Beleid insake die aanbieding van kortkursusse aan die Universiteit Stellenbosch

Transcriptie

1 Beleid insake die aanbieding van kortkursusse aan die Universiteit Stellenbosch Datum van goedkeuring: Oktober 2007 Outeurs: 2004-Taakgroep en personeel van die Afdeling Kortkursusse en InnovUS Deel van die Universiteit Stellenbosch (US) se Visie 2012 is aktiewe rolspeling in die ontwikkeling van die Suid-Afrikaanse samelewing. Die aanbieding van kortkursusse vorm ʼn belangrike komponent van hierdie. 1. Doel van die beleid Die doel van hierdie dokument is om n beleid daar te stel vir die koördinering en regulering van voortgesette onderrig in die vorm van kortkursusse wat onder die vaandel van die Universiteit Stellenbosch aangebied word. Hierdie beleid sluit aan by die US se Leer- en Onderrigbeleid. Die doel van die beleid is om: a) die ontwikkeling, registrasie en aanbieding van kortkursusse deur die Universiteit op n gestruktureerde manier te bevorder en te ondersteun, tot voordeel van die Universiteit, die USpersoneel en die gemeenskap. b) n raamwerk daar te stel waarbinne die gehalteversekeringstelsel vir kortkursusse ingevolge daardie reglement bestuur kan word. c) n sentrale meganisme in die vorm van n ondersteuningsafdeling vir kortkursusse op die kampus te skep (sien par. 5). d) die nodige stelsels en prosesse (soos bepaal deur die Raad vir Hoër Onderwys [RHO] of die Gehaltekomitee vir Hoër Onderwys [HEQC]) te reguleer om eerstens in die US se behoeftes te voorsien, en tweedens aan die Universiteit selfakkreditasiestatus te gee vir die aanbieding van kortkursusse. Hierdie beleid word beperk tot die aanbieding van kortkursusse. Dit sluit konsultasies en ander soorte entrepreneursaktiwiteite uit. Hierdie dokument vervang die Aanbevelingsrapport van die Akademiese Beplanningskomitee (nr. 1/2003MA, waarby ingesluit is die verslag van die Taakgroep insake Verdere Onderrig op Kampus) wat op 28 Februarie 2003 deur die Senaat goedgekeur is. 2. Vertrekpunte Die aanbieding van kortkursusse raak al drie die kernfunksies van die Universiteit. Insig en kennis wat deur navorsing gegenereer is, word via die aanbieding van kortkursusse (onderrig) oorgedra tot voordeel van en in interaksie met die gemeenskap (gemeenskapsinteraksie). Die aanbieding van kortkursusse bied n geleentheid aan US-personeel om addisionele inkomste te verdien en as entrepreneurs te ontwikkel. Die personeel van die US is betrokke by voortgesette 1

2 onderrig as deel van hulle amptelike pligte. Soos ander pligte, val dit onder die beheer en bestuur van die fakulteit of verantwoordelikheidsentrum (VS) en die akademiese organisasie-eenheid (departement of sentrum) of afdeling waarbinne die betrokke kursus aangebied word. Die aanbieding van kortkursusse is n onderrigaktiwiteit wat in die naam van die Universiteit plaasvind. Dit moet dus voldoen aan al die gehalteversekeringsvereistes van die Universiteit asook aan die vereistes van die tersaaklike owerheids- en ander reguleringsinstansies (die Nasionale Onderwysdepartement, die RHO en die Suid-Afrikaanse Kwalifikasie-owerheid [SAKO]). 3. Definisies 3.1 n Kortkursus is n opleidingsgeleentheid a) wat nie deel uitmaak van die amptelike, goedgekeurde en gesubsidieerde kwalifikasie- en programprofiel van die Universiteit nie. b) waarvan die totale studietyd soos uitgedruk in krediete minder as 120 beloop. c) wat in die naam van die Universiteit aangebied word. Met ander woorde i) die Universiteit se handelsmerk word gebruik (bv. die US-naam en/of -logo, professorale titel, optrede in ampshalwe), en ii) die kortkursus word deur die Universiteit gesertifiseer (d.w.s., sertifikate met die Universiteit se amptelike embleem en die handtekeninge