De Sjter 1 versjleit koplouper Caesar noa heroïsche comeback; Tweede elftal baekert door; Dames winnen dik; Ode aan Jenki Jevric Ut woar un euverwaegend succesvol weekend veur os clubke. Ozze veteranen houwe weliswoar niks te voetballe, maar hun euverwinning van veurig weekend op IVS mot nog ummer besjproake waere. De dames pakten flink oet taege de ladies van Veritas (7-2). En auch os tweede elftal boekte un euverwinning, veur de baeker, taege GSV 1-2 combinatie. Ut driede pakte un puntje oet in de derby taege Haslou 5. Einige dissonant woar os 4 e elftal dat mit 1-3 ten onger ging taege Zwentibold 4. Maar os veerde houw waal de absolute man van ut weekend in heur gelederen in de persoon van Jenki Jevric. Dae verdeint un terechte ode aan ut eind van dit versjlaag. Maar dat alles verbleik bie de prestatie die de mannen van 1 leverden in Baek op zoaterdigoavend. Noa un waek eerder al mit vlag en wimpel de volgende baekerrunj bereik te hubbe (1-6 taege derdeklasser Langeberg), keken os jonges noa 60 minute sjpele in Baek taege unne 4-1 achtersjtandj aan taege de koplouper. Un hauf oer later sjting coach Jean Maas echter juichend op de toafel in ut kleidlokaal temidden van zien sjpelers, noa unne glorieuze comeback dae resulteerde in un 4-5 euverwinning. Dát is nog ens lekker de winjtersjtop ingoan. In dit versjlaag natuurlijk auch waer links en rechs un bietje aandacht veur ut randjgebeuren. Zet uch d r dus maar ens goud veur, want veer goan beginne. En dat doon veer dees waek mit ozze dames. Die houwe aafgeloupe waek unne joarige in hun midden. De eeuwig 18-joarige schone Marwa woort doa op hartelijk gefeliciteerd door heur ploeggenoten. Wobie t prettig is om te weite dat Marwa waal taege un grepke kent Omdat de dames nog eine wedsjtried op ut programma houwe sjtoan, woort d r de aafgeloupe waek geweun getraind. Jill Vallinga vonj ut op dinsdig eigenlijk te koud om te traine, maar coach Martens kende gein genade. In de geest van Ernst Happel sjprook hae oet: Niecht loellen, gewoon fussball spielen. Noadat de dames in ut kleidlokaal nog 15
minute geklaag houwe, ginge ze toch maar ens ut veldj op. Dyonne Conjour woar (terech) hartsjtikke greutsj op zichzelf dat ze woar komme traine. Ut woar dinsdig immers kip-daag bie KFC en door de training moosj ze dit missen. Opvallende aafwezige op de training woar Nel (Cindy). Heur ploeggenoten vermoeden dat dit waarsjienlijk koom doordat ze eindelijk instagram haet geïnstalleerd. Op heure ouwe daag (20 joar ouwer es de res) zal dit waal un tiedje langer gedoerd hubbe es gebroekelijk is. Op zondig moosjten de ladies thoes aantraeje taege de dames van Veritas. Rachel van Erp deit dees waek versjlaag van ut gebeuren. Hulde doaveur Rachel! Om 10 oer ging De Sjter zich omkleije veur de wedsjtried. Dyonne begoosj mit ut oetdeile van de tenues. Ze zoog d r nog frisj oer veur emes wat maar 2-3 oer sjloap houw gehad. Dyonne woar same mit ploeggenote Sanne in de nach van zoaterdig op zondig vruig noa hoes gegange vanoet de Bekker. Ze houwe nog un nachttoernooi aaf te legke, same mit de broor van Dyonne. Sanne houw dat toernooi gewonne. Gein wonjer dus dat Dyonne nog redelijk fit woar, want ze houw zich neet nog 15 glaze extra noa binne houve gieten om de euverwinning te vieren. Nemes houfde Dyonne te helpe bie ut oetdeile van de tenues en ze is geine eine keer gevalle. Chapeau! Wie jederein aangedoan woar, woort aan de warming up begoosj. Doa vele veural de nuuje keepers-heisje van Maartje op. Die pasten perfect bie heur tenue: flitsend rood/oranje. Noa de warming up nog effe noa binne en toen lekker de wei op om te beginne. Doa vonj de sjeidsrechter ut tenue van Maartje get te veul vloke, dus woort coach Tom gevroag om unne nuuje trui te regele. Maartje protesteerde en weigere heure