Preek Romeine 6:3-4. (Preek tydens erediens in Gereformeerde Kerk Welkom-Noord op Sondag 25 Junie 2017) Prediker: Ds JL van der Schyff

Transcriptie

1 1 Preek Romeine 6:3-4 (Preek tydens erediens in Gereformeerde Kerk Welkom-Noord op Sondag 25 Junie 2017) Prediker: Ds JL van der Schyff Voor die erediens Sing: Skrifberyming 8-3 Sing: Lied 510:1,2,3,4 Sing: Lied 553 Afkondigings Stilte Erediens: Votum Groetseën Lofprysing: Psalm 33-1:2,11 Geloofsbelydenis: Twaalf Artikels Sing: Skrifberyming 12-3:1,2 Die Wet van die Here: Matteus 22:37-40 Skriflesing: Romeine 6:1-14 Bediening van die doop Sing na bediening van die doop: Lied 292:1,2 Fokus: Romeine 6:3-4 Preek: Tema: Die doop as merkteken van die nuwe jy. Gebed Diens van barmhartigheid Sing: Skrifberyming 2-4:1,3 Wegstuurseën Amen: Skrifberyming

2 2 Preek: Geliefdes in ons Here Jesus Christus Iemand wat aan Christus behoort, is n nuwe mens so staan dit in 2 Korintiërs 5:17. Die doop (wat vanoggend weer aan n verbondskindjie bedien is) is n teken en n seël van die verandering vanaf n ou mens na n nuwe mens. Dit is n merkteken van die nuwe jy, wat deur jou eenwees met Jesus Christus tot stand kom. Met die nuwe jy bedoel ek nie dat dit iets is wat jy bereik het nie. Dit is nie n kwessie van dat jy hard daarvoor gewerk het en dit toe reggekry het om n nuwe jy te word nie. Nee, God het van jou n nuwe jy gemaak. Dit is aan jou gegee, jy het dit nie self reggekry nie. Kom ons kyk na wat die doop te doen het met die verandering van n ou jy na n nuwe jy. In Romeine 6:3 staan daar: Of weet julle nie dat ons almal wat in Christus Jesus gedoop is, in sy dood gedoop is nie? Deur die doop word jy een met Jesus Christus jy word in Christus Jesus gedoop. Jy word aan Jesus Christus verbind. Jy word Syne. Jy word aan Hom gewy. Jy word aan Hom gewy om Hom te dien. Dit is ook wat in Matteus 28:19 bedoel word met die woorde doop hulle in die Naam van die Vader en die Seun en die Heilige Gees. Deur die doop word jy aan God Drie-enig verbind. Jy word verbind aan die Vader en aan die Seun en aan die Heilige Gees. Jy word as t ware gemerk as God se eiendom. Jy het n noue band met God die Vader en die Seun en die Heilige Gees. Jy word aan God Drie-enig gewy om Hom te dien. En dit onderskei jou van die ongelowiges. Terug na Romeine 6:3: Of weet julle nie dat ons almal wat in Christus Jesus gedoop is, in sy dood gedoop is nie? Jesus se dood is die straf wat Hy vir ons sondes uitgedien het. Hy is mos in ons plek gestraf en die straf wat Hy gekry het, was die dood. As jy in Jesus Christus gedoop is, is jy in sy dood gedoop, dit wil sê jy kry deel aan sy dood en so deel jy in sy straf. Jy deel in sy straf, nie in die sin dat jy self gestraf word nie, maar dat Hy in jou plek gestraf is en jy dus nie self gestraf hoef te word nie. Die ou jy was skuldig en het daarom verdien om gestraf te word. Die nuwe jy is nie meer skuldig nie, want Jesus Christus het jou straf namens jou uitgedien. So is die nuwe jy vrygespreek en hoef die nuwe jy nie meer gestraf te word nie. Die doop is n teken en n seël van hierdie verandering vanaf n skuldige jy na n onskuldige jy. Die doop is die merkteken van n nuwe jy wat nou onskuldig is. Deurdat Jesus gekruisig is, is Hy vervloek. As jy in Jesus Christus gedoop is (en so in sy dood gedoop is), deel jy in die vervloeking van sy dood. Jy deel in sy vervloeking, nie in die sin dat jy self vervloek word nie, maar dat Hy in jou plek vervloek is. Die ou jy was vol skande en daarom vervloek. Die nuwe jy is nie meer vol skande en vervloek nie, want Jesus Christus is namens jou onteer en vervloek. Die doop is n teken en n seël van hierdie verandering vanaf n onteerde jy na n eervolle jy, die verandering vanaf n

