WAARDES VIR DIE WEDSTRYD REEKS (SONDAG 10 MEI - SATERDAG 13 JUNIE 2015)

Transcriptie

1

2 WAARDES VIR DIE WEDSTRYD REEKS (SONDAG 10 MEI - SATERDAG 13 JUNIE 2015) INHOUDSOPGAWE VOORWOORD 1 HOE OM DEEL TE NEEM AAN DIE REEKS 2 KERKSONDERMURE SE CREDO 3 OORSIG VAN DIE HELE REEKS *Elke week se inhoud word soos die weke vorder beskikbaar gestel. Week 1 (10-16 Mei) VERHOUDINGS: God ken my 4 Week 2 (17-23 Mei) VERVULLING: Die krag van die Heilige Gees Week 3 (24-30 Mei) VERSKEIDENHEID: Unieke gawes Week 4 (31 Mei 6 Junie) VERNUWING: God genees Week 5 (7-13 Junie) VOLGELINGE: Gehoorsame volgelinge

3 VOORWOORD Waardes vir die Wedstryd Sedert die begin van 2015 is die kerksondermure geloofsfamilie besig met ʼn Wedstrydplan na Lewensverandering. Elkeen wat in hierdie tyd geluister het na die spanpraatjies (preke) of wat deelgeneem het aan die weeklikse oefenprogram sou ʼn uiters belangrike vertrekpunt raakgehoor het die wedstryd word op die veld gespeel en nie in die kleedkamer nie. Dalk het julle ook al beleef hoe verskillende sportbyeenkomste geopen word deur die voorlees van ʼn credo. Deur die lees van so ʼn credo word die waardes vir waardige deelname aan die sportsoort uitgespel en verbind die deelnemers hulle daartoe om met hierdie waardes as maatstaf deel te neem. kerksondermure is ʼn geloofsfamilie en daarom is ons verbind tot ʼn unieke waardestelsel waarvolgens ons deelneem aan die wedstryd van die lewe. In ʼn volgende fase van ons wedstrydplan gaan ons van 10 Mei tot 13 Junie aandag gee aan die inoefening en uitleef van kerksondermure se waardes, nl. Verhoudings, Vervulling, Verskeidenheid, Vernuwing en Volgelinge. Ons nooi jou hartlik uit om deel te neem aan ons tweede reeks - Waardes vir die Wedstryd. Hierdie reeks vorm deel van ons Persoonlike Verhouding met God konteks binne ons Wedstrydplan na Lewensverandering droom. Mag hierdie reeks julle as individue, gesinne, en selfamilies voorberei en aanmoedig om die wedstryd van die lewe voluit saam met God te leef! Soli Deo Gloria kerksondermure Uitvoerende span Waardes vir die Wedstryd - reeks Bladsy 1

4 HOE OM DEEL TE NEEM AAN DIE REEKS Welkom by ons tweede reeks in Fase 1 van ons Wedstrydplan na Lewensverandering! Ons wil graag in die volgende 5 weke saam met jou, jou gesin en/of jou selfamilie kliphard oefen en groei in ons persoonlike verhouding met God, deur aandag te skenk aan kerksondermure se 5 waardes. Ons gaan hierdie 5 waardes individueel besoek, een per week, en ʼn 7-dag oefenprogram vir elk volg. Elke week se tema sal bou op die vorige. Raadpleeg die afdeling oor kerksondermure se credo vir ʼn kort oorsig en beskrywing van ons waardes. Dit is belangrik dat jy dalk weer die afdelings oor die beginsels, kontekste en oefenprogram in die boekie oor die Wedstrydplan: Persoonlike Verhouding met God herbesoek en oordink. Daar word sterk aanbeveel dat jy sover moontlike elke Sondag se erediens sal bywoon. As jy dit nie kan bywoon nie, sal dit teen die Woensdag, ná die Sondag, elektronies beskikbaar wees op die voorblad van ons webtuiste onder Audio-preke. Elke week, na afloop van die Sondag se preek oor ʼn spesifieke waarde, is daar ʼn beskrywende stuk teks, gevolg deur daaglikse opdragte en refleksies, as deel van die oefenprogram elektronies beskikbaar op die voorblad van ons webtuiste onder publikasies. Daar is ook aan die einde van elke week se program ʼn Kindertyd afdeling wat aktiwiteite vir kinders voorstel, spesifiek rondom die waarde-tema van daardie week. Waardes vir die Wedstryd - reeks Bladsy 2