trui oet te trekke en dus ging dae angere trui geweun d r euver haer aan. Noa enige vertraging koosj d r toch aafgetrap waere. De Sjter begoosj in de volgende opsjtelling: Kis: Maartje Achter: Joyce, Dyonne, Jill, Yael Midden: Shauni, Siri, Cindy, Nikki Veur: Samantha, Joy Bank: Bo, Kyra Vervolges moosjten d r hendjes gesjud waere in de middencirkel. Keepster Maartje noom maar geliek al heur sjpulle mit, want tot noe toe woar dit sezoen nog jedere keer de toss verloare, en wol de taegesjtenjer meestal van helft wissele. Dit keer wis Joy echter de toss te winne. Un goud veurteiken? De score woort geoapend door routinier Cindy, die zelf heur kans creëerde door goud om te sjakele. Vervolges woort d r un euvertreding gemaak op Joy binne de 16. Joy pakte zelf de penantie en scoorde de 2-0. Nog veur de rust verhoogden Bo en Siri de score noa 4-0. Noa de rust houwe ozze dames un klein dipje. Noa un tiedje loog de 4-1 in ut netje. Achterin woort doanoa get feller opgetroaeje. Dat leidde echter waal tot unne penantie veur Veritas en zo sjting ut 4-2. Joy zurgde doa op veur get opluchting door de score noa 5-2 te tillen. Doanoa koom de fase wo in Dyonne onverwachs ging oetblinke. Ze zoog d r al hartsjtikke fit oet veur aanvang, maar hauverwaege de 2 e helf bereikte ze zelfs unne keer de middenlien.
En goof ze nota bene auch nog geliek unne puntgave assist op Bo, die de 6-2 scoorde. Noadat Bo, Siri en Joy nog kansen houwe loate ligke om de score wiejer oet te breiden, kreeg De Sjter aan ut einde nogmaals unne penantie. Dit keer moch de ultrafitte Dyonne dem numme en zie bepaalde de eindsjtandj op 7-2. Rachel, doe hubs d r un sjiek versjlaag van gemaak. Bedank doaveur. En respect veur t feit dasse de ganse wedsjtried op de bank bes blieve volgen veur os, ondanks bevroare tenen. Letste woord names de dames veur de winjtersjtop is veur Dyonne en heur meest geheurde opmerking richting de sjeids: Sjeids, ich raakte heur godverdomme neet ens aan! Ozze ladies sjleite de eesjte sezoenshelft aaf op de 3 e plaatsj mit nog oetzicht op meer. Klasse dames! Dan goan veer sjnel door noa os veerde elftal. Dat kent qua resultaten un ietwat taegevallend sezoen. Al haet dat in grote mate te make mit ut ontbraeke van unne keeper. Noud Claessens haet die rol euveriges waal heel get wedsjtrieje mit verve vervuld en geneit doaveur veul respect bie zien ploeggenoten. Euveriges woort daezelfde Noud dees waek door zien maatje Kenny getagd op facebook bie un leuke vroag: Noe ken ich Noud pas un joar of 10 en ich koosj mich hie eerlijk gezag weinig bie veursjtelle. Gelukkig wis zien maatje Jari oet de ouw doos nog un foto teveursjien te tovere, die de tag
van Kenny verkloart. Goud kieke, want dit is éch neit Robert ten Brink in zien jong joare, maar ozze eigen Noud: En deze klasbak zurg d r dus waal jeder waek veur dat de mannen van 4 geweun kenne voetballe mit unne acceptabele goalie. En doabie geit dees ouw foto ech gein vervaelend gevuil bie Noud oproupe. Mit Fortuna es aanveurder van de ranglies in de Jupiler League, kriege veer dae glimlach de kommende waeke ech neit van zien gezich aaf. Wiejer is vermeldenswaardig bie ut veerde dat de gemiddelde laeftied van dat team dit sezoen flink is opgetrokke. Doaveur zeen mit name sjpitsenduo Jenki Jevric en Rachid Bourja verantwoordelijk. Die mannen presteren euveriges veurbeeldig en numme auch nog ens ut leeuwendeil van de goale veur hun raekening. Maar dit soort mannen op laeftied in unne sjpelersgroep bringk waal get extra complicaties mit zich mit. Ralph Doek vroog doa dees waek nog maar ens aandacht veur op de groepsapp:
