De Pinhawwers ielegaal edisie nr. 25

Transcriptie

1 De Pinhawwers ielegaal edisie nr. 25 Jaorgaank 56 nommer 2 8 miert 2014 Vaan de vernuijde hoofredaksie. Leef vastelaovendsvrun, ut blijjf hijj mer jachte en mer jaoge. Heet daan niemes begrip veur eus situasie? Deen Onno meint ziech devaan aof te kinne make mèt Iech bin zoe wie iech bin, zoe wie iech bin, bin iech gebore. Now, daan wete veer d r ouch nog wel un paar. Onno meinde ouch dat de naom vaan de gezèt op häöm sloog, en daorum is metein d n tietel weer aongepas. En nein, dat sleit neet op uuch, börgemeister, mer op die luij die ut weer volheelde al die daog en mèt naome op die dreij jungskes die ziech es pinnekes volledig dedoor höbbe gegoejd, Sjappoo. Veer wèlle de aw hoofredaktries neet tege de sjene trappe, mer waore wel hiel erreg teleurgestèld um te vernumme dat zie ziech had trökgetrokke op ut strand vaan Denemarke, notabene mèt Harie debijj. Wat móte veur noe mèt die does sjerrie? Wat veur us väöl erger waor, is dat dee neuije korrespondent ut mer vertikte um zien snoets hijj ins te laote zien. Dee reageert ouch neet op breve, twiets, websaaits, meelkes en wat veer allemaol nog geperbeerd höbbe. Dee wèlt ech geheim blieve. Veer zien d n awwe korrespondent daan ouch hiel erreg daank versjöldig dat dee häöm de ganse vasteloavend achternao gelaope sjijjnt te höbbe en dee zoe lang aon ziene kop gelamenteerd heet, en häöm heet volgegoejd mèt beer, dat d r toch get oet dee zien pen gekaome is. Mer toen veer huurde dat heer iers e kenon ging make, woort ut us weer benajd um t hart. Dat de kinder ut leuk vinde um bijj de kenonne te goon speule, dat snappe veer, mer op ziene leeftied? D n awwe korrespondent heet us belaof dat heer ins stevig mèt zie roed potloed door dat linkse gewawwel zow goon. Es nog mer get euvergebleve is. Geer höb netuurlik allemaol weer ut bewies gezeen dat Slivvenhier unne Mestreechteneer is. Wat e weer. En alleijn e paar dröppelkes toen de luij zaote te ete. De Prins leep zoe te genete dat heer zellefs te laat oppe vriethof waor dinsdegaovend, mer dat voont niemes e probleem want noe mós Beppie nog twie ekstra leedsjes zinge. Daor waort daan ouch terech vuurwerrek veur aongestoke. En dat dee Henri nog zoen stum had! Wat höbbe ze dee de ganse vastelaovend door zien göt gegoejd? Daor zow Fabricio ins naor móte informere, want deen erreme kloet waor al op zaoterdag zien stum kwiet. Te väöl samba gedans in de kantien, hoorte veer vaan intimi die al op vriedeg op ónderzeuk zien oetgegaange. Wat kint geer verwachte in dees gezèt? Wiste veer ut mer, want d n awwe korrespondent heet ziech mèt de aw hoofredaktries wel un erreg ruijm aofsjijjdsregeling wete te ranzjere, die d r op neerkump dat heer eigelik de nuije hoofredakteur is gewore. Veer höbbe zjus wie al die jaore hijjveur geine sodemieter in te bringe. Ut liekent wel de gemeinteraod. Veer hoorte nog wel dat ut zuster vaan de aw hoofredaktries op maondag naor e fèllemke vaan Ziesjoem had gekeke op Joetjoep en zónder dat ze ut in de gate had, had ze al de slaopzak, sjmink en pekske ingepak, tot ze óntdèkte dat ze oet veurzörreg de otosleutels aon de aw hoofredaktries had gegeve. En die zaot toen al te verkleume op dat strand. Jaomer, keend, vollegend jaor beter. En daan geve veer t mer weer oet han aon d n awwe straotkorrespondent, anneks neuije hoofredakteur en d n neuje straotkorrespondent. Nein, luij, veer snappe ut zellef ouch allemaol neet mie, mer mesjiens is dat wel zjus de essensie vaan dit blaad?

