Valsje sjtart veur De Sjter 1; Jari Knoops topper van ut weekend! Aafgeloupe weekend is t nuuje sezoen eindelijk van sjtart gegange veur n aantal teams binne os vereiniging. Zo mochten De Sjter 1 en 2 eindelijk aan de bak veur de competitie, noa n lange veurbereiding en succesvolle baekerwedsjtrieje. Auch ut driede en de dames voetbalden dit weekend, maar die teams deige dat nog in t kader van de baeker. En tot sjlot sjpeelden auch de veteranen dit weekend eindelijk hunne eesjte wedsjtried van t sezoen, noa twee eerdere aafgelasjte duels. De oetsjlage lete n wisselend beeld zeen. Os eesjte kende unne valsje sjtart en verloor op bezuik bie UOW verrassend mit 3-2. Ut tweede houw t achterin prima veurein maar koosj veurin gein potten braeke en heel dus 1 punt euver aan heur doelpuntloze ontmoeting mit Susteren. Ut nuuje (doa euver later meer) driede sjpeelde, onger leiding van coach Rene Tsunami Gooren, in n wervelende voetbalshow De Heeg 4 van de mat en pakte un nette baeker-euverwinning. De dames dolven, ondanks (of wellicht: es gevolg van) t trainingsregime van Sjteins meest welbespraakte voetbal-filosoof Gerard Martens, t ongersjpit taege de dames van Schaesberg. En op zoaterdigoavend houwe de veteranen, mit dank aan de breidte van heur selectie (8 wisselsjpelers taegeneuver eine wisselsjpeler bie de taegesjtenjer), t weekend aafgetrap mit n 4-2 euverwinning taege SC Leeuwen. Maar, zo wie t geer gewend zeet, in dit versjlaag gein oetgebreide analyses veur de wedsjtrieje, maar veural unne houp sjtomme kal om t voetballe bie en n beknopte samenvatting van de femieje-daag van de veteranen van aafgeloupe zondig. Dus loate veer maar sjnel beginne. En dat beginne doon veer dees waek ens bie os eesjte elftal. Dat kende n iezersjterke veurbereiding, wo in (vriewel) alle oefen- en baekerwedsjtrieje euvertugend woorte gewonne. En mit de winst van t Maaskant-treffen, nota bene in Aelse, moch auch alvas de eesjte pries waere biegesjreve. Coach Czornyj leet de coaching dan traditie-getroew euver aan ziene assistent, sinds hae bie zien eesjte optraeje d r debet aan woar dat De Sjter veur t eesj sinds 1946 neit t Maaskanttreffen won. Sindsdien haet assistent Rudy Crutzen drie keer op rie de baeker opgehoald. En dat is veur beginne coach Crutzen toch alwaer de veierde hoofdpries in drie joar tied (de promotie mit De Sjter 2 van 2 joar geleje, sjloan ich nog nét get hoger aan). Maar goud, un zeer goeie veurbereiding dus veur os eesjte. De ploug is ten opzichte van veurig sezoen sjlechs zeer beperkt gewijzigd. Barney van de Heide en Wesley Thompson sjpele dit sezoen bie respectievelijk SVE en Neerbaek. Veur hun in de plaatsj zeen de talentvolle Sjteindenaere Mike en Timo Haberland, veurmalig GSV-captain Guido Rutten, veurmalig Scharn-topscorer Guillermo Kroon en veurmalig Caesar-keeper Geoffrey Jacobs de selectie versjterke. In de begeleidingsstaf is d r dit sezoen auch ein toevoeging. Coach Czornyj houw, sinds t wegvallen van de bie jederein geleifde Jack Dassen, emes extra neudig in zien sjtaf. Dae persoon is gevonje in Frans Beaujean. Frans is al joare vaste supporter bie De Sjter 1, zien kinjer voetballe d r en hae traint inmiddels auch nog ens de B2. Noa mien meining un zeer waardevolle versjterking veur de sjtaf. Emes dae op voal gebieden toegevoegde waarde haet.
