Dit is juis wat Paulus ook leer vir die gemeente in Kolosse. God hou mense vuil en onverdienstelik soos hulle is vas in sy arms.

Transcriptie

1 Kolossense 1:15-29 Agtergrond Kolossense is deur Paulus geskryf terwyl hy in die tronk was in ± 61 n.c.. Hy het nooit die Gemeente in Kolosse besoek nie. Hy het deur Epafras hulle gemeenteleier gehoor van die gemeente en hulle toewyding aan God. In die brief vestig Paulus al die klem op Christus. Inleiding Die popster Cliff Richard onthou sy besoek aan een van die Bihari-vlugtelingkampe in Bangladesh maar alte goed: Daardie eerste oggend het ek seker n dosyn keer my hande gewas. Ek wou aan niks raak nie, veral nie aan die mense nie. Almal in daardie kampe, selfs die babatjies, was oortrek met sere en rowe. Ek erken dat ek ondermeer vir die reklamewaarde daardie vlugtelinge gaan besoek het. Dit was ook hoofsaaklik ter wille van die fotograaf dat ek afgebuk het om kamma nader aan een van die arme skepseltjies te kom. Intussen het ek my bes gedoen om nie binne reikafstand van hom te staan nie. Op daardie oomblik het een van die omstanders per ongeluk op die kind se vingers wat op die grond oopgesprei was, getrap. Hy het hartstogtelik begin huil. Dit is toe dat ek heeltemal van sy smerigheid en sere vergeet en hom instinktief in my arms opgeraap het. Ek onthou nog hou daardie warm lyfie aan my vasgeklou het, en dat sy gehuil onmiddellik bedaar het toe ek hom vasdruk. Op daardie oomblik het ek besef hoe enorm baie ek nog te leer het oor praktiese Christelike liefde. Daardie dag het ek ten minste n begin gemaak. Die foto van my wat daar staan met my asvaal gesig en daardie seuntjie wat styf teen my skouer aankruip, is een van my kosbaarste besittings. Dit hang teen die muur tussen my slaapkamer en badkamer, waar ek nie anders kan as om dit daagliks raak te sien en nie net die voorval te onthou nie, maar ook dat God my daagliks vuil en onverdienstelik soos ek is in sy arms vashou. (Uit: Die Groot stories boek) Ek wil vanoggend juis julle aandag vestig op hierdie laaste woorde van Cliff Richard:... dat God my daagliks vuil en onverdienstelik soos ek is in sy arms vashou. Dit is juis wat Paulus ook leer vir die gemeente in Kolosse. God hou mense vuil en onverdienstelik soos hulle is vas in sy arms. En God het dit gedoen, doen dit steeds en sal dit doen. Hy doen dit deur sy enigste Seun, Jesus Christus. Paulus sê dit baie duidelik: Jesus Christus is die inhoud van die Bybelse boodskap; van die evangelie. 1. Christus se ingryping in die verlede