2 Hè hè, zie die aw zawwele eindelik veerdig mèt hun litanie. Hijj bin iech daan, gans verkwik door dee heerlike vastelaovend. Wat höb iech vaan Mestreech en uuch allemaol genote. Jao letterlik allemaol, want geer waort allemaol wel hiel massaal debeij. Op zoondeaovend bijj de priesoetreijking vaan de Citotes woorte d r wel 22 luij getèld, wat Mattie d n oetspraak verlokte vaan veer kinne us wel goon trök trèkke. Iech gaon uuch iers laote geniete vaan de hersespinsels vaan de nuije straotkorrespondent, en zal denao nog get dinger aonvulle die heer vergete heet of neet belangriek genóg voont. Wie ziech dat pas in de wereld vaan de gezètte, höbbe veer daor e katern vaan gemaak. Ut waor e benkelik momint. Maondagaovend, nog mer net haalf weeg. Ut waor crisis, ut leep leeg. Boe waore de luij gebleve? Half twaalf. Waore veer te vreug in de Lure, mankeerde us vaste route? Waore veer te gretig gewees, te vreug gepiek? Waore de cent op vaan ut vastelaovend vierend vollek vaan Mestreech? De piepe leeg of pap in de kute, boe waore ze allemaol? Tot daan waor d'r niks aon de hand. Ut begós wel e bitsje te laat oppe Vriethof, mer de sjeut kloonke luid en klaor en Slivvenier waor unne Mestreechteneer, veer wete ut allang. Auch noe weer woort op ut plein in de zon gelache en straolde ut Mooswief in vol ornaat us tow. Oet ut ganse land waore veer weer naor ut zuide getrokke um te viere tot veer behure tot un uniek stökske Nederland met e boetegewoen hoeglöstig karakter. En slingerentere tusse de Knijnspiep en de Pieter zow us traditie euvereind blieve en met volle teuge genote weure vaan ut leve en alles wat dat us kint beeje. Wie ut aoflöp lees geer later, want dizze vastelaovend verdeent un gooi annalies, en dit jaor doen veer dat netjes in èllef deile, unne canon vaan de Mestreechter vastelaovend 2014 in èllef lemma's. Iech weet neet preceis de volgorde vaan belangriekheid mer wel wat ut allerbelangriekste is vaan ut recep veur unne grandiose vastelaovend, dee alle zörreg opzijj zèt. Ein: Same D'r zien vrun, die ziech alleijn in d n oto köstelik kinne amuseere met ut doorluustere vaan complete Dvd's mèt Carnavalsmuziek, mer veer allemaol bleuje toch pas ech op es veer mekaar weer in de gesjminkte ouge kieke, en same kinne genete, t Kenon springe, drinke. Beijnao eederein waor present, joonk en aaijt, pasgebore en zellefs nog neet ins gebore. U kleijn Arabeerke heelt ziech moestil en Vieneke koos allein mer lache, naor al die poelewoelepoele snuutskes die ein veur ein de kaar inkeke, op zeuk naor de ónschöld zellever. Same in de reijaloet door ut peurtsje veur us geplaots in de Wolfstraot, same ut glaas klinke, same elkaar in de gate hawwe es weer ins eus riechtingsgeveul us in de steek leet, same op zeuk naor ut leukste pekse en ut gezèlligste plekske. Twie: Mestreech En dat plekske ligk in Mestreech, kort bijj de Vriethof. Boe ut insjete us deit óntwake vaan al die ing druime. Boe niemes werkeloos tow kiek mer mèt deit. Boe de malaise wiet weg is en Bourgondie vlak bijj. Boe ut Mooswief tow kiek en de Prins Henri d n Ierste enthoesjas Slivvenier bedaank veur zien goodgezindheid. Boe de straote en kaffees zien verkleijd en un eeder mer ein taol sprik. Mestreech un stad vaan traditie en vaan klaank Dreij: Meziek De ierste daog waore veer zier te spreke euver de Mestreechter meziek. Wienig rebjsbie, de hermeniekes blaosde met volle gaas en ut waor beslis neet um te jenke. Af en tow huurde veer stevig gemiks geweld door de hoempawalsen, mer euver ut gehiel genome waor de klaank herkinbaar Mestreechs. Op d n dinsdeg waor der unne kleine dip woer te neume, mer dit woort glansriek weer herstèld naodat ut Mooswief al weer ter röste waor gelag en veer eus verdreet móste wegzinge bij Charlemagne. Veer zaoge de Duijtse slagers weer bezit neume van de Wollefstraot, toch al neet de Breijstraot. De Samba's hadde hunne leesersjów toesgelaote, mer wiste toch op pure beat de hossende meinigte tot extaas te bringe. De