Mit die goeie veurbereiding en de genuimde versjterkingen reisde os eesjte aafgeloupe weekend aaf veur heur competitie-oapening taege t gepromoveerde UOW. Aan dat terrein beware ozze mannen goeie herinneringe want dat is t terrein wo op un aantal joare geleje de zo lang begeerde promotie noa de 2 e klasse woort gerealiseerd. Destieds sjting os eesjte op de letste sjpeeldaag nog 2 punte achter op koplouper Veritas. De Sjter sjpeelde oet taege UOW en Veritas moch t thoes opnumme taege t al oetgevoetbalde MMC Weert. De Sjter deig heur plicht en won aafgeteikend mit 4-0, maar woort compleet verras wie t nuujts koom dat Veritas verloare houw. Dat leverde destieds n groot feest op, dat woort aafgetrap op t complex van UOW. De joare doanoa woort de term UOW-oet un begrip bie de sjpelers van De Sjter 1. Hoewel UOW die joare in un angere klasse sjpeelde, volgde sjteevas op de vroag taege wae sjpeelt geer eigenlijk kommend weekend? ut antjwoord UOWoet. Helaas zal die traditie noa aafgeloupe zondig waarsjienlijk komme te vervalle. Want ozze mannen sjpeelden, volges alle aanwezigen, hunne zjwaakste wedsjtried van de letste 2 moanje. Coach Czornyj sjtuurde zien ploug de wei ( t woar un richtige wei, want t graas sjting tot knei-hoogte) in, in de volgende formatie: Kis: Geoffrey Achter: Roel, Paolo, Guido R., Stan Midden: Ricardo, Guido C., Ikram Veur: Thijs, Guillermo, Luc Ozze milfhunter Randy Wanten en defensie-leider Davy Hodselmans zeen nog hersjtellende van operaties, en Hassan woar in Marokko om t graaf van ziene pap te bezuike. Euveriges sjpeelde Guido Rutten waal 90 minute mit n maske, vanwaege n gebroake naas. Gelukkig veur Guido besjik De Sjter euver n geweldig medisch team mit voal know how op dit gebied, in de persoon van verzurger Wesly Wanten, en specialist in t rechzette van sjeif naze, Willem Thewissen. Euver de wedsjtreid zelf bereikte mich weinig relevante informatie. De Sjter koom op un 1-0 veursjprong via Guillermo Kroon. Nog veur rus teikende t defensief sjpelende (wo niks mis mit is) UOW de 1-1 aan. Noa de rus koom UOW auch nog op veursjprong. In die fase toonde De Sjter, ondanks t belabberde sjpel, waal nog veerkracht en koom via unne knappe pegel van captain Guido Cals op 2-2. Helaas woort 10 minute veur tied esnog de 3-2 geïncasseerd en woar t aan unne door Geoffrey gesjtopte pingel te danken dat t leed neit nóg groter woort. Unne valsje sjtart dus veur os vlaggesjeep. Kommend weekend echter kans op revanche taege t oet in de eesjte klasse gedegradeerde Sporting Heerlen. Un ploug die ongetwiefeld waer geliek heur vertroewde plaatsj zal innumme es misselijkste ploug van de 2 e klasse (en dat zaet get mit auch Heer en Geusselt Sport in de klasse). Des te meer reje om de nederlaag van aafgeloupe weekend te revancheren mit unne goeie pot taege Haerle. Kwaliteit is d r in jeder geval genog bie ozze mannen. Die goan os nog genog loate geneite dit sezoen.
Van ut eesjte sjakele veer euver noa de mannen van 2. Deze talentvolle groep woort 2 sezoene geleje nog kampioen in de 1 e reserve klasse en moch dus veurig sezoen ens ruke aan de door Brabantse mega-vereiniginge gedomineerde hoofdklasse. En dat woort n leuk en leerzaam avontuur, wo in de ploug veelvuldig complimenten kreeg veur t vertoonde positieve sjpel, maar zich oeteindelijk toch moosj neerlegke bie de degradatie. Dat leidde gelukkig neit tot unne laegloup. Vriewel de ganse selectie bleef intact. Allein Charaff en Twan van de Woude vertrokke noa respectievelijk Neerbaek en Havantia. De selectie woort aangevuld door t vas doorsjuve van A-junioren Sjoerd Vanmulken en Bob Dukers. Jonges, die veurig joar auch in de hoofdklasse prima euverein woare gebleve es ze mitdeige. En doanaeve zeen auch ouwe rotten (en veurmalig