van bevoegde persone daarop word uitgereik). d) wat voldoen aan die Universiteit se akademiese standaarde, en spesifiek die riglyne in die Reglement vir die akademiese gehalteversekering van kortkursusse. e) wat in terme van die toepaslike Senaatsbeleid amptelik deur die Universiteit goedgekeur is. f) wat aangebied word deur toepaslik gekwalifiseerde aanbieders wat personeellede van die Universiteit is, of deur toepaslik gekwalifiseerde en bevoegde persone wat deur die kursusleier aangewys word, met goedkeuring van die betrokke departementele voorsitter of omgewingshoof. g) wat vir een of meer van die volgende teikengroepe aangebied of op hulle gerig kan word: voornemende studente, geregistreerde studente, personeel, gegradueerdes, beroepslui en die algemene publiek. h) wat aangebied word om een of meer van die volgende doelwitte te bereik: die nakoming van die Universiteit se verantwoordelikheid om n rol in die gemeenskap te vervul; voortgesette professionele onderrig; verdere onderrig; gemeenskapsinteraksie; diensleer (in die geval van studente wat ingeskryf is vir amptelike kwalifikasies); die ontginning van die derde geldstroom; die kommersialisering van die Universiteit se intellektuele kapitaal; en die stimulering van innovasie. Buiten die voordele wat spruit uit die bereiking van hierdie doelwitte, is daar n sekondêre voordeel in die sin dat die aanbieding van kortkursusse aan die personeel verdere inkomstegeleenthede skep. 3.2 Die term kortkursus kan in die volgende soorte kursusse verdeel word: a) kortkursusse b) sertifikaatprogramme c) seminare en slypskole d) voortgesette professionele onderrig (VPO) of ontwikkelingsprogramme 3.3 Die kursusleiers (soms ook projekbestuurders genoem) is amptelik aangestelde personeellede van die US. Hulle kan insluit personeellede wat aangestel is op gesamentlike platforms (volgens die Reglement vir die akademiese gehalteversekering van kortkursusse, par. 19a), wat volle verantwoordelikheid vir die betrokke kursus en die akademiese inhoud daarvan aanvaar. Die kursusleiers word deur die departementele voorsitter of omgewingshoof aangewys (Reglement vir die akademiese gehalteversekering van kortkursusse, par. 17a). In die konteks van hierdie beleid word departementshoofde, departementele voorsitters en omgewingshoofde as ekwivalent beskou. 3.4 n Aanbieder is enige persoon wat deur die kursusleier, in oorleg met die departementele voorsitter, gekontrakteer word om die kursus as geheel of dele van die kursus aan te bied. Aanbieders kan dus personeel van die US of persone van buite die Universiteit wees. 2

3 3.5 Kortkursusse kan deur middel van verskillende onderrigmedia, soos kontaksessies of tegnologies gemedieerde metodes, en aan n verskeidenheid kliënte aangebied word. 3.6 Die aanbieding en sertifisering van kursusse aan die US as n hoëronderwysinstelling word beperk tot NKR-vlakke soos binne die hoëronderwysband geïdentifiseer (tans NKR-vlak 5 8). Kortkursusse mag by uitsondering op vlak 4 aangebied word (maar nie op laer vlakke nie). Hoogstens n bywoningsertifikaat mag vir vlak 4-kursusse uitgereik word. Hierdie bepaling is van toepassing op voorwaarde dat: a) die strategiese voordeel vir die US in ag geneem word; b) die behoefte van die mark ondersoek word; en c) daar nie duplisering van diensverskaffing is nie; met ander woorde, daar mag nie n ander instelling wees wat die opleiding kan aanbied nie. 4. Akademiese gehalteversekering Die beleidsverantwoordelikheid vir die gehalteversekering van die akademiese aanbod van die US berus by die Senaat. Dit sluit ook kortkursusse in. Die manier waarop die gehalte van die akademiese aanbod verseker word, word beskryf in die Reglement vir die