3 herremeniekes heelde dapper stand in ut modernistische geweld en wiste de zjurie op dinsdeg toch weer te euvertuige. Geluidswagels zien un plaog veur d n optoch mer un aonwins veur de Ezele-merret. Ut neuijste carnavalsleedsje kaom get meujlik op gaank mer op de lètsten daog woord ut toch oet volle boors mètgezónge. Memorabel is de Banjospeuler dee in de Lure us weer tot leve brach met zien Franse hartekreet "Je pleur", wat weer eve un aw wond opereet, opgeloape bij u mondeling Frans. Neet te vergete zien de nachtelike konserte bij de Pieter boe Adèle woord vertollek esof ze ut keend vaan Beppie waor. Hazes en Piaf op d n toog in de Steine Brök, och d r gebäört gewoen teväöl um op te numme. Zeker origineel waor de wederopstanding vaan de Doors, die met "unne boonte störrem" en "weijer" de riders in de storm en fire veur good de vergetelheid indeujde. En euver doors gesproke, us veerde ingredient is netuurlik d n... Veer: Draank Noe is draank veur us eigelik gein thema. Ut is un alibi, ut gief houvas, smeert de keel en ut deit us verplaotse vaan kaffee naor kaffee. Ut zien de èllef pleisterplaotse boe veer us stempelke mote hole, soms soepel sjravelend, soms met pienlike veuij en vaanwege de oetzonderlike weersumstandigheije konstant klunend euver de kinderköpkes of aander óngemekelike stein boeste mèt gemaak diene nek op briks. Rundsje, rundsje. Ut waor neet altied mekelik um d r tösse te kaome. Op e gegeve momint waore veer met zoeväöl aonhaang tot veer mekelik de Tribunal gezellig hadde kinne make, mer veur de ravitaillering waor dat toch un logistieke oetdaging vaan jewelste. De Knijjnspiep, de Mouton Blanc, de Karkol, Pothuiske, de Bonne Femme, Charlemagne, de Steine Brök, Forum, de Lure en de Pieter en de Vriethof dee zich óntpopte es eine groete kaffee, badend in de zon es waore ut t strand vaan Griekeland. Totste ouch zoonder alkohol unne gooije vastelaovend kins viere bewees Cécile die behuurlik stand heel in ut jaorliks bachanaal, af en tow foetelde met un alkoholvrij bavariaatje en dat allemaol um eus aankoamende prinses de carnaval nog veur de paplepel mèt te geve. D n aonstaonde pap waor neet solidair, nog neet ins geprobeerd, mer zien leefde mèt de Take Five waor met t aonstaond vajersjap toch bekeult geraak en volledig riechting de Pieter umgeslage, daor kinne de straotkorresspondente alle waardering veur opbringe. Cécile had neturlik ouch vaan de geweldige veurziening oppe Vriethof gebruuk kinnen make. Daor had de gemeinte nao ampel beraad ut ei vaan Columbus gevoonde en met väöl egaars special veur häör un club Nix opgezat. Ut waor daor nog leger, mer daan gedurende de ganse vasteloavend, es in de Lure zoe wie al gememoreerd op dat benkelike momint op maondagaovend. Vijjf: Zinge De hoechste vörrem vaan gelök is óngetwiefeld mèt blère met alles watste huurs. Ofste d n teks noe wel of neet wèts, dat maak neet oet. Tip vaan uzze perfessor: De beweegs d ne moond op de beat vaan ut orkes, de dinks aan die aw vlam met die ouge zoe zwart es de nach, op t hoegtepunt slutste dien ouge en waans diech zwevend in de zevende hiemel. De kums oet dien ploeij en storts diech op ut festival der liebe. Daan begint ut same zinge, de harmonie resoneert diech tot in ut paradies. Kiekend naor al die nissjekes die zich amesere met Pieke en Juulke (höb iech dee wel gehuurd dit kier?). Iech mót towgeve, este de teks wèts is de lol zoe meugelik nog groeter, en dat bringk us bij ut vollegende punt.. Zès: de Citotes In de vasteloavend óntbrik elke vörrem vaan kompetisie, es ste tenminste aon de maan of vrow bis. Prijjze weure oetgereiik mèt 111 punte, de egaliteitsgedachte is e fundament vaan de vastelaovend. Iech höb miech laote vertèlle tot in eus streke dat weurd gevierd door in eus pekskes de hoeger laoge vaan de bevolking te imitere, en in Braobant kees men veur allemaol ut zellefde pekse, de boerekiel. Netuurlik is ut un ier um un medaille op de boors gespeld te kriege, um tot de orde vaan de geplökte hin tow te treije en zeker um vastelaovendvierder vaan ut jaor te weure, daor euver later mie. Mer in eus klupke heet ziech inins un compatitieve traditie vaan us meister gemaak.