sjpelers van de legendarische zoepnaze van De Sjter 4) Pascal Conjour en Kenny Lemmens de selectie van 2 komme versjterke. Kenny vertrek euver un tiedje es militair op oetzending en traint dus veurluipig allein mit, terwiel Pascal auch besjikbaar is veur wedsjtrieje. Euveriges moag bes gezag waere dat euver Pascals euversjtap aanvankelijk lacherig woort gedoon door voalen, maar dat hae dees veurbereiding op alle sjpelers en trainers unne hele sjterke indruk haet gemaak. Klasse Pascal! Os tweede wis zich, via twee euverwinninge, auch te plaatsjen veur de volgende baekerrunj en houw dus auch un prima veurbereiding. In die veurbereiding veel euveriges veural t frivole aanvalssjpel op en leek d r defensief nog get te verbaetere. Dit letste auch al, omdat sjterkhouwer Joep Nacken, vanwaege zien werk, neit jeder weekend kent mitdoon. Taegesjtenjer woar Susteren, grappig genog auch al de taegesjtenjer taege wae os 2 e kampioen is gewoare 2 sezoene geleje. Os tweede sjtartte es volgt: Kis: Esat Achter: Sjoerd, Joep, Jari en Steve Midden: Amir, Bob en Mike Veur: Frank, Marko en Youri De wedsjtried woar van beide plouge neit geweldig. Beide teams krege weliswaar get kansen maar euver de ganse wedsjtried bezeen houwe de aanvallers t vizier neit op sjerp sjtoan, ontbrook t aan echte dreiging en woare de beide defensies de baas. Oetblinker aan de kantj van De Sjter woar Jari Knoops. Telg oet de befaamde Sjteinder voetbalfemieje Vankan kreeg hae t voetballe mit de paplaeper ingegoate. Al van jongs af aan woar t terrein van De Sjter zien thoeshaven. Van jongs af aan leerde Jari echter auch al de geneugten van ozze veurtreffelijke kantine kennen. Doa in ligk auch de oorzaak dat hae t voetballe nooit echt helemoal onger de knei haet gekrege maar dat hae waal des te baeter haet lere zoepe. Doanoaeve is Jari auch nog unne geweldige clubman, dae ummer oethulp bie jeugdactiviteiten. Dit sezoen is hae auch nog ens assistent trainer van de C1, samen mit zien maatje, Roel Heffels. C1 hoofdtrainer Stef Conjour pries zich gelukkig mit dit assistenten-duo, mit t idee dat min-min wiskundig gezeen plus is. Euver 5 joar kent Ronny Czornyj bie ut eesjte dus vas en zeker waer un nuuje lichting sjpelers oet de jeugd
verwelkomen die én sjtom kenne kalle én emes lachend doormidde sjuppe én geine bal aafgaeve. Maar goud, veer houwe t euver Jari. Want dat woar de onbetwiste oetblinker van de wedsjtried. De basis veur dae sjterke wedsjtried woort door Jari al in de eesjte 2 minute gelag. Dat begoosj wie de sjpits van Susteren m aansjprook vlak noa de aaftrap. Sjpits Susteren: Jij krijgt een moeilijke middag. Ik heb nog bij Fortuna gespeeld. Jari: Goud dasse t zaes, sjtamp ich dich bie de eesjte 2 bel geliek op de enkele. Sjpits Susteren: Nee, voetbal alsjeblieft normaal, ik kan daar niet goed tegen. En geer roajt t al: d r sjtinge 2 minute sjpeeltied op de klokken, wie de sjpits van Susteren al 2x pienlijk aan zien enkele gevuild houw. De res van de wedsjtried is neit voal meer van m vernomme. Jari woar dus heel sjterk, maar auch de Benjamin van de ploug, Bob, moag un compliment kriege. Hae woar waer energiek en sjterk in de duels wie ummer. Helaas woar t neit genog veur de eesjte driepunter van t sezoen, want de wedsjtried eindigde, zo wie hae begoosj woar: 0-0. Volgende waek op noa de eesjte drie punte. Dan goan veer door noa ut driede. Die moosjte voetballe veur de baeker en dat haet effe get toelichting neudig. De aafgeloupe seizoenen kent geer ut driede nog es de godenzonen die un paar seizoene geleje nog de kampioens-sjoal pakten. Mannen wie de onverwoestbare Ralph Gladiator Doek, Jos Op de sjtropdas Ostendorf en balvituoos Rene Tsunami Gooren sjtuwden ut driede, onger de bezielende leiding van coach Mark Habets en