De mannen van 4 houwe aafgeloupe zondig eigenlijk unne oetwedsjtried noa Zwentibold (Guttecoave-Lömmerich) op ut programma sjtoan. Die ploug houw echter gevroag om in Sjtein te moage sjpele omdat hun eige velje al un paar waeke onbesjpeelbaar zeen. Omdat ut tweede om hauf 12 thoes sjpeelde en de dames om 11 oer, woort de wedsjtried van ut veerde ingepland om hauf 2. Ut woar dudelijk dat dat late tiedsjtip un aantal luuj op ut verkeerde bein houw gezat want d r sjting zelfs un camera-ploug van de LOS te filmen. Wie dae in de gate kreeg dat de dikke sjpelers in ut veldj niks te make houwe mit zien tele-lens, woar dae auch waer zo de klote op, aldus reporter Doek. Door dat ongebrukelijk late tiedsjtip houwe ozze mannen maan sjus genog luuj (eine wissel). Desondanks sjpeelden un paar man ut kloar om in aangesjoate toesjtandj aan de warming up te beginne. Jari Knoops woar gelukkig bereid om es keeper oet te helpen en auch Frank Haenraets woar bereid om nog un helfke mit te doon om de zieke Stan aaf te lossen. De opsjtelling woar es volgt: Kis: Jari Achter: Jup, Ivo, Doekie, Danny Midden: Michel (Stan-Frenkie), Dasse, Brahim, Patje Veur: Rachid, Jenki 95 minute op de bank: Meuge Habets Ralph Gladiator Doek deit versjlaag: Zwentibold hei jun gooje jonge good getrainde ploog. Dus ver wiste dat ut ene lestige pot ging waere. Toch woort d r good gesjpeeld. Zwentibold woar sjterker en scoorde de 0-1 en de 0-2. Ver probeerden doa op tactisch get aan te passe en dat heij effect. Die van Lömbrich woare effe de kluts kwiet. Rachid houw zichzelf eerder al un kans oetgesjpeeld die maar net naeve ging, maar de tweede keer woar ut waal raak en sjting ut 1-2. Die van Zwentibold woare get in paniek. Winst beteikende veur hun dat ze herbstmeister zouwe waere want Gelaen heij sjmurges verloare van Munstergelaen. Ut sjpeel bleef op en neer goan. De 2-2 hing in de loch helaas de 1-3 auch en die veel auch. Ut woar op zich unne relaxte wedsjtried, allein leke die van Zwentibold waal oet Sjtein Zuid te komme. Die bleve maar jenke, zeivere en moele taege de sjeids. Ut leek waal un proatprogramma. Om euver hun bank, wo allein maar neet zo sjnuggere opmerkinge vanaaf kome, maar te zjwiege. D r zoat veur De Ster maar ein dingk op: d r op kletse! Helaas woort ut spel doa neet baeter door en de wedstried ging oet wie un nachkaers. Good gesjpeeld maar weer mit laeg henj helaas. Gelukkig houw de res van de senioren allemoal punte gepak. Noa de winjter goan veer dat auch doon! Happy holidays names ut veerde! Klasse Ralph en klasse mannen van 4. Geneet van de feestdaag, ammeseer uch bie de hallenmasters en dan noa de winjter waer vanouds knalle! Dan door noa os tweede elftal. Dat begoosj ut sezoen super maar acteert inmiddels in de middenmoot. Grootste boosdoener is de kleine selectie, wodoor men geregeld mit un oetgekleid elftal de sjtrijd mot aangoan. De sfeer leidt dae euveriges allerminst onger. Die is
al ut ganse sezoen top. De jonges hubbe sjpas ongerein, blieve mit ut ganse team oerelangk in de kantine hange, organisere activiteiten en ammesere zich op de groepsapp. Mit auch dees waek waer Luc Spaans in de hoofdrol: De mannen van 2 houwe op zondig, op ut eige Hetjen, unne baekerwedsjtried taege GSV 2 op ut programma sjtoan. De mannen oet Genhout zeen de trotse koplouper in de 2 e reserve klasse. Bovendien wis die ploug zich dit weekend versjterk mit un 6-tal sjpelers van GSV 1. Gelukkig mochten ozze eige jonges auch un beroep doon op un aantal sjpelers die de daag d r veur minute gemaak houwe veur De Sjter 1 in Baek. De opsjtelling woar es volgt: Kis: Bastiaan Achter: Frusj, Bob, Jari en Mike Midden: Cyrill, Frank en Bart Veur: Sevn, Marko en Luc Bank: Kenny, Luca, Jason en Joep H. In de beginfase woorten os jonges un bietje aafgebluft door die van Genhout. Die zatte geliek hoog druk en doa wis De Sjter neit goud mit om te goan. GSV kreeg auch ein laevesgrote kans, maar die woort door Bastiaan onsjadelijk gemaak.
