9. Ek glo Jesus het opgestaan Johannes 20:1-18

Transcriptie

1 1 9. Ek glo Jesus het opgestaan Johannes 20:1-18 Tema Jesus se opstanding was ʼn onverwagse verrassing wat vir ons as sy volgelinge moed gee wanneer ons deel word van sy triomftog waarin Hy baie mense saam met Hom neem. Agtergrond en interpretasie In die vorige twee ontmoetings het ons oor die trappe van vernedering op Jesus se lydenspad gesels. Vandag en in die volgende ontmoeting gaan ons gesels oor die omgekeerde hiervan: die trappe van verhoging. Hierdie vyf groot trappe van verhoging is deur die geskiedenis geïdentifiseer as: Jesus se opstanding, sy hemelvaart, sy regering aan die regterhand van God, sy wederkoms en sy finale triomf. Maria Magdalena speel ʼn belangrike rol in Johannes se opstandingsverhaal. Anders as in die ander Evangelies, vertel Johannes nie van die ander vroue wat ook na die graf toe gegaan het nie. Hy noem net vir Petrus en die ander dissipel, wat waarskynlik hy self was. Die verhaal bou op tot ʼn hoogtepunt om aan te toon hoe verrassend die opstanding vir Maria Magdalena en die dissipels was: Selfs toe Jesus self met haar praat, dink sy eers dis die tuinopsigter. Vers vorm die hoogtepunt van die verhaal. Hier noem Jesus vir Maria Magdalena op haar naam. Dit is ʼn baie persoonlike oomblik. Hy roep haar soos die goeie herder sy skape op hulle naam roep en uit die kraal lei (Joh 10:3). In vers 17 sê Jesus vir haar sy moet Hom nie vashou nie. Hierdie vers is deur die geskiedenis heen deur verskillende kunstenaars uitgebeeld. Hier is ʼn afdruk van Martin Schongauer (c ) se skildery Noli me tangere (dit beteken: Moet My nie vashou nie ). Dit is vandag in die Unterlinden-museum in Colmar, Frankryk ( In hierdie skildery stap Christus met die vlag van oorwinning weg, maar kyk tog vir Maria in haar oë.

2 2 Die kruis is agter die rug. Jesus is op pad na sy Vader toe. Die hemelvaart is op hande (v 17). BA Müller skryf in Woord teen die Lig I/3: Die hele Evangelie van Johannes is gerig op die verhoging, ʼn verhoging wat kruis, opstanding, hemelvaart en die belofte van die Gees in een geweldige bondel saamvat. As die Een wat so verhoog word, sal Hy alle mense na Hom trek (12:32; vgl 3:14; 8:28). So kom die wêreldsending vanuit hierdie omvattende verhoging in sig. Jesus, die Een wat op die punt staan om na sy Vader toe op te vaar, stuur Maria terug na die dissipels toe om hulle in sy triomftog op te neem: Sy Vader is ook hulle Vader, en sy God is ook hulle God. (Dit herinner ons nogal aan Rut.) Jesus bring hiermee vir Maria en die dissipels in beweging vir deelname aan sy triomftog. Jesus se triomftog word ook ons triomftog wanneer ons in Hom glo en Hom bely. Dit gee vir ons krag om teenstand en bedreigings in die oë te kyk. Ons stel voor die verhaal soos Johannes dit beskryf word dramaties vir die kinders oorvertel. Laat die klem op die gedeeltes in direkte rede val (v 16-18). Bybelgedeeltes en hoofgedagtes Bybelgedeelte (lees of vertel) Lees Johannes 20:1-10 Lees Johannes 20:11-16 Lees Johannes 20:17-18 Hoofgedagtes van die ontmoeting 1. Jesus het opgestaan, maar sy volgelinge het nog nie besef wat gebeur het nie. 2. Jesus verras vir Maria Magdalena. 3. Jesus kan nie as mens op aarde vasgehou word nie. Sy volgelinge is kinders van God. Uitkoms 1. Insig: Die opstanding is ʼn onverwagse verrassing. 2. Respons: Neem as kinders van God hier op aarde aan Jesus se triomftog deel. Hulpmiddels by die storie 1. Paneel Prent van Martin Schongauer se skildery. Hulpmiddels vir kleingroepvaslegging Junior kleingroep Bring saam Senior kleingroep Bring saam 1. Kryte of inkleurpotlode. 1. Penne.

