De Sjter 1 versjpeelt winst taege GSV 28; De Sjter 3 pak eesjte punt; Willem Thewissen sjpeelt zich in de kieker bie hoofdtrainer Czornyj Ozze seniorenteams blieve maar successen boeken dit sezoen. Auch dees waek trapten de veteranen un succesvol weekend aaf mit un 1-4 euverwinning bie t sjterker geachte VV Lanaken. Op zondig gove de dames dat n goud gevolg mit un aafgeteikende 5-1 euverwinning taege Sjummert. Doanoa hoalde of 2 e elftal oet taege un teental (en noa 20 minute un achttal) sjpelers van Limburgia 2. De teller sjtopte bie 17-0 en toen vonj de sjeids ut noa 75 minute voetballe waal genog gewaes. Os eesjte elftal versjpeelde helaas unne 2-0 veursjprong in de derby taege GSV, maar heel toch un punt euver aan die partie. De oet sjpelende plouge houwe wisselend succes. De mannen van 5 moosjte ut helaas nipt aaflegke in Oirsbaek taege nuujbakken fusieclub Alfa Sport. En ut driede tot sjlot koom oet in Buchten oet verloare positie terugk en behoalde un glorieus punt taege opponent HBC. Ut eesjte punt veur de beesten van 3. Dat d r nog maar voale moage volgen. En loate veer dit versjlaag dan auch maar geliek beginne bie dat eesjte winstpunt van De Sjter 3. Coach Gooren sjtuurde noa aafloup un zeer oetgebreid versjlaag van dees noe al legendarische partie. Rene begoosj zien versjlaag mit n opmerking wo sjoolmeister Jo van Funs ongetwiefeld de boks van aafzak. De mannen van 3 sjtinge veur aanvang van de wedsjtried op 0 punten. Taegesjtenjer HBC houw tot noe toe 3 punten verzameld. Aanleiding veur Rene om n dubieuze raekensom te make: De veurteikene veur de wedsjtried woare neit geweldig. Om veier oer sjnachs kome d r nog twee aafmeldinge binne bie Rene. Dat zeen de aafmeldinge wo se es coach natuurlijk ummer lekker vrolijk van wurs esse zondigmurge wakker wurs en noa dien tillefoon kiks. Gelukkig lete de euvergebleve gladiatoren zich doadoor neit ontmoedigen. De beesten van drie lete geliek zeen dat ze fysiek aanwezige woare. De duels woorte sjtevig ingegange en auch enkele 95+kilo sjpelers van HBC houwe de sjrik al sjnel te pakke. Dat fysieke sjpel leidde tot unne foutieve pass bie HBC achterin. Mick Creemers pikte de bal op en sjpeelde Thijs Kemp aan, dae ut driede veur ut eesjt dit sezoen op veursjprong zat: 0-1!
Net wie veurige waek kreeg sjpeler-coach Gooren un gael kaart. Dit keer neit vanwaege moele maar vanwaege un professionele euvertreding om unne counter d r oet te hoale aldus Rene zelf. Wederhoor bie Mick Creemers leverde un angere visie op: die sjlak woar geweun waer te laat. Un gael kaart beteikent 10 minute d r oet. De sjeids houw zien horloge echter kapot en leet Rene pas waer terugkkere wie HBC in de 12 e sjtroaf-minuut van Rene de 1-1 aanteikende. Un dubieuze besjlissing vlak veur rus woort Maikel Melis te veul en hae pakte un gael kaart veur moele. HBC profiteerde doa vlak noa rus van door twee kere te scoren, wobie aan ein goal toch un dudelijke euvertreding veuraaf ging. Kortom genog rejene om de moud in de sjoon te loate zinke en maar te acceptere dat un goud resultaat oet zicht woar. Maar dan kent geer ozze beesten van 3 neit. Die zatte noa de rentree van Maikel flink aan en al sjnel scoorde gelegenheidssjpits Thijs Kemp de 3-2 oet unne goeie veurzet van Martijn. De Sjter 3 bleef aandringen, maar kreeg via unne counter de 4-2 om de oren. Maar opnuuj woort de rugk gerech. Men ging 1 op 1 sjpele en de lange bal hanteren. Dat brach de verdediging van HBC zo in verlaegenheid dat ze opnuuj de bal rech in de vuit van Mick Creemers sjpeelden. Dae bleef rustig en scoorde de 4-3. En un paar minute veur tied woort ut nog sjoner want opnuuj Thijs Kemp kupte unne prachtige veurzet binne veur de 4-4. Un dik verdeind punt woort zo behoald door De Sjter 3. Mit de driemoal scorende Thijs Kemp én keeper Brian Nitsch (dae un wereldredding verrichtte door al hangend in de loch nog te reagere op unne bal dae vlak veur m van richting woort verangerd) es absolute oetblinkers. Klasse mannen. Al mot aan dat punt auch waer neit zo heel voal waarde waere gehech, aangezeen de bewegwiezering op ut sjportcomplex in Buchten leek te insinueren dat men taege de plaatsjelijke sjutterie houw gesjpeeld: Desondanks grote klasse mannen! En noe op noa de eesjte driepunter!
