Die Hoërskool DF Malan Frans Conradierylaan, Bellville 7530 Tel (021) 948 8781 Faks (021) 948 2996 E-pos : skoolhoof@dfmalan.com Webtuiste : http:// www.dfmalan.com Nuusbrief 1 10 Februarie 2015 Beste DF-ouers Baie welkom terug aan al ons DF-leerders, ouers en personeel aan die begin van n nuwe skooljaar wat beloof om vol opwinding en nuwe uitdagings te wees. n Spesiale welkom aan alle nuwelinge wat vir die eerste keer deel van die DFfamilie geword het. Mag die Dee-Effers in 2015 ons jaarspreuk Maak n wêreldse verskil, met passie uitleef deur elke geleentheid wat op hul pad kom, aan te gryp! n Hele paar nuwe personeellede het vanjaar by ons aangesluit. Hulle is mnr. Noel Pilkington (agter, links) wat in die Engelsdepartement aangestel is, mnr. Charles Store, biokinetikus en hoof van die nuwe hoëprestasiesentrum (middel) en mnr. Louis Lambrechts (regs), krieket- en rugby-organiseerder. In die voorste ry is (links) me. Jo-Mi Müller (Wiskunde), mnr. Adriaan Rossouw as nuwe RTT-onderwyser en me. Tildie Smit wat Afrikaans onderrig. Me. Karen Delport (Wiskunde) en mnr. Arno Erwee (bestuurder van die krieketakademie) was nie teenwoordig toe die foto geneem is nie. Ons is baie opgewonde oor die nuwe toevoegings tot die DF-personeel en glo dat elkeen waardevolle bydraes sal lewer. Die graad 8 s het ook vinnig ingeskakel en het tydens die oriëntering bewys dat hulle ongetwyfeld hul plek in die groot skool kan volstaan!
Hier geniet die nuwe graad 8 s n verposing tydens die Groot Stap, terwyl hulle op die foto regs met trots vir die eerste keer met hul DF-baadjie kan spog. Matriekuitslae Inge en Lilene du Toit saam met me. Helen Zille en me. Debbie Schäfer, onderwysminister (bo). Lilene en Inge is saam met Tonia Schoeman in die provinsiale merietelys opgeneem, terwyl Tonia (regs) onder die topdrie kandidate landswyd geëindig het. Dat akademie steeds Hoërskool DF Malan se kernbesigheid bly, is weer eens deur spoguitslae in die NSS-eksamen bevestig. n Hoogtepunt was toe Hoërskool DF Malan by n toekenningsgeleentheid te Leeuwenhof nog n keer as een van die top 20-skole in die provinsie aangewys is. Om as gemeenskapskool saam met verskeie onafhanklike skole op grond van akademiese uitnemendheid
hierdie gesogte lys te haal, spreek boekdele. Van die Dee-Effers het ook in hul onderskeie vakke onder die top 10-leerders in die provinsie geëindig. Die klas het verras toe nie minder nie as 54 leerders n A-gemiddeld behaal het. Die klasgemiddeld was n skitterende 74,3%, terwyl 92% van die matrieks toelating tot n Baccalaureusgraad verwerf het. Veels geluk aan die matrieks van 2014 wat weer eens bewys het dat Hoërskool DF Malan n wêreldklas skool is! Koor 2015 het vir die DF-koor letterlik en figuurlik op n hoë noot begin toe hulle die baie unieke ervaring gehad het om deel te neem aan n opvoering van The Peacemakers in die beroemde Carnegie Hall, New York. Die koor, onder leiding van mnr. Leon Starker, het ook die besondere voorreg gehad om die komponis van hierdie werk, Karl Jenkins, te ontmoet. Kursus in Frans Dee-Effers het vanjaar weer die geleentheid om Frans by die skool te neem. Die klasse word op Dinsdae deur The French Junction aangebied. Die beginnersklasse is van 16:30 tot 17:30 en die koste is R450 per kwartaal (8 weke). Belangstellendes word ook genooi om n gratis proefklas vir beginners by te woon. Die volgende kursus begin op Dinsdag 10 Februarie, maar daar kan ook na hierdie datum aangesluit word. Vir verdere inligting, of om n gratis klas te bespreek, kan dr. Mike de Freitas geskakel word by thefrenchjunction@gmail.com, selnr. 084 2414848 of 021 559 5021. Kwartaaldatums (volledige program op web beskikbaar) 13 Feb. : MTBS 27 Feb.- 1 Mrt. : Koorkamp 20 Feb. : Senior Bal 9-20 Mrt. : Toetsreeks 26 Feb. : Talent Show 1 April : Skool sluit
Wetenswaardig Die 21ste jaarlikse MTBS-byeenkoms trek vanjaar n splinternuwe baadjie aan en vind, anders as gewoonlik, by die Parow-atletiekbaan (Jan Burger Sportkompleks) plaas. Hierdie besluit is a.g.v. heelwat uitdagings en praktiese probleme geneem. Hoewel die tradisionele pawiljoenvertonings van die vier skole vanjaar skipbreuk ly, glo ons dat toeskouers kan uitsien na atletiek uit die boonste rakke. Die byeenkoms op Vrydag 13 Februarie begin om 11:30 met n optog van die atlete en die laaste aflosse behoort teen 18:30 afgehandel te wees. Kaartjies teen R10 per persoon (of R30 per motor) is by die hekke beskikbaar. Om in die regte stemming vir MTBS te kom, word ouers en ondersteuners genooi om Woensdagaand tussen 18:00 en 18:30 in groot getalle by die Bellville-stadion op te daag om te kom luister na DF se Rebel-kreet soos net die Dee-Effers dit kan doen!! Die beoogde hoëprestasiesentrum sal na beraming in die tweede helfte van 2015 voltooi word. Baie dankie aan alle ouers wat gereeld hul My School Card gebruik en daarmee n welkome inkomste vir die skool verseker. Aansoeke vir n MySchoolkaart kan aanlyn gedoen word by www.myschool.co.za of deur 0860 100 445 gedurende kantoorure te skakel. Aansoekvorms is ook by die skool se finansiële kantoor beskikbaar. Indien u kontak- of werkbesonderhede die afgelope jaar verander het, stel asseblief die finansiële kantoor daarvan in kennis by admin@dfmalan.com. Ons huidige beheerliggaam se ampstermyn loop binnekort ten einde. Teken asseblief die datum van die beheerliggaamverkiesing, 5 Maart aan. Meer inligting oor die nominasie- en verkiesingsproses sal binnekort verskaf word. n Baie voorspoedige 2015 word u toegewens! Joh Dorfling SKOOLHOOF