akademiese gehalteversekering van kortkursusse, wat in 2004 deur die Senaat goedgekeur is. 5. Die Afdeling Kortkursusse en die Universiteit se handelsmerk Die Universiteit sal ingevolge hierdie beleid n Afdeling Kortkursusse op die been bring met die doel om kortkursusprosesse namens die instelling te koördineer, te standaardiseer en te ondersteun. Die bestuursverantwoordelikhede vir kortkursusse is gesetel in die normale bestuurslyne (departementele voorsitters en dekane, of omgewings- en VS-hoofde). Die voordele van die vestiging van n Afdeling Kortkursusse sluit in: a) n verhoogde markpenetrasie deur die gebruik en bemarking van n sterk handelsmerk; b) die bevordering van n vollekostebenadering waarin alle koste van kortkursusse gesentraliseer word, en geen kruissubsidiëring tussen formele programme met ʼn subsidie en kortkursusse sonder ʼn subsidie kan plaasvind nie; c) die bereiking van skaalbesparing deur duplisering van dienste en aktiwiteite uit te skakel; d) beter diensvlakke aan personeel wat kortkursusse wil aanbied; en e) die daarstelling van stelsels en prosesse wat die Universiteit uiteindelik in staat sal stel om formele akkreditasie van kortkursusse te doen. n Kursus mag slegs aangebied word mits dit die volle goedkeuringsproses deurloop het, dit wil sê, as dit via die aanlynregistrasiestelsel deur die dekaan of VS-hoof goedgekeur is en dus op die sentrale register geregistreer is. Die bestuur van kortkursusse word egter gedesentraliseer. n Opleidingsgeleentheid waarvoor geen sertifikaat uitgereik word nie hoef nie op die sentrale stelsel geregistreer te word nie. Alle kortkursusse wat via die aanlynstelsel geregistreer is, sal deur die Afdeling Kortkursusse bemark word as goedgekeurde kursusse van die US. Personeel en departemente mag slegs kortkursusse adverteer (intern of ekstern) nadat dit op die Universiteit se sentrale aanlynregistrasie- en goedkeuringstelsel geregistreer is. Relevante departemente of ander organisatoriese eenhede (bv. sentrums of institute) kan saam met kortkursusse bemark word. Vergoeding vir die gebruik van die handelsmerk (insluitend die gebruik van ampstitels soos professor ) word in paragraaf 6.4 bepaal. 6. Finansies Die vollekostebenadering word toegepas ten opsigte van alle kortkursusaktiwiteite van die Universiteit. Dit beteken die totale inkomste moet die totale direkte en indirekte uitgawes delg. 3

4 Personeel en/of akademiese eenhede of afdelings mag deel in die wins ná uitgawes, maar sal ook volgens die winsverdelingsformule verantwoordelik wees vir verliese gely in gevalle waar genoegsame netto inkomste nie gegenereer word nie. Die wins-/verliesverdeling word vooraf deur die betrokke partye onderhandel. Alle inkomste wat deur kortkursusse gegenereer word, word inbetaal in die kostepunt wat spesifiek vir die kortkursus geskep is. As alternatief kan n nuwe projek binne n bestaande kostepunt vir n kortkursus geskep word. Alle uitgawes word dan teen daardie kostepunt of projek aangegaan. Die oorhoofse finansiële administrasie word deur die Afdeling Finansies behartig. Die hoof van die Afdeling Kortkursusse moet verslag doen aan die betrokke bestuurslid van die Universiteit ten opsigte van alle finansiële en ander aspekte van die afdeling. 