Geloof verander my PREEK

Transcriptie

1 Geloof verander my Rom 5:8-21 Maar God bewys sy liefde vir ons juis hierin dat Christus vir ons gesterf het toe ons nog sondaars was. (9) Aangesien ons nou vrygespreek is op grond van sy versoeningsdood, staan dit soveel vaster dat ons deur Hom ook van die straf van God gered sal word. (10) Aangesien ons, toe ons nog vyande was, deur die dood van sy Seun met God versoen is, staan dit soveel vaster dat ons, noudat ons versoen is, deur die lewe van sy Seun gered sal word. (11) Maar dit is nie al nie. Ons verheug ons ook in God deur ons Here Jesus Christus, deur wie ons nou die versoening ontvang het. (16) En met die gawe van God is dit anders as met die sonde van die een mens. Op die oortreding van die een mens het die oordeel gevolg en dit het tot veroordeling gelei, maar op die baie oortredings het die genadegawe gevolg en dit het tot vryspraak gelei. (17) Deur die oortreding van die een mens het die dood begin heerskappy voer deur hierdie een mens, maar deur die Een, Jesus Christus, is veel meer bereik: dié wat die oorvloed van genade en die vryspraak as gawe ontvang het, sal lewe en heerskappy voer. (21) Die doel was dat, soos die sonde deur die dood heerskappy gevoer het, die genade deur die vryspraak ook heerskappy kan voer en tot die ewige lewe kan lei deur Jesus Christus ons Here. 2 Korintiërs 3:18 Ons almal weerspieël die heerlikheid van die Here, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe. Dit doen die Here wat die Gees is. PREEK: Met vakansie op Jongensfontein gesels ons een aand met Johan en Renette Louw, vriende en lidmate uit die vorige gemeente, King William s Town, wat ook op Jongensfontein kuier. Hulle het intussen geskuif en Johan boer nou in

2 Vredendal en Renette gee onderwys. Soos dit maar gaan om n braaivuur, gesels mens oor dit en dat en nog wat. Hy vertel ons toe dat hulle een Saterdag die basaar van die NG Kerk op Loeriesfontein bygewoon het. Dis glo elke jaar iets besonders om by te woon. Na die gebraai en gesels by die basaar, staan almal toe saal se kant toe waar daar n veiling is. Hy sien toe n quilt wat mooi was en wat seker baie tyd geneem het om te maak. Johan dink toe dis vir n goeie doel en hy wil vir Renette verras en besluit in sy agterkop dat hy tot R5000 sal bie maar hy reken darem nie dit sal so hoog gaan nie. Toe die quilt opgelig word, val die afslaer weg met: Wie gee my n bod? Ek het R5000, ek het R5000, wie gee my R6000? Ek het R6000, R6000 het ek. Wie gee my R7000? Hy sê, n rukkie later stap daar n ouerige boer met n laphoedjie in en roep: R21000! R21000 vir n kombersie! Die quilt is toe vir R21000 verkoop! Was dit R21000 rand werd? Ek weet nie maar dis wat daarvoor betaal is. My vriend het verseker nie gedink dis R werd nie! Die storie het my laat dink aan hoe ons soms oor ons redding dink. Ons wil almal graag darem gered word (neem ek aan), maar dan wonder ons of ons lewens dit werd is. As ek, by wyse van spreke, opgeveil word, sal ek die bedrag haal wat nodig is om gered te word. En omdat ons almal onsself so goed ken, twyfel die meeste van ons of ons dit ooit gaan haal. Daarom gebruik ons sulke woorde soos: Ek hoop ek kom eendag in die hemel. Dalk maak ek dit. Ek probeer my bes ens. En al bely ons elke sondag ek glo in die vergifnis van sonde, sê my hart steeds vir my dat die goeie dinge in my lewe die deurslag gee. As ons so oor ons redding dink, dan dink ek aan my eie lewe soos n skaal wat moet ballanseer. In die een bak is al die sondes wat ek in my lewe gedoen het, steeds doen en nog gaan doen. En ons weet dat sondes nie ongestraf kan bly nie,