vlagger Paul Janssen, joare langk omhoog. Die mannen hubbe echter besjloate om un treetje leger te goan voetballe, in de hoap dat t voetballe op t zachte graas van veldj 2 in plaatsj van t toch sjtroevere en hellere kunstgraas van veldj 1, d r veur zurg dat coach Habets minder dan drie kere in ein joar ziene vout geit braeke. De ouwe vedetten van 3 maken plaatsj veur de jonge honden van ut veurmalige viefde. Die mannen houwe de veurbieje 2 seizoene de Will Griggs van de Lage Landen, Bob On Fire Schoutropp in de gelederen en woare toe aan un sjtepke omhoog. Wat ze dan waal nog neudig houwe woar unne goeie trainer. Want Marco Vaessen houw t de letste joare es vlagger en hoofd-regelaer van ut viefde, prima veur elkaar mit de jonges, maar d r woar behoefte aan unne extra impuls van boetenaaf. Emes dae de jonges aan t traine kreeg, dae de zaak tactisch goud koosj neerzetten, dae via vlammende besjpraekinge de groep tot grote hoogten koosj brenge. Wie dae persoon echter nurges te vinje woar, lag men zich oeteindelijk maar neer bie n joar coaching door Rene Gooren. Maar, ere wae ere toekump, Rene haet de sjpelers van 3 waal aan t traine gekrege en dat is geweun un goeie zaak. Zowel veur doorsjtruimende jeugdsjpelers es auch veur de kwaliteit van t sjpel van ut driede. Mit Rene aan ut roer sjpeelden de Beesten van 3 aafgeloupe weekend unne baekerwedsjtried taege De Heeg 4. En t woort n woare gala-veursjtelling, aldus coach Gooren zelf:
Aangezeen de sjriever van dit sjtuk aan kritische hoor- en wederhoor deit, woort auch nog effe get wiejer geïnformeerd, bie vedette Mike Schippers. Dae woort echter geliek waer euver-sjreeuwd door ziene coach:
Van ut driede goan veer euver noa n ploug die dit sezoen auch unne nuuje trainer veur de groep haet: ozze dames. Dat team besjik inmiddels euver de meest oetgebreide trainers-staf van de ganse vereiniging, in de personen van oud-sjpeelsters Kiki en Cindy, alleskunner Tom de Keul en de nuuj toegetraeje veteraan (en papa van sjpeelster Shauni) Gerard Martens. Unne unieke staf mit twee dames die zelf goud hubbe kenne voetballe (en nog ummer kenne) en unne Tom de Keul dae al joarelangk jeugdteams traint en doa euver zelfkritisch zaet: voetballe ken ich ze neit leer, maar ich leer mien teams waal ummer zoepe. En dan auch nog ens de meest unieke aller veteranen, mister genuanceerd, Gerard Martens, es trainer veur de groep. Dat mot waal un top sezoen waere veur de dames. Euver Gerard Martens woort euveriges dit weekend nog ens de anekdote opgehoald dat Wim Koevermans (oud prof, oud international, Europees Kampioen in 1988) mitsjpeelde mit de veteranen van De Sjter. Koevermans houw zich omgekleid en heurde dat de opsjtelling woort veurgelaeze. Ziene naam woort echter neit genuimp. Koevermans: En waar speel ik? Coach: Doe begins op de bank. Kense os sjpelke eesj ens rustig bekieke. Koevermans: Maar ik ben Wim Koevermans! Gerard: En ich Gerard Martens. Doa ligk nog un vlag. Doe kens de eesjte helf vlaggen, kut. Maar veer dwalen aaf. De dames sjpeelden dit weekend taege Schaesberg en dat woar geliek unne pittige taegesjtenjer. Coach Gerard houw de dames dan auch goud euver de kling gejaag de aafgeloupe waeke, om ze goud besjlage ten ies te loate komme. Sjpeelster Robin Martens houw un oetgesjproake meining euver de aanpak van heure coach:
Helaas koosj Gerard zelf neit bie de wedsjtried zeen. Op vriedigoavend sjikte hae doarom unne mail noa mede-coach Tom Keulen, wo in hae zien tactisch plan ontvouwde: Of t aan de traininge van Gerard loog, of aan t door Tom de Keul neit begrepe tactisch plan, of geweun aan unne iets baetere taegesjtenjer, is mich neit bekend. De dames dolven echter t ongersjpit, ondanks luide toejuichinge langs de kantj van de kinjer van oud-sjtervedetten Roger en Manon Quaedvlieg en ondanks de speciaal door De Keul ingehuurde euvervleigende wensballon. Dat de wedsjtried auch nog ens un paar keer ongerbroake