4 Op leve en doed weurt gestreje um de citotes mèt wins te kinne afslete. Dit jaor veel Bokito in de preize, dee zellefs de miest gedrevene ónder us zien hakke leet zien. Elk jaor rope veer in koer dat t aanders mót, mer veer höbbe de tiedgeis tege en ut wreek ziech dat de carnaval zoe lang veurbeij is veurdat de citotes weurd oetgesjreve. Ut zow zeker hellepe es de citotes neet mie veur ut moment supreme woort gehawwe mer denao. Daan heet ut vierend vollek vaan Mestreech weer ziene zin veur betrekkelijkheid hervoonde en kin oonspanne aon ut geklasjeneer en gewawwel mètdoen, zoonder ziech drök te hove make euver de punteverdeiling. Mer Sjappoo veur Ingrid die oonder meuijlike umstandigheden al heur zörreg opzijj wis te zètte oonder ut motto: the games must go on. Un origineel en prachtige tes, die us weer deit beseffe dat ut woernummingsvermoge tijdes de vastelaovend neet beister hoech ingesjat moot weure en ut verlange naor Mestreech en us vrun greuijt mèt elke vraog die veer weer ónbeantwoord móte laote. Mèt blood zweit en traone gaof zie miech tow en in liechte paniek of de medaailles wel op tied veerdig waore, heet ze ziech vaan häör pliech gekwete en t hope is tot veer aon die traditie unnen aandere dreij kinne geve. Mer meinigein dörf heij alleijn in anonimiteit geciteerd te weure. Zeve: Maskers Iech moot miech nog even sjminke, veer kaome der zoe aon. Zoonder sjmink geine vastelaovend, zoe väöl is dudelik. Zellefs us leedsje ging der euver, roed geel en greun, tot ónder aon mien sjeun. De kins auch euverdrieve. Enfin anderhalf oor later woorte veer toch danig oongerös. Pé qwatchappde daan auch sjerrep: de bis toch neet aon ut body painte. Linie had de smaak hielemaol te pakke, die ging euverdaag de kamer vaan häör dochter nog in de sjmink zètte. Aoch Mattie wis prachtige blomme op de geziechte te fabriceren, mer de stippelkes vaan Dinsdeg maakte zien vrow volgens Irma aaijt. Gelökkig waor ut weer un jong bluimpke toen de verref vaan häör geziech waor gefacewashjed. Paul nao Twie oor experimentere leek unne baard en snor te höbbe gekrege en ouch aon de kleurige kreatie vaan Maud waor us get opgevalle. Heet ze noe unne pony? Väöl vierders dörve mer meuijlik hun zorgvuldig opgebouwde reputasies op ut speul te zètte, door te experimenteren mèt hun kreasies, dus elke kritiek op die variasies zalste op dees plek neet vinde, al leek Linie op maondagmiddag de brèl neet op te höbbe gehad bij ut sjminke, mer zie wis zich s' aoves knap te revancheren. Cécile had Mexikaanse invloede gebruuk um indrök te make, mer die waore naor einen daag auch weer mèt de noorderzon vertrokke um plaots te make veur häör verleijdelikke wimper kreasie. Trowwes appropo sjèlderije, höb ger die prachtige portrètte in de Pieter gezeen, werkelik fantastisch. Ach: Pèkskes Veer höbbe meujte móte doen um neuij kreasies te óntdekke oonder de vastelaovesvrun. Zoe erreg zellefs tot ut bès zoe zow kinne zien tot de groepsfoto vaan dit jaor amper afwiek vaan dee vaan veurig jaor, al waor de neuje foto wel erreg sjerp, daankzij de fotomesjien vaan Pé, die nao un paar weigeringen toch u sjiek resultaat gaof. Zo, dee foto kinne veer volgend jaor weer gebruke, zo sjoen. Mèt de iphone fotografeert ut toch meuilijk esste neet weits wat de kant van de kamera is, zoe bleek al. Jeh daan is dit toch t momint um un dudelik pleijdooi te doen veur de sjoenste pekskes vaan de Vasteloavend Neet de draakskes, neet de bielemennekes, die e bielevruijke debeij hadde gescoord, neet ut gebreijde kleijdsje vaan Vienne, noch de gebreijde baard vaan e zwierig dansend tiep. Veer waore zier gesjarmeerd vaan de wasvruijkes, die der umheen zweefde mer op de ierste plaots koame toch de Pinnekes, of zowie e gezin in Nazereth zeet, de wasknuppelkes. Laot die jonges mer sjuive, want veur de zoeväölste kier wiste ze Mestreech te betaovere met hun hoezehoege kreasie. Tot op de details klopte de kreasie die us eve de druugmesjien deech vergete. Veer zien unaniem vaan meining tot die jonges de groete ier neet mie kinne óntlaope, al is het wel zoe tot ze nog dreij jaor hun laankgerekte slummigheije