6.1 Begroting en verslae Die begroting word opgestel deur die kursusleier, aanbeveel deur die departementele voorsitter en goedgekeur deur die dekaan of omgewingshoof as deel van die normale aanlyngoedkeuringsproses. Hierdie begroting moet aangeheg word tydens alle aansoeke vir die goedkeuring van kortkursusse, behalwe in gevalle waar ander ooreenkomste geld. Die inkomstestaat bestaan uit: die inkomste minus die heffings, die dosent- of aanbiedersgelde en ander direkte koste. Dit lewer die netto inkomste of tekort. Die finansiële bestuur word deur die betrokke kursusleier in samewerking met die departementele voorsitter of omgewingshoof hanteer. Binne ses maande ná afloop van die aanbieding van die kortkursus moet n volledige finansiële verslag, wat die begroting versus ware syfers weerspieël, aan die Afdeling Kortkursusse gestuur word. Hierdie inligting is noodsaaklik vir die effektiewe koördinering en bestuur van kortkursusse aan die US. 6.2 Inkomste Inkomste word gedefinieer as alle kursusfooie of registrasiegelde wat betaal is deur die deelnemers aan n aktiwiteit, ongeag of dit die vorm aanneem van borgskappe (insluitend uitstallingsfooie) of rente ontvang. Oninbare skuld ten opsigte van kursusfooie is vir die rekening van die betrokke kursus. 6.3 Prysvasstelling n Markverwante prys vir n bepaalde kursus word deur die kursusleier in oorleg met die departementele voorsitter of omgewingshoof vasgestel, met die doel om wins te maak of gelyk te breek. Die netto bedrag sonder BTW word gebruik vir winsdelingsdoeleindes. Kursusse kan ook op n niewinsgewende grondslag aangebied word op voorwaarde dat enige voorsiene verliese gedek word deurdat die departement of afdeling dit self subsidieer of deurdat ander vorme van betaling aangewend word. 6.4 Aanbiedersgelde Dosente van die Universiteit en eksterne persone wat kursuaanbieding aanbied, word op n markverwante basis vergoed.die kursusleier bepaal saam met die epartementele oorsitter of mgewingshoof die tarief wat aan aanbieders betaalbaar is.waar beoordeling integrale deel van die kursus vormen ʼn sertifikaat uitgereik word, mag assesseringsgelde bo en behalwe aanbiedersgelde aan die aanbieder of dosent betaal word. Aanbieders word nie vergoed vir enige ontwikkelingswerk 1 van ʼn kursus nie.wanneer dosente kontrakteer vir ontwikkelingswerk is die kontrak ook onderworpe aan die heffings soos inparagraaf Sentrale kosteverhaling 1 Intellektuele eiendom behoort aan die US. Personeel word dus nie normaalweg vir ontwikkelingswerk vergoed nie. Beloning vir werk verrig, moet volledig verkry word uit aanbiedersfooie, verdeling van wins, ensovoorts. 4

5 Die Universiteit se standaardheffing op derdegeldstroominkomste, soos van tyd tot tyd bepaal (tans 12%), is van toepassing op alle inkomste wat deur kortkursusse gegenereer word Ander direkte koste Alle direkte uitgawes verbonde aan ʼn kursus word teen die betrokke kursusinkomste verhaal. Dit sluit in betalings aan eksterne verskaffers, byvoorbeeld drukwerk, posgeld, advertensies in tydskrifte en koerante, handboeke, sertifikate, die huur van lokale, reis- en verblyfkoste, asook die aankope, vervanging, onderhoud en huur van toerusting. Ontwikkelingswerk, kapitale uitgawes en onthaalkoste wat nie verband hou met n kursus nie, lidmaatskap van verenigings en drukwerk wat nie direk verband hou met ʼn kursus nie, mag nie as direkte uitgawes van n betrokke kursus verhaal word nie. 6.7 Verdeling van wins of verlies Finansiële state moet so gou moontlik deur die kursusleier en departementele voorsitter of omgewingshoof voltooi en na die dekaan of VS-hoof en die Afdeling Kortkursusse gestuur word. Dit moet (vir statistiese doeleindes) die begroting versus werklike koste weerspieël. ʼn Tydperk van drie maande word toegelaat om alle uitstaande gelde te verhaal en fakture te betaal. Die volledige finansiële verslag moet binne ses maande aan die Afdeling Kortkursusse gelewer word. Die volgende riglyn vir die verdeling van die surplus/tekort (volgens die goedgekeurde begroting) word voorgestel (in ooreenstemming met die Beleid op die ontginning van intellektuele eiendom), maar kan steeds volgens die diskresie van