Mieng Jeug Doa woa mieng ouwesjhoes nog sjteet Deelde ich mit broar, leef en leed Hont der pap en de mam, daag en nach Os mit de nuëdige zurg groeët gebrach Eëpel en alle greunte houwe vier in d r gaat En sjpilde in d r hof, of t druug woar of naat Huvelle, mit de tol sjpiele en belke trekke Wat woare die luuj um te verekke Bei der Neut op de trepkes zitte Achter der Zeele van Schaik, sente sjtikke Bei d r Kessels Roos ruuke aan t broeëd En op d r Sittarderweg bleef t jungske Verwer doeëd En gong mit ing reep en heutje uëver gen sjtroate Of d r winkvoeëgel oploate En oet d r zomp waterhónder en negerpie.. verkope Sjlegter Gorisse houw ee verke gesjlag De wiesvrouw Unger houw ee kink gebrag En vier holde bei Collaris de waar En kleen Niekske rökde in t portaal ing dieke sigaar Vuur ée kwartje ing tuut friete bei d r Hermans Huub kope En dan mit de jonge noa d r zankberg lope Jan Halmans t Vueèrjoar `S mörges leep ich vueèr daag en dauw, tösje Mindergangelt en Brebere doeër `t veldj, `T how gevroare,mien oeëre dinge pien van de kou, Want `t woar nog vreug in de mörge, vueèr de res how ich `t neet koud, doa ding ich vueèr zörge, Es te doeèr de veldjer wanjele wils goan, Mos te aaf en toe ens effe blieve sjtoan, Dan zuuste dat `t wildj doa drek op deed reagere, Dus ging ich dat dea daag weer ens oetprobere, Want neet wiet biej mich weg zowt èè haze koppel biej-èè, En dinge zich te good aan `t nog jonge koare, Mer wiej ze mich zoge koze ze `t haze-pad èè vueër èè, En woar ze weer sjnel oet `t oog verloare, Effe later vloog ene uul àà mich vuurbiej, Dea how waarsjienlèk èè muuske ontdekt, Mer dat muuske woar net op tied, Biej zien hoalke angesj woar hea vas-en zieëker genekt, Want oog in de natuur is het parool, De een ziene doeëd is de anger zien broeëd, Deez kier kreeg de uul neet ziej frühsjtük woeè hea van hool, Mer kumpt niks te kort en kènt gene hongersnoeëd.
`T leep teage achte, de daag woar al in de log, In ens vloog ene fazanthaan vuurbiej, Mesjien how hea èè vruijke bezog, Want in `t vreugjoar goan ze opzeuk noa èè hènneke, En vleege dan van hot noa haar, Ze wille dan zoeë sjnel mögelèk paare mit dat vrunjdinneke, En doa noa blieve ziej vueër altied èè paar. Jan Theunissen. Mien Limburg Limburg mien landj Landj va hartelikheed en ee-voud A dich hub ich mien hart verpandj Woeë os dialek klink es moeziek Deëa onlosmakelik mit Limburg is verbonje Genau wiej humor kwinksjleëg en romantiek Hoeëg in de loef had d r lieëwerik zien leedje gedoa Doa woeë Maria-kapelkes en weëgkruutzer sjtoa Va fanfare s en harmonieje De gloeëijende veldjer mit winkend koare En va die sjoeën sjutterieje Ich bin dankbaar dat ich hiej bin geboare En es sjtolse Limburger ich hiej verkieër Landj va vergange zjwarte good Mit zien freutweije en vakwerkhoezer Mien Limburgs landj zit mich in t blood Landj va Limburg ich dank dich Dat ich va zoeë minnige prachtige toch Va diene gees en sjoeënheed En va t volk en heuvellandj geneete moch Jan van Haaf Geldj en geluk? Is geldj hubbe geliek aan het hubbe van geluk? Mit dees vroag hub-ste jieëderee drék tuk! Geldj makt neet gelukkig zoeë wurd gezag, Mér is dat ooch waal zoeë, hub ich ins gedach? Es-te kieks noa errem en riek, Is de invloed van geldj op geluk dan waal geliek? Inne miljonair leëft in n anger welt, Dem boeit t neet wat get kost, heë heet toch zat geldj! Mér heet deë geen geldj dan geet t drék verkieërd, Went oane of mit minder geldj te leëve heet heë neet gelieërd!