Noa un hauf uurke wol Frank vanaaf 31 maeter op goal sjeite, maar ziene sjeut woort geblock en koom bie rechsback Mike. Dae fakkelde neit lang en sjoot van 32 maeter op goal en zoog ziene knal rechsjtreeks de krusing invleige. Wat un wereldgoal! Klasse Mike! Beide plouge krege hienoa nog get klein kenskes maar ech noemenswaardige dinger gebeurden d r neit meer. Rust. In de tweede helft woar ut einrichtingverkeer richting de goal van De Sjter 2. GSV woar sjterker en jedere 2 e bal woar veur hun. Zelf kregen ozze jonges maar un paar kenskes maar tot doelpunten leidde dat neit meer. Door goud teamwork en vechtlust wisten ozze jonges eindelijk waer ens de 0 te haute en plaatsjten ze zich veur de achtste finales van de baeker. Klasse jonges! Nog ummer in de baeker, leuk mitdreije in de competitie, un goei ongerlinge sfeer, de jonges van de A-jeugd prima opvange meer ken veer neit van uch wunsje. Gangk zo door noa de winjter! Van os tweede elftal sjakele veer effe terugk noa un waek eerder. Toen woar d r op de zondig un algehele afgelasting, maar op zoaterdig sjpeelden ozze vets waal nog hunne tweejoarlijkse wedsjtried van ut joar taege de vets van IVS. Mit noa aafloup auch de traditionele maaltijd veur beide plouge. Dae zoaterdigmiddig verzamelden de vets zich aan de teek. En hoewel d r unne topwedsjtried in t versjeit loog solliciteerden un aantal sjpelers noadrukkelijk noa un reservebeurt, door zich neit te haute aan ut veurgesjreve voedingsbeleid: Aan de teek kome euveriges waal waer de sjoonste verhoale los. Zo vertelde Willem Thewissen dat ut team van ziene zoon Ian dae murge unne nogal fysieke taegesjtenjer houw wodoor de hauve Sjteinse ploug aan ut huule woar gewaes. Ron Marchal reageerde doa op.
Ron: Kens zeen dat ich alwaer unne tied neit meer in Sjtein woon. Willem: Wiezo? Ron: Dat deige die boete-echtelijke kinjer van mich vruiger nooit, hule op ut veldj. Willem: Ich hub veur ut eesj gehuuld wie ich Joyce naaksj zoog. Die perfectie! Stef: Woarse dan bie de geboarte van Joyce goan kieke? Auch Ans van Kan moosj d r aan geluive. Willem: Hooooiiii Aaaaaaans, wat hubse de kantine leuk verseiert. Ans: Danke. Ron: Zo verseierse toch nog ens get, he Ans. In ut kleidlokaal kreeg Rudy Crutzen de keepersheijsje terugk die hae un waek eerder houw oetgeleend aan Ron Marchal. Rudy: Ich controleer effe of d r gein gate in zitte noe. Ron: Kent waal zeen dat d r drie vingers aanein plekke want ich hub mich nog gewiks mit de heijsje aan. Rudy: Godverdomme, d r zit ech un gaat in. Kom op hei, dat is toch neit normaal! Ron: Och joa, ich houw mich de zak neit gesjoare. Doa zal ut van zeen. Mat: Rudy, maak dich neit druk, veer vergoeden dat. Ich verkoup waal get bitcoins. Misha: Hubbe veer niks meer in de sociale kas zitte? Rudy verleet doa op ut kleidlokaal effe wonoa Ron nog get kwiet moosj. Ron: Nog un geluk dat hae dae broene wiesvinger van die heisj nog neit haet gezeen. Vervolges kome coaches Leon Fredrix en Willy Worms binne veur de opsjtelling. Mat: Willy, hubse unne nuuje kapper? Willy: Joa, geine meer! Mat: Ich hub mich trouwes stress gehad vandaag. Hub de ganse ochtend Pierre gezoch. Willy: Wae? Mat: Pierre, mien kat. Ron: Wát woar mit de poes van Jacqueline? Mat: Zoot r oeteindelijk bie de bure. Eddy: Normaal zits doe bie de poes van de buurvrouw. Ron: Pierre woar dich natuurlijk aan ut zuike, Mat.
