De Sjter 1 baekert door; Seniorenteams ongervinje veul hinjer van 11-11; Steef en Joy blinken oet; Sjtandjbeeld veur Noud Claessens? Ut woar un weekend wo veuraaf weinig hoapvolle verwachtingen euver woare. Tenminste, es ut geit om ut voetballende gedeilte. Want es de 11 e van de 11 e vilt op zoaterdig, dan wurt ut veur de meeste seniorenvoetballers aafzeen op zondig. En getuge de oetsjlage van dit weekend vieren Sjteindenaere de sjtart van ut vasteloavessezoen nét get sjteviger dan de res van Limburg. Angesj zeen de nederlagen van os tweede elftal (5-0 taege Venlosche Boys), os veerde elftal (3-4 taege Urmondia 3) en ozze dames (7-5 taege Armada) neit te verkloare. Gelukkig pakte ut driede waal nog un puntje via un 4-4 gelieksjpel taege Slekker Boys 2. Euverwinningen woare d r allein veur os eesjte elftal (2-4 baekerwinst taege Roosteren) en de veteranen (1-6 winst taege Sjpaubaek). Boete ut veldj woare os seniorenteams gelukkig un sjtuk succesvoller. Doadoor kent geer in dit versjlaag sjmulle van un goud initiatief van Wesly Wanten, Rene Gooren dae indruk maak op de selectie onger de douche welteversjtoan. En auch euver Tom de Keul dae op gouwekoupe wieze aan fruit veur de sjooltesj van de kinjer kump, en euver de reje dat Ruud Paulissen waal vorm haet, maar nog neit in vorm is. De onvermijdelijke Marco Vaassen duuk auch waer op versjillende maneiere op in dit versjlaag. Wiejer sjieke foto s van ozze dames tiedes de 11 e van de 11 e en tiedes ut kotse in de sjtruke unne daag later. Unne oproup veur un sjtandjbeeld veur Noud Claessens en de eesjte transgender bie os clubke kump oet de kas. Loate veer dus maar sjnel beginne. En dat doon veer dees waek bie ozze dames. Die houwe op zondig unne wedsjtried taege Armada op ut programma sjtoan, maar veul belangrieker woar dat ze van de 11 e van de 11 e unne teambuilding-daag maakten. Gerard Martens trapte dae daag aaf door unne sjtevige boam veur de dames kloar te maken in de keuken:
Ut doerde natuurlijk neit lang veurdat die foto de groepsapp van de veteranen bereikte. De reacties waore aeve talriek es veursjpelbaar, temeer omdat Gerard zich houw aafgemeld veur ut voetballe van de vets: Die letste opmerking van Jack Dassen sjprook man van de wereld Steef van de Woude aan. Dae noom ut dan auch geliek op veur Gerard: Maar goud, veer woare gebleve bie de teambuilding-activiteit van ozze dames. Dae leverde heel get sjieke foto s op, die ich uch absoluut neit wul onthaute:
Noa dees perfecte teambuildingactiviteit verzamelden de dames zich in alle vruigte (kwart veur 9 vertrekke!) op de parkeerplaatsj van t Hetjen om richting Grevenbicht aaf te reizen. De haerwaeg en de warming up woare veur sommige feestbeesten al un hele opgave. Mit name Bo Knoops houw t d r lestig mit. De mam van Dyonne woar zo leif om Bo un breudje te komme brenge om heure maag get rustig te kriege. Dat bleek echter neit erg succesvol, zo wie bliek oet dees gelekte (en om ut risico op represailles te verkleinen) geanonimiseerde foto:
De wedsjtried begoosj en ozze dames woare de baetere ploug en kregen auch de meeste kansen. Allein woorte die allemoal gemis. Ut waer woar sjlech, ut veldj woar niks en leek waal op un sjaatsbaan. Armada bleek doa minder las van te hubbe want die krege veur rus 3 kansen en die vloge allemoal d r in. Ozze ladies knokten zich echter nog veur ut rustsignaal terugk tot 3-2 via goals van Cindy Nel en Joy. Armada prikte d r auch nog eine bie en zo ginge beide plouge mit unne 4-2 sjtandj rusten. In ut kleidlokaal goven de Sjter trainers unne peptalk en de dames krege waer de mood terugk. Frisj (veur zover dat muigelijk woar) begoosj men waer aan de tweede helft en de wedsjtried ging geliek op. Helaas houwe die van Beech ut vizier waal op sjerp sjtoan en dus sjting ut al sjnel waer 6-2. Intusje woar Dyonne aan ut sjeije dat ze de bal nurges kwiet koosj omdat d r nemes veurin sjting. Dae koom echter doordat Bo euver de railing haer hing om de karma van de 11 e van de 11 e te verwirke. D r kome nog un paar kenskes veur ozze ladies en Armada zakte bienoa door de hoeven. Want via treffers van Cindy, Joy en Siri woort de achtersjtandj verkleind tot 6-5. Vlak veur ut eindsignaal scoorde Armada de bevrijdende 7-5 en woar ut gedoan. De ladies woare opgelucht dat de wedsjtried achter de rugk woar. Volgende waek get frisjer aan de sjtart sjtoan en dan knallen! Mit hoapelijk opnuuj Joy in topvorm, sjus wie taege Armada. Succes!
Van ozze dames goan veer doa noa de mannen van De Sjter 4. Die houwe unne thoeswedsjtried taege Urmondia 3 op ut programma sjtoan. En speciaal veur deze derby houw men versjterking gekrege van unne nuuje sjpeler, aafkomstig van Havantia. Hae moch in de basis sjtarten es linksback en maakte unne verdeinstelijke indruk. Ralph Doek: Jup the Butcher moosj nog get wenne aan de kleuren en reep af en toe kom op Maes! maar veur de res hoalde hae un dikke voldoende. Noud Claessen fungeert al bienoa ut ganse sezoen es gelaegenheidskeeper van ut veerde en deit dat euver ut algemein vrie goud. Aafgeloupe zondig houw hae echter get las van de 11 e van de 11 e, constateerden zien ploeggenoten. De eesjte helf woar ut veldsjpel neit geweldig, maar ech dramatisch woar ut noa auch waer neit. Desondanks keek men bie de rust taege unne 0-2 achtersjtandj aan. Noa de rust woort d r un sjupke boavenop gedoan en scoorde Abby al sjnel de aansjleitingstreffer. Kickbokser Ricky Kostons woar doanoa effe de focus kwiet en Urmondia koosj oetloupe noa 1-4. In unne alles of niks poging kome os jonges nog terugk tot 3-4 door goals van Abby en Jenki maar de wedsjtried doerde helaas 5 minute te kort. Prima geknokt maar helaas net te min veur un puntje. Reporter Ralph Doek sjloot volkomme terech aaf mit un dikke pluim veur Noud Claessens, un sjtukske humor en unne oproup aan de res van de vereiniging: Van ut veerde goan veer door noa ut driede. De mannen van Rene Gooren houwe ut doordewaeks lekker druk mit ut deile van leuke berichten en foto s op de app. Zo woort Marco Vaassen op un flauwe maneier getagd op facebook, leet Ruud Paulissen zeen dat hae in vorm (rondj) is, en woort Chris Boselie op de foto vasgelag terwiel hae net op heiterdaad betrap woar terwiel hae porno aan ut kieke woar:
Wiejer woar d r get twiefel of de mannen van 3 auch de 11 e van de 11 e deige vieren. Marco Vaassen noom dae twiefel op zoaterdigmiddig geliek weg door mit ziene kop op L1 te versjiene: Auch sjpeler/coach/topscorer Rene Gooren vierde op zoaterdig de 11 e van de 11 e, maar neit veurdat hae op vriedig eesj nog mit ut tweede houw mitgetraind. Wat unne topper is dae Rene toch. De ganse selectie woar dan auch noa de training van m onger de indruk. Al leet Randy Wanten weite dat dat neit mit zien voetbalkwaliteiten te make houw:
