Ontmoeting 20 Paulus en sy vriende vertel ander van God In hierdie deel van Paulus se verhaal sien ons weereens hoe God vir ons sorg. Hy het vir Paulus vriende gegee om hom te help met sy taak om die boodskap van Jesus uit te dra. In Handelinge 18:9 sê God vir Paulus: Moenie bang wees nie, hou aan preek en moenie begin stilbly nie, want Ek is by jou. Niemand sal n hand op jou lê of iets sleg aan jou doen nie, want in hierdie stad behoort baie mense aan My. Teks: Handelinge 18:1-18 Hulpmiddels: Een van die volgende: Ongedrukte koerantpapier/ butcher paper Maskeerband Bordkryt Prente vir storie Tent Flitsligte Lakens vir tentbou Aktiwiteitsblad Skoon papier vir tekeninge Inkleurkryte Welkom Maak n slak-vorm spiraal op een van 3 maniere (maak genoeg sodat die kinders in groepe van 5 n spiraal kan gebruik.) Teken groot slakvormige spirale op ongedrukte koerantpapier ( butcher paper ) en plak dit op die vloer vas of teken dit met bordkryt op teer of sement (dit was maklik af met water) of plak spirale met maskeerband op n mat. Verdeel elke spiraal in 12 spasies en merk die middelpunt van die spiraal met Rus. Deel die kinders in groepe van 5. Maak seker dat daar een spiraal vir elke groep is. Die eerste kind in die groep hop op een voet deur die spiraal in elke spasie sonder om aan die lyne te raak of albei voete neer te sit. Wanneer hulle by die Rus kom, kan hulle met albei voete land. Nou kan hulle omdraai en weer uitspring. Indien hulle dit regkry, mag hulle in enige van die spasies iets goed en wonderlik van God neerskryf. Hou so aan tot elke kind n beurt gehad het. (Indien die kleiner kinders dit nie regkry nie, kan hulle versigtig deur die spiraal loop.) Gee aan hulle die geleentheid om te vertel wat hulle oor God se goedheid geskryf het. Wyding Temalied: I have decided Stilword-ritueel: Laat die kinders hul ogies toemaak en tjoepstil bly. Sê vir hulle in n rustige stem die volgende: Dink bietjie oor die volgende vrae sonder om hardop te antwoord: Toe jy vanoggend wakker geword het, was dit vir jou lekker of sleg in julle huis? Toe jy uit die huis uitgegaan het, was die mense op julle pad vriendelik of onbeskof? Toe jy by jou skool aangekom het, was jou maatjies vriendelik met jou of het hulle jou sleg laat voel? Was die dag in die skool vir jou lekker of minder lekker? Sê in jou hartjie vir die Here dankie dat Hy nog die hele dag by jou was. Sê Amen na 30 sekondes van stilte.
Woord Verlede keer het ons gehoor wat Paulus alles vir die geleerde mense in Atene vertel het. Daarna het hy na Korinte vertrek. (Skuif die sandaaltjie op die kaart.) Vandag gaan ons sien wat in Korinte met hom gebeur het. Hy het nog steeds daarna uitgesien dat Silas en Timoteus by hom moet aansluit. (Indien die groep klein genoeg is, kan jy n tent binne die lokaal opslaan en die storie van Paulus vertel terwyl julle binne-in die tent sit. Gee vir een of twee kinders flitsligte om op die prente te skyn terwyl jy die storie vertel.) Vra eers vir die kinders watter werk hulle graag sal wil doen wanneer hulle groot is. Paulus het n baie interessante werk gehad; hy het tente gemaak. In Korinte het Paulus n man en sy vrou ontmoet wat kort tevore daarheen getrek het. Hulle name was Akwila en Priscilla en hulle het van Italië af gekom. (Wys prent 1.) Hulle het ook tente gemaak. Hoekom dink julle kon Paulus n lewe maak van tente maak? Dit was nie tente vir vakansie en kamp soos ons dit ken nie, maar dit was baie mense se huise. Hulle het groot stukke lap aanmekaar gewerk en tente daarvan gemaak om in te woon. In vandag se terme sou hulle bouers gewees het. Akwila en Priscilla was baie bly om vir Paulus te ontmoet en het hom genooi om by hulle te kom bly en saam met hulle te werk. Kyk net hoe wonderlik is God: Hy gee vir Akwila en Priscilla n vriend en vir Paulus gee hy vriende, n plek om te bly en n werk. (Wys prent 2.) Terwyl Paulus by hulle gebly het, het hy hulle geleer hoe om ander mense van God te vertel. Paulus se ander twee vriende, Silas en Timoteus, het uiteindelik in Korinte aangekom om hom te help om mense van God te vertel. Teen die tyd dat hulle daar aangekom het, het Paulus genoeg geld gehad en hy kon ophou werk en die hele tyd net preek. Paulus het al sy aandag daaraan bestee om die Jode te oortuig dat Jesus die Messias is. (Wys prent 3.) Die Jode wou steeds nie na hom luister nie en het hom gespot en beledig. Hy het die stof van sy klere afgeskud as teken dat hy klaar is met die Jode. Hy het gesê: Ek is onskuldig. Julle wil nie hoor nie; van nou af is dit julle eie verantwoordelikheid. Paulus het daarna by Titius Justus, wat n nie-jood was, gaan bly. Titius Justus het reg langs die sinagoge gebly. Krispus, die hoof van die sinagoge, en sy hele gesin het tot geloof in die Here gekom. Ook baie ander mense van Korinte het gelowiges geword en is gedoop. (Wys prent 4.) Paulus het daarna sy tweede reis klaargemaak en teruggegaan na Jerusalem en daarna na Antiogië toe. Volgende keer gaan ons saam met Paulus op sy derde reis vertrek. Kinders kry tyd om oor die verhaal te dink: 1. Ek wonder wat was vir jou mooi in die verhaal. 2. Ek wonder waar jy jouself in hierdie storie sou sien. 3. Ek wonder hoe jy sou voel as mense jou nie wil glo nie. 4. Ek wonder hoe kan n mens ander help wie se enigste werk dit is om ander van God te vertel. Werskaf Werkblad met vrae en prentjies - Bible fun for kids (Akwila en Priscilla) Deel aan die kinders lakens uit en laat hulle tente bou met tafels en stoele en gee geleentheid dat hulle daarin kan speel. Teken n manier hoe jy vir ander mense van God kan vertel. Bestel n gratis boekie vir elke kind deur CLF Literature: Ek was skaam en bang om oor Jesus te praat. (021 873 6964 / www.clf.co.za) Sluit af met die seënbede: Mag jy verder hierdie week die Here se liefde beleef en dit vir ander gaan vertel. Amen.
1 2
3 4
Akwila en Priscilla Omkring die regte anwoord(e) by elke vraag: 1. Hoe het Paulus gevoel oor die dinge wat die mense van Korinte gedoen het? 2. Watter werk het Akwila en Priscilla gedoen? 3. Watter werk het Paulus gedoen terwyl hy by Akwila en Priscilla gebly het? 4. Het almal vir wie Paulus van Jesus vertel het in Hom geglo? 5. Wat het Jesus een nag vir Paulus in n droom gesê? Moenie bang wees nie. Hou aan met preek. Ek is by jou.