3 vervloekte jy na n geseënde jy. Die doop is die merkteken van n nuwe jy wat nou eervol is en geseënd is. 3 Jesus se dood het nie net jou sondeskuld en die vloek van die sonde weggevat nie. Dit het ook die sonde self weggevat. Volgens 1 Petrus 2:24 het Jesus Christus ons sondes in sy liggaam aan die kruis gedra. Al ons sondes is op Hom gelaai en Hy het dit weggedra. So het Hy jou bevry van die sonde as sodanig. Die ou jy was n slaaf van die sonde. Die nuwe jy is bevry van die sonde. Die nuwe jy is dood vir die sonde. Die doop is n teken en n seël van hierdie verandering vanaf n slaaf van die sonde na iemand wat vry is van die sonde. Die doop is die merkteken van n nuwe jy wat nou dood is vir die sonde. Romeine 6:4 sluit hierby aan. Daar staan: Deur die doop is ons immers saam met Hom in sy dood begrawe, sodat, soos Christus deur die wonderbaarlike magsdaad van die Vader uit die dood opgewek is, ons ook so n nuwe lewe kan lei. Deurdat ons in Jesus Christus se dood gedoop is, is ons ook saam met Hom begrawe. Jesus is begrawe om daarmee die versekering te gee dat Hy werklik gesterf het. Die feit dat ons saam met Hom begrawe is, wys dat ons werklik dood gegaan het vir die sonde. Ons is dood vir die sonde, sodat ons n nuwe lewe kan lei. Dit is wat in die tweede helfte van Romeine 6:4 gesê word: Deur die doop is ons immers saam met Hom in sy dood begrawe, sodat, soos Christus deur die wonderbaarlike magsdaad van die Vader uit die dood opgewek is, ons ook so n nuwe lewe kan lei. Ons is dood vir die sonde, sodat ons, net soos wat Christus deur die Vader uit die dood opgewek is, ook so n nuwe lewe kan lei. As jy in Christus Jesus gedoop is (en so een is met Hom), is jy ook saam met Hom opgewek. Jy het opgestaan in n nuwe lewe. Jy is lewend vir God. Die doop is n teken en n seël van hierdie verandering vanaf iemand wat dood was vir God na iemand wat nou lewend is vir God. Die doop is die merkteken van n nuwe jy wat nou lewend is vir God. Geliefdes, ek hoop dat dit vir julle duidelik is in watter opsig die doop te doen het met die verandering van n ou jy na n nuwe jy. Ek hoop dat dit vir julle duidelik is in watter opsig die doop n merkteken is van die nuwe jy. Op grond van ander gedeeltes in die Bybel sou ek by wyse van spreke ook kon sê dat die doop: Jou geboortesertifikaat van jou wedergeboorte (jou tweede geboorte) is. Jou identiteitsdokument as burger in God se koninkryk is. Jou paspoort is waarmee jy as vreemdeling in hierdie wêreld lewe. Jou trouring as bruid van die Bruidegom is. Jou brandmerk waarmee jy as God s n gemerk is. Die belangrike is dat jou status verander het. Jy het n nuwe status gekry. Jou doop is n merkteken híérvan. In die Nederlandse Geloofsbelydenis, artikel 34, word dit soos volg gesê: Deur die doop word ons in die kerk van God opgeneem en van alle ongelowiges en vreemde godsdienste afgesonder om heeltemal sy eiendom te wees en sy merkteken en vaandel te dra.

