Toe sê Jesus vir hulle : Kom eet. Nie een van die dissipels het sover gekom om vir Hom te vra : Wie is U, nie. Hulle het geweet dat dit die Here is.

Transcriptie

1 Johannes 21:12 Ds Willem Kotze Toe sê Jesus vir hulle : Kom eet. Nie een van die dissipels het sover gekom om vir Hom te vra : Wie is U, nie. Hulle het geweet dat dit die Here is. Kom eet! 2 Woordjies wat so algemeen is in letterlik elke taal oor die ganse wêreld om vir ete geroep te word : Kom eet! Maar buitengewoon, en die grootste voorreg, as dit Jesus self is wat jou vir die ete roep : Kom eet! Ons weet ook almal wat die effek van hierdie 2 woordjies op n mens het. Jy word na vriende toe uitgenooi vir ete, jy stap hulle huis binne, die eetkamertafel pragtig gedek begroet jou, Heerlike geure uit die kombuis, maar eers vooraf bietjie kuier. Iets om te drink vir elkeen, terwyl die gasvrou die laaste voorbereidings tref en dan die uitnodiging : Kom eet! En dan word jy bedien, bederf, die samesyn, die vrolikheid, die kuier alles begin by : Kom eet by ons! Jesus se dissipels was die hele nag op see, in hulle bootjie, probeer om vis te vang hulle is moeg en uitgeput en honger. n Ontbyt sal nou goed afgaan, en dan die heerlike woorde van Jesus : Kom eet! Maar, broers en susters, hierdie uitnodiging van Jesus aan Sy dissipels vir n vroeë oggend ontbyt word ook voorafgegaan deur n aantal gebeure, wat die uitnodiging van Jesus aan Sy dissipels in perspektief stel. In die eerste plek openbaar Hy homself aan hulle as die opgestane Christus, In die tweede plek beklemtoon Hy hulle afhanklikheid van God En derdens bevestig Hy opnuut hulle roeping. Broers en susters, dit is enkele weke na die opstanding van Christus. Sewe van Sy dissipels is reeds hier by die see van Tiberias, ook genoem die See van Galilea, bymekaar. So het hulle Hom hoor sê toe hulle nog die laaste paasmaal, voor Sy kruisiging saam ge-eet het. Nadat ek uit die dood opgewek is, sal Ek julle vooruitgaan na Galilea toe. Dis hier waar alles begin het. 1

2 Drie jaar tevore. Toe Jesus vir die heel eerste keer in die bootjie van Petrus geklim het, en vir hom gesê het : Vaar uit na die diep water toe en gooi julle nette uit om te vang. En Petrus toe n bietjie teësinnig was : Meester, ons het die hele nag geswoeg sonder om iets te vang, maar op U bevel sal ek die nette uitgooi. En die resultaat : so n klomp vis dat hulle nette wou skeur. Lukas skryf : Hulle was stom van verbasing. Wie is hierdie man? Wat se mag het Hy dat op Sy bevel die see wat die hele nag geen vis gelewer het nie, nou n oorvloed vis verskaf? Toe het Jesus vir hulle gesê : Moenie bang wees nie, van nou af sal julle mense vang. Dis nou 3 jaar later, terug by die See van Galilea in afwagting op Jesus se verskyning. Die sirkel moet voltooi word. Intussen het daar baie water in die see geloop. Hulle is geskool as dissipels, het volwasse geword in hulle geloof. Hulle het saam met Jesus wonderbaarlike wonders en genesings en tekens beleef. Gereeld gevra wie is hierdie man, verstom gestaan oor Sy wondermag, en stadig maar seker gegroei in n verstaan dat Hy Jesus, die Messias, die Seun van God is. Saam die hartseer van Sy kruisdood beleef, en groots Sy heerlike opstanding ervaar en die waarheid besef : Hy is die Here God, Verlosser en Saligmaker. En weer is hulle nou terug by die See van Galilea waar alles begin het. En dit is asof 3 jaar terug se gebeure presies net so herhaal word. Die hele nag op die see, niks gevang nie. Moeg en uitgeput. Hulle is nog so n 100 m van die strand af as iemand in die oggendskemer van die strand af roep : Het julle nie iets gevang om te eet nie? Nee niks, antwoord hulle Hom. Gooi dan die net aan die regterkant van die skuit uit, dan sal julle iets kry, roep die besoeker op die strand. En weer : toe hulle die net uitgooi, kon hulle vanweë die groot klomp vis dit nie weer intrek nie. Opnuut openbaar Jesus aan hulle Sy wondermag nou as opgestane Here n nuwe openbaring van God se genade. Nou, na 3 jaar saam met Jesus, moet hulle opnuut leer hoe pateties en donker jou omstandighede ookal lyk, in God se genade is daar vir jou oorwinning. Selfs die dood kon Hom nie bind nie, en vir almal wat in Hom glo is hierdie genade beskore. Niks nie, nie eers die dood nie, sal jou kan skei van God se liefde nie. 2

