Preek 1 Timoteus 4:7

Transcriptie

1 1 Preek 1 Timoteus 4:7 (Preek gelewer tydens oggenddiens in Welkom-Noord op Sondag 24 Julie 2016) (Dit was die eerste preek van n reeks oor die tema Afrigting vir die lewe) Voor die erediens Sing: Lied 207:1,4 Sing: Lied 475:1,2 Sing: Lied 200:1,3 Afkondigings Stilte Tydens die erediens: Votum Groetseën Loflied: Psalm 100-2:1,2,3 Geloofsbelydenis: Twaalf Artikels Die Wet van die Here: Exodus 20:1-17 Sing: Psalm 86-1:6 Gebed Skriflesing: 1 Timoteus 4 Sing: Skrifberyming 14-1:1,3 Fokus: 1 Timoteus 4:7b Preek: Gebed Diens van barmhartigheid Sing: Lied 308:1,2,5 Wegstuurseën Amen: Skrifberyming 13-3 Tema: Oefen jou vir n lewe wat in eerbied aan God toegewy is. (Die preek is op die volgende vier bladsye)

2 2 Preek: Geliefdes in ons Here Jesus Christus Al die top-atlete in die wêreld is tans besig om baie hard te oefen. Hoekom? Want oor net minder as twee weke begin die Olimpiese Spele in Rio de Janeiro in Brasilië. Nou is my vraag aan jou: Het jý al begin oefen? Dalk is jy verbaas dat ek hierdie vraag vir jou vra. Jy dink dalk: Waarom vra jy die vraag vir mý? Ek gaan mos nie aan die Olimpiese Spele deelneem nie. My antwoord aan jou is: Dit is wel so dat jy nie aan die Olimpiese Spele gaan deelneem nie. Maar jy moet nog steeds oefen, want daar is n ander wedloop waaraan jy moet deelneem. En vir hierdie wedloop moet jy oefen. Wat is hierdie wedloop waaraan jy moet deelneem? Aan die een kant kan ons sê dat dit die wedloop van die lewe is. Aan die ander kant kan ons sê dat dit die geloofswedloop is. Op verskeie plekke in die Bybel word ons as gelowiges se lewe hier op aarde vergelyk met die hardloop van n wedloop. n Voorbeeld hiervan is Hebreërs 12:1-2, wat in die woorde van die 1983/92-Vertaling soos volg lui: Terwyl ons dan so n groot skare geloofsgetuies rondom ons het, laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, die oog gevestig op Jesus, die Begin en Voleinder van die geloof. Nog n voorbeeld is 1 Korintiërs 9:24-26, wat in die woorde van die 1983/92-Vertaling soos volg lui: Weet julle nie dat atlete wat aan n wedloop deelneem, wel almal hardloop, maar dat net een die prys ontvang nie? Hardloop dan só dat julle die prys kan wen. Almal wat aan n wedstryd deelneem, ontsê hulleself allerlei dinge. Hulle doen dit om n verganklike oorwinnaarskroon te verkry, maar ons n onverganklike. Ek hardloop soos een wat nie van sy doel onseker is nie; ek slaan soos n bokser wat nie in die lug slaan nie. En dan is daar ook Paulus se woorde in 2 Timoteus 4:7-8, wat in die woorde van die 1983/92-Vertaling soos volg lui: Ek het die goeie wedloop afgelê, ek het die wenstreep bereik; ek het gelowig enduit volgehou. Nou wag die oorwinnaarskroon vir my, die lewe by God. Op die dag dat Hy weer kom, sal die Here, die Regverdige, dit vir my gee, en nie net vir my nie, maar ook almal wat met verlange uitsien na sy koms. Al hierdie gedeeltes moedig ons aan om die geloofsmarathon te hardloop en te voltooi. Om n marathon (of enige ander wedloop) te hardloop en te voltooi, moet jy fiks wees. As jy nie fiks is nie, gaan die wedloop vir jou baie moeilik wees. Jy gaan moeg word. Jy kan dalk halfpad wil opgee. Jy kan dalk die afsnypunt mis. As jy onfiks is, kan jy makliker beserings of siektes opdoen, wat jou uit die wedloop kan laat onttrek.