moosj waere door t onwaer én door sjeidsrechter Robert Kraus, dae zien fluit in de rus in de kantien houw loate ligke, maakte t al mit al unne wedsjtried om sjnel te vergaete. Maar mit deze fantastische begeleidingsstaf kump t dit sezoen waal goud mit de dames. Zo, noe rest os nog maar ein team dat dit weekend voetbalde. Eindelijk koosjten de veteranen auch aan de bak. Noa twee aafgelasjte wedsjtrieje doordat taegesjtenjers gein elftal op de bein koosjte brenge, sjting dit weekend de topper taege t ummer über-fitte Lanaken op t programma. Helaas bleek d r get mis te zeen gegange in de communicatie wodoor Willem Thewissen op vriedig moosj loate weite dat Lanaken neit koosj komme. Dat leverde unne houp gegrouwel op via de e-mail. Roger Daemen informeerde of dit beteikende dat de contributie nog auch omleeg ging, aangezeen d r al drie wedsjtrieje neit doorginge. Robert Kraus troaj corrigerend op door terugk te mailen: Doe hubs auch nooit economie gehad op sjool, zo te laeze. Door de gemise kantine-omzet mot de contributie sjus omhoog. Wie die mededeiling veur de nodige onrus zurgde, brach Willem Thewissen, noa euverlegk mit captain Mat Cremers gerussjtellend nuujts: Allemoal leuk en aardig, maar jederein houw zin om te voetballe. Gelukkig haet Jos Driessen unne collega dae voetbalt bie de veteranen en dae vertelde dat ze auch niks te voetballe houwe. En dan is 1 plus 1 sjnel 2. Jederein bedankte Jos veur t regele dat veer esnog koosjte voetballe. Willem vuilde zich echter te kort gedoan doamit:
Wie dan auch, d r koosj waer gevoetbald waere. Gelukkig maar, want in de zomersjtop houwe de veteranen zich allemoal op hun eige unieke maneier veurbereid op de sjtart van t sezoen. Piele deig dat door get speciaalbeerkes noa binne te wirke op n terras, herintreder Steef van de Woude wirkte zich in t zjweit op de boksclub in Mesjtreich, vedette op de vleugel Math Caanen haet in zien nuuje hoes op de Sanderboutlaan n gans krach-honk loate inrichte en krachmens Willem The Body Thewissen prolongeerde op vakansie ziene titel Mr Cote d Azur 50+ -titel (Jacky Linders won in de 60+ categorie) en haet doanoa allein nog maar op ziene handjdouk gelaege. Coaches Leon en Frens houwe zoaterdig al angere plannen en houwe hun takenpakket veur eine keer euvergedrage aan Roger d n Doam. Dae besjikte euver 19 topfitte sjpelers (inclusief zichzelf). Roger sjtelde zichzelf op nummer 10 op en boewde de res van de ploug doarom haer. Veur de wedsjtried krege eesj de nuujkommers Steef van de Woude en Levi Nelissen hun wedsjtriedshirt plechtig euverhandigd door Willem Thewissen:
Euver die nuuje leden woar euveriges nog unne haup te doon gewaes. Levi woar mit n ruime meerderheid aangenomme, via un sjtumming op de groeps-app. Allein Gerard sjtelde zich formeel op door te zegke dat sjtumming euver nuuje leden op basis van artikel veerpunt-twee allein koosj plaatsjvinje in n twee waeke vanteveure sjriftelijk aangekondigde algemene ledenvergadering, wobie ten minste twee derde van de leden aanwezig is en wobie de nuuje leden mit n gekwalificeerde meerderheid van viefenzeventig procent woorte aangenomme. Althans, ich geluif dat Gerard dat ongeveer bedoelde wie hae sjreef: sjtumme gebeurt bie Lies van Jacobs op de vergadering, dus die kutte motte maar wachte. Wie d r vervolges auch nog euver Steef gesjtump woort op de app, wol Gerard waer d r veur goan ligke. Steef woar immers al ens lid gewaes en woar un paar joar geleje vertrokke. Dat hae noe un zjwoare hartoperatie houw gehad en hae op dokters-advies waer ging voetballe, leverde Steef gein compassie van