De mannen van 3 moosjten ut opnumme taege hekkesjleiter Slekker Boys 2. Men houw echter de pech dat ut eesjte elftal van de Sjlek neit houfde te voetballe, wodoor men in de praktijk taege un zjwoar versjterk 2 e elftal aan ut sjpele woar. De sjeidsrechter van deins noom zien taak erg serieus en ongerworp beide teams aan ut zeer sjtrenge peskes-controle, wodoor pas un kwarteier te laat aafgetrap koosj waere. Opvallende versjiening aan De Sjter-kantj woar Ralph Janssen dae zich de heisje houw aangetrokke, ondanks dat ut 8 graden woar en ut zunke sjeen. Ralph woort dan auch geliek omgeduip tot weike door zien ploeggenoten. Wiejer woort d r veur de wedsjtried nog get noagekald euver de 11 e van de 11 e, wo diverse sjpelers zich houwe sjuldig gemaak aan #Metoo-achtige praktijken, die ongetwiefeld euver un joar of 20 esnog opduke es ein van die sjlumme ut gesjup haet tot wethouwer van Sjtein. De sjtart van de wedsjtried woar weinig euvertugend van beide plouge. Jederein moosj bliekbaar nog effe wakker waere. Ut woar echter waal dudelijk dat bie De Sjlek neit de puntloze ploug van de veurgoande wedsjtrieje op de wei sjting. Want via twee sjnelle aanvallen koom die ploug op 2-0. Gelukkig sjting d r op dat moment unne ware veldheer op bie ozze mannen. Althans, dat bewaert un volkomme neutrale bron:
Noa de rust begoosjten de mannen van 3 ech goud te voetballe en de kansen kome dan auch. Maikel Melis wirkde hel in de sjpits en won zien duels. Op de vleugels woar d r veul sjnelheid mit weike Ralph en supersjeng Verhoeven. En de ruumtes op ut middenveldj woorte benut om lekker te voetballe. En koom de Sjlek d r dan toch ens oet dan sjting de verdediging auch goud, onger leiding van Lars Poulissen. De verdeinde 2-2 koom op naam van Marco Verhoeven, dae de rebound van unne eerder geblokte sjeut tot goal promoveerde. Neit lang doanoa woort daezelfde Marco weggesjtuurd aan de rechterkantj en woort hel ongeroet gehoald door de keeper van Sjlek. Unne terechte pingel woort benut door Rene: 3-2. En ut woort nog sjoner wie Mike Schippers mit de kop de 4-2 scoorde. Helaas bekroop de ploug doanoa ut gevuil dat de buit al binne woar. Jederein wol scoren en d r woort neit meer omgesjakeld. Sjlek profiteerde hie optimaal van door 2x te scoren. Marco en Rene troffen nog unne keer de poal en Sjlek kreeg de letste enorme kans, maar gelukkig houw Sjter-goalie Pascal Driessen doa op un prima redding in hoes. Oeteindelijk moosj men genoegen numme mit un gelieksjpel en de wieze les dat ut zunj is om unne veursjprong weg te gaeve door euvermoed. Kommende waek sjteit veur de mannen van 3 de wedsjtried van ut joar op ut programma, taege Sjtein-Zuid! Kom op mannen, de metse sjliepe en gaas gaeve! Succes! Dan door noa os tweede elftal. Dat houw in de aanloup noa ut weekend al un prima initiatief gedoan door un leuk toernooi te organiseren in de kantine:
Super initiatief mannen. En ich zou zegke: lekker mitdoon allemoal. Want 6 euro insjriefgeldj is niks esse doaveur auch nog ens un optraeje krigs van DJ s Völler en Rijkaard! Voetballend ging ut de mannen van 2 get minder goud aaf. Men moosj oet sjpele taege Venlosche Boys en koosj mit un 5-0 pak op de brouk terugk noa Sjtein reizen. Jari Knoops woar kort in zien analyse: Ondanks de nederlaag bleven de jonges van 2 waal, bie terugkkeer in Sjtein, nog unne tied in de kantine biejein zitte wo men loesterde noa ut radio versjlaag van de baekerwedsjtried van ut eesjte (mit name aandacht veur ut knappe gezich van Jari): In die kantine bleef Tom Keulen euveriges es letste zitten. Neit zozeer omdat hae dat noe zo gezellig vonj, maar waal omdat hae wis dat hae dan de euverbliefselen van de gezonje kantine mit noa hoes koosj numme. En dat kump toch ummer van pas veur in de sjooltesj van de kinjer:
Os eesjte elftal dan. Dat moosj, zo wie al gezag, veur de baeker voetballe in Roosteren. Verzurger Wesly Wanten houw un prima idee. Hae organiseerde veuraafgoand aan de wedsjtried unne lunch (of veur de meesten: ontbijt) in de serre: Ech grote klasse, Wes!