3 3 Die storie Begin Wie van julle kan nog die trappe van vernedering op Jesus se lydenspad onthou? Hy is gebore; Hy het gely; Hy is gekruisig; Hy het gesterf; Hy is begrawe, en Hy het ter helle neergedaal. Dit was egter nie die einde van Jesus se verhaal nie, al het sommige mense so gedink. Tot vandag toe is daar mense wat sê dit was die einde van Jesus se lewe. Een van die vroue wat baie lief was vir Jesus het ook gedink dit was die einde. Johannes vertel vir ons wat met haar gebeur het die Sondagoggend nadat Jesus gekruisig en begrawe is. Vir die Jode begin ʼn nuwe dag wanneer die vorige dag eindig, met ander woorde, wanneer die son ondergaan. Goeie Vrydag, die dag waarop Jesus gekruisig is, het geëindig die aand toe hulle Jesus se liggaam begrawe het. Die volgende dag (die tweede dag) noem ons Stil Saterdag. Dit is die dag waarop Jesus in die graf was. In die tyd toe Jesus op aarde was, is Saterdae ook die rusdag, of sabbatdag, genoem. Die sabbatdag eindig ook wanneer die son ondergaan. Dan begin ʼn nuwe dag. Goeie Vrydag was dus die eerste dag, Stil Saterdag die tweede dag, en die Sondag die derde dag. Daardie Sondagoggend vroeg het Maria Magdalena na die graf gegaan. Die ander Evangelies sê daar was ook ander vroue by haar. Johannes vertel egter vir ons net van Maria Magdalena. Kom ons lees haar storie. Hoor Moment 1: Johannes 20:1-10 Jesus het opgestaan, maar sy volgelinge het nog nie besef wat gebeur het nie Ons lees dat Maria Magdalena vir Petrus en die ander dissipel gaan vertel het Jesus se graf is oop. Die ander dissipel was waarskynlik Johannes self, die een wat die verhaal neergeskryf het. Hy wou waarskynlik nie sy naam hier inskryf nie. As iemand Jesus se liggaam weggeneem het, sou hulle die grafdoeke waarin Hy toegedraai was met hulle saamgeneem het. Johannes skryf egter dat die doeke alles daar gelê het. Die doek wat om Jesus se kop gedraai was, was selfs opgerol. Die dissipels het nie verstaan wat gebeur het nie. Hulle het gedink dit is onmoontlik dat iemand uit die dood kon opstaan. Maria Magdalena was baie ontsteld en het gehuil. Sy het gedink iemand het Jesus se liggaam gesteel. Moment 2: Johannes 20:11-16 Jesus verras vir Maria Magdalena Eers sien Maria die engele by die graf, en wanneer Jesus met haar praat, dink sy dit is die tuinier. Sy het immers gedink Jesus is dood. Toe Jesus haar op haar naam noem, verander alles egter. Sy noem Hom dan Leermeester (onderwyser). As ʼn mens die kort sinne lees en net hoor: Maria! en Rabboeni! is dit asof dit in die lug bly hang. Dis amper asof Jesus ook ons naam sê en wag dat ons moet antwoord. Johannes het vroeër in sy Evangelie geskryf dat die goeie herder sy skape op hulle naam roep en hulle lei (Joh 10:3). Dis asof Hy hier vir Maria sê: Kom, ons gaan nou verder! Moenie hier by die graf bly staan nie. Ons kan ons indink hoe bly sy was en hoe styf sy vir Jesus wou vasgryp, maar Jesus was op pad. Wat het Hy vir haar gesê?