Op inne Euro te kieke hooft deë miljonair neet, Mér geen geldj hubbe is get dat vuur huëm neet besjteet! Geldj makt in die welt dus waal degelik gelukkig zouw-ste zigke, Went oane geldj gene sjtatus, geen leëve, dus neet oet te ligke! Es-te dan kieks noa de geweune man Deë mot oetkieke wat heë zich kope kan. Inne buul mit ongetild geldj dat kint heë neet, Is dat noe waal of neet n punt van verdreet? Went heë sjteet angesj in t leëve, Geldj dat is heuëm dan waal neet gegeëve. Mér doarom kiekt heë noa de welt op n onbevange maneer, En heuëm dont ooch de kleen dinger in t leëve plezeer. Die dinger die inne miljonair zich mit zien geldj neet kint gelle, Neet doeër internet of doeër ieëmesj op te belle! Dat zunt de dinger die geëve t leëve zin, En ze zunt vuur gelukkig zun t biste begin. Ron Logister. Neet Alles Neet alles is Zoeë wies-te t zuus Neet alles is Zoeë wies-te t ruuks Neet alles is Zoeë wie me t huërd t Geet ooch waal ns angesj Geet wie t gebuërd Vier loate os zoeë dik Doeër oeërdele leije Kinne neet kloar zieën Loate os verleije Dat zunt de memente Van egewiesheed Dan makt der miensj Zien ege leed Wiel Roeselers Haute Der is zoeëveuël om van te haute, kiek mer ns om dich heër. Vuëgel, blome, kinjer en vrouwluuj. Hout van al en jieëderee. Va inne get mieë es van de angere. Gier wit toch wie dat geet. Gier puutjs geen blome, en plukt geen vrouwluuj. Haut va al, mit gepaste moat.
Jan Halmans Op de fiets. Ich doeë geer fietse mer neet bergop, Dan sjweet ich mich te barsjte en höb ene kletsj nate kop, Van te vueëre plën ich de route en houd reëkening mit berg, Om dat dat get vueël energiej va mich vergt, Soms goan ich èè paar oeër ààn èè sjtök fietse oane te drènke, Dan hoof ich ongerweag neet te pènke, Onger `t fietse kiejk ich ummer rondj en `t ontgeet mich niks, Mer pas waal op dat ich onverwacht op miej gezich lik. Wen ich heem kom zeat miejn vrow teage mich, Ich gleuëf doeë höbs weer gejakkert, ich ziejn `t àà diej gezich, Sjchat loeëster, en neet rauwele doeë wits ich höb `t gauw werm, Ich höb geweuën doeër gefietst en närges gerast in ene berm, Gank dich wèssje, zeat ze, en goeësj diej nate kleèjer biej de wèsj, Dan vueëls te dich dadelèk weer frèsj, Ich noam mich de tiejd en bleeëf lekker onger de sjtroal water sjtoan, Dat ding mich goot en dach, dat höbs te goot gedoan, Wiej ich mich how gedousjt, En de nate klèjer in de wèsj gegoeësjt, Ging ich de kamer in, kiejk noa miejn vrow en zèk, Vingste `t erg es ich noeè miejn beeën effe sjtrèk, Ziej kikt mich àà, lacht en zeat, Noeë bes te meuëg en ich hoof neet te vroage, woeë te bes gewaes, Dan weet ich van te vueëre al, was te zeas, Ziej kènt mich en wit genoa woeë ich `t zeuëk, Doarom doeën ich dat huuj vueër altiejd oeët de dueëk. Ich fiets geeër ueëver de Teverennerheeëj, Doa vèng ich rust èn een sjoeën natuuër alle beeëj, Ich loeëster noa de vueëgelkès mer ziejn ze neet, Mer loeëster al fietsende noa hun leed, Vueër mich geet dan de Paradiejspoart oape en sjtèl mich de vroag, Wea heat os al dat sjoeëns gegeave wat ich huuj weer zoag, Dan bèn ich dankbaar dat ich dit nog moog beleave, Dat blif zoeëlang ich kèn miejn sjtreave. Jan Theunissen Ich veul mich good Ich veul mich good Mer bin waal krank Mien leëve geet nog, ummer ziene gank woeëvuur ich ozze Hergod dank