5 wèlle volhawwe en daan ligk netuurlik unnen oeuvre pries mie veur de hand. Veer wachte met spanning de zjuriezitting aof, of is de transperansie van de Tempeleers wiet te zeuke? Eederein heet volgend jaor netuurlik weer n aander pekske. Ron geit eindelik hielemaol in ut greun, Paul slut zich ouch beij de pinnekes aon mèt u geweldig zonnepaneel, dat genóg enersjie gief um die prachtige vaan kleurversjetende bolle op ut Slevrowweplein brannend te hawwe, Irma heet neuij inspiratie gevoonde bij e koppel dat dezellefde Slivvenhiersbieskes verslaoving had. Dit vaan de Xenos, dat bij Kruidvat, dit vaan Fisher Price. En heus, veur die kouse hoofste geine anorexia te höbbe, Irma, die sjoen bein vaan diech mage nog gezeen weure! Pe heet zoene sjerrepe foto gemaak tot heer bès wel verkleijd kin es hoffotograaf, met Liny es hofmodel. Of neturlik es Hoessjèlder, dat weurd daan aoch unne vörrem vaan Bodypainting. Ellen en Mattie hawwe zoe vaan blömkes, daor mót toch get mèt te doen zien, roed roed roed zien de roeze, die iech mèt de gemeinteraodsverkezing aon diech wèl geve! Ingrid geit netuurlik de merret ónderzeuken, daan belaove veer dat v r af en tow ins langskoame um te zien of ze al u vurke aon Minckeleers heet kinne verkaope. Arjan en Cécile kinne meujteloos verkleijd goon es Pa en Ma. Kinne ze hun keend in de kojts doen en d n draank d r oonder. Marcel, dee zien vrow zoe good heet beijgestande in häöre leijdensweeg mèt de citotes, zal de mikrofoon in de hand kinne numme um de marketenster ouch in dees missie terzijjde te stoon. Nege: Cortège oftewel d'n optoch Willie waor d r erreg euver te spreke. Heer heet m good kinne bekieke, dus heer zal wel geliek höbbe. Ans voont ut mer unne rotzooi. Feit is tot ut karakter vaan unnen optoch (dat heer door de stad trèk) toch wel behuurlik geweld woort aongedoon. Zoe wie Pe zag: d'r zien gein looker. Dat klop, mer dat is ouch wel mekelik este ein oor op dezelfde plek bleijfs stoon umtot d r gein beweging is te kriege in de verzameling vaan kleurig oetgedoste pekskes en elektronisch euverversterkte geluidwagels. Veer kaome zoe op de innoverende gedachte um volgend jaor de optoch gewoon op de stóp op te stèlle zoedat de luij d r in eige tempo langs kinne laope, in ut kielzog vaan de bewoondering oetsprekende inspecterende prins. Dit beejt ouch allerleij meugelikheije aon kreasies die op rajer meulijk oet de veuij kinne of die unne beslissende chicane bij de brök of Vriethof neet soepel kinne numme. D'r waor auch nog sprake vaan un Boetezitting, mer eure straotkorrespondent heet allein mer unne wanhopige es tempeleer verkleijde kinderlokker zien bedele um slachtofferkes die hun ding kóste doen, mer hunne sjów liever in eige krink wowwe hawwe. Kortom auch dat idee is weer Nix en kin zoe d n drekbak in, good geperbeerd. Iech ruuk al e good leedsje veur Tien: Gewawwel Boe biste met de Vastelaovend este neet heerlik kins klasjeneere met vrun en aander rónddolende tiepes. Wat dach geer vaan de opruimkojts dee Ellen iers un vraogelies leet invulle. Ellen kós geine raod mie vaan hun kriege want häöre maan sjeen zoeväöl troep te make tot daor weijer niks aanders mie aon te doen veel daan de maan op te ruime. Daor waor ouch nog iemes dee un groete lies aon ut trèkke waor, zeker politieke ambities. De mennekes van UPS, die de klachte aon ut afhandele waore, Maud voont u gewillig