22. Die Here hoor sy kinders Rigters 6:1-22

Transcriptie

1 22. Die Here hoor sy kinders Rigters 6:1-22 Tema Die Here hoor sy kinders wat tot Hom roep al het hulle van Hom af weggedraai en help hulle deur leiers wat Hy daarvoor gereed maak. Agtergrond Rigters vertel hoe Israel in die beloofde land begin lewe, tussen groepe mense (Kanaäniete, Filistyne ) wat nie dieselfde beloftes van die Here gekry het as hulle nie die anti-promise mense. Hierdie mense het rondom en langs Israel-groepe gewoon en hulle op twee maniere bedreig: 1. Hulle was vyande wat Israel se grondgebied wou afvat en hulle diere en produkte vernietig of gesteel het. 2. Hulle het ander gode aangehang en gedien en dit kon Israel verlei tot afgodery. In Rigters kry ons n sekere patroon wat n paar keer herhaal: 1. Die Israeliete doen wat verkeerd is in die oë van die Here. 2. Die Here gee hulle oor in die hande van die vyande. 3. Die Israeliete roep om hulp. 4. Die Here hoor deur n redder te voorsien. Hierdie patroon lei ook die verhaal van Gideon in. Die Here loop n pad met Gideon en gebruik hom om sy kinders van die vyande te red. Maar die verhaal sluit af met die hartseer inligting van hoe Gideon n beeld van goud maak wat die mense begin aanbid het. Opmerking: Ons gaan die hele verhaal in baie kort dele opbreek en dit net vertel, terwyl ons n bietjie langer stilstaan by Rigters 7:16-22 en dit uit die Bybel lees. Dit sal goed wees as ons almal die week tuis die hele verhaal uit die Bybel kan lees en weer daaroor nadink (Huisgeloof). Bybelgedeeltes Vertel Rigters 6:1-10 Vertel Rigters 6:11-23 Vertel Rigters 6:24-32 Vertel Rigters 6:40 Vertel Rigters 7:1-8 Vertel Rigters7:9-15 Lees Rigters 7:16-22 Vertel Rigters 8:22-27, Hoofgedagtes van die ontmoeting 1. Doen verkeerd, word aan vyande oorgegee, roep om hulp. 2. Gideon word geroep en kry versekering dat die Here as redder by hom is. 3. Huis skoonmaak van afgode! Gideon word amper doodgemaak. 4. Twyfel, maar die Here gee versekering. 5. Te veel manskappe. Verminder tot 300, anders dink die mense hulle het hulleself gered. 6. Nog n keer moed gegee deur die Here (droom). 7. Die Here en Gideon! Die Here red. 8. Terug op die ou dwaalweg van afgodery.

2 Uitkoms 1. Sê dankie vir leiers wat deur die Here gebruik word en bid vir hulle. 2. Aanbid die Redder wat hoor as ons roep. 3. Erken dat ons maklik WEER afdwaal en vra die Here om ons vas te hou! Hulpmiddels by die storie n Groot doek of mat waarop jy blokke kan stapel. Sewe boublokke Gebruik enige van die volgende: stene, bokse, plastiekbakkies, blikke. Paneel 4 om te wys ons is nou in die Rigterstyd ná die val van Jerigo se muur, net voor die leeu en heuningkoek (Simson). Die Portret van Gideon Hulpmiddels vir kleingroepvaslegging Junior kleingroep Bring saam 1. Vir elke kind n plakker met die woord: Dapper 2. n Aantal blikkies of blokke waarmee n toring gebou kan word 3. Penne, kryt Senior kleingroep Bring saam 1. Vir elke kind n plakker met die woord: Dapper 2. n Aantal blikkies of blokke waarmee n toring gebou kan word 3. Penne, kryt