Van ut driede goan veer noa de mannen van 2. Die houwe doordewaeks te make mit problemen veur hunne aanvalsleider Marko Jevric. Marko woar op t Hetjen un aardige som geldj kwietgeraak. Neit aan de drank, maar geweun ech letterlijk kwietgeraak. Jeugdsjpeler Ian Thewissen (de zoon ván) houw dat geldj gevonje en woar zo eerlijk gewaes om t aan Jo van Funs aaf te gaeve. Dae koosj noa aafloup van de vriedigtraining Marko gelukkig make mit zien gevonje cente. Willem Thewissen vertelde zoaterdigmiddig dat Marko taege Jo houw gezag dat hae ut nog waal zou goudmake mit de kleine Ian. Dae zal waal un paar waeke gratis aan de waterpiep moage lurken, suggereerde Dennie Vorstermans doa op. De mannen van twee houwe nog twee sjpelers die opvallend in de sjienwerpers sjtinge de aafgeloupe waek. De noa ut midden oosten oetgezonje soldoat Kenny Lemmens woort betrap terwiel hae nog ummer in zien sjuttersputje deig mitlaeze op de groepsapp:
Wie Kenny doa op woort aangesjproake, bleek dat de faciliteiten in zien sjuttersputje bes waal in orde zeen: Ralph Doek hoakte geliek in op dat letste berich:
Naeve Kenny, dae pas in maart waer zal aansjleite bie de mannen van 2, sjting auch keeper Bastiaan dees waek in de belangsjtelling. Bastiaan veel dit keer neit op mit zien keeperskwaliteiten en auch neit vanwaege ziene fitness-body womit hae Willem Thewissen noa de kroon probeert te sjtaeke. Nae hae veel op mit nogal apaarte accessoires, utgein de indruk wek dat hae de illusie haet opgegaeve dat hae ut lichaam van Willem kent euvertreffen en zich d r noe op geit toelegke om erkend veurvechter van de bisexualiteit Mat de metroman Creemers noa de kroon te sjtaeke: Sjportman es Bastiaan is, betrof dees foto neit allein maar un oavendje sjtappen, maar vonj hae auch nog de kans om zien keeperskwaliteiten op piel te haute. Op de inzat van Randy Wanten woar hae echter kansloos:
Mit unne pas vader gewoare sjpits dae zien centen leet rondjsjlingere, unne back dae in un sjuttersputje in t midden oosten alcohol vriej beier ligk te zoepe en unne vleegevangende metroman in de goal, moosj coach Crutzen un opsjtelling oet de hoge houd tovere veur de wedsjtried taege Limburgia 2. Maar eigenlijk deig die opsjtelling d r helemoal gein klote toe. De taegesjtenjer oet Brunssum woar mit sjlechs 10 sjpelers komme aafreizen, zoog al noa 15 minute unne sjpeler geblesseerd oetvalle en unne angere van t veldj loupe (reactie aanveurder Limburgia: Ik sjjjla je dinsdag helemaal kapot op de training, auw hoer! ) en noa 75 minute voetballe bloos de sjeidsrechter van elenj maar aaf bie unne 17-0 tusjesjtandj. Dat ging dus helemoal nurges euver. Ech un aanfluiting veur zo n grote vereiniging, wovan de A1 nota bene in de hoofdklasse acteert. Doa mot euveriges waal bie gezag waere dat de 8 sjpelers die de wedsjtried volmaakten dat deige zonger te sjuppe en zonger blessures te faken om n sjtaking aaf te dwinge. Coach Crutzen ging noa aafloup dan auch effe ut kleidlokaal van de taegesjtenjer in om de sjpelers te bedanken dat ze in jeder geval hun sjportieve plicht houwe gedoan en hae wunsjde ze toe dat in de heenwedsjtried noa de winjtersjtop unne volwaardige wedsjtried aafgewirk zou kenne waere tusje beide plouge. Un sjiek gebaar, dat teikenent is veur Rudy.