die lynhoofde onderhandel word: 25 persent aan die betrokke fakulteit of VS; 25 persent aan die kursusleier se departement of afdeling; en 50 persent aan die kursusleier vir moontlike verdere verdeling volgens hulle diskresie. In sommige gevalle kan n kursusspan (insluitend die departementele steunpersoneel) die wins deel. Winsdeling aan kursusleiers of personeel wat weens ander vorme van betrokkenheid in die wins deel, is onderhewig aan die Universiteit se normale voorskrifte vir uitbetaling binne die bepalings van die Universiteit se Finansiële Beleid en Belastingwetgewing (ook van toepassing op par 6.4). Enige tekort wat ontstaan, word op dieselfde manier en in dieselfde verhouding as enige surplus verdeel, en kostepunte word reeds in die beplanningsfase geïdentifiseer. Geen winsdeling sal uitbetaal word voordat die finale finansiële verslag gelewer is nie. 7. Personeel en ander instansies 7.1 Verantwoordelikheid van departementele voorsitters of omgewingshoofde en dekane of VS-hoofde In hierdie beleid word telkens verwys na die pligte en verantwoordelikhede van departementele voorsitters of omgewingshoofde en dekane of VS-hoofde ten opsigte van kortkursusse. Die finale verantwoordelikheid vir die kortkursusse berus by die dekaan van die betrokke fakulteit of by die VS-hoof van die ondersteuningsafdeling. Aangesien kortkursusaanbiedings n geleentheid vir die Universiteit is om sy kennisprodukte na n breër gemeenskap uit te brei, het die inhoud en aanbieding hiervan n direkte invloed op die eksterne beeld van die Universiteit. Daar moet dus altyd met groot omsigtigheid opgetree word. 7.2 Doserende en ondersteuningspersoneel Deelname van doserende of ondersteuningspersoneel aan die aanbieding van kortkursusse is onderhewig aan goedkeuring van die dekaan of VS-hoof, op aanbeveling van die betrokke departementele voorsitter of omgewingshoof. Die departementele voorsitter of omgewingshoof is verantwoordelik vir die monitering van die personeel se werklading, insluitend hulle deelname aan enige kortkursusse. Werklading en kundigheid van personeel moet in ag geneem word deur lynbestuurders tydens die proses van aanbeveling en goedkeuring van kursusse. Betrokkenheid by kortkursusse en die ontginning van n derdegeldstroom-inkomste moet te alle tye in verhouding 2 Die heffing op kortkursusse as derdegeldstroom-aktiwiteit is reeds n geruime tyd van toepassing en nie direk verwant aan die skep van die Afdeling Kortkursusse nie. Die Afdeling Kortkursusse is n steundiensafdeling, en die basiese dienste word kosteloos aan departemente en afdelings verskaf. 5

6 wees tot die bereiking van al die kernfunksies van die Universiteit asook die dienslewering van steundiensomgewings. Personeel mag as kursusleiers of aanbieders deelneem aan die aanbieding van kortkursusse. In alle gevalle tree hulle egter in n persoonlike hoedanigheid op, en nie as n maatskappy, beslote korporasie, trust of ander regsentiteit nie. Betalings sal ook slegs aan individue gemaak word. Kortkursusse is n kernaktiwiteit van die Universiteit. Al drie die kernfunksies van die Universiteit, en veral gemeenskapsinteraksie, speel n rol in die aanbieding van kortkursusse. Personeel word dus nie toegelaat om kortkursusse vir eie gewin in die naam van die Universiteit aan te bied nie. Kortkursusse word nie as buitewerk beskou nie. Hierdie vereiste is ook van toepassing selfs wanneer personeel kursusse in hulle vrye tyd aanbied (dit sluit in kursusse wat ná ure of in verloftye aangebied word). US-personeel word dus nie toegelaat om in hulle privaat hoedanigheid in hulle veld van kundigheid (waarvoor hulle by die US aangestel is) kortkursusse te ontwikkel en aan te bied nie. US-personeel