3 Die storie Begin Vandag gaan ons n storie vertel wat eintlik baie lank is. Almal moet dit in die week wat kom by die huis gaan lees. Daarom gaan ons dit vandag net vinnig vertel. Die verhaal pas op paneel 4, net hier waar die stukkie muur van Jerigo nog staan, en voordat ons by die verhaal van die sterk man, die dooie leeu en die heuning kom. Voordat ons by die storie kom, wil ek eers twee vrae vra: 1. Dink julle ook dat baie mense sterker is as min mense, of dat baie mense beter is as min mense? In vandag se tye stem ons mos oor dinge. As die meeste mense vir iets vra, of iets kies, dan maak ons so. Ons hou dus van meerderhede. Dink n bietjie hieroor terwyl ons die storie vertel. 2. Het julle ook al vreeslik baie van iemand gehou iemand wat soos n held of idol is, en dan doen daardie iemand iets wat jou baie teleurstel? Ons verhaal vertel ook van iemand wat soos n held dinge doen, maar dan eindig ons storie nie so mooi nie. Ons gaan die storie met sewe blokke (Gebruik enige van die volgende: stene, bokse, plastiekbakkies, blikke) vertel, en elke keer wanneer daar iets nuuts in die storie kom, gaan ek nog n blok op die ander stapel. Voordat ons die eerste blok pak, gooi ons eers hierdie doek oop om te vertel hoe dit in Israel gegaan het. Die kinders van die Here wou nie na die Here luister nie en het net gedoen wat hulle wou. Daar was ook nie n koning of leier wat hulle op die regte pad gehou het nie. Toe kom die vyand, die Midianiete wat so baie soos sprinkane was en begin steel Israel se goed vir sewe jaar lank. En dit wat hulle nie gesteel het nie, het hulle afgebrand of verwoes. Die Israeliete moes net altyd wegkruip. Nou begin ons met die eerste blok. (Bou met elke moment een blok hoër. Pak dit mooi stewig sodat dit nie omval voor die einde nie. n Mens sou n tekening of woord op elke blok kon skryf, byvoorbeeld: n profeet, vuur, bul, vlieswol, 300, droom, swaard.) Hoor Moment 1: Vertel Rigters 6:7-10 ( n Man/profeet) Israel roep toe tot die Here, en die Here stuur n man om vir hulle te gaan sê: Dis eintlik julle eie skuld. Die Here het julle uit Egipte gebring en gesê Hy is die enigste Here, en toe begin julle om die afgode wat die ander mense in hierdie land dien, te dien. Alhoewel dit Israel se verdiende loon was dat hulle so swaarkry, hoor die Here hulle tog nou. Moment 2: Vertel Rigters 6:11-23 (Die vuur uit die engel se staf) n Groot boom was nogal n belangrike bymekaarkomplek. Die engel van die Here het toe by so n groot boom naby die koringlande van Joas gaan sit. Daar naby was n jongman met die naam Gideon besig om koring wat hulle nog vir die Midianiete weggesteek het, skoon te maak (kaf van die korrels te skei). Die engel gaan toe na hierdie jongman toe en sê: Die Here is by jou, dapper man. Gideon was sommer kwaad: As die Here by ons is, hoekom gebeur al hierdie slegte goed dan met ons? Waar is die Here?