Jan van Haaf Lef is t meervoud van leëve In t os gegeëve leëve, Kin-ste genete en zjweëve. Mér neet alles geet wie-ste zouws wille, Soms kan-ste doa aan gans zjwoar tille! n gebuërtenis die dich rakt, n situatie die dich dreuvig makt! n Oetsjproak doeër ieëmesj gedoan, Die t muijelik meuilijk makt om doeër te goan! Dan zuus-te t geweun effe neet mieër zitte, Zuus ooch altied mieër, gees uëveral op litte! D r knoep mot dan om, dat is mekkelik gezag, Lef is dan nuëdig om te vergeëte, tuëen weer deë lach! Sjtank boave al die verveëlende figuëre, Die dien leëve in de war prebere te sjtuëre! Dat is zieëker neet gemekkelik, dat is woar, En d r is tied nuëdig om te bezjwere t gevoar! Jieëdere situatie is angesj, kint zieën ege verhoal, Sjuus doarom is t ooch zoeë lestig vuur os allemoal! D r is geen pankloare oplossing, mér t besef mot gruije, Dat doeër t tuëne van lef dien leëve weer op kint bluije!! Es dat besef d r dan is, dan is zoeë veuël zieëker gewis, Dat lef t meervoud van leëve is! Ron Logister. Witte en behange Omdat vier allebei Nogal get zjwame Krege vier ene aansjlaag Op moeëre en op rame Doarom zag Marie Ooch al zuus doe dat neet zitte t Wurd noe hoeëg tied Dats-te weer gees witte Aan de baas verlof gevroagd Zoeë n week of twieë De collega zag: Sjoeën vekans Went ich dich huuje neet mieë zieë Noa de boewmerte gevare Karwei, Gamma, Praxis Vuur behang, pleksel, kwes Aafplekteep en Latex Alles doe noa heem gesjlip Gesjtapeld en gelagerd En doe in de boet
Al op ee gesjraveld De kes oetgeruump en i gepak In doeëze, mangele of ene plestik zak Doe vings gene zak mieë Wens-te get nuëdig broeks t Liek waal ofs-te op Ene kemping rondj sjtoeks Dan behang aaftrikke En duëre aafwesje Sjtees mit de puët in de pleksel De latex lupt in de boksetesje Noa veuël gesjtres en gesjoeb En hieël veuël sjtom kalle Begint me zich onger ee Ooch nog oppe wikker te valle Mer krek wens-te t leed bis Van al dat sjoefte en doeën Ligke vier vuur kapot oppe bank En is de kroam weer sjoeën Wiel Roeselers Heem-hure Went ich huur wie ze Uëver Limburg kalle En wie ze uëver Os plat valle Dan vroag ich mich aaf Lüj blief toch doa vanaaf Gank ins durch os sjoeën durp lópe Onger de loeënde klókke, die dich röpe Om noa dat Limburgs landj te goa Dat is mien heemet en Dat is vuur mich te versjtoa Jan Halmans Dazelmans Driek Dieng Dazelmans-Dulkes dansde. Dat duvels moor! dach d r dieke Dazelmans Driek. Dieng deed Driek deësje. Doch dat dul duppe doa danst. Driek dreujde Dieng.