Gerard op. Gerard bleef dwaesj ligke door te zegke: weg is weg, geine waeg terugk. Die discussie woort pas beëindigd wie Ron Marschal un oer veur de wedsjtried in de groep zei: ja maar Gerard, Steef haet un nuuj hart gekrege dus technisch gezeen is dit neit de ouwe Steef dae ooit weg is gegange. Wie oeteindelijk auch Misha Dreessen binne koom om zich om te kleije (Eddy: Steef, es Misha binnekump, witse dat de letste binne is), trok de ploug noa boete veur de warming up (bie un temperatuur van 38 graden). De wedsjtried behouf neit voal toelichting: Robert Lucassen scoort de 1-0, Math Haagmans sjik unne sjpeler van Leeuwen d r oet, Stef Conjour scoort de 2-0, d n Doam sjtruijt mit sjtaekpasses, Gerard Martens wint n kupduel, Math flut veur de rus, d n Doam zet 8 frisje sjpelers d r in, Robert scoort de 3-0, Willem sjtamp unne taegesjtenjer om, Leeuwen scoort 3-1, Willem lup nog eine om, Stef scoort de 4-1, Leeuwen scoort de 4-2, Willem lup nog emes om en sjteit op t punt om n naas te goan rechzette, Math Haagmans flut aaf, unne haup flauwekul in t kleidlokaal, Rudy Crutzen zaet dat r nooit meer wult mitdoon, nog get flauwekul, Math Haagmans zaet dat r nooit meer kump en jederein geit zich douchen. Business as usual veur de vets. Noa aafloup in t kleidlokaal woar Ron Marschal neit ech onger de indruk van de in mien auge toch waal sjterke rentree van Steef: Volges mich hubbe ze gaar niks aan dich gedoan in t ziekenhoes, Steef, allein un factuur gesjtuurd.
Willem Thewissen woare veural de bontj-gekleurde zukke van stijl-icoon Mat Creemers opgevalle. Willem: Sjieke zukke Mat! Mat: Dat zeen echte Paul Smith zukke. Eddy: Haet de veurige bewoner die loate ligke? Mat (verwiezend noa de dure sjoon die hae ens haet euvergenomme van unne bekende Nederlenjer): Nae, die hub ich van Joop Braakhekke euvergenomme. Robert: Oh, ich dach van Bassie. Rudy Crutzen woar intusje nog kwoad euver t sjlech terugkverdedige en de twee goale die hae doadoor houw motte incasseren. Willem: Maak dich neit druk Rudy, volgende waek geweun waer opnuuj. Rudy: Nae Willem, veurluipig neit meer. Ich ken hie neit taege. Willem: Wat is dan? Rudy: Mich hubbe ze ummer geleerd dat voetballe besjteit oet drie dinger. Nummer 1. Willem: Bel taegehaute? Rudy: Noe kom ich gaar neit meer. Steef bekeek zich dat ens op zien gemaak en zien auge vele inens op de 80 s-style-herenslip van Ron Marschal. Steef: Miljaaaaar Ron, dat is nog get oet de joare taaaaaachtig. Ron: Och verrek, hub ich mich gister de verkeerde mitgenomme oet die dark room. In de kantine vertelde Levi Nelissen dat hae t zo sjiek vonj dat hae zien debuut veur Armada houw gemaak es 16-joarig broekie taege t VV Born van Roger d n Doam. Levi: En d n Doam woar zich 90 minute langk aan t houwe mit ozze veursjtopper. En ich sjtong doa es sjnotaap mit grote auge haer te kieke. Willem: Sjiek he, en noe kumpse m bie de vets waer taege. Levi: Joa, 20 joar later. Sjiek is dat. Ron: Num dien vrouw maar ens mit. Dan zuusse die 20 joar later auch waer terugk. Én dan ként die get! In de kantien woort t neit te laat gemaak zoaterdigoavend. Op zondig sjting d r namelijk alwaer n activiteit op t programma: de joarlijkse femiejedaag van de veteranen. De feestcommissie houw druk vergaderd en woar tot n prachtig programma gekomme. De beoogde boottocht woort volges veurzitter van de feestcommissie, Mat Cremers, op t letste moment aafgelasj in verbandj mit t waer. Wat Mat doamit bedoelde ( t woar immers