2 Ek het vroeër gesê dat die brief Kolossense n baie duidelike klem op Christus plaas. Daar is n rede voor. Die gemeente in Kolosse het te doen gehad met n dwaallering. Daar was persone wat geleer het dat jy as mens grootliks self vir jou verlossing verantwoordelik was. Hulle het geglo dat bonatuurlike magte aan die stuur van die wêreld was en dat elke jyself daardie magte positief moet stem teenoor jouself. Jy kon dit doen deur allerlei feesdae ter ere van die bo-natuurlike magte te vier. Terselfdertyd moes jy jouself onthou van allerlei dinge. Deur hierdie opofferinge te maak, het jy die bo-natuurlike magte aan jou kant gekry. Hierdie opvattings was eintlik n vermenging van n paar godsdienste. Vir ons klink dit belaglik. Maar onthou hierdie eerste gemeentes het nog nie oor n Bybel en n hele teologie gebou op die Bybel beskik nie. Teen hierdie tyd was baie min van die Nuwe Testamentiese boeke nog geskryf. Hulle het gehoor van Jesus en sy sterwe en geglo. Hulle kon baie maklik op allerlei dwaalweë gelei word. Daarom dat Paulus die brief aan hulle skryf en die dwaallering uitwys. Hy beklemtoon dat Christus die enigste Here en Verlosser is. Hy beklemtoon dat n mens net gered word deur Christus. Hy het die ganse wêreld met God versoen. Die eerste deel wat ons gelees het vers 15 tot 20 is heelwaarskynlik n lied wat in die vroeë kerk gesing is. In hierdie lied word Jesus se identiteit wie Hy is en wat Hy gedoen het verklaar. Dit begin by die verlede die verste verlede. Ja, dit begin by die skepping. Ons leer dat Jesus van die begin van die skepping van voor die skepping af God was. Hy is die beeld van God. Hy is die Eerste ver verhewe bo die skepping. God het deur Jesus die hele skepping geskep. Dit is waar van die hemel en die aarde; van alles wat gesien en nie gesien kan word nie. God het selfs heersers en konings deur Christus geskep. Ons leer dat alles deur Christus geskep is vir Christus geskep is Dit kom daarop neer dat Christus alles is in die skepping. Alles gaan oor Christus. Soos Paulus skryf: Hy is die inhoud. Christus is die sentrum en kern van die skepping. Alles handel en draai rondom Hom. Maar Christus se ingryping in die verlede gaan nie net oor die skepping nie. Dit gaan ook oor die kerk. Paulus leer vir ons deur die lied dat Christus ook die oorsprong en die hoof van die kerk is. En Hy is dit omdat Hy die Eerste is wat uit die dood opgestaan het. Hy is die hoof van die kerk omdat Hy die Eerste in die hemel is. Daar regeer Hy aan die regterhand van God, die Vader. Christus sê die verlede gaan natuurlik juis oor dit wat Hy op aarde kom doen het. Hy het die Verlosser van die wêreld geword. Sy kruisdood het versoening bewerk tussen God en mens. Hy het namens mense die straf op die sonde gedra. Hy het die sonde en die dood oorwin. Hy het weer vrede tussen God en mens gebring. Natuurlik erken ons dat ons baie van die dinge nie verstaan nie. Die Drie Enige God God as Vader, Seun en Gees verstaan ons nie. Een wese, maar drie Persone, verstaan ons nie. Die Drie Enige God en die skepping verstaan ons nie. Ons verstaan nie eers aldag die kruisgebeure nie. Maar dit is wat

3 ons leer in God se Woord en dit is waaraan ons vashou. Dit is wat ons in die geloof en in verwondering aanvaar. Dit is wat ons bely. Christus is die inhoud van alles. Christus se ingryping in die verlede gaan nog verder as die skepping en die kerk. Dit raak elke indiwidu. Vir ons elkeen vir elke gelowige het Hy in die verlede ingegryp. Paulus verduidelik hoe mense elkeen in sonde geleef het ver van God. Maar deur Christus se ingryping het dit verander. Hy het indiwidue met God versoen. Hy het die vrede tussen God en indiwidue herstel. Dit het natuurlik aan die kruis gebeur. Hy het die sonde weggeneem en ons in staat gestel om heilig en onberispelik voor God te kan wees. Ons word vanoggend weer herinner aan dit wat ons weet: Christus is alles. Hy het ingegryp in ons verlede. Deur Hom en vir Hom is alles ook ons geskep. Deur Hom en vir Hom het die kerk ontstaan. Deur Hom en vir Hom is ons verloste kinders van God. En juis in koninkrykstyd is dit belangrik. Hy is die Koning en ons is sy onderdane. Hy regeer oor sy skepping en oor sy kerk. Ons is sy skepping en sy kerk. Hy het ons dit gemaak. 2. Christus se ingryping in die hede Christus het nie net die verlede ingegryp nie. Ook in die hede kan sy ingryping en liefde gesien word. Paulus gee aan die gelowiges in Kolosse die versekering: Christus is in julle. Hy gee hierdie versekering teen die agtergrond van vervolging. Hy vertel vir hierdie gemeente van sy eie vervolging. Hyself verduur baie teenstand en lyding as gevolg van sy ywer vir Christus en sy kerk. Hy is n dienaar van die evangelie waarvan die inhoud Christus en dit bring al die lyding mee. Maar ten spyte van die lyding, deins hy nie terug nie. Hy gaan onverstoord voort om Christus en sy ingryping in die verlede te verkondig. Die gemeente van Kolosse moes ook hulle deel van vervolging geken het. Paulus moedig hulle aan om vas en sterk te bly staan in die geloof en hulle nie te laat losruk van die hoop wat die evangelie in hulle gewek het nie. Vervolging en valse leringe moet hulle nie laat wegdwaal van God nie. Hulle moet vashou aan wat Christus vir hulle gedoen het. Christus is immers in hulle. Paulus se droom vir die kerk is dat almal tot geestelike volwassenheid sal kom. Dit is hoekom hy aanhou Christus te verkondig. Ons word ook vandag herinner dat Christus in ons is. Hy wat ons met God versoen het en vir ons vrede gebring het, Hy wat ons losgemaak het van die sonde en die vernietigende effek van die sonde, is steeds in ons. Ons word ook herinner om vas en sterk te staan. Ons moet groei in ons geestelike lewe tot volwassenheid. En ons moet dit juis alles doen teen die agtergrond van wat ons verlede week toe ons gekyk het na die eerste 13 verse van Kolossense 1 gehoor het. God en Christus is die dirigent wat ons lewe dirigeer: Hy het ingegryp en is steeds elke dag besig om in te gryp. Hy stuur ons voort op hierdie avontuur van christen-wees elke dag. Hy begelei ons want Hy is in ons.