Doch Dieng dach: Domme diekzak, deësj doe. Doe dansgek, doe duvelskindj! duivelde Driek. Doe da, dobbele diekkop! Doe dazels diek driej daag doer de Durpsjtroat! Draak! Drupkesjong! Doe dansde Dieng doer. Maria Dolmans Uit Steenkool sept. 1948 De zon De zon deed moale sjeem en sjtroale woeë bis doe zon zon ich hub dich leef zon die a os kleaf woeë bliefs doe zon zon i ozze gaard zon blief os besjpaard Zon doe bis va mich zon doe bis en bliefs egaal wat ste driefs bis doe os leef zon zon die vier zeuke zon die vier broeke kom op leef zon zon deed grujje zon deed blujje gee leave zonger zon Jan van Haaf t Weer van de litste joare t weer van de litste joare, wat mos-te doa van zigke, t is joa ooch egelik gaar neet mieër oet te ligke! Inne wintjer sjtrenger wie de vuurgoande joare, Inne zoeëmer deë de zon heët verloare! Wat vier kriege is reëge, reëge en noch ins reëge, En went de zon zich lieët zieën, deet ze dat hieël verleëge! In t vuurjoar voole op sommige daag de musje van t daak, Toen woar t te veuël van het goeije, daag achteree woar t raak! De herfst hubbe vier al in juli en augustus de litste joare, Mér dat woar ooch geen garantie vuur werme noajoare. Ozze meteorloge die wete t ooch neet mieër,
Vuur hun is t ooch n roadsel kieër op kieër. t weer is neet wat vier zouwe wille, mér dat hubbe vier neet zelf in de handj, Dat wurd angesj geregeld es via os miensjelijke versjtandj! Went es-te zuus woeë me zich teëgewuurdig vuur mint te motte sjtrieje, Zouwe d r veuël luuj onger t zelf bepoale van t weer motte lieje! Dan houwe vier noch mieër oeërlog en zinloos geweld, Terwiel vier dat sjuus motte verbanne van ozze welt! Ron Logister. Dweësj Soms bin ich zoeë dweësj Dan knotter ich om al Wat zou dat toch zun? Deë trik noa krawal De bonusse van de banke? Gouwe handjdrukke va de hieëre? Die t ooch nog veërdig kriege Om os te kristelieëre De afbraak van de zurg? De oetverkoop van t pensjioeën? Bezuuneginge, belastinge? Vier kinne der nieks aa doeën Wie mieë de groeëte klauwe En zich onger der nagel riete Wie mieë der klene man Zich der boksereem mot aa riete Bin ich noe zoeë dweësj? Bin ich noe zoeë vreg? Nee, ich maak mich alleen koad Uëver al dat onrech! Wiel Roeselers Ing Mam Honger kint ing módder waal verdrage Um ermood,lieët ze och ging troan En aasjleeg op heur ier zal ze weersjtoan Pieng en kouw verdreugd ze zonger klage Wat kint ing módder al neet verdrage Wat lieët ze zich gevalle oane troan Wat wit ze zonger krump te weersjtoan Wat kint n módder lieje oane klage Maar wat ing módder neet begriept Dat heur kink noa drugs griept En alles deed um aa geld te komme En zich aan alles wat kint vergriept
Jan Halmans `t Vuërjoar zit in de loeg Dat merkt me aan de natuur mer oog aan de luuj, Miejn vrow begint dan te poetse tot alles blinkt wiej nuuj, Ze is de kou zat, en zèt vinsters en duëre oape, Frissje loëf mot noa bènne zeat ze, alles woar lang genog gesjloate, De ganse boet sjteet dan op d`r kop, Ze sjlèpt mit alles noa boëte, ich weet neet miej woeë ich zitte mot, Al driej daag eate viejr friet mit kroket, Diej ligge mich op de maag ze zint erg vèt, Nog twieëj daag mood houte zeat ze dan bèn ich kloar, Dan heat alles een gow buërt gehad tot volgend joar, Gelökkig zèk ich, dan kumpt weer rust in de tent, Och erme haus zeat ze, doe bès niks gewend, Ich sjnap neet dat diej zin in sjoeënmaak heat, En doa gaar neet meug van weat, Es Ich `t woeërd sjoeënmaak huër weër ich neet good, Dan zakt mich de mood, Tot in de sjoeën, Doa kên ich niks aan doeën. Jan Theunissen D r mei moandj Mei keul en naat Vult de sjuëre en ooch t vaat Wea kint dees gezigkde neet Die op woarheed besjteed De jonkheed is op sjtap De meiden is gekap En die is versjtop In de buusj mit dea pannesjop De mealder flöt d,r mol sjtuët De eekheur sjteet op zien echtesjte puët Jieëder voeëgel zingt wie er gebek is In de natuur is t gaar neet mis Ich bin op zeuk Va woeë d,r koekoek reup Es d r mei is in de moandj Is bedrievigheed en va alles goand Ich zigk daag teage God en de Weldj En geneet ooch oane geldj Jan van Haaf