Vervolges koom Rudy waer ut kleidlokaal in en ging ut gesjprek waer euver noa heum. Mat: Wie geit ut mit de trainerscursus, Rudy? Rudy: Geit goud heur. Mat: Van wae hubse les? Rudy: Van J.L. en J.d.H. (vanwaege privacy-rejene maar effe geanonimiseerd) Mat: Oh, dan besse zeker gesjlaag! J.L. dae kenne veer nog, he Ronny. Ron: Doa sjlaagse zeker bie. Mat: Zegk m maar datse os kens. Witse nog Ron? Doa hubs doe vruiger nog ens de vrouw van d r tusje gehad. Rudy: Ich denk dat ich dat baeter neit ken vertellen. Mat: Joa, dat woar mich get. Ich heel ze vas en Ronny haet ze eine betrokke. Ron: Joa dat klop. Al houws doe eigenlijk gaar gein functie. Mat: Wiezo? Ron: Die wol gaar neit wegloupe. Doe wols geweun kieke. Vervolges woar ut tied gewoare om te voetballe. Al woar d r van unne echte wedsjtried nooit sjproake. Beide teams houwe maar sjus de luuj biejein gekrege, maar in ut geval van De Sjter woare ut verval de ouweren die neit mitdeige, terwiel bie Berg sjus de jongere ut lete aafweite. De Sjter vets deige ut rustig aan en de rust woort bereik mit unne 2-0 veursjprong dankzij goals van Levi Nelissen en Misha Dreessen. In de rust woort d r door mit name Levi get gemok euver ut sjloapwanjeltempo. Willem reep doa op Levi (dae in ut achtesjte deil van ut kleidlokaal aan ut kalle woar) tot de orde. Willem: Levi, loesterse auch effe? Willy wult get euver de wedsjtried zegke. Willy: Sjpaar doe dich dae oam maar veur de gemeinteroad, sjlumme. In de tweede helf ging ut tempo iets omhoog taege IVS dat nog maar mit 10 man op ut veldj sjting, en dat leidde tot doelpunten van Rob (2x) en Misha, womit de score op 5-0 koom. IVS houw euveriges al onger de rust gevroag aan leider Willem Thewissen om Fer Omani zien jubileumgoal te loate make in de tweede helf. Piele woar op de hoogte, maar houw tot 10 minute veur tied nog gein kans gehad om Fer opzichtig te loate loupe. Doarom woort auch de res van de ploug ingeseind. En warempel in de letste minuut woar doa de ultieme kans om Fer te loate doorloupe. Hae leep sjoon mit, mit unne medesjpeler, allein op Rudy aaf. Dae maakte zich op om opzie te duke, maar de medesjpeler van Fer besjloot zelf te scoren. Dus nog maar un minuut doorgesjpeeld en nog unne keer Fer loate doorloupe en dit keer moch hae waal scoren. Eindsjtandj 5-2.
Noa aafloup sjmaakde de door Mat Creemers geregelde sate prima en woort d r nog lang noafgekald euver de eesjte sezoenshelf. Willem wis zelfs te melje dat d r un nuuj aanmelding woar. Willem: Jonges veer hubbe un nuuj aanmelding gekrege via Danny: Remco Hulst. Piele: Dat is unne goeie. Dae lup veul. Mat: Dat venj ich noe sjiek, dat d r auch waer get jonger men bie komme. Willem: Joa, want es Will Leurs dich onverwachs wegvilt, hubse un groot gaat. En effe later besjloot Willem de oavend mit un terechte constatering. De reactie van Eddy woar euveriges aeve terech. Willem: Jonges, ich hub ens gekeke, maar zonger Gerard Martens hubbe veer geine eine verloare. Eddy: Doe deis angesj auch al unne ganse tied neit meer mit Van de veteranen sjakele veer euver noa os driede elftal. Dat moosj in Aelse de derby der derby s sjpele taege Haslou 5. Unne wedsjtried wo al waeke haer woar oetgekeke. En de twee teams sjtelden absoluut neit teleur want noa 90 minute sjprankelend voetbal woort d r aafgesjloate mit unne 3-3 eindsjtandj. De neutrale toesjouwer loog helaas nog mit unne kater in bed, angesj woar dae zonger twiefel de grote winnaar gewaes. Doelpunten van De Sjter-kantj kome op naam van Thijs Kemp, Mick Cremers en Mike Schippers. De mannen van 3 sjleite doamit de eesjte sezoenshelf aaf in de middenmoot mit 11 punte oet 8 gesjpeelde wedsjtrieje. En dan hubbe veer nog maar ein team te besjpraeke en dat is os eesjte elftal. Die houwe ongerhauve waek geleje doordewaeks veur de baeker gesjpeeld taege derdeklasser Langeberg. Veuraaf woort unne pittige wedsjtried verwach maar in de praktijk veel dat heel erg mit. Unne verzjwaakte taegesjtenjer