Veur aanvang van de wedsjtried houw de sjeidsrechter euveriges nog gedreig te sjtake es d r neit veur gezurg woort dat de blajer van t veldj woorte gehoald. Coach Rudy pakte auch die taak op zich en zurgde veur un besjpeelbaar veldj. In de rus loog t veldj alwaer onger de blajer en houw Rudy die taak gedelegeerd aan ziene gewisselde aanveurder Steve Krijgsman. Dae kreeg echter, ondanks diverse poginge, de bloazer neit aan de kal:
Wae noe precies allemoal de goale houw gemaak, wis Jari Knoops auch neit meer op te laepele. Dat hae d r zelf twee houw gemaak, wis hae nog net. Wovan eine trouwes un heusse wereldgoal woar. Die goal woort auch nog gezeen door de voltallige selectie van 1 die in de serre sjting te kieke. Thijs Nieuwland houw doa de weurt oetgesjproake: is het 15-0? Als Jari zometeen ook nog gaat scoren, ren ik naakt het veld op. En nog gein minuut later dreijt Jari de bal van 25 maeter mit unne fantastische krul in de krusing. Jari meinde dat de angere goale gemaak woare door Steve (3x), Marko (2x), Luc (4x), Joep (1x), Zoubair (1x) Eleandro (1x), Youri (3x). Opvallend woar wiejer nog de rol van de geblesseerde Pascal Conjour dae zo sociaal woar om te vlagge bie ut tweede. Bie unne oetsjlaag van 17-0 hubse es vlagger natuurlijk gein klote te doon. En dus woort Pascal de hauve wedsjtried hangend taege de aafrastering gespot. Wie oeteindelijk unne keer gelegenheid woar om te vlagge (noadat de verdedigers van De Sjter tiejig sjtapten en de sjpits van Limburgia 10 maeter boetesjpel sjting) reep Pascal vanaaf de reling: Ich vlag neet, begin maar te renne luie wiksers. Luc Spaans wis euveriges noa aafloup nog (terech) te melje dat De Sjter 2 dit sezoen nog alles haet gewonne es hae mitsjpeelde en dat de ploug zónger heum pas eine keer haet gewonne. Klasse Luc, es angere zoget neit constatere dan sjprikse dat geweun effe zelf oet. En volkomme terech dasse de tweede helf de aanveurdersbandj droogs. En bie 2 moag d r auch waal effe unne sjienwerper gerich waere op Frank doe krigs 10 euro esse de Haenraets, dae al waeke sjterk sjpeelt es verdedigende middenvelder en es beloning doaveur sjmiddigs in de selectie van 1 woort opgenomme. Klasse bezig Frank! Van de sjlachpartie van De Sjter 2 goan veer noa de mannen van 5. Die dreije dit sezoen wie unne tierelier en d r woort dan auch vol vertroewe aafgereis noa Oirsbaek veur de wedsjtried taege Alfa Sport. Auch dees mannen houwe te make mit taegesjlaag veuraafgoand aan hun partie. Sjterkhouwer en Frank Sinatra-reïncarnatie Rick the voice Kostons woar tiedes de Playback-oavend bie Tilly van de Bekker op zoaterdigoavend sjlechs op de driede plaatjs geëindigd. En dat terwiel jederein zal beamen dat Rick voal baeter kent playbacken es zinge. Door dit grove onrecht wat m woar aangedoan, leverde unne mentaal geknakte Rick sjlechs un sobere partie aaf op ut viefde. Oetblinker bie de mannen van 5 woar opnuuj knuffelsjeng Marco Verhoeven dae de ploug in de eesjte helf twee keer op veursjprong sjoot, eesj via unne penalty en doanoa via unne sjtreep dae in de krusing belanjdde. Omdat Alfa Sport twee keer teaege scoorde woort de rus bereik mit unne 2-2 sjtandj. Noa de rus houw de FC Biejeingeraap van 5 muijte mit de helle winjt en mit t oet de wedsjtried gesjtamp waere van topschutter Marco. Ondanks alwaer un foutloze partie van Devon, hilarische capriolen van de Caubo-breurkes un sjterk centraal duo in de personen van Mark Janssen en Ivo van den Bergh, scoorde allein Alfa Sport nog noa rus en zo keerde os viefde zonger punten terugk noa t Hetjen, wo t beier desondanks aeve goud sjmaakde. Auch de dames houwe waer unne wedsjtried op t programma sjtoan. Noa unne goeie sjtart van t sezoen op t gebied van aanlevere van input veur t versjlaag woar t dit keer dun gezeijd mit de info euver hun prestaties. Gelukkig bleve die prestaties zelf auch dit weekend