25 graden onger unne blauwe hemel) woort neit gans dudelijk. Maar de vervangende activiteit woar perfect. Eesj woorte alle gezinnen ontvange op t architecten-kantoor van Mat in Mesjtreich. Gratis parkeren, koffie en vlaai dat begoosj prima. Vervolges mochten veer allemoal plaatsjnumme veur n geïmproviseerd sjerm wo Mat os boeren get ging leren euver zien Mesjtreich, de sjtad wo deze Sjteindenaer inmiddels alwaer heel get joare woont, wirk en unne Bef- en BreastFuck exploiteert. Mat meldde dat veer os bevonje in Wyck, n gedeilte van Mesjtreich dat flink in de lift zoot sinds hae doa woar komme wonen. Willy de Worm: Houwe ze hie véur das doe kooms nog geine dörpsgek dan? Mat toverde n kaertje van Wyck teveursjien, wovan 25% woort gevuld door river de Maes, en begoosj zien verhoal. Misha (serieus kiekend): Mat, moag ich effe get vroage? Mat: Natuurlijk jong Misha (nog serieuzer kiekend): Sjteit de Maas auch urges op dat kaertje? Wie de 9-joarige Jur opsjting en de rivier aanwees wo laevesgroot t woord Maas biesjting, koosjte veer wiejer. Mat begoosj waer te vertelle euver Wyck dat hae consequent oetsjprook es Wiek. Geboare Mesjtreichtenaer Steef corrigeerde Mat. Steef: Mat, probeer t ens es Wieeeeeeek oet te sjpraeke. Mat: Och kut joa, doe hubs geliek. Eddy: Nae Mat, doe sjpriks t oet es kuuuuuuut. Mat s verhoal eindigde bie n gedicht van unne bekende Mesjtreichter dichter dae poëtisch en enigszins cryptisch t proces besjreef dat hae zelf sjteeds ouwer woort en begoosj in te zeen dat de dames neit meer noa m omkeke es hae door de sjtad wanjelde. Denk doa maar ens euver noa, mannen, want dit is de laevesfase wo veule van os noe inzitte, eindigde Mat. Un treurig sjtummend beeld. Gelukkig loos ich vandaag (dinsdig) op nu.nl t volgende troostende bericht:
Maak uch dus maar neit druk mannen. Wie minder vrouwluuj noa uch omkieke, wie langer dat geer laef. Noa de indrukwekkende oapeningsspeech van Mat woort de groep in tweeje gesjplits: de jongste kinjer ginge mit n paar dames noa de bioscoop. En de res van de groep ging noa beer-broewerie De Keizer. Un unieke gebeurtenis, aldus Mat, want de broewerie geit eigenlijk pas 25 september oape veur publiek, maar veer hubbe de primeur vandaag. Ut eesjte wat de gids un hauf oer later zei: Ich gaef hie al 13 joar rondjleidingen! Mit dae primeur veel t dus waal mit. Al woare veer waal de eesjten noa de letste renovatie. De rondjleiding door de inmiddels neit meer actieve broewerie woar indrukwekkend. De lullige opmerkingen taege de gids (unne échte Mesjtreichse heer) woare get minder indrukwekkend. Gids: Miene naam is Gérard de Vèche. Rene Hillen: Sjraar de Flesj? Gids: Nae, De Vèche. Rene: Oh, ich dach dat ze uch de flesj nuimde vanwaege de broewerie. Gids: En hie taege dees moer gruijt de hop supersjnel omhoog. Jos Driessen: Ich zeen t al, t is klim-(h)op. Gids: Veer goan noe un unieke ruumte binne. Stef: Rene, vroag ens of ze wifi hubbe hie.
En wie Rene Hillen, noa twee oer indrukwekkende rondjleiding un dure, in Hongarije boave giftige kwikdampen gebloaze vaas optilde en get te hel neerzat, leek t ozze gids tied veur get angesj. Gids: Zulle veer dan no eens t beer goan preuve? Rene: Hèhè, ich woar al effe bang dat d r nóg un etage woar. Noa twee neit geweldig sjmakende glazen beier dat gebroewe woar volges recept oet 1913 woorte de kinjer waer opgepik en woort koers gezat noa Sjtein. De auto s woorte thoes geparkeerd en jederein verzamelde zich waer bie Café de Poart. Eesj woort doa un heerlijk chinees buffet kloar van de Chinees op de Mauritswaeg. Unne Chinees wo Rene Gooren vruiger vaker ging sjpele omdat hae bevrundj woar mit de kinjer van de Chinees. Rene vertelde doa ens euver: die houwe zo n groot aquarium boave t restaurant wo unne kleine haai in zjwom. Dat bleek nog unne ganse jonge te zeen. Ich woar mit Kimmie aan t sjpele wie ich inens zoog dat dae kleine haai un anger vusjke opvroot. Ich zeen dat gebeure en vertel t taege Kimmie. Dae sjteit op, lup noa t Aquarium en zaet Foei, jong Haai! Maar goud, de chinees sjmaakte