mag vir buite-instansies kortkursusse saamstel en/of aanbied, maar dit mag nie in mededinging met aktiwiteite van die US wees nie. Die betrokkenheid van akademiese of ondersteuningspersoneel by die aanbieding van kortkursusse word as deel van die normale proses vir die vasstelling van werkkontrakte tussen personeellede en die departementele voorsitters of omgewingshoofde hanteer. Prestasiebestuur word in terme van die normale prosedures hanteer. Die US se beleid insake intellektuele eiendom vir formele programme is ook op kortkursusse van toepassing. 7.3 Aanbieding deur buitepersone of gesamentlike aanbiedings met ander instansies Persone (individue) wat nie op die diensstaat van die Universiteit is nie, mag slegs in uitsonderlike gevalle, met streng beheer en genoegsame motivering, gekontrakteer word om kursusse in die naam van die Universiteit te ontwikkel en/of aan te bied. Dit is die verantwoordelikheid van die betrokke departementele voorsitter of omgewingshoof en dekaan of VS-hoof om te verseker dat so n individu se akademiese en kundigheidsagtergrond nagegaan en geverifieer word, en dat die kursusmateriaal aan die Universiteit se standaarde voldoen. Kortkursusse is n kennisproduk van die Universiteit aan die breër gemeenskap en het ʼn direkte invloed op die beeld van die Universiteit na buite. Dit is dus van groot belang dat die betrokke aanbieder n grondige kennis van die kursusinhoud en relevante en bewese ervaring op daardie gebied moet hê. Die bepalings in paragraaf 3.3 geld ook in sulke gevalle. Wanneer n kortkursus saam met n ander instansie (onderwys of ander instelling of maatskappy) aangebied word, geniet die belangrikheid van die Universiteit se naam, handelsmerk en reputasie voorkeur, soos in die geval van formele programme. By n gesamentlike aanbieding moet die volgende in ag geneem word: die reputasie van die Universiteit sowel as dié van die derde party; gehalteversekeringsprosedures; die aard van die sertifikaat; reëlings met betrekking tot intellektuele eiendom; mededinging met ander universiteitsprodukte; en toepaslike administratiewe reëlings. Die belangrikste oorwegings in enige ooreenkoms is die beskerming van die Universiteit se reputasie en gehaltestandaarde. Ooreenkomste sal nie oorweeg word wanneer die Universiteit slegs akkreditasie en gehalteversekering verskaf teen n nominale bedrag sonder enige duidelike groter voordeel nie. Die Universiteit se rol en akademiese en ander belang moet beduidend wees wanneer sy naam aan die kursus gekoppel word. Vir akkreditasie en gehalteversekering van ʼn kursus wat gesamentlik aangebied word, is dit noodsaaklik dat US-personeel n beduidende bydrae lewer tot die intellektuele kapitaal, kursusinhoud en kursusaanbieding en/of dat hulle ʼn kerndeel van die evalueringspan en -meganisme sal uitmaak. Die verantwoordelikheid hiervoor berus by die dekaan of VS-hoof op aanbeveling van die departementele voorsitter of omgewingshoof. 6

7 Die bepaling in paragraaf 6.5 is ook van toepassing op kortkursusse wat deur buitepersone ontwikkel en aangebied word, of wat in samewerking met ander instansies aangebied word, op voorwaarde dat die Universiteit die verantwoordelikheid dra vir die gehalteversekering, registrasie en sertifisering van die kursus. 8. Gelyktydige aanbieding van kortkursusse vir sowel nieformele as formele onderrig In sekere gevalle (bv. nagraadse modules) kan lesings en/of kontaksessies gelyktydig aan sowel gesubsidieerde studente as niegesubsidieerde kursusgangers aangebied word. Die departementele voorsitter en dekaan moet albei toestemming verleen hiervoor, en inskrywings mag slegs via n graadprogram of n kortkursus geskied. 