waer veurtreffelijk. De dames van Sjummert woorte mit 5-1 aan de zegekar gebonje. De goale woorte gemaak door Bo, die veur de verangering ens sjlechs 3x in plaatsj van 6x scoorde, Kyra en Samantha. Wobie reporter Robin Martens nog flink get vaere in de vot sjtook van twee ploeggenoten: Wiejer houwe de dames t noa aafloup veural druk mit t enigszins in toom haute van aansjtoande exen. Zo dach Clannad dudelijk t heure d r van dat vruntj Stefan de Frusj om zeven oer al muijte houw om rech veuroet te kieke:
En Jill en Robin keke hoofdsjuddend toe wie hun partners Roel Heffels en Bart Linders, same mit partner in crime Jari Knoops besjloate om de zjwoarbevochten 17-0 euverwinning van De Sjter 2 nog effe oetgebreid te viere. De dames houwe de punten dus auch waer binne dit weekend en goan dus nog ummer aan kop in hun klasse. Un geweldige prestatie, die coach Tom Keulen dan auch beloond zoog waere mit un romantische lunch mit zien Natasha:
Noa de thoes-euverwinninge van de dames en ut tweede woar ut allein nog effe de taak aan de mannen van 1 om de derby taege GSV in winst om te zette. De aafgeloupe joare woare de wedsjtrieje tusje beide plouge ummer un garantie veur sjpektakel, voal goale en (euver t algemein) drie punte veur de gael-zjwarten. Doabie is GSV auch geweun (noa mien meining) de sympathiekste taegesjtenjer in de 2 e klasse, mit sjpelers, begeleiding, besjtuur en supporters mit voal fatsoen die d r geweun unne leuke middig van wulle make. En doa op voortbordurend moag auch waal gezag waere dat GSV sinds un aantal joare unne geweldige sjportieve en sympathieke grensrechter haet. Unne jonge jong, dae un grepke maak mit de luuj langs de kantj en geine enkele keer in de verleiding kump om de vlag onterech op te sjtaeke. Aan De Sjter kantj leverde t inmiddels al 3 moanje doerende antecedenten-ongerzuik noa aanwinst Guillermo Kroon eindelijk interessant materiaal op in de vorm van n vertederende jeugdfoto:
Coach Czornyj sjtuurde zien mannen de wei in, in de volgende opsjtelling: Kis: Geoffrey Achter: Roel, Tim, Guido R., Paolo Midden: Stan, Guido C. en Ricardo Veur: Hassan, Guillermo en Thijs Bank: Bastiaan, Timo, Bob en Frank Wie de multifunctionele elftalleider Frans Beaujean de herfstblaajer van t veldj houw gebloaze, koosj d r aafgetrap waere:
De eesjte helf koom de wedsjtried neit ech op gang. Beide plouge maakten voal fouten in de passing en kome nauwelijks tot georganiseerde aanvallen, mede doordat van beide kenj lekker fel gesjpeeld woort. De kansen in de eesjte helf woare op ein handj te telle. De grootste woar veur De Sjter dat unne lange bal doorgekup zoog waere op Hassan, wonoa Guillermo door koosj braeke. Ziene inzat woort geblok. De bal woort vervolges opgepik door Thijs dae de achterlien hoalde, hel veurzat, wonoa de inloupende Guido Cals de bal mit rechs via de lat euver sjoot. Noa de rus houw De Sjter aanvankelijk ut baetere van ut sjpel. De score woort geoapend door Stan Goossens dae op 30 maeter van de goal besjloot om ens oet te hoale en ziene vernietigende