4 Die volgende wat ons hoor in die Bybelse verhaal, is dat die Here vir Gideon sê: Ek stuur jou. (Dit Bybelverhaal verander dus die engel na die Here self). Toe Gideon nog sê hy kom maar uit n arm familie en hoe sal hy nou die Midianiete gaan straf, antwoord die Here net: Ek is by jou. Gideon het vir hierdie vreemde Persoon gesê hy moet net daar wag. Hy gaan bak toe gou n klomp brood en bring dit saam met vleis terug. En wat doen die vreemde Persoon? Hy sê Gideon moet die kos op n rots sit. Toe raak Hy met die punt van die stok in sy hand aan die vleis en brood. n Vuur het uit die rots opgevlam en die Persoon verdwyn. Gideon was baie bang, maar die Here het hom gerus gestel. Gideon bou toe daar n altaar vir die Here. Moment 3: Vertel Rigters 6:24-32 (Die bul) Die Here stuur Gideon toe om sy pa se groot bul wat al sewe jaar oud was te gaan slag en dit vir die Here op n nuwe altaar te offer. Maar voordat Gideon dit doen, moes hy eers die altaar wat sy pa vir die afgod Baäl gebou het, afbreek. Omdat Gideon bang was vir die mense, het hy dit in die nag gedoen. Die volgende oggend was daar chaos: Wie het dit gedoen? wou almal weet. En toe hulle uitvind dis Gideon, wou hulle hom doodmaak. Gideon se pa het egter gesê dat as Baäl n god is, hy maar vir Gideon moet straf. Moment 4: Vertel Rigters 6:36-40 (Die stukkie vlieswol) Gideon het moed geskep en op die ramshoring geblaas om al die mense wat kan veg bymekaar te maak. Toe twyfel hy weer of die Here hom wil gebruik om Israel te red. Hy vra die Here toe om vir hom n teken te gee. As n mens n skaap afskeer, sit die wol nog aan mekaar vas (dit val nie los soos hare nie). Met so n stuk vlieswol vra Hy toe vir die Here n teken: Hy sal die wol in die nag buite sit en as dit die volgende môre nat gedou is, maar die grond is droog, sal hy weet dis reg: Die Here gaan hom gebruik. En so gebeur dit toe. Gideon was nog nie seker nie, want dit is nogal normaal dat n so n wolvlies in die nag dou sal aantrek. Toe vra Gideon vir die Here of dit ook andersom kan gebeur. En die volgende môre was dit oral nat gedou, maar die wol was droog. Moment 5: Vertel Rigters 7:1-8 (Net 300 manskappe) Daar was duisende manskapppe by Gideon. Die Here sê toe vir hom: Israel gaan spog as hulle die vyand met soveel manskappe wen. Dan sal hulle sê dis hulle wat so sterk is. Sê dat almal wat bang is en bewe, maar kan omdraai. Twee en twintig duisend draai toe om en net tien duisend bly oor. Dit was nog te veel vir die Here. Die Here sê toe Gideon moet hulle laat water drink by n stroom. Party het by die stroom gekniel om te drink, maar drie honderd het die water met hulle hande opgeskep. Die Here sê toe die drie honderd is genoeg. Moment 6: Vertel Rigters 7:9-15 (Die droom van die vyand) Die Here wou al Gideon se bangheid wegvat. Hy sê toe vir Gideon hy moet die nag as dit baie donker is, tussen die vyand se tente ingaan en gaan luister wat hulle sê. Ek sou darem baie bang wees om dit te doen. Gideon het egter gegaan. Hy het sy slaaf saamgeneem. En wat hoor hy daar in die vyand se kamp? Een persoon vertel vir sy maat dat hy gedroom het n groot ronde garsbrood kom rol in hulle kanp in en rol hulle hele tent om. Die maat antwoord toe: Dis Gideon! Die Here gaan Gideon laat wen. Nou was Gideon gereed. Hy het teruggegaan en sy plan aan die manne vertel.

5 Moment 7: Lees Rigters 7:16-22 (Die swaard van die Here en Gideon) So het die Here van arme bang Gideon, dapper Gideon gemaak. Onthou julle nog wat daardie vreemde engel reg aan die begin vir Gideon daar onder die boom gesê het? Hy het gesê: Die Here is by jou, dapper man! Nou wou die mense vir Gideon koning maak. Moment 8: Vertel Rigters 8:22-27, (Moenie n boublok hier gebruik nie! Skop al die blokke om nadat jy die volgende vertel het.) Gideon doen toe n baie snaakse ding. Hy sê elkeen moet n goue ring wat hulle by die Midianiete afgevat het met die oorlog, na hom toe bring. Die ringe het altesaam 17 kg geweeg. Toe maak Gideon n beeld daarvan en op die ou-end aanbid die mense hierdie beeld. En na Gideon se dood het hulle weer vir Baäl aanbid. (Skop die agt blokke om.) Dink Oë toe! Dink aan n sekere dag toe daar iemand by die doopvont gestaan het met jou as seuntjie of dogtertjie by hulle. Dis asof die Here daardie dag by jou gestaan het, en gesê het: Ek is by jou dapper, seun of dogter. Dis asof hierdie woorde heelpad by ons bly, ook as ons bang is en weer twyfel. Die Here troos ons dan daarmee, dat Hy by ons is en dat Hy die oorwinnaar is. Leef Omdat ons Christene is, sê die Here vir ons ons is belangrik. Hý maak ons belangrik. Hý maak ons God se kinders. Daarom kan ons dinge doen wat ons nooit gedroom het ons sal kan doen nie. Ons maak nie oorlog en wen gewone vyande nie. Nee, Christene is dapper om dinge wat verkeerd is, reg te maak. Ons bring liefde waar daar haat is, vrede waar daar n bakleiery is, blydskap waar daar hartseer is. Ons wen die kwaad met die goeie! Ons kan vandag dankie sê vir elke leier wat die Here vir ons gee, en bid dat hulle saam met ons aan die Here getrou sal bly. Ons erken dat ons almal maklik afdwaal, en daarom moet ons vir mekaar bid en baie met mekaar praat en mekaar bemoedig. Ons aanbid die Here wat ons redder is en wat hoor wanneer ons tot Hom roep om gehelp te word.