4 4 En nou, geliefdes: Waarom is dit belangrik dat jy onthou dat jou doop n merkteken is van die nuwe jy? Die antwoord op hierdie vraag is in Romeine 6:1-2. Daar staan: Wat moet ons nou hiervan sê? Moet ons aanhou sonde doen sodat die genade kan toeneem? Beslis nie. Hoe kan ons wat dood is vir die sonde nog daarin voortlewe? In die vorige hoofstukke van die boek Romeine gaan dit daaroor dat ons slegs uit genade alleen gered word. En hoe meer sonde jy het, hoe meer genade het jy nodig om gered te word. Beteken dit nou dat jy meer sonde moet doen sodat jy meer genade kan kry? Die antwoord is: Nee, beslis nie! Onthou: Jy is dood vir die sonde! Hoe kan jy, as jy dood is vir die sonde, nog daarmee aanhou? Jou doop sê vir jou: Jy is n nuwe jy! Jy is nou dood vir die sonde en lewend vir God! Dit is onmoontlik dat jy aanhou sonde doen! Dit pas net nie by wie jy is nie! As jy aanhou met die sonde, is jy ontrou aan wie jy is! Jy is ontrou aan die nuwe status wat God vir jou gegee het! Tog gebeur die onmoontlike. Tog gebeur dit dat mense wat glo, mense wat Christene is, aanhou met die sonde. Tog gebeur dit dat mense wat glo, mense wat Christene is, skynbaar glad nie omgee dat hulle aanhou met sonde nie. Dit is amper soos wat dit vir n ma onmoontlik is om haar kind te verwerp, en dit tog doen. Dit is nie dat dit onmoontlik is nie, want dit gebeur wel, so sien ons baie keer. Maar tog is dit onmoontlik vir n ware ma. En die een wat dit wel doen, is die naam ma nie werd nie. Omdat jy dood is vir die sonde en lewend vir God, moet jy leef soos iemand wat dood is vir die sonde en lewend vir God. Daarom staan daar in Romeine 6:12-14: Moet dan nie toelaat dat die sonde nog langer oor julle heerskappy voer en julle die begeertes van julle sterflike aardse bestaan laat gehoorsaam nie. Julle moet geen deel van julle liggame in diens van die sonde stel as n werktuig om goddeloosheid te bedrywe nie. Nee, stel julle in diens van God as mense wat dood was maar lewend gemaak is, en stel elke deel van julle liggame in diens van God as werktuig om te doen wat God wil. Die sonde moet nie meer baas wees oor julle nie, want julle staan nie onder die wet van Moses nie, maar onder die genade. So, wat moet jy doen? Jy moet al meer en meer ontslae raak van die ou jy. Jy moet al meer en meer soos die nuwe jy leef. Deur jou eenwees met Christus is jy reeds n nuwe jy. Jou werk is nou om al meer en meer te word soos wat jy in Christus reeds is. Soms is dit moeilik en sukkel ons om van sonde ontslae te raak. Onthou dan: God het sy Heilige Gees aan jou gegee om jou daarmee te help. Met jou doop het jy ook híérvan n teken en n seël ontvang. Wat ek bedoel, is dit: Die doop is n teken en n seël dat jy met die bloed én die Gees van Christus gewas is. Dat jy met die bloed van Christus gewas is, beteken dat jou sonde vergewe is. Dat jy met die Gees van Christus gewas is, beteken dat die Gees jou binnekant skoonwas. Jy word deur die Gees vernuwe en geheilig. Ook híérvan het jy met jou doop n teken en n seël ontvang. Met jou doop het jy n teken en n

5 seël ontvang dat die Gees jou gaan vernuwe om die nuwe jy te word wat jy in Christus reeds is. 5 Die besef en belewing van die nuwe jy is n belangrike anker vir die lewe. Wanneer jy beproewings beleef, wanneer dinge by die werk moeilik gaan, wanneer jy verontreg word of verwerp word of seerkry ervaar, wanneer ander jou sleg behandel of lelike dinge van jou sê of vir jou sê, onthou dan wie die nuwe jy is. Niks wat in hierdie wêreld gebeur of wat mense aan jou doen of van jou sê of vir jou sê, kan die nuwe jy van jou af wegneem nie. Niks kan verander aan wie jy in Christus is nie. Die besef en die belewing van die nuwe jy, is ook n belangrike hulpmiddel om mense wat verslaaf is, te help. Die stukkende wêreld waarin ons leef, bring soms vir ons groot pyn. Baie mense probeer die gat wat deur hierdie pyn veroorsaak word, vul met drank of dwelms of dobbel of wat ookal mense aan verslaaf raak. Die besef en belewing van die nuwe jy kan hierdie gat vul. Verslawing veroorsaak skaamte en die skaamte maak die gat in jou groter, met die gevolg dat jy al meer vlug na dit waaraan jy verslaaf is. So is dit n bose kringloop. Al is jou pyn hoe groot en jou hartseer hoe erg, onthou dan dat jy in Christus n nuwe jy is. Wat ek nou net gesê het, is net n deeltjie van die antwoord om iemand met verslawing te help. Daar is baie meer wat gedoen moet word met die hulp van iemand wat toegerus is om te help. Daarom, as jy vasgevang is in die greep van verslawing, gaan na iemand wat jou daarmee kan help. Al wat ek hier wou doen, is om te wys watter groot anker ons het in die besef en belewing van wie en wat jy is. In aansluiting hierby is die doop (as merkteken van die nuwe jy) n groot anker, waaraan jy kan vashou. Amen.