Om makliker saam te dink oor God se goedheid gaan ons weer `n paar handvatsels gee.

Transcriptie

1 1 God se goedheid en Abraham Lees Efesiërs 3:16-21 INLEIDING Ons is besig met `n reeks preke wat handel oor wie God is. Hoe langer ek hiermee besig is, hoe meer kom ek agter dat dit nogal voorbarig is om `n tema soos Wie is God te hê, want selfs al sou ek al die regte teologiese terme gebruik om God te beskryf sal ons Hom self daaruit nie heeltemal kan ken nie. Hy is net heeltemal te groot daarvoor. Maar verdra my maar as ons tog gaan probeer om iets van God te verstaan, want om God reg te ken, is uiters belangrik, sodat ons Hom met die nodige kennis en vertroue kan dien. Vandag fokus ons op die goedheid van God. Die tema kon ook God se liefde gewees het, maar ek kies juis die term goedheid, omdat die woordjie liefde so `n afgewaterde betekenis in ons tyd gekry het. God se goedheid omsluit egter sy liefde en herinner ons aan die grootheid daarvan. Soos die gebruik is, probeer ek `n definisie gee van hierdie eienskap van God. Def: God kies mense uit sy goedhartigheid en gee aan hulle onverdiende liefde en genade. Om makliker saam te dink oor God se goedheid gaan ons weer `n paar handvatsels gee. God kies uit Goedhartigheid Onder hierdie handvatsel wil ons onthou wat ons reeds by vorige geleenthede geleer het, nl. dat God alwetend en almagtig is. Omdat God alles weet, en omdat Hy almagtig is kies Hy sekere mense om Hom te dien. Vir party is hierdie gedagte van uitverkiesing `n probleem en selfs iets wat onregverdig is, maar, as God als weet, en Almagtig is, dan beteken dit eintlik dat Hy nie `n fout kan maak nie, ook nie met sy keuse nie. Wie sou jy eerder met die keuse wou vertrou? Ons leer in Ef. 1:4 4So het Hy, nog voordat die wêreld geskep is, ons in Christus uitverkies om heilig en onberispelik voor Hom te wees. Maar waarom sou God dit doen? Kan iemand uitstaan, of iets meer doen om gekies te word? Nee, as ons deur die volgende verse van Ef 1 lees, hoor jy woorde soos: in liefde, volgens sy genade, vrye geskenk. God kies mense om Hom te dien omdat dit in sy goddelike aard is.

2 2 Hy is goedhartig. Is jy oop vir hierdie goedhartigheid van God, sien ons dit nog raak? God gee God gee twee dinge in sy goedheid: Hy gee liefde en Hy gee genade. Eintlik som die woordjie GEE God se liefde op. Deur sy Woord wys God Homself as die een wat gee. As ek julle 10 sekondes gee om te dink aan dié teksgedeelte wat hierdie waarheid vir ons uitspel, dan is ek seker julle hierdie een onthou: Joh. 3:16 16 God het die wêreld so lief gehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê. Kan daar `n groter, meer indrukwekkende daad van liefde wees as dit? En Hy doen dit uit genade, uit omgee. God gee genade op genade, want Hy gee hierdie tipe liefde aan mense wat dit nie verdien nie, en Hy gee dit verniet. God se hand is nooit toe nie. God gee aan hulle wat dit nie verdien nie Dit is die derde handvatsel. Sou God se goedheid nie reeds groot gewees het as Hy gegee het aan hulle wat dit verdien nie? Verseker, ongelukkig sou daar geen kandidate vir daardie liefde gevind word nie. Niemand kan verdien nie. Juis hierin is God se goedheid oorweldigend, dat Hy dit bewys teenoor mense wat dit hoegenaamd nie verdien nie. Dit is lewens belangrik dat oud en jonk moet besef hoe groot God se liefde is. Dit is presies waarvoor Paulus in Ef. 3:18 bid. 18Mag julle in staat wees om saam met al die gelowiges te begryp hoe wyd en ver en hoog en diep die liefde van Christus strek. 19 Mag julle sy liefde ken, liefde wat ons verstand te bowe gaan, en mag julle heeltemal vervul word met die volheid van God. Maar waarom is dit dan belangrik dat ons die liefde van ons Here Jesus moet ken? Sodat ons vervul mag word met die volheid van God. As ek God in sy volheid wil beleef, dan moet ek besef dat sy liefde groter is as wat my breintjie kan verstaan of wat my emosies kan voel. Maar hoe beleef ons hierdie volheid van God? Vers 18 sê: saam met al die gelowiges.