9. Taal Elke kortkursus se aanbiedingstaal moet bepaal en aan die kursusgangers gekommunikeer word. 10. Uitreiking van sertifikate Sertifikate mag slegs gedruk word deur die eenheid met wie die Afdeling Kortkursusse n ooreenkoms aangegaan het. Sertifikate van bevoegdheid en verklarings van bywoning kan aan kursusgangers uitgereik word in ooreenstemming met die volgende vereistes: a) Sertifikate van bevoegdheid mag slegs uitgereik word indien kursusgangers die betrokke kursus suksesvol voltooi het en n formele proses van assessering, soos bepaal deur die akademiese vereistes, afgehandel is. Daarna kan verklaar word dat n voldoende vlak van bevoegdheid bereik is. b) Verklarings van bywoning mag aan kursusgangers uitgereik word op voorwaarde dat hulle die betrokke kursus bevredigend bygewoon het. (Let wel: n Kursusganger wat nie kwalifiseer vir n sertifikaat van bevoegdheid nie, kan kwalifiseer vir n verklaring van bywoning.) c) Sowel die sertifikaat van bevoegdheid as die verklaring van bywoning moet deur die betrokke dekaan of VS-hoof, of die departementshoof of omgewingshoof en die kursusleier onderteken word. (Let wel: Slegs amptelike grade en diplomasertifikate word deur die visekanselier en registrateur onderteken.) d) Die universiteitsembleem en/of -advies mag op die sertifikaat van bevoegdheid en die verklaring van bywoning gebruik word, onderhewig aan die korporatiewe beleid van die Universiteit en met streng toepassing van die beleid deur die Afdeling Kortkursusse. e) Die identiteit van die departement, eenheid of afdeling binne die Universiteit moet gepas op die sertifikate van bevoegdheid en die verklarings van bywoning aangedui word. f) Die sertifikate van bevoegdheid en die verklarings van bywoning kan in Afrikaans of Engels, of in albei tale, uitgereik word na gelang van elke kursusganger se voorkeur. Die Afdeling Kortkursusse sal gestandaardiseerde sertifikate voorsien aan die departementele voorsitter of omgewingshoof van die betrokke departement of afdeling wat n kortkursus aangebied het. Hierdie sertifikate, wat op hoëgehaltepapier gedruk word, voldoen aan die vereistes van die beleid oor die korporatiewe beeld van die Universiteit. Geen individu word toegelaat om enige alternatiewe sertifikate vir kortkursusse uit te reik nie. 11. Verantwoordelikhede en dienste van die Afdeling Kortkursusse 11.1 Die Afdeling Kortkursusse bied die volgende dienste en voordele a) Die registrasie van kortkursusse, wat geskied ooreenkomstig die Riglyne vir akademiese toesig en gehalteversekering van kortkursusse, en hanteer word via die Universiteit se aanlynstelsel vir die aansoek om en goedkeuring en registrasie van kortkursusse. Dit behels ook i. verslae oor alle kortkursusaktiwiteite aan die Universiteit (dekane of VS-hoofde, departementele voorsitters of omgewingshoofde, algemene bestuur, ens.); en ii. verslae aan die Nasionale Onderwysdepartement en die RHO se gehaltekomitee. b) Die fasilitering van akkreditasie van kortkursusse, wat insluit 7

8 i. die beplanning en bestuur van die akkreditasie van kortkursusse aan die Universiteit; ii. die fasilitering van onderhandelings met gehalteversekeringsliggame wat gehalteversekering toepas ingevolge die wetgewing van SAKO; en iii. die invordering en rekordhouding van inligting vir registrasiedoeleindes. c) Toestemming om die Universiteit se handelsmerk te gebruik vir die aanbieding en bemarking van n kursus. d) n Gesentraliseerde databasis van kursusgangers, wat insluit i. die opdatering van alle rekords en statistiek ten opsigte van elke kortkursus; en ii. die ontwikkeling en instandhouding van ʼn webwerf waarop kortkursusse gratis geadverteer sal word. e) Ondersteuning deur die gebruik van die aanlynregistrasiestelsel vir