3 3 Dieselfde geld vir die wedloop waaraan ons as gelowiges deelneem. As jy hierdie wedloop wil hardloop en klaarmaak, moet jy fiks wees. Jy moet geestelik fiks wees. Veral die eise van vandag se lewe vra dat ons geestelik fiks moet wees. Een van die hoofredes hoekom mense soms nie die eise van die lewe kan weerstaan nie, is omdat hulle nie geestelik fiks is nie. Juis daarom moet ons oefen. Oefen en nogmaals oefen. Dit is die opdrag van die vers waarop ons vandag fokus. Daar staan in die woorde van die 1933/53- Vertaling: en oefen jou in die godsaligheid. Dit is belangrik om raak te sien aan wie Paulus hierdie opdrag gegee het. Dit was die jong dominee Timoteus. Timoteus was n jongman wat deur Paulus as predikant opgelei is. Vir n lang tyd het Timoteus saam met Paulus gereis en van Paulus geleer. Later het Paulus al meer verantwoordelikhede aan hom gegee. Toe Paulus die brief 1 Timoteus geskryf het, was Timoteus die predikant van die gemeente in Efese. Sien julle raak? Paulus gee nie hierdie opdrag om te oefen aan iemand wat halfhartig in die geloof is nie. Hy gee hierdie opdrag aan iemand wat n voorganger is, iemand van wie net goed gepraat word. As Paulus hierdie opdrag aan so n toegewyde persoon gee, hoeveel te meer geld dit nie vir ons nie. Die Griekse woord wat hier in 1 Timoteus 4:7 gebruik is en wat met oefen vertaal is, is gymnadze. Dit is die woord waar ons woord gimnasium vandaan kom. Of soos ons kortweg sê: Gim. Ek gaan nou gim. Dan bedoel ons: Ek gaan nou oefen om fiks te word of spiere te bou of wat jou doelwit met die oefening ookal mag wees. Die woord gimnasium word ook gebruik vir n plek waar jy onderrig word of leer. n Skool word soms n gimnasium genoem, soos byvoorbeeld Welkom Gimnasium. n Gimnasium is in hierdie sin n plek waar jy leer of onderrig word om jou vir die lewe gereed te maak. Jy kan net suksesvol gim en liggaamlik fiks word, as jy gedissiplineerd is in wat van jou in die gimnasium verwag word. Jy kan nie net een keer per maand of selfs net een keer n week gaan oefen nie. Dan gaan jy nie vordering maak nie. Dieselfde geld van ons geestelike oefening. Dit help nie jy lees jou Bybel net nou en dan of kom net nou en dan kerk toe nie. Dan gaan jy nie juis vordering maak om geestelik fiks te word nie. Oefen en nogmaals oefen geld ook vir jou geestelike lewe. Watter oefening moet jy vir hierdie wedloop doen? Die vers waarop ons vanoggend fokus gee die antwoord op hierdie vraag. In die 1933/53-Vertaling staan daar: oefen jou in die godsaligheid. Wat is die godsaligheid? Dit is baie nou verwant aan die Hebreeuse woord wat in die Ou Testament vir die vrees vir die Here gebruik word. Dan is dit nie bang wees vir God nie, maar om respek en ontsag vir God te hê. So is die godsaligheid om ontsag en eerbied vir God te hê. Dit is egter meer as net ontsag en eerbied vir God. Die godsaligheid behels ook dat jou ontsag en eerbied vir God daarop uitloop dat jy jou ten volle aan God toewy. Hierdie aspek van die godsaligheid kom in die 1983/92-Vertaling na vore, waar daar staan: Oefen jou liewer om in toewyding aan God te lewe. Die godsaligheid behels ook dat jou toewyding aan God daarop uitloop dat jy doen wat Hy van jou vra. Dit behels dat jy reg lewe. Hierdie aspek van die godsaligheid kom in die Nuwe Direkte Vertaling na vore, waar daar staan: Oefen jouself om vroom te lewe.