veurtreffelijk. En doanoa woar t tied om un drietal prieze oet te reiken. Eesj koom Willem Thewissen aan t woord, dae in dichtvorm (geweldig gedicht, Willem!) de winnaar van de prestigieuze Graad Smeets Zeiver-award bekendmaakte. De winnaar woar nemes minder dan Misha Dreessen. Unne volkomme terechte winnaar. Misha is neit de grootste moelejan maar zien opmerkingen zeen waal ummer perfect getimed, gortdreug, lekker geacteerd onneuzel, en doamit ummer raak en ummer humoristisch. Proficiat Misha! Vervolges goof Willem de microfoon door aan Mat Cremers. Dae woar helemoal in zien element want hae moch de keuningin van de veteranen goan oetroupe. Euver die oetruiping woar doordewaeks op de app al t neudige te doon gewaes. Leon Fredrix onthulde get euver de sjoute kantj van veurige keuninginne, Ron Marschal vreesde betrap te waere, Dennie leek de discussie in n anger richting te bewaege maar de sjriever van dit sjtuk brach m (mit n verwiezing noa Mat s opmerking euver de contributieverhoging) waer terugk noa de veteranen:
Maar Mat Cremers sjtelde jederein vervolges gerus mit de mededeiling dat de keuningin van 2016 un goeie keuze zou zeen:
Ron Marschal leet vervolges in zien reactie blieke dat hae nemes van de sjpelersvrouwen herkende in dees omsjrieving: Oeteindelijk maakte Mat bie De Poart de winnares bekend en dat bleek de echtgenote van de sjriever van dit sjtuk, Véronique, te zeen. Twintig angere dames hoalden opgelucht oam. Tot sjlot koom de microfoon in henj van veteranen-veurzitter Rene Hillen veur de oetreiking van de gouwe sjoon. Wo de zeiver-award wurt toegekend door Willem en allein Mat besjlis euver de keuningin, doa wurt de gouwe sjoon-winnaar waal bepaald via democratische sjtumming. Al kent dat democratische karakter auch waer enigszins in twiefel getrokke waere esse heurs dat de winnaar n sjtummenpercentage haet gekrege dat tot veur kort woar veurbehaute aan Putin, Kim Jung-il, Khadaffi, Saddam Hoessein en Marianne Coumans (bie de letste sterman/vrouw van t joar verkeizing). De winnaar kreeg namelijk maar leifs 89% van de sjtumme! Maar wat unne winnaar houwe veer auch dit joar. Rene woort sjteeds specifieker in zien omsjrieving. Eesj meljde hae dat t emes van de jonger garde woar (Piele van achteroet de zaal: Auw kut, krieg ich m alwaér neet! ). Vervolges dat t emes woar dae aafgeloupe seizoen zelfs houw lere scoren. Dat r sjtamgast is bie Café de Poart. Dat r kleur bringk in t
team. De winnaar van de gouwe sjoon 2016 is THIJS OTTEN! En volkomen terecht, doa woar jederein t euver ens. Thijs pakte de microfoon. Thijs: Jonges, geweldig dit. Ich houw eigenlijk wulle sjtoppe, maar noe mit deze pries goan ich nog lekker un joar door. Achter oet de zaal: Dan pak m sjnel dae pries aaf! Rene: Thijs, doe bes noe emotioneel. In deze toesjtandj mosse neit terugkkomme op dat soort besjlissinge. Unne geweldige winnaar dae hoapelijk nog heel get joare de letste 20 minute van de wedsjtrieje van de veteranen blif invulle. Unne man auch dae ummer de wedsjtrieje van os eesjte en/of tweede geit kieke. En wo hae bie De Poart zien vaste sjtek haet, haet hae die auch tiedes wedsjtrieje van De Sjter 1. Rechs naeve t vangnet, sjuin achter de rechter doelpoal. Doa sjteit ummer un vas gruupke. Maar de einige dae doa al ummer sjteit tiedes de warming up van os jonges, is Thijs. Dus mannen van 1, es geer kommende zondig uch letste sjprintjes van de warming goat trekke, vlak veur de naas van Thijs, num dan effe de tied om deze fantastische Ster-man te felicitere mit zien euverwinning. De aafsjleiting van dees waek kump van ozze herintredende veteraan, Steef van de Woude, dae unne euver-gelukkige (en ietwat zjwevende) Thijs waer mit beide beinkes terugk zat in de realiteit:
Tot volgende waek! Rob Sjulpe