oor bij de helpdeskmedewèrker, dee wel eve zow belle mèt ut hoofkentoer, mer dat waor helaas in gesprek. Euver belle gesproke, iech sjoot auch nog de Paus, boe vaan veer veurig jaor nog beriechte mer dee noe met Slivvenier zellef aon ut belle waor, dee geit tenminste mèt zienen tied mèt. Tijdes us processie langs de Brand heiligdomme woord netuurlik continu ketak gehawwe via de qwatchapp. Aon ei woord genóg: vriethof, slevrowweplein, lure. Eus konversasie weurt op die meneer tot ut hoegsnoedzakelijke trökgebrach: beer? Dat ouch umtot de oere beij us ut langzaam begeve in ut geluidgeweldspectrum. Iech dach nog miene iphone met koptelefoon te

6 kinne inzette um de konversasies in unne kaffee tot e good eind te kinne bringe, mer oeteindelijk kreeg ut besef de euverhand dat ut allemaol mer sjiem te lala sjiem te lala is en este dees gezèt lees iech eindelik weet boe dee wawwel allemaol euver ging. In de middag sessies, zoe beij de Bon Femme woort de wereldproblematiek toch eindelik eve stevig aongepak, totdat de straotkorrespondent woord weggesleip door zien lieftallige assistente, die de lokroop van de zoermoos neet mie kos weerstoon. En dat bringk us beij ut letste oonderdeil Èllef: Ete Pé waor vastbeslote um ut wereldrecord zoervlies in de wach te sleipe. Bijj ut Kläöske, Minckeleers (beinao zwart mer wel zeut), mer neet mie bijj de Awwe Stiene, dee waor us get te waterig gewore. Verder heelte veer us op de beijn met heerlike stekskes, zellefs klein weurskes woorte aongebooije en op ut sjeije vaan de merret wis Ron zelfs nog un tuut chips oets zien tes te touvere. Nao de kroegetoch geit d r niks bove unnen hiering, al zien de gelierde ut neet eins of ut unne rolmops mót zien, of tot zellef t bèste de majonais towgevoeg kin weure. Mèt roggebroed of stumpke, aoch neet te versmade. Hieringebiete móste veer misse, gevraog naor de ervaringen wis de straotkorrespondent alleijn te bevestige dat de konsumpsie op asselegoonsdag neet mót weure oondersjat, zeker es die tösse 5 en 7 tot stand kump op unne lege maog. Her en der zuuste wel hieringebiete konserte, mer ut weurt toch noets mie zoe es mèt Rieu, dee zien glansrieke karrière is begonne door mèt e salonorkest klassieke muziek es carnavalshit ten gehure te bringe. Tenslotte: Crisis, wat veur unne crisis? Sjus toen veer de mood op wowwe geve kaom oet alle heuk en gate t vasteloavend vierend vollek weer te veursjein. De krimp waor afgewend en ut daak van de Lure ging der weer es vanouds vanoaf. U dudelik geval vaan in de Lure gelag. Wanhoop neet, ouch es de kaffee dreig stèl te valle, este unne gooje wc höbs, Mestreechse muziek drèjs, al is ut oet ut Nederlands vertaold, daan bis ste altied blijj datste de kaffee neet vergete bis en met t leze vaan dees gezèt zalt geer hopelijk de Vastelaovend vaan 2014 ouch neet mie zo snel vergete. Mèt e gemiddelde van 11 graode de werremste oets, dink iech. De nuije Kommentaar vaan d n hoofredakteur Zo, dee kin wawwele, dat is wel dudelik, of neet soms? Volleges miech is heer nog wel get vergete zoe hijj en daor. En daoneve mót dee ouch mer ins unne kursus fotografere goon doen want op die fotoos die heer opsjikte zuuste alleijn mer striepe. Ut weurt miech wel un lang gezèt op dees meneer. Die zow toch weure opgezag? Boe is dat toch fout gegaange? Ten ierste is daor netuurlik de jaorlikse diskussie euver : t Appartemint. Dat heet eederein allang begrepe, alleijn Ingrid en Marcel zien get langsem. Die zien zoe gek op taksies en dat woort dit jaor daan aoch weer beloend toen ze op t Tóngersepleijn oet mochte stappe umdat d n taksi unne platten tuub had. Ze waore te verpópzak um te vraoge of heer eve unnen aandere kós belle. Errem Nina, ze hadde nog euverwoge um dat keend alleijn mèt deen