4 4 Moment 3: Johannes 20:17-18 Jesus kan nie as mens op aarde vasgehou word nie. Sy volgelinge is kinders van God Jesus is op pad terug na sy Vader toe. Maar eers stuur Hy vir Maria Magdalena met ʼn baie belangrike en blye boodskap na die dissipels toe. Hy noem hulle sy broers en sê sy Vader is ook hulle Vader. Dis die nuwe familiegroep, broers en susters, met God as hulle hemelse Vader en Jesus as hulle Here, maar ook as hulle Broer. Maria is opgewonde wanneer sy vir die ander gaan vertel dat sy die Here Jesus gesien het. Sy vertel ook vir hulle wie hulle werklik is want Jesus self het so gesê. Die nuus het die dissipels baie opgewonde en bly gemaak, maar dit het hulle ook nuwe krag gegee. Dit was soos die begin van ʼn groot optog wat al hoe meer mense sou intrek. As iemand sou vra: Wie is julle? kon hulle antwoord: Kinders van God, broers en susters van die Here Jesus. Dink Elke keer wanneer ons sê ons glo in Jesus Christus wat op die derde dag opgestaan het, is dit asof Jesus ons in ons oë kyk, ons naam sê en verklaar: Ons is op pad! Leef Wanneer ons hartseer is, voel dit partykeer vir ons ons kan nie aangaan met die lewe nie. Dit is dan wanneer die lewende Here Jesus by ons kom staan en ons op ons naam noem. Hy maak ons kinders van sy Vader en dan kry ons nuwe moed! Sê as groep die Apostoliese Geloofsbelydenis saam op.

5 5 Kleingroepvaslegging: Junior groep Welkom Groet elkeen wat inkom op hulle naam. Wegspring Kan julle die Apostoliese Geloofsbelydenis opsê tot by vandag se deel oor Jesus se opstanding? (Sien bl 7 van die werkboek.) Opmerking: Sê dit as groep stadig saam op. Herhaal twee keer. Vra of daar enigiemand is wat dit alleen wil probeer opsê. Werksaam Kyk na die trappe van verhoging in jou werkboek. 1. Teken op die onderste trap die oop graf met die steen wat weggerol is. (Laat die volgende twee trappe eers oop tot met die volgende ontmoeting.) 2. Laat elkeen in die groep hulle naam in die praatwolkies in die werkboek skryf en dit dan versier. As daar meer kinders as wolkies is, teken nog wolkies in. As daar minder kinders as wolkies is, laat hulle familielede of maats se name neerskryf.

6 6 Wegstuur/Huisgeloof 1. Gesels saam oor julle name. Hoe het jy jou naam gekry? Beteken jou naam iets besonders? 2. Maria Magdalena het vir Jesus Rabboeni genoem. Vertel vir mekaar wat julle vir Jesus noem wanneer julle met Hom praat. 3. Lees weer Johannes 20:17. Wie is almal deel van God se huisgesin?

7 7 Kleingroepvaslegging: Senior groep Welkom Groet elkeen wat inkom op hulle naam. Wegspring Kan julle die Apostoliese Geloofsbelydenis opsê tot by vandag se deel oor Jesus se opstanding? (Sien bl 7 van die werkboek.) Opmerking: Sê dit as groep stadig saam op. Herhaal twee keer. Vra of daar enigiemand is wat dit alleen wil probeer opsê. Wonder Dink aan die skildery van Jesus en Maria Magdalena wat jy vandag gesien het. Die skildery se naam is: Moet My nie vashou nie. Dink aan Jesus en Maria se hande wat na mekaar uitgesteek is, aan hulle oë en aan die vlag van oorwinning. Waaraan laat die skildery jou alles dink? Werksaam 1. Kyk na die skets in jou werkboek. Die steen voor Jesus se graf is weggerol. Die stippellyn en pyltjie kring al hoe verder van die oop graf af uit. Met Jesus se opstanding het Hy iets aan die gang gesit. 2. Gesels saam oor wat met Jesus se opstanding begin het en hoe dit vandag voortgaan. 3. Skryf dit in jou eie woorde al in die rondte op die stippellyn. Begin by die oop graf. (Opmerking: Jesus praat met Maria Magdalena en sê vir haar Hy leef. Sy neem die boodskap na die dissipels. Die dissipels vertel dit weer vir ander mense. Só word al hoe meer mense kinders van God. Die boodskap kom ook tot by ons. Ons vertel dit weer vir ander.)

8 8 Wegstuur/Huisgeloof 1. Gesels saam oor julle name. Hoe het jy jou naam gekry? Beteken jou naam iets besonders? 2. Maria Magdalena het vir Jesus Rabboeni genoem. Vertel vir mekaar wat julle vir Jesus noem wanneer julle met Hom praat. 3. Lees weer Johannes 20:17. Wie is almal deel van God se huisgesin?