Hier bunne wi'j dan: buurvrouw en buurvrouw, moar nog lange gin Olle taarten.

Transcriptie

1 Goejenoavond Holtkleuvers en liebe Gâste aus Deutschland, Hier bunne wi'j dan: buurvrouw en buurvrouw, moar nog lange gin Olle taarten. Prinses Maria: lk bun prinses Maria de eerste, oet de putte. Geboor'n in ut zeekenhuus in Vrene en op e-greujt in Zwillbrock. lk bun de oldste dochter van Theo van Gait Hindrik oftewal Slachter en mooder Mia Reirink. Wi'j bunt tuus met 2 kinder. Ikke en mien breur, boer Hermann. lk bun e-trouwt met Frans van de Rôtter en wi'j hebt 3 kinders: Chris, Mara en Marc. Frans is met pensioen en ik bun de meesteres van ut aanrecht an de Holterhookseweg en mag heel geerne kokken en bakken. Ok wet ik heeeel vôlle van auto's want ik warke al 45 joar bi'j dezelfde garage. Toen de organisatie vroog of ik prinses wol wodden, vertellen ze d'r bi'j dat d'r nog nooit iemand nè hef e-zeg. Dat blik helemoale neet woar te wen, moar gelukkig hef mien adjudante ok gin nè e-zeg! Adjudante lk bun adjudante Marijke de eerste. lk bun geboor'n in Doesburg, de alom bekende mosterdstad. lk bun de 2 e van 8 kinders. Mien vader Jan was schilder en mien mooder Willie was tuus um op de kroos te passen. Noa verschillende scholen te hebben deurlopen, ging ik as 18 jeurige noar de opleiding veur ziekenverzorgster in Terborg. Sinds december bun ik met pensioen.

2 Marijke: In 1979 verhuuzen ik noar de Holterhoek en bun no bienoa 40 joar etrouwt met Richard Roes van Tessel. Tegenwoordig schoapenboer en verhuurder van Olle schuren. lk komme dan wal uut de mosterdstad moar toon ik Richard leerde kennen, wis ik pas woar Abraham de mosterd halen. Wi'j hebt 3 vrouwleu: Marleen, Rianne en Nicole. Mien hobby is noast bakken, veural jam maken en inwecken. Zo no wet jullie genog oaver ons. Wi'j wilt no wat oaver jullie vertellen en dat doot wi'j deur un aantal recepten oaver en van jullie veur te lezen. Joa wi'j bakt ze broen vanoavond! Heel Holterhoek bakt!

3 Maria: Het eerste recept: FIETSONGELUK - kleinen Jan Roerdink ongeveer 65 kg - un fietse - un auto - 2 liter whiskey l'j geet eerst heel vôlle whiskey in Jan Roerdink. Dat is neet zo moeilijk, Jan warkt wal good met. Dit loat ie effen good inwarken. Dan zet ie Jan op de fietse en dan loat ie um noar hoes hen fietsen. Dat is al un stuk moeilijker, umdat hee stuurloos is e-woddene. Volgens ons is de Kruiskamplaan breed genog, moar den enen auto stond toch in de weg. Met un flinken klap en vôlle kabaal is he tegen un auto an e-jag en is d'r half onder e-schotene. Vervolgens doot ie doar de halve buurte bi'j en i'j hebt un compleet ongeluk met pottenkiekers en al. Net as slagroom wa'j te lange e-klopt hebt, was Jan nogal beduusd. Gelukkig veur um stond den auto stille. Dan kump ut makkelijkste gedeelte van dit recept l'j zet Jan in auto en brengt um noar hoes. De kers op de taarte van zienen oavond! En eigenluk mo'j dit recept dan afmaken met un betje liefde, moar of Saskia dat hef e-daone, dat wedde wi'j neet.