kortkursusse, asook die onderhouding en opgradering van die stelsel. f) Ondersteuning aan personeel met betrekking tot die finansiële beplanning, bestuur en administrasie van kortkursusse. g) Die inisiëring, fasilitering en evaluering van die beleid en prosedures vir die bestuur, administrasie en registrasie en gehalteversekering van kortkursusse Addisionele dienste wat by die begroting gevoeg kan word Die volgende koste is bykomend tot die basiese dienste hier bo genoem en word by die begroting van elke kortkursus ingesluit. Die Afdeling Kortkursusse kan kursusleiers verwys na instansies wat hulle hiermee kan bystaan en kan self ook van hierdie dienste aanbied. a) Kortkursusprogrambestuur, bemarking en administrasie: i. die ontwikkeling van n bemarkingsplan en die druk van bemarkingsmateriaal ii. die hantering van korrespondensie, en die ontvangs en registrasie van deelnemers iii. die aankoop, voorbereiding en verspreiding van kursusmateriaal iv. die uitklaring van kopiereg v. die ontvangs, verwerking en verspreiding van werkopdragte en evaluering b) Logistiek i. die bespreking en voorbereiding van lokale en oudiovisuele toerusting ii. die beplanning van etes iii. die identifisering van afstandsonderrigmetodes (waar van toepassing) iv. die reis- en verblyfreëlings van dosente (waar van toepassing) v. die rekordhouding, organisering en aanbieding van sertifikaatoorhandigings 12. Registrasie Slegs kortkursusse wat op die Universiteit se kortkursusstelsel geregistreer en goedgekeur is, mag onder die Universiteit se vaandel aangebied word. Alle kortkursusstudente sal in ʼn enkele gepaste studenteregistrasiestelsel geregistreer word. 13. Intellektuele eiendomsreg Kopiereg op alle kortkursusse wat volledig deur US-personeel ontwikkel is, behoort ingevolge die Beleid oor die ontginning van intellektuele eiendom (IE) aan die Universiteit. Outeurskap van die kursusinhoud sal volgens normale akademiese praktyk erken word. Tydens gesamentlike aanbiedings behoort die IE proporsioneel aan die instellings waar dit ontwikkel is. Die Universiteit is die eienaar van verskeie handelsmerke wat sy beeld en reputasie weerspieël. Hierdie beleid reguleer slegs die gebruik daarvan ten opsigte van kortkursusse. Alle ander toepassings sal ingevolge die beleid oor die ontginning van IE geskied. Kopieregkwessies moet tydens die saamstel en reprodusering van kursusmateriaal met die US se kopieregbeampte uitgeklaar word. 14. Bemarking 8

9 Die Afdeling Kortkursusse bemark goedgekeurde kursusse op hulle webtuiste en mag dit ook wyer bemark. Kursusleiers mag egter self hulle goedgekeurde en geregistreerde kursusse onder die vaandel van die Universiteit bemark onderhewig aan die bepalings ten opsigte van die Universiteit se korporatiewe beeld en indien die Afdeling Kommunikasie en Bemarking van die US dit goedgekeur het. 15. Onderlinge mededinging Personeel mag enige kortkursus in hulle kundigheidsveld aanbied, mits dit goedgekeur is deur die gehalteversekeringsproses soos in hierdie beleid beskryf en dit nie in konflik met die gesindheid of bepalings van enige spesifieke ooreenkoms of kontrak is wat deur die US aangegaan is nie. Die beoordeling van die kundigheidsveld van ʼn persoon berus by die dekaan of VS-hoof op aanbeveling van die departementele voorsitter of omgewingshoof binne n spesifieke fakulteit of omgewing. Die beoordeling of onderlinge mededinging oor fakulteitsgrense heen as wenslik geag word of nie, berus by die Viserektor: Onderrig. Die beoordeling of die aanbieding van n kortkursus in konflik met n ooreenkoms of kontrak van die US is, berus by die US-bestuur. 16. Datum van hersiening van die beleid Hierdie beleid sal aan die einde van 2010 hersien word //