Luuj mit kritiek In os leëve, Dat is n gegeëve. Hubbe altied luuj kritiek, Dat is neet ummer eëve sjiek! Vuural bie die luuj die alleen langs de kantj sjtoan, En teëge alles wat angere doeën in goan! Déks dont ze die kritiek ooch noch neet zelf bringe, Mér probere ze doa vuur inne angere gek te vinge! Want sjtil dich vuur dat ze dat zelf motte doeën, Dan sjreie ze meteen moord en brandj mit de hoeëgste toeën! Want ze hubbe déks t wirke zelf neet oetvonge, En bie de geboorte alleen n groeëte moel bedonge! n Ege mening hubbe ze ooch déks neet, Omdat aansjlete bie de groeëte groep zoeë gemekkelijk geet! Ze drieve waal ummer mit angere de sjpot, Make doamit succesvolle trajecte kapot! t Ligkt bie die luuj dan ooch neet direct vuur de handj, Te dinke dat ze gezeëgende zunt mit veuël versjtandj! En ooch excuses komme in hun woeërdebook neet vuur, De wuërd respek en waardering make hun uëversjtuur! Jieëderee kint ze waal die luuj, ze lope uëveral rondj, En trappe dich de been weg onger de grondj! Zeët dich dit nieks, houd dich dan d r sjpeegel vuur, En bekin went t zun mot kluër! Want dan is dich dit gedich op t lief gesjrieëve, En is het zieëker dat dit neet zoeë kint blieve! Want vreug of laat kumpt toch alles oet, zoeë veuël is gewis, En dan zal-ste zieën dat-ste zelf de gebieëte hondj bis! Ron Logister. De Sjilder Heë deeg witte, verve sjtrieke Moeëre marmere en duëre kemme Went heë ee moal bezig woar Woar heë neet mieë te remme Heë kos al versjteëke Mit plamuur en kneëbaar hoot Doe woerd heë krank t Woar heuëm gaar neet good Heë heel t neet mieë vol En is oetintelich gezjwich
Noe ligkt heë op t sjoof Mit n oetgesjtrieëke gezich Wiel Roeselers Good Middel Keuper: Sjoon zint toch sjreklig duur, kint geer geen maneer um ze get langer te drage? Verkeuper: Jazieëker, num groeëtere sjtappe! Jan Halmans Gooje murge zonnesjien Gooje murge zonnesjien Geneet va os sjoeëne landj Verzit dich mit handj en tandj Geaf t leave inne handj Zit de zurg mer aa de kantj Doeë vergeate allenuij deëe sjmart Loat de zon binne in dien hart Gooje murge zonnesjien Sjtoa op goa drop oet Blief neet zitte in die boet Maak plezeer geaf t leave inne gulle lach En dink es noa wat t leave dich brach Pak t leave biej de kraag Lache blieve der ganse daag Gooje murge zonnesjien Doeë es get ruijig a en neet zoeë gejaag En ophuëre mit dat geklaag kieek om dich heer geneet va de natuur Wentj dat is allenuij neet duur Erm of riek oud of jonk Mer houd de veut ummer oppe gronk Gooje murge zonnesjien Es- te wanjels doeër t landj Reek inne diene handj Bekiek t leave va de zonnige kantj Goa s zitte op die bank Doeë get sjrieve in t zandj Vergeat alle sjtank vuur dank Wentj t leave doert neet zoee lank Jan van Haaf
Onverwachte dinger Soms, doe houws t neet verwach, Gebuëre van die dinger, gans onverwach. Vier kinne t allemoal, zunt d r mit bekint, Mér vier rake noeëts doa aan gewint. Soms valle die dinger teëge, soms valle ze mit, Dan is t hosanna, dan delf-ste t ongersjpit. Zoeë is dat neet alleen mit dinger die gebuëre, Mér ooch mit de luuj die doa bie huëre! Sjuus es-te dinks t zit waal good, Kumpt d r get dat numt dich deë mood. Dan huërs-te via, via dat d r wurd gezag, Wie deë zich gedrieëg en wat heë zich noe heët oetgedach Dat sjleet nurges op, doa van vergeet dich jieëdere lach. Uëverligke is d r bie huëm joa gaar neet mieër bie, t liekt op n one man show doeër heuëm hie! Dat is neet mieër normaal, t zou neet motte kinne, Zoeë probere ze dan zieltjes vuur zichzelf te winne. En de aandacht noa zich toe te trikke en te kieke, Wie ze oane get te doeën de ieër op kinne sjtrieëke! Ooch dat fenomeen is waal bie jieëderee bekint, Tsja en wat mos-te zigke, weë doa get mit wint? Egelik gene mér die luuj mene van waal, Ze plukke dich geweun hieëlemoal kaal! Doe wurs doa bie déks mer besjadigd doeër angere, Terwiel ze zelf ooch nauweliks get verangere! Gieëfs hieël veuël energie weg aan die projecte en merks dan, Wie flot dat d r sjproake van ongerwaardering zun kan! Doeër luuj die beëter wete, mér neet reke die helpende handj, Want de bis-te sjtuurluuj sjtond nog ummer aan de kantj! Vuur alle luuj en de lede van vereniginge dizze gouwe road, Hubt respek vuur luuj die wirke, meët neet mit n twieëde moat! En es gier dat neet kint opbringe en toch kritiek mint te motte ventilere, Loat dan zieën wie t mot en doch zelf deë sjtap om ins get te prebere! Want alleen degene die zoeën kar trikke, joar in joar oet en ummer weer, Verdene de ieër en t respek vuur wat ze dont, zoeë houte ze t plezeer! En dan kinne vieër same sjtols zun op os vereniging zoeë veuël is gewis, Omdat dat ooch de oeëtsjtroaling noa boete sjtukke beëter is! Ron Logister. Inne sjoeëne zoeëmerdaag. t Is inne sjoeëne zoeëmerdaag. Zonne daag dats-te sjmurges vreug al dinks dat t get sjoeëns mot were.