4 Marijke: Het tweede recept: NEDERLANDSE UUTNEUDIGING - penne - papier - Marianne ten Hoopen - woordenbook Zoas jullie wet, bunt d'r hier heel wat huuze verkoch in de Holterhook. De Holterhookers goat noar de stad en de stadsen goat noar de Holterhook. Kiek moar noar Overkamp, ten Hoopen en Snippert. No mo'j wetten dat Marianne ten Hoopen elk joar met Ni'j joar un uutneudiging stuurt veur un Ni'j joarsborrel in de buurte. In 't plat. Moar dit joar had ze 'm e-schrevene in 't Hoog Hollands. Marianne was bange dat anders de helfte van de buurte neet kwam opdraven, umdat ze de uutneudiging neet konden lèzen. Dus dit is dan ok 't recept van Marianne: Pak moar un blender. Gooi doar un penne, papier, un woordenbook en un betjen van Marianne in en noa 15 minuten reuren he'j un uutneudiging in 't Hoog-Hollands. Prachtig! Moar Marianne: he'j ow wal af e-vroagt of de Holterhookers dit wal kunt lèzen. Wi'j vindt eigenluk da'j veur un goeijen inburgering wal plat mot blieven schrieven, anders leert klein Amsterdam 't nooit. A'j plat kunt proaten mo'j ut neet loaten en un inburgeringscursus in de Holterhoek ku'j wal zonder woordenboek.

5 Maria: Het daarde recept: SCHONE WOONUMGEVING - Jan Klumpers - Clemens Geverinck - Alfons Geverinck - zand - klinkers - anhangwagen l'j nemt Jan Klumpers, en een paar koare vol met zand en un handvol klinkers. l'j geef 'm un dag de tied zodat 't good kan inwarken. En dan heb ie un mooien klinkerweg noar ut hoes hen. As wi'j noo Diny ophaalt veur de gym, hoove wi'j neet meer te slalommen um de gèete hen. Un mooi recept. Wi'j wilt jullie nog een ander recept anbevelen veur un schone woonumgeving. Doar heb ie Alfons en Clemens Geverinck veur neudig. l'j doot doar un paar anhangwagens en containers bi'j en dan krieg ie alles glad um ut huus en de rest wordt noar Grolle brach noar 't ni'je bedrief. Dat is smullen a'j d'r langs ried!

6 Marijke: Het veerde recept: HORIZONVERVUILING Raymond Holtkamp 60 kratten bier 50 steule 3 anhangwagens 2 koelwagens paar auto's 6 fietsen 1 vrachtwagen Dit recept is deur elken slechten kok te maken. l'j gooit un hele prôttel an kratten, steule, anhangwagens, koelwagens, auto's, fietsen en de vrachtwagen bi'j mekare in. Dan reur ie 't good deur mekare. 5 minuten loaten stoan en i'j hebt un cocktail à la Raymond Holtkamp. Ok wal "horizonvervuiling" e-neumt. Tis al zo wiet dat alle ingrediënten d'r neet ens meer in past. Dus mot d'r nog een snufje Frans Startman bi'j in. Raymond hef nameluk al van alles bi'j Frans in de schure op e-slagene. Veur de dudelijkheid: ondertussen dat de buren drok bunt e-wes met ut veurige recept, um alles op te ruumen en zorgt veur un schone woonumgeving, hef Raymond un ander recept bedach. Toch is d'r ok nog ene wiet 't recept van Raymond hef noa e-maakt. Nameluk Wilco Wopereis. Den hef net zonne prôttel um 't huus, allene hef he 't ok nog verlicht. Misschien ku'j 't hele spul inmaken en nooit meer oet de kelder halen.

7 Maria: Het viefde recept: RARE SCHUTTER Riet ten Hoopen buks scheetkaartje Haak en Hoek l'j nemt Riet ten Hoopen met noar de scheetbane van Haak en Hoek. l'j geeft eur- veursichtig!- un buks in de hande. Dan dre'j ie un scheetkaartje in op bane zesse. Vervolgens loat ie eur rustig kieken en scheeten. Dan mo'j de kop d'r good bieholl'n, want inens begunt ut gerecht te borrelen en te rèren. Ze hef nameluk raak e-schottene! Dan goat ie ut kaartje bekieken, moar doar is niks op te zene. Gin paniek, good zeuken. En joa heur, ze hef de kogel deur het rondje van de zesse, van bane zesse hen e-schottene. Dan loat ie dit gerecht un paar wekke stoan um rustig af te keulen. Doarnoa begunt ut weer te borrel'n en te rèren. Wat was ut geval? Riet had gin bericht e-had dat ze finale mos scheten, en doardeur hef ze un beker e-wonne zonder dat ze hef e-schottene. Hier ut eindresultaat: un raren schutter met vôlle lawaai.