3 3 Ons beleef die volheid van God se goedheid, wanneer ons mekaar daaraan herinner, ja ook in ons verskeidenheid. Ek doen dit as ek in my huwelik nie vir myself leef nie, maar my lewe aan my vrou, my kinders gee. Ek doen dit wanneer ek soos Jesus, teen die stroom in gehoorsaam is aan God, en goed doen aan mense. Ek doen dit as ek weer onthou hoe geweldig baie seëninge ekself ontvang, wanneer ek God daarvoor dank, en wanneer ek dit met ander deel. So raak ons meer en meer bewus van hoe volledig en oorvloedig God se liefde is. Soos dit ook die gebruik in hierdie reeks is, gaan ons kyk hoe hierdie eienskap van God in die lewe van `n OT karakter lyk. Ons kyk vandag hoe God se goedheid in die lewe van Abraham duidelik is. Abraham se lewe As ons dink aan die verhaal van Abraham, dan getuig dit by uitstek oor die goedheid van God. God kies vir Abraham uit sy goedhartigheid Blaai saam met my na Genesis 12. As julle net vinnig terug kyk na hoofstuk 11, dan sien ons dat hierdie gebeure voorafgegaan word deur die verwarring by die toring van Babel. Die mense was weereens nie gehoorsaam aan God nie, en God begin oor met Abraham. Dan hoor ons in 12:1 hoe God vir Abraham kies. God kies Abraham omdat Hy goedhartig is. Hy wil steeds `n verhouding met mense hê, sodat Hy hulle kan red, sodat Hy kan heel maak wat stukkend is. Omdat God in sy wese goed is, kies Hy vir Abraham sodat die wêreld kan hoor dat Hy God is. So kry Abraham dan die opdrag om te trek. God gee As God vir Abraham kies, dan gee Hy ook. Hy gee beloftes van `n nageslag, van `n land en ook van `n seën vir al die volke. Ons sien hierin God se liefde vir Abraham. Abraham is teen hierdie tyd 75 jaar oud en sonder kinders.