3 Die hele nag geswoeg, uitgeput, niks gevang nie, maar in God se genade is daar vir jou oorvloed. Gooi aan die ander kant en beleef die rykdom van Sy liefde en sorg. Dit is die vreugde en die betekenis van Jesus se opstanding vir ons. Ons was vasgekluister aan die donker van sonde en die ewige dood, maar in Christus se oorwinning oor die graf en die dood, lê ook ons oorwinning. Die sonde het nie meer mag oor ons nie, die duiwel het geen houvas en binding meer oor ons nie in Christus en saam met Hom het ook ons die sonde afgesterf, en het ons opgestaan in n nuwe lewe. Watter omstandighede ookal in jou lewe, hoe donker, hoe beproewend, hoe seer -- Die hele nag geswoeg, geworstel, uitgeput, moedeloos Moenie moed verloor nie, gooi aan die ander kant, volhard in geloof en gebed en sien dan die rykdom van God se genade. Die dissipels gooi weer hulle nette uit, aan die ander kant van die skuit, en vanweë die groot klomp vis kon hulle dit nie weer intrek nie. En hierdie keer, geen verbasing nie, geen vraag van wie is hierdie man nie, Johannes reageer oombliklik : Dit is die Here. Wat hier gebeur is genoeg om te besef, dat die besoeker in die oggendskemer op die strand, die Here is, Drie jaar in Jesus se teenwoordigheid het hulle geleer om Sy wondermag te herken, en te kan erken : Dit is die Here. Herken jy nog die Here en Sy werk in jou lewe, broer en suster? Erken jy Hom nog as Here God van jou lewe? Bely jy nog jou afhanklikheid van Hom? Ons het die afgelope week by JP en Leandri de Kock se babatjie se begrafnisdiens mekaar moes troos, vanoggend is ons saam met Derick en Marchelle Venter dankbaar oor die doop van hulle kind. By die een n familie wat huil en hartseer is, by die ander een n familie wat bly is en fees vier maar by albei bely ons, en erken ons : dit is die Here. Erken en bely ons die wonder van Sy genade en liefde Want hoe sal ons staande bly by die dood van n kind as die Here ons nie in Sy liefde vashou en vertroos nie? En hoe sal ons ooit die verbondsverantwoordelikheid by die doop van n kind kan nakom as God ons nie die wysheid van Sy liefde skenk nie? In elke faset van ons lewe erken ons, dit is die Here. 3

4 Elke dag is Sy genade en rykdom vir ons genoeg Hy troos, Hy gee wysheid, Hy versterk ons in ons geloof elke dag moet ek my afhanklikheid van Hom leef, in die wonder van my lewe, Hom raaksien, en uitroep : Dit is die Here. Alles in ons lewens wat met ons gebeur, die vreugdes, die seer, die verbasing, die beproewings, is God se manier om ons te begelei tot by die erkennng : Dit is die Here. Hy vra elke dag aan ons dieselfde vraag as wat Hy daar aan Sy dissipels op die bootjie vra : Het julle iets gevang? Julle het die hele nag gespook, gespartel, geworstel het julle iets gevang? Die Here vra : Hoe lyk jou lewe? Wat maak jy met jou lewe? Is dit maar n gespook teen die donker van die nag, jy spook en spartel om n vis gevang te kry. En Jesus beklemtoon : Leef in afhanklikheid van God! Kom tot besinning en besef dat hierdie lewe nie om jou alleen draai nie, nie vasgevang behoort te wees in n roetine van wêreldse pligte en plesier nie, maar in afhanklikheid van God. Gee aan Hom die eer, erken Hom as die fokus en middelpunt van jou lewe hoor Sy stem, wees aan Hom gehoorsaam, gooi jou net aan die ander kant en leef ten volle in Sy liefde en genade. Uiteindelik as die dissipels die swaar vrag vis op die strand het, die afwagting om in Jesus se teenwoordigheid te mag wees, - dan hoor hulle Sy uitnodiging: Kom eet! Gewoonlik n uitnodiging aan jou beste vriende. Aan hulle wat rondom jou deel is van jou gesin. Jesus vou Sy dissipels toe. Soos n sorgsame ma haar gesin vir ete naderroep, so trek Jesus Sy dissipels weer nader in die binnekring van Sy liefde. Petrus dra nog swaar aan die skuldgevoel dat hy Jesus verloën het, Thomas voel nog steeds skaam oor sy kleingeloof en hoe hy hom in sy kamer toegesluit het, die ander dissipels sukkel nog om Jesus in die oë te kyk, by Sy gevangeneming het hulle weggehardloop, by Sy kruisiging was hulle nie daar nie. Wat beter as rondom die etenstafel, daar op die strand rondom n vuurtjie vir ontbyt, om alles weer reg te stel. Jesus bevestig weer hier hulle roeping as Sy medewerkers Kom eet! En bring van die vis wat julle gevang het, die werk moet vorentoe, saam in die koninkryk van God, By hierdie ontbyt moet die dissipels opnuut in Petrus se woorde antwoord ; Here, U weet dat ons u liefhet. By hierdie ontbyt hoor hulle in die opdrag aan Petrus vir elkeen self : Pas my skape op. By hierdie ontbyt herhaal Jesus Sy roeping aan elkeen van hulle : Volg my. Julle sal nou vissers van mense word! 4

5 Hierna sou Jesus se hemelvaart volg en Sy opdrag aan die kerk van die Nuwe Testament : Gaan dan na al die nasies toe en maak die mense My dissipels doop hulle in die naam van die Vader en die Seun en die Heilige Gees, en leer hulle om alles te onderhou wat Ek julle beveel het. Geliefdes in ons Here Jesus Christus, in Christus se opstanding maak Hy Sy dissipels weer bymekaar wat deur die kruisdood verward en seer gelaat is. In Sy opstanding openbaar Hy opnuut God se liefde en genade. Ook ons het deel aan daardie genade Want ook jy mag hoor : Kom eet! Kom sit aan die bruilofsmaal van die Lam, jy is skoongewas van al jou sonde, vrygekoop van die oordeel van God, nuutgemaak in Christus. Jy is deel van Sy bruid vir wie Hy as bruidegom toevou met liefde en genade tot in ewigheid. Jou plek aan die bruilofsmaal is vas en seker Kom eet! Amen! 5