MATRIEKAFSKEIDDIENS: N MOEDER MET HAAR TWEE SEUNS KNIEL BY JESUS (Matteus 20:20)

Transcriptie

1 MATRIEKAFSKEIDDIENS: N MOEDER MET HAAR TWEE SEUNS KNIEL BY JESUS (Matteus 20:20) Geliefde Jongmense, Ouers en Personeel, n Ma vat haar twee seuns aan die hand en hulle gaan en kniel - by Jesus. Op n dag soos vandag kyk n mens n bietjie terug - en jy wonder: Hoeveel keer het ek my kind se hand gevat om hom of haar iewers te bring Eintlik so baie kere dis te veel om op te noem. Want toe ons hierdie kinders as babas ontvang het kon hulle nog nie baie dinge doen nie. Hulle kon suig en skreeu, ja maar dit was ook omtrent al. Ons moes hulle eintlik aan die hand vat en alles leer Só het ons hulle met twee vingers aan die hande gevat en geleer loop treetjie vir treetjie. 1

2 En daarna toe hulle n bietjie stewiger op die voete was het ons hulle aan die een hand gevat en vir hulle al die mooi dinge in die tuin en in die wêreld gewys. Hulle moes leer eet en hulle het n groot gemors daarvan gemaak want hulle wou self En ons moes hulle hande vat - en hulle leer so hou jy n lepel vas en so werk jy met n vurk en kos is bedoel vir jou mond en nie vir jou neus nie. En ons moes hulle aan die hand vat en hulle na hulle eerste partytjie toe vat want hulle was te skaam en hulle wou nie alleen gaan nie en hulle wou nie hê jy moet loop nie (moeilik om dit vandag te glo) En toe kom die dag dat ons hulle aan die hand vat en ons hulle skool toe vat n Moeilike dag vir party en natuurlik ook vir sommige mammas En dit voel of dit sommer nou die dag was. 2

3 En so het ons hulle baie kere aan die hand gevat en hulle oor die jare na baie plekke toe gebring Sportbyeenkomste toe en ekstraklasse toe en see toe en wildtuin toe en na baie ander plekke toe En so het ons die paadjie saam geloop tot hier toe. Nie dat die dae van handvat - en saam loop nou al heeltemal verby is nie. Netnou sal ons hulle hand vat en hulle loop deur n hekkie die wye grootmenswêreld in Sommiges van ons sal hulle kinders se hand vat en hulle na n universiteit of kollege toe bring En ander sal dalk hulle kinders se hand vat en saam bank toe stap en sê: Kom laat ek jou op die been help En ander van ons die wat dogters het sal seker maar eendag hulle hand vat en in die kerk in n paadjie aflei - en sê: Sien jy daardie ou daar voor? Hy sê hy is lief vir jou Hy gaan nou jou hand vat 3

4 En so sal ook sekerlik die dae aanbreek waar die rolle omgekeer sal word waar hulle weer ons hande moet vat en sê: Kyk Oupa hier is jou kleinkind En nog later Gee jou hand dat ek jou help, Oupa hier is jou rystoel En daardie selfde hande druk dalk nog ons oë toe. Hande-vat tussen ouers en kinders omspan eintlik ons hele lewe van begin tot einde n Biblioteek vol boeke het nie genoeg woorde om te omskryf wat dit alles beteken nie. Maar, liewe vriende, al hierdie handevat en al hierdie bring na verskillende plekke toe is eintlik tevergeefs - as ons nie doen wat hierdie vrou in ons Skrifgedeelte doen nie. Sy vat haar kinders aan die hand en sy bring hulle na Jesus toe en saam kniel hulle voor Hom. 4

5 As ons ons kinders nie geleer het om dít te doen nie by Jesus te kniel nie - dan is al die ander dinge wat ons hulle leer in n baie opsigte waardeloos en eintlik ook gevaarlik. As ons kinders nie voor Jesus kniel nie en ons leer hulle loop Wie weet waarheen hulle sal loop en of hulle op die regte pad sal bly? As hulle nie voor Jesus kniel nie sal hulle nie met al daardie kennis wat hulle opdoen groot egoïste word wat net vir hulleself lewe en hulle eie koninkrykies bou nie. As hulle nie voor Jesus kniel nie hoe sal hulle weet waar lê die grense by n partytjie en hoe sal hulle weet wat is gesonde waardes in n verhouding en hoe sal hulle reg kan oordeel oor die karakter van n toekomstige lewensmaat? Voor Jesus kniel is alles broer en suster En let op ouers moet kinders leer om dit te doen. Hulle word nie so gebore nie 5