Der Servoas sjteet op oet de puus en kiekt get ongeleuvig in der sjpegel. Heë kan zich hoas neet vuursjtille dat heë dat zelver is. De hoare sjtond van der kop aaf es of heë de vingere in t sjtopkontak gehad heët en uëver zien bakke zuus-te inne zjwart-grieze sjieëmer, inne baard van inne daag. Had der ooch al ns beëter oet gezieë, dinkt heë bie zichzelf. Heë krats zich get voel e weg uëver der boek en geet oppe vinster aa. Went heë der kop oet gen vinster sjtik, sjteëke heuëm de ieësjte zonnesjtroale al i gen oge. In der noeëteboom zit inne meëlder zich al druk te make. Heë flut dat t der duivel hoalt. Servoas loesterd effe genetend noa die zoeëmersymfonie en kiekt uëver ziene koeëlhof oet en noa t good van Sjpeëtjes deë neëve heuëm wont. Op t good van Sjpeëtjes is der haan zich al mit de hoonder aan t bemuije. Loat mer goan jong ; reupt Servoas in n koajongesbuuj en kiekt n bietje mismeudig noa t Hoeberding dat nog ligkt te sjnurke op neet de aller vuurdeligste manneer. Dan geet heë noa de badkamer op en wurpt zich in de punte. Went heë de koffie veërdig had kumpt t Hoeberding ooch aa getrampele. Vuurzichtig dinkt Servoas, went t Hoeberding mot me in de murge neet teveuël oppe wikker valle. Mer noa n tas koffie en n sjmauer mit sjpek en ei begint ooch t Hoeberding miensj te were. Hast-e huuje get vuur, zeët Hoeberding teëge Servoas. Servoas is al n joar of drie mit pensjioeën en prebeert de tied zoeë veuël meugelik oane wirke kapot te kriege. Ich goan wanjele mit, Beërke, zeët Servoas en drek drachter aa, of has doe get vuur mich i gedanke? Wenst-e mich vantevuëre effe de gerdiene kins aafpakke zeët t Hoeberding, dan kan ich die wesje. Wie? Vrieëgt Servoas, die has-te lits toch ooch gedoa! Mit die sjtinksigare va dich mot ich ze dukker wesje wie ins gieëf Hoeberding truuk. Servoaske trik n gezich va essig, aafpakke vingk heë dat geet nog, mer weer ophange, doa hat heë der duivel aa gezieë. Doa kriet me zon laam erm va, mer alla went der chef zeët gerdiene wesje dan is t gerdiene wesje! Went Servoas de koffie op heët trampeld heë oppe sjtal aa om de trapludder te hoale. In de sjtal begint Servoas al te grauwele: Nondedju weë ligkt noe inne nate dweil op n hote ludder, die verrikde vrouwluuj! Sjtrakke zunt de sjproate rot,.. dat is get om de haus te breëke! Zever neet, zeët Hoeberding, doe bis alleen mer koad dats-te get mos doeën doe meuge! Vanaaf dats-te mit pensioeën bis, bis te nog te meug om oet de oge te kieke. Servoas wurpt der dweil in inne hook en sjnapt zich de ludder onge gen erm en wilt de kuëke in komme. Kiek oet mit de duërsjtielle keëkt Hoeberding, Zef van os heet die pas geverfd. Mer. te laat, Servoas wilt mit de ludder de gank in drieë en kratst mit de ludder langs de kelderduër. Doe trampeleër sjilt Hoeberding. Bis doe toch zelf sjood doe sjoap, zeët Servoas. Doe zuus toch dat ich mit de ludder aa kom, maak die duër dan toe, doe blutsj! Ondanks t sjoeëne weer pakke zich donkere wolke same boave t huuske van Servoas en Hoeberding. Harkedammer dats-e bis, sjilt Hoeberding. Doe bis te sjtom om mit n ludder te lope en ich krieg de sjoot. Zoeë is dat ummer bie die keëls, n groeëte waffel mer get good doeën, vergeët t mer! Servoas begint zich noe richzig op te vreëte en dat is egelik neet zoeë good. Wie roazender dat inne miensj wurdt wie onvuurzichtiger. Zoeë ooch ozze Servoas. In de kamer pratsjt heë de ludder op gen eërd en wilt inne ermsjtool aa gen ziej sjuve. Lugte neet sjuve doe klotskop, geliek hub ich kratse oppe parket grauwelt Hoeberding.
