Word ʼn vriend van Jesus! Ds. Willem Louw: NG Kerk Miederpark Lees: Joh.15:12-17

Transcriptie

1 Word ʼn vriend van Jesus! Ds. Willem Louw: NG Kerk Miederpark Lees: Joh.15:12-17 Het jy ook al die spreukwoord gebruik: Dis nie wie jy is nie. Dis wie jy ken! Hierdie spreukwoord beklemtoon hoe belangrik vriende op die regte plekke is. Ons besef almal: Vriende kan vir jou deure oopmaak! Ek is oortuig daarvan dat elke mens, ʼn voorbeeld sal kan vertel van ʼn geleentheid toe ʼn vriend jou uit die verknorsing gehaal het. Ons praat vandag oor die aktuele onderwerp van vriendskap! Ek het al telkemale gehoor hoe mense sê: Daardie en daardie persoon het ʼn aanstelling by ʼn onderneming of tersiêre inrigting ontvang, omdat hulle iemand binne daardie organisasie geken het wat vir hulle ʼn goeie woordjie gedoen het. Baie mense het al erken, as dit nie vir hierdie vriend of daardie persoon was nie, sou ek nie die werk gekry het nie, of sou my probleme nie opgelos kon word nie, ens. Die punt is, vriende is belangrik. In die Bybel hoor ons kort-kort van vriende. In een spesifieke gelykenis vertel Jesus van ʼn man met wie dit finansieel voorspoedig gegaan het van weë sy hoë pos. Hy het die geld op so ʼn wyse gebruik dat hy nie net homself daarmee verryk het nie, maar ook sy vriende daarmee gehelp het. Daardie vriendskappe kan ons handig te pas kom as hy vorentoe weer probleme optel! Vriende waardeer nie noodwendig altyd die voordeel wat hulle uit ʼn vriendskap ontvang nie. Jesus vertel ʼn gelykenis van ʼn Koning wat ʼn groot banket aanbied vir sy vriende. Hy nooi al sy vriende uit. Dan daag daardie vriende nie een op nie. Die koning gee dan opdrag vir sy amptenare om die strate in te gaan en enige persoon wat voorkom, uit te nooi na die koning se banket. Daardeur dui Jesus aan dat ons binne die kerk kan sit, maar die ewige lewe en al die wonderlike dinge 1

2 wat God aan ons wil bied, kan mis. Ons moet begryp watter voorreg dit is om Koning Jesus se vriende te wees. Elke mens het vriende nodig in die lewe. Jesus sê dat die twee belangrikste beginsels in hierdie lewe is: 1) Om God met jou hele hart lief te hê 2) Om jou vriende lief te hê soos jouself God moedig ons dus aan om goeie vriende vir mekaar te wees! Die eerste stap tot Goeie vriendskap is om te ontdek wat ʼn Goeie Vriend Jesus vir jou is. Hy is bereid om al jou sondes op hom te neem en in jou plek aan die kruis te sterf, sodat jy ʼn nuwe kans kry om in ʼn nuwe liefdesverhouding met God die Vader te lewe (Joh.3:16). Begryp jy die opoffering en prys wat Jesus betaal om jou ʼn beter lewe te gee? In Jesus se eie woorde verduidelik Hy dit so: Joh.15:12-15 Dit is My opdrag: Julle moet mekaar liefhê soos Ek julle liefhet. Niemand het groter liefde as dit nie: dat hy sy lewe vir sy vriende aflê. Julle is my vriende as julle doen wat Ek julle beveel. Ek noem julle nie meer ondergeskiktes nie, want ʼn ondergeskikte weet nie wat sy baas doen nie. Nee Ek noem julle vriende, omdat Ek alles wat Ek van my Vader gehoor het, aan julle bekend gemaak het. Die vraag is of ons werklik vandag nog dink aan Jesus se liefde vir ons? Het ons werklik nog waardering vir sy vriendskap? Is ons lojaal teenoor Jesus? Is ons uitverkoop aan Jesus? Verstaan ons die voordele van Sy vriendskap met ons? Die oomblik wanneer jy Jesus se vriendskap minder belangrik ag en ander mense se verhoudinge as belangriker ag en voorkeur gee aan ander vriende bo Jesus se vriendskap, het jy probleme! Wanneer jy nie uitverkoop aan Jesus leef nie, word dit moeilik om versoekings en sondes te oorwin. Iemand wat nie regtig vir Jesus liefhet nie, kan nie kunsmatig die voordele van sy vriendskap voortsit nie. Jy verbeur die geleentheid om die koning se spreukwoordelike banket by te woon. 2