6 Hulle sal nie van self so uitdraai nie Jy moet jou kinders se hand vat en jy moet hulle lei Nie net stuur nie Nee- Jy moet self gaan en hulle saamvat en jy moet self kniel en hulle leer kniel en jy moet self bid en hulle leer bid en jy moet nie nee vir n antwoord vat nie Hier moet ek en jy hulle hande styf vathou en saam gaan. en nie laar los nie. As jy weet wie Jesus is As jy weet dat Hy Koning is - Here en God aan wie alle mag in hemel en op aarde gegee is As jy weet dat Hy deur die vergewing van sondes die sleutel van die ewige lewe het As jy dit weet en dit self glo dan sal jy nie kan rus voor jou met jou kind gemaak het soos hierdie vrou van ons Skrifgedeelte nie Jy sal hulle hande vat en hulle bring en kniel. 6

7 Eintlik het hierdie vrou in ons Skrifgedeelte baie redes om dit nie te doen nie. Ons weet wie sy is. Sy is Salome die vrou van Sebbedeus En vroue het daardie dae nie eintlik in geestelike sake die leiding geneem nie Veral ook nie as dit by seuns kom nie. En haar twee seuns is Johannes en Jakobus. En hulle is op n moeilike ouderdom Sekerlik so amper matriek-ouderdom Hulle staan al so n bietjie op hulle eie voete Die ouderdom waarop ouers gewoonlik sê: My kind jy moet maar self besluit En verder het haar twee seuns ook n bietjie van n reputasie. In n ander Skrifgedeelte word hulle Boanerges genoem Dit was hulle bynaam Johannes Boanerges en Jakobus Boanerges En Boanerges beteken: Van die donder En jy kan jou maar self indink wat n kind van 17 of 18 gedoen het om só n bynaam te kry. 7

8 Maar daar gaan Salome vrou alleen en sy vat haar moeilike kinders wat in n verkeerde ouderdom is en wat n anderster bynaam het en sy gaan kniel saam met hulle voor Jesus. En - sy sien Jesus nie as n kennis van die familie nie Nie as n vriend of politieke leier nie Maar as Koning as almagtige Here en God Salome glo dat Jesus die Messias is en daarom kan sy nie anders nie Sy bring haar kinders by Jesus want sy het haar kinders lief. En daar by die voete van Jesus vra sy hierdie groot guns: Here mag my kinders ook deel wees van u koninkryk! Ja sy vra ook iets meer. Sy bly maar n ma Sy het ambisie vir haar kinders Een aan die regterkant en een aan die linkerkant asseblief, Here! 8

9 Maar die hoofsaak van Salome se versoek is: Here mag hulle deel wees van u koninkryk Is daar iets meer of iets beter wat n ouer vir sy kind kan wens? Maak dit vanoggend ook jou gebed vir jou kind: Here, mag hy mag sy deel van u koninkryk wees Want as jou kind deel is van God se koninkryk en jy volhard self in die geloof. dan het jy jou kind vir altyd Vir tyd en ewigheid dwarsdeur die dood heen. Want God se koninkryk is n ewige koninkryk. As dit dan ook vanoggend ons bede vir ons kinders is wat is Jesus se antwoord? Opmerklik dis die ma wat vra. Maar as Jesus antwoord dan praat Hy met die kinders met Johannes en Jakobus: So is dit ook vanoggend ons as ouers wat kom vra wat saam met ons kinders voor Jesus kom kniel 9

10 Maar Jesus het n boodskap vir julle jongmense En Jesus sê eintlik vir julle twee dinge: EERSTENS: Onthou as jy deel is van my koninkryk dan is daar n prys En TWEEDENS Onthou as jy deel is van my koninkryk dan is daar n doel Ja daar is n prys Kan julle vra Jesus in Vers 22 vir Johannes en Jakobus Kan julle die lydensbeker drink wat ek gaan drink? En Johannes en Jakobus sê sonder om twee keer te dink Ons kan Daar het jy die positiwiteit van die jeug wat ons so bewonder. Hulle is die Yes-we-can-generasie! En ek dink ons Here Jesus het in sy hart geglimlag oor hierdie antwoord want hulle het nie geweet wat hulle sê nie. 10