3 maar betaal moet word en as ek mooi onthou, dan sê die Bybel dat die loon van die sonde die dood, die hel is. Dan is die ander bak die goeie dinge wat ons probeer doen om die skaal te probeer ballanseer. En dan werk ons hard aan goeie dinge en dade om die skaal ten minste net gelyk te hou. Maar ek dink dat almal van julle wat al n paar jaar die pad van die lewe gestap het, met my sal saamstem, dat dit onmoontlik is om ooit die skaal selfs effens te lig. Daarvoor is die mag van sonde in ons eie lewens hopeloos te groot. Selfs die goeie dinge wat ons doen, is nog so vol van selfsug en eie eer en bedekte motiewe, dat dit eerder die skaal verder laat sak as wat dit ooit kan lig. Eintlik is ons dan al dood voor ons nog begin lewe het! En dan mis ons reeds die eintlike lewe van vrede wat God vir ons hier op aarde belowe het. Maar daar is n tweede moontlikheid om oor ons lewe as kind van die Here te dink. Kom ek lees weer vir u vers 17: 17 Deur die oortreding van die een mens het die dood begin heerskappy voer deur hierdie een mens, maar deur die Een, Jesus Christus, is veel meer bereik: dié wat die oorvloed van genade en die vryspraak as gawe ontvang het, sal lewe en heerskappy voer. 18 Soos een oortreding gelei het tot veroordeling vir alle mense, so het een daad van gehoorsaamheid dus ook gelei tot vryspraak en lewe vir almal. (ROMEINE 5:17 18) As ons die sonde op die een bak van die skaal sit en God se groot genade wat die Bybel ons van vertel, waarvan die doop ons vanoggend weer kom herinner en wat die doop in oorvloed oor elke kind uitgiet, dan is daar GEEN vergelyking nie. Dan is (soos die kinders sê) die sonde nie n patch op die krag en die grootheid en die verlossingskrag en die liefde van God soos Hy dit vir ons kom wys het toe Hy vir Jesus aan die kruis kom laat sterf het nie. En dit, dit, is waaroor die Bybel

4 eintlik gaan. God se GROOT, GROOT, GROOT genade. Nie ons sondigheid en probeerslae en menslike poginkies nie, maar God se liefde en onverdiende genade wat Hy nou reeds vir jou en my kom gee en wat ons elkeen met albei hande kan kom vat. God sit met al die troewe in sy hand in die wedstryd teen sonde en nie n oomblik hoef enige mens te twyfel dat God se genade groot genoeg vir my sal wees nie. Daar is nie n skaal wat sterk genoeg is om dit te weeg nie - selfs nie in ons gedagtes nie. Genade op genade soos Johannes 1:16 dit sê. Miskien sal n verhaaltjie ons help om iets van die groot genade beter te verstaan: Daar word die verhaal vertel van Johnny Lingo, n baie mooi jong Polinesiër wat besig was om vrou te soek. Maar hy was nie net aantreklik nie, maar ook baie talentvol en vriendelik en daarom het almal op die dorp geweet dat hy enige meisie sou kon vra en almal vir hom ja sou sê. Daarom was almal baie verbaas toe Johnny vir Mahana kies - eintlik n ou vaal meisietjie wat maar skamerig was en baie onopvallend. En toe Johnny na Mahana se pa gaan om oor die bruidskat te onderhandel, het almal geweet dat hy goedkoop los gaan kom omdat haar pa maar te bly sal wees om hom as skoonseun te kry. Daarop was almal baie verbaas toe die gulsige pa die prys aankondig: n hele drie beeste! Almal het asems opgehou wat hulle het geweet dat Johnny baie mooier meisies sou kon kry vir minder beeste. Wat sou Johnny doen? Die mense van die dorp het amper op hulle rug geval toe hulle hoor wat Johnny besluit het: Hy het daarop aangedring dat hy nie drie beeste vir Mahana betaal nie, maar 8! Almal moes weet, het Johnny gesê, dat sy vrou duur is - baie meer werd as net drie beeste...