3 As jy nie Jesus jou nommer een vriend maak nie, sal jy ook nie die behoefte hê om Jesus in volle oorgawe te dien nie, en daarom ook nie Sy Woord ten volle gehoorsaam nie! Jy word ʼn slegte onbetroubare vriend van Jesus. Sulke mense leef ʼn val en opstaan lewe omdat hul oë kort-kort wegdwaal na ander liefdes (versoekings). Maar, as jy Jesus se liefde en genade geproe het en uitverkoop leef vir Hom, dan begin jy ook die werklike voordele van Sy vriendskap op vele terreine van jou lewe ontdek! Boonop verander persoonlike vriendskap met Jesus jou denke, jou geaardheid, jou karakter, jou prioriteite. Kortom, jou lewe gee ʼn wonderlike aroma af wat almal rondom jou bevoordeel! Wat verwag God van jou en my nadat ons Sy liefde geproe het? Die antwoord is in die Bybel gedeelte wat ons gelees het. Joh.15:16-17 Julle het My nie uitgekies nie, maar Ek het julle uitgekies en julle aangestel om uit te gaan en vrugte te dra, vrugte wat sal hou. So sal die Vader aan julle gee wat julle ook al in my Naam vra. Dit beveel Ek julle: Julle moet mekaar liefhê! Die wêreld is vandag sleg en vol boosheid omdat ons lewe nie die liefde van Jesus waardeer en benut nie. Waar liefde is, word haat verdryf Waar liefde soos God dit bedoel het geleef word, verander verhoudinge vanself! Ons het ʼn opdrag om God se liefde in hierdie wêreld prakties en sigbaar te gaan uitleef. Dit moet alle verhoudinge rondom ons beïnvloed. God verwag dat ons midde in hierdie harde lewe, met sy geweld en pyn, nie met dieselfde geweld sal reageer nie. In Kolossense 3 skryf Paulus: Julle het met die ou sondige mens en sy gewoontes gebreek. En leef nou die lewe van die nuwe mens wat al hoe meer vernuwe word na die beeld van sy skepper. Hoe moet ons dan onder mekaar optree? Kol.3:12-14 gee die antwoord: Julle is die uitverkore volk van God wat Hy baie liefhet. Daarom moet julle 1) meelewend, 2) goedgesind, 3) nederig, 4) sagmoedig en 5) verdraagsaam wees. Wees 6) geduldig met mekaar en 7) vergewe mekaar as die een iets teen die ander het. Soos die Here julle vergewe het, moet 3

4 julle mekaar ook vergewe. Bo dit alles moet julle 8) mekaar liefhê. Dit is die band wat julle tot volmaakte eenheid saambind. Bob Phillips sê: Vriendskap is soos ʼn bankrekening. Jy kan nie aanhoudend onttrek sonder om iets te deponeer nie. Die Woord van God wil elke gelowige aanmoedig om as vriend van Jesus uit te reik na ander. Gaan maak vriende! Ons gemeente se jaar-tema is hierdie jaar: vriende sonder grense. Daar is ʼn baie goeie rede waarom ons hierdie jaar tema gekies het. Ons ken die teorie van die Woord, maar ons sukkel in die praktyk. Hierdie is die jaar waarin ons God se liefde oor grense wil neem en nuwe verhoudinge smee. Verhoudinge binne huisgesinne, by die werk, oor kultuurgrense, ens. Verhoudinge wat mense op ʼn punt sal bring waar hulle God se liefde vir hulle begin raaksien en ontdek. Die wêreld is vandag vol geweld en haat. Dit is die gevolg wanneer ons God se opdrag om mekaar lief te hê, ignoreer! Iemand het opgemerk: As dit sleg met mense gaan, vra hulle maklik: Waar is God? Mens ervaar dikwels eers dat God werklik vir jou omgee, deur iemand anders se vriendskap teenoor jou. Dis waar: Mense gee dikwels nie om vir God nie, totdat hulle ʼn ware vriend ontdek wat God liefhet en God se liefde vir hulle ervaar deur hul vriendskap met die besondere vriend of vriendin! Voorbeeld: Iemand staan langs die pad met ʼn stukkende motor. Die persoon is moedeloos en gefrustreerd. Dan stop daar ʼn weldoener wat straal van liefde en hulpvaardigheid en net soos die barmhartige Samaritaan daardie ekstra moeite doen en hierdie gestrande motoris help totdat al sy probleme opgelos is. Wat is die storie wat hierdie motoris na die tyd onthou? Hy onthou dat daar ʼn engel van God by hom stilgehou het. Hoe goed God vir hom was, daar in sy noodsituasie. Skielik begin God weer ʼn werklikheid vir hom word. 4