en un op en top gemotiveerd De Sjter zurgde veur unne sjprankelende wedsjtried van ozze mannen. De eindsjtandj van 1-6 leet niks aan dudelijkheid te wunsje euver. Dikke pluim aan Frank Haenraets dae unne prima pot sjpeelde in de basis en aan Jari Knoops en Cyril Bruinen die verdeinstelijk invele. De goale woorte euveriges gemaak door Maarten (2x), Thijs (2x), Hassan en Giel. Noa die doordewaekse baeker-euverwinning, houwe de mannen van 1 veurig weekend un vriej weekend vanwaege de algehele afgelasting. Un ideaal moment veur Roel Heffels om ens flink door te zakke same mit zien maedje. Helaas veur Roel veel de alcohol bie Jill get minder goud, wodoor d r waal veul gelache woort, maar d r neit ut toetje koom, wo op Roel geraekend houw:
En dan woort t tied veur ut sjoonste affiche van ut joar: de derby taege Caesar. Zoaterdigoavend 16 december 2017. Unne datum dae bie de aanwezigen veur de eeuwigheid in ut geheugen gegrift zal zeen. Althans bie die oet Sjtein haha. Elftalleider Frans Beaujean deit versjlaag: Om 6 oer arriveerden de eesjte sjpelers in Baek in ut Caesar-amfitheater wo de grandioze veldjverleichting al sjus tot aan de sjtroat te zeen woar. Jean Maas hei uiteraard speciale gevuiles bie deze wedsjtried want es jong van Baek (en al mit 16 joar in ut eesjte sjpelend) deit dat get mit dich. Veur Caesar sjting de winjtertitel op ut sjpel. Veur De Sjter ut behoud van de aansjleiting noa boave toe, zodat waer omhoog gekeke kent waere. Caesar houw nog geine wedsjtried verloare, dus ut woar veuraaf dudelijk dat veer mit un moeilijk te kloppen ploug te make houwe. Mit un aantal gerichte versjterkinge en un hoog gehalte aan neet Baekse jonges zeen hun ambities dudelijk: promotie noa de eesjte klas, un ambitie mit allure. Onger in de catacomben woar ut lekker werm en Jean begoosj mit zien wedsjtriedbesjpraeking. Piet Vos moosj (ozze grote knuffelbaer) moosj achter Jean oet want es hae kalt wult hae jederein kenne aankieke en nemes in zien rugk hubbe. De opsjtelling woar es volgt: Kis: Geoffrey Achter: Wantelic, Davy, Guido, Roel Midden: Timo, Thijs, Stan Veur: Hassan, Maarten en Giel Bank: Marko, Mike, Bob en Richard Kloksjlaag hauf 8 floot sjeidsrechter Hodzelmans oet Echt veur ut begin. Op ein veldj wo op (zo wie helaas al 15 joar bekend) goud voetbal vriewel onmuigelijk is, probeerde De Sjter dat
meer es Caesar en woar voetballend de baetere ploug. Veul ging euver de linkerflank wo Hassan ijverig werk verrichtte mer nog neet geveerlijk woar. Tot ut moment dat hae eine beste sjtaekpass kreeg van Stan, dae Hassan rech op ut doel van Caesar aaf deig sjtorme. Helaas hubbe ze bie Caesar nog ummer vlaggeniers van ut vleegveldj gedetacheerd en dae vlagde un absoluut neet-boetesjpelmoment aaf. Joamer Willem Verhoeven Thewissen en ziene manager Peter Smeets pakten de taak op om dat de grensrechter op un nette maneier dudelijk te make. Dit alles gebeurde onger toezeend aug van un beheurlijk aantal luuj oet Baek, Sjtein en omringende durpe. Eine opvallende aanwezige woar Graad Smeets. Dae is doorgoans allein bie thoeswedsjtrieje aanwezig. Frans Beaujean wis te vertelle woarom Graad veur deze keer un oetzunjering houw gemaak: Noe ut doordewaeks te koud is om te vusje en euver de kilo s vangst op te sjuppe, is Graad dekker thoes en dit bringk nogal get wrieving mit zien eega Mie mit zich mit. Mie houw dus taege Graad gezag: noe gangk estebleef noa ut voetballe kieke, dan ben ich dich effe kwiet. Ich ben blie esse dalik waer kens goan vusje. Maar goud. Terugk noa de wedsjtried. De Sjter bleef aandringen via wederom un goei ongersjupping van Stan en dito pass op Thijs, dae euver rechs de deipte in ging, zien vleugels oetzat en vertrokke woar. Thijs goof unne prima veurzet op moat veur ozze goalgetter Neuhaus, dae de 0-1 aanteikende. Op dat moment unne verdeende veursjprong via un prachtige goal. Noadat Geoffrey unne supersave houw gemaak op unne inzet van Mo Hegic, woar ut toch