taksie naar Nazareth te sjikke. Die stap noets mie in zoe dingk. Dus kaom weer ins de vraog of veer neet mèt z n alle e groets hoes kóste heure, daan zowwe Ron of Marcel wel op de kinder kinne passe. Trowwens euver Nazareth (en Limmel) gesproke, boe waore die allemaol? Aander jaore waor dat de hèllef vaan ut vastelaovendsvierend vollek vaan Mestreech, met dit jaor heet de krisis daor sjijnsbaar hel towgeslage. Biezunder data Veer wiste netuurlik allemaol dat Irma op 2 miert häöre verjaardaag maag viere, en veer verklappe hijj netuurlik neet wie jóngk die gewore is, behalleve daan dat Maud nog 10 jaor jonger is, dat is daan aoch ech a naokummerke. Irma kreeg sjoen hejse en panties. Cécile en Arjan goon op de Amerikaanse toer, want hun dochter mót e hiel Independend keend weure, zoedat ze höbbe bepaold

7 dat die op de ónaofhaankelijksdaag gebore zal weure. Um dat te benaodrökke is al vastgelag dat Arjen zien awwers de ierskaomende 10 vasteloavende op dat keend zalle passe. Weijer sjijnt veur Pinneke/kebouter Daan 1 aprèl unne biezunderen daag te weure umdat dee daan es konsultant in Amsterdam geit wèrreke. Heer wees zellef neet mie te vertèlle daan dat heer de luij ging oetlègge dat zie neet wiste wat heer zellef och neet wis, mer daor daan ouch nog dik veur betaold zow kriege. Dee jong kump d r wel. Pinneke Ruben heet zien ripputasie weer einigszins wete te herstèlle door dit jaor neet al op zoondeg devaan tösse te goon. En Mieske, jeh wat zal iech zègke, dit jaor had dee op vriedeg en zaoterdag get te zwoer aongezat, zoedat dit jaor Daan häöm dudelik de baas waor in ut wawwele. En die jonges hadde us netuurlik wel op ut spoor gezat vaan de Doors. Ron en Janneke hadde beslote dat de krisis aonleijding waor um de zaoterdag euver te sloon. Wat zie vergete waore, waor dat ut noe väöl minder gezèllig waor in d n oto, umdat Maud netuurlik wel op zaoterdag kaom. En dat ze noe al die eijer zellef oet Nijjmege móste mèt sleipe, umdat op zoondeg de winkels tow zien. En Mattie en El vierde dat ze dit jaor 35 jaor same zien. Luij Jeh, wie al gezag, wee waor d r neet. Pé waor bijj de Steine Brök zien vrow kwiet, en die wapste dat zie al op t Slevrowweplein stoont. Die heet ut tenminste begrepe. Mer aoch daor raakte heer häor spoor weer bijjster. Here vroog aon unne verkleider of dee zien vrow mesjiens gezeen had. Is dat die sjerrepe, menier? Die höb iech hijj zjus achter dat mörke gezeen. Malon kós us laote zien dat zie ech in Afrika gewees waor, want die had allerleij pekskes mètgenome. Sjiek keend. Pim had zie nuij vlam Ineke mètgenome, die ut hiel good deech bijj de ballotaasj. Paul had maondag even unne dip, toen heer door kreeg dat zien vrow häöm in jaore noe wiet de baas waor, mer toen veer m vertèlde dat dit mer 5 daog doorde, knapde heer metein weer op. Veronique waor debij, en die heet ut letterlik op häör heupe. Jacqueline netuurlik, oet Bèèèlfelt. Euver unnen dip gesproke, Marcel waor grieperig, zoedat Ing al de ganse week reep vaan steek miech neet aon. Heer heet unnen aovend móte oetröste, zjus wie Janneke die get las had vaan de rök. Ach jeh, Maud ging regelmaotig wissele vaan sjeun. Veer zaoge Ziesjoem nog eve, zjus wie Chris Hoebe, al waor heer ut liek in t karpèt eve kwiet. Netuurlik mage veer neet vergete dat Nils dit jaor de ganse zoondeg heet mètgevierd. Heer kós daorbijj get wawwele mèt Nina en Saar, mer dee jong heet hielemaol niemes nudig. Dee heet die gene vaan zien Mam en kin stèllekes genete vaan alles um ziech heen. Heer heet nog op zien kneje gezete um toch ezzebleef tot goonsdeg te mage blieve, mer Maud heel dapper vol. Die kin ut netuurlik neet make dat Kees ziech alleijn geit veule. En veer mage häör breurke Henk netuurlik neet vergete, bijj