5 Mary Dawn Hughes sê: God se vingers raak jou lewe aan wanneer jy ʼn vriend aanraak. Godsdiens is nie teorie nie. Jesus vra dat ons God se liefde prakties gaan uitleef in die wêreld. Elke dag is daar mense wat jou en my vriendskap en hulp sal waardeer! Waarom net elke dag dieselfde ou groepie mense help? Waarom nie snap dat elkeen wat hulp nodig het en oor my pad kom, my naaste is nie? Waarom nie vriende sonder grense maak nie? Waarom nie God se liefde met blymoedigheid aan hulle illustreer nie? Ons vind baie stof tot nadenke in Jesus se voorbeeld: Vriende is Betroubaar Elke woord wat Jesus gespreek het, was betroubaar. Maria, Marta en Lasarus was goeie vriende van Jesus. Vriende laat mekaar nie in die steek nie. Marta en Maria het dit beleef toe Lasarus sterf. Jesus het effens later gekom, maar met ʼn goeie doel: Marta en Maria het gesien dat vriende eerlike antwoorde gee. Dat Jesus selfs pyn oor hul lewe toelaat om hulle verhouding met mekaar en met God na ʼn dieper vlak te neem. In die proses het hulle geleer dat ware liefde bereid is om alles op te offer. Jesus het dit gedemonstreer tot aan die kruis. Daar is nog Bybelse voorbeelde van vriende wat aan mekaar trou gebly het ten spyte van moeilike omstandighede: Rut and Naomi illustreer dat vriende bereid is om op te offer ter wille van verhoudinge: Rut 1:16-17 Maar Rut het (Naomi) geantwoord: Moet my tog nie dwing om van u af weg te gaan en om te draai nie, want waar u gaan, sal ek gaan; waar u bly, sal ek bly; u volk is my volk; u God is my God; waar u sterf, sal ek sterf en daar sal ek begrawe word. Ek lê ʼn eed af voor die Here: net die dood sal ons skei. John Seldon sê: ʼn Ou vriend is soos ou skoene: gemaklik! David and Jonatan illustreer dat vriende lojaal bly, al kos dit wat Van die grootste vriendskappe in die Bybel was die van Dawid en Jonatan. Toe Jonatan se vader, koning Saul, vir Dawid so baie gehaat het dat hy hom wou doodmaak, het Jonatan vir Dawid beskerm. 5