knal zoog eindige in de linkerkrusing. Ech un heerlijke wereldgoal. Neit lang doanoa loog auch de tweede in t netje. Unne veurzet van Guillermo woort door Hassan prachtige binnekantj-poal ingeknik. En zo sjting d r unne 2-0 tusjesjtandj op de borden noa un oer sjpele. Gein voelke aan de loch veur de gael-zjwarten want ech geveerlijk woar GSV noa rus nog neit gewaes. De ploug woort echter in de wedsjtried geholpe door unne (op t aug) mekkelijk gegaeve penalty dae feilloos woort benut. De sjeidsrechter floot euveriges un prima partie, dus doa kent niks van gezag waere. In de fase doanoa weigerde De Sjter gebroek te make van de ruumte die t keer op keer kreeg, mit name aan de rechterkantj via Thijs. Telkens woar echter ofwel de veurzet net te laat of neit goud, of de bewaeging veur de goal onvoldoende. GSV wis doa nauwelijks get taegenin te brenge maar koom desondanks op gelieke hoogte wie hunne sjpits de bal mit links in de lange houk wol trappe oet de dreij, de bal echter compleet verkeerd raakte, wonoa dae bal door n woud van bein tergend langzaam in de korte houk rolde, terwiel keeper Geoffrey op t verkeerde bein sjting en niks angesj koosj doon dan toekieke. De 2-2 beteikende auch de eindsjtandj. Un jammerlijk puntverleis veur de mannen van 1. Op de inzet woar evenwel niks aan te mirke en de taegegoale woare meer un kwestie van pech dan get angesj. Geweun kop omhoog en doorgoan en dan kump dae driepunter waer sjnel genog. En dan hubbe veer nog ein team te besjpraeke dees waek: de veteranen. Die woare op de groepsapp nog ummer neit oetgesjproake euver de belaevenisse van Steef van de Woude in Iran:
Steef reageerde geliek mit unne rechse directe richting Ron en meljde zich vervolges doodleuk opnuuj aaf veur de wedsjtried:
De reacties op t ontbraeke van Steef woare, wie verwach, gemengd: Auch Roger Daemen houw verplichtingen, maar dae plande dat netjes boete t voetballe om. Desondanks woar zien oetsjtepke mit t gezin ongerwerp van gesjprek op de groepsapp:
Willem Thewissen prikkelde vervolges de groep door un sjpreuk te deile, die volges heum aafkomstig woar van sjpreukenman Frans Beaujean: als je lichaam zijn grens begint aan te geven vergeet dan niet te luisteren. Math Caanen reageerde doa op dasse dien lichaam mos opmake omdat ut zunj is es d r nog get van euver is esse sjturfs. Wo op Gerard zich aafvroog of Steef neit al grotendeils zien lichaam op haet. Steef leet dat neit op zich zitte en reageerde mit n foto mit begeleidende tekst:
Dat woar natuurlijk vroage om reacties. En die kome d r auch sjnel zat: Veur de veteranen sjting unne oetwedsjtried taege VV Lanaken op t programma. Dat is jeder joar un zjwoare partie omdat ze in Belsj neit ech veteranenteams kenne en de gemiddelde laeftied doa dus un sjtuk leger ligk. En dat beteikent dus auch ummer unne haup aafmeldinge van luuj die doa get bevreesd veur zeen. Oeteindelijk verzamelden 10 dappere sjtrieders zich, same mit coaches Leon en Frans in de kantine op zoaterdigmiddig. Mat Creemers en Ron Marschal woare al rechsjtreeks noa Loanaken aafgereis. In de kantien noom Leon t woord. Leon: jonges, ich hun goud en sjlech nuujts. 10 man in koor: deit Will Leurs neit mit? Leon: dat is inderdaad ut goeie nuujts. Ut sjlechte is dat veer maar 12 man hubbe. Robbie van der Linden ging zich doa op un pilske besjtelle bie Jo van Funs. Willem: Jo, hubse auch get droevesokker veur Robbie? Want dae mot dalik unne ganse wedsjtried sjpele.