4 4 Die tipe oefening wat jy moet doen, sê watter tipe wedloop dit is waaraan jy moet deelneem. n Naelloper sal naellope oefen en op spoed oefeninge konsentreer. n Marathon atleet sal weer op uithouvermoë konsentreer. Dieselfde geld vir ons as gelowiges. Ons oefen in die godsaligheid, want die godsaligheid is die wedloop wat ons in die geloof moet hardloop. Of anders gesê: Ons oefen vir n lewe aan wat God toegewy is en Hom dien, want dit is die wedloop waaraan jy as gelowige moet deelneem. Daarom is die tema van hierdie preek: Oefen jou vir n lewe wat in eerbied aan God gewy is. Ek sou die tema van die preek ook soos volg kon verwoord: Oefen jou om godvresend te lewe. Nog n manier waarop die tema van die preek verwoord sou kon word, is: Oefen vir jou erediens. Met die woord erediens bedoel ek nie dit wat Sondae hier in die kerkgebou gebeur nie. Nee, met die woorde jou erediens bedoel ek dit wat jy elke dag van die week doen. Vir n gelowige is dit wat hy elke dag van die week doen, n erediens. n Gelowige dien God op elke terrein van die lewe, elke dag van die week. Dit is wat ons die erediens van die lewe noem. Die opdrag van ons fokusvers is: Oefen jou daarin. Ja, oefen vir jou erediens, die erediens van die lewe. Dít is die wedloop waaraan jy as gelowige moet deelneem. Dit is n wedloop wat jy nie vir jouself hardloop nie, maar wat jy vir God hardloop. Ons kan dit vergelyk met die jaarlikse Tour de France wat die afgelope drie weke in Frankryk plaasgevind het. Die van julle wat dit gevolg het, weet waarskynlik dat nie al die ryers wat deelgeneem het, met die doelwit om as algehele wenner gekroon te word, deelgeneem het nie. Baie van hulle se doel was om iemand in hulle span die algehele wenner te laat wees. Hulle het nie die toer vir hulleself gery nie, maar vir n spanmaat. So hardloop ons die geloofswedloop (soos ek reeds gesê het) nie vir onsself nie, maar vir God. Jy hardloop om die eer van God te laat wen. Die eer van God is die goue medalje. Ons het ons doel bereik, as God verheerlik word en as sy koninkryk bevorder word. Ons kan die geloofswedloop wat ons hardloop (die erediens van die lewe) ook vergelyk met die Comrades wedloop tussen Durban en Pietermaritzburg. Die meeste van die atlete hardloop nie om eerste te kom nie, maar om klaar te maak. En in die proses is daar kameraadskap tussen die atlete en ondersteun hulle mekaar, soos wat ons ook moet doen in die geloofswedloop waaraan ons deelneem. Daar lê nog iets belangriks in die Griekse woord wat ons met oefen vertaal. Die Griekse woord verwys ook na naaktheid, om kaal te wees. Destyds het net mans aan die Olimpiese Spele deelgeneem. En hulle het kaal deelgeneem. Daarom die konnotasie van oefen met kaal wees. Die rede hoekom hulle kaal deelgeneem het, is om alles wat hulle kon strem en rem om voluit te hardloop, uit te trek. Vandag se atlete en swemmers en fietsryers se klere is so ontwerp om die minste weerstand te bied. In geestelike sin moet ons ook ontslae raak van alles wat kan keer dat ons voluit die wedloop van die erediens van die lewe hardloop. Dit beteken dat ons veral van die sonde ontslae moet raak, want juis dit keer ons om voluit te hardloop.

5 5 Geestelike oefening is baie waardevol. So lees ons in 1 Timoteus 4:8 in die 1933/53- Vertaling:... die godsaligheid is nuttig vir alles, omdat dit die belofte van die teenwoordige en die toekomende lewe het. In die 1983/92-Vertaling staan daar:... om in toewyding aan God te lewe, het in alle opsigte groot waarde, want dit bevat n belofte van lewe, vir nou en die toekoms. Ja, n lewe wat in eerbied aan God toegewy is (of ander gesê, die godsaligheid) gee sin aan jou lewe. Dit maak jou diensbaar. Jy leef dan nie meer selfgesentreerd nie. Jy dra al meer God se lig en liefde aan ander uit. Jy lewe dan werklik, nou en vir ewig. Terwyl al die top-atlete in die wêreld tans besig is om hard te oefen, kry hulle ook afrigting. Soos julle weet, is afrigting baie belangrik. In aansluiting hierby is ons tema vir die kwartaal: Afrigting vir die lewe. Die bedoeling is om vir julle afrigting te gee vir die wedloop waaraan julle as gelowiges deelneem. Die bedoeling is om vir julle afrigting vir die erediens van die lewe te gee. Ons gaan aandag gee aan dinge wat die erediens van die lewe vir ons moeilik maak. Ons gaan kyk na dinge wat ons kan laat struikel en val in die wedloop. Ons gaan kyk na die dinge wat ons fikser kan maak in die geloof. Ons gaan kyk na hoe ons moontlike struikelblokke kan voorkom, of as ons gestruikel het, hoe ons weer kan opstaan en verder hardloop. Liewe broer en suster, uiteindelik gaan dit oor wat jy met die nuwe lewe maak waarvoor ons Here Jesus Christus soveel gely en swaargekry het. Toe Hy daar aan die kruis gesterf het, was dit om vir jou n nuwe lewe te gee. Wat maak jy met die nuwe lewe wat ons Here Jesus Christus vir jou gegee het? As jy nie geestelik oefen sodat hierdie nuwe lewe in jou ontwikkel nie, gooi jy eintlik Jesus se verlossingswerk in sy gesig terug. Dan beteken al die moeite en pyn en lyding wat Hy vir jou deurgemaak het, net mooi niks nie. Nee, jy mag nie so maak nie. Juis omdat Hy soveel vir jou gedoen het, moet jy oefen en ontwikkel in die erediens van die lewe. Vanoggend se preek plaas jou voor die vraag: Is jy geestelik fiks? Oefen jy jouself vir die geloofswedloop waaraan jy moet deelneem? Oefen jy jouself vir die erediens van die lewe? Oefen jy jouself vir n lewe wat in eerbied aan God gewy is? Indien nie, is dit tyd dat jy daarmee begin. En gebruik die afrigting wat hierdie kwartaal aan jou gegee gaan word. Amen.