4 Ook hier moet ons in eerlikheid erken dat ons nie altyd verstaan nie. Daar is en bly n groot stuk misterie oor hoe Christus in ons is. Alhoewel ons bely dat Hy opgevaar het na die hemel en sit aan die regterhand van God, bely ons ook dat Hy teenwoordig is in ons elkeen se lewe. Orals en altyd. 3. Christus se ingryping die toekoms Ons kry ook in Kolossense die belofte dat Christus steeds in die toekoms sal ingryp. Die ingryping in die toekoms gaan oor hoop. Paulus skryf vir ons oor die hoop wat ons het. Die hoop is gebou op wat Christus in die verlede gedoen het: Hy het ons met God versoen en ons verlos van sonde en sondestraf. Die hoop is gebou op wat Christus in die hede doen: Hy is in ons en stuur ons elke dag om sterk en vas te staan. Hierdie hoop word ook beskryf as die hoop op die heerlikheid. Dit verwys na die ewige lewe saam met God. Christus was die Eerste wat opgestaan het uit die dood; Hy was die Eerste wat sy plek in die hemel ingeneem het. En ons het die hoop dat ons Hom daarin sal volg. Ons sal opstaan uit die dood en ons sal ons plek in die hemel inneem. Ook aan hierdie hoop op die eendag word ons vanoggend herinner. Dit is mos so dat n mens baie maklik in die gejaag van elke dag se lewe maklik jou perspektief verloor. So maklik word ons net vasgevang in die daaglikse probleme en uitdagings en vervaag ons hoop op die toekoms. Daarom is dit goed om so nou en dan weer daaraan herinner te word. Net weer die versekering te kry: Ons het n seker toekoms. Christus sal steeds vir ons ingryp. Slot Cliff Richards het n foto wat hom daagliks herinner... dat God my daagliks vuil en onverdienstelik soos ek is in sy arms vashou. Eintlik wens ek ons elkeen het so n foto gehad. Maar dit is presies waaraan Kolossense 1 ons herinner... dat God my daagliks vuil en onverdienstelik soos ek is in sy arms vashou. Christus het ingegryp in die verlede: deur Hom en vir Hom is alles geskep Hy is die oorsprong en Hoof van die kerk Hy het ons met God versoen Christus gryp steeds elke dag in die hede in: Hy is in ons Hy laat ons vas en sterk staan Christus sal in die toekoms ingryp: Ons het die hoop op die heerlikheid In kort gaan dit oor Christus. Hy is die inhoud en doel van ons bestaan. Hy is die Koning en ons sy koninkrykskinders. Mag ons ook - soos Cliff Richards hoe enorm baie ons nog te leer het oor praktiese Christelike liefde. Mag ons elke dag ten minste vordering maak.

5