Aangekomme in Loanaken sjting Mat Creemers de sjtoet wages al op te wachte. Ut terrein loog ech in the middle of nowhere, dus ut woar maar goud dat Mat doa woar om os te gidsen. Speciaal om Roger d n Doam te prikkele houw Mat n t-shirt mitgenomme wo de naam van Rogers vrouw op prijkte: Mat: Dat shirt hub ich aan gehad wie ich veurige waek door de A2-tunnel hub gerend. Van die jong sjnake op t werk houwe mich gevroag. Maar ich rende ze allemoal d r oet. Willem: Die pille die se houws gesjlik veur de wedsjtried taege Sjummert van veurige waek zulle nog waal doorgewirk hubbe. Vervolges noom Mat jederein mit op un wanjeling door de boesj om oeteindelijk bie de kleidlokalen te komme. Dat woar al un belaevenis op zich:
In ut kleidlokaal maakte coach Leon de opsjtelling bekend. Leon: Veer hubbe maar 12 man, dus t is krap vandaag jonges. Roger: Essen oe d r naeve sjteis, besse ech sjlech. Willem: Leon ech, es ich waer d r naeve sjtoan, sjmiet ich alles d r bie neer. Zo krieg ich nooit un kans op 1. Gerard: Wae sjteit dan d r naeve, Leon? Leon: Willem Willem: Godverdomme Leon! Leon: Jonges loester. Ron Marschal of Willem begint mit keepen. Ron is d r neit Eddy: Dan zou ich Willem loate keepe, trainer. Zonger Ron begove de 11 euverige sjpelers zich noa t kunstgraasveldj. Doa doemde un nuuj probleem op. D r woar nurges un poartje euver de omheining rondj t veldj. Roger reep op de wermloupende Belsje opponenten. Roger: Jonges, de wedsjtried kent neit doorgoan. Belsj: Wiezo dat neit? Roger: Veer hubbe maar 11 man en ích kom neit euver dat hek haer. Gelukkig woar Math Caanen inmiddels auch gerriveerd es toesjouwer en houw hae Henkie van de Pitsj mitgenomme. Henkie bliek veul ervaring te hubbe mit t oape kriege van hekwerken en versjafte Roger esnog unne doortocht. Oeteindelijk arriveerde auch Ron Marschal esnog en noom Willem plaatsj op de bank. Zonne teamsjpeler is r dan auch waal waer. En wie noa 5 minute Roger get vuilde in zien hamstring, sjprong Willem op en rende hae gretig t veldj in om in de sjpits de plaatsj van Roger in te numme. De eesjte helf ging t geliek op wobie Loanaken toch net get sjterker leek en auch op veursjprong koom door n ongelukkige own goal van Dennie Vorstermans. Dae toonde zich doa s oaves euveriges al sjuldbewust euver door de volgende foto mit ongersjrif te sjture:
Un nog grotere fout woort gemaak door de sjriever van dit sjtuk dae vlak veur rus de ideale kans op de geliekmaker kreeg wie Willem unne bal perfect doorkupte, maar de bal doa op volgend door ongergeteikende vanaaf 5 maeter van de goal euver t vangnet woort gejens. Op zondigmiddig koom Gerard Martens doa langs de lien bie 1 nog effe op terugk. Gerard: Rob, ofse effe mit Loanaken wuls belle. Ze hubbe dae bal van dich nog ummer neit terugkgevonje." De rus woort dus bereik mit unne 1-0 achtersjtandj maar mit t besef dat veer neit kansloos woare. Ron Marschal houw n veursjtel. Ron: Jonges, sjeit maar oppe kis de tweede helf want es keeper zuusse aan dae kantj niks mit die leegsjtoande zon. Rob: Wiezo? Doe houws toch geweun alles? Ron: Ja joa, maar ich koosj alles van ongeraaf bekieke. Dae keeper van hun is unne lange. Math C.: Doe hubs dien ganse laeve ummer alles ut leefste van ongeraaf bekeke, Ron. Ron: Dat is woar. Vanoavend mot ich trouwes nog noa t joarfees van fitsclub t verzetje. Die motte toch allemoal dringen van de vrouw aaf wulle, es ze mich oetneudige.