11 Maar in hulle harte was daar n ywer en n oorgawe om die Here te dien wat dit ookal kos. En dit was vir die Here genoeg. Maar daar is n prys. As dit in jou hart lewe om so diensbaar as moontlik vir jou Koning te wees deur die bes moontlike matriekeksamen te skryf. Dan moet jy weet daar is n prys En - as jy die talente wat Hy jou gegee het so goed as moontlik wil ontwikkel om hulle tot sy eer te gebruik in die wêreld daar buite Weet dan daar is n prys. As jy die Here dwarsdeur jou hele lewe as Koning wil dien en eer Daar is n prys Dit gaan jou iets kos. Die prys is nie vir almal dieselfde nie. Al is julle boeties soos Johannes en Jakobus die offers wat in elkeen se lewe gevra word is verskillend. 11

12 Die Here weet hoe om sy Naam in elkeen van sy kinders se lewens te verheerlik. Jakobus skaars 30 jaar oud word een van die leiers van die gemeente in Jerusalem. Maar in 44 nc word hy deur die goddelose Herodus gevang en met die swaard om die lewe gebring. Dit was die offer wat hy moes bring. En sy broer Johannes betaal n ander prys Hy moes baie oud word tot diep in die 90 En baie gemeentes besoek en baie spanning hanteer En baie briewe skryf En as ou man nog na Patmos verban word waar Hy die vreeslike visioen van die Openbaring van Jesus Christus oor die eindtyd moes ontvang en neerskryf. Ook hy betaal n prys. So is daar vir elkeen wat die Here Jesus volg n prys n kruis om te dra. Maar liewe jongmense Watter prys jy ook al in jou lewe sal betaal om as kind van God te kan skitter. Dit bly altyd n genadeprys 12

13 En daarmee bedoel ek: Dit is nie uit eie krag of uit eie verdienste wat jy die offers kan bring wat van jou gevra gaan word nie Die Koning self sal as jy blywend voor Hom kniel jou deur sy Heilige Gees toerus om dit te kan doen wat gevra word. As jy vanoggend saam met jou ouers voor Koning Jesus kniel En jy het n gesindheid van vertroue en oorgawe En jy sê gewoon: Ja Here ek kan Ek kan want u is my Koning dan vat Hy jou hand (daardie hand wat jou pa en ma netnou nog vasgehou het) en Hy lei jou verder en Hy maak jou bekwaam en Hy bring jou waar jy moet wees. En die beker wat jy dan sal moet drink - dit sal nie bitter wees nie Want die bitter beker het Jesus Self op Golgota gedrink En wat oorbly is die beker van gemeenskap met Jesus die lewe saam met Hom Ja - Jy sal kan! Want die Here jou God is by jou. 13

14 En die tweede ding wat Jesus vanoggend vir julle jongmense sê, is: Onthou die lewe in my koninkryk het ook n doel En die doel van jou lewe as koningskind is diens. Hou gouer julle dit in die lewe leer jongmense hoe beter. Julle gaan nog baie dinge in jou lewe doen En gesien die mooi talente wat die Here julle gegee het - julle gaan deur sy genade sekerlik ook baie dinge in die lewe bereik Maar dít wat jou in die lewe werklik gelukkig en vervul sal laat is wanneer jy dien God en jou naaste Wat jy ookal in die lewe doen Watter loopbaan watter pos watter beroep Laat jou leuse altyd wees : om te dien nie om gedien te word nie Want wanneer jy dien dan sal jy diep binnekant weet: Ek loop op die pad van my Koning Ek loop hand in hand met Hom Ook Hy het gekom om te dien nie om gedien te word nie Hy is my Koning ek volg Hom na. Hy werk deur sy Gees en ek werk saam met Hom 14

15 Hoe nodig het die wêreld Hoe nodig het ons land Hoe nodig het ons gemeenskappe nie weer egte leiers - wat dien nie. Wees julle die jongmense wat voor Jesus kniel sulke leiers. Deel van n nuwe generasie wat hoop bring Want ook vandag is dit by die nasies so so soos Jesus sê - dat die regeerders baasspeel en die groot manne die mag misbruik. Liewe Jongmense, vandag is die dag wat ons julle hande n bietjie loslaat Maar ons julle ouers en onderwysers het julle vanoggend eers hiernatoe gebring Ons het julle vanoggend eers gebring om nog een keer voor Jesus te kniel en te vra dat julle altyd deel van sy koninkryk mag bly En nou kan ons laat los - want ons weet Hy sal julle hande verder vashou. En Hy sal julle lei 15

16 Die pad waarop Hy julle sal lei sal OFFERS en DIENS vra maar dit sal uitloop op n heerlikheid wat God self vir julle gereed gemaak het en wat al julle swaarkry verreweg sal oortref. Kom ons kniel nog een keer En dan Ons liewe kinders - Gaan met God. AMEN. 16