit recht kent waere aangesjproake op zien veelvuldige aafwezigheid. En auch op de groepsapp leet hae nog maar sjporadisch van zich heure. En dan auch nog meestal es mosterd noa de moaltied. Zo wie aafgeloupe waek, wie de ganse selectie al Rene Hillen houw gefeliciteerd mit ziene verjoardaag, en Gerard om 5 veur 12 auch nog van zich leet heure:

16 En auch later in diezelfde waek kreeg Gerard un opmerking euver zien beperkte aanwezigheid de letste waeke:

17 Maar ut mot gezag: aafgeloupe zoaterdig koom hae de tweede helft waal kieke noa zien ploegmakkers en bleef hae noa aafloup auch in de kantine hange. Hae wult dus waal en deit zien bes om alles dreijende te haute in zien laeve. Utzelfde geldj veur ziene inzet es trainer van de dames. Mit hart en ziel wult hae zich doaveur inzette. Zeker omdat zien dochter Shauni auch in dat team sjpeelt en hae zien dochter unne goeie trainer gunt. Maar auch hie mot hae af en toe keuzes make. Ziene tied is immers sjpaarzaam. En noe zouwse zegke: die dames sjnappe dat waal en die hubbe begrip veur de situatie van hunne trainer en sjteunen m doa in nou niks is minder woar. Want hae wurt geregeld gedekseld door zien dames. Ach, en eigenlijk verdeint r dat auch. Want veer hubbe ut natuurlijk euver Gerard Martens. En jederein dae Gerard kent, dae wit dat dae niks leuker venjt dan zo vaak muigelijk de vinger op de zere plek te legke bie luuj. Lekker un bietje sjteuke, un bietje ploage, Gerard is d r unne kei in. En ummer mit de beste bedoelinge. Om anger luuj aan ut lachen te kriege. Kwoajigheid sjtik d r immers neit in Gerard. En datzelfde geldt veur de plaogerieje van os dames richting Gerard. Auch die zeen geweun leuk bedoeld. Zo wie aafgeloupe waek. Wie Gerard un compliment oetdeilde aan Samentha veur ut geweldige gesjreve versjlaag, maar geliek unne tik wol oetdeile, dae hae mit un razende vaart terugkgekaats kreeg: Gerards reactie woort vervolges auch geliek weggehoond:

18 Maar dat woar nog neit ens de grootste verbale klap dae Gerard de aafgeloupe waek kreeg. Dae woar namelijk aafkomstig van de jongste telg van os damesteam, Yaël Beaujean. Die maakte zich op de dinsdigtraining namelijk onsjterfelijk bie heur ploeggenoten door un opmerking van Gerard te beantjwoorden mit un ad rem-reactie wo zelfs Ron Marchal jaloers op woar gewaes: Dinsdig kome de dames un paar seconden te laat ut trainingsveldj opgewanjeld. Hunne coach sjting hun al op te wachten mit zien welbekende kritische blik in de auge. Hae besjloot de dames ens cynisch aan te sjpraeke, maar woar neit bedach op de reactie. Gerard: Es geer de trein houwt motte numme, dan houwt geer dem noe gemis, godverdomme! Yaël: Nou, dan houwe veer toch geweun unne trein later gepak? Touché! Pes volgende waek, Rob Sjulpe