2 Konings 5. Tema: Wanneer genade en mag/geld/vermoë mekaar ontmoet // wanneer ek Jesus ontmoet.

Transcriptie

1 1 2 Konings 5 Tema: Wanneer genade en mag/geld/vermoë mekaar ontmoet // wanneer ek Jesus ontmoet. Ons gemeente is ons in `n interessante tyd van God se reis met ons. Ons word geskud en geskuif en dit mag dalk voel of ons bietjie rigting verloor. Maar ons weet waarvoor dit is dat God ons roep en vind nog uit. Ons voel geroepe om Jesus Christus baie relevant in ons gemeenskap uit te leef en te verkondig. Maar nou stoei ons so bietjie met getalle en met ons kerkwees, en ons wonder hoe gaan ons `n impak op ons gemeenskap maak? Gaan ons dit oorleef? Uit die WEG van God, God se storie, die Bybel, kry ons riglyne toe Hy Naäman se storie deel van syne gemaak het. Ons het hier met een van die mooiste en mees bekende verhale in die Bybel te doen. Dis `n verhaal van `n klein dogtertjie wat onthou, van `n groot held en vegter wat siek word, van `n profeet wat nie opdaag nie, van `n vuil rivier, diensknegte wat hul sout werd is, genesing, bekering, van onvoorwaardelike diens aan God. Wie was Naäman? - Oorlogsheld, hoof van die leër, eerste minister, geliefd, gesiene, ryk - `n Arameër, `n vyand van Israel en tog hoor ons dat God hom laat wen het. Dus kom sy mag en goeie naam van God. - Ongewensde buitestander: sy melaatsheid sou hom al hoe meer van mense vervreem het. Met al sy mag en geld kan hy niks aan die siekte doen nie. Dit vat `n ontvoerde Israelitiese slawemeisie in sy huis om te onthou van die profeet in Samaria, van God wat genesing kan gee. Dit is amper asof hy desperaat is, want hy gaan vra toestemming van sy koning om te kan gaan. God se werk deur Elisa was baie wyd bekend en Naäman word met `n brief en duur geskenke na Jerusalem gestuur. Want Naäman begeer om IN te wees, en rykdom kry jou in!

2 2 Die koning van Jerusalem staan en bewe na hy die brief lees: is ek God? Hy skeur sy klere, want hierdie versoek is onmoontlik, hy is nie by magte om gesond te maak en te laat lewe nie! Tog roep hy nie tot God nie, en ook nie tot God se profeet nie. Maar die profeet vra: hoekom skeur jy jou klere, weet jy nie daar is `n profeet in die land nie? Weet jy nie dat God in hierdie land is nie? Laat Naäman na my toe kom sodat hy kan weet hier is `n profeet van God in hierdie land. En so daag Naäman met perde en strydwaens en mense en geskenke en mag voor Elisa se deur op. Want kyk mag en geld kry jou in die binnekring. Maar al wat opdaag is `n boodskapper wil jy skoon wees? Gaan was jou...7 keer in die Jordaan. Die grote Naäman ruk hom op, en ry weg. Wie dink hierdie man is hy? Wie dink hy is ek? Wat se tipe God is dit wat op hierdie manier werk? En ons wonder wat nou eintlik Naäman se probleem is? Natuurlik was dit die feit dat Elisa hom nie eens persoonlik gesien het nie, nie iets dramaties gedoen het nie. Iets wat pas by die statuur van die een wat gekom het vir genesing. Maar eintlik gaan dit oor die eenvoud van die opdrag. As ek my wil bad is daar baie beter en mooier riviere in Damaskus. Enige aap kan hom in die Jordaan was?! En hy is reg, die Jordaan is nie `n besonder mooi en skoon rivier nie. Wat se tipe God sal dit so eenvoudig maak om gesond te kan word? Dinge is nooit so eenvoudig nie, vra maar jou moderne geneser by massa byeenkomste. Dit is benede Naäman, en hy ry weg. Maar dank die Here vir die eenvoudiges, die slawe en dienaars in Naäman se lewe, want hulle snap iets van die omgekeerde werkswyse van God. Wag meneer: as hy jou gevra het om iets moeiliks te doen sou u dit gedoen het.

3 3 Soos om die laaste berglelie op die hoogste bergpiek in die verste land te gaan pluk. Want dan was u waardig om gesond gemaak te word. Maar nou gaan dit hier oor iets heeltemal anders want die een wat dink dat hy waardig is, is onwaardig. Die een wat besef dat hy nie die vereistes kan nakom om gereinig te word nie, dit is die een wat waardig is. Die een wat besef dat hierdie genesing eintlik vir almal, vir die laagste, die slegste, die sondigste, die vuilste beskikbaar is, besef dat daar net Een is wat waardig is. En dit is juis hoekom almal nie die eenvoudige ding doen nie, want dit is te maklik, en daarom te moeilik. Naäman gaan was homself in die eenvoudige vuil Jordaan, en dan gebeur dit: wêreldse mag, rykdom en waardigheid ontmoet Goddelike genade. Naäman se hele lewe word omgedraai, en die bewys is aan sy vel: sy vel was soos die van `n klein seuntjie. Hy is in werklikheid weergebore, en rein, nie omdat hy waardig was nie, maar juis omdat hy bewus was van sy onwaardigheid. Hy loop hom in die genade van God vas. Hierdie keer kom hy anders voor Elisa se deur, en Elisa is daar om die nuwe, rein, nederige en waardig gemaakte Naäman te ontmoet. Hierdie keer is daar nie sprake van bravade en rykdom nie, net getuienis. Daar is geen God op die hele aarde nie behalwe in Israel. Daar is net Een. Hierdie keer bring hy nie bewyse van sy waardigheid nie, maar hy bring geskenke van dankbaarheid vir genade. Maar Elisa is nie van plan om enige fokus van God se onverstaanbare genade weg te vat nie. Nee, nee, ek vat niks, want God leef! En dan maak Naäman `n ander plan, hy wil dank, so hy gaan grond saamvat, en hierdie God in sy land dien, want daar is net een! So dien Naäman vir God met sy mag, gesag, aansien en rykdom, want hy wat `n heidense buitelander is, getuig teen die Israeliete dat daar net een God is. Hulle wat begin het om allerhande afgode te aanbid sodat hulle IN kon wees by die ander volke rondom hulle. Juis nou, is Naäman IN, want God se genade trek jou in.