Noa dae lekkere lunch vertrok de selectie noa Roosteren. Elftalleider Frans Beaujean zoot bie Davy in de auto en zoot 20 minute langk taege ziene sjtool geplek door de hoge sjnelheid. Terwiel de sjpelers zich ginge omkleije, trok ut besjtuur en de begeleiding richting besjtuurskamer veur un tas koffie. De besjtuurskamer zoot echter propvol mit besjtuurders van Roosteren dus maar door noa de kantine wo de gasten veur eige raekening get te drinke koosjten besjtelle. Frans Beaujean sjprook veurzitter Raymond aan: Om te voetballe hubse toch twee partieje neudig, of neit Raymond? Sjtelletje hoale baere hie! De warming up woort aafgewirk onger un sjtevige raegebuuj. Lekker voetbalwaer dus en auch un heerlijke graasmat en un lekker groot veldj. Ut ganse complex oajemde voetbalsfeer oet. Lekker dus! Veur De Sjter woar dit unne belangrieke pot om waer in un positieve flow te komme. Coach Maas moosj ut doon zonger de geblesseerden Randy en Giel en sjtuurde zien ploug in de volgende opsjtelling de wei in: Kis: Geoffrey Achter: Timo, Davy, Guido en Roel Midden: Mike, Stan en Thijs Veur: Hassan, Marko en Maarten Bank: Randy Walraven, Bob, Sjoerd Ozze mannen sjpeelden verzurg voetbal en woare (zo wie t auch heurt es 2 e klasser taege unne 4 e klasser) de sjerkere ploug. Un aantal mooie combinaties woare te zeen en veurin woar d r prima loupwerk. De keeper van Roosteren koosj aanvankelijk echter mit get kunsten vleigwerk de ietwat te sjerpe veurzette van De Sjter redden. Oeteindelijk woar ut dan toch De Sjter dat de score oapende. Davy kupte unne corner van Stan snoeihel in de krusing veur de 0-1! Roosteren houw un paar leuke voetballers en de ganse ploug voch wie leeuwen. Un onoplettendheid bie unne ingooi veur Roosteren leidde noa un hauf oer de 1-1 in. De Sjter pakte de droad waer op maar koosj veur de rust ut net neit meer vinje. Roosteren coach Boes maakte zichzelf veur de rust euveriges nog onsjterfelijk belachelijk door noa un foutje aan De Sjter kantj te roupe: Zien jullie wel jonges, ze kunnen er helemaal niks van. Kom op! Kiek dien ploug aanmoedigen en op sjerp zette is ein dingk maar un bietje oog veur de realiteit is auch neit verkeerd Noa de rust pakten de gael/zjwarten de droag waer prima op. Stan woar fel op ut middenveldj, Davy heerste achterin en Thijs en Hassan houwe in aanvallend opzicht de sjwung gevonje. Ut sjpelbeeld woort nog ut beste geïllustreerd door de beide grensrechters. Want terwiel de grens van Roosteren ut druk houw mit ut binnehoale van vleigtuge, houw Marco Vaassen alle tied veur :