zie Schlagerfestival in de Wollefstraot. Dee Kemeleer waor get óngelökkig vaan de wagel gestap, 5 hechtinge in de poet, mer dat waor ut punt neet. Nein, dee zaot aon de antibiotica, op ziech ouch gei punt, mer datste daor neet bijj maags drinke, daor woort heer neet vrolik vaan. Dee kin nog liere vaan Cécile. En kint geer Inge nog, dat leef Mestreechs vrommes, die us 2 jaor geleje verpópzak deech stoon toen ze vertèlde dat ze naor Braobant waor verhuis. Now die woent weer gewoen in Mestreech en leep daor rónd mèt unne kleijne. De tes der teste Ut is al aongehaold dat de tes dit jaor weer hiel sjiek waor. Dee nuije korrespondent wawwelt al jaore euver unne nuije opzat, mer dat kump gewoen umdat dee zellefs de antwoorde op de gemelike vraoge neet wèt. De kommendeus had prachtige medaailles gemaak, boe ze Pé hiel gelökkig mèt heet gemaak. D n oetslaag kaom wel hel aon bijj Maud, die t gewoenweg neet geluive kós dat dee vale Bokito häör weer de baas waor gewees en dat zellefs de kebouters hoeger waore gekaome. Zie heet daan aoch metein, zoonder einige diskussie, beslote dat zie vollegend jaor de anti-bokito tes geit make. Ze had m bekans al veerdig op dinsdeg. Alleijn mer vraoge euver leedsjes vaan Johnny Blenco dus. Drök Dee nuije heet ut euver unne lege Lure, dee zoemer weer vol leep. Op zaoterdag waor ut inderdaad get röstiger es aander jaore, mer dat kaom netuurlik umdat Ron en Janneke d r nog neet waore. Op de

8 aander daog waor ut gewoen barstensvol. Veer kóste soms zellefs neet eus gewoen roete laope. Ut waor jaomer veur Cas dat Pim en Ineke op tied weer weg móste (die waore al thoes veur Mattie en El op zoondeg), zoedat Cas ouch mer is gegaange. Op de Kesselskade waor ut get röstiger es aander jaore, mer veer zien d r wel weer gewees. Oppe Vriethof waor ut heerlik vol al die daog, en veer höbbe daor hiel get aofgewawweld. Veer hoorte dat René in de polletiek geit, en dat waor vas de reije boeveur dee eeder keteer mèt e blaad beer langskaom. Gaank zoe door jong. Maud heet un vriendin Annabel, die heet un vriendin "meitske oet Merkelbeek" die beij ut sjoenzuster vaan Irma in de klas heet gezete. Irma heet oeteindelik toch die kouse aongetrokke en melde datste ze neet mie veuls nao 3 pèls. Cécile en Arjen hadde allebei unne snor, Arjen zien awwers höbbe al e sjeerapparaat veur de kleijne gekoch. Dee Banjospeuler mèt 2 kaktusse. Dao zónge veer mèt: Et j'ai crié, crié, Aline! Faut quelle revienne. En Weijer Veer zaoge unne sjieke Loveboot, iers mèt un rotvaart door de Pieterstraot, mer d n daag denao zaoge veer dat dee toch erreg sjiek waor. De kapsalon op ut Slevrowwepleijn deeg ut hiel good, zeker toen Maud e fleske haorspree wis te regele dat al jaore neet mie te kaop is. Dat bleek achteraof daan ouch vrijjwel alleijn water te bevatte. Nina leep mèt e sjoen aureoolke op en Maud zit zich te verbiete wat daor noe ut Mestreechse woord veur is. Jeh, leef luij, aon alles kump un ind, en dus aoch aon dees gezèt. Veer slute aof mèt de hommaasj vaan de neuije korrespondent, dee ech ut verkierde vak heet gekoze: Leef Luij ut waor weer sjiek, ut waor weer sjoen, vaan optoch tot perroen Ut waor weer roed, geel en greun, ut waor vaan pruuk tot in de sjeun Vaan Knijjnspiep tot Lure, kneeje die ut krege te verdure Vaan samba tot banjo, vaan hopsasa tot a gogo Ut waor zoervleis tot stekske, weer allemaol utzelfde pekske veer waore allemaol debeij. Bedaank veur de kompenei Genete vaan ut leve En haw de vastelaovendkeers brannend, nog eve Ut waor werrem, leef, gezèllig, sjoen,en heerlik. Vollegend jaor goon veer gewoen weer opnuij. Sjrief op de kalender: Vastelaovend 2015, 15, 16, 17 Fibberewari 2015 Unne groete Sjappoo en dikke knoevel vaan eure awwe en nuije straotkorrespondent.