Tankwa Karoo : 14-16 Augustus 2010 Johan Snyman Agtergrond Aangesien ons binnekort Windhoek toe trek, is ons nou besig om al ons geliefkoosde plekke te gaan groet. Ek het onlangs ook groot veranderinge aan die Landie aangebring en hierdie besoek aan die Tanka Karoo was die ideale geleentheid om die nuwe stelsel te gaan toets. Die weervoorspelling het mooi, maar koue, weer voorspel. Aangesien dit hierdie jaar, in sekere opsigte, nie n goeie blommejaar is nie, het ons ook nie verwag om baie blomme te sien nie. Maar, omdat dit net die 2 van ons was sou ons ook heelwat tyd te voet in die veld rondloop en het geweet dat ons wel heelwat interessante goedjies sou kry om af te neem. Dag 1 : Saterdag 14 Augustus 2010 Ons het die oggend om 7h00 in die pad geval en eers by die Taalmonument in die Paarl n draai gaan maak voordat ons oor Du Toitskloof Pas gery het tot naby Rawsonville en het daarvandaan met die Slanghoekpad en deur Mitchell s Pas na Ceres gery en daarvandaan met die R46 oor Theronsberg Pas en Hottentoskloof Pas, en toe met die R355 deur die Karoopoort Pas tot by die afdraai na die Tankwa Karoo Nasionale Park. Net na die Karoopoort Pas het ons n Jetta met n papwiel gekry. Die mense het maar gesukkel om die kar opgedomkrag te kry en ek het toe maar die wiel vir hulle omgeruil. Die pap wiel was egter onherstelbaar beskadig en hulle is toe weer met n groot vaart daar weg. Net voor die afdraai na die Tankwa Karoo het ons eers teetyd langs die pad gehou en ook so n bietjie in die veld rondgekyk : J Snyman 1
J Snyman 2
Daarvandaan is ons na die Park se kantore om vir ons n kampplek te kry en het toe die aand in Langkloof geslaap. Daar het heelwat geel vygies in die blom gestaan. Die kampplek is langs n kleinerige rivier, onder bome, en by die murasie van n ou plaaswoning, en daar is geen geriewe nie. Alhoewel die wind so effens gewaai het was dit glad nie koud nie en ons het vir n verandering sommer lekker vroeg gaan slaap. J Snyman 3
Die totale afstand vir dag was 338km waarvan 170km op teer- en 168km op grondpaaie was. Dag 2 : Sondag 15 Augustus 2010 Na n rustige nag het ons so effentjies verslaap en toe is dit tyd om weer van die bekende vlaktes is die Park te gaan opsoek. Ons het heelwat blommende Hoodia plante teëgekom en dan was die vlaktes tussen Leeu- en Pramberg oortrek met blommende geel Gazanias. Daar was ook heelwat vygies, waarvan sommige nog aan die blom was. J Snyman 4
J Snyman 5
Partykeer moet jy ook maar plat op die klippe gaan lê om van die Park se kleiner bewoners van nader te beskou... Ons het ook die Leeuberg 4x4 roete in die Park gery. Dit loop al op die maanhaar van die Leeuberg en het die mooiste uitsigte. J Snyman 6
Ons het die aand by Perdekloof se windpomp kamp opgeslaan en het weereens n baie rustige nag gehad. Die totale afstand vir dag was 99km, waarvan alles op grondpaaie was. J Snyman 7
Dag 3 : Maandag 16 Augustus 2010 Dit was ongelukkig tyd om huiswaarts te keer. Ons het met die hoofpad uit die Park tot op die R355 gery en daarmee tot by die afdraai na Peerboomkloof Pas en toe oor Katbakkiespas deur tipiese Cederberg rotsformasies tot by Op-die Berg. Daarvandaan is ons met die R303, oor die Gydopas na Prince Alfred Hamlet en Ceres. Ek het op die banddruk monitor agtergekom dat die regter-agterwiel stadig besig is om lug te verloor en het die band toe in Ceres herstel. Daarvandaan is ons deur Mitchells Pas en oor Slanghoek na Rawsonville waar die Landie eers oor die weegbrug gesit is. Dit was nogal n skok om agter te kom dat ons 20kg oorbelas op die vooras was en dat die voertuig se totale massa 60kg minder as die toegelate maksimum gewig was. Daarvandaan is ons weer bo-oor Du Toitskloof Pas huistoe. J Snyman 8
Die totale afstand vir dag was 333km waarvan 198km op teer- en 135km op grondpaaie was. Ter afsluiting Dit was sommer baie lekker om weer vir n slag heeltemal op ons eie in die veld te kon wees, en A3 kon na hartelus met haar kamera s rondloop. Ons het tydens ons besoek aan die Park slegs een voertuig, op n afstand, gesien. Die Landie se nuwe pakstelsel werk na wense, alhoewel dit seker n rukkie sal duur voor ons weer gaan weet waar alles is. Ons sal egter weer deur al die toerusting moet gaan, veral die swaar gereedskap en herwinningstoerusting, om te sien waar ons n bietjie gewig van besnoei. ------------------------------ J Snyman 9