5 Dikwels dink ons nog oor God se genade as God wat net baie meer as ek gee tot my verlossing. As ons ooit oor God se genade moet dink, dan mag ons nooit klein dink nie. God het nie baie kom gee toe Jesus aan die kruis kom gee het nie. Hy het selfs nie die meeste gegee nie. Nee, Hy het ALLES kom gee wat nodig is om gered te word. Daarvan vertel die Bybel, daarvan vertel die doop. God kom sê ook vir klein Emma vanoggend dat Hy alles reeds betaal het wat nodig is, nog selfs voor sy vir Jesus kom kies het. Nou weet ek dat sommige van ons wonder: Maar hoef ek dan nou niks doen om die lewe te ontvang nie? Nee, niks nie! Wanneer ek iets begin verstaan van God se genade, kan my lewe nie meer dieselfde bly nie, kan ek nie anders as om dit te begin glo nie. En vriende, wanneer die Here se genade deur die doopwater en deur die Bybel se Boodskap oor mens begin rol, dan kan mens nie anders as om stadigaan nuut te word nie. God se genade, die doopwater los jou nie net soos jy is nie. Jy kan nie anders as om te verander nie. So vertel CS Lewis, die Engelse akademikus wat eers later in sy lewe tot bekering gekom het. Oor sy eie bekering skryf hy so mooi in die boek Surprised by joy: Jy moet jouself indink hoe ek daar in my kamer alleen, nag vir nag, die krag van die Here ervaar het, as ek vir n oomblik my aandag van my werk afhaal. Dit was sonder ophou, juis van Hom wat ek nie wou ontmoet nie. Dit wat ek die bangste voor was, het uitendelik met my gebeur. In Mei 1929 gee ek uiteindelik in en erken dat God God is en het ek neergekniel en gebid: Dalk daardie aand die mees teneergedrukte en onwillige bekeerling in die hele Engeland. Toe het ek nie gesien wat vandag die wonderlikste en mees voor die hand liggenste is nie: Die groot genade van God wat selfs iemand

6 soos ek aanvaar het... die hardheid van God is sagter as sagtheid van mense en sy dwang is ons bevryding. So werk God se onkeerbare genade, so sê CS Lewis, maar so sê die Bybel en so sê ook die doop. Wanneer ook babatjies nie eers nee of ja kan sê nie, kom sê God: Ek sê ja vir jou. Ek sluit af: Die verhaal van Johnny Lingo het n mooi einde wat dit wat CS Lewis sê, mooi wys. Nadat Johnny die 8 beeste betaal het vir Mahana, was hulle n paar maande weg op n soort wittebrood. Toe hulle terugkom, kon die dorpsmense hulle oë nie glo nie: Die valerige Mahana was nie meer vaal nie, maar het binne n paar maande in n beeldskone vrou verander! Die wete dat iemand haar liefhet, dat sy meer werd is as wat almal gedink het, as wat sy selfs in haar wildste drome kon droom, dit het haar verander... Genade het haar verander, haar mooi gemaak. 2 Korintiërs 3:18 Ons almal weerspieël die heerlikheid van die Here, want die sluier is van ons gesig af weggeneem. Ons word al meer verander om aan die beeld van Christus gelyk te word. Die heerlikheid wat van ons uitstraal, neem steeds toe. Dit doen die Here wat die Gees is. Dit moet ons weet en onthou: God se genade wil, en kan dit - en baie meer - vir ons ook doen. God kom maak van ons ook mooi mense net alleen omdat Hy ons so baie liefhet. Hoe kan ons dan, as gedooptes, anders as toelaat dat die Heilige Gees, wat in ons woon ons lewens nuut maak? Vanoggend kom sê die Here vir klein Emma, maar ook vir elkeen van ons: Jy was vir my soveel werd dat ek my lewe daarvoor gegee het. Wil jy nie nou jou lewe vir my gee sodat ek dit deur My Gees meer en meer kan maak soos Jesus nie?

7 Natuurlik kan ek en jy ook nee kan sê. Maar hoe kan ons? En hoekom sal ons? Amen