6 Kleingroepvaslegging: Junior groep Welkom Plak n dapper -plakker voor elkeen se bors soos wat hulle inkom. Wegspring Bou agt blokke op mekaar sonder dat dit omval. Maak beurte, en kyk wie die hoogste toring kan bou. Werksaam 1. Teken die agt blokke van Gideon se storie in jou werkboek. Gee vir elke blok n naam of teken iets daarin. Help mekaar om dit in die regte volgorde te doen. 2. Gesels nou oor hierdie vrae: Watter blok was vir my die interessantste? Hoekom? Watter leier is vir julle n voorbeeld van hoe n kind van die Here moet optree? Noem verskillende mense en bid vir hulle. Wegstuur/Huisgeloof 1. Lees in die week weer die hele verhaal van Gideon soos Rigters 6 8 dit vertel. Gesels saam oor hierdie verhaal. 2. Vra die grootmense om te vertel: Ek moes eenkeer iets doen waarvoor ek nie eintlik kans gesien het nie. Wat het toe gebeur?

7 Kleingroepvaslegging: Senior groep Welkom Plak n dapper -plakker voor elkeen se bors soos wat hulle inkom. Wegspring Maak beurte, en kyk wie die hoogste toring kan bou uit die items wat voorsien word (blokkies, blikkies, plastiekhouertjies). Wonder Dink aan jou eie lewe. Bou n paar blokke in jou gedagtes op mekaar. Gee ook aan elkeen n naam. Dalk is daar een wat blok wat vertel van iets wat gebeur het toe jy n baie bang tyd in jou lewe gehad het. Dalk kom een blok uit n tyd toe jy baie moedeloos was. Jou toring het nie omgeval nie, want die Here was heelpad by jou. Hy sê vandag weer vir jou: Jy is dapper, want Ek is by jou. Werksaam 1. Teken die agt blokke van Gideon se verhaal in jou werkboek. Gee vir elke blok n naam of teken iets daarin. Help mekaar om dit in die regte volgorde te doen. 2. Gesels nou saam: Ons is Christene. Wat maak ons bang? Ons is Christene. Wat maak ons moedeloos? Ons is Christene. Watter soort wapens gebruik ons? Ons is Christene. Wat laat ons aanhou en uithou? Ons is Christene. Waarteen veg ons? Wat moet ons oorwin? Watter leier is vir jou n voorbeeld van hoe n kind van die Here moet optree? Noem n paar leiers se name en bid dan vir hulle. Wegstuur/Huisgeloof 1. Lees in die week weer die hele verhaal van Gideon soos Rigters 6 8 dit vertel. Gesels saam oor hierdie verhaal. 2. Vra die grootmense om te vertel: Ek moes eenkeer iets doen waarvoor ek nie eintlik kans gesien het nie. Wat het toe gebeur? 3. Kyk of julle mekaar moed kan inpraat deur hierdie sin vir mekaar te voltooi: Ek onthou eendag toe jy iets baie wonderlik en dapper gedoen het