6 1Sam.20:30-31 Toe het Saul hom bloedig vererg vir Jonatan en gesê: Jou rebelse ellendeling! Jy verkies mos die seun van Isai tot jou eie skande en tot skande van jou ma wat jou in de wêreld gebring het. Solank die seun van Isai op hierdie aarde leef, sal daar nie plek wees vir jou en jou koningskap nie. Stuur en bring hom na my toe, hy moet dood. Saul was so woedend dat hy met ʼn spies na Jonatan gemik het om hom dood te gooi (vers 33) Ten spyte van die verlies van sy toekomstige koningskap, die verlies van die verhouding met sy vader, en die moontlikheid dat hy sy eie lewe sou verloor, het Jonatan lojaal teenoor Dawid gebly! In Spreuke kry ons die volgende stelling: Spr17:17 Op ʼn vriend se liefde kan jy altyd reken; jou broer is daar met die oog op jou nood. Spr.27:10 Moenie by ʼn vriend wat al jou pa se vriend was, verbygaan na jou broer se huis toe as jy moeilikheid het nie: ʼn buurman wat naby is, is meer werd as ʼn broer wat ver is. Ons lewe so gejaag dat ons baie min tyd maak om verhoudinge te bou. Dit kos opoffering om verhoudinge te bou. God vra vandag vir jou: Het jy my lief soos Ek jou lief het? Kyk jy met die oë van Jesus na die mense rondom jou? Reik jy met die selfde gesindheid wat Jesus teenoor jou het, uit na die mense wat God oor jou pad stuur? Ek wil afsluit met ʼn laaste belangrike gedagte: Vra jouself af: Waarom sou Jesus wou hê dat ons Sy liefde tussen ons vriende moes gaan uitleef, en die vriend van klomp ander mense moet gaan word? Daar is meer as een rede, maar kom ons kyk net na hierdie een belangrike rede: Vriende het groot invloed op mekaar! Die invloed van opregte vriende is geweldig groot. Die Kerk, bereik nie meer die wêreld daar buite nie. 6

7 Die werklikheid is dat mense wat hul rug op God gedraai het nie eers die behoefte het om in ʼn erediens in te stap nie, ongeag die aanbiddingstyl, musiek of prediker! Daar is egter goeie nuus. Vriende kan ʼn impak maak in hul vriende se lewe: Navorsing het gewys dat mense wat lankal hul rug op die Christendom gedraai het, se kans groter is om in Jesus belang te stel as hulle ʼn ware vriend ontdek wat vir hulle opreg liefhet en dan ontdek dat hierdie vriend (of vriendin) uitverkoop is in sy liefde vir Jesus! Meegesleur deur hul vriend se opregte liefde, begin hul saam met hul vriend ook omgee vir die geloofsgemeenskap waar hul vriend aanbid en begin ook later belangstel in die Jesus wat hul vriend liefhet. Kerke en geloofsgemeenskappe kwyn omdat mense nie Jesus meer so lief het, en so uitverkoop aan Hom leef, dat dit afsmeer op hul vriende nie! Egte liefde vir Jesus en mekaar, verander alles: Voorbeeld: Ware vriende verleen hulp wanneer dit in hul vermoë is. Hulle is mekaar goedgesind Spr.3:28 Moenie vir iemand sê: Gaan eers terug en kom môre weer, dan help ek jou, as jy nou reeds kan help nie. Omdat vriende se gewoontes en waardes op mekaar afsmeer, is dit belangrik om jou vriende versigtig te kies. Geen wonder Spr.22:24 sê: Moenie maats maak met ʼn opvlieënde mens nie, moenie saamgaan met een wat kort van draad is nie: dalk leer jy sy maniere aan en beland jy in lewensgevaar. Die invloed van opregte vriende is geweldig groot. Net so groot is die invloed van familielede wat mekaar opreg liefhet. Elkeen het behoefte aan opregte vriende! Daarom het ʼn opregte vriend wat Jesus dien, altyd die kans om sy vriend aan Jesus se liefde bekend te stel. Dis altyd ʼn maklike uitweg om verby iemand te loop. Om saam met iemand te loop vra opoffering en prysgawe van jou eie planne. Is daar iemand naby jou, wat tans ʼn opregte vriend nodig het? Is jy bereid om uit jou gemaksone te gaan en selfs ʼn prys te betaal om iemand te help? 7

8 Is jy ʼn betroubare vriend of vriendin wat werklik omgee? Glo jy dat jou liefde ʼn verskil kan maak? Is daar iemand wat jy sal dra soos Jesus jou dra? Is daar steeds mense teenoor wie jy verbitterd, byterig, krapperig en katterig is omdat jy nie van daardie persoon hou nie? Besef jy dat jou gesindheid uiteindelik die ervaring sal wees wat daardie persoon van Jesus sal oorhou. Dat dit die kloof tussen daardie persoon en God vergroot? Jesus sê in Joh.15: Dit is My opdrag: Julle moet mekaar liefhê soos Ek julle liefhet. Ek het julle uitgekies en julle aangestel om uit te gaan en vrugte te dra... Dit beveel Ek julle: Julle moet mekaar liefhê! AMEN 8