De Sjter besjliste de wedsjtried doordat Hassan en Maarten binnen 2 minuten de 1-2 en 1-3 scoorden. Coach Boes van Roosteren leet zich vervolges nog twee keer van ziene beste kantj zeen. Eesj wie ziene sjpeler un domme euvertreding maakte en doaveur terech de 2 e gael kaart kreeg ( Moet de hoger geklasseerde ploeg per se winnen, scheids? ) en doanoa wie De Sjter unne penalty claimde noa unne dikke handbal ( Als jullie zo moeten winnen! ). Maar goud, coach Maas bleef wie ummer rustig en leet ziene opponent blèren. Maarten tilde de score nog noa 1-4, wonoa Roosteren de eindsjtandj op 2-4 bepaalde. Un terechte euverwinning, wobie ut sjpel d r prima oetzoog. Lekker om waer get positiviteit te tanken. Auch al gebeurde dat taege unne twee klassen leger acterende taegesjtenjer. Kommend weekend lekker dae lien doortrekke taege Sjarn, jonges! En dan rest os nog ein ploug te besjpraeke en dat zeen ozze veteranen. Die houwe unne oetwedsjtried taege Sjpaubaek op ut programma sjtoan op zoaterdigoavend. En mit in Sjtein un groot 11 e van de 11 e feest moosj men dat doon zonger un gans peloton sjterkhouwers, zo wie Gerard Martens, Roger Daemen en Will Leurs. En auch Rudy Crutzen ontbrook omdat hae in zien Voelender vasteloavesflyers in de breivebusse moosj duuje Gelukkig sjakelde Willem Thewissen sjnel en wis hae un tweetal versjterkinge vas te legke veur de wedsjtried. Op de eesjte plaatsj hoofdtrainer Jean Maas, dae ziene tweede wedsjtried veur de Sjter-vets ging sjpele. En doanaeve deig Willem mysterieus euver de keeper dae hae geregeld houw:
Veul sjpelers waagden un poging: Oeteindelijk woar ut Roger Daemen dae goud roajde dat Paul Janssen de goal zou verdedigen. En wat nog sjieker woar: Stefan Janssen maakte noa lang blessureleed ziene rentree. Al moanjelangk veurheugde hae zich op ziene terugkkeer. Eindelijk waer voetballe! En dan auch nog ens de zekerheid dat hae dat neit houfde te doon mit de inmiddels gesjtopte Math Caanen veur zich En wat sjetste Stefans verbazing: Math Caanen koom toevallig in Sjpaubaek waer ens un kiekske numme en deilde en passant mit dae hae waarsjienlijk waer ging voetballe bie de vets. Euver dat veuroetzicht woar Stefan minder enthousiast, gezeen zien reactie dees waek op de app, wie d r waer ens krapte woar bie de vets:
Aangekomme in Sjpaubaek wanjelden de veteranen de kantine in. Doa zoot unne sjpeler van Sjpaubaek dae Eddy Ubbink aansjprook en get bezurgdheid uitte euver ut doorgoan van de wedsjtried. Eddy reageerde pragmatisch. Sjpeler Sjpaubaek: D r is nog weinig van os hie. Vroag mich aaf of veer genog man hubbe. Eddy: Ach, veer kenne auch bes taege 10 man voetballe. Is veur os auch gein probleem. Noadat jederein zich get gedronke houw, toog men noa ut kleidlokaal. De coaches Leon Fredrix, Willy Worms en Willem Thewissen houwe de opsjtelling bliekbaar al kloar en ginge geliek mit ut kleidlokaal in. Willem: Normaal blieve de leiders in de kantine, maar veer zeen noe bang dat geer Jean (Maas) goat pesten. Willem: Ich zei trouwes net taege eine van Sjpaubaek: wie veer veurig joar hie taege uch voetbalden, sjting bie os eine in de goal dae mich de vrouw haet aafgepak en bie uch voetbalde auch eine mit dae mich ooit ut maedje haet aafgepak. Ron: Es veer die allemoal motte wegjage, dan haute veer geine meer euver, Willem. De eesjte helf verleep get sjtroef aan de kantj van De Sjter. Sjpaubaek koom weliswoar maar eine keer aan de goal, maar ut scoren leep veur de Sjteindenaere auch neit zo soepel. Allein gelegenheids-rechsboete Denny Vorstermans houw ut vizier op sjerp sjtoan en scoorde twee keer. Mit unne 0-2 veursjprong op zak ginge ozze vets rusten. Doa vertelde Willem nog un sjmakelijke quote van Ron Marchal (die hae in de eesjte helf op de bank houw gemaak) noa: Willem: Ron zaet net: die vrouwluuj zeen noe allemoal mit Gerard op sjtap. Es veer sjtraks op ut Wilhelminaplein aankomme, dan zeen die m zo sjpuugzat dat ze os sjpontaan mit de blote musj in t gezich sjpringe. Un oetsjproak die zo op n tegelke kent. Klasse Ron! In de rust woort ut tied veur un invalbeurt van onger angere Steef van de Woude. Dae woar getergd want hae houw de aafgeloupe waeke get te vaak motte aanheure dat hae zich veural neit sjuldig moosj vuile es hae zich waer ens aafmeldde veur unne wedsjtried. Plek d r nog un paar waeke aan vas, woar dan meestal de teneur. Of zo wie de sjriever van dit sjtuk ut verwoordde op de groepsapp, noa waer un aafmelding van Steef:
Dae Steef moosj dus invallen zoaterdig. Veur de wedsjtried woar al dudelijk dat de toch al dunbezatte verdediging sjlechs ein helf un beroep koosj doon op Piele. Aangezeen Mat Cremers, Gerard Martens en Robbie van der Linden ontbroke, woort veurgesjteld om Steef noa de rust op te sjtelle es letste man. Dae woar doa dudelijk neit van gedeind: Leon: Steef, doe un helfke letste man? Steef: Sjei oet, maaaaan. Dan gebroekse maar 50% van mien kwaliteiten. Geweun op ut middenveld! En dus verhoesde de sjriever van dit sjtuk noa de rust noa de verdediging en ging Steef lien brenge in ut sjpel van de vets. En dat deig hae op grandioze wieze. Eesj woar ut Steef zelf dae unne penantie opeiste en dem ieskoud binneknalde veur de 3-0. Doanoa scoorden Stef (oet unne superveurzet van Ron) en Jean (sjieke combinatie mit Stef) de 4-0 en 5-0 wonoa Steef un vette handjteikening onger de wedsjtried zat door un ein-twee mit Stef aaf te ronje mit unne stift euver de keeper veur de 6-0. Steef sjtroalde noa aafloup van zien gala-veursjtelling. Mit unne smile van oor tot oor woar hae zich de kleijer aan ut oetdoon, wie hae waer mit beide bein terugk op aarde woort gezat.