Op dat fees van ut verzetje koom auwt veteranensjpeler Peter Kut Janssen s oavens auch nog effe terugk: Roger Daemen reageerde op die oetneudiging van Peter in neit mis te versjtoane wurt. Al trok hae dae keutel auch waer aeve sjnel in:
Naeve Ron Marschal woar auch Mat Creemers aafgereis noa t fees van t verzetje. Ron koom d r unne daag later achter dat hae get sjpulle kwiet woar en sjikde Mat un berichske: Maar goud, terugk noa de wedsjtried. De tweede helft begoosj en Willem Thewissen houw veur de rus al loate zeen dat hae in vorm woar. Hae kleunde alle duels in, deilde oet, incasseerde en zjweepte de troepen op. In de tweede helf zat hae zelfs nog un tendje bie. En wie noa 35 minute de balans woort opgemaak woar de 1-0 achtersjtandj omgeboage in unne glansrieke 1-4 euverwinning veur De Sjter. Doelpunten woare gemaak door Robbie van der Linden en unne heusse hattrick van Willem. In ut kleidlokaal woar Willem, logischerwies, opgetogen euver zien eige sjpel mit quotes wie: Ich denk dat ich noe ut ongeliek van de trainers waal hub beweze. Es Ronny mich nóe nog gein kans geef op 1, dan weit ich t auch neit meer. Hie jonges, 56 joar en nog ummer de beste. Geer mot uch kapot sjame. Maar geliek houw r auch. Willem sjpeelde un geweldige partie en woar geweun neit te sjtoppe zoaterdig. De beloning koom later op de oavend. En wie doa get commentaar op koom, reageerde Willem wie door un sjlang gebete:
Noa aafloup van de wedsjtried woort d r nog effe gedouche in t kleidlokaal. De douches bleke ontzettend werm te zeen en Mat Creemers sjting kuumend d r onger. Ron Marschal reageerde van unne aafsjtandj. Ron: Wat ís, Matje? Kumpse kloar? Mat: Nae, miljaar die douches zeen werm. Ron: Doe maaks noe angesj t zelfde geluid es wat ich ummer heur es ich bie uch thoes onger t bed ligk, esse onverwachs thoes bes gekomme. Noa ut douchen woorte d r nog get uurkes doorgebrach in n gezellig Belsj café en doanoa ging jederein ziene eige waeg. Maar de onoetwisbare indruk dae Willem houw achtergeloate bleef jederein door de kop goan:
En wie Willem, noa ut aafgeloupe weekend gekroond woar tot Man of The Match op de facebook-pagina van De Sjter, woort dat heuglijke nuujts auch effe mit de facebookloze Willem gedeild. Ziene naef Gerard Martens en ziene compaan Math Caanen deige doa op hun bes om Willem mit beide beinkes op de grondj te haute: Om Willem en ziene pap extra lang in sjpanning te loate, wachtte de sjriever van dit sjtuk auch bewus lang mit t inlevere d r van. Op gounsdigmiddig koosj Willem zich neit langer beheersen en sjlingerde t volgende berich de wereld in:
De sjriever van dit sjtuk reageerde door te zegke dat hae muijte houw om de prestaties van Willem onger weurt te brenge en vroog de res van de veteranen om te helpe mit get sjtaekweurt. Dat leverde n sjtortvloed aan ontroerende reacties op:
Maar oeteindelijk woar t, wie kent t auch angesj, dichter des vaderlands Gerard Martens dae de prestaties van ziene naef Willem t beste verwoordde: Veer besjleite dit versjlaag mit os damesteam. Veursjtopper Dyonne Conjour woar zoaterdigoavend lekker op sjtap gegange en meljdde zich op zondig op t complex es un opvallende versjiening. De linkerkantj van heur veurhoofd woar namelijk gans dik en kapot gesjaaf. Noa noavroag bleek dat de verklaoring veur die sjade drieledig woar: euvermatige inname van alcohol in combinatie mit n noa un onverwachse plaatsj verplaatsjde deurmat bie Dyonne veur, in combinatie mit n massief houten deur en un betonnen sjtuupke. Un foto van twee van de drie boosdoeners woar sjnel gevonje:
Un foto van t sjlachoffer bleek lestiger te achterhoale. Dyonne zelf bleek zelfs drie daag noa heur ongeluk nog ummer neit in the mood om mit te wirke en goof antjwoord op de van heur bekende wieze: Pes volgende waek! Rob Sjulpe