8 Marijke: Het zesde recept: DE VAKANTIEMAN -Theo en Marga Huls - auto met een caravan - un rodelbane - de ANWB Eerst pak i'j rustig de caravan in en zet ie Theo achter ut stuur en Marga d'r noast. En dan ri'j rustig noar Duutsland. Dit bunt de ingrediënten veur un rustige vakantie. Um ut recept wat pittiger te maken, goa ie noar de rodelbane veur un betjen spanning. An te roaden is dan, 'm d'r wat pepper bi'j in te doan, moar Theo had schienboar al genog pepper in de konte. Want he zei tegen Marga: "loat mien moar as erste goan, want i'j bunt vôl te veurzichtig". De pepper deet good zien wark want 't was moar effen of Theo vloog noast de rodelbane. 2 vingers uut de kom en meerdere schrammen. Dit mo'j dan 30 minuten afblussen met lauw water. Vervolgens afdekken met Olde theedeuke. Doarnoa doot ie d'r un paar etleppels ANWB bi'j in en bu'j zo weer met de pruttel in huus. Vakantieman: gezellig hè!

9 Maria: Het zeuvende recept: KUNSTMESTSTREUER - Jeffrey en Mariëlle Roelvink - heel vôlle zakken kunstmest - un kale weide - un Citroën Berlingo. Misschien wet jullie ut al wal, moar Carola en Jeroen hebt ok ni'je buren e-kregene. Kippendokter Jeffrey en ziene vrouwe Mariëlle. Ze hebt ut good noar ut zinne doar. Mooi un betje grond rondum ut huus. Allene heb ze 't machinepark nog neet veur mekare. Hoo geet dat dan a'j kunstmest wilt streujen? Zo geet de bereiding van hun recept: l'j pakt un Citroën Berlingo uut de schure en laad dat ding helemoale vol met zakken kunstmest, moar let op: loat een klein stuksken vri'j veur Mariëlle. Dan zet ie Jeffrey achter ut stuur. Mariëlle zet ie achterin de bak met de deure lôs, en zet eur un emmer met kunstmest tussen de bene. Dan loat ie Jeffrey de auto starten en heel rustig de weide inrien. Dan begint ut: he rit hen en weer en hen en weer en hen en weer en dat zo'n 80 keer. En ondertussen streujt Mariëlle met mooie golvende bewègingen ut kunstmest in de rondte. A'j kloar bunt stek ie un keersken an en vroagt Piet Paulusma um ne bu'je règen. En helpt dat neet, dan he'j pech. Dan is ut grôs bi'j de buurman toch altied greuner!

10 Marijke: Ut achtste recept: LETZTE NI'JS - 85 kg Richard Roes - Karke in Zwilbrock - Ludwig - tientallen nieuwtjes en roddels l'j pakt 85 kg Richard Roes bi'j de kladden en stopt um in de karke van 't Zwilbrock. Doar loat ie um un uur zitten. Doarnoa nem ie um weer met en zet um bi'j Ludwig an de Stammtisch. Doar loat ie um ongeveer 2 uur zitten. Ondertussen gooi i'j d'r van allerlei roddels en ni'jtjes bi'j in en loat dat good op um inwarken. As 't good is en hee kump tuus, dan wette heel vôlle, oaver van alles en nog wat. Moar leu, 't is heel jammer dat ik ut mot zeggen, want dit recept mislukt hoaste altied. As ik um vroag of d'r nog ni'js is, wet hee nameluk nooit wat. Dus ik begin doar moar neet meer an. Richard: ie blieft zondags moar met de konte in hoes.