Willem: Steef, doe hubs de bein van unne voetballer en ut lichaam van unne sumoworstelaer. Ron: Ut is maar goud dasse un tuike in de brook hubs, dan hubse tenminste maar 1 boekrol. Steef: Jonges sjei oet, ich hub ut lichaam van Franz Beckenbauer! Noa aafloup woort d r in de kantine van Sjpaubaek nog lekker get gedronke op de 6-1 euverwinning. 6-1 joa. Vergoot ich bienoa te zegke dat Sjpaubaek auch nog scoorde in de letste seconde. Keeper Paul Janssen koosj doa echter totaal niks aan doon Wie die van Sjpaubaek geldj kome ophoale veur te dobbele, maakte Willem taege Jean Maas zien waekelijkse opmerking (die ich leuk blief vinje): Ich verrek es die doa niks aan euverhaute. Willem vertelde nog taege auwt prof Jean dat auch unne angere auwt prof, Wim Koevermans, nog ens bie de vets haet mitgedoan. Wie ut bekende verhoal woar gedeild wo in Ron Marchal un vol kleidlokaal vertelde dat hae get te hel tekeer woar gegange de oavend doaveur en es bewies ziene pum aan jederein (inclusief Koev) koom loate zeen, vroog men zich nog aaf wo Wim Koevermans op vandaag oethingk. De sjriever van dit sjtuk maakte doa op un verwiezing noa ut plan van Math Caanen om unne moandj in Thailand te euverwinjtere. Jean: Volges mich traint Koevermans noe Indonesie onger 21 of zoget. Rob: De Caan deit de kommende moandj de onger 21 in Thailand. Noa waer unne gesjlaagde oavend woort vervolges waer koers gezat noa Sjtein. Maar neit veurdat in de kantine van Sjpaubaek auch nog ens ut verhoal woar verteld euver de eerdere keepers-ervaringen van Paul Janssen. En dat verhoal kent prima deins doon es aafsjleiter van dees waek. Paul Janssen woar in zien jonge joare unne verdeinstelijke keeper. Mit name in de zaal deig hae dat ech prima. Op ut veldj, wo de goale net get groter zeen, ging m dat noa verloup van tied get minder aaf. Desondanks keepte Paul veurhaer menig wedsjtriedje bie de veteranen. En oet dae tied sjtamp dit legendarische verhoal. Ut is december en ut is ieskoud in Sjtein. De veteranen hubbe gevoetbald en ut woar noa aafloup waer gezellig in de kantine. De meeste vets woare versjtenjig gewaes en op de fits gekomme. Leon Fredrix en Willem Thewissen vonje ut op enig moment genog gewaes en sjtapten op de fits noa hoes. Sjnel ging t neit. Ze verrekten van de kou, moosjten door de sjnee ploegen en dan veel Leon auch nog ens jedere 200 maeter van ziene fits aaf van zatigheid. Bienoa aangekomme bie ut hoes van Willem, veel Leon opnuuj. Dit keer belanjde hae langk oet mit zien gezich in de sjnee. Willem houw ut koud en woar ut zat om Leon keer op keer waer op ziene fits te takele. En dus dach Willem: Loat m maar effe ligke. Ich fits nog 50 maeter noa hoes, bel doa Corry (de vrouw van Leon) en dan loup ich terug totdat Corry d r is om m op te hoale.
Vermuijd sjtapte Willem van de fits aaf, sjleipte zich noa binne, woort euvervalle door de wermte in hoes en veel op de bank in sjloap. Intusje woar auch Paul Janssen oet de kantine vertrokke, op de fits op waeg noa hoes. Ongerwaeg zoog hae van wiet aaf get in de sjnee ligke. Wie r korter bie koom, zoog hae dat ut unne man woar, dae langkoet in de sjnee loog. Verrek, doa lig kunne dooie, dach Paul. Hae sjprong van de fits aaf, dreijde ut lichaam om en zoog tot ziene sjrik dat ut Leon woar. Paul begoosj Leon in ut gezich te kloppen en aan m te rammele. En toen ontsjpon zich de sjoonste dialoog aller tieje. Paul: Leon! Leon, waer wakker! Leon, geit t? Leon knipperde mit de auge, en moosj effe winne aan ut leich van de sjtroatlantaern. Paul: Leon, gelukkig. Geit t waal? Besse bie? Leon, witse nog wae ich ben? Leon sjtamelde: Doe. Paul: Ja Leon? Leon: Doe bes de allersjlechste keeper wo ich ooit mit gevoetbald hub. Pes volgende waek! Rob Sjulpe