4 4 Selfs in sy omstandighede waar hy as hoof raadgewer vir die koning van Aram, in die tempel van Rimmon sal moet ingaan, sal hy nie `n ander god dien nie, en hoop hy op God se vergifnis. Dit is `n ander man wat terug gegaan het na die huis in Damaskus. Hy het gegaan as een wat uiterlik lei aan melaatsheid, maar sy innerlike melaatsheid is ook genees. `n Jong slawemeisie se geloof sou versterk wees in die omkeer wat daar by haar eienaar gekom het. En sy wat `n buitestander in sy huishouding was, sou nou iemand in die binnekring wees, die binnekring van God se genade. Wanneer die aardse fokus op rykdom, sukses en goeters in die genade van God vasloop, kom daar omkeer. Dis `n nuwe avontuur. In ons tyd waar almal graag IN wil wees, is hierdie so `n belangrike deel van God se verhaal, sy storie. Waarom is daar al hierdie korrupsie en magspel? Dit is om IN te wees. Maar vertrou jy God se storie? Hoe kom Jesus na die aarde? Hy kom as niks, Hy word die buitestander. Hy kom nie met bewyse van mag, gesag, rykdom en geskenke nie. Hy word laer as `n slaaf, Hy word soos een van ons, niks. Omkoop geskenke wou Hy nie hê nie, en het Hy ook nie gegee nie. Maar oor hoe jy werklik rein kan word, daaroor het Hy nooit ophou praat nie. Genade het in en deur Jesus Christus die aardse rykdom, mag, gesag en kamstige waardigheid van mense ontmoet. Hy het dit gekonfronteer soos in Lukas 4: toe Hy verwys het na Elisa wat baie weduwees kon help, maar die buitelandse weduwee gehelp het, en wat baie melaatses gesond kon maak, maar juis vir Naäman gesond gemaak het. Vir die Fariseërs sê Hy dat hulle nie in is nie, want hulle verstaan nie God se genade nie. So word Hy al meer bevestig as een wat `n buitestander is. Wie dink Hy is Hy? Hy erken nie ons waardigheid nie! Hy hou Hom op met gewone mense, sondaars, straatvroue, tollenaars.

5 5 Wat se tipe God hou Hy voor, wat so maklik genees, wat so maklik sondes vergewe, wat so maklik rein verklaar? Op die ou einde sterf Jesus as `n buitestander sodat elkeen wat waarlik in Hom glo, nooit weer buite sou wees nie, maar regtig IN. Hy IN my, en ek IN Hom. Deur Hom word elkeen wat glo deel van die enigste binnekring wat saak maak. Die Heilige Gees kom woon in elkeen wat oorgee aan sy genade. Hoe sal ons dan gehoorsaam die evangelie verkondig in Windhoek en elders? Nie omdat ons `n waardige sterk, ryk, magtige gemeente is nie, maar omdat ons in die genade van God vasgeloop het. Omdat daar geen ander manier is om voort te gaan as dat ons oorgee aan sy eenvoudige, maar duur reiniging nie. Ons moet altyd vertel dat net dié skoon kan word wat weet dat hulle nie waardig is nie. Ons het nie hopies grond van die heilige land nodig nie, ons het nie `n heilige gebou nodig nie. Ons het nie goeie werke en onderhouding van die wet nodig om rein en reg/waardig voor God te wees nie. God se genade deur Jesus is genoeg. Genoeg om ons lewens, ons uitkyk op ons goeters om te draai. So sê God ook deur sy profeet Sagaria in die profeet se boek, hoofstuk 4 as Hy vir Serubbabel sê hoe die toekoms sal lyk en hoe hy moet regeer. Vers 6 nie met mag en krag sal jy slaag nie, maar deur my Gees, sê die Here die Almagtige. En dan so mooi in vers 10: Moenie die dag van klein dingetjies gering ag nie. Geliefdes, ons moet nederig die Here vertrou. Vertrou die afwassing van sondes deur Jesus se dood. Kom ons dien daarom die Here met al die res waarmee Hy ons geseën het, ons geld, gesag, posisie, want dit is in elk geval syne, en sy genade is vir ons genoeg. Genees ons geestelike melaatsheid Here, ons wil net by U IN wees.

6 6