5 KERKSONDERMURE SE CREDO Hierdie reeks handel hoofsaaklik oor kerksondermure se 5 waardes, daardie credo waarvolgens ons deelneem aan die wedstryd van die lewe. Dit kan natuurlik nooit losstaan van ons ons visie (ʼn Dienende geloofsfamilie wat met blydskap die Koninkryk van God oral uitleef) en ons missie (Om ander te lei om Jesus te leer ken en meer soos Hy te leef) nie. ONS WAARDES Verhoudings Ons bestaan vir verhoudings met God, gelowiges en die wêreld. Vervulling Ons leef oorgegee aan en in die krag van die Heilige Gees wat egte lewensverandering bewerk. Verskeidenheid Ons verwelkom die feit dat nie almal dieselfde is, dink, voel en doen nie. Ons verwelkom dus verskeidenheid en poog om eietyds te wees. Vernuwing Ons wil deel in God se passie om sy wêreld te bring na vernuwing (heelheid). Volgelinge Ons help mekaar om radikaal gehoorsame volgelinge van Jesus te wees. Waardes vir die Wedstryd - reeks Bladsy 3

6 10 tot 16 Mei 2015 Verhoudings Week 1 Verhoudings: God ken my Waarde: Ons bestaan vir verhoudings met God, gelowiges en die wêreld. Ons is gemaak en bedraad vir verhoudings! Van al ons verhoudings is die belangrikste verhouding ons persoonlike verhouding met God. Dit is maklik om dit te sê, maar is dit so? In Openbaring 2 lees ons dat God baie ernstig is oor sy verhouding met ons, soveel só dat Hy eis dat Hy ons eerste liefde moet wees. Die Bybel praat huwelikstaal, die taal van die bruidegom en die bruid waarin daar vir ons geweldige waarhede opgesluit is. As ons bruidegom... soek God ons net vir Homself (Openbaring 2); eis God onverdeelde trou (Exodus 20); neem God ons soms die woestyn in om mooi dinge vir ons te sê en om Homself aan ons te bind (Hosea 2); vereis God dat ons afgesonderd sal wees van die lewe van sonde, afgesonder vir Hom (Johannes 17); en het God vir die bruid (ons) gesterf en wy Hy ons aan God toe en stel Hy ons onberispelik voor God (Efesiërs 5:25-27). ʼn 4D Lewe In Psalm 139 leer ons dat God vir gelowiges ʼn 4D lewe te weeg bring. Net soos ʼn 4D skandering vir ons wys wat ons nie met die blote oog kan sien nie, so is geloof die skandeerder wat vir ons ʼn nuwe lewe wys - dié lewe van die onsigbare Koninkryk wat tasbaar teenwoordig is in die sigbare wêreld om ons. Dawid leer ons wat dit beteken om in ʼn moederskootverhouding met God te leef. ʼn Lewe waar sy teenwoordigheid ons soos ʼn moederskoot omsluit. In hierdie verhouding is dit nie moontlik om van God se teenwoordigheid te ontkom nie. Nie in die lewe van vandag nie, en ook nie in die hiernamaals nie. Waardes vir die Wedstryd - reeks Bladsy 4

7 Dawid herinner ons daaraan dat God betrokke is by die detail van ons lewens. Hy is die een wat gesien het hoe elke beentjie in ons liggaam gevorm is, toe niemand dit kon sien nie. Hy weet wat ons dink, wat ons droom, wat ons wil sê nog voordat ons die woorde uitspreek. Hierdie Here wat ons so deeglik ken, wat weet dat ons van stof gemaak is (Psalm 103), is die Een wat Hom aan ons bind. Die groot vraag... Ken jy Hom? Die vraag is nie of jy van Hom weet nie. Die vraag is nie of jy weekna-week moeite doen om te luister na woorde en getuienisse van en oor Hom nie. Die vraag is nie of jy in ʼn Christenhuis grootgeword het of selfs of jy kerk toe gaan nie. Die vraag gaan nie oor of jy bid of Bybellees nie. Die belangrikste vraag wat ek en jy vandag moet antwoord is: Ken jy Hom? Wanneer Jesus praat oor die ewige lewe in Matteus 7:21-23, is daar ʼn indringende waarskuwing as Hy verwys na mense wat in Sy Naam preek en wonders doen, en Hy hulle nie ken nie. Jesus is uitgesproke dat hierdie mense nie die ewige lewe saam met Hom sal spandeer nie. Vandag móét jy die vraag beantwoord: KEN jy vir Jesus? As jy sê JA; sal dit sigbaar moet wees in jou lewe, want woorde en dade moet dieselfde storie vertel. Jy kan sê wat jy dink, maar jy doen wat jy glo! Wys met jou lewe, oral, waar jy sigbaar is in die gemeenskap en waar jy onsigbaar is in die stilte van jou eie geselskap, dat jy aan Jesus behoort. Dit is die belangrikste vraag vir elke mens om te antwoord: Ken jy vir Jesus? Dan, eers dan sal dit wat jy by Hom kry rimpel na al jou ander verhoudings. Prys die Here! Aanbevole leesstof God is closer than you think (John Ortberg) Desiring God (John Piper) Waardes vir die Wedstryd - reeks Bladsy 5