4 4 God beloof aan hom kinders in daardie tyd was kinderloosheid gesien as `n straf van God, `n skande. Maar soos ons deur die verhaal van Abraham se lewe gaan, sien ons hoedat God hom voorberei, sodat hy sy liefde kan verstaan vir wat dit is. Abraham wag 25 jaar voordat die eerste belofte van `n nageslag tot uitvoering kom. So leer Abraham dat God se liefde nie net in die deur voer van beloftes sit nie, maar dat die liefde wat Hy gee in elke dag se lewe met Hom ervaar kan word. Hierdie dinge gee God aan Abraham uit genade, want Abraham sou die res van sy lewe kinderloos gebly het as God nie vir Isak aan hom gegee het nie. Verder het God ook vir Abraham die teken van die besnydenis gegee as teken van sy genadige liefde. God gee aan Abraham terwyl hy dit nie verdien nie Nou moet ons onthou wie Abraham die man was. As julle weer terugblaai na die laaste verse van hoofstuk 11. Daar hoor ons dat Abraham die seun van Tera was, wat uit Ur weggetrek het na Haran toe. (wys kaart Ons weet uit opgrawings en geskiedenis dat beide stede, Ur en Haran, plekke was waar die aanbidding van die maangod die primêre godsdiens was. En dan hoor ons in Joshua 24:2 2Toe sê Josua vir die hele volk: So sê die Here die God van Israel: Lank gelede het julle voorvaders onder hulle was Tera, vader van Abraham en Nahor anderkant die Eufraat gewoon en hulle het ander gode gedien. Abraham was vir 75 jaar van sy lewe `n afgodsdienaar! Verder hoor ons reg deur Abraham se verhaal dat hy dikwels nie vertrou het dat God hom en Sarai sal beskerm nie, ons hoor dat hy leuens vertel het. Nadat hy al lank moes wag vir die geboorte van `n kind, kry hy op aandrang van Sarai `n kind by haar slavin, om darem net vir God so bietjie te help. In hoofstuk 17 kom Abraham agter dat dit nie God se plan was nie, en as God weer vir Abraham belowe dat hy `n kind by Sara sal hê, dan hoor ons in vers 17 dat Abraham lag. Dit is asof hy wil sê: Here, kom ons wees net bietjie realisties. Dit wat U beloof is onmoontlik, hier is Ismael, kan dit nie maar hy wees nie. As God dan self vir Abraham kom besoek om die belofte te bevestig, hoor ons hoe Sara in hfst. 18 ook lag. Abraham was dus glad nie die perfekte kandidaat om hierdie goedheid van God te verdien nie.

5 5 `n Heiden, `n leuenaar, `n twyfelaar en noem maar op. Nee God gee omdat Hy goed is, en weereens sluit God se goedheid meer mense as net een in. Kom ons luister na Deut. 7:6-8 Net vinnig die konteks van die gedeelte: Die Israeliete se kamp is langs die Jordaanrivier opgeslaan, reg om die beloofde land in te gaan nadat hulle 40 jaar in die woestyn moes rond swerf. Moses kon nie die beloofde land binnegaan nie omdat hy voor God gesondig het. Nou is hy besig om die volk te leer oor die groot dinge wat God alles vir hulle gedoen het = die goedheid wat God aan hulle bewys het. 6Jy is n volk wat vir die Here jou God afgesonder is. Vir jou het die Here jou God gekies om uit al die volke op die aarde sy eiendomsvolk te wees. 7 Die Here het jou nie liefgekry en gekies omdat jy groter was as die ander volke nie, jy was die kleinste van almal. 8 Omdat die Here jou liefhet en Hy sy belofte nakom wat Hy met n eed bekragtig het aan jou voorvaders, het Hy jou deur sy groot krag laat wegtrek en jou bevry uit die plek van slawerny. Deurdat God sy liefde aan Abraham gegee het, het Hy dit ook aan hierdie volk gegee. God se goedheid moes deur Abraham by hierdie volk uitkom, en weer deur hulle by al die volke van die aarde, ook by ons. Onthou God se woorde toe Hy Abraham gekies het: In jou sal al die volke van die aarde geseën wees. So sal ons die volheid van God se goedheid beleef. Slot Broer en suster, vriende. God se grootste daad van liefde was toe Hyself na hierdie aarde gekom het in Jesus Christus. Die Vader het sy Seun gegee, die Seun het Homself gegee. Sodat Hy finaal alles wat stukkend is, kan heelmaak. Sodat Hy my stukkende lewe kan heelmaak. Die wat Hy dan in sy goedhartigheid gekies het om Hom te dien, sal dit glo. Aan hulle gee Hy, sonder dat hulle dit verdien, die Heilige Gees, om hulle elke dag aan sy onuitputbare liefde te herinner. Mag die kennis van God se goedheid jou weer aanspoor om opnuut te vertrou op sy liefde elke dag, in elke omstandigheid.

6 6 Kom ons gee dan in dieselfde liefde, kom ons deel die goedheid van God met mekaar, sodat ons sy volheid mag ken. Ons bid saam met Paulus. Ef. 3:16 16Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word, 17 dat Christus deur die geloof in julle harte sal woon en dat julle in die liefde gewortel en gegrondves sal wees.