Caesar dat in ein grote verdachtmaking van boetesjpel de 1-1 maakte door de sjnelle Tim van de Geijn. Ozze grens Marco Vaessen is noe eenmaal unne topdarter en geine werknummer van Maastricht Aachen Airport. Door sjlordigheden in de Sjteinder defensie kreeg Caesar noe kansen. Oet unne corner bie de eesjte poal veel ietwat klunzig de 2-1 binne. Grrrr En vlak veur rust leidde un misversjtandj in de verdediging tot unne zoere 3-1 tusjesjtandj. Balen omdat ver absoluut neet de mindere woare van Caesar. Onger de rust goof Jean aan dat nog niks verloare woar. Veer voetbalden baeter, allein moosjten veer oszelf goan belonen. Uiteraard hinge de kupkes aanvankelijk omleeg in ut lokaal. Mer Jean kreeg op zien maneier toch waer de koppen op door zich es trainer in ut hart van de groep te verplaatsje. Noa boete en d r veur goan! Ut woar dudelijk dat de Sjter-mannen dit oppakten. Waer woare veer de baetere partie. Bob koom d r in veur de goud sjpelende Stan, om nog meer power en daadkracht op ut middenveldj te brenge. De eesjte kans woar veur Sjtein door unne sjeut van Neuhaus dae op de lat eindigde. Ut zoot neet mit. Effe later in de omsjakeling van Caesar unne geveerlijke counter dae door de sjnelle Tim van de Geijn onhoudbaar woort aafgerondj: 4-1 veur Caesar. Dit woar bekeke, dachten ze in Baek. De DJ begoosj alvas op te boewe veur de afterparty. Maar, zo wie gezag, De Sjter woar de baeter voetballende ploug en rechtte de rugk. Bob won alle duels door de loch en euver de grondj en ut offensief woort ingezat. Oet unne corner
kupte de mit op gekomme Davy de 4-2 taege ut netje in de 66 e minuut. De Sjter bleef komme en in de 70 e minuut volgde waer unne corner. Davy ging waer mit noa veur, kreeg de bal veur de veut en scoorde de 4-3. De Sjter rook blood, doa wo vruiger in ein amfitheater de gladiatoren vochten wie leeuwen, zo sjpeelden ozze gael-zjwarten in Baek. Hassan hei mit Giel geruuld van kantj en beiden koame geregeld geveerlijk door euver de flanken. Mit name Giel koom sjteeds baeter in zien ritme. Dae zelfde Giel duujde de bal in ein scrimmage veur de Baeker goal achter de doellien. Hoppa 4-4, ongeluifelijk! Caesar woar knocked-down en De Sjter vuilde dat d r nog meer in zoot. Mit nog 5 minute op de klok woort ozze aal Nieuwland op rechs de deepte ingesjtuurd. Thijs pakte de bal mit, controleerde, keek, en neet egoïstisch goof r de bal veur. Maarten houw dat natuurlijk al lang gezeen en woar ter plekke veur de 4-5!!!! Ongeluifelijk wat un wederopsjtanding. Dolle taferelen langs de kantj en unne haup Sjtersjpelers op ein. Noa nog un hachelijke situatie in de letste seconden, bie unne corner, wo Geoffrey nog unne rood-witte kerstbal op zien naas kreeg, floot sjeidsrechter Hodzelmans veur ut einde. Wat unne wedsjtried! Klasse mannen. In oetzichtloze situaties leet un team zeen dat men un team is. Dat is naeve de drie punten de belangriekste winst. Pfff krieg d r nog kippevel van. De euverwinning woort vanzelfsjpraekend flink gevierd en bejubeld op ut veldj, in ut kleidlokaal en in de kantine. De foto wo op verleizend trainer Danny Volkers wurt geïnterviewd en winnend coach Jean Maas geduldig wacht op zien beurt illustreert geniaal ut versjil tusje winst en verleis. Kiek allein maar noa dae smile van Jean. Wat mich betruf de foto van ut joar:
En omdat ut toch waal erg leuk is om triomfantelijke foto s noa unne gewonne derby te bekieke: Alleh dan, nog un paar om ut aaf te lere Mannen, klasse gewirk zoaterdig. En noe mit un heerlijk gevuil de winjtersjtop in, effe lekker bie-tanken en dan de tweede helf van ut sezoen volle gaas veuroet. Proficiat! De aafsjleiter van dees waek geit euver unne man, dae pas un hauf sezoen voetbalt bie os clubke. En toch hubse ut gevuil dat hae al bie ut meubilair heurt. Geboare in Montenegro is hae ein van de weinige inwoners van Sjtein dae zich get kent veursjtelle bie t woord oorlog. Dae versjrikkelijke burgeroorlog in Joegoslavië dreef m noa Limburg, wo hae zich inmiddels haet gesettled in Sjtein. Veer hubbe ut euver Jenki Jevric. Veulen kenne m al joare es de pap van de goedlachse publiekslieveling Marko. Troew volg hae vriewel alle wedsjtrieje van ziene zoon. En dus is hae al joarelangk veul te vinje in de