8 Oefenprogram vir Week 1 Bywoon van erediens en gesprekke met jou geliefdes en vriende daaroor. Ek is héél eerste gemaak vir ʼn verhouding met God. Geloof is die sleutel vir ʼn verhouding met God. Kan jy sê dat jy vir Jesus ken? Skryf kort notas neer oor hoe jou verhouding met Jesus begin het... Waardes vir die Wedstryd - reeks Bladsy 6

9 Lees Johannes 17:1-3 Wat leer hierdie stuk jou van die Ewige Lewe? Hoe verskil dit van ander weergawes van die Ewige Lewe wat jy al in jou lewe gehoor het? Wat sê hierdie gedeelte vir jou oor ʼn buurman wat saam in die kerk sit, maar nie leef soos ʼn Christen nie, want hy/sy meen dat geloof al is wat jy nodig het om gered te word? Jy kan sê wat jy dink, maar jy doen wat jy glo. Daar lê geweldige wysheid in hierdie stelling opgesluit. Jakobus sê dat ons dade juis die toets is vir ons geloof. Wat sal die wêreld sê as ʼn kameraspan jou lewe vir ʼn week sou dophou? Waardes vir die Wedstryd - reeks Bladsy 7

10 Jy leer God ken deur sy Woord, in die natuur, deur gebed, deur tyd saam met medegelowiges te spandeer, deur betrokke te wees by nood, en deur bewustelik saam met Hom te wandel op ʼn daaglikse basis. Kies vandag een van die bogenoemde maniere om God beter te leer ken... doen dit... Wat het dit jou geleer van jou en God se verhouding? Lees Josua 24:15b Het jy en jou huismense al besluit om die Here te dien? Praat met mekaar oor hoe julle dit elke dag vir ander kan wys. Om vorentoe te kyk vereis dikwels ook dat ek bereid sal wees om terug te kyk. Wat het die Here vir my uitgewys in die afgelope week waaraan ek in die komende week moet werk? Waardes vir die Wedstryd - reeks Bladsy 8

11 Kindertyd Lees Psalm 139:1-6 vir jou kind(ers). Som dit op in die woorde: God ken my. Verduidelik vir jou kind(ers) hoe wonderlik dit is om in ʼn verhouding met iemand te mag leef wat ons deur en deur ken! As julle ʼn X-straal in die huis het, wys dit vir jou kind(ers). Soos wat ʼn dokter tot binne-in ons lyfies kan sien wat verkeerd is, so ken God ons deur en deur. Lees ook Psalm 139:7-12 vir jou kind(ers). Som dit op in die woorde: God is oral God is altyd by my. Kniel saam met jou kind(ers) en dank die Here dat Hy altyd by ons is. Wat ʼn voorreg om elke dag in ʼn verhouding met iemand te leef wat elke oomblik by ons is! Herhaal weer die storie agter Psalm 139: God ken ons God is altyd by ons God het ons op ʼn wonderbaarlike wyse gemaak Koop ʼn PS-sjokolade en deel dit terwyl julle dink aan die storie agter PS een-drienege wat waar is vir elkeen in die gesin. Ons het geleer dat wanneer ons in ʼn verhouding met God leef ons vas en seker kan weet: God ken my; Hy is oral; Hy het my op ʼn wonderbaarlike wyse gemaak. Kinders wat weet dat God ons ken, dat Hy oral is en dat Hy ons op ʼn wonderbaarlike wyse gemaak het, kan deur hulle verhoudings ʼn verskil in hierdie wêreld maak! -ooo- Waardes vir die Wedstryd - reeks Bladsy 9