Leck mich am aasj, doa zitte toch plekkerkes onge reupt Servoas. Kint toch kratse zeët Hoeberding. Dan riet ze dronger oet, dan hubs doe deë kroam ooch neet nuëdig gieëft Servoas es antjwoeërd. Hang mer der beledigde oet! Zeët Hoeberding. Doe, doe moogs alles zigke, mer went ich ns inne kieër get zigk dan is der hieër oppe tieënkes getrap, t fiengeveulig menke! Servoas wurdt nog ummer roazender. En t Hoeberding begint ooch al roeëd in t gezich te were. t Geet gaar neet good huuje. Servoas lupt koad oppe ludder aa en wilt die neëve de vinster zitte. Heë lupt get roe doer de kamer en zjweijt in ene kieër de sjoeënmam en n vaas van de kas aaf. Rinkeldekinkel;.. de foto van de sjoeënmam zeilt doeër de kamer en vilt mit t gezich op gen eërd, glaas kapot. De vaas drieët zich elegant in de loch, kumpt op inne punt neer en sjpat in alle kartale oet ee. Noe kiek ns wats-te noe weer gemak has, keëkt Hoeberding. De foto en de vaas van mam! Noe zuus-te, ich hub t ummer gezag; sjilt Servoas, die priej hat mich allezeleëve dweësj gezeëte en die vaas is ooch get van de rommelemert! Dan is t pas richzig vieërtig en Hoeberding lieëst Servoas de leviete hoe ginne hondj broeëd van vrit. Loop noa de pomp, dooch t dich zelf! reupt Servoas en lupt koad noa boete. Hoe gees-te heer, kom truuk doe hoddelsjong! sjilt Hoeberding. Ich loat mich zonne sjoeëne zoeëmerdaag neet versauwe, ich goan mit Beër wanjele ; reupt Servoas uëver de sjauwer truuk. Ze kint mich nog mieë vertille, ich loat mich neet der daag bederve doeër zon wief dinkt Servoas en lupt op Beërke aa vuur te goan wanjele. In zien koadheed heët Servoas neet in de gate dat de loch aan t betrikke is. Heë mint dat de duustere wolke zich alleen in zien gedanke vas gezat hubbe en neet in de loch boave heuëm. En dan gebuërd wat sjienbaar op zonne daag gebuëre mot. Ieër dat heë bie Beërke is valle diekke druppele oet gen loch. Heë kiek noa boave en zuut dat t peëkzjwart toe trigkt. Vuur dat heë t good en waal mit kriet zit Slevenhieër de sjluze oape. De reëge vilt mit bek tegeliek noa onge en n zjwoar onweer liet zich los boave gen durp. Servoas prebeert nog gauw onger t pannesjop van Krieëmesj te sjoele, mer ieër dat heë doa is, is heë al doeërnaat. Mit n gezich zoeë duuster wie de loch pakt heë n sigaar oet t tesjke va zien heëmd..pratsjnaat! Dan wurdt inne knetterende vlook uëversjtumd doeër ene helle dondersjlaag. Inne sjoeëne zoeëmerdaag,.. dinkt Servoas mismeudig bie zichzelf. Wiel Roeselers