kantine op t Hetjen. Voetballe deit r zelf auch nog ummer. Tot veur kort deig hae dat echter neit in Sjtein maar un paar kilomaeter wiejerop in Baek. Sjpelend veur de veteranen en leger elftalle van Caesar maakte hae doa veule joare furore. Mit Jenki witse ummer al vanteveure watse krigs: 90 minute inzet, verbetenheid en hypnotiserende sjienbewaeginge. En noa aafloup van de wedsjtried lekker get ouwehore en lachen aan de teek. Ut maakte veur os eigen veteranen- en seniorenteams de joarlijkse wedsjtrieje op ut beton van baek nog enigszins draaglijk. De weitensjap datse in jeder geval onger de wedsjtried waer effe versjteld koosj sjtoan van un actie van Jenki en datse noa aafloup gezellig eine koosj drinke mit m. Joarelangk woort d r in Sjtein gelobbyed veur ziene komst. En dit sezoen zat hae eindelijk de sjtap. Jenki ging voetballe veur os veerde elftal. Temidden van deze gevallen godenzonen moosj hae nuuj elan brenge. En dat haet hae zeker gedoan. Al 5 keer trefzejer dit sezoen, diverse assists op ziene naam, 100% aanwezigheid en ummer 200% inzet. En dat op 50- joarige laeftied, waekelijks sjpelend taege sjpelers die jonger zeen es zien zoons. Daezelfde Jenki keek al waeke oet noa de letste wedsjtried van os eesjte elftal veur de winjtersjtop. Oet taege Caesar. Ziene zoon, voetballend taege zien ouw clubke, dat nog ummer un plaetsjke in Jenki s hart haet. Dat moosj toch geneite waere langs de lien, houw hae zich bedach wie ut competitieprogramma in augustus woort gepresenteerd. En doa sjteisse dan op unne ieskouwe zoaterdigoavend. Zestig minute langk haet Caesar de ploug van diene zoon op de pienbank gelag. 4-1 achter. Tied om noa hoes te goan? Nae, zo is Jenki neit. Dae drink de gifbaeker mit verbeten blik gans laeg. En besjtelt d r dan geweun nog eine. Want wat mosse thoes doon? Maar Jenki woort zoaterdig beloond veur zien geduld. Tezamen mit de angere Sjteindenaere die de kou houwe getrotseerd, zoog hae ein van de sjoonste comebacks oet de historie van os clubke. De ploug van ziene zoon boog unne 4-1 achtersjtandj om in un 4-5 euverwinning. Dat moosj gevierd waere! En dus dronk Jenki zich d r eine, en nog maar eine ach, en nog maar eine. Ut woar inmiddels 3 oer gewoare en de barman van Caesar goof Jenki de keuze: of doe geis noe nao hoes, of ich gaef dich de sjleutel en dan sjlutse zelf de kantien maar. Tied om de tillefoon te pakke dus. Wie vaak houw hae neit ein van zien zoons midde in de nach opgehoald in un goddeloos oord. Ze zouwe hunne pap noe toch vas waal komme ophoale Jenki kreeg echter nul op t rekest. Nemes koom m hoale. De kantine woar toe, ut vroor en dan sjteisse doa in Baek en mosse noa Nieuwdorp. Maar ach, Jenki houw waal erger dinger gezeen en mitgemaak. De kraag van de jas omhoog en door de kouwe duusternis maakte hae te vout de tocht noa Sjtein. Thoes gekomme om 4 oer, lag hae zich in bed. De wekker woort gezat, want d r moosj murge gevoetbald waere. Zien ploug raekende op m. Wie sjmurges de wekker ging, wreef hae zich ens euver zien köpke. Hae houw zich waal ens baeter gevuild. Maar ach, d r is toch niks lekkerder dan voetballe. Ut tesjke woort ingepak en sjoon op tied meldde hae zich in de kantine bie de mannen van 4. En 95 minute volle gaas voetballe later, dronk hae zich nog eine op de euverwinning van ziene zoon.
Hae is de verpersoonlijking van doorzettingsvermogen, geteikend door ut laeve, vaak al geboage maar nooit gebroake. Dat r nog maar lang veur os clubke moag voetballe en nog veul langer ziene zoon langs de lien moag aanmoedigen om noa aafloup gezellig eine te drinke. Lang laeve Jenki Jevric! Fijn feestdaag allemoal, veul sjpas bie de hallenmasters en tot in 2018! Rob Sjulpe