11 Maria: Ut negende recept: MOATWARK - Frans Rôtter - harde muziek - oordoppen - proclamatie l'j hebt Frans Rôtter en ziene oarne. Doar wil ie un proclamatie in loaten lopen. Moar pas op da'j d'r veurtied neet te vôlle harde muziek bi'j in doot, want dan heurt Frans niks. Dus hier de oplossing: un paar goeije oordoppen. Moar dan mo'j ze wal van te veurne passen Frans, want at ze te groot bunt he'j d'r nog niks an. Dit joar wille wi'j dit recept verander'n. Wi'j loat de oordoppen d'r uut. Want i'j mot noo noar ons luusteren en dan heb ie gin oordoppen neudig.

12 Marijke: Ut tiende recept: NI'JE BESTUURSLEDEN De beneudigdheden: - het bestuur - Martijn Heusinkveld - Stijn Alferdinck - namen van meerdere Holterhookers Eerst hebbe wi'j 't Olde recept van veurzitter d'r nog es bi'j e-haalt en heel good bekekken, moar a'w eerluk bunt is Jos Rôtter noo toch wal oaver de datum. Inwecken hef ok gin zin meer, dus wi'j begint an wat ni'js. l'j stopt 't hele bestuur in un grote beraadslaag-komme en gooit door van alles bi'j in, den name en den name. Den is te Old, den is te jong, den wil ut neet doon, den wil ut wal doon moar den wilt ze d'r neet bie hebben. Noa un paar uur begint de brei te kokken en te broezen en kiek an. D'r komt 2 namen uut: Martijn Heusinkveld en Stijn Alferdinck. Un paar mooie toetjes. Allene vroge wi'j uns af, of Stijn wal wet, dat he veur dizze functie neet wordt betaald. Hee is nameluk veur Kim op de kneene goane, en dat kost vake nog wal un paar centen. Dan loat ie dit gerecht nog weer effen un paar wekke sudderen en op un gegeven moment begint het te rijzen. En ut geet moar deur en wat kump d'r utendelukke uut: juust Gerben Papen. Hee zal nog wal un betjen af e-bakkene motten worden moar dan is hee helemoale kloar veur zien taak. Gerben vôlle succes: Gin zeute breudjes bakken, moar bak ze ok neet te broen.

13 Maria: Het elfde recept: KAPSONES 93 kg Henk Papen - 85 kg John te Vruchte kleine 100 kg Wim Simmelink - 1 meter 60 Harrie Leezeman - 1 emmer Grolse wind Dizze heren woont an de P.C. Hoofdstroate, zoas i'j wal wet. En ze hebt 't nog steeds hoge in de kop. Ze goat nameluk neet, zoas wi'j gewone leu dat zeg, noar koklesse. Nè, ze goat noar un "workshop koken". De bereiding van dit gerecht: l'j pakt un grote tonne en doar gooi ie 93 kg Henk Papen in. Doar doot ie 100 kg Wim Simmelink bi'j. Dat hoof ie moar 5 minuten te kloppen want dizzen beiden verdrègt zich good. Dan geet d'r 85 kg John te Vruchte bi'j in. Un betje eigenwies gre'j, dus iets langer mixen, totdat he mooi dol is. As lezte geht d'r 1 meter 60 Harrie Leezeman bi'j in. Langzaam loaten zakken, zodat he effen kan wennen. Dan maak ie het gerecht af met un emmer Grolse wind van Ronald Gerritsen, eigenaar van de workshop genaamd "Effen Anders". Veur de stank ku'j d'r un betjen pepper bi'j in gooien. Dan loat ie ut effen good deurtrekken en i'j hebt ne moojen tonne vol kapsones. Veur ut gebroek effen loaten afkeulen. Wi'j denkt dat ze d'r alleene moar Haagse Bluf maakt. Moar wi'j hebt un veurstel: at jullie un kere kokt, komme wi'j etten. Net effen anders!

14 Nawoord Marijke: Zo, dit waren un aantal recepten uut ons kokbook. Mocht ie belangstelling hebben veur ons book, nem dan contact op met ut bestuur. Wèès d'r raps bi'j want op is op en weg is pech! Maria: Wi'j vind ut noo good e-wes. Wi'j zet ut fornuus uut en goat feest vieren onder ut motto: